Á mu ikháán xtaʼdiin e̱ji̱n majkhiinʼ atambáñúún muniratáá comentario dí ma̱ndoo muthi ikhiin. Náa tikhu reunión najuiʼthá ga̱jma̱a̱ numuu xkujndu dí naguáʼdáá bi̱ nidamijná o aʼkhá xkawiʼ dí nuni̱ xa̱bu̱. Maski ajndu xúʼko̱ marígá mbóo o a̱jma̱ kutriga̱ náa e̱ji̱nʼ ma̱ndoo muthi. Ma̱ngaa atambáñúún e̱jña̱a̱ʼ makru̱ʼu̱u̱n ndíjkha dí xákánún xúgíʼ comentario mámbá dí guxujxi̱ ñawúúnʼ. Á mu narathúún xúgíʼ rígi̱, ikhiin xákúwi̱i̱n ngíná índo̱ gakánúún eʼwíinʼ comentario dí nindúún muthi (1 Tim. 6:18). Xugiáanʼlu ma̱ndoo muʼni ratháá májánʼ comentario dí maʼgá gamajkhu náa Jeobá ga̱jma̱a̱ dí maxnúún tsiakii a̱ngiu̱lú (Prov. 25:11). Nguáná ma̱ndoo muʼthá mbá chíʼgíiʼ dí niguaʼnilú ikháanʼ mu ragíʼmaa muʼthá wéñuuʼ i̱ndó ga̱jma̱a̱ numulú (Prov. 27:2; 2 Cor. 10:18). Rí phú gíʼmaa muʼni, nindxu̱u̱ dí muʼthá itháán ga̱jma̱a̱ numuu Jeobá, Ajngóo ga̱jma̱a̱ numuu xuajñuu (Apoc. 4:11). w23.04 24, 25 kutriga̱ 17, 18

Ngajua gíʼdoo numuu mu xáguanúlú muʼnuʼ ga̱jma̱a̱ rí mundxaʼwamíjna̱ má xúʼko̱ dí májánʼ (Mat. 22:​37-39). Mbá xkri̱da, dí nandulú kuʼyáá Dios nambáyulú mu muʼtáraʼa maski ajndu nuraʼníí xkujndu (2 Tim. 1:​7, 8). Numuu rí nandulú kuʼñúún xa̱bu̱ bi̱ na̱nguá ku̱mu̱ún xó má ikháanʼ, nuʼnilú xúgíʼ xó má eʼngulú mu muʼtáruʼúún, asndu nuʼniraʼmáʼ carta náa inún o nuʼtáruʼúún ga̱jma̱a̱ teléfono. Nuguaʼthi̱i̱n dí maʼga̱nú mbóoʼ mbiʼi dí muriʼkhumijná ga̱jma̱a̱ dí muni̱ dí májánʼ (Ezeq. 18:​27, 28). Ma̱ngaa nandulú kuʼñúún a̱ngiu̱lú, ikha jngóo nuxnámíjnálú tsiakii, ga̱jma̱a̱ numbayúmíjnálú (1 Tes. 5:11). Ikháá má kayuuʼ xóo soldados bi̱ numbayúmíjná kaníkiin. Xúʼko̱ má mangáanʼ xúʼni gajuunʼ rí muʼni gawúúnʼ a̱ngiu̱lú ga̱jma̱a̱ xurtanga̱a̱ dí raʼkhí niniulúʼ (1 Tes. 5:​13, 15). I̱mba̱ dí xóo nusngajmá dí nandulú kuʼñúún a̱ngiu̱lú nindxu̱u̱ dí mbuʼyamajkún bi̱ kuya̱ edxu̱u̱ náa nagimbáanʼ (1 Tes. 5:12). w23.06 10 kutriga̱ 6; 11 kutriga̱ 10, 11

Mbá rí ma’ni gújkhúʼ fe ndrígúlú nindxu̱u̱ rí mundxa̱ʼwa̱míjna̱ ga̱jma̱a̱ numuu rí nijuiʼtsiwáánʼ. Rí nijuiʼtsiwáánʼ naʼni mbuʼyáá gajkhun dí xúgíʼ rí nikudaminaʼ maʼni Jeobá mambanúu. Gíʼdoo wéñuʼ numuu muriʼyáʼ mbiʼi mundxaʼwámijná xúgíʼ rí ndiyóoʼ maguma mu majuiʼtsiwáánʼ ma̱ngaa ndíjkha rí Jeobá niʼni xúʼko̱. Rúʼko̱ gambáyulúʼ mbuʼyáá gajkhun, dí Jeobá gajkhun maʼni marigá mbá numbaaʼ itháan májánʼ ga̱jma̱a̱ rí makuwáanʼ kámuu mbiʼi. Náa numuu rí nuʼthá xúʼkhíin rá. Gundxaʼwámíjná ga̱jma̱a̱ numuu rí nijuiʼtsiwáánʼlú Jeobá, niniñuuʼ rí A̱ʼdióo bi̱ mbáwíi nikungua̱a̱nʼ náa ku̱ba̱ʼ bi̱ nambáxu̱u̱ itháán májánʼ ga̱jma̱a̱, mu maxtáa náa tsu̱du̱u̱ ku̱ba̱ʼ gi̱i̱ xóo mbáa xa̱bu̱ jmbii. Índo̱ Jesús nixtáa gi̱i̱, nimínuuʼ wéñuuʼ niraʼnuu mbaʼa tsáʼkhá gakhi̱i̱ rí asndu nikháñuu. Rígi̱ naʼni mbuʼyáá dí Jeobá ra̱ʼkhá tháán mba̱a̱ rí niʼni numuu. Xóo niʼtsiwáánʼlú ga̱jma̱a̱ rí ikhaa raʼkháa tháán májánʼ a̱jkiu̱u̱n, nditháan xániñuuʼ rí A̱ʼdióo magíʼnuu xúgi̱ kaʼnii mu makuwáánʼ májánʼ káaʼ mbá xngaa (Juan 3:16; 1 Ped. 1:​18, 19). Numuu rí Jeobá ra̱ʼkhá tháán mba̱a̱ dí niʼni numuu, ikha jngóo ikhaa gáʼni rí ma̱ndoo makuwáánʼ kámuu mbiʼi náa numbaaʼ nuxi̱ʼ. w23.04 27 kutriga̱ 8, 9