Ndiéjunʼ eʼsngúlú mbá nájma̱ i̱yi̱ʼ rí niʼnirámáʼ Pedro rá.

1. Ndiéjunʼ ñajunʼ nixnúu Jeobá apóstol Pedro nákha xóo tsékháñuu rá.

APÓSTOL Pedro niʼni ñajuunʼ Jeobá ga̱jma̱a̱ xúgíʼ a̱jkiu̱u̱n. Nijngruigo̱o̱ raʼtáraʼa ga̱jma̱a̱ Jesús ma̱ngaa nigi̱ʼdu̱u̱ niʼtáruʼun xa̱bu̱ bi̱ na̱nguá nindxu̱ún judíos ga̱jma̱a̱ nda̱wa̱á ninindxu̱u̱ náa Cuerpo Gobernante. Índo̱ inu makhañúu, Jeobá nixnúu itháan ñajunʼ maʼni. Nákha tsiguuʼ 62 ga̱jma̱a̱ 64 tsiguʼ nda̱wa̱á, Dios niʼni di ikhaa maʼnirámáʼ a̱jma̱ i̱yi̱ʼ: Dí xúgi̱ najmaʼnuu xóo timbá ga̱jma̱a̱ ragajma i̱yi̱ʼ rí ninirámáʼ Pedro. Apóstol Pedro nindoo dí a̱jma̱ i̱yi̱ʼ rígi̱ ma̱ndoo mambáñun ma xúʼko̱ Cristianos nda̱wa̱á dí ikhaa gákháñuu (2 Ped. 1:​12-15).

2. Ndíjkha rí nimbáñún a̱ngiu̱lú i̱yi̱ʼ dí niʼnirámáʼ Pedro rá.

² Nákha mbiʼi dí Pedro niʼnirámáʼ i̱yi̱ʼ rígi̱ náa inún a̱ngui̱i̱n ikhiin kúwá “ngíná ga̱jma̱a̱ numuu mixtiʼkhu xkujndu” (1 Ped. 1:6). Nikúwíin mbaʼin xa̱bu̱ bi̱ xkawiinʼ wéñuuʼ bi̱ nuthi dí ragájkhun náa a̱ngiu̱ún ga̱jma̱a̱ nuni rí tsagaa náa nagímbíin (2 Ped. 2:​1, 2, 14). Cristianos bi̱ kúwíin náa Jerusalén inuu má mbuyáá “mbiʼi rí mambáa xúgíʼ” xóo muʼthá dí mambáa xuajñún ga̱jma̱a̱ templo ndrígu̱ún gúni̱ soldados romanos (1 Ped. 4:7). Xó má eʼyáá i̱yi̱ʼ dí niʼnirámáʼ Pedro nimbáñún wéñuuʼ Cristianos mbiʼi rúʼko̱ mu maʼngu̱u̱n muraʼníí xkujndu ga̱jma̱a̱ muni ratamíjná ga̱jma̱a̱ náa mbiʼi dí gáʼkha̱.b

3. Ndíjkha gíʼmaa muʼnigajma̱a̱ a̱jma̱ i̱yi̱ʼ dí niʼnirámáʼ Pedro rá.

³ Maski asndu Pedro niʼnirámáʼ i̱yi̱ʼ rígi̱ náa inún Cristianos bi̱ nikúwíin nákha siglo timbá, Jeobá nindoo rí maguanúu náa Biblia, mu xúʼko̱ xúgiáanʼ ma̱ndoo majmañulú (Rom. 15:4). Mangáánʼ kuwanlú náa mbá numbaaʼ dí nanigu̱u̱nʼ muni dí rakhíʼ ga̱jma̱a̱ nuraʼníí xkujndu dí naʼniulú mingíjyúuʼ muʼni ñajuunʼ Jeobá. Inu má ma̱ʼkha̱ mbá gaʼkhu dí itháan mba̱a̱ ki xóo dí niʼni gámbáa Jerusalén ga̱jma̱a̱ templo ndrígóo. Ikha jngóo a̱jma̱ i̱yi̱ʼ dí niʼnirámáʼ Pedro naʼsngúlú dí gíʼdoo wéñuuʼ numuu muguáʼthi̱i̱n mbiʼi ndrígóo Jeobá ga̱jma̱a̱ dí xámiñúlú gúni̱ eʼwíinʼ, ma̱ngaa dí maʼndulú kuñúún wéñuuʼ a̱ngiu̱lú. Rígi̱ gámbáñún bi̱ kuya̱ edxuu mu muni májánʼ ñajunʼ ndrígún dí muñewu̱u̱n a̱ngiu̱lú bi̱ kúwíin náa nagimbáanʼ.

