Gajmañaaʼ marataráʼa májánʼ: Atayáá xú káʼnii matriʼña̱a̱ xa̱bu̱ bi̱ nakiʼnáa me̱ndaʼkho

Ndíjkha rí gíʼdoo wéñuʼ numuu. Náa nuʼtáraʼa nuxkamin xa̱bu̱ bi̱ nuriʼñulú ga̱jma̱a̱ gamajkhu. Mú, Jesús niʼtáriyaʼ dí makuwá bi̱ mawiñunʼ kuyulúʼ (Juan 17:14). Ikha jngó, ragíʼmaa maguanúlú tsiánguá á mu nuxkamin xa̱bu̱ bi̱ nakiʼníin me̱ndaʼkho kuyulúʼ. Á mu xúʼko̱ egíʼní, gíʼmaa muriʼña̱a̱ xó má eniguʼ Jeobá, Dios bi̱ nuʼthá ga̱jma̱a̱ numuu (Rom. 12:17-21; 1 Ped. 3:15). Rí muriʼña̱a̱ májánʼ maʼni dí xa̱bu̱ ni xákiʼnáa itháan. Ma̱ngaa, xa̱bu̱ mbaʼyoo rí májánʼ niriʼñálú ga̱jma̱a̱ xúʼko̱ má eʼwíínʼ bi̱ gúyáá, ga̱jma̱a̱ rúʼko̱ gáʼne rí maʼndún mudxawíín índo̱ gátangiín mbu̱júu̱ bi̱ nutaraʼa (2 Cor. 6:3).

Xú káʼnii gúʼni:

Xákiʼnán ga̱jma̱a̱ májánʼ a̱jkia̱nʼ gáʼne. Rígi̱ gáʼne marigá rí májánʼ. Xáku̱ma̱ʼ rí xa̱bu̱ nakiʼnáa kaʼyaʼ ikháánʼ (Ecl. 7:9). Mbáa ikhaa gíʼdoo xkujndu rí mingíjyúuʼ o mbáa nitadi̱i̱ xkrugoo mbóo mbiʼi dí ikhaa na̱nguá xtáa májánʼ. Á mu tsíyoo gáʼyoo ajngáa dí na̱jkua̱ gúʼthán, mbáa xóó tséjkha̱nú maninuʼ májánʼ xúgíʼ(2 Cor. 4:4).
Májánʼ gátriʼña̱a̱ (Prov. 15:1). Lá nitaxkajui̱i̱ xa̱bu̱ ráʼ. Lá nitani̱ rí maniñuʼ raʼni ñajunʼ ndrígóo xáʼ. Gajkhun má, bi̱ Nuʼtáraʼa tséyóoʼ muʼthán xa̱bu̱ rí maʼni mba̱a̱ a̱jkiu̱u̱n mu muʼnimbánii ñajunʼ rí kuaʼdáá. Mú, ma̱ndoo maratha̱a̱n maʼni mba̱a̱ a̱jkiu̱u̱n á mu ni̱dxu̱ʼnú mbóo mbiʼi rí ikhaa na̱nguá xtáa májánʼ. Á mu xa̱bu̱ nakiʼnáa ga̱jma̱a̱ numuu xtujtaa rí niʼdxaun ga̱jma̱a̱ numulúʼ. Ma̱ndoo muʼthán: “Nakroʼoʼ má náa numuu nakiʼnán. Mú, rí nitha̱nʼ ga̱jma̱a̱ numuxu ragájkhun nindxu̱u̱. Lá ma̱ndoo matatsiʼñúʼ matha̱nʼ rí phú gajkhun ráʼ.” Á mu xa̱bu̱ tsénigu̱ʼ mbá rí nuʼni, rí xú káʼnii eʼyáálú eʼdi o náa numuu rí na̱nguá e̱jkua̱ kuʼdi̱i̱n e̱ji̱n mu̱phu̱ idú ikhú ma̱ndoo muʼthán: “Nakroʼoʼ má. Eʼwíínʼ xa̱bu̱ nituxu xúʼko̱ kaʼnii ma̱ngaa. Mú, lá ma̱ndoo masngajmáʼ rí naʼthí náa Biblia náa numuu rí nunixu xúʼko̱ kaʼnii ráʼ.”
Á mu rí xa̱bu̱ nakiʼnáa me̱ndaʼkho, mbáa májánʼ gáʼne rí muʼgua̱lú rí asndu nimbá xúʼgíʼ muʼthá. Ga̱jma̱a̱ á mu na̱nda̱ʼa̱ rí ní xágun gúyáá bi̱ nutaraʼa numuu Jeobá, ikhú aratháán rí mambanúu xó má eʼthí ikhaa.

Atagíʼ matani rígi̱ rí mbá gu̱nʼ:

Gu̱ya̱a̱ xú káʼnii muriʼñún bi̱ nakiʼníin me̱ndaʼkho índo̱ gúnigajmaa mbá guʼwáanʼ.
Nda̱wa̱á rí niratángáwíí mbáa xa̱bu̱ bi̱ nikiʼnáa me̱ndaʼkho, atraxi̱i̱ bi̱ nigájnaʼ ga̱jma̱ʼ á mu ndiyóoʼ matriʼña̱a̱ itháan májánʼ.