Atraʼwíí dí matani̱ índo̱ gaʼni Conmemoración

Mambá índo̱ ndayáa tsiguʼ xa̱bi̱i̱ Jeobá ra̱ʼkhá tháán naguáʼthi̱i̱n dí marigá Conmemoración. Semana wapháá dí nacho̱o̱ marigá ga̱jma̱a̱ nda̱wa̱á dí nijngoo, nuʼni xúgíʼ xó má eʼngo̱o̱ mu xúʼko̱ muʼni mba̱a̱ Jeobá ga̱jma̱a̱ nuxnáa numaaʼ dí niʼtsiwáanʼlú (Ef 1:3, 7). Mbá xkri̱da, nuʼni rígi̱ índo̱ nuʼni tsiakimijna muʼthúún eʼwíinʼ magún. Tikhuin a̱ngiu̱lú nuriya̱ʼ awan mani̱ndxu̱ún precursor auxiliar gu̱nʼ marzo o abril náa nuxnaxíi̱ 30 o asndu 50 hora. Lá manigua̱a̱ʼ marataraʼaa itháán índo̱ gaʼni Conmemoración ráʼ. Ndiéjunʼ gándoo matani̱ rá.

Dí matríyaʼ wapháá awan nagájnuu májánʼ (Pr 21:5). Gíʼ mijngii ma dí marigá Conmemoración, ikha jngóo gíʼmaa matríyaʼ ma awan. Atatsaʼwáminaʼ ndiéjunʼ gátani̱ índo̱ gaʼni Conmemoración ga̱jma̱a̱ ndiéjunʼ nindxu̱u̱ tikhu dí ndayóoʼ matani̱ mu xúʼko̱ matani̱ mbáníí. Nda̱wa̱á atanda̱ʼa̱a̱ Jeobá dí maʼni tsajkurámuuʼ dí nitraʼwíí (1Jn 5:14, 15).

Lá natatsaʼwáminaʼ ndiéjunʼ gándoo matani̱ mú xúʼko̱ marataráʼa itháán índo̱ gáʼni Conmemoración ráʼ.