GUGUAʼTHI̱I̱N MA XÚʼKO̱ DÍ GÁʼKHA̱

4. Ndiéjunʼ gamíi maʼni makáwabaaʼ fe ndrígulú rá. (2 Pedro 3:​3, 4).

⁴ Kuwaanʼ náa majñúnʼ xa̱bu̱ bi̱ na̱nguá guaʼdáá fe dí nákha raʼthí náa Biblia ga̱jma̱a̱ numuu dí marigá nda̱wa̱á. Numuu dí mbayuuʼ má tsiguʼ kuwáanʼ nuʼtáraʼa dí kuwaanʼ náa iwáá mbiʼi, mbáa xa̱bu̱ bi̱ na̱nguá nigúun dí eʼthálú nutsijmáánʼ ga̱jma̱a̱ nuthi dí xáʼga̱nú marigá rígi̱ (atraxnuu 2 Pedro 3:​3, 4). A mu náa nuʼtáraʼa, náa nuñajunʼ o familia ndrígulú maʼtulúʼ rígi̱, mbáa fe ndrígulú makáwabaaʼ. Ndiéjunʼ gámbáyulú rá. Guʼyáá dí niʼthí Pedro.

5. Ndiéjunʼ gambáyulúʼ mu maʼngo̱o̱ a̱jkiu̱lú muguaʼthi̱i̱n índo̱ gáʼkha̱ fin rá. (2 Pedro 3:​8, 9.)

⁵ Mbáa mbaʼin nundxaʼwamíjná dí Jeobá ndajyúuʼ maʼnigámbíin xa̱bu̱ xkawiinʼ. Pedro niʼthí mbá dí naʼni mundxa̱ʼwa̱míjna̱. Niʼni marmáʼáan a̱jkiu̱lú dí Jeobá ndaʼyoo mixtiʼkhu kayuuʼ xóo eʼyáá ikháanʼ mbiʼi (atraxnuu 2 Pedro 3:​8, 9). Ikhaa ndaʼyoo dí mbá mil tsiguʼ nindxu̱u̱ xóo mbóoʼ mbiʼi. Ma̱ngaa ikhaa naʼngo̱o̱ a̱jkiu̱u̱n, ga̱jma̱a̱ na̱nguá eyoo dí nimbáa magumaa gámbáa. Mbiʼi ndrígóo ma̱ʼkha̱ ga̱jma̱a̱ xa̱bu̱ xkawiinʼ makhañún. Lá ragájkhun dí nandulúʼ majmuluʼ itháan májánʼ mbiʼi mu mutaruʼúún xa̱bu̱ náa mbá xúgíʼ numbaaʼ ráʼ.

6. Xú kaʼnii ma̱ndoo musngajmá dí nuguaʼthi̱i̱n ma xúʼko̱ mbiʼi ndrígóo Jeobá rá. (2 Pedro 3:​11, 12.)

⁶ Pedro naʼthúlú dí gakuwáánʼ xawii mu mbuʼyáá mbiʼi ndrígóo Jeobá (atraxnuu 2 Pedro 3:​11, 12). Xu kaʼnii maʼndoo muʼnilú rá. A mu naʼngo̱o̱, gundxa̱ʼwa̱míjna̱ tsejtsí mbiʼi xóo mitsaanʼ makuwáanʼ náa numbaaʼ nuxi̱ʼ. Lá naʼnga̱a̱ʼ natayaminaʼ dí asndu mitsaanʼ ndayáa xiʼ o dí ra̱ʼkhá tháán miʼtsí ganitsu natsu̱ ráʼ. Lá natayaminaʼ dí natandriguíin bi̱ xtañún bi̱ nikháñúún ga̱jma̱a̱ naratá xú kaʼnii nimbánuu profecía dí na̱ʼkha̱ raʼthí náa Biblia xa̱bu̱ bi̱ nikúwíin nakha wajyúuʼ ráʼ. A mu natatsaʼwáminaʼ ga̱jma̱a̱ numuu xúgíʼ rígi̱ mambáyáaʼ mu maraʼti̱i̱n ma xúʼko̱ dí gáʼkha̱ ga̱jma̱a̱ dí ma̱ta̱ya̱a̱ gajkhun dí xtaa náa iwáá mbiʼi. Numuu dí nduʼyáá má ndiéjunʼ gárígá nda̱wa̱á, ikha jngóo tséʼnimbulú náa kiʼsngáa dí rakhíʼ dí nuthi (2 Ped. 3:17).

