Abdías
Rígi̱ rí naʼthí Tátá Jeobá bi̱ itháán mba̱a̱ ga̱jma̱a̱ numuu Edom:
“Nidxawíínxu̱ mbá rí niʼthí Jeobá
ga̱jma̱a̱ nijuaxúʼmaa mbáa bi̱ maʼga kayóo ajngáa mu maʼthúún xa̱bu̱ bi̱ kúwá náa i̱ʼwáʼ xuajin:
‹Guguajxu̱la. Guniratamijná muxmijná gajmiúlú›”.
2 “¡Atayáá! Ni̱ni̱ dí xáraʼdáá numaaʼ náa majñu̱únʼ i̱ʼwáʼ xuajin,
xa̱bu̱ nawiñu̱u̱nʼ kuyaaʼ.
3 Rí niʼnimbamínáʼ a̱jkia̱a̱nʼ niʼni nduwáánʼ,
ikháán bi̱ xtaa náa tsíñu,
bi̱ xtaa náa mitsídánʼ, ikháán bi̱ niratáminaʼ náa awúu̱n a̱jkia̱a̱nʼ:
‹Tsáá gáʼngo̱o̱ gáʼni magájtaa mbayííʼ rá.›
4 Maski má guʼwáaʼ rígá* mitsídánʼ xó má bi̱yú
o natani̱ xájáanʼ náa majñu̱únʼ a̱ʼgua̱a̱n,
ma̱ni̱ dí marajta̱a̱ʼ ikhí”, eʼthí Jeobá.
5 “Á mu naguwáʼ kuʼwáʼ rí mbruʼun,
lá raʼkháa i̱ndó muni̱ kuʼwáaʼ rí nandún ikhiin xáʼ.
(¡Mú ikháán maguma gámbáanʼ mbá kayuuʼ!).*
Á mu naguwáʼ bi̱ nundrigú uva,
lá raʼkháa muniña̱a̱ʼ dí mataʼyáaʼ xáʼ.
6 ¡Kuduun ndiyáʼ xúgíʼ dí gíʼdoo Esaú!
¡Ndiyáʼ ga̱jma̱a̱ nixkamaa xúgíʼ rí gíʼdoo numuu dí ikhaa gíʼdoo!
7 Murmajngua̱a̱nʼ asndu náa ndawaa.
Xúgíinʼ bi̱ nambájxáaʼ gajmiáanʼ nini̱ nduwáánʼ.
Xa̱bu̱ bi̱ kúwá tsímáá ga̱jma̱á nindxa̱a̱ʼ táʼnga̱a̱ʼ gátani̱ gajmiáanʼ.
Xa̱bu̱ bi̱ nuphiʼtsu mbóó ga̱jma̱á nindxa̱a̱ʼ mugíʼ mbá tsáʼkhá náa ikháán,
mú ikháán xáta̱ya̱a̱.
8 Mbiʼi rúʼko̱, eʼthí Jeobá,
lá xáni̱ gámbíin xa̱bu̱ bi̱ najmañún bi̱ kúwá náa Edom
ga̱jma̱a̱ ku̱ma̱ dí rígá náa kúbá ndrígóo Esaú ráʼ.
9 Mamiñún asndu maguíʼiin xa̱bu̱ mixkujiiʼ bi̱ xtaʼdiin Temán,
numuu rí xúgíinʼ bi̱ kúwá náa kúbá ndrígóo Esaú maguma gámbíin.
10 Ga̱jma̱a̱ numuu rí niguma ngínáa gi̱ʼtia̱a̱ʼ, Jacob,
ikha jngóo magajnúu gamajkuaaʼ,
ga̱jma̱a̱ ikháán maguma gámbáanʼ mbá kayuuʼ.
11 Mbiʼi rí ikháán niriejún níjní,
mbiʼi rí xa̱bu̱ bi̱ tséjmaʼniúnʼ nigún kudiin soldádiu̱u̱ gi̱ʼtia̱a̱ʼ,
índo̱ xa̱bu̱ bi̱ naguwaáʼ nitu̱ʼu̱u̱n náa xkrugoo, nirawíi suerte* mu magún kudúún dí rígá náa Jerusalén,
ikháán ma̱ngaa nitani̱ xóo ikhiin nini̱.
