RÍ KAYÁ EDXU̱U̱ NÁA INUU I̱YI̱I̱ʼ | LÁ MANIGUA̱ʼ MATANIGAJMAA BIBLIA RÁʼ.

Mbá curso ndrígóo biblia rí makhánun xúgínʼ xa̱bu̱

Bi̱ ni̱ndxu̱lú xa̱bi̱i̱ Jeobá najmaʼnáanʼ numuu rí nutaraʼa. Mú, lá natayáá rí ma̱ngaa numbáñunxu xa̱bu̱ náa xúgíʼ numbaaʼ mu makru̱ʼu̱u̱n rí naʼthí Biblia ráʼ.

Mbáa xa̱bu̱ xtáa raʼnigajma̱a̱ Biblia náa nañajunʼ

Nákha tsiguʼ 2014, itháan rí 8,000,000 bi̱ nutaraʼa numuu Jeobá nusngúún itháan maʼni 9,500,000 xa̱bu̱ ga̱jma̱a̱ numuu Biblia mámbá gu̱nʼ náa mbá 240 xuajen mba̱ʼu̱ ga̱jma̱a̱ territorios.a Mbaʼin wéñuʼ xa̱bu̱ nunigajmaa Biblia ga̱jma̱á ni̱ndxu̱xu. Á mu nugímbíin xúgínʼ maʼni itháan mbaʼin xa̱bu̱ ki xóo bi̱ kuwa náa mbá 140 xuajen mba̱ʼu̱.

Mú ma̱ndoo magumambánii rí majuiʼsngúún mbaʼin wéñuʼ xa̱bu̱, nurawíixuʼ mámbá tsiguʼ itháan maʼni 1,500 millón i̱yi̱i̱ʼ xó má Biblia, libros, revistas ga̱jma̱a̱ mbaʼa folletos náa mbá 700 ajngáa. Náa ñajunʼ rígi̱ naʼni rí xa̱bu̱ bi̱ nandoo maʼnigajmaa Biblia ma̱ndoo maʼni náa ajngáa rí nandoo ikhaa.

“Tániguʼ kayuʼ rí manigajmaa, mú rí xúgi̱ niniguʼ wéñuʼ. Rí nijmañuʼ ra̱ʼkhá tháán nimbáyuʼ.” (Katlego, Sudáfrica)

“Curso niriʼña̱a̱ xúgíʼ graxe̱ rí gúʼdoo, ga̱jma̱a̱ ra̱ʼkhá tháán mbaʼa rí nijmañuʼ.” (Berta, México)

“Nunigajmaaxu náa goʼwóoʼ ga̱jma̱a̱ náa hora eyoʼ ikhúúnʼ. ¡Nda̱a̱ imbo̱o̱ rí manda̱ʼa̱!” (Eziquiel, Brasil)

“Nunigajmaaxu quince minutos asndu media hora; nguáná asndu itháan. Ikhúúnʼ etha nguáthá mba̱yu̱ʼ gáʼni.” (Viniana, Australia)

“¡Tsíyóóʼ gánimboʼ rí tsextuma rí musngáa!” (Aimé, Benín)

“Bi̱ naʼsngóoʼ naʼngo̱o̱ wéñuʼ a̱jkiu̱u̱n ga̱jma̱a̱ májánʼ a̱jkiu̱u̱n. Nimbáxuʼ májánʼ ga̱jmu̱ʼ.” (Karen, Irlanda del Norte)

“Mbaʼin xa̱bu̱ nunigajmaa Biblia mú tsénindxu̱ún Testigos.” (Denton, Inglaterra)

GRAXE̱ RÍ NAGUMA GA̱JMA̱A̱ NUMUU CURSO

Xú káʼnii ni̱ndxu̱u̱ curso rúʼko̱ rá.

Ikhí najuiʼsngáa rí naʼthí náa Biblia numuu mbaʼa temas. Mbá xkri̱da, náa Biblia naʼthí tsáa ñajunʼ Dios, xú káʼnii ni̱ndxu̱u̱, xú káʼnii mbiʼyuu, náa xtáa ga̱jma̱a̱ á mu ma̱ndoo mambaxúu gajmiúlú. Bi̱ nunigajmaa najuiʼsngúún náa gándoo guxkamaa náa Biblia rí nariʼña̱a̱ graxe̱ rígi̱.

Mu mumbáñuun xa̱bu̱ maxtiʼña̱a̱ graxe̱ ndrígu̱ún, najmulú libro¿Qué enseña realmente la Biblia?b Libro rígi̱ niguma mu mambáñun xa̱bu̱ makru̱ʼu̱u̱n rí naʼthí náa Biblia. Na̱ʼkha̱ capítulos rí naʼthí ga̱jma̱a̱ numuu Dios, ga̱jma̱a̱ numuu Jesucristo, náa numuu rí numíniʼ, rí nakháñulú, ga̱jma̱a̱ numuu rí muʼtájkáan ma̱ngaa na̱ʼkha̱ i̱ʼwáʼ tema.

Náa minaʼ ga̱jma̱a̱ náa mbiʼi gíʼsngáaʼ rá.