GUNIʼÑÁÁʼ DÍ NAMÍÑULÚ ENI̱ EʼWÍINʼ

7. Ndiéjunʼ ma̱ndoo maʼniulú a mu namíñulú eʼni eʼwíinʼ rá.

⁷ Nduʼyáá dí mbiʼi ndrígóo Jeobá inu ma̱ʼkha̱. Ikha jngóo nandulúʼ dí eʼwíinʼ mudxawíín ajngáa rí májánʼ ga̱jma̱a̱ numuu Reino. Mú, nguáná maʼniulú miʼskhaa muʼtálu. Náá numuu rá. Numuu rí namíñulú eni̱ xa̱bu̱. Xígi̱ káʼnii niku̱mu̱ʼ Pedro índo̱ inu muxiyáa Jesús. Nimíñuu maʼthí dí nindxu̱u̱ xa̱bi̱i̱ ga̱jma̱a̱ mbaʼa nuthu niʼthí rí tseniniiʼ (Mat. 26:​69-75). Ikhaa nda̱wa̱á ni támiñuu ga̱jma̱a̱ niʼngo̱o̱ niʼthí: “Xámíñala ga̱jma̱a̱ rí ikhiin naʼnimíñún, ni má xáxmiéjuanla” (1 Ped. 3:14). Ajngáa ndrígóo naʼni mbuʼyáá dí ma̱ndoo muniʼñááʼ dí namíñulú eni̱ eʼwíinʼ.

8. Ndiéjunʼ gámbáyulúʼ mu maʼngulú muniñaʼ dí namíñulú eni̱ eʼwíinʼ rá.

⁸ Ndiéjunʼ gámbáyulú mu xámiñúlú kuʼñúún eʼwíinʼ rá. Pedro naʼtulúʼ: “Guyamajkuíí Cristo xóo Tátá náa a̱jkia̱la” (atraxnuu 1 Pedro 3:15). Mu muʼnilú rígi̱, mbaʼyóoʼ dí mundxaʼwamíjná ga̱jma̱a̱ numuu ñajunʼ dí nikhánáá Tátá ga̱jma̱a̱ Rey Jesucristo. Á mu dí na̱jkha̱nú mbiʼi náa dí ma̱ndoo marataráʼa mu namíñáaʼ ga̱jma̱a̱ naguáʼáan, dí ma̱ndoo mambáyaaʼ, atatsaʼwáminaʼ ga̱jma̱a̱ numuu rey ndrígulú. Mbá xkri̱da atatsaʼwáminaʼ dí ikhaa xtaa raʼtáñajunʼ náa mekhuíí náá majñúnʼ mbaʼin ángeles. Ga̱jma̱a̱ garmáʼáan a̱jkia̱a̱nʼ dí ikhaa: “Nijuixnájxiʼ xúgíʼ dí rígá mekhuíí ga̱jma̱a̱ náa tsu̱du̱u̱ ku̱ba̱ʼ”. Ikhaa niʼthí “maxtáá ga̱jma̱á nindxa̱la asndu índo̱ gártumuu mbiʼi” (Mat. 28:​18-20). Pedro niʼthúlú dí “gíʼmaa makuwáánʼ xawii mu muʼthá ga̱jma̱a̱ numuu fe ndrígulú”. Lá manigua̱ʼ marataráʼa asndu náá minaaʼ, xóo náá natiejunʼ náa escuela o asndu náá má xtaa ráʼ. A mu nandaaʼ matani rígi̱, atatsaʼwáminaʼ náá mbi̱ʼi̱i̱ ma̱ndoo matani ga̱jma̱a̱ atani̱ ratháá ndiéjunʼ marata. Atanda̱ʼa̱a̱ Jeobá dí maxnáaʼ tsiaki̱i̱ ga̱jma̱a̱ gakumaaʼ dí ikhaa mambáyaaʼ mu xámíñáaʼ xtañún eʼwíinʼ xa̱bu̱ (Hech. 4:29).