12 Táʼyóoʼ maʼdxaaʼ ga̱jma̱a̱ numuu gamiéjunʼ rí nigíʼnuu gi̱ʼtia̱a̱ʼ,
táʼyóoʼ maʼdxuu a̱jkia̱a̱nʼ ga̱jma̱a̱ numún xa̱bu̱ Judá bi̱ nikháñún,
ni má táʼyóoʼ matatsijmíin mbiʼi rí nimíníiʼ.
13 Táʼyóoʼ mata̱ʼa̱a̱ʼ náa xkrugoo xuajñunʼ mbiʼi rí niraʼnuu gamiéjunʼ,
ni má táʼyóoʼ maʼdxaaʼ nákha mbiʼi rí ikhaa nigíʼnuu gamiéjunʼ,
ni má táʼyóoʼ midxu̱ʼ xtaaʼ rí gíʼdoo, mbiʼi dí ikhaa niraʼnuu gamiéjunʼ.
14 Táʼyóoʼ mariejún náa nawiʼtáa kamba̱a̱ mu maradíin bi̱ nikáwíin,
ni má táʼyóoʼ maraxnaxíin bi̱ nikáwíin náa mbiʼi rí niraʼníí gamiéjunʼ.
15 Numuu rí na̱ʼkha̱ mijngii mbiʼi ndrígóo Jeobá rí manda̱ʼa̱a̱ cuenta náa xúgíʼ xuajin.
Xó má ikháán nitani̱ xúʼko̱ ma gágu̱máán.
Xó má ikháán* nitaniu̱u̱n eʼwíinʼ xúʼko̱ má gagumáán mangáánʼ.
16 Xó má ikháanʼla niwan vino náa kúbá ndrígóʼ rí kaʼwu,
xúʼko̱ má xa̱bu̱ bi̱ kúwá náa i̱ʼwáʼ xuajin muwa̱a̱n rí nakásngañu̱ʼ xóo vino.
Muwa̱a̱n,
ga̱jma̱a̱ maguma gámbíin, mani̱ndxu̱u̱ asndu xóo nditháan tákúwá.
17 Mú bi̱ gákríya̱a̱ʼ maxtáa náa kúbá Sion,
ga̱jma̱a̱ ikhaa mani̱ndxu̱u̱ mikaʼwii,
goʼwóo Jacob matanga̱a̱ magruigú rí kaʼyoo.
18 Goʼwóo Jacob mani̱ndxu̱u̱ xóo mbá aguʼ,
goʼwóo José mani̱ndxu̱u̱ xóo riʼyu̱u̱ aguʼ.
Mú goʼwóo Esaú mani̱ndxu̱u̱ xóo náskhá.
Ikhiin mugi̱da̱a̱ʼ agiuuʼ mu mi̱kha̱a̱,
nimbáa xákríyáaʼ náa goʼwóo Esaú
numuu rí mínaaʼ má Jeobá niʼthí.
19 Mudrigú mbaaʼ Négueb ma̱ngaa kúbá ndrígóo Esaú,
Sefelá ga̱jma̱a̱ ku̱ba̱ʼ ndrígu̱ún filisteos.
Mudrigú mbayuuʼ Efraín ga̱jma̱a̱ mbayuuʼ Samaria,
Benjamín ma̱ngaa magruigú Galaad.
20 Bi̱ kúwíin náa xtájtsí rígi̱ bi̱ nijkha kiʼdiin,
xuajin Israel, xúgíʼ ku̱bu̱únʼ cananeos asndu náa Sarepta mani̱ndxu̱u̱ ku̱bu̱únʼ ikhiin.
Bi̱ ni̱jkha̱ kiʼdiin náa Jerusalén bi̱ kúwá náa Sefarad, mudrigú xuajin dí rígá náa mbaaʼ Négueb.
21 Bi̱ nini̱ káwíin xa̱bu̱ matsimún náa kúbá Sion
mu munda̱ʼa̱a̱ cuenta kúbá ndrígóo Esaú,
ga̱jma̱a̱ Jeobá maʼga̱nú maʼtáñajunʼ”.