Guʼniratamijná mu muguaʼdáá Conmemoración

Mbóo mbiʼi 13 ñajunʼ gu̱nʼ nisán tsiguʼ 33. Jesús ndiʼyoo rí imbóó mbruʼun rúʼko̱ gaxtáa gajmíi̱nʼ bi̱ nambáxu̱u̱ májánʼ nákha xóó tsíxiyáa. Maxtáa gajmíi̱n ikhiin náa imbóó Pascua dí magiʼdoo ga̱jma̱a̱ mariʼkhu̱u̱ mu muniriyaaʼ Ganitsu wañuu Señor. Numuu rí ninindxu̱u̱ mbóo mbiʼi dí ra̱ʼkhá tháán nigiʼdoo numuu, ndiyóoʼ maguma májáánʼ, ikha jngó nikuʼmaa Pedro ga̱jma̱a̱ Juan mu muni rígi̱ (Luc. 22:7-13). Asndu nákha ikhú, ikháanʼ bi̱ ni̱ndxu̱lú cristianos gíʼdoo numuu rí muʼniratamijná mu muʼniriyaaʼ Conmemoración (Luc. 22:19). Guʼyáá ndiéjunʼ gíʼmaa muʼni mu makuwáanʼ xawii nákha xóó tsírígá Conmemoración rí maʼni 3 ñajunʼ gu̱nʼ abril.

Dí gíʼmaa muniratáá bi̱ kuya̱ edxu̱u̱:

Mbuyáá á mu majmaa guʼwá náa nagimbáanʼ o i̱mba̱ níʼkhá náa marigá mbaʼa xílí ga̱jma̱a̱ mambiʼi májánʼ ma̱ngaa náa xáʼni mijkha wéñuʼ. Muriyaʼ wapháá awan mu muni kaʼwii májánʼ náa marigá Conmemoración.
Mbuyáaʼ mbáa bi̱ najmañuu maxná májánʼ discurso, xúʼko̱ má ndxájulú bi̱ mayéʼga xúgíʼ reunión ga̱jma̱a̱ a̱ngiu̱lú bi̱ mutajkáan nákha xóó tsínújngoo pan ga̱jma̱a̱ vino.
Á mu nawi̱i̱n eʼwíínʼ a̱ngiu̱lú náa mbá guʼwá, guyáá náa hora gárígá mámbá reunión xúʼko̱ má índo̱ gátu̱ʼu̱u̱n ga̱jma̱a̱ índo̱ gagájni̱i̱n náa guʼwá ma̱ngaa náa maguajún carro.
Muraʼwi̱i̱n acomodadores ga̱jma̱a̱ bi̱ muni manújngoo pan ga̱jma̱a̱ vino náa bi̱ gáguwáʼ.
Mbuyáá dí marigá pan ga̱jma̱a̱ vino rí kaʼyoo, ga̱jma̱a̱ dí marigá xúbá, copa, mesa ga̱jma̱a̱ mantel dí májánʼ majmaa mbiʼi rúʼko̱.

Dí gíʼmaa muniratáá bi̱ publicadores:

Mutaraʼa xó má eʼngo̱o̱ mu muxna invitación ndrígóo Conmemoración.
Muniraʼmáʼ náa i̱yi̱i̱ʼ mbiʼñún bi̱ nusngúún ga̱jma̱a̱ numuu Biblia, bi̱ kuñún, bi̱ nunigajmaa gajmiún o bi̱ nuñajunʼ gajmiún ga̱jma̱a̱ eʼwíínʼ bi̱ nuniʼnuʼ mu mutún maguwáʼ náa Conmemoración.
Muraxnuu náa Biblia rí kaʼyoo migixnuu índo̱ maʼni Conmemoración ga̱jma̱a̱ mundxaʼwamíjna̱ dí guraxnuu.
Mutún bi̱ gáguaʼnu náa Conmemoración dí májánʼ nini rí niguwáʼ.