xa̱bu̱ bi̱ gátuxi̱ín makuwa mbu̱júu̱ ga̱jma̱a̱ xa̱bu̱ bi̱ gakáwíin náa Armagedón. Náa ikha rígi̱ ma̱ʼkha̱ xúgíʼ rí eyoo masngájma Jeobá náa mbá míí tsiguʼ. Xúʼko̱ kaʼnii gáʼni rí mámbáa gaxnáxi̱i̱ cuenta índo̱ gáʼni mbá míí tsiguʼ.

Índo̱ gáʼga̱nú mbiʼi rí Dios manda̱ʼa̱a̱ cuenta, ra̱ʼkhá tháán mbaʼin wéñuʼ xa̱bu̱ mugi̱ʼdi̱i̱ majmañún ndiéjunʼ eyoo Dios muni ga̱jma̱a̱ nda̱wa̱á xa̱bu̱ muni xúʼko̱ kaʼnii. Ikha jngó, gíʼmaa rí miʼsngúún xúgínʼ xa̱bu̱. ‹Xa̱bu̱ bi̱ kuwa náa tsu̱du̱u̱ ku̱ba̱ʼ, majmañún rí jmbu› (Isaías 26:9). Mú mbaʼin xa̱bu̱ xáʼndun muni rí eyoo Dios. Isaías 26:10 naʼthí: “Maski ajndu nuni mba̱a̱ a̱jkiu̱ún kuyáá xa̱bu̱ bi̱ ra̱májánʼ, ikhaa xáʼga̱nú majmañuu maʼni rí jmbu. Náa ku̱ba̱ʼ náa rígá rí jmbu ikhaa maʼni dí ra̱májánʼ, ga̱jma̱a̱ xáʼngo̱o̱ gáʼyoo rí Jeobá najmañuu wéñuʼ”. Xa̱bu̱ bugi̱ bi̱ ra̱míjínʼ maguma gámbíin kámuu mbiʼi índo̱ Dios gánda̱ʼa̱a̱ cuenta (Isaías 65:20).

Índo̱ gámbá Mbiʼi rí Dios manda̱ʼa̱a̱ cuenta, xa̱bu̱ bi̱ gakáwíin ‹maguanu makuwá› tsímáá wéñuʼ, numuu rí ní xaguaʼdáá aʼkhá (Revelación 20:5). Ikha jngó, índo̱ Dios gaxtáa randa̱ʼa̱a̱ cuenta, xúgínʼ xa̱bu̱ ní xáguaʼdáá aʼkhá, maʼni xó má nákha nigi̱ʼdu̱u̱ nikuwa timbíi̱n xa̱bu̱ nákha wajyúúʼ (1 Corintios 15:24-28). Nda̱wa̱á kayuʼ marigá imbo̱o̱ prueba. Ikhú Satanás magajnáa ga̱jma̱a̱ muniñaʼ rí maʼninduwiinʼ xóó xa̱bu̱ (Revelación 20:3, 7-10). Xa̱bu̱ bi̱ xúni̱ rí nandoo Gixa̱a̱ mbuyáá xú káʼnii xtáa rambánuu májánʼ wéñuʼ rí naʼthí náa Biblia: “Xa̱bu̱ bi̱ nuni rí jmbu makuwá kámuu mbiʼi náa tsu̱du̱u̱ ku̱ba̱ʼ.” (Salmo 37:29). Ikha jngó, Mbiʼi rí Dios gánda̱ʼa̱a̱ cuenta mani̱ndxu̱u̱ mbá rí májánʼ wéñuʼ náa xa̱bu̱ bi̱ nuni rí jmbu.

NÁKHA xóó tséjkha̱nú tsiguʼ 1914, mbá chímbaʼin bi̱ ninigajmaa Biblia nijngruigu̱u̱n ruti mba̱yu̱ʼ tsiguʼ rí 1914 marigá mbaʼa rí magiʼdoo wéñuʼ numuu. Ndiéjunʼ gárígá rá. Ndiéjunʼ esngájma rí 1914 ninindxu̱u̱ mbá tsiguʼ rí nigiʼdoo wéñuʼ numuu rá.

Náa Lucas 21:24 na̱ʼkha̱ raʼthí rí niʼthí Jesús: “Jame mistriga [o muni gámbáa] xuajin Jerusalén guni xabo, asjndo na aganu mbiʼi ri xabo, gentiles naxutañajun naʼ numba rigueʼ”. Jerusalén ninindxu̱u̱ mbá xuajen náa nikuwa reyes bi̱ nitañajúnʼ xa̱bu̱ judíos. Ikhí nitañajunʼ mbaʼin reyes bi̱ niguwáʼ náa goʼwóo David (Salmo 48:1, 2). Reyes bugi̱ ninindxu̱ún mixtiʼkun náa xúgínʼ reyes numuu rí nitri̱gi̱i̱n ‹náa xílí ndrígóo Jeobá›, xóo muʼthá, nini xtiʼkuriyaaʼ Dios (1 Crónicas 29:23). Ikha jngó, Jerusalén nandoo gáʼthi náa naʼtáñajunʼ Jeobá.

