Gajmañaaʼ marataráʼa májánʼ: Atani dí maʼndún mbuyáá itháan bi̱ nuraxnuu revistas ndrígúlú

Ndíjkha rí gíʼdoo wéñuʼ numuu. Mbaʼin xa̱bu̱ nanigu̱nʼ revista ndrígúlú mú tsíñún gúnigajmaa Biblia gajmiúlú, mbáa mu májánʼ má kúwi̱i̱n náa religión ndrígu̱ún o mbáa numuu rí tsíguapiin munigajmaa. Maski ajndu xúʼko̱, numuu rí tsíniñaʼ ruraxnuu revista, maʼni rí maʼndún mbuyáá itháan dí e̱ʼkha̱ raʼthí náa Ajngá rawunʼ Dios (1 Ped. 2:2). Mbáa marigá mbóo artículo rí maʼga̱nú asndu náa a̱jkiu̱ún, o naxtiʼkhuu xóo kúwi̱i̱n. Índo̱ gúʼgua̱ ruʼñún mbégu̱ʼ ga̱jma̱a̱ rí mu̱ʼgua̱ má xúʼko̱ mambáyulúʼ mbuʼyáá ndiéjunʼ rí eyoo mbaʼyoo itháan ga̱jma̱a̱ ndiéjunʼ rí naʼni maxmiéjunʼ, ga̱jma̱a̱ ikhiin xámiñun mutulú rí endxa̱ʼwa̱a̱ edxu̱ún. Mbáa nda̱wa̱á, ma̱ndoo mugíʼdi̱i̱ muʼnigajmaa gajmiúlú dí e̱ʼkha̱ raʼthí náa Biblia.

Xú káʼnii gúʼni:

Adédxuʼ maraxna̱a̱ xa̱bu̱ revista Bi̱ Nayejngoo mámbá rí nagájnuu nuxi̱ʼ. Mbáa ma̱ndoo mi̱dxu̱ʼ gáta̱ya̱a̱ i̱ʼwáʼ mbiʼi rí gu̱nʼ má rúʼko̱ mu maratha̱a̱n rí maguxnuu mbá artículo ndrígóo revistas dí nitatsíñáʼ, o mu maraxna̱a̱ imbo̱o̱ i̱yi̱i̱ʼ rí najuixna gu̱nʼ rúʼko̱. Atayáá májánʼ dí mataniraʼmáʼ. (Atayáá Nuestro Ministerio del Reino rí gu̱nʼ enero tsiguʼ 2014, ináa 3.)
Atani̱rataminaʼ mámbá dí mi̱dxu̱ʼ gáta̱ya̱a̱ xa̱bu̱. Raʼkháa i̱ndó revistas gáraxna̱a̱, atagíʼ maratamíjná ga̱jma̱ʼ ma̱ngaa atani dí mambaxáʼ ga̱jma̱ʼ. Xúʼko̱ xáʼniulu mingíjyúuʼ muʼni rí xa̱bu̱ maʼndoo majmañuu itháan rí gajkhun.
Á mu nandoo atagíʼdi̱i̱ marasngáá xa̱bu̱ ga̱jma̱a̱ numuu Biblia. Xí mu dí mbá xa̱bu̱ bi̱ náa natatsíñáʼ revistas naraxa̱ʼ ndiéjunʼ eʼthí Biblia ga̱jma̱a̱ numuu mbóo tema, ayédxuʼ mbá i̱yi̱i̱ʼ rí nuʼnigajmaa náa nagimbáanʼ mu mariʼña̱a̱ graxe̱ rí niʼni ga̱jma̱a̱ gu̱ya̱a̱ nájmáanʼ. Nákha xóó tsédxúuʼ, atani̱i̱ i̱mba̱ graxe̱ rí nambánii ga̱jma̱a̱ tema rúʼko̱ ma̱ngaa aratháán rí matriʼña̱a̱ índo̱ gídxúʼ nda̱wa̱á. Á mu naratá má xúʼko̱ dí eʼthí náa Biblia ga̱jma̱ʼ xa̱bu̱ ma̱ngaa najmaʼ Biblia o i̱ʼwáʼ i̱yi̱i̱ʼ dí najmaa mu miʼnigajmaa, ikháánʼ nitagíʼdi̱i̱ má marasngáa ga̱jma̱a̱ numuu Biblia. Lá nitatsíñáʼ folleto Ajngáa rí májánʼ ga̱jma̱a̱ niratháán xú káʼnii miʼnigajmaa Biblia rí xáʼni mbaʼa minutos ráʼ. I̱mba̱ rí ma̱ndoo matani nindxu̱u̱ rí matasnga̱jmáá videos Náa numuu rí gíʼmaa muʼnigajmaa Biblia rá. Ga̱jma̱a̱ Xú káʼnii nindxu̱u̱ rí miʼsngáa ga̱jma̱a̱ numuu Biblia rá. Maski ajndu xa̱bu̱ na̱nguá nindoo matanigajmaa ga̱jma̱ʼ nákha ginii, marigá dí maʼni mariʼkuminaʼ. Náa numuu dí tsiratháán marasngáá mbu̱júu̱ xá.

Atagíʼ matani rígi̱ rí mbá gu̱nʼ:

Ataniraʼmáʼ mbiʼñún xa̱bu̱ bi̱ ma̱ndoo mi̱dxu̱ʼ gáraxnu̱u̱n revista mámbá gu̱nʼ. Araxnún revistas dí itháan nuxi̱ʼ ga̱jma̱a̱ arathún rí matangaán mu maraxnu̱u̱n i̱ʼwáʼ dