Lá xtaa xawii índo̱ gárígá mbá ga̱ʼkhu̱ rí majphú mba̱a̱ rá’.

1. Ndíjkha gíʼmaa muʼniratamijná nákha xóó tsérígá mbá gamiéjunʼ rá.

NAʼNI makríña̱a̱nʼ dí matanirataminaʼ wapháá. Mbá xkri̱da, índo̱ narígá mbá gamiéjunʼ itháán má nache̱ nakríya̱a̱ʼ mbáa xa̱bu̱ bi̱ naʼnirataminaʼ wapháá ma̱ngaa ma̱ndoo mambáñún eʼwíinʼ. Xó má ethi tikhun xa̱bu̱ bi̱ kúwá náa Europa bi̱ numbañún eʼwíinʼ, “ma̱ndoo maʼni kríña̱a̱nʼ rí matanirataminaʼ májánʼ”.

2. Ndíjkha gíʼmaa makuwáánʼlu xawii índo̱ gárígá ga̱ʼkhu̱ rí majphú mba̱a̱ rá. (Mateo 24:44.)

² Nda̱a̱ tsumáá gági̱ʼdu̱u̱ “ga̱ʼkhu̱ rí majphú mba̱a̱” (Mat. 24:21). Xúgíinʼ xa̱bu̱ xáʼniún tsiánguá, xó má narígá ga̱jma̱a̱ i̱ʼwáʼ gamiéjunʼ, numuu rí niʼni má 2,000 tsiguʼ dí Jesús niʼthún xa̱bi̱i̱ dí gíʼmaa makuwíin xawii índo̱ gáʼkha̱ mbiʼi rúʼko̱ (atraxnuu Mateo 24:44). Á mu nuʼnimbáníí consejo rígi̱, xáʼniulú miʼskhaa muʼni kríyamíjnálú ma̱ngaa dí mumbáñún eʼwíinʼ mu makáwíin náa mbiʼi mingíjyúuʼ dí ma̱ʼkha̱ (Luc. 21:36).

3. Ndíjkha rí mbaʼyóoʼ maʼngulú, magáwíinʼ a̱jkiu̱lú ma̱ngaa dí maʼndulú kuʼyamijná mu makuwáánʼ xawii índo̱ gárígá rí majphú mba̱a̱ ga̱ʼkhu̱ rá.

³ Mbaʼyóoʼ musngajmá ajtsú cualidad mu makuwáánʼlu xawii índo̱ gárígá ga̱ʼkhu̱ rí majphú mba̱a̱. Ndiéjunʼ gúʼni á mu nutulúʼ dí muʼthúún xa̱bu̱ mbá ajngáa gujkhuʼ dí magíʼnún ga̱jma̱a̱ ikhiin nakiʼníin kuyulú rá. (Apoc. 16:21.) Ikhú mbaʼyóoʼ muʼnimbulú kuʼyáá Jeobá, ikha jngóo gíʼmaa rí maʼngo̱o̱ a̱jkiu̱lú mu xámiñulu ga̱jma̱a̱ makumulú dí ikhaa má gañewunlúʼ. Ndiéjunʼ guʼni á mu a̱ngiu̱lú nandáti̱gu̱u̱n tikhu o mbá xúgíʼ dí guáʼdáá rá. (Hab. 3:17, 18.) Ikhú gíʼmaa musngajmá dí nagáwíinʼ a̱jkiu̱lú kuʼñúún mu mumbáñún ma̱ngaa dí muxnún dí ndañún. Ndiéjunʼ gúʼni índo̱ gúni gináánʼ mbá nguéjmi̱i̱n xa̱bu̱ rá. Dí gúʼni á mu mbá mbiʼi mbaʼyóoʼ makuwáánʼ mbá jnduʼ gajmiúlú a̱ngiu̱lú rá. (Ezeq. 38:10-12.) Ikhú mbaʼyóoʼ musngajmá dí gajkhun nandulú kuʼyamijná.

