¡Májánʼ nindxu̱u̱ rí muʼgua kanuu náa a̱ngiu̱lú!

1, 2. Ndiéjunʼ dí itháan gíʼdoo numuu eʼyoo Jeobá ga̱jma̱a̱ ndiéjunʼ dí nandoo mu̱ʼni̱ xá.

DÍ MUʼNIU̱U̱N rí májánʼ eʼwíinʼ gíʼdoo numuu eʼyoo Jeobá. Jesús niʼthí dí gíʼmaa maʼndulú kuʼñúún xa̱bu̱ numbaaʼ gajmiúlú xó má eyulú kuʼyamijná ikháánʼ (Mat. 22:​37-39). Rígi̱ nandoo gáʼthí dí asndu bi̱ tséni̱ ñajuunʼ Jeobá ndayóoʼ muʼniu̱u̱n dí májánʼ. Á mu dí xúʼko̱ e̱ʼni̱, musngajmá dí nduʼyaridáá Anu̱lú Jeobá bi̱ “naʼni magajnúu a̱jkha̱ʼ náa xa̱bu̱ míjíinʼ ga̱jma̱a̱ náa xa̱bu̱ ra̱míjíinʼ, ga̱jma̱a̱ naʼni rí maxnúu ruʼwa náa kúwá xa̱bu̱ bi̱ nuni̱ rí jmbu ga̱jma̱a̱ náa bi̱ tséni̱ rí jmbu” (Mat. 5:45).

² Maski ajndu Jeobá nandoo kaʼñún xúgíinʼ xa̱bu̱, mú nandoo kaʼñún itháan bi̱ nunimbu̱u̱n kuyáá (Juan 14:21). Ikhaa nandoo dí mbuʼyaridáá, ikha jngóo naʼthúlú dí gíʼmaa ‹maʼndulú kuʼñúún wéñuuʼ› a̱ngiu̱lú ga̱jma̱a̱ dí maʼndulú ‹kuyamíjna̱ xóo bi̱ kaníkáanʼlú› (1 Ped. 4:8; Rom. 12:10). Gíʼmaa maʼndulú kuʼñúún xó má eyulú kuʼñúún bi̱ kúwíin náa guʼwúlú o xó má eyulú kuʼyáá mbáa bi̱ nambájxulú gajmiúlú.

3. Xú káʼnii nindxu̱u̱ dí nandulúʼ kuʼyamijná rá.

³ Dí maʼndulú kuʼyamijná nindxu̱u̱ xóo mbá planta, rí ndayóoʼ muxíjyááʼ ga̱jma̱a̱ ndayóo’ muñewa̱a̱n mu xúʼko̱ mba̱ja̱a̱. Apóstol Pablo niʼthún a̱ngiu̱lú ajngáa rígi̱: “Gaʼndala kuyamíjna̱ má xúʼko̱ xóo kaníkháanʼla” (Heb. 13:1). Jeobá nandoo rí mu̱ʼni̱ dí mba̱ja̱a̱ má xúʼko̱ dí nandulúʼ kuʼñúún eʼwíinʼ. Náa artículo rígi̱ majmañulú náá numuu dí ndayóoʼ makuwáánʼ mbá kambájxulú gajmiúlú a̱ngiu̱lú, ga̱jma̱a̱ xóo gándoo gúʼgíʼ mu̱ʼni̱ má xúʼko̱.

GÍ’DOO NUMUU DÍ MAKUWÁÁN’ MÁ XÚʼKO̱ GAJMIÚLÚ ANGIULÚ

4. Ndiéjunʼ gándoo gámbáyulú mu mbuʼyáá dí guáʼdáá má xúʼko̱ numún a̱ngiu̱lú xó má eʼthí náa Salmo 133:1 rá. (Atayáá ma̱ngaa xtiʼkhuu.)

