Atambáyumina náa Jeobá, xó má ni’ni Sansón

1, 2. Ndíjkha rí gíʼdoo numuu muʼnigajma̱a̱ xóo nixtáa Sansón rá.

NDIÉJUNʼ e̱ʼkha̱ ginii edxa̱a̱ʼ ikháán ga̱jma̱a̱ numuu Sansón rá. Dí nindxu̱u̱ mbáa xa̱bu̱ bi̱ mixkujiʼ wéñuuʼ. Gajkhun má ninindxu̱u̱ mbáa xa̱bu̱ bi̱ nigiʼdoo tsiaki̱i̱ ga̱jma̱a̱ nikiéʼkúun, rúʼko̱ niʼni rí mamínuuʼ. Maski ajndu xúʼko̱, Jeobá ndiʼyoo nguáthá mba̱a̱ fe rí nigiʼdoo xúgíʼ mbiʼi rí nixtáa. Ga̱jma̱a̱ niraʼwíí dí maguanúʼ xkridoo náa Biblia mu mbiʼyuu majmañulú ga̱jma̱a̱ numuu ikhaa.

² Jeobá nijmiuu Sansón mú maʼni rí mbáa xa̱bu̱ xáʼngo̱o̱ gaʼni, mú maʼnikríyaaʼ xuajñuu Israel. Tsiguʼ nda̱wa̱á rí nikháñuu, Jeobá niʼni rí apóstol Pablo maʼnirámáʼ, mbiʼyuu Sansón náa mbá lista náa na̱ʼkha̱ xkridún bi̱ niguaʼdáá fe (Heb. 11:​32-34). Sansón nimbáyuminaʼ náa Jeobá asndu náa rí mbiʼi mingíjyúuʼ rí nixtáa. Náa artículo rígi̱, mbuʼyáá xú káʼnii xkridoo mambáyulú, ma̱ngaa mbuʼyáá xú káʼni ma̱ndoo mbuʼyaridáá.

SANSÓN NIKUMU̱U̱ KAʼYOO JEOBÁ

3. Ndiéjunʼ ñajunʼ nikhánáá Sansón rá.

³ Índo̱ Sansón nixtáa, filisteos nutañajúúnʼ ga̱jma̱a̱ nuni̱ gíníi xa̱bu̱ Israel (Juec. 13:1). Xó má eʼyáá ra̱ʼkhá tháán xkawiʼ a̱jkiu̱ún, nini̱ rí mumíniiʼ israelitas. Ikha jngóo Jeobá niríyaaʼ Sansón mu “ikhaa magíʼdu̱u̱ maʼni káwíin xa̱bu̱ Israel náa ñawúúnʼ xa̱bu̱ filisteos” (Juec. 13:5). ¡Ra̱’khá tháán mingíjyúuʼ ñajunʼ rí nikhánáá! Ikha jngóo, Sansón ndiyóoʼ rí mambáyuminaʼ náa Jeobá.

4. Xú káʼnii nimbáyúu Jeobá Sansón rá. (Jueces 15:​14-16.)

⁴ Gúʼyáá xu xkáʼnii Sansón nisngájma rí nikumu̱u̱ kaʼyoo Jeobá. Mbá miʼtsu mbá grupo soldado filisteos nigún náa Lehí, náa jmbaaʼ rí naguanúu náa xuajin Judá, mu murtuwiin Sansón. Xa̱bu̱ bi̱ kúwíin náa Judá nimíñúún wéñuuʼ, ikha jngóo nithi dí muxnajxi̱i̱ Sansón náa xa̱bu̱ sia̱nʼ ndrígu̱ún. Ikha jngóo nirtuwiin ga̱jma̱a̱ niruʼwa̱a̱ gakhi̱i̱ ga̱jma̱a̱ jñuu nuxi̱ʼ, nigún kuya̱a̱ náa filisteos (Juec. 15:​9-13). Mú ‹espíritu santo ndrígóo Jeobá niʼni dí Sansón magiʼdoo tsiaki̱i̱›, ga̱jma̱a̱ niʼngo̱o̱ niʼnikriyamínaʼ. Nda̱wa̱á, ‹nixkamaa mbá jxaráwuun búrru dí kaʼníí gújkhúʼ›, rúʼko̱ nigudíin ga̱jma̱a̱ mbá 1,000 xa̱bekha filisteos (atraxnuu Jueces 15:​14-16).b