4. Ndiéjunʼ esngájma dí gíʼmaa muʼni tsiakimijna mu maʼngulú ga̱jma̱a̱ magáwíinʼ itháan a̱jkiu̱lú ma̱ngaa dí maʼndulú kuʼyamijná itháan rá.

⁴ Náa Ajngáa rawuunʼ Dios naxkajxáánʼ dí maʼngulú ga̱jma̱a̱ magáwíinʼ itháan a̱jkiu̱lú ma̱ngaa dí gaʼndulúʼ kuʼyamijná itháan. Lucas 21:19 naʼthí: “Á mu naʼngala asndu índo̱ gártumuu mbiʼi maguma káwáanʼ”. Colosenses 3:12 naxkajxáánʼ: “Gusngajmá dí nagáwíinʼ a̱jkia̱la kuyamíjna̱” ga̱jma̱a̱ 1 Tesalonicenses 4:9, 10 naʼthí: “Dios xtáa má raʼsngála dí maʼndala kuyamíjna̱. […] Mú a̱ngui̱nʼ, ikháanʼxu̱ nunda̱ʼa̱la rí musngajmá xóó itháan ngajua rígi̱”. Xúgíʼ ajngáa rígi̱ nijkha náa inún xa̱bu̱ bi̱ nusngajma má dí naʼngu̱u̱n ga̱jma̱a̱ nagáwíinʼ a̱jkiu̱ún ma̱ngaa dí nandún kuyamijná, mú ndiyóoʼ dí muni tsiakimijna musngajmá itháán. Ikháá má kayuuʼ mangáanʼ, mbaʼyóoʼ musngajmá itháán cualidad rígi̱. Ndiéjunʼ gámbáyulú rá. Náa artículo rígi̱ mbuʼyáá xú káʼnii nini̱ timbíin cristianos mu mba̱ja̱a̱ cualidad rígi̱, ga̱jma̱a̱ xú káʼnii ma̱ndoo mbuʼyaridúún ma̱ngaa xú káʼnii gámbáyulú cualidad rígi̱ mu makuwáanʼ xawii índo̱ gárígá mbá ga̱ʼkhu̱ rí majphú mba̱a̱.

GAʼNGO̱O̱ A̱JKIA̱A̱Nʼ

5. Ndiéjunʼ nini̱ timbíin cristianos mu maʼngu̱u̱n rá.

⁵ Timbíin cristianos ndiyóoʼ maʼngu̱u̱n (Heb. 10:36). Ikhiin niguáʼdáá dí naʼni maxmiéjúúnʼ xó má ikháánʼlú, mú ma̱ngaa niraʼníí i̱ʼwáʼ xkujndu numuu fe ndrígu̱ún. Mbaʼin nijuixkúún eni̱ xa̱bu̱ ede̱ ga̱jma̱a̱ xa̱bu̱ ñajunʼ ma̱ngaa asndu familia ndrígu̱ún niwiñunʼ kuñúún (Mat. 10:21). Nguáná, asndu ndiyóoʼ dí muni gáʼdu̱u̱n kiʼsngáa dí ragájkhun ndrígún bi̱ niniña̱a̱nʼ kamba̱a̱ʼ dí gajkhun, numuu rí nindúún dí a̱ngiu̱lú muni wajímijná (Hech. 20:29, 30). Maski ajndu niraʼníí rígi̱, ikhiin niʼngu̱u̱n (Apoc. 2:3). Xú káʼnii nini̱ rá. Nindxaʼwamíjna̱ ga̱jma̱a̱ numuu xkridún xa̱bu̱ bi̱ na̱ʼkha̱ raʼthí náa Escrituras Hebreas, xóo Job (Sant. 5:10, 11). Nitakháñii Jeobá mu maxnún tsiakii (Hech. 4:29-31). Nirmáʼáan a̱jkiu̱ún má xúʼko̱ dí Jeobá má gáʼni tsajkurámiinʼ á mu naʼngu̱u̱n nuguajún jmbu (Hech. 5:41).

