Xtáʼdu̱u̱ iná rí gíʼdoo agiuʼ

Moisés nixtáa 40 tsiguʼ náa xuajen Madián. Ikhí ninigúnʼ ga̱jma̱a̱ nigiʼdiin e̱ji̱n. Mbá mbiʼi rí xtáa rañewu̱u̱n mugu̱ mijngii náa kúbá Sinaí ga̱jma̱a̱ ndiʼyoo mbá rí niʼni maʼga̱ a̱jkiu̱u̱n. Mbá xtáʼdu̱u̱ gíʼdoo agiuʼ, ¡mú, tsékha! Índo̱ Moisés ni̱jkha̱ gáʼyoo ndiéjunʼ erígá, niʼdxaun mbá aʼwá rí nagájnuu náa awúu̱n xtáʼdu̱u̱ iná. Aʼwá niʼthúu̱n: “¡Moisés! Xádxáʼ itháan mijngii. Atrawíi chádaʼ, numuu rí xtiejún náa ku̱ba̱ʼ kaʼwu”. Nindxu̱u̱ Jeobá, najmiuu mbáa angel mú maʼtámíjná ga̱jma̱a̱ Moisés.

Moisés nimíñuu, ikha jngó nirugoo inuu. Aʼwá niʼthúu̱n: “Nda̱yo̱o̱ rí israelitas naguma gíníi wéñuʼ. Mani káwíin náa ñawúunʼ xa̱bu̱ egipcios ga̱jma̱a̱ maʼgá kagui̱i̱n náa mbá ku̱ba̱ʼ mitsaan. Ga̱jma̱a̱ nandoʼ dí ikháánʼ matrawíin xa̱bi̱ʼ náa Egipto”. Lá naku̱ma̱ʼ ikháánʼ rí Moisés niguanúu tsiánguá ráʼ.

Moisés niraxu̱u̱: “Ndiéjunʼ gáthá índo̱ gura̱xi̱ tsáa nikungunʼ rá.” Dios niriʼñuu: “Arathún rí Jeobá, Dios ndrígio̱o̱ Abrahán, Dios ndrígio̱o̱ Isaac ga̱jma̱a̱ Dios ndrígio̱o̱ Jacob nikungunʼ”. Moisés niʼthí: “Xí xuajen rígi̱ tsénimbu̱ún kuyoʼ rá”. Jeobá nisngájma mbá rí maʼni mu maʼnimbo̱o̱ rí maxtáa ga̱jma̱a̱. Niʼthúu̱n rí mati̱ga̱ ixu̱u̱, índo̱ niti̱ga̱, ¡ixu̱u̱ nirtaximínáʼ mbáa a̱bu̱nʼ! Nda̱wa̱á, Moisés nigujtuun tsiyuʼ a̱bu̱nʼ bugi̱, ikhú nirtaximínáʼ ixi̱ mbu̱júu̱. Ikhú Jeobá niʼthúu̱n: “Índo̱ gátane milagro rígi̱, matasnga̱jmá rí ikhúúnʼ nikuʼmáán”.

Mú Moisés niʼthí: “Tsíjmañuʼ gáthá májánʼ náa inún xa̱bu̱”. Jeobá niʼthúu̱n: “Ikhúúnʼ matha̱nʼ rí gárata, ga̱jma̱a̱, makuʼmáa ndxájuaʼ Aarón mambáyaʼ”. Índo̱ Moises ndiʼyoo rí Jeobá gámbáyúu, ikhú nitanga̱a̱ náa Egipto. Ga̱jma̱a̱ ni̱jkha̱ kayáa a̱ʼgiu̱u̱ gajmíi̱n e̱ji̱n.