5. Xú káʼnii nisngájma Sansón rí nikumu̱u̱ kaʼyoo Jeobá rá.

⁵ Mbá jxaráwuun búrru ráʼ. Ndíjkha rí Sansón nijmuu rígi̱ rá. Ikhaa ndiʼyoo dí itháán gíʼdoo numuu rí mambáyuminaʼ náa Jeobá, tséʼniuu asndu xkáʼnii má dí gájmuu. Xa̱bu̱ jmbii bigi̱, nijmuu dí nixkamaa mu maʼni dí Jeobá nandoo. ¡Niʼngo̱o̱ numuu rí nimbáyuminaʼ náa Jeobá!

6. Ndiéjunʼ gándoo gajmañulú xóo nixtáa Sansón rá.

⁶ Jeobá maxnáaʼ tsiaki̱i̱ mu maʼnga̱a̱ʼ matanimbánii asndu ndiéjunʼ ñajunʼ dí gákhanaaʼ na xuajñuu, maski asndu nguáná makumaaʼ dí xájmáán gátanimbaníí. Ikhaa ma̱ndoo mambáyulú mbaʼa enii dí asndu maʼniuluʼ tsiánguá. Á mu natambáyuminaʼ náa Jeobá ma̱ndoo ma̱ta̱ya̱a̱ gajkhun dí ikhaa mambáyaaʼ mu maʼnga̱a̱ʼ matanimbánii rí naniguuʼ ikhaa, ga̱jma̱a̱ maxnáaʼ tsiaki̱i̱ xó má niʼni ga̱jma̱a̱ Sansón (Prov. 16:3).

7. Ndiéjunʼ xkri̱da nasngájma rí gíʼdoo numuu mbuʼyáʼ ikha ndrígóo Jeobá rá.

⁷ Mbaʼin a̱ngiu̱lú bi̱ nuñambáá náa naguma guʼwá nusngajma rí nakumu̱ún kuyáá Jeobá. Numuu rí nákha ginii, xuajñuu Jeobá naríyaʼ xtiʼkhu guʼwá xóo maguma ga̱jma̱a̱ naʼni mbaʼa guʼwá náa magimbáánʼ ga̱jma̱a̱ i̱ʼwáʼ guʼwá rí najmaa náa xuajñuu. Mú xóo má ni̱jkha̱ ra̱ja̱a̱ itháán xuajñuu Jeobá, ndiyóoʼ dí maxtiʼkhu̱u̱ mbaʼa. A̱ngiu̱lú bi̱ kuya̱ edxu̱u̱ ndiyáʼ ikha rí na̱ʼkha̱ náa Jeobá mú xúʼko̱ ma̱ndoo muri̱ya̱ʼ awan. Mbá xkri̱da, nigi̱ʼdi̱i̱ nitsi guʼwá rí niguma má ga̱jma̱a̱ ni̱ni̱ májáanʼ. Ndxájulú Robert, bi̱ niñajunʼ wéñuuʼ náa naguma guʼwá náa xúgíʼ numbaaʼ naʼthí: “Nákha nigi̱ʼdu̱u̱ imbo̱o̱ nuxi̱ʼ awan rígi̱, xúgíinʼ niʼniún gakhi̱i̱, numuu rí nindxu̱u̱ mixtiʼkhu kayuuʼ xóo naguwáʼ runixu náa mba̱yu̱u̱ʼ tsiguʼ. Mú a̱ngiu̱lú nikúwá xawii munimbánii, ga̱jma̱a̱ nikujmaa dí Jeobá naʼni tsajkurámuuʼ imbo̱o̱ nuxi̱ʼ awan rígi̱”. Phú gajkhun dí rígi̱, nasngájma dí Jeobá naxná ikhoo xuajñuu mu mambanúu rí nandoo. Ikha jngóo májánʼ gáʼni dí murajximíjna̱: “Lá ndaʼyaʼ ikha ndrígóo Jeobá ga̱jma̱a̱ na̱ni̱ tsiakimínáʼ mu manimbánuu ráʼ.”