6. Ndiéjunʼ eʼsngúlú xóo niʼni Merita mu maʼngo̱o̱ rá.

⁶ Mangáanʼ ma̱ndoo maʼngulú á mu naguʼunlú nundxaʼwamíjna̱ xkridún a̱ngiu̱lú bi̱ niʼngu̱u̱n niguájun jmbu, bi̱ naʼthí náa Biblia ga̱jma̱a̱ náa i̱yu̱lúʼ. Ikhaa rígi̱ nimbáyúu ndxájulú Merita bi̱ xtáa náa xuajin Albania, mu maʼngo̱o̱ índo̱ nini̱ gínáa familia ndrígóo. Ikhaa naʼthí: “Índo̱ ninigajma̱a̱ historia ndrígóo Job dí na̱ʼkha̱ náa Biblia, ni̱jkha̱nú asndu náa a̱jkiu̱nʼ. Ikhaa nimínuuʼ wéñuʼ..., ga̱jma̱a̱ ikhaa táʼyoo tsáá niʼni rí mamínuuʼ wéñuʼ. Maski ajndu xúʼko̱, ikhaa niʼthí náa Job 27:5: ‹¡Asndu índo̱ gákhañuʼ, káxi̱ má xúʼko̱ a̱jkiu̱nʼ gáni̱!›. Rígi̱ niʼni mandxaʼwáminaʼ dí ikhúún xtáá ramínúuʼ nindxu̱u̱ chíʼgíiʼ ki xóo dí nigiʼnuu ikhaa, ma̱ngaa ikhúún nda̱yo̱o̱ tsáá naʼni dí magúʼdoo xkujndu”.

7. Maski ajndu na̱nguá xtaa ranújngaaʼ mbá xkujndu gakhi̱i̱, mú ndiéjunʼ gíʼmaa majmañaaʼ asndu nákha xúgi̱ rá.

⁷ Imbo̱o̱ rí ma̱ndoo mambáyulú mu maʼngulú nindxu̱u̱ rí muʼtákáñii má xúʼko̱ Jeobá (Filip. 4:6; 1 Tes. 5:17). Mbáa ikháán xúgi̱ na̱nguá xtaa ratraʼníí xkujndu gakhi̱i̱. Mú, lá naratákáñii Jeobá índo̱ nakiʼnán, najnga̱wa̱a̱n, o tsétayáá dí matani̱ ráʼ. Á mu naguʼwanʼ mataʼyáaʼ Jeobá índo̱ xtaʼdáá xkujndu, rúʼko̱ gámbáyáaʼ ma̱ngaa nda̱wa̱á índo̱ gáʼni itháán gakhi̱i̱ makuwáánʼ. Ikhú matayaa gajkhun dí Jeobá ndaʼyoo májánʼ nguáná ga̱jma̱a̱ xú káʼnii mambáyaaʼ (Sal. 27:1, 3).

8. Xú káʼnii esngájmulú xkridoo Mira dí á mu naʼngulú xúgi̱ mambáyulú maʼngulú nda̱wa̱á rá. (Santiago 1:2-4; atayáá ma̱ngaa xtiʼkhu.)

