KÍXNUU 53
Gíʼmaa manigu̱u̱ʼ Jeobá rí xóo natani gagiminaʼ
Jeobá nindxu̱u̱ mbáa “Dios gagi” (1 Timoteo 1:11). Ikhaa nandoo rí makuwáanʼ gagi má xúʼko̱ náa xúgíʼ mbiʼi rí kuwáánʼ. Ra̱ʼkhá tháán edxuu ikhaa rí muniʼñálu mbáxngaa ñajunʼ ga̱jma̱a̱ muríyálú mbiʼi mbuʼyáaxuluʼ. Ikha jngóo náa kíxnuu rígi̱, mbuʼyáá tikhu xóo gándoo majmuluʼ májánʼ mbiʼi ndrígúlú índo̱ nda̱a̱ rí e̱ʼni̱, ga̱jma̱a̱ rí manigu̱u̱ʼ Jeobá dí gúʼni.
1. Ndiéjunʼ gíʼmaa mbuʼyáá índo̱ guraʼwíí rí guʼni gagimijná ga̱jma̱a̱ rá.
Ndiéjunʼ enigua̱ʼ matani mu maʼni̱i̱ a̱jkia̱a̱nʼ ikháán rá. Tikhun nandún maguanún náa guʼwún muraxnuu libro, mudxawíín ajmúú, mbuyáá mbá película o matu̱ʼu̱u̱n náa internet. Eʼwíinʼ nanigu̱u̱nʼ makuwíin gajmiún migiún xóo magún pasia o mutsíin. Asndu ndiéjunʼ má rí gúʼnilú, mu gíʼdoo wéñuʼ numuu mbuʼyáá rí nuraʼwíí muʼnilú “manigu̱u̱ʼ Tátá” (Efesios 5:10). Gíʼdoo wéñuuʼ numuu rí mbuʼyáálú rígi̱. Náa numuu rá. Numuu dí mbaʼa rí nuni gagimijná ga̱jma̱a̱ xa̱bu̱ tikhu rí ikhaa nindxu̱u̱ dí tsénigu̱u̱ʼ Jeobá xóo náa rí nagiʼdu̱u̱n xkawiʼ kayuuʼ, náa nubúúnʼ xa̱bu̱ o rí kaʼyoo náa xáwáán (atraxnuu Salmo 11:5). Ndiéjunʼ gambáyuluʼ dí muraʼwíí májánʼ rí muʼnilú rá.
Á mu nuraʼwíin májánʼ bi̱ mambáxulu gajmiúlú bi̱ nandún kuyáá Jeobá, ikhiin mumbayulúʼ mu xúʼko̱ mangáanʼ muraʼwíí májánʼ rí muʼtsíin ga̱jma̱a̱. Xóo nijmañulúʼ náa kíxnuu 48, “bi̱ najngrui̱go̱o̱ gajmíi̱n bi̱ najmañún ma̱ngaa majmañuu”. Ma̱ngaa ndiʼyáálu bi̱ nambájxu̱u̱ gajmíi̱n xa̱bu̱ bi̱ tséyamajkuíí xtángoo ndrígóo Jeobá “magíʼnuu dí ra̱májánʼ” (Proverbios 13:20).
2. Ndíjkha rí gíʼdoo numuu mbuʼyáá nguáthá hora gájyulúʼ náa nuʼni gagimijná rá.
Maski ajndu xóo nuʼni gagimijná nindxu̱u̱ májánʼ, mú gíʼmaa muñewa̱a̱n rí xájyulú wéñuʼ. Á mu tséñawa̱a̱n xóo eʼni, mbaʼyulú mbiʼi mu muʼnilú ñajunʼ rí itháán gíʼdoo numuu, ikha jngóo náa Biblia naʼtulúʼ “gajmalaʼ májánʼ mbiʼi rí naguanúu” (atraxnuu Efesios 5:15, 16).
GAJMAÑAAʼ ITHÁAN
Guʼyáá ndiéjunʼ gándoo matani ikháán mu matraʼwíí májánʼ dí matani gagiminaʼ ga̱jma̱a̱.
3. Atatsíñánʼ gitsíin rí maʼni gachíín
Ndíjkha gíʼmaa muraʼwíí májánʼ rí muʼni gagimijná ga̱jma̱a̱ rá. Gu̱ya̱a̱ VIDEO ga̱jma̱a̱ gutamíjnála rígi̱:
Xú káʼnii mbríguii gitsíin dí nirígá náa Roma nákha wajyúúʼ ga̱jma̱a̱ tikhu gitsíin dí rígá mbiʼi xúgi̱ rá.
Xó má ni̱ʼkha̱ náa video, ndiéjunʼ nijmañuu Danny ga̱jma̱a̱ numuu gitsíin rá.
Guraxnuu Romanos 12:9 ga̱jma̱a̱ gutamíjnála rígi̱:
Xú káʼnii embáyulú texto rígi̱ mu muraʼwíí májánʼ rí muʼni gagimijná ga̱jma̱a̱ rá.