⁴ (Atraxnuu Salmo 133:1).a Mbáa mangáánʼlú nuʼthá xó má niʼthí bi̱ niʼnirámáʼ salmo, “ra̱ʼkhá tháán májánʼ ga̱jma̱a̱ mitsaanʼ” dí mambájxulú gajmiúlú bi̱ nandún kuyáá Jeobá. Mú gamíi dí nda̱wa̱á ni xúʼñúún xúʼko̱ bi̱ kúwá náa xuajñuu Jeobá. Migamíi magíʼnulú xóo nigíʼnuu mbáa xa̱bu̱ bi̱ ndiʼyoo mbá ixi̱, timbá miʼtsú dí ndiʼyoo ixi̱ asndu niʼniuu tsiánguá numuu dí ra̱ʼkhá tháán mba̱a̱ ga̱jma̱a̱ mitsídánʼ, mú índo̱ ninújngoo mbiʼi nánguá eʼyoo xó má eʼyoo nákha ginii, numuu dí ndaʼyoo má mbaʼa nuthu. Ikháánʼlú mangáánʼ nduʼñún nángi eʼni a̱ngiu̱lú, mbáa nduʼñún mbaʼa nuthu dí mbá xmáná, ndiéjunʼ gándoo gúʼni̱ mu xúgíʼníí xó má nigíʼnuu xa̱bu̱ bi̱ ndiʼyoo ixi̱ rá. Ndayóoʼ dí muríyaʼ mbiʼi mundxa̱ʼwa̱míjna̱ náá numuu dí nduʼyáá dí a̱ngiu̱lú guáʼdáá wéñuuʼ numún ga̱jma̱a̱ ndíjkha jngóo guáʼdáá numún náa congregación.

5. Xú káʼnii embáñún eʼwíinʼ índo̱ nduyáá dí nandulúʼ kuʼyamijná rá.

⁵ Xa̱bu̱ bi̱ nagún timbá miʼtsú náa reunión ndrígulú naʼniún tsiánguá índo̱ nduyáá dí ikháánʼ nandulúʼ kuʼyamijná, xúʼko̱ ikhiin naguánú nduyáá dí náa kuwáánʼ nindxu̱u̱ gajkhun. Jesús niʼthí: “Á mu nuni̱la xúgi̱ kaʼnii, xúgíinʼ gúyáá rí ikháanʼ nindxa̱la xa̱bi̱ʼ: Á mu nandala kuyamíjna̱” (Juan 13:35). Guʼyáá dí naʼthí Chaithra, mbáa dxáʼgú bi̱ naʼniga̱jma̱a̱ náa universidad, ikhaa nigíʼdu̱u̱ niʼniga̱jma̱a̱ Biblia. Ndxájulú bi̱ naʼsngóo niʼthúu̱n dí maʼga náa asamblea regional ga̱jma̱a̱ ikhaa ni̱jkha̱, timbá mbiʼi dí ni̱jkha̱ náa asamblea niʼthúu̱n ndxájulú bi̱ naʼsngóo: “Anu̱ʼ ga̱jma̱a̱ ru̱dúʼ nditháan túyaruʼún. ¡Mú timbá mbiʼi dí xtáá náa asamblea ndrígáaʼ ndiyaruʼún mbá 52 a̱ngiu̱lú! Ikhiin nini̱ mba̱yo̱o̱ dí Jeobá nandoo kaʼyoʼ. Ikhúún nandoʼ maxtáá gi̱i̱”. Chaithra niʼniga̱jma̱a̱ má xúʼko̱ ga̱jma̱a̱ tsiguʼ 2024 nijngúun iyááʼ. Rígi̱ naʼni mbuʼyáá dí índo̱ xa̱bu̱ nduyáá xóo nuʼnilú, dí nandulúʼ kuʼyamijná, naxkajxi̱i̱ a̱jkiu̱ún dí maguánú muni̱ ñajuunʼ Jeobá (Mat. 5:16).

6. Xú káʼnii gándoo gámbáyulú dí makuwáánʼ mbóó gajmiúlú a̱ngiu̱lú rá.

⁶ Dí makuwáánʼ mbóó gajmiúlú a̱ngiu̱lú ma̱ndoo mañewu̱nlú. Pablo niʼthún ajngáa rígi̱ a̱ngiu̱lú: “Guxnamíjná tsiakii mámbá mbiʼi […] mu tsiakii ndrígóo aʼkhá rí minduwaʼ xárígá náa nimbáa dí ikháanʼla” (Heb. 3:13). Á mu dí nakáguabáanʼlú ga̱jma̱a̱ nakumulú dí nánguá e̱ʼni̱ xó má gíʼmaa, Jeobá ma̱ndoo majmiuu a̱ngiu̱lú mu mumbayulúʼ (Sal. 73:​2, 17, 23). ¡Ra̱ʼkhá tháán májánʼ dí kuaʼdiin a̱ngiu̱lú bi̱ ma̱ndoo mumbayulúʼ!