⁸ Itháán xáʼniulú miʼskhaa muraʼníí ga̱ʼkhu̱ rí majphú mba̱a̱ á mu naʼngulú nuraʼníí xkujndu dí nuguaʼdaa xúgi̱ (Rom. 5:3). Mbaʼin a̱ngiu̱lú nakumu̱ún dí índo̱ naʼngu̱u̱n nuraʼníí mbá tsáʼkhá dí gakhi̱i̱, itháán tséʼniún mingíjyúuʼ imbo̱o̱ dí gáʼkha̱. Naʼngu̱u̱n nuraʼníí tsáʼkhá numuu rí Jeobá nambáñúún, rúʼko̱ naʼni rí fe ndrígu̱ún maʼni itháán gújkhúʼ, ga̱jma̱a̱ nambáñúún maʼngu̱u̱n muraʼníí i̱ʼwáʼ tsáʼkhá dí gáʼkha̱ (atraxnuu Santiago 1:2-4). Xúʼko̱ endxa̱ʼwáminaʼ Mira, mbáa ndxájulú precursora bi̱ xtáa náa xuajin Albania. Ikhaa nguáná endxa̱ʼwáminaʼ dí nda̱wa̱a̱ imba̱a̱ bi̱ gíʼdoo itháán xkujndu xóo ikhaa. Mú ikhú, narmáʼáan a̱jkiu̱u̱n dí Jeobá nimbáyúu náa itháan dí 20 tsiguʼ ga̱jma̱a̱ ikhaa nandxa̱ʼwáminaʼ: “Ariéjún jmbu. Xátatsiʼñánʼ matani ñajuunʼ Jeobá, nda̱wa̱á dí ikhaa nimbáyaaʼ, mu maʼngaaʼ matraʼníí mbá xúgíʼ xkujndu gakhi̱i̱ dí niraʼdáá”. Mangáán ma̱ndoo matatsaʼwamínáʼ xúgíʼ dí niʼni Jeobá mu mambáyaaʼ. Gaʼni káñii a̱jkia̱a̱nʼ rí ikhaa ndaʼyoo mámbá xkujndu dí naʼnga̱a̱ʼ natraʼníí ma̱ngaa ikhaa maʼni tsajkurámáanʼ (Mat. 5:10-12). Á mu natani̱ rígi̱, índo̱ gági̱ʼdu̱u̱ ga̱ʼkhu̱ rí majphú mba̱a̱, ikháán xáʼniaaʼ gakhi̱i̱ maʼnga̱a̱ʼ.

ATASNGÁJMA RÍ NAGÁWÍINʼ A̱JKIA̱A̱Nʼ

9. Xú káʼnii nisngájma congregación ndrígóo Antioquía dí rígá náa Siria dí nigáwíinʼ a̱jkiu̱ún rá.

⁹ Gundxaʼwamíjna̱ dí nirígá índo̱ cristianos bi̱ nikúwá náa Judea niraʼníí ewiʼ. Índo̱ a̱ngiu̱lú bi̱ kúwá náa Antioquía dí rígá náa Siria nidxawíín, ikhiin nigáwíinʼ a̱jkiu̱ún ga̱jma̱a̱ nisngajma xú kaʼnii nikumu̱ún: ‹Niri̱ya̱ʼ awan rí muxu̱ʼma̱ rí mumbañún a̱ngiu̱lú bi̱ kúwá náa Judea, mámbáa nixná xó má rí gíʼdoo› (Hech. 11:27-30). Maski ajndu a̱ngiu̱lú bi̱ niraʼníí ewiʼ nikúwíin tsínguáʼ, cristianos bi̱ kúwá náa Antioquía nimbáñún (1 Juan 3:17, 18).

10. Xú káʼni ma̱ndoo musngajmá dí nagáwíinʼ a̱jkiu̱lú kuʼñúún a̱ngiu̱lú índo̱ nuraʼníí mbá gamiéjunʼ dí tséguaʼthi̱i̱n rá. (Atayáá ma̱ngaa xtiʼkhu.)

