Bi̱ guaʼdáá itháan numbañún bi̱ na̱nguá guaʼdáá wéñuʼ

Testigos de Jeobá nuni̱ ñajuunʼ ndrígu̱ún ga̱jma̱a̱ numbañún a̱ngiu̱ún bi̱ kúwá náa nújngoó dí 200 países ga̱jma̱a̱ xuajin majkhaʼ. Mú káaʼ 35 país dí naʼngo̱o̱ mbújkha̱a̱ dí nuxna má ikhiin majmúún náa ndayóoʼ. Mú, xú káʼnii eni̱ bi̱ kúwá náa gíná eʼni mbújkha̱a̱ rá.

Cuerpo Gobernante ndrígu̱ún Testigos de Jeobá nduyáá ñajunʼ rí ndayóoʼ maguma ga̱jma̱a̱ i̱ʼwáʼ rí ndañúunʼ Testigos bi̱ kúwá náa mbájndi numbaaʼ. Mbújkha̱a̱ dí najuixná naxtiewa̱a̱n wéñuʼ. Á mu mbá sucursal napídu̱únʼ mbújkha̱a̱ dí nagruigú, nakuʼma náa i̱ʼwáʼ sucursal rí ndayóoʼ itháan. Nuni̱ xó má nini̱ timbíin cristianos. Ikhiin nijmún mbújkha̱a̱ dí napíduúnʼ mu mumbañún ga̱jma̱a̱ bi̱ itháan gíníin, ga̱jma̱a̱ xúʼko̱ nimbáa táʼni gínáa wéñuʼ (2 Corintios 8:14).

Xú káʼnii eni̱ a̱ngiu̱lú índo̱ nakánún mbújkha̱a̱ dí napídu̱únʼ eni̱ i̱ʼwáʼ sucursal rá. Mbá xkri̱da, náa Tanzania náa máá dí mbá taphi̱i̱n xa̱bu̱ asndu tséʼni a̱jma̱ dólar guáʼdáá makuwá ga̱jma̱a̱ dí mbá mbiʼi, nijmaa mbújkha̱a̱ mu maguma májáa̱nʼ Guʼwá náa nagimbáánʼ dí rígá náa congregación Mafinga. A̱ngiu̱lú bi̱ kúwá ikhí nithi: “Asndu nákhá mbiʼi dí niguma májáa̱nʼ Guʼwá náa nagimbáánʼ, nigi̱ʼdu̱u̱ niʼni itháan mbaʼin. Nuxnááxu wéñuʼ núma̱aʼ xuajñuu Jeobá ga̱jma̱a̱ mbá xúgíinʼ a̱ngiu̱lú bi̱ kúwá mbájndi numbaaʼ dí nuxna dí guáʼdáá. Dí xúgi̱ kuaʼdááxu mbá guʼwá mitsaanʼ náa mbuyamajkuííxu Jeobá”.

Ga̱jma̱a̱ numuu nandii COVID-19, tikhuiin a̱ngiu̱lú bi̱ kúwá náa Sri Lanka niʼñún gakhi̱i̱ ga̱jma̱a̱ ganitsu. Mbáa dí ikhiin nindxu̱u̱ ndxájulú Imara Fernando ga̱jma̱a̱ a̱ʼdióo chíʼgíiʼ bi̱ mbiʼyuu Enosh. Mú, núma̱a̱ má mbújkha̱a̱ dí nuxna náa i̱ʼwáʼ país, nindoo nixtambáñún ga̱jma̱a̱ rí ndiñúu̱nʼ. Nda̱wa̱á nini̱ mbá i̱yi̱ʼ náa naʼthí: “Nuxníín wéñuʼ núma̱aʼ a̱ngiu̱lú dí nisngajmuxu dí nandún kuyuxu̱ náa mbiʼi gakhi̱i̱ rígi̱. Ra̱ʼkhá tháán edxuxu dí kuwáanʼxu náa xuajñuu Jeobá ga̱jma̱a̱ nutakáñíí wéñuʼ Jeobá dí mambáñún má xúʼko̱ a̱ngiu̱lú bi̱ ndañúu̱nʼ náa iwáá mbiʼi gakhi̱i̱ rígi̱”.

Asndu náá má kúwá a̱ngiu̱lú, asndu nadxún dí muxna dí guáʼdáá. Mbá xkri̱da, Enosh, ikhaa niʼni mbá caja náa najti mbújkha̱a̱ mu xúʼko̱ maxná mu mixtambáñún ga̱jma̱a̱ a̱ngiu̱lú bi̱ itháan ndañúu̱nʼ. Xúʼko̱ má májánʼ a̱jkiu̱u̱n ndxájulú Guadalupe Álvarez ma̱ngaa. Ikhaa xtáa náa mbá xuajin ngíná náa México náa mbaʼin xa̱bu̱ na̱nguá ekánún mba̱a̱ mbújkha̱a̱ ga̱jma̱a̱ káaʼ nguáthíi̱n wáa bi̱ nákánún wáa chíʼgíiʼ. Maski ajndu xúʼko̱, ikhaa naʼni xó má eʼngo̱o̱ mu mayambáá. Guadalupe naʼthí: “Naxnaá wéñuʼ núma̱aʼ Jeobá dí nandoo kaʼyulú ga̱jma̱a̱ dí májánʼ a̱jkiu̱u̱n. Nda̱yo̱o̱ dí mbújkha̱a̱ dí na̱xna̱ ga̱jma̱a̱ dí nuxna eʼwíinʼ mambáñún a̱ngiu̱lú bi̱ ndañúu̱nʼ”.

Sucursal dí nuxuʼma mbújkha̱a̱ ra̱ʼkhá tháán edxún dí nuni̱. Anthony Carvalho, Comité Sucursal dí rígá náa Brasil, naʼthí: “Mba̱yu̱u̱ʼ tsiguʼ i̱ʼwáʼ sucursal ndiyóoʼ rí mumbayúxu ga̱jma̱a̱ mbújkha̱a̱. Núma̱a̱ má dí nimbayúxu, rúʼko̱ niʼni dí mbaja̱a̱ ñajunʼ. Dí xúgi̱, ikháanʼxu nandoo numbáyíí eʼwáʼ sucursal ga̱jma̱a̱ mbújkha̱a̱. A̱ngiu̱lú nduyáá ñajunʼ dí majuiʼtáraʼa nindxu̱u̱ mbá ñajunʼ dí naguma náa mbájndi numbaaʼ ga̱jma̱a̱ naguánú nduyáá rí ndayóoʼ muñambáá, xóo míjíinʼ xa̱bi̱i̱ Cristo”.

Xú káʼnii gándoo testigos de Jeobá mumbañún a̱ngiu̱ún bi̱ ndañúu̱nʼ rá. Itháan májánʼ dí murajkua̱a̱ mbújkha̱a̱ náa obra mundial ga̱jma̱a̱ xúxuʼma mbújkha̱a̱ náa i̱ʼwáʼ sucursal dí rígá i̱ʼwáʼ país. Ma̱ndoo murajkua̱a̱ náa caja dí rígá náa guʼwá nagimbáánʼ dí naʼthí “Obra mundial” o náa donate.jw.org. Ra̱ʼkhá tháán nañambáá mbújkha̱a̱ dí najuixná.