Kíxnuu 2

Nimbáá nda̱wa̱a̱ tsáa bí mambaxa̱ʼ májánʼ ga̱jma̱ʼ xóo Dió

Rí mambaxa̱ʼ ga̱jma̱ʼ Dió ra̱ʼkhá tháán májánʼ rí gatagiʼnii. Dió maʼsngááʼ xú gakanaʼ rí maraxtaa tsímáá jma̱a̱ náa nda̱a̱ rí mitsaʼkháán; mambayaaʼ matatsiʼñanʼ xúgíʼ kiʼsngáá rí ragajkhuun. Xúʼkhue̱ máʼ mangoo mambayaaʼ má xathani dí ra̱májánʼ. Maʼdxaun rí gatabríga̱a̱. Ikhaa maʼni rí maxtáa tsímáá ámia̱nʼ nda̱a̱ ga̱jmá náa ikháánʼ (Salmo 71:5; Filipenses 4:6, 7). Dió gambayaaʼ índo̱ ganujngáá rí gaki̱i̱ (Salmo 18:18). Ikhaa má mangoo, Dió naxnára̱ʼa̱ mamini̱nʼ maraxtaa kámuu mbiʼi (Romanos 6:23).

Índo̱ na̱jkua̱nulúʼ nuniʼníí Dió na̱jkua̱nú nuniʼnúnʼ bí nambáxu̱u̱n májánʼ gajmiún Dió. Bí nambáxu̱u̱n májánʼ gajmiún Dió mambaxúún májánʼ ga̱jma̱ʼ. Maguanu manindxu̱u̱n ndu xó angianʼ. Maʼdxúún rí musngáʼ ga̱jma̱a̱ numuu Dió, mangoo mumbayááʼ.

Nangua mbriguanʼ gajmiulúʼ Dió. Índo̱ natagiiʼ mambaxa̱ʼ ga̱jma̱ʼ Dió, giʼdo makruaʼa rígi̱: rí mambaxulúʼ májánʼ gajmiulúʼ Dió ra̱ʼkháa xó rí mambaxulúʼ májánʼ gajmiulúʼ mbáá xa̱bu̱. Ikhaa giʼdo mba̱a̱ wéñuʼ tsiguʼ ra̱ʼkháa xóo ikháanʼ, ra̱ʼkhá tháán ejmañuu wéñuʼ mangoo giʼdo wéñuʼ sieki̱i̱. Mbáwíí ikhaa giʼmaa maʼtháñajulúʼ. Ikha jngó, ámu nandulúʼ mambaxulúʼ májánʼ gajmiulúʼ, giʼmáanʼ muʼdxawín rí eʼthi muʼni rí endu̱ʼu̱lúʼ. Magajnulúʼ májánʼ ámu nuʼni máʼ xúʼkhue̱ xúgíʼ rígi̱ (Santiago 1:25).