“GÁʼNDALÁ KUʼYAMIJNÁ WÉÑUUʼ”

9. Nguáná Pedro na̱nguá nisngájma dí nandoo kaʼñúún eʼwíinʼ rá. (atayáá xtiʼkhu ma̱ngaa.)

⁹ Pedro nijmañuu ndiéjunʼ eʼyoo gáthúu̱n dí masnga̱jma̱a̱ dí nandoo kañun eʼwíinʼ. Ikhaa niʼdxawuun índo̱ Jesús nithi: “Naxna̱la i̱mba̱ nuxi̱ʼ kiʼtáñajunʼ: Rí gaʼndala kuyamíjna̱ kaníkháanʼ; xó má ikhúúnʼ nindoʼ ka̱ya̱la, xúʼko̱ má gáʼndala kuyamíjna̱ mangáan” (Juan 13:34). Nda̱wa̱á ikhaa tándoo gákuiʼtsu gajmíi̱n a̱ngiu̱lú bi̱ na̱nguá nindxu̱ún judíos numuu rí ikhaa nimíñuu nini̱ Cristianos bi̱ nindxu̱ún judíos. Apóstol Pablo niʼthí dí Pedro niʼni a̱jma̱ inuu (Gál. 2:​11-14). Pedro niʼdxawuun índo̱ nixprigúu Pablo ga̱jma̱a̱ niriʼkuminaaʼ. Xó má niʼnirámáʼ náa a̱jma̱ i̱yi̱ʼ, niʼthí kaʼwu dí raʼkháa i̱ndó ndayóoʼ maʼndulú kuñún a̱ngiu̱lú ma̱ngaa gíʼmaa musngajmúún.

10. Ndiéjunʼ embáyulú dí muguaʼdaa ngajua xóo kaníkháanʼ dí ragíʼdoo a̱jma̱ inu rá. (1 Pedro 1:22.)

¹⁰ Pedro niʼthí dí gíʼmaa “maguaʼdámíjna ngajua xóo kaníkháanʼ dí ragíʼdoo a̱jma̱ inuu” náa a̱ngiu̱lú (atraxnuu 1 Pedro 1:22). Rí maʼndulú kuʼñúún nindxu̱u̱ dí “nuʼnimbulú kuʼyáá rí gajkhun”, ga̱jma̱a̱ náa gajkhun rúʼko̱ naʼthí dí “Dios tséraʼwíín xa̱bu̱” (Hech. 10:​34, 35). A mu i̱ndó nusngajmá dí nandulúʼ kuʼñúún káaʼ tikhuun a̱ngiu̱lú náá nagimbáanʼ, tseʼnimbulú dí niʼthí Jesús ga̱jma̱a̱ numuu ngajua. Gajkhun má dí mambáxulu itháan gajmiúlú tikhuun a̱ngiu̱lú, xó má niʼni Jesús gajmíi̱n tikhuun xa̱bi̱i̱ (Juan 13:23; 20:2). Pedro naʼni marmáʼáan a̱jkiu̱lú dí gíʼmaa musngajmá dí “guáʼdáá ngajua” xóo kaníkháan náa a̱ngiu̱lú, xóo muʼthá, ikhaa xóo dí nandulúʼ kuʼñúún a̱ngiu̱lú bi̱ kúwíin náa guʼulúʼ (1 Ped. 2:17).

11. Ndiéjunʼ eyoo gáʼthúu̱n rí “maʼndulú kuyamijná ga̱jma̱a̱ xúgíʼ a̱jkiu̱lú rá.”

¹¹ Pedro nixnulu consejo rígi̱: “Gáʼndalá kuyamijná ga̱jma̱a̱ xúgi̱ a̱jkia̱la”. Índo̱ niʼthí rígi̱, ga̱jma̱a̱ “xúgi̱ a̱jkia̱la” nandoo gáʼthúu̱n dí maʼndulú kuʼñúún eʼwíinʼ, bi̱ naʼniulú gakhi̱i̱ muʼniu̱u̱n dí májánʼ. Mbá xkri̱da, ndiéjunʼ gúʼnilú a mu mbáa ndxájulú naʼni gawúnlú rá. Mbáa xáʼndulú kuʼyáá, maʼndulú muʼni̱i̱ ikháá má xóo niʼniulúʼ. Rígi̱ xániguuʼ Jeobá, xó má Jesús nisngóo Pedro (Juan 18:​10, 11). Apostol Pedro niʼnirámáʼ: “Xátangáanʼ muniu̱u̱n dí ra̱májánʼ bi̱ niniala dí raʼkhí, xútha wéñúúnʼ bi̱ nutawéñala. Rí phú gíʼmaa mu̱ni̱, gu̱ni̱ tsajkurámíin” (1 Ped. 3:9). Á mu nandaaʼ xtayáá mbáa ga̱jma̱a̱ xúgi̱ a̱jkia̱a̱nʼ, maratha̱a̱n májánʼ ga̱jma̱a̱ matani̱ májánʼ maski asndu niʼni gawáanʼ.