7. Xú káʼnii embáyulú dí maʼndulú kuʼyamijná rá. (Colosenses 3:​13, 14.)

⁷ Kuwáánʼlú náa kúwíin xa̱bu̱ bi̱ nunimíjna̱ maʼndún kuyamijná, ikha jngóo naguma tsajkurámáánʼlú (1 Juan 4:11). Índo̱ gajkhun nandulúʼ kuʼyamijná tséʼniulú gakhi̱i̱ mu̱ʼni̱ mba̱a̱ a̱jkiu̱lú kuʼñúún eʼwíinʼ, ga̱jma̱a̱ rúʼko̱ naʼni dí makuwáánʼ mbá kambájxulú (Efes. 4:​2-6; atraxnuu Colosenses 3:​13, 14). Ikha jngóo náa reunión ndrígulú nakuwáánʼ tsímáá, raʼkháa xóo náa i̱ʼwáʼ grupo dí rígá náa numbaaʼ rígi̱.

GUʼYAMAJKÚN EʼWÍINʼ

8. Xú káʼnii embáyulú Jeobá mu makuwáánʼ mbá kambájxulú rá.

⁸ Maski ajndu nindxu̱lú xa̱bu̱ aʼkhá, mú Jeobá nambáyulú dí makuwáánʼ mbá kambájxulú gajmiúlú a̱ngiu̱lú bi̱ kúwá náa xúgíʼ numbaaʼ (1 Cor. 12:25). Náa Biblia naʼthí: “Dios xtáa má raʼsngála dí maʼndala kuyamíjna̱” (1 Tes. 4:9). Xú káʼnii eʼni xá. Najmuu Ajngá rawuunʼ mu maʼthúlú ndiéjunʼ gáʼyóoʼ mu̱ʼni̱ mu ma̱ndoo makuwáánʼ mbá kambájxulú. Nuniʼñámíjná dí maʼsngulúʼ índo̱ nuraxnuu Ajngá rawuunʼ ga̱jma̱a̱ nuʼgíʼ nu̱ʼni̱ dí naʼthí ikhí (Heb. 4:12; Sant. 1:25). Ikhaa rúʼko̱ dí nuʼnimíjna̱ mu̱ʼni̱ ikháánʼ bi̱ nindxu̱lú testigos de Jeobá.

9. Xú káʼnii gándoo gámbáyulú dí naʼthí náa Romanos 12:​9-13 mu mbuʼyamajkún eʼwíinʼ rá.

⁹ Xú káʼnii gándoo gámbáyulú Ajngá rawuunʼ Dios mu makuwáánʼ mbá kambájxulú gajmiúlú a̱ngiu̱lú rá. Guʼyáá dí niʼthí Pablo náa Romanos 12:​9-13 (atraxnuu). Mú guʼyáá dí eyoo gáʼthúu̱n ajngáa “Gináanʼ ikháanʼ gúyamajkúnla eʼwíinʼ”. Ajngáa rígi̱ nandoo gáʼthúu̱n dí gináánʼ gíʼmaa mbuʼyáʼ xóo musngajmúún a̱ngiu̱lú dí nandulúʼ kuʼñúún, xóo dí mu̱ʼni̱ mba̱a̱ a̱jkiu̱lú kuʼñúún, muʼniu̱u̱n dí májánʼ ga̱jma̱a̱ dí mundriguíin májánʼ náa guʼwúlú (Efes. 4:32). Xúguaʼthi̱i̱n dí eʼwíinʼ muxuʼmamijná náa ikháánʼlú. Ikháánʼ gináánʼ gíʼmaa dí mumbáñún, xúʼko̱ gúʼyáá dí gajkhun nindxu̱u̱ ajngáa dí niʼthí Jesús: “Rígá itháan gagi dí maraxna̱ ki xóo dí makánaa’” (Hech. 20:35).

