Juan naʼniratoo kambo̱o̱ Jesús

Juan ninindxu̱u̱ a̱ʼdióo Zacarías ga̱jma̱a̱ Elisabet. Jeobá nigíʼ xóo gaʼyee ga̱jma̱a̱ nijmiuu mu maʼthúún xa̱bu̱ rí Mesías inuu má ma̱ʼkha̱. Mú ikhaa táʼtaraʼa náa xuajen ga̱jma̱a̱ náa sinagogas, ikhaa niʼtáraʼa náa ku̱ba̱ʼ mixooʼ. Mbaʼin xa̱bu̱ bi̱ kuwa náa Jerusalén ga̱jma̱a̱ náa Judea nagún gudxawíín rí naʼthí Juan. Ikhaa naʼthúún rí gíʼmaa muniñaʼ runi dí ra̱májánʼ mu maʼdxuu Dios, xóo muʼthá, mu Dios maxtáa gagi gajmíi̱n. Ikha jngó, mbaʼin nitangi̱i̱n náa dí ra̱májánʼ rí kuwa runi, ga̱jma̱a̱ Juan nikumíínʼ iyááʼ náa mañu Jordán.

Juan nda̱a̱ rí nigiʼdoo. Xtíñuu nindxu̱u̱ xtátsiu̱u̱n camello ga̱jma̱a̱ naʼkhu̱u̱n tsíʼbu ga̱jma̱a̱ yááʼ xáná. Xa̱bu̱ nandún mbuyáá itháan ga̱jma̱a̱ numuu ikhaa. Asndu fariseos ga̱jma̱a̱ saduceos bi̱ nuni mbaʼumíjna̱ nigún gúyáá. Ikhú Juan niʼthún: “Gíʼmaa matangáanʼ ga̱jma̱a̱ muriʼkhumijná. Nakumala rí kuáʼdáá wéñuʼ numala numuu rí nindxa̱la e̱ji̱i̱n Abrahán, mú raʼkháa rígi̱ eyoo gáʼthúu̱n rí nindxa̱la e̱ji̱i̱n Dios”.

Mbaʼin xa̱bu̱ nuraxi̱i̱ Juan: “Ndiéjunʼ gáʼyóóʼ muʼni mu Dios maʼdxuu rá.” Ikhaa nariʼñún: “Á mu kuaʼdáá a̱jma̱ xtíñála, guxna̱a̱ mbóʼ mbáa bi̱ ndayóoʼ”. Lá natayáá náa numuu eʼthúún xúʼko̱ xáʼ. Numuu rí Juan nindoo rí ikhiin mbuyáá rí á mu nandún muni rí naniguʼ Dios gíʼmaa maʼndún kuñún xa̱bu̱.

Ma̱ngaa niʼthún bi̱ nuruma mbújkha̱a̱: “Xúni̱ kuʼwáʼ ga̱jma̱a̱ xúni̱ nduwaʼ nimbáa”. Ga̱jma̱a̱ soldados niʼthún: “Xúni̱ nduwaʼ ní xundrigú tsigijñaʼ”.

Ndxajkun ga̱jma̱a̱ levitas mangiin nigún gúyáá Juan ga̱jma̱a̱ nitháán: “Xúgínʼ xa̱bu̱ nandún mbuyáá tsáa ni̱ndxa̱ʼ”. Juan niʼthí: “Ni̱ndxu̱ʼ mbá aʼwá náa ku̱ba̱ʼ mixooʼ bi̱ naxnún ikha xa̱bu̱ mu muniʼniiʼ Jeobá, xó má niʼthí gaʼyee Isaías”.

Xa̱bu̱ ninigu̱nʼ wéñuʼ rí Juan niʼsngáa, ga̱jma̱a̱ mbaʼin nindúún mbuyáá á mu ikhaa nindxu̱u̱ Mesías. Ikha jngó Juan niʼthún: “Mbáa bi̱ gíʼdoo itháan tsiakii ma̱ʼkha̱ nacha̱. Asndu na̱nguá kaʼyoʼ marajkhúʼ chádoo. Ikhúúnʼ nakumíínʼ iyááʼ xa̱bu̱, mú ikhaa maʼni ga̱jma̱a̱ xi̱ʼ kaʼwu”.