12. (a) Á mu nandulú kuʼñúún wéñuuʼ a̱ngiu̱lú ndiéjunʼ itháan gíʼmaa muni rá. (b) Ndiéjunʼ exkajxi̱i̱n matani̱ video Guʼyáá dí gíʼdoo numuu makuwáánʼ kambájxu̱lú rá.

¹² Náa timbá i̱yi̱ʼ dí niʼnirámáʼ Pedro ma̱ngaa niʼthí “gáʼndalá kuyamijná”. Ngajua rúʼko̱ raʼkháa i̱ndó nambumuu nguáthá aʼkhá, ikhaa “nanújngorámuuʼ mbaʼa aʼkhá” (1 Ped. 4:8). Índo̱ niʼnirámáʼ rígi̱, Pedro mbáa nirmáʼáan a̱jkiu̱u̱n índo̱ Jesús niʼsngóo ga̱jma̱a̱ numuu dí maʼni mba̱a̱ a̱jkiu̱u̱n rí nitamíjná má ginii. Índo̱ Pedro niʼthí dí ma̱ndoo maʼni mba̱a̱ a̱jkiu̱u̱n mbá “asndu 7 nuthu”, mbá nindxa̱ʼwáminaʼ dí ra̱ʼkhá tháán májáanʼ xa̱bu̱ nindxu̱u̱. Mu Jesús niʼsngóo dí mbaʼyóoʼ maʼni mba̱a̱ a̱jkiu̱u̱n “asndu 77 nuthu”, dí ragíʼmaa martumuu dí maʼni mba̱a̱ a̱jkiu̱u̱n kaʼñúún eʼwíinʼ. Rígi̱ gíʼdoo numuu náa mangáánʼ (Mat. 18:​21, 22). Lá naʼniaaʼ miʼskhaa matani̱ mbáníí consejo rígi̱ ráʼ. Xájmaa má, numuu dí nindxu̱lú xa̱bu̱ aʼkhá, mbáa xúgíinʼ xa̱bi̱i̱ Jeobá naʼniún mingíjyúuʼ muni mba̱a̱ kuñún eʼwíinʼ. Ikha jngóo, ndiéjunʼ gándoo matani rá. Rí itháan gíʼdoo numuu nindxu̱u̱ dí matani xúgíʼ xó má eʼngo̱o̱ mu matani̱ mba̱a̱ a̱jkia̱a̱nʼ xtáyá ndxájuaaʼ ga̱jma̱a̱ maraxtaa tsímáá ga̱jma̱a̱.c

BI̱ KUYA̱ EDXU̱U̱, GUÑEWU̱U̱N MUGU̱

13. Ndíjkha rí ma̱ndoo maʼniún mingíjyúuʼ bi̱ kuya̱ edxu̱u̱ mu muñewu̱u̱n a̱ngiu̱lú rá.

¹³ Mbáa Pedro nditháan támbumuu dí niʼthúu̱n Jesús nda̱wa̱á dí nigabi̱i̱: “Atiewu̱u̱nʼ tháan e̱jín múgiú” (Juan 21:16). A mu nindxa̱a̱ʼ mbáa bi̱ kayá edxu̱u̱, natayáá dí mangáánʼ matanimbánii ikha rígi̱. Mu mbáa maniaʼ miʼskhaa matríyáʼ mbiʼi mu matani mbáníí ñajunʼ rígi̱ dí gíʼdoo numuu. Numuu dí ginii gíʼmaa ma̱ta̱ya̱a̱ ndiéjunʼ eñu̱u̱ bi̱ kúwíin náá guʼwáaʼ ga̱jma̱a̱ dí matambáñún mambaxúún májánʼ gajmiún Jeobá. Ma̱ngaa gíʼmaa muʼgíʼ májánʼ xkri̱da náa nutaraʼa, gíʼmaa muni ratamíjná májánʼ mu musngáa na reunión ga̱jma̱a̱ muxná májánʼ discurso náa asamblea. Tikhuiin kúwíin na Comité bi nuñambáá náa Hospital o náá Departamento Local ndrígóo Diseño ga̱jma̱a̱ Construcción. Xó má eʼyáá bi̱ kuya̱ edxu̱u̱ guáʼdáá wéñuuʼ ñajunʼ.

