Gedeón naʼngo̱o̱ naʼni gámbíin madianitas

Ninújngoo mbiʼi, bi̱ israelitas mbu̱júu̱ niniñaaʼ Jeobá ga̱jma̱a̱ nigi̱ʼdi̱i̱ ndiyamajkhún dioses bi̱ ragájkhun. Mbá juwan tsiguʼ, xa̱bu̱ Madián nuni kuʼwíinʼ xujkiún israelitas ga̱jma̱a̱ nuni gámbáa dí nudu. Mu nda̱a̱ dí gaguaʼnii, bi̱ israelitas nurkaʼumijná náa tsíñu ga̱jma̱a̱ náa kúbá. Nda̱wa̱á, nitakháñii Jeobá rí maʼni káwíin. Ikha jngó Jeobá nikunguanʼ mbáa ángel mu maʼthúu̱n mbáa dxámá bi̱ nigumbiʼyuu Gedeón: “Jeobá niraʼwíín ikháánʼ mú manindxa̱ʼ mbáa xa̱bu̱ bi̱ gíʼdoo tsiakii mu maxmínaʼ”. Gedeón niraxu̱u̱: “Xú káʼnii ganikríyaʼ Israel ikhúúnʼ dí ni̱ndxu̱ʼ mbáa xa̱bu̱ bi̱ ragíʼdoo numuu rá.”

Gedeón nindoo mbaʼyoo májánʼ á mu Jeobá ndiyáaʼ, ikha jngó, dí niʼni xáʼ. Nigíʼ mbá chíʼgíʼ mugu̱ mbayííʼ ga̱jma̱a̱ niʼthúu̱n Jeobá: “Á mu miʼcha̱ gajtsi, mugu̱ rígi̱ nimajan, mú mbayííʼ mixooʼ, xúʼko̱ gáyóo rí ikhúúnʼ ni̱ndxu̱ʼ xa̱bu̱ bi̱ nitraʼwíí maʼnikríyaaʼ Israel”. Imbo̱ʼ mbiʼi, ndiʼyoo rí mugu̱ phú xtiʼtiʼ, mú mbayííʼ mixooʼ. Ikhú, Gedeón nindo̱ʼo̱o̱ Jeobá maʼni rí imbo̱o̱ mbiʼi mugu̱ xámajan, i̱ndó ku̱ba̱ʼ mamajan. Rí nindo̱ʼo̱o̱ Gedeón mbu̱júu̱ niʼnimbánuu. Xúgi̱ dí Gedeón ni̱jkha̱nú ndiʼyoo rí Jeobá ndiyáaʼ. Ikha jngó nigímbíin soldados ndrígóo mú maʼgá gaxmijna gajmíi̱n xa̱bu̱ madianitas.

Jeobá niʼthúu̱n Gedeón: “Mambáñun israelitas mú maʼngu̱u̱n. Mú numuu rí ni̱ndxu̱ún mbaʼin wéñuʼ soldados, makumún rí ikhiin ndajkuíín niʼngu̱u̱n. Arathún rí bi̱ namíñun matangi̱i̱n náa guʼwún”. Ikha jngó mbá 22,000 xa̱bekha nigúun, ga̱jma̱a̱ mbá 10,000 niguanún. Nda̱wa̱á Jeobá niʼthúu̱n: “Xóó mbaʼin wéñuʼ. Ayuʼ xtiin náa mata ga̱jma̱a̱ arathún rí muwa̱a̱n iyaʼ. I̱ndó aguanáʼ gajmiáanʼ bi̱ gúwáan iyaʼ ma̱ngaa kuwa xawii mu mbuyáá rí xáʼkha̱ xa̱bu̱ sia̱nʼ”. I̱ndó 300 xa̱bekha nikuwa xawii índo̱ kuwa raʼwa̱a̱n iyaʼ. Jeobá nikudaminaʼ rí nguéjmi̱i̱n xa̱bu̱ buʼko̱ maʼngu̱u̱n muni gajmiún bi̱ mbá 135,000 soldados madianitas.

Mbruʼun rúʼko̱ Jeobá niʼthúu̱n Gedeón: “Ni̱jkha̱nú mbiʼi rí muxmíjná gajmiúlú madianitas”. Gedeón nixnúún xa̱bi̱i̱ chi̱ji̱ʼ ga̱jma̱a̱ rayaʼ ga̱jma̱a̱ mbá antorcha awúu̱n, ga̱jma̱a̱ niʼthún: “Guyoʼ ga̱jma̱a̱ guni ikháá má xóo eni ikhúúnʼ”. Gedeón nindiyuu chi̱ji̱ʼ ndrígóo, nixpíʼtha rayaʼ ndrígóo, niʼbajngaa antorcha ndrígóo ga̱jma̱a̱ niʼthí gakhi̱i̱: “¡Espada ndrígóo Jeobá ga̱jma̱a̱ Gedeón!”. Bi̱ 300 xa̱bekha nini ikháá má. Madianitas nimiñun wéñuʼ ga̱jma̱a̱ nigáñun asndu náa. Numuu rí mbá níjkuáa náa nigún ragañun ikha jngó nigi̱ʼdi̱i̱ nixmijná kanikhiin. Jeobá nimbáñun mbu̱júu̱ israelitas mu maʼngu̱u̱n muni gajmiún xa̱bu̱ sia̱nʼ.