Jesucristo ma̱ʼne rí ná xáríga̱ xkujndu

Nákhí nixtáa ná tsu̱du̱u̱ ju̱ba̱ʼ Jesucristo nisngájma rí maphú nandoo̱ jaʼyalóʼ; ikhaa jngó asndo nixnáxe̱ mine̱ʼ ma̱ja̱ñúu̱ ga̱jma̱á numalóʼ (Mateo 20:28; Juan 15:13). Na̱ʼkha̱ rangiyuu máʼ mbiʼi rí Jesucristo masngájmalóʼ mbu̱jú rí maphú nandoo̱ jaʼyalóʼ: ikhaa̱ ñajuun Xa̱bo̱ Ñajon tsí niʼgíi̱ Ana̱ʼlóʼ, ikhaa jngó ma̱ʼne gámba̱a̱ xkujndu rí ríga̱ ná xúgíí numbaa (Salmo 46:9).

Athiyáá dí iʼthán Ajngóo Ana̱ʼlóʼ rí ma̱ʼne Jesús:

• “Ma̱ʼne jríya̱ʼ tsí ngínáa nandxaʼwá ska mi̱thambáyíi, xúʼkhue̱n máʼ tsí naxrígú mina̱ʼ jamí tsí ndawa̱a̱ nimbáa tsí mambáyúu. Ma̱ñáwíin a̱kui̱in jaʼyoo xa̱bo̱ tsí naxrígú mina̱ʼ jamí tsí ngínáa mangaa, ma̱ʼne jríñii tsí ngíníi. Ma̱ʼne jríñi̱i inúú xúgíin tsí nune̱ ngíníi jamí núñúu nikhuáa̱” (Salmo 72:12-14).

Xáne gúsnga̱jmalóʼ rí nu̱ʼxnáálóʼ dínuma̱a Jesús ga̱jma̱á numuu rí niʼnii̱ jamí mangaa rí ma̱ʼnii̱ ga̱jma̱á numalóʼ rá. Mbá rí ma̱goo mu̱’ne̱ló’ ikhaa ne̱ ñajuun rí mu̱’ne̱ gajma̱a̱ló’ i̱wa̱á xóó numuu Ajngáa máján noxe̱’ rí na’thán numuu Xa̱bo̱ ñajun tsí ni’gíi̱ Ana̱’ló’, ikhaa rú’khue̱n ñajuun ajngáa rí ni’thán ra’a Jesús (Lucas 4:43). Araxnuu artículo rí na’thán “Rí nindxu̱u̱ Reino ndrígóo Dios”.