Ndiéjunʼ nindxu̱u̱ tikhu rí Jeobá tsénigu̱ʼ rá. Guraxnuu Proverbios 6:16, 17 ma̱ngaa Gálatas 5:19-21. Nda̱wa̱á rí niraxnuu texto, gutamíjnála rígi̱:
Xó má ni̱ʼkha̱ raʼthí náa texto rígi̱, ndiéjunʼ gitsíin rí itháán najmaʼnuuʼ rí mbiʼi xúgi̱ rá.
Xóo gúraʼwíí májánʼ rí muʼni gagimijná ga̱jma̱a̱
Atraxi̱mínáʼ:
Ndiéjunʼ e̱ʼkha̱ rá. Lá na̱ʼkha̱ rí Jeobá nawiyuuʼ kaʼyoo ráʼ.
Nguáná rá. Lá narígú káʼyúʼ mbiʼi mani ñajunʼ rí itháán gíʼdoo numuu ráʼ.
Tsíin gajmíʼ rá. Lá maxtáá itháan mbayuuʼ gajmíʼ xa̱bu̱ bi̱ na̱nguá eñún kuyáá Jeobá ráʼ.
Mu, xágíʼnulú rígi̱ ndayóoʼ rí muñewamíjna̱ wéñuuʼ, ikha jngóo gíʼmaa dí muʼni tsíngumíjnálú náa xúgíʼ rí gamíi dí maʼni gacháánʼlú.
4. Gajmaaʼ májánʼ mbiʼi
Gu̱ya̱a̱ VIDEO ga̱jma̱a̱ gutamíjnála rígi̱:
Ndxájulú bi̱ ni̱ʼkha̱ náa video nda̱a̱ má dí raʼkhí eʼni, mu ndiéjunʼ egíʼnuu índo̱ tséjmuu májánʼ mbiʼi ndrígóo rá.
Guraxnuu Filipenses 1:10 ga̱jma̱a̱ gutamíjnála rígi̱:
Xú káʼnii embáyulú versículo rígi̱ mu mbuʼyáá nguáthá mbayuuʼ gájyulúʼ índo̱ gúʼtsíin rá.
5. Atraʼwíí mbá gitsíin rí májánʼ mu matani gagiminaʼ ga̱jma̱a̱
Gajkhun má rí Jeobá tsínigu̱ʼ tikhu gitsíin, mu rígá tikhu rí ma̱ndoo muʼni gagimíjna̱ ga̱jma̱a̱. Guraxnuu Eclesiastés 8:15 ma̱ngaa Filipenses 4:8 ga̱jma̱a̱ gutamíjnála rígi̱:
Ndiéjunʼ gitsíin rí májánʼ nanigua̱a̱ʼ ikháán rá.
Ma̱ndoo muʼni gagimijnálú xó má kaʼyoo.
RÍ NUTHI TIKHUN: “Na̱nguá má mbiiʼ rí ma̱ta̱ya̱a̱ náa nuni xawan, náa nagiʼdu̱u̱n xkawiiʼ káyuuʼ, náa nubúúnʼ xa̱bu̱. ¡Mbi̱i̱ʼ á mu rí matani!”.
Ndiéjunʼ rathá ikháán rá.
RÍ NAGÁJNURIYO̱O̱ʼ
Jeobá nandoo muraʼwíí mbá gitsíin májánʼ ga̱jma̱a̱ rí manigulúʼ.
Rí nijmañaaʼ
Ndiéjunʼ gitsíin rí tséʼni gagimijnálú ga̱jma̱a̱ bi̱ ni̱ndxu̱lú cristianos rá.
Ndíjkha gíʼmaa muñewa̱a̱n májánʼ nguáthá mbayuuʼ gájyulúʼ índo̱ gúʼtsíin rá.
Lá nandaaʼ matani gagiminaʼ ga̱jma̱a̱ rí nanigu̱u̱ʼ Jeobá ráʼ. Náá numuu rá.
ATAYÁÁ ITHÁAN
Atayáá tsáá kaʼyoo maraʼwíí rí nuʼni gagimijnálú ga̱jma̱a̱.
Atraxnuu mu ma̱ta̱ya̱a̱ xú káʼnii gátraʼwíí gitsíin májánʼ ma̱ngaa dí matani gagiminaʼ ga̱jma̱a̱.
“Lá májánʼ xóo nuʼni gagimijná ráʼ.” (Bi̱ Nayejngoo, 15 ñajunʼ gu̱nʼ octubre tsiguʼ 2011)
Atraxnuu historia ndrígóo xa̱bu̱ mu ma̱ta̱ya̱a̱ ndiéjunʼ nimbáyúu maniñuuʼ rí niʼni gagiminaʼ ga̱jma̱a̱, náa naʼthí: “Nánguá niguiyuʼ kañuun eʼwíinʼ”.
“Biblia niriʼkhuu xóo makuwá” (Bi̱ Nayejngoo, 1 ñajunʼ gu̱nʼ febrero tsiguʼ 2010)
Atayáá xú káʼnii niraʼwíí maʼni mbáa a̱ʼgu̱ ga̱jma̱a̱ tikhu video rí kagujtuminaʼ náa xa̱bu̱ wéñiʼ.