Nguáná nigi̱ʼdi̱i̱ xuajen mu muni gámbáa Xa̱bu̱ Ñajunʼ ndrígóo Dios ga̱jma̱a̱ xú káʼnii niʼni xá. Rígi̱ nirígá nákha tsiguʼ 607 tsiguʼ rí nirígá ginii (ts.g.), índo̱ xa̱bu̱ bi̱ kuwa náa Babilonia nitu̱ʼu̱u̱n náa Jerusalén. ‹Náa xílí ndrígóo Jeobá› na̱nguá nixtáa nimbáa, ga̱jma̱a̱ na̱nguá nitañajunʼ mbaʼin reyes bi̱ niguwáʼ náa goʼwóo David (2 Reyes 25:1-26). Lá ní xáʼtañajunʼ nimbáa náa xuajen Jerusalén kámuu mbiʼi rá. Na̱nguá, numuu rí náa libro ndrígóo Ezequiel najuiʼtháán Sedequías, imbawíí rey bi̱ xóó xtáa náa xuajen rúʼko̱: “Atrígúu xtíin rí nagiwanʼ edxu̱ún, ga̱jma̱a̱ atrígúu corona. Rígi̱ xáʼga̱nú magiʼdoo [nimbáa] asndu índo̱ gáʼkha̱ bi̱ kaʼyoo maʼtáñajunʼ, ga̱jma̱a̱ ikhaa gíʼmaa rí maxnu̱u̱ rígi̱” (Ezequiel 21:26, 27). Jesús nindxu̱u̱ xa̱bu̱ “bi̱ kaʼyoo maʼtáñajunʼ” bi̱ makhánúu corona ndrígóo David (Lucas 1:32, 33). Ikha jngó, Jerusalén xáguanúu xó má nákha nini gámbáa índo̱ Jesús gáʼga̱nú mani̱ndxu̱u̱ Rey.

Nguánáa nirígá rígi̱ rá. Jesús niʼthí rí xa̱bu̱ gentiles (nandoo gáʼthi bi̱ raʼkhíin judíos) mutañajunʼ mbá nguáthá mbiʼi. Náa Daniel capítulo 4 gáʼthulúʼ nguáthá mba̱yu̱ʼ gáʼni rígi̱. Ikhí naʼtáriyaʼ mbá xnuʼndaa rí nigiʼdoo mbáa rey bi̱ nigumbiʼyuu Nabucodonosor bi̱ nixtáa náa xuajin Babilonia. Náa xnuʼndaa rúʼko̱ ndiʼyoo xú káʼnii nidi̱i̱ mbá ixi̱ mba̱a̱ wéñuʼ. I̱ndó xminduʼ niguanúu, rí niruʼwa̱a̱ ga̱jma̱a̱ hierro ga̱jma̱a̱ cobre mu xágaja̱a̱ itháan. Nda̱wa̱á, mbáa ángel niʼthí: “Manújngoo mbá juwan tiempo náa ikhaa” (Daniel 4:10-16).

Nguáná náa Biblia najmuu xkri̱da ndrígóo mbá ixi̱ mu maʼthí ga̱jma̱a̱ numún Xa̱bu̱ Ñajunʼ (Ezequiel 17:22-24; 31:2-5). Ikha jngó, índo̱ najmuu xóo xkri̱da rí nidi̱i̱ mbá ixi̱ nandoo gáʼthi rí xa̱bu̱ bi̱ nigruigi̱i̱n Dios mutañajunʼ náa Jerusalén ní xútañajunʼ. Mú, náa visión nikujmaa rí “Jerusalén” maʼga̱nú “mambáa” mbá nguáthá mbiʼi: Mbá “juwan tiempo”. Nguáthá phú gájyúuʼ tiempo rígi̱ rá.

Rí huasjŋgajma Juan (Apocalipsis) 12:6, 14 nasngájma rí ajtsú tiempo tikhu na̱jkha̱nú naʼni “Mba mil ijma-mu ciento isu-mu squiñuʼ mbiʼji”. Ikha jngó, mbá “juwan tiempo” na̱jkha̱nú naʼni mbá: 2,520 mbiʼi. Xa̱bu̱ bi̱ na̱nguá ni̱ndxu̱ún judíos ndiyáá rí asndu xóo nda̱a̱ numuu Xa̱bu̱ Ñajunʼ ndrígóo Dios nda̱wa̱á rí ninújngoo 2,520 mbiʼi niguma gámbáa Jerusalén. Rí kiʼtáriyaʼ rígi̱ nasngájma kaʼwu rí gíʼmaa maʼni itháan mba̱yu̱ʼ mbiʼi. Á mu nuraxnuu Números 14:34 ga̱jma̱a̱ Ezequiel 4:6, mbuʼyáá rí a̱jma̱ texto rígi̱ naʼthí rí “mbá mbiʼi nindxu̱u̱ mbá tsiguʼ”. Ikha jngó mbá “juwan tiempo” na̱jkha̱nú naʼni mbá 2,520 tsiguʼ.

