Rí phú itháan ndayúlú mu muʼsngáa
1. Náa numuu rí nambánii cristianos gajmiún albañiles rá.
1 Bi̱ ni̱ndxu̱ún albañil guáʼdáá mbaʼa herramienta rí najmún náa nuñajunʼ. Tikhuu i̱ndó najmún náa ndayóoʼ ga̱jma̱a̱ i̱ʼwáʼ najmún tsejtsi. Albañiles bi̱ najmañún itháan májánʼ nuyegun má xúʼko̱ rí itháan najmún, rí najmañún majmúún itháan. Náa Escrituras naʼthúlúʼ rí muʼni tsiakimijna náa nuʼtáraʼa. Gíʼmaa rí mámbáa Testigo mani̱ndxu̱u̱ mbáa bi̱ “nañajunʼ mejanʼ setiyuʼ numu ñajunʼ ri naʼni” (2 Tim. 2:15). Náa biʼyaa rí itháan gíʼdoo numuu rí najmulú náa nuʼtáraʼa rá. Ikhaa nindxu̱u̱ Biblia, rí najmulú mu muʼsngúún xa̱bu̱ (Mat. 28:19, 20). Ikha jngó, gíʼmaa muʼni tsiakimijna mu muʼsngáa “jmbu xu pu-guiʼma ri ajŋgo Dios ri ica ñajunʼ ŋacun”. Mú, xúgiáanʼ bi̱ nuʼtáraʼa gíʼmaa majmañulúʼ majmulúʼ májánʼ i̱ʼwáʼ rí kuaʼdáá mu muʼsngúún eʼwíínʼ rí gajkhun (Prov. 22:29).
2. Náa guaʼyaa rí ndayóoʼ majmulúʼ mu muʼsngáa rá.
2 Rí ndayóoʼ majmulúʼ mu muʼsngáa. Raʼkháa i̱ndó Biblia kuaʼdáá, rígá i̱ʼwáʼ i̱yi̱i̱ʼ. Xó má libro Ndiéjunʼ phú eʼsngáa náa Biblia rá. Ikhaa rí itháan najmulú mu muʼsngáa ga̱jma̱a̱ numuu Biblia. Índo̱ naguámbulúʼ ruʼnigajmaa gajmiúlú bi̱ nuʼsngáá, najmulú libro “Manténganse en el amor de Dios” mu majmañuu maxtáa xó má e̱ʼkha̱ raʼthí náa ikha rí na̱ʼkha̱ náa Biblia. Ikha jngó, gíʼmaa muniʼnuʼ májánʼ ga̱jma̱a̱ majmañulúʼ majmulúʼ májánʼ nájma̱ libro rígi̱. Mbáa ma̱ngaa kuaʼdáá tikhuu folleto. Mbá xkri̱da, Ajngáa rí májánʼ na̱ʼkha̱ náa Dios nambáyulúʼ mu mugíʼdi̱i̱ muʼsngáa ga̱jma̱a̱ numuu Biblia. Á mu náa nuʼtáraʼa nuxkamin xa̱bu̱ bi̱ naʼniún mingíjyúuʼ muraxnuu o nuthi i̱mba̱ ajngáa náa nda̱a̱ i̱yi̱i̱ʼ o nda̱a̱ mbaʼa, ma̱ndoo majmulúʼ folleto Atadxawíín Diúu̱ o Atadxawíín Diúu̱ ga̱jma̱a̱ araxtaa kámuu mbiʼi. I̱mba̱ i̱yi̱i̱ʼ rí ndayóoʼ majmulúʼ nindxu̱u̱ Tsíin lá eni rí nandoo Jeobá rí mbiʼi xúgi̱ rá. Rígi̱ mambáyúu bi̱ nuʼsngáá mu maninuʼ xuajñu Jeobá. Ma̱ngaa videos nañambá mu miʼsngúún xa̱bu̱ ga̱jma̱a̱ gíʼmaa majmulúʼ májánʼ rígi̱. Tikhuu nindxu̱u̱ Náa numuu rí gíʼmaa muʼnigajmaa Biblia rá. Káʼnii erígá náa Guʼwá nagimbáanʼ rá. Ma̱ngaa Xú káʼnii nindxu̱u̱ rí miʼsngáa ga̱jma̱a̱ numuu Biblia rá.
3. Ndiéjunʼ gájmañúlúʼ náa i̱ʼwáʼ Ñajunʼ rí Nuʼtáraʼa numuu Reino rá.
3 Náa i̱ʼwáʼ Ñajunʼ rí Nuʼtáraʼa numuu Reino dí raʼkhún magajnúu majmañulúʼ xú káʼnii gájmulúʼ májánʼ i̱yi̱i̱ʼ rí kuaʼdáá mu muʼsngáa. Á mu nuʼni tsiakimijna majmulúʼ májánʼ, muʼnimbánii xtágabu rí na̱ʼkha̱ náa Biblia: “Atayahuaminaʼla ican-ma-u, xuʼcui-ma ri narasjŋga, araxnasiaquiminaʼ mitani indo ri mejanʼ-u. Mi amu ri natani riguiʼ, aʼcui ri mitani macariyaʼminaʼla ican-ma-u, cami mitani macahuinlu su nudxahuanʼ maŋguin” (1 Tim. 4:16).