Tsíin ni̱ndxu̱ún Cuerpo Gobernante ndrígu̱ún xa̱bi̱i̱ Jeobá rá.

Cuerpo Gobernante ni̱ndxu̱ún mbá nguéjmi̱i̱n cristianos bi̱ nuxna ikha náa ñajunʼ rí nuni bi̱ nutaraʼa numuu Jeobá náa xúgíʼ numbaaʼ. Ñajunʼ rí nuni nindxu̱u̱ mba̱a̱:

• Nuniratáá i̱yi̱i̱ʼ rí nagájnuu náa Biblia rí majmaa náa reunión ndrígúxu̱ ga̱jma̱a̱ náa majuiʼsngúún bi̱ nutaraʼa numuu Jeobá (Lucas 12:42).

• Nuxna ikha náa ñajunʼ rí nuni xa̱bi̱i̱ Jeobá náa xúgíʼ numbaaʼ. Rígi̱ nindxu̱u̱ rí mbuyáá xóo najuiʼtaraʼa ga̱jma̱a̱ xóo majmaa mbújkha̱a̱ rí najuixná.

Cuerpo Gobernante nuni ikháá má xóo rí nini ‹apóstoles ga̱jma̱a̱ bi̱ kuya̱ edxu̱u̱ bi̱ nikuwa náa Jerusalén› nákha siglo timbá. Ikhiin niraʼwíí mbaʼa rí gíʼdoo numuu dí mayambáá náa congregación cristiana (Hechos 15:2). Cuerpo Gobernante na̱nguá ni̱ndxu̱ún bi̱ nutañajunʼ náa ñajunʼ ndrígúxu̱, xó má túni xa̱bu̱ bi̱ niguájun jmbu náa inuu Dios nákha wajyúuʼ. Ikhiin nduyáʼ má xúʼko̱ náa Biblia ikha rí xóo muni ga̱jma̱a̱ nduyáá rí Jeobá nigíinʼ Jesucristo mu mbayá edxu̱u̱ náa congregación (1 Corintios 11:3; Efesios 5:23).

Tsíin ni̱ndxu̱ún Cuerpo Gobernante rá.

Cuerpo Gobernante ni̱ndxu̱ún Kenneth Cook, Jr., Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane ga̱jma̱a̱ Jeffrey Winder. Xúgíinʼ ikhiin kúwá ruñajunʼ náa guʼwá rí naxná ikha dí rígá náa Warwick, (Nueva York).

Xú káʼnii eñajunʼ Cuerpo Gobernante rá.

Cuerpo Gobernante nigruigi̱i̱n mbá majuiin comité bi̱ nduyáá xú káʼnii naguma mixtiʼkhu ñajunʼ. Mámbáa rí ikhiin nañejunʼ ikhí.

• Comité Bi̱ nayéjkha̱ edxu̱u̱. Ndaʼyoo ga̱jma̱a̱ numuu xkujndu dí narígá náa Xa̱bu̱ Ñajunʼ ma̱ngaa naríyaʼ awan ndiéjunʼ gaguma índo̱ narígá mbá gamiéjunʼ, ma̱ngaa ndaʼyoo ndiéjunʼ gaguma índo̱ bi̱ nutaraʼa numuu Jeobá najuixkúún ga̱jma̱a̱ numuu rí nunimbu̱u̱n.

• Comité Bi̱ nañewu̱u̱n bi̱ nuyambáá. Ndaʼyoo xóo kúwi̱i̱n ga̱jma̱a̱ rí ndañúunʼ bi̱ kúwá náa Betel, xóo muʼthá, bi̱ nuñajunʼ náa guʼwá rí naxná ikha ndrígu̱ún bi̱ nutaraʼa numuu Jeobá.

• Comité Bi̱ naguwíi i̱yi̱i̱ʼ. Ndaʼyoo rí eyóoʼ mu magumaaʼ imprimir i̱yi̱i̱ʼ dí nagájnuu náa Biblia ga̱jma̱a̱ xú kaʼnii gáʼga náa eʼwáʼ xuajen i̱yi̱i̱ʼ rúʼko̱, ma̱ngaa ndaʼyoo xóo maguma guʼwá náa nagimbáanʼxu, guʼwá náa najuiʼtájuíi ajngáa ga̱jma̱a̱ guʼwá rí naxná ikha.

• Comité Bi̱ ndaʼyoo xóo miʼtáraʼa. Ikhaa nariya̱ʼ awan xóo miʼtáraʼa “ajngáa májánʼ ndrígóo reino” (Mateo 24:14).

• Comité Bi̱ naʼthí xóo miʼsngáa. Kaʼyoo maguwíin awan ndiéjunʼ mbiʼyáá índo̱ na̱jkuáxu̱ náa guʼwá nagimbáanʼ, xóo miʼsngáa ga̱jma̱a̱ awan xóo magajnúu aʼwá ga̱jma̱a̱ video.

• Comité Bi̱ naʼniratoo i̱yi̱i̱ʼ. Ikhaa naʼni mújúunʼ i̱yi̱i̱ʼ rí nagájnuu náa Biblia ga̱jma̱a̱ rí natima náa ináa ndrígóo Internet ndrígúxu̱, ma̱ngaa ikhaa ndaʼyoo ñajunʼ rí naguma náa najuiʼtájuíi ajngáa.

I̱mba̱ rí nuni bi̱ Cuerpo Gobernante nindxu̱u̱ rí mámbá xmáná nagimbíi̱n mu mbuyáá ndiéjunʼ xóo rí naʼni tígo̱o̱ muni. Índo̱ nugimbíin, nuraxnuu Biblia ga̱jma̱a̱ nuniñanʼ rí xi̱ʼ kaʼwu ndrígóo Dios maxnún ikha. Nuni xó má eʼngo̱o̱ mu rí nuraʼwíi muni mani̱ndxu̱u̱ májánʼ ga̱jma̱a̱ rí mambáñún xúgíinʼ (Hechos 15:25).

Bi̱ numbañún Cuerpo Gobernante

Mámbáa comité bi̱ nindxu̱u̱ Cuerpo Gobernante gíʼdiin eʼwíínʼ bi̱ numbayíí bi̱ mangiin ni̱ndxu̱ún cristianos bi̱ nuni ga̱jma̱a̱ xúgíʼ a̱jkiu̱ún ñajuunʼ Dios bi̱ nakru̱ʼu̱u̱n ga̱jma̱a̱ nduyáá májánʼ xú kaʼnii ñajunʼ eʼni comité bi̱ náa kaʼñún muñejunʼ (1 Corintios 4:2). Bi̱ nuyambáá bugi̱, ikhiin mangiin nakuwa índo̱ nagimbíi̱n comité mu maguaʼdáá reunión. Maski ajndu ikhiin tsíraʼwíí rí maguma, mu nuthi tikhu rí mayambáá mu comité mbuyáá májánʼ ndiéjunʼ rí guraʼwíí maguma, ikhú ikhiin nunimbánii xó má rí comité niraʼwíi maguma. Ma̱ngaa Cuerpo Gobernante, ma̱ndoo muʼthúún rí mangúún gúñún bi̱ nutaraʼa numuu Jeobá bi̱ kúwá náa i̱ʼwáʼ xuajen o rí manújngún muxna discurso náa programas kiejuunʼ xóo náa reunión dí narígá mámbá tsiguʼ o índo̱ naramúúnʼ bi̱ ninigajmaa náa Escuela ndrígóo Galaad.