Rí mbá 2,520 nigi̱ʼdu̱u̱ nákha gu̱nʼ octubre tsiguʼ 607 ts.g. —índo̱ xa̱bu̱ bi̱ kuwa náa Babilonia nitu̱ʼu̱u̱n náa xuajin Jerusalén ga̱jma̱a̱ niriyakaʼyíʼ trono rey bi̱ na̱ʼkha̱ náa goʼwóo David— ga̱jma̱a̱ niguámbá nákha gu̱nʼ octubre tsiguʼ 1914. Ikhú ni̱jkha̱nú “mbiʼi ri xabo, gentiles naxutañajun naʼ numba rigueʼ” ga̱jma̱a̱ índo̱ Dios nigíiʼ Jesucristo mu mani̱ndxu̱u̱ Rey mekhuíí (Salmo 2:1-6; Daniel 7:13, 14).a

Jesús niʼthí rí índo̱ ikhaa gaxtáa raʼtáñajunʼ xóo Rey náa mekhuíí marigá mbaʼa rí mbuʼyáá, xó má guerra, ewiʼ, rí naʼxma ga̱jma̱a̱ mbaʼa nandii (Mateo 24:3-8; Lucas 21:11). Ga̱jma̱a̱ xúʼko̱ má xtáa rarígá. Rígi̱ nasngájma kaʼwu rí tsiguʼ 1914 nigi̱ʼdu̱u̱ nirígá Reino ndrígóo Dios náa mekhuíí ga̱jma̱a̱ nigi̱ʼdu̱u̱ ratumuu mbiʼi náa numbaaʼ xkawiʼ rígi̱ (2 Timoteo 3:1-5).

NÁA Biblia na̱ʼkha̱ tikhuu texto náa naʼthí ga̱jma̱a̱ numuu mbá ángel bi̱ nagumbiʼyuu Miguel. Mú náa xúgíʼ texto rúʼko̱ na̱ʼkha̱ raʼthí rí ikhaa xtáa rañajunʼ má xúʼko̱. Náa libro ndrígóo Daniel na̱ʼkha̱ raʼthí rí ikhaa xtáa raxmínaʼ gajmíi̱n ángeles bi̱ ra̱míjínʼ; náa i̱yi̱i̱ʼ ndrígóo Judas naʼthí rí xtáa ragi̱ʼdu̱u̱ ga̱jma̱a̱ Gixa̱a̱, ma̱ngaa náa libro ndrígóo Revelación (o Apocalipsis), naʼthí rí xtáa raʼni guerra náa Satanás gajmíi̱n xa̱bu̱ wéñiʼ ndrígóo. Ikhaa nañawu̱u̱n má xúʼko̱ rí naʼtáñajunʼ Jeobá ga̱jma̱a̱ nagi̱ʼdu̱u̱ gajmíi̱n bi̱ guáʼdáá sia̱nʼ náa Dios. Rígi̱ nasngájma rí naʼni xó má eyoo gáʼthi mbiʼyuu: “Tsáa nindxu̱u̱ xóo Dios rá.” Mú, tsáa nindxu̱u̱ Miguel rá.

Nguáná, tikhun xa̱bu̱ guáʼdáá itháan rí mbóo mbiʼñún. Mbá xkri̱da, Jacob nindxu̱u̱ bi̱ ndiyá edxu̱u̱ náa mbá guʼwíin, ma̱ngaa nijmaʼniiʼ xóo Israel, ga̱jma̱a̱ apóstol Pedro nijmaʼniiʼ xóo Simón (Génesis 49:1, 2; Mateo 10:2). Xúʼko̱ má ma̱ngaa, náa Biblia nasngájma rí Miguel nindxu̱u̱ imbo̱o̱ mbiʼyuu Jesucristo asndu nákha xóó tséʼkha̱ náa tsu̱du̱u̱ Ku̱ba̱ʼ ga̱jma̱a̱ nda̱wa̱á rí ni̱jkha̱a̱ mekhuíí. Guʼyáá ndiéjunʼ eʼthí náa Escrituras mu ma̱ndoo makru̱ʼu̱lú rígi̱.

Arcángel. Náa Ajngá rawunʼ Dios naʼthí rí Miguel nindxu̱u̱ ‹arcángel› (Judas 9). Ajngáa rígi̱ nandoo gáʼthúu̱n “ángel bi̱ phú kayá