SANSÓN NIJMUU TSIAKII RÍ NIXNÚU JEOBÁ

8. Ndiéjunʼ niʼni Sansón índo̱ nikándawuuʼ wéñuuʼ rá.

⁸ Mbáa narmáʼáan a̱jkia̱a̱nʼ dí niʼni Sansón dí xáʼngo̱o̱ gáʼni mbáa xa̱bu̱ú. Mbá xkri̱da, niʼngo̱o̱ niʼnigajmaa mbáa león ga̱jma̱a̱ nixíyáa, nda̱wa̱á nigudíin mbá 30 xa̱bekha bi̱ naguwáʼ náa xuajin Asquelón ndrígu̱ún filisteo (Juec. 14:​5, 6, 19). Sansón ndiʼyoo dí xáʼngo̱o̱ gáʼni á mu Jeobá tsembáyúu. Nikujmaa kaʼwu dí nimbáyuminaʼ náa Dios ndrígóo índo̱ nda̱wa̱á rí nigudíin mbá 1.000 filisteos ikhaa nikandawuu. Ikhú nindo̱ʼo̱o̱ Jeobá rí maxnúu iya’ maga̱a̱n, raʼkháa ikhaa ndiyáʼ (Juec. 15:18).

9. Xú káʼnii niriʼña̱a̱ Jeobá dí nitajkháan Sansón rá. (Jueces 15:19.)

⁹ Xú káʼnii niriʼña̱a̱ Jeobá rí nindo̱ʼo̱o̱ Sansón rá. Jeobá niʼni mbá milagro, niʼni dí marigá iduu iyaʼ. Índo̱ Sansón niʼga̱a̱n “ndiyáa tsiaki̱i̱ ga̱jma̱a̱ niʼni̱i̱ a̱jkiu̱u̱n” (atraxnuu Jueces 15:19).c Mbáa iyaʼ rígi̱, nirígá xóó a̱jma̱ tsiguʼ nda̱wa̱á, índo̱ Jeobá niʼni rí profeta Samuel maʼnirámáʼ libro dí Jueces. Mbáa índo̱ israelita nduyáá iyaʼ, naʼni marmáʼáan a̱jkiu̱ún dí Jeobá ma̱ndoo mambáñún náa mbiʼi gakhi̱i̱.

10. Ndiéjunʼ gíʼmaa muʼni mu mambáyulú Jeobá rá. (Atayáá ma̱ngaa xtiʼkhu.)

¹⁰ Xóo má niʼni Sansón, xúgiáanʼ ma̱ndoo munda̱ʼa̱a̱ Jeobá dí mambáyúlú. Ndayúlú dí mambáyulú tséʼniuu ajndu ndiéjuunʼ dí najmáán nuʼni o dí niʼngo̱o̱ niʼni má náa xuajñuu. Gíʼmaa manindxu̱lú xa̱bu̱ guabaaʼ ga̱jma̱a̱ guʼyáá májánʼ dí i̱ndó ma̱ndoo makuwáanʼ májánʼ á mu numbáyumijná náa ikhaa. Sansón ndiyáa tsiaki̱i̱ índo̱ niʼga̱a̱n iyáʼ dí nixnúu Jeobá. Á mu najmulú xúgíʼ dí naxnúlú Jeobá, rúʼko̱ gámbáyulú mu mambájxulú itháán májánʼ gajmiúlú (Mat. 11:28).