10. Xú káʼnii gándoo gúsngajmá dí nduʼyamajkhún eʼwíinʼ rá. (Atayáá ma̱ngaa xtiʼkhuu.)

¹⁰ Guʼyáá mbá ajngáa dí gíʼdoo numuu rí niʼthí Pablo. Índo̱ ikhaa niguámbóo niʼthí, gináanʼ ikháanʼ gúyamajkúnla eʼwíinʼ, niʼthí ajngáa rígi̱: “Guñajunʼla, xáʼskala”. Mbáa xa̱bu̱ bi̱ nañajunʼ nadxuu a̱jkiu̱u̱n, ga̱jma̱a̱ índo̱ nagruigú mbá ñajunʼ, naʼni tsu̱ma̱á. Proverbios 3:​27, 28 naxnúlú consejo rígi̱: “Á mu naʼngo̱o̱ matambáñún eʼwíinʼ, xátani̱ gaʼduunʼ matambáñún bi̱ nda̱ñúunʼ mixtambáñún”. Ikha jngóo á mu nduʼyáá dí mbáa ndayóoʼ mumbáyíí, guʼyáʼ xóo mumbáyíí. Xákumulú dí maxtáa i̱mba̱a̱ bi̱ mambáyúu (1 Juan 3:​17, 18).

11. Ndiéjunʼ gándoo gámbáyulú mu makuwáánʼ mbá kambájxulú gajmiúlú a̱ngiu̱lú rá.

¹¹ I̱mba̱ dí xóo ma̱ndoo musngajmá dí nduʼyamajkhún eʼwíinʼ, nindxu̱u̱ dí mu̱ʼni̱ mba̱a̱ a̱jkiu̱lú kuʼñúún mbá nacha̱. Efesios 4:26 naʼthí: “Xúniʼñáánʼ rí asndu marámáaʼ a̱jkha̱ʼ ka̱ʼníí kuwáanʼ rakiʼnáaʼla”. Náá numuu dí xígi̱ eʼthí rá. Mu xúʼko̱ “xúniʼñáánʼ rí Gixa̱a̱ mato̱ʼo̱o̱” maʼniulú dí raʼkhí, xó má eʼthí náa versículo 27. Nángi eʼni eʼthúlú Jeobá dí ndayóoʼ mu̱ʼni̱ mba̱a̱ a̱jkiu̱lú kuʼñúún eʼwíinʼ. Colosenses 3:13 naxnúlú mbá májánʼ consejo: “Gu̱ni̱ mba̱a̱ a̱jkia̱la kuyamíjna̱ má xúʼko̱”. Á mu nu̱ʼni̱ mba̱a̱ a̱jkiu̱lú kuʼñúún a̱ngiu̱lú, rúʼko̱ gáʼni dí makuwáánʼ májánʼ gajmiúlú. Ga̱jma̱a̱ rúʼko̱ gáʼni dí ‹makuwáánʼlú mbá kambájxulú, xó má espíritu niruwáanʼlú› (Efes. 4:3). Rígi̱ nandoo gáʼthí dí á mu tséʼni mba̱a̱ a̱jkiu̱lú xándoo makuwáánʼ mbá kambájxulú ni má xándoo makuwáánʼ tsímáá.

12. Xú káʼnii embáyulú Jeobá mu mu̱ʼni̱ mba̱a̱ a̱jkiu̱lú kuʼñúún eʼwíinʼ rá.

¹² Gajkhun má dí naʼniulú mingíjyúuʼ mu̱ʼni̱ mba̱a̱ a̱jkiu̱lú kuʼyáá mbáa bi̱ niʼniulúʼ dí raʼkhí. Mú ma̱ndoo mu̱ʼni̱ mba̱a̱ a̱jkiu̱lú kuʼyáá, numuu dí Jeobá ma̱ndoo maxnúlú espíritu santo ndrígóo. Náa Biblia naʼthí dí ikháánʼlú ma̱ndoo muʼniu̱u̱n rí májánʼ eʼwíinʼ ga̱jma̱a̱ manindxu̱lú mbáa xa̱bu̱ bi̱ nañajunʼ. Mú ma̱ngaa ikhí naʼthí: “Gaguaʼdáá gagi rí na̱ʼkha̱ náa espíritu santo”. Xóo muʼthá, índo̱ mbáa cristiano gíʼdoo “espíritu santo” asndu nadxuu eʼni rí májánʼ, xóo índo̱ nasngájma rí nandoo kaʼñúún eʼwíinʼ, índo̱ naʼni mba̱a̱ a̱jkiu̱u̱n kaʼñúún ga̱jma̱a̱ nagruiguíin májánʼ náa goʼwóo (atayáá rí maʼni raga̱jma̱ nota dí na̱ʼkha̱ náa Biblia de estudio náa Romanos 12:11). Ikha jngóo nuʼtákáñíí Jeobá dí mambáyulú muʼniu̱u̱n dí májánʼ eʼwíinʼ (Luc. 11:13).

“XÚRKUAJIMÍJNÁ KANÍKÁANʼ”

13. Ndiéjunʼ gamíi maʼni dí xákuwáánʼ mbá kambájxulú rá.

¹³ Náa congregación kúwíin “xúgíinʼ enii xa̱bu̱” (1 Tim. 2:​3, 4). Numuu dí mixtiʼkhu xóo ndijáánʼ, mbáa ikha jngóo nguáná mixtiʼkhu xóo dí nuraʼwíí mu̱ʼni̱, xóo dí muʼgíʼ xtíñulú, xóo nu̱ʼni̱ tanamijná o xóo nu̱ʼni̱ gagimijná. Á mu dí tséñawumíjnalú migamíi dí rúʼko̱ maʼni dí xákuwáánʼ mbá kambájxulú (Rom. 14:4; 1 Cor. 1:10). Mú Dios naʼsngúlú dí gíʼmaa maʼndulú kuyamijná, ikha jngóo tséʼthá dí nuraʼwíí mu̱ʼni̱ ikháánʼ nindxu̱u̱ itháan májánʼ, ki xóo dí nuraʼwi̱i̱ muni̱ eʼwíinʼ (Filip. 2:3).

14. Ndiéjunʼ dí ndayóoʼ muʼnimíjna̱ mu̱ʼni̱ má xúʼko̱, ga̱jma̱a̱ náá numuu rá.

¹⁴ I̱mba̱ dí ma̱ndoo mu̱ʼni̱ mu makuwáánʼ má xúʼko̱ mbá kambájxulú náa congregación, nindxu̱u̱ dí muxnúún tsiaki̱i̱ eʼwíinʼ ga̱jma̱a̱ dí muʼni̱i̱ a̱jkiu̱ún (1 Tes. 5:11). Xíkhoo má, mbaʼin a̱ngiu̱lú bi̱ niniña̱a̱nʼ ragún reunión mba̱yu̱u̱ʼ tsiguʼ ga̱jma̱a̱ bi̱ nigájni̱ín náa congregación nitangiín mbu̱júu̱. Ikháánʼ asndu nadxulú nindríguíin (2 Cor. 2:8). Mbáa ndxájulú a̱ʼgu̱ bi̱ naʼni má gu̱wa̱ʼ tsiguʼ niniñuuʼ ra̱jkha̱ reunión, nitanga̱a̱ mbu̱júu̱ náa guʼwá nagimbáanʼ, ikhaa naʼthí: “Asndu nadxún niguwáʼ gúrajxuún” (Hech. 3:19). Xú káʼnii nimbáyúu ndxájulú bugi̱ dí xígi̱ kaʼnii nini̱i̱ xá. Ikhaa naʼthí: “Niku̱mu̱ʼ dí asndu xóo Jeobá ejkha̱ kañún mbu̱júu̱ náa maxtáá gagi”. Índo̱ nuʼnimíjna̱ dí muʼni̱i̱ a̱jkiu̱ún eʼwíinʼ, Jesús ma̱ndoo majmiuu ga̱jma̱á nindxu̱lú mu mumbáñún ‹bi̱ néʼngu̱u̱n› (Mat. 11:​28, 29).

15. Lá rígá i̱mba̱ dí mambáyulú mu makuwáánʼ mbá kambájxulú ráʼ. (Atayáá ma̱ngaa xtiʼkhuu.)

¹⁵ Ma̱ngaa dí xóo nuʼthá ma̱ndoo maʼni dí makuwáánʼ mbá kambájxulú. Náa Job 12:11 naʼthí: “Lá tséʼdxawun cháʼwuun xa̱bu̱ xóo ewán ajngáa ga̱jma̱a̱ raju̱u̱n tséʼyoo xóo miʼtsí ganitsu ráʼ.” Mbáa bi̱ najmañuu naʼni mújúunʼ ganitsu, ginii ndaʼyoo á mu miʼtsí ga̱jma̱a̱ nda̱wa̱á naxnún mu̱phu̱ eʼwíinʼ. Xúʼko̱ má eyóoʼ mu̱ʼni̱ mangáánʼ, nákha xóó tséʼthá, ndayóoʼ mundxaʼwamíjna̱ á mu ajngáa dí gúʼthá ma̱ndoo mambáñún eʼwíinʼ, maxnún tsiaki̱i̱ ga̱jma̱a̱ maʼni̱i̱ a̱jkiu̱ún (Sal. 141:3; Efes. 4:29).

16. Tsíín lá gáʼyóoʼ muthi ajngáa dí maxnún tsiaki̱i̱ eʼwíinʼ rá.

¹⁶ Mú bi̱ itháan ndayóoʼ dí muthi ajngáa rí maxnún tsiaki̱i̱ eʼwíinʼ nindxu̱ún a̱ngiu̱lú bi̱ ninigu̱nʼ, a̱ngiu̱lú xa̱bekha ga̱jma̱a̱ gu̱ʼu̱ bi̱ guáʼdiin e̱jñu̱ún (Col. 3:​19, 21; Tito 2:4). Xúʼko̱ má a̱ngiu̱lú anciano mangiin, numuu rí ikhiin nuxnún tsiaki̱i̱ ga̱jma̱a̱ nuni̱i̱ a̱jkiu̱ún mugiu̱u̱ Jeobá (Is. 32:​1, 2; Gál. 6:1). Náa Proverbios 15:23 naʼthí: “¡Ra̱ʼkhá tháán májánʼ nindxu̱u̱ ajngáa rí najuiʼthá náa mbiʼi rí ndayóoʼ!”.

GUSNGAJMÁ DÍ “GAJKHUN NANDULÚ KUʼYAMIJNÁ”

17. Xú káʼnii gándoo gúsngajmá dí gajkhun nandulúʼ kuʼñúún a̱ngiu̱lú rá.

¹⁷ Apóstol Juan niʼthí: “Xáʼyóoʼ muʼtháá rí nandulú kuʼyamijná, gusngajmá ga̱jma̱a̱ dí nu̱ʼni̱ rí gajkhun nandulú kuʼyamijná” (1 Juan 3:18). Xú káʼnii gándoo gúsngajmá dí gajkhun nandulúʼ kuʼyamijná rá. Ma̱ndoo musngajmá á mu nuríyaʼ mbiʼi makuwáánʼ gajmiúlú a̱ngiu̱lú, rúʼko̱ gámbáyulú mambájxulú májánʼ gajmiúlú ga̱jma̱a̱ rí maʼndulú kuʼñúún itháan. Guríya̱ʼ mbiʼi makuwáánʼ gajmiúlú náa reunión, náa nuʼtáraʼa. Ma̱ngaa guʼgua̱ gúʼñún náa guʼwún. Á mu dí xúʼko̱ e̱ʼni̱, eʼwíinʼ muthi ga̱jma̱a̱ numulú: “Dios xtáa má raʼsngála dí maʼndala kuyamíjna̱” (1 Tes. 4:9). Ga̱jma̱a̱ mináá má ikháanʼ gúʼyáá dí “ra̱ʼkhá tháán májánʼ ga̱jma̱a̱ mitsaanʼ rí a̱ngiu̱lú makuwá mbá kambáxu̱u̱n” (Sal. 133:1).