14. Ndíjkha rí nandún bi̱ kuya̱ edxu̱u̱ muñewu̱u̱n mugiu̱u̱ Dios ga̱jma̱a̱ ndiéjunʼ ma̱ndoo mambáñun xá. (1 Pedro 5:​1-4.)

¹⁴ Pedro niʼthún eʼwíinʼ cristianos bi̱ kuya̱ edxu̱u̱: “Guñewu̱u̱n múgiúu Dios” (atraxnuu 1 Pedro 5:​1-4). Nduʼyáá má dí bi̱ kuya̱ edxu̱u̱ nandún kuñún a̱ngiu̱ún ga̱jma̱a̱ nandún muñewu̱u̱n. Nguáná naku̱mu̱ún dí xáʼngo̱o̱ guʼni mbáníí ñajunʼ rígi̱, numuu dí ra̱ʼkhá tháán guáʼdáá ñajunʼ o naʼni néʼngu̱u̱n. A mu ikháán nagíʼnáaʼ xúʼko̱ kaʼnii, ndiéjunʼ ma̱ndoo matani rá. Aratháán Jeobá xú kaʼnii ku̱ma̱a̱ʼ. Pedro niʼthí: “Á mu mbáa naʼthí, gaʼni xóo mbáa bi̱ naʼtáriyaʼ ajngóo Dios ga̱jma̱a̱ á mu mbáa nambáñún eʼwíinʼ, gaʼni xó má eʼni mbáa bi̱ nagruigú tsiakii ndrígóo Dios” (1 Ped. 4:11). Mbáa a̱ngia̱a̱nʼ nuraʼníí xkujndu dí xámbánuu náa numbaaʼ rígi̱. Mu gármáʼáanʼ a̱jkia̱a̱nʼ dí Jesucristo, “nindxu̱u̱ baxtúu bi̱ phú kayá edxu̱u̱”, ikhaa ma̱ndoo maʼni itháan ki xóo ikháanʼ asndu nákha xúgi̱ ga̱jma̱a̱ náa numbaaʼ nuxi̱ʼ. Dí Jeobá nagi̱ʼthu̱u̱n nindxu̱u̱, dí bi̱ kuya̱ edxu̱u̱ maʼndún kuñún a̱ngiu̱ún ga̱jma̱a̱ muñewu̱u̱n.

15. Ndiéjunʼ eʼni mbáa bi̱ kaya̱ edxu̱u̱ mu muñewu̱u̱n mugiu̱u̱ Dios rá. (atayáá xtiʼkhu ma̱ngaa.)

¹⁵ William bi̱ mba̱yu̱u̱ʼ ma tsiguʼ kayá edxu̱u̱, ndaʼyoo dí gíʼdoo wéñuuʼ numuu mañewu̱u̱n mugu̱. Índo̱ nigíʼdúu nandii COVID-19, ikhaa gajmíi̱n eʼwíinʼ bi̱ kuya̱ edxu̱u̱ ndiyáá dí gíʼdoo numuu muʼtamíjná gajmiún a̱ngiu̱lú bi̱ kúwíin náa grupo ndrígún mambá xmáná. Ndíjkha rá. Ikhaa naʼthí: “Mbaʼin a̱ngiu̱lú nikúwíin i̱ndó ikhiin náa guʼún, ga̱jma̱a̱ ndawa̱a̱ tsáá muʼtamíjná gajmiún. Ga̱jma̱a̱ rígi̱ maʼni mundxaʼwamíjná dí raʼkhí”. Índo̱ mbáa ndxájulú gíʼdoo xkujndu, William naʼdxawuun májánʼ dí eʼthí mu mbaʼyoo ndiéjunʼ phú ndayóoʼ ga̱jma̱a̱ ndiéjunʼ eʼni maxmiéjuunʼ. Ikhú ikhaa ndayáʼ xóo ma̱ndoo mambáyúu, dí itháán najmuu nindxu̱u̱ mbá video dí rígá náa ináa internet ndrígulú. William naʼthí xóo: “Dí muñewu̱u̱n mugu̱ ra̱ʼkhá tháán gíʼdoo wéñuuʼ numuu, nuʼni tsiakimijna mumbáñuun wéñuuʼ xa̱bu̱ mu muniʼniiʼ Jeobá. Ikháá ma kayuuʼ gíʼmaa muʼnilú mu muñewu̱u̱n mugu̱ ndrígóo Jeobá mu makuwíin ma xúʼko̱ náa rí gajkhun.”

