Canal ndrígulú dí nagruigú ga̱jma̱a̱ satélite nambáñún bi̱ na̱nguá guáʼdáá internet

Xúgíʼ gu̱nʼ nuguáʼthi̱i̱n mbuʼyáá videos dí naxnúlú tsiaki̱i̱ dí nagájnuu náa JW Broadcasting. Mú mbaʼin a̱ngiu̱lú bi̱ kúwá náa África na̱nguá xóo mbuyáá ga̱jma̱a̱ internet. Náá numuu rá.

Mbaʼin xa̱bu̱ náa África na̱nguá guáʼdáá internet. Ga̱jma̱a̱ xuajin náa rígá internet, minumuu wéñuuʼ o na̱nguá eñajunʼ májánʼ. Mbá xkri̱da, mbá míʼtsú, mbáa superintendente de circuito bi̱ xtáa náa Madagascar nirígú video JW Broadcasting dí natsimuu mámbá gu̱nʼ náa mbá cibercafé ga̱jma̱a̱ ndiyóoʼ maʼni numuu mbá 16 dólares.a Ra̱ʼkhá tháán mba̱a̱ mbújkha̱a̱ nindxu̱u̱ rígi̱, nindxu̱u̱ itháan mba̱a̱ ki xóo dí nadaaʼ mbáa xa̱bu̱ náa mbá semana.

Maski ajndu xúʼko̱, dí xúgi̱ ra̱ʼkhá tháán mbaʼin xa̱bu̱ bi̱ kúwá náa África nandoo nduyáá videos dí natsimuu náa JW Broadcasting ga̱jma̱a̱ tséyóoʼ má majmúún internet. Xú káʼnii eni̱ xá.

Asndu nákhá tsiguʼ 2017, bi̱ kúwá náa África subsahariana ma̱ndoo mbuyáá JW Broadcasting náa mbá canal dí nagruigú ga̱jma̱a̱ satélite. Canal rígi̱ ma̱ndoo mbuyáá xúgíʼ mbiʼi, xúgíʼ semana náa mbá 16 ajngáa.

Mu a̱ngiu̱lú mbuyáá videos náa canal rígi̱, testigos de Jeobá nuni̱ numáá mbá canal ndrígóo televisión dí nagruigú ga̱jma̱a̱ satélite. Señal ndrígóo satélite na̱jkha̱nú náa mbá 35 xuajin dí rígá náa África subsahariana, ga̱jma̱a̱ naguma numáá mbá 12,000 dólares mámbá gu̱nʼ. Ma̱ngaa, nguáná ndayóoʼ maguma numáá i̱mba̱ canal mu mbaʼin xa̱bu̱ mbuyáá asamblea regional ga̱jma̱a̱ discurso kiejuunʼ dí najuixnájxi̱ índo̱ mbáa ndxájulú bi̱ na̱ʼkha̱ náa Guʼwá náa phú na̱ʼkha̱ ikha na̱jkha̱ náa sucursal dí rígá ikhí.

Mbaʼin a̱ngiu̱lú ga̱jma̱a̱ mbaʼin bi̱ na̱nguá nindxu̱ún Testigos naʼngu̱u̱n nduyáá canal rígi̱ náa televisión ndrígu̱ún. Mú, kúwá má mbaʼin bi̱ na̱nguá guáʼdáá mbújkha̱a̱ mu mutsi dí ndayóoʼ majmúún mu mbuyáá canal rígi̱. Ikha jngóo náa itháán dí 3,670 Guʼwá nagimbáanʼ nigumaratáá mu ikhí a̱ngiu̱lú ma̱ndoo mbuyáá JW Broadcasting náa canal dí nagruigú ga̱jma̱a̱ satélite. Á mu a̱ngiu̱lú náa Guʼwá nagimbáanʼ guáʼdáá má tele o mbá proyector, i̱ndó má ndayóoʼ maguma numáá mbá 70 dólares wáa mu maʼga̱nú rí majmúún náa Guʼwá nagimbáanʼ. Mú á mu na̱nguá guáʼdáá tele o mbá proyector, naguma numáá 530 dólares ga̱jma̱a̱ numuu xúgíʼ dí majmúún.