¹⁰ Índo̱ nuʼdxawíín dí a̱ngiu̱lú nuraʼníí mbá gamiéjunʼ dí tséguaʼthi̱i̱n, mangáanʼ ma̱ndoo musngajmá dí nagáwiinʼ a̱jkiu̱lú kuʼñúún. Ma̱ndoo muʼni rígi̱: Ma̱ndoo muraxu̱u̱n bi̱ kuya̱ edxu̱u̱ xú káʼni ma̱ndoo mumbáñun, muxnalú mbújkha̱a̱ náa obra mundial ma̱ngaa muʼtájkáan ga̱jma̱a̱ numún bi̱ numíníiʼ (Prov. 17:17).b Mbá xkri̱da, tsiguʼ 2020, nikúwíin náa xúgíʼ numbaaʼ itháan dí 950 Comités bi̱ numbañún a̱ngiu̱lú, mu muxnún rí ndañún bi̱ nikúwíin náa awúu̱n nandii COVID-19. Nuxnáalu wéñuuʼ núma̱aʼ xúgíinʼ a̱ngiu̱lú ga̱jma̱a̱ numuu ñajunʼ dí nini̱ mu mumbañún a̱ngiu̱lú. Rí nigáwíinʼ a̱jkia̱la nixkajxáánʼ mu mumbañún a̱ngia̱la ga̱jma̱a̱ dí kuáʼdáá, muxnunla tsiakii mu muni má xúʼko̱ dí nanigu̱u̱ʼ Jeobá ga̱jma̱a̱ asndu nini májáanʼla guʼwún ga̱jma̱a̱ náa nagimbíi̱n mu mbuyamajkuíí Jeobá (atayáá ma̱ngaa 2 Corintios 8:1-4).

11. Xú káʼnii eʼyamajkuíí Anu̱lú bi̱ xtáá mekhuíí índo̱ nagáwiinʼ a̱jkiu̱lú kuʼñúún a̱ngiu̱lú rá.

¹¹ Xúgíʼ rí nuʼni nduyáá xa̱bu̱ itháan índo̱ nusngajmá rí nagáwíinʼ a̱jkiu̱lú kuʼñúún a̱ngiu̱lú, índo̱ numbáñún náa gamiéjunʼ dí nuraʼníí. Guʼyáá mbá xkri̱da, náa Bahamas nákha tsiguʼ 2019, ruʼwa mbiʼ dí nigumbiʼyuu Dorian niʼni gámbáa mbá Guʼwá náa Nagimbáanʼ. Índo̱ niguma májáanʼ, nixtanda̱ʼa̱a̱ mbáa xa̱bu̱ mu mbaʼyoo nguáthá mbújkha̱a̱ gáʼga náa xúgíʼ ñajunʼ dí maguma. Ikhaa niriʼña̱a̱: “Nandoʼ gámbáyala, manigu̱u̱ʼ maniʼñúuʼ majmalaʼ xúʼkhíin ajua̱nʼ, xa̱bu̱ bi̱ muñajunʼ ma̱ngaa dí mbaʼyóoʼ mu majmalaʼ. Ni̱jkha̱nú asndu náa a̱jkiu̱nʼ xú káʼnii eniunla bi̱ nambájxa gajmiála”. Mbaʼin xa̱bu̱ na̱nguá eniʼniiʼ Jeobá, mú mbaʼin nduyáá ndiéjunʼ eʼni bi̱ nindxu̱lú Testigos ndrígióo. Ra̱ʼkhá tháán edxu̱lúʼ dí eʼwíinʼ nduyáá dí eʼnilú, ga̱jma̱a̱ rúʼko̱ naʼni rí mangiin maʼndún muniʼniiʼ “Dios bi̱ ra̱ʼkhá tháán egáwi̱i̱nʼ a̱jkiu̱u̱n” (Efes. 2:4).

12. Xú káʼnii embáyulú xúgi̱ rí magáwíinʼ a̱jkiu̱lú kuʼñúún eʼwíinʼ mu muraʼníí ga̱ʼkhu̱ rí majphú mba̱a̱ rá. (Apocalipsis 13:16, 17.)

¹² Náá numuu rí mbaʼyóoʼ magáwíinʼ a̱jkiu̱lú índo̱ garigá mbá ga̱ʼkhu̱ rí majphú mba̱a̱ rá. Numuu dí náa Biblia naʼthí dí xa̱bu̱ bi̱ tsémbayíí xa̱bu̱ ñajunʼ muraʼníí xkujndu, ga̱jma̱a̱ índo̱ gárígá ga̱ʼkhu̱ rí majphú mba̱a̱ (atraxnuu Apocalipsis 13:16, 17). Asndu a̱ngiu̱lú mbaʼyóoʼ mixtambáñún mu makánún dí makuwíin ga̱jma̱a̱. Índo̱ gáʼkha̱ Rey Jesucristo mu maʼthí dí gagíʼnún xa̱bu̱, nandulú rí ikhaa mbaʼyoo rí nusngajmá dí nagáwíinʼ a̱jkiu̱lú kuʼñúún eʼwíinʼ. Ikhú gáʼthúlú: “Gundrígúula rí májánʼ dí maxná Xa̱bu̱ Ñajunʼ ndrígóo Dios” (Mat. 25:34-40).

GAʼNDAAʼ XTAÑÚN ITHÁÁN A̱NGIU̱LÚ

13. Xó má eʼthí Romanos 15:7, ndiéjunʼ nini̱ timbíin cristianos mu maʼndún kuyamijná itháan rá.

¹³ Nákha siglo timbá xúgíinʼ, xa̱bu̱ ndiyáá dí cristianos nindúún kuyamijná. Lá táʼniún mingíjyúuʼ muni̱ rígi̱ xáʼ. Gundxaʼwamíjna̱ ga̱jma̱a̱ numuu congregación dí nirígá náa xuajin Roma, náa nikúwíin a̱ngiu̱lú bi̱ nindxu̱ún mixtiʼkuiin kayuuʼ. Tikhuin nindxu̱ún judíos, bi̱ nijuiʼsngúún dí gíʼmaa munimbu̱ún dí naʼthí náa Xtángoo ndrígóo Moisés. Mú ma̱ngaa nikúwíin a̱ngiu̱lú bi̱ nigumiin náa i̱ʼwáʼ xuajin, ndi̱ji̱i̱n mixtiʼkhu kayuuʼ. Mbáa asndu tikhun nindxu̱ún ñumbáá, xa̱bu̱ bi̱ nutañajumíjná ga̱jma̱a̱ bi̱ guáʼdiin ñumbáá. Ndiéjunʼ nimbáñún mu maʼngu̱u̱n mambáxu̱u̱n májánʼ ga̱jma̱a̱ maʼndún kuyamijná itháan xá. Apóstol Pablo nixnún consejo rígi̱: “Gundríguíin eʼwíinʼ ga̱jma̱a̱ gagi” (atraxnuu Romanos 15:7). Ndiéjunʼ nindoo gáʼthúún xá. Ajngáa dí najuiʼtájuíi xóo “gundríguíin eʼwíinʼ ga̱jma̱a̱ gagi”, nandoo gáʼthúu̱n dí matandrígúu̱n ga̱jma̱a̱ májánʼ a̱jkia̱a̱nʼ, xájmídáaʼ maraxna̱ dí xtaʼdáá. Nindxu̱u̱ xóo índo̱ natandriguii mbáa xa̱bu̱ náa guʼwáaʼ o natagíʼdi̱i̱ nambájxa̱a̱ʼ ga̱jma̱a̱ mbáa. Mbá xkri̱da, Pablo niʼthúu̱n Filemón dí ‹magriguíi májánʼ› Onésimo, ñumbáá bi̱ nigáyúu (Filem. 17). Priscila ga̱jma̱a̱ Áquila itháán má najmañún ga̱jma̱a̱ numuu cristianismo ki xóo Apolos, mú nindriguíi ga̱jma̱a̱ gagi ma̱ngaa nigún gajmiún (Hech. 18:26). Maski ajndu cristianos bugi̱ ninindxu̱ún mixtiʼkuiin kayuuʼ, túniña̱a̱ʼ dí rígi̱ maʼni dí muniwájimíjná, ikhiin nindrigumíjná ga̱jma̱a̱ gagi.

14. Xú káʼnii nisngajma Anna ga̱jma̱a̱ ajmbio̱o̱ rí nandún kuñúún a̱ngiu̱ún rá.

¹⁴ Mangáánʼ ma̱ndoo musngajmúún a̱ngiu̱lú dí nandulú kuʼñúún, raʼkháa i̱ndó nundríguíi mbáwíi mu mambájxulú májánʼ gajmiulúʼ, rígi̱ maʼni dí mangiin musngajma dí nandún kuyulú (2 Cor. 6:11-13). Xúʼko̱ nigíʼnun Anna ga̱jma̱a̱ ajmbio̱o̱ bi̱ nixuʼmiin magún xóo misioneros náa África Occidental. Nda̱wa̱á dí niguánúu náa xuajin, nigi̱ʼdu̱u̱ nandii COVID-19, nánguá nindoo gúwiin gajmiún a̱ngiu̱lú bi̱ kúwi̱i̱n náa congregación. Ndiéjunʼ nini mu musngajma dí nandún kuñúún a̱ngiu̱ún xá. Ikhiin nigi̱ʼdi̱i̱ niniu̱u̱n videollamada mu muthún dí nandún gúñún mu muniʼniún itháan. Familia bi̱ nijuiʼthúún rígi̱, ni̱jkha̱nú asndu náa a̱jkiu̱ún dí mangiin nigíʼdi̱i̱ nitaruʼún ga̱jma̱a̱ nixuʼma mensaje náa inún misioneros. Náa numuu dí a̱ngiu̱lú misioneros nini tsiakimijna muniʼnúnʼ itháan májánʼ congregación rá. Anna eʼthí: “Xámbumuu kayuuʼ xú káʼnii a̱ngiu̱lú nisgajmuʼ ga̱jma̱a̱ famílióoʼ dí nindúún kuyuxu índo̱ nikuwáanʼ májánʼ ga̱jma̱a̱ índo̱ nikuwáanʼxu gíná. Xkridún naxkajxu̱u̱n masngajmáʼ dí nandoo kañun a̱ngiu̱lú”.

15. Ndiéjunʼ eʼsngáa xkridoo Vanessa xú káʼnii nisngájma dí nandoo kaʼñúún a̱ngiu̱lú rá. (Atayáá ma̱ngaa xtiʼkhu.)

¹⁵ Kúwáanʼ náa congregación dí kúwíin a̱ngiu̱lú bi̱ mixtiʼkhu kayuuʼ xóo nindxu̱ún ga̱jma̱a̱ xóo ndi̱ji̱i̱n. Ndiéjunʼ gámbáyulú mu maʼndulú kuʼñúún itháán rá. Guʼyáá dí májánʼ náa a̱ngiu̱lú. Vanessa mbáa ndxájulú bi̱ xtáa náa Nueva Zelanda niʼñuu miʼskhaa mu mambájxu̱u̱ májánʼ gajmíi̱n a̱ngiu̱lú náa congregación ndrígóo, numuu dí tsénigu̱u̱ʼ xóo nindxu̱ún. Mú ikhaa niraʼwíi mambájxu̱u̱ gajmíi̱n ki xóo dí maʼni tsíngumínaʼ. Núma̱aʼ má dí niʼni rúʼko̱, ikhaa ndiʼyoo ndiéjunʼ nindxu̱u̱ dí Jeobá ndiʼyoo náa ikhiin. Vanessa eʼthí: “Numuu rí ajmbio̱o̱ ninindxu̱u̱ superintendente ndrígóo circuito, nimbájxu gajmiúxu itháán mbaʼin a̱ngiu̱lú, mámbá dí ikhiin mixtiʼkuiin. Mú nánguá eʼniuʼ miʼskhaa mambájxu̱u̱ gajmíi̱n. Naniguʼ dí kúwíin mixtiʼkun xóo nindxu̱ún a̱ngiu̱lú. Jeobá nanigu̱u̱ʼ dí makuwíin mixtiʼkuiin xa̱bu̱ ikha jngóo ni̱ʼkha̱ kagui̱i̱n náa xuajñuu”. Xú káʼnii ma̱ndoo musngajmá dí nandulú kuʼñúún a̱ngiu̱lú rá. Gúʼni tsiakimijna mu mbuʼñún xó má eʼñún Jeobá (2 Cor. 8:24).

16. Ndíjkha dí ndayóo’ maʼndulú kuyamijná índo̱ garígá ga̱ʼkhu̱ rí majphú mba̱a̱ rá. (Atayáá ma̱ngaa xtiʼkhu.)

¹⁶ Magiʼdoo itháan numuu dí maʼndulú kuyamijná índo̱ gakuwáánʼ náa ga̱ʼkhu̱ rí majphú mba̱a̱. Xú káʼnii gañewunlúʼ Jeobá rá. Gundxaʼwamíjna̱ ga̱jma̱a̱ numuu ikha dí nixnúu xuajñuu mu makawiin índo̱ gágumaa gámbáa Babilonia: “Ayuʼ, xuajñuʼ. Ata̱ʼa̱ʼ náa awúu̱n guʼwáaʼ, ga̱jma̱a̱ índo̱ nita̱ʼa̱ʼ má atrugua̱a̱ xkrugua. Atarkaʼuminaʼ mbá xngaa asndu índo̱ gánujngoo rí nakiʼnún” (Is. 26:20). Mbáa asndu mangáanʼ mbaʼyóoʼ munimbulú ikha rígi̱ índo̱ gákuwáanʼ náa ga̱ʼkhu̱ rí majphú mba̱a̱. Ajngáa “awúu̱n guʼwáaʼ” mbáa nindxu̱u̱ náa nagimbáanʼ. Á mu mbiʼi rúʼko̱ nakuwáanʼ kambájxu̱lú, Jeobá mañewu̱nlú xó má nikudáminaʼ maʼni. Ikha jngóo asndu nákha xúgi̱, tséyóoʼ dí i̱ndó maʼngo̱o̱ a̱jkiu̱lú kuʼñúún a̱ngiu̱lú ma̱ngaa gíʼmaa musngajmá dí gajkhun nandulú kuʼñúún. ¡Á mu tsíyulú kuʼyamijná xándoo muʼni kríyamíjná!

ARAXTAA XAWII ASNDU NÁKHA XÚGI̱

17. Ndiéjunʼ ma̱ndoo muʼnilú índo̱ gakuwáánʼ náa ga̱ʼkhu̱ rí majphú mba̱a̱ á mu nakuwáánʼlú xawii rá.

¹⁷ Índo̱ gakuwáánʼ náa “mbiʼi mba̱a̱ ndrígóo Jeobá” maʼni ra̱ʼkhá tháán mingíjyúuʼ makuwíin xúgíinʼ xa̱bu̱ (Sof. 1:14, 15). Mangáanʼ bi̱ nindxu̱lú xa̱bi̱i̱ Jeobá muraʼníílú xkujndu. Mú, á mu nakuwáánʼ xawii asndu nákha xúgi̱, xáxmiéjunlú ga̱jma̱a̱ ma̱ndoo mumbáñún eʼwíinʼ. Rí maʼngo̱o̱ a̱jkiu̱lú mambáyulú mu maʼngulú muraʼníí asndu ndiéjunʼ má xkujndu dí guguaʼdáá. Á mu nagáwíinʼ a̱jkiu̱lú rígi̱ gámbáyulú mu makuwáánʼ xawii mu mumbáñún a̱ngiu̱lú ga̱jma̱a̱ muxnún rí ndaʼñún. Ga̱jma̱a̱ rí nandulú kuʼñúún mambáyulú mu makuwáanʼ jnduʼ. Jeobá maʼni tsajkurámáanʼ mu makuwáanʼlu kámuu náa mbá numbaaʼ dí gamiéjunʼ ga̱jma̱a̱ xkujndu mambáa (Is. 65:17).