Gu̱ʼniu̱u̱n gu̱ʼú wanii xóo rudulú, ga̱jma̱a̱ bi̱ wa̱ʼxa̱áʼ xóo a̱ngiu̱lú

Náa Biblia naʼthúlú rí gíʼmaa mbuʼñún xóo anu̱lú a̱ngiu̱lú bi̱ guanii ma̱ngaa bi̱ jiáma o wa̱ʼxa̱ʼ xóo a̱ngiu̱lú (atraxnuu 1 Timoteo 5:1, 2). Mú itháan bi̱ ni̱ndxu̱ún a̱ngiu̱lú xa̱bekha gíʼma rí mbuyangajui̱i̱n ga̱jma̱a̱ mbuyamajkún a̱ngiu̱lú gu̱ʼu̱.

Mbáa ndxájulú xa̱biya̱ nditháan ragíʼmaa maʼniuu xieʼwun mbáa ndxájulú a̱ʼgu̱, ni má rí maʼni mati̱yu̱u̱ʼ (Job 31:1). Mbáa ndxájulú bi̱ xóó tsínigúnʼ ragíʼmaa maʼtsíin ga̱jma̱a̱ mbáa ndxájulú a̱ʼgu̱ á mu xóó tséndxaʼwáminaʼ manigúnʼ.

Mbáa nguáná a̱ngiu̱lú gu̱ʼu̱ naguwaʼ gúñún a̱ngiu̱lú bi̱ kuya̱ edxu̱u̱ mu muniu̱u̱n mbá graxe̱ o muthún ga̱jma̱a̱ gamajkhu rí ndayóoʼ maguma náa congregación. A̱ngiu̱lú bi̱ kuya̱ edxu̱u̱ gíʼmaa muniu̱u̱n rí májánʼ xúgíinʼ a̱ngiu̱lú gu̱ʼu̱, mu itháán bi̱ na̱nguá guáʼdiin ajmbiu̱ún bi̱ nda̱wa̱a̱ tsáa mañewu̱u̱n (Rut 2:8, 9).

NDA̱WA̱Á RÍ NITAYÁÁ VIDEO GUSNGÁJMA NÁA CONGREGACIÓN NGAJUA RÍ NDITHÁAN XÁMBÁA: GU̱ʼÚ XUÁʼA̱ GA̱JMA̱A̱ E̱JÍN GUÁʼA̱, ATRIʼÑA̱A̱ GRAXE̱ RÍGI̱:

• 

  Xú káʼnii nisngajmáá ngajua ndxájulú Myint a̱ngiu̱lú bi̱ kúwá náa congregación rá.

• 

  Náá numuu rí ngajua rí nisngajma a̱ngiu̱lú bi̱ kúwá náa congregación niʼni rí xa̱bu̱ xúthi dí raʼkhí ga̱jma̱a̱ Jeobá rá.

• 

  Ndiéjunʼ nixkajxi̱i̱n muni waʼxiinʼ ndxájulú Myint ga̱jma̱a̱ numuu rí a̱ngiu̱lú nisngajma ngajua rá.

Xú káʼnii gándoo gatasnga̱jmá ikháán rí naxmiéjuanʼ xtañún a̱ngiu̱lú gu̱ʼu̱ bi̱ kúwá náa congregación rá.