11. Ndiéjunʼ gíʼmaa muʼni mu majmulú xúgíʼ rí na̱ʼkha̱ náa Jeobá ga̱jma̱a̱ ndiéjunʼ xkri̱da nigíʼ xa̱bu̱ gajmii rá.

¹¹ Guʼyáá xkridoo Alexéi, mbáa ndxájulú bi̱ xtáa náa Rusia, bi̱ xtáa namínúuʼ eni̱ xa̱bu̱ ñajunʼ. Ndiéjunʼ embáyúu ikhaa mu maʼngo̱o̱ xá. Ikhaa ga̱jma̱a̱ a̱ʼgiu̱u̱ nuniga̱jma̱a̱ má xúʼko̱ Biblia. Alexéi niʼthí: “Naniminaʼ dí manigajma̱a̱ má xúʼko̱ Biblia ma̱ngaa rí maguxnuu xúgíʼ mbiʼi. Ma̱ngaa mámbá miʼcha̱, ikhúún gajmuʼ a̱ʼgiu̱ʼ, nuraxnuxu texto ma̱ngaa nitajkáanʼxu mbóó”. Ndiéjunʼ esngulú rígi̱ rá. Dí gíʼmaa mumbayumíjná náa Jeobá, raʼkháa ga̱jma̱a̱ tsiaki̱i̱ ndrígulú ikháanʼ. Mu ma̱ndoo muʼni rígi̱, ndayóoʼ dí muʼni gujkhúʼ fe ndrígulú dí muʼnigajma̱a̱ Biblia, guʼtájkáan, guʼgua̱ reunión ga̱jma̱a̱ guʼtáraʼa má xúʼko̱. Á Mu nuʼni xúgíʼ rígi̱, Jeobá maʼnitsajkurámáánʼ ga̱jma̱a̱ mambáyulú dí muʼni má xúʼko̱ ñajuunʼ. Xó má niʼni ga̱jma̱a̱ Sansón dí nixnúu tsiaki̱i̱, xúʼko̱ má gáxnulú mangáánʼ.

SANSÓN TAKANÁJKOO

12. Ndiéjunʼ dí ra̱májánʼ niraʼwíí maʼni Sansón ga̱jma̱a̱ ndíjkha rí ninindxu̱u̱ mixtiʼkhu ki xóo dí niraʼwíí maʼni nákha ginii xá.

¹² Sansón ninindxu̱u̱ xó má ikháánʼlú, ikha jngóo nguáná taraʼwíí májánʼ dí maʼni. Mbá miʼtsu, niraʼwíí maʼni mbá dí nda̱wa̱á niʼni mamínuuʼ wéñuuʼ, numuu rí na̱nguá nikumu̱u̱ kaʼyoo Jeobá. Índo̱ niñajunʼ xóo juez, “ninigu̱u̱ʼ kaʼyoo mbáa a̱ʼgu̱ bi̱ xtáa náa Sorec, bi̱ mbiʼyuu Dalila” (Juec. 16:4). Nákha xóó tséʼninuwiin Dalila, nindoo mbayáa mbáa a̱ʼgú filistea. Náa Biblia naʼthí dí rígi̱ “na̱ʼkha̱ náa Jeobá, bi̱ xtáa rayáʼ xóo maxmína̱ʼ gajmíi̱n filisteos”. Nda̱wa̱á Sansón ni̱jkha̱ náa Gaza náa xuajñún xa̱bu̱ filisteos, ikhí niguanúu náa goʼwóo mbáa a̱ʼgu̱ bi̱ nagujuamínáʼ. Mbiʼi rúʼko̱, Jeobá nixnúu tsiaki̱i̱ Sansón, mu maríya̱ʼ xkrugoo xuajin, mu xúʼko̱ magi̱ʼdu̱u̱ gajmíi̱n (Juec. 14:​1-4; 16:​1-3). Mú Dalila ninindxu̱u̱ mixtiʼkhu. Mbáa ikhaa nindxu̱u̱ israelita, ikha jngóo á mu dí ndayáa ikhaa, xámbáyúu mu magi̱ʼdu̱u̱ gajmíi̱n filisteos.

13. Mu ma̱ndoo murugua̱a̱ Sansón, ndiéjunʼ niʼni Dalila rá.

¹³ Filisteos, nindúún dí Dalila maʼninduwaaʼ Sansón. Ikha jngóo nixná mbaʼa mbújkha̱a̱ plata ga̱jma̱a̱ ikhaa nigruigú. Mú, xú káʼnii lá dí Sansón tséʼyoo dí nindoo maʼniuu Dalila rá. O lá ga̱jma̱a̱ numuu dí nindoo kaʼyoo wéñuuʼ ráʼ. Tséʼniuu asndu xkáʼnii má, mú Dalila nitsudaa má xúʼko̱ Sansón mu maʼthuun náa e̱ʼkha̱ tsiaki̱i̱ ndrígóo, ga̱jma̱a̱ ikhaa niʼthúu̱n. Phú migíná, Sansón nindáti̱go̱o̱ tsiaki̱i̱ ndrígóo nguáthá mba̱yu̱u̱ʼ ma̱ngaa niniñuuʼ Jeobá (Juec. 16:​16-20).