A̱ngiu̱lú ra̱ʼkhá tháán edxún numuu rí naʼngu̱u̱n nduyáá canal rígi̱. Mbáa anciano bi̱ xtáa náa Camerún naʼthí: “Ikhúún gajmiúnʼ bi̱ kúwá náa goʼwóʼ, ndu̱ya̱a̱xu dí canal rígi̱ nindxu̱u̱ xóo maná dí rígá náa majñuuʼ ku̱ba̱ʼ mijxooʼ”. Odebode, mbáa ndxájulú xa̱biya̱ bi̱ xtáa náa Nigeria, naʼthí: “Nagimbáanʼxu mu mbu̱ya̱a̱ canal rígi̱ ajtsú nuthu náa mámbá semana. Ejñu̱nʼ ra̱ʼkhá tháán nanigu̱u̱nʼ, dí nuthu̱nʼ dí magruígu maski ajndu na̱nguá nindxu̱u̱ mbiʼi dí kaʼyoo mbu̱ya̱a̱xu”. Rose, mbáa ndxájulú a̱ʼgu̱ bi̱ xtáa náa Nigeria, naʼthí: “¡Ra̱ʼkhá tháán nadxuʼ! Nákhá ginii naniguuʼ mba̱yo̱o̱ noticias, mú rí xúgi̱ naniguuʼ mba̱yo̱o̱ canal JW. Índo̱ nda̱yo̱o̱ noticias, nakiʼnún mbá nache̱ ga̱jma̱a̱ natsimuu presión ndrígóʼ. Mú, canal JW nambáyúʼ ga̱jma̱a̱ naʼni dí maxtáá tsímáá. Nindxu̱u̱ canal dí itháán naniguʼ mba̱yo̱o̱. Núma̱aʼ má Jeobá ga̱jma̱a̱ numuu canal”.

Mbáa ndxájulú superintendente de circuito bi̱ xtáa náa Mozambique naʼthí dí náa circuito ndrígóo, nigumaratáá Guʼwá nagimbáanʼ mu mundrigú señal ndrígóo satélite mu xúʼko̱ mbuyáá canal JW. A̱ngiu̱lú naguánú mbá hora wapháá o itháan mu mbuyáá JW Broadcasting nákhá xóó tségi̱ʼdu̱u̱ reunión.

Índo̱ nirígá asamblea internacional nákhá tsiguʼ 2019 náa Johannesburgo (Sudáfrica), nijmaa canal mu mbá mijna gu̱wa̱ʼ xuajin mbuyáá discurso dí itháán mba̱ʼu̱ dí nixnajxi̱ a̱ngiu̱lú Cuerpo Gobernante. Sphumelele, bi̱ xtáa náa Departamento ndrígóo Broadcasting dí rígá náa sucursal ndrígóo Sudáfrica, naʼthí: “Nákhá ginii najmuxu internet mu a̱ngiu̱lú mbuyáá discursos. Mú ndayóoʼ dí marigá májánʼ señal ga̱jma̱a̱ nutsi̱xu datos. Rí xúgi̱ nánguá eʼniu̱xu wéñuuʼ gakhi̱i̱ ga̱jma̱a̱ na̱nguá numuu wéñuuʼ dí majmuxu canal dí nagruigú ga̱jma̱a̱ satélite”.

Númala wéñuuʼ ga̱jma̱a̱ numuu mbújkha̱a̱ dí nuxnala, a̱ngiu̱lú bi̱ kúwá náa África dí xúgi̱ nandoo nduyáá JW Broadcasting dí nagruigú ga̱jma̱a̱ satélite. Númala wéñuuʼ ga̱jma̱a̱ numuu dí nuxnala náa obra mundial ga̱jma̱a̱ náa donate.jw.org.