GUNIʼÑÁÁʼ DÍ JEOBÁ MAʼNI RATHÁANLÚ MÁ XÚʼKO̱

16. Xú kaʼnii ma̱ndoo muʼgíʼ muʼnimbáníí dí nijmañulúʼ náa ajma̱ i̱yi̱ʼ dí niʼnirámáʼ Pedro rá.

¹⁶ Náa artículo ndiʼyáá dí ma̱ndoo majmañulú náa a̱jma̱ i̱yi̱ʼ dí niʼnirámáʼ Pedro. Mbáa nitayáá dí rígá tikhuʼ náa ma̱ndoo matani̱ itháán májánʼ. Mbá xkri̱da, lá manigua̱a̱ʼ matatsaʼwamínáʼ itháán ga̱jma̱a̱ xóo mitsaanʼ dí makuwáánʼlú náa numbaaʼ nuxi̱ʼ ráʼ. Lá nitagíminaʼ marataráʼa asndu náá má xtaa xóo náa natiejunʼ, náa escuela o náa imbo̱ʼ ráʼ. Natatsaʼwáminaʼ mbaʼa eʼni xóo matasnga̱jmá dí nandaaʼ xtañún ga̱jma̱a̱ xúgíʼ a̱jkia̱a̱nʼ a̱ngia̱a̱nʼ ráʼ. Á mu ikháán nindxa̱a̱ʼ mbáa bi̱ kaya̱ edxu̱u̱, lá matani tsiakimínaʼ mu matie̱wu̱u̱n itháán májánʼ mugiu̱u̱ Jeobá ga̱jma̱a̱ xúgíʼ a̱jkia̱a̱nʼ ga̱jma̱a̱ tsiaki̱i̱ ndrígáaʼ ráʼ. Índo̱ natrajximínáʼ rígi̱, natayáá dí ndayóoʼ matani̱ xóo itháán, xájmaa. “Garmáʼáan a̱jkia̱a̱nʼ rí tátá májánʼ a̱jkiu̱u̱n” ga̱jma̱a̱ ikhaa mambáyaaʼ matani itháán májánʼ ñajuunʼ (1 Ped. 2:3). Pedro naʼthulú dí “Dios [...] gámbóo raʼniratáanʼla; ikhaa gáʼni rí maguajún jmbu, ga̱jma̱a̱ rí maguajún gujkhuʼ” (1 Ped. 5:10).

17. Ndiéjunʼ gúndrígúu a mu nuʼni má xúʼko̱ ñajuunʼ Jeobá ga̱jma̱a̱ nuniñaʼ dí ikhaa maʼni ratháánʼ xá.

¹⁷ Mbá miʼtsú Pedro nikumu̱u̱ dí nda̱a̱ numuu maxtáa náá inuu a̱ʼdióo Dios numuu rí nindxu̱u̱ xa̱bu̱ aʼkhá (Luc. 5:8). Mu núma̱aʼ má Jeobá ga̱jma̱a̱ Jesús dí nisngájmáá dí nandún kuyáá, Pedro niñajunʼ ni̱jkha̱ má xúʼko̱ tsu̱du̱u̱ Jesús. Ikha jngóo mata̱ʼa̱a̱ʼ “náa rí Jesucristo bi̱ nindxu̱u̱ Tátá ndrígúlú ga̱jma̱a̱ bi̱ naʼni káwáánʼ maʼtáñajunʼ asndu kámuu” (2 Ped. 1:11). ¡Ra̱ʼkhá tháán mitsaanʼ dí nikhánáá! Xúʼko̱ má mangáán á mu natani̱ ma xúʼko̱ dí nikhánaaʼ matani xó ma niʼni Pedro ga̱jma̱a̱ natasíñaaʼ dí Jeobá maʼniratáánʼ, xúʼko̱ maraxtaa kámuu mbiʼi. “Ga̱jma̱a̱ numuu fe ndrígáa makríña̱a̱nʼ” (1 Ped. 1:9).