14. Ndiéjunʼ nigíʼnuu Sansón ga̱jma̱a̱ numuu rí nikumu̱u̱ kaʼyoo Sansón rá.

¹⁴ Sansón nikumu̱u̱ kaʼyoo itháán Dalila ki xóo Jeobá ga̱jma̱a̱ rígi̱ niʼni dí mamínuuʼ wéñuuʼ. Filisteos nirugua̱a̱ ga̱jma̱a̱ nirawíi iduu. Nda̱wa̱á nixuda̱a̱ʼ náa guʼwá ejua̱a̱nʼ dí rígá náa Gaza, náa xuajin dí niríyaʼ xkrugoo, ikhí ninindxu̱u̱ ñumbáá mu maʼnu̱u̱ tsiga. Nda̱wa̱á filisteos nini mbá ndxa̱a̱ ga̱jma̱a̱ nixnajxi̱ mbá tsigijñaʼ náa dios Dagón, numuu rí niku̱mu̱ún dí ikhaa nixnájxi̱i̱ Sansón náa ñawúúnʼ. “Niriya̱a̱ʼ Sansón náa guʼwá ejua̱a̱nʼ mu maʼni munduʼwa”, xóo nuʼthá nitsijmaa (Juec. 16:​21-25).

15. Xú káʼnii nisngájma Sansón rí nikumu̱u̱ mbu̱júu̱ kaʼyoo Jeobá rá. (Jueces 16:​28-30; atayáá xtiʼkhu rí kama náa nagi̱ʼdu̱u̱.)

¹⁵ Sansón nikiéʼkhun, mú tákha guabaaʼ a̱jkiu̱u̱n. Nindoo maʼnimbánuu má xúʼko̱ ñajunʼ rí Jeobá nixnájxu̱u̱, dí magi̱ʼdu̱u̱ gajmíi̱n filisteos (atraxnuu Jueces 16:​28-30).d Ikha jngóo nindo̱ʼo̱o̱ Jeobá: “Atatsíñúnʼ dí ma̱ni̱ gámbíin filisteos”. Dios niʼdxawuun dí niʼtájkáan Sansón ga̱jma̱a̱ nixnúu itháán tsiaki̱i̱ ki xóo rí nigiʼdoo nákha ginii. Sansón nigudíin itháán filisteos mbiʼi rúʼko̱ ki xóo náa xúgíʼ mbiʼi rí nixtáa.

16. Ndiéjunʼ ejmañulúʼ ga̱jma̱a̱ numuu Sansón rá.

¹⁶ Maski ajndu Sansón nimínuuʼ ga̱jma̱a̱ dí niraʼwíí maʼni, mú tániñuuʼ raʼnimbánuu dí nandoo Jeobá. Xúʼko̱ má mangáánʼ, xáʼyoo makanájkulú á mu nuxuʼdamíjná aʼkhá ga̱jma̱a̱ muxprigulú o asndu mandáti̱gu̱lú ñajunʼ dí kuaʼdáá náa guʼwá nagimbáanʼ. Gármáʼáanʼ a̱jkiu̱lú dí Jeobá, maʼndoo kaʼyulú má xúʼko̱ (Sal. 103:​8-10). Maski ajndu makiéʼkúlú, mú ma̱ndoo majmiuu má xúʼko̱ ga̱jma̱á nindxu̱lú, xó má niʼni ga̱jma̱a̱ Sansón.

17, 18. Náá numu naxnáaʼ tsiaki̱i̱ xkridoo Michael rá. (Atayáá ma̱ngaa xtiʼkhu.)

¹⁷ Guʼyáá rí nigíʼnuu ndxájulú bi̱ mbiʼyuu Michael. Ikhaa ninindxu̱u̱ siervo ministerial ga̱jma̱a̱ precursor regular, ra̱ʼkhá tháán eʼni ñajuunʼ Jeobá. Phú migíná numuu rí nikudaminaʼ mbá aʼkhá ga̱jma̱a̱ rúʼko̱ niʼni dí nindáti̱go̱o̱ ñajunʼ dí gíʼdoo náa guʼwá nagimbáanʼ. Ikhaa naʼthí: “Májánʼ má xtáá rani̱ ñajuunʼ Jeobá, na̱ni̱ asndu xó má naʼngo̱o̱. Mú índo̱ ni̱jkha̱nú mbiʼi rúʼko̱, asndu niku̱mu̱ʼ xóo nixkumún náa pared. Mú, ndi̱yo̱o̱ má kaʼwu dí Jeobá nditháan xániñuʼ, maski ajndu xúʼko̱ narajximínáʼ á mu ma̱ndoo mambaxúʼ gajmuʼ Jeobá xó má nákha ginii o á mu matanga̱án ma̱ni̱ ñajunʼ náa guʼwá nagimbáanʼ”.

