Rí nijmañaaʼ náa níʼkhóo 1

Ndiéjunʼ rí itháán nanigua̱a̱ʼ dí marigá nda̱wa̱á rí naʼthí náa Biblia rá. Náá numuu rá.

Náá numuu ku̱ma̱a̱ʼ ikháán dí Biblia nindxu̱u̱ Ajngá rawuunʼ Dios rá.

Ndíjkha rí gíʼdoo numuu majmaaʼ mbiʼyuu Dios rá.

Náa Biblia naʼthí rí náa Dios “na̱ʼkha̱ rí nandoo nduʼya” (Salmo 36:9). Lá natatsimbaaʼ ikháán rígi̱ ráʼ.

Guraxnuu Proverbios 3:​32.

• Náá numuu rí Jeobá nindxu̱u̱ bi̱ itháán májáanʼ bi̱ ma̱ndoo mambáxulu gajmiúlú rá.

• Ndiéjunʼ gíʼthu̱u̱n Jeobá náa bi̱ nambájxu̱u̱ gajmíi̱nʼ rá. Lá nakuma̱a̱ʼ ikháán dí gajkhun nindxu̱u̱ rúʼko̱ ráʼ.

  (Atayáá náa kíxnuu 07 ga̱jma̱a̱ 08).

Guraxnuu Salmo 62:8.

• Ndiéjunʼ dí niratakáñii má Jeobá rá. Ndiéjunʼ rí xóó ma̱ndoo maratakháñii xá.

• Xú káʼnii eriʼña̱a̱ Jeobá dí nuʼtajkháan rá.

  (Atayáá náa kíxnuu 09).

Guraxnuu Hebreos 10:​24, 25.

• Náá numuu rí májánʼ mi̱dxu̱ʼ reunión ndrígu̱ún testigos de Jeobá rá.

• Lá naku̱ma̱a̱ʼ rí magiʼdoo numuu á mu nadxuʼ reunión rúʼko̱ rá.

  (Atayáá náa kíxnuu 10).

Náá numuu rí májánʼ nindxu̱u̱ dí matraxnuu Biblia tsejtsí mbiʼi rá. Ndiéjunʼ programa ejmaa ikháán mu matraxnuu xúgíʼ mbiʼi rá.

Ndiéjunʼ rí itháán ninigua̱a̱ʼ rí nitanigajmaa asndu xúgi̱ náa libro rígi̱ rá.

Asndu nákha nitagíʼdi̱i̱ nitanigajmaa̱ Biblia, nitraʼníí xkujndu ráʼ. Ndiéjunʼ nindxu̱u̱ rá. Ndiéjunʼ gámbáyaaʼ mu xakanájkaaʼ rá.