Ikháánʼ gárata náa minaʼ ga̱jma̱a̱ náa mbiʼi gíʼsngáaʼ.

Nguáthá mba̱yu̱ʼ ejyúuʼ mámbá curso rá.

Á mu ikháánʼ rakáʼniiʼ matanigajmaa xúʼko̱ káʼnii, ma̱ndoo miʼsngáaʼ mbiʼi rí naguapáán ikháanʼ. Mbaʼin xa̱bu̱ nuraʼwíí munigajmaa mbá hora mbá xmáná. Mú, tikhun nunigajmaa i̱ndó gu̱wa̱ʼ o gu̱wa̱ʼ nítsu minutos.

Lá mbaʼyóoʼ matani numáá ráʼ.

Na̱nguá. Rí miʼsngáaʼ ga̱jma̱a̱ i̱yi̱i̱ʼ rí matanigajmaa tsextángu̱jua̱. Ikha jngó, Jesús niʼthún discípulos ndrígóo: “Ri nijanaʼla, guxna manganʼla” (Mateo 10:8).

Nguáthá mba̱yu̱ʼ ejyúuʼ curso rá.

Asndu nguáthá mba̱yu̱ʼ má eyaʼ ikháánʼ. Libro ¿Qué enseña realmente la Biblia? gíʼdoo 19 capítulos. Ma̱ndoo matanigajmaa xúgíʼ capítulos xó má eyaʼ ikháánʼ.

Lá mbaʼyóoʼ manindxa̱ʼ mbáa bi̱ naʼtáraʼa numuu Jeobá ráʼ.

Na̱nguá. Ikháanʼxu nduyamajkuíí rí nandoo maʼni mámbáa xa̱bu̱ o maraʼwíí náa eyoo maʼnimbo̱o̱. Mú, rí ma̱ta̱ya̱a̱ rí naʼthí náa Biblia mambáyaʼ matraʼwíí májánʼ rí matani.

Náa gándoo gátaxkamaa itháan ga̱jma̱a̱ numuu rígi̱ rá.

Náa ináa ndrígóo Internet jw.org/jw-tln mataxkamaa información rí ñajunʼ gajkhun ga̱jma̱a̱ rí nakumuxu ma̱ngaa rí nunixu.

Xú káʼnii gándoo gánda̱ʼa̱ rí miʼsngóoʼ rá.

Ma̱ndoo matanda̱ʼa̱ mbá curso náa formulario rí mataxkamaa náa ináa jw.org/jw-tln.
Ma̱ngaa ma̱ndoo mataniraʼmáʼ mbá dirección rí na̱ʼkha̱ náa ináa 2.
Imbo̱o̱ rí ma̱ndoo matani aratáruʼun bi̱ nutaraʼa numuu Jeobá bi̱ kuwa náa xtaa.

a Mbaʼin xa̱bu̱ najuiʼsngúún náa mbá grupo.

b Rí nini bi̱ nutaraʼa numuu Jeobá. Libro rígi̱ nigájnuu itháan rí 230 millón náa itháan rí 260 ajngáa ga̱jma̱a̱ gíʼdoo 224 ináa.

RÍ MAMBÁÑUN BI̱ KUWA MBÁ GUʼWÍIN

“Índo̱ a̱ʼgiu̱ʼ nigíʼdu̱u̱ niʼnigajmaa Biblia, ndi̱yo̱o̱ rí niriʼkuminaʼ wéñuʼ. Xúgíʼ nixtiʼkhuu náa guʼwúxu. Nindoʼ mba̱yo̱o̱ náa numuu ga̱jma̱a̱ ikhú nigíʼdu̱u̱ ninigajmaa. Rí nijmañuʼ niʼni rí mani̱ndxu̱ʼ itháan májánʼ xa̱bu̱. Índo̱ ninigajmaaxu Biblia niʼni mambaxúxu itháan májánʼ náa goʼwóoʼ.” (Eziquiel)

“Nda̱wa̱á rí nigíʼdu̱u̱ ninigajmaa Biblia, niniʼñúʼ drogas, iya najnga̱a̱ ga̱jma̱a̱ nijmañuʼ maxpríguminaʼ índo̱ nakiʼnún. Rí xúgi̱ goʼwóoʼ itháan mikaʼwu ga̱jma̱a̱ xúgíʼ kixtanguxi̱i̱ májánʼ. Nandoʼ ka̱ñu̱u̱n itháan bi̱ kuwa náa goʼwóoʼ ga̱jma̱a̱ naniguʼ wéñuʼ mambáñun. Xtáá itháan gagi ki xóo nákha ginii.” (Karen)

“Mbaʼin nitanumuʼ rí xtáá ranigajmaa Biblia. Mú ajmbioʼ nimbáyuʼ. Niʼthúunʼ: ‹Tsixmiéjunʼ rí gúthi xa̱bu̱. Rí naxmiéjunʼ rí xtaa májánʼ xúgi̱. Atani má xóo tani›. Nimbá miʼtsú tákuwáanʼ tsímáá wéñuʼ mbá guʼwáanʼ.” (Viniana)