¹⁸ Ra̱ʼkhá tháán májánʼ dí Michael tákanájkoo. Ikha naʼthí: “Nini̱ tsiakimínaʼ dí mambájxuʼ itháán gajmuʼ Jeobá. Rí nimbáyuʼ nindxu̱u̱ dí matajkáan ga̱jma̱a̱ xúgíʼ a̱jkiu̱nʼ, manigajma̱a̱, ga̱jma̱a̱ rí mandxa̱ʼwa̱mínáʼ”. Nda̱wa̱á Michael nigruigúu ñajunʼ rí gíʼdoo náa guʼwá nagimbáanʼ ga̱jma̱a̱ rí xúgi̱ nindxu̱u̱ mbáa bi̱ kayá edxu̱u̱ ga̱jma̱a̱ precursor regular. Ikhaa naʼthí: “Rí nimba̱yúʼ ga̱jma̱a̱ tsiakii rí nixnuʼ a̱ngiu̱lú, mú itháán a̱ngiu̱lú bi̱ kuya̱ edxu̱u̱ nimbáyúʼ mba̱yo̱o̱ dí Jeobá nandoo kaʼyoʼ má xúʼko̱. Xúʼko̱ ma̱ndoo mani̱ ñajuunʼ rí asndu xáʼni gawúnʼ ku̱ma̱ ndrígóʼ. Dí nigíʼnuʼ rígi̱, niʼni mba̱yo̱o̱ dí Jeobá ma̱ndoo maʼni mba̱a̱ a̱jkiu̱u̱n kaʼyoo xa̱bi̱i̱ bi̱ gajkhun natanga̱a̱ a̱jkiu̱u̱n”. Ikhaa má xóo Michael, ma̱ndoo mbuʼyáá gajkhun á mu nixuʼámijná aʼkhá, ma̱ndoo majmiuu ga̱jma̱á nindxu̱lú má xúʼko̱ Jeobá ma̱ngaa maguma tsajkurámáánʼ ma̱ngaa á mu nuni xúgíʼ xó má naʼngo̱o̱ mu muriʼkhui̱i̱ xóo nindxu̱lú ga̱jma̱a̱ xuniʼñáá rumbáyumijná náa ikhaa (Sal. 86:5; Prov. 28:13).

19. Xú nixnáaʼ tsiaki̱i̱ xkridoo Sansón rá.

¹⁹ Náa artículo rígi̱, niʼnigajmaa̱ tikhuʼ xóo nixtáa Sansón. Ma̱ngaa ninindxu̱u̱ xa̱bu̱ aʼkhá, maski ajndu xúʼko̱ táʼni guabaminaʼ rí maʼni ñajuunʼ Dios, niʼni má xúʼko̱ ñajuunʼ asndu nda̱wa̱á dí niʼninduwaaʼ Dalila. Jeobá nindoo kaʼyoo má xúʼko̱, ga̱jma̱a̱ nijmiuu xóó mu maʼni ñajunʼ mba̱ʼu̱. Ndiʼyoo má xúʼko̱ xóo mbáa xa̱bu̱ gíʼdoo fe, ikha jngóo niʼnirámáʼ mbiʼyuu ma̱ngaa náa capítulo 11 ndrígóo Hebreos, náa na̱ʼkha̱ mbiʼñún eʼwíinʼ. Naxnúlú wéñuuʼ tsiaki̱i̱ índo̱ nduʼyáá rí anu̱lú bi̱ xtáa mekhuíí nandoo kaʼyulú ga̱jma̱a̱ nandoo maxnúlú tsiaki̱i̱, itháán índo̱ kuwáanʼ ranújngulú náa awúu̱n xkujndu ga̱jma̱a̱ ndayúlú dí mambáyulú. Xó má niʼni Sansón, gunda̱ʼa̱ Jeobá: “Mbá péñu, garmáʼáan a̱jkia̱a̱nʼ xtayoʼ. Dios ndrígóʼ. Araxnúʼ tsiaki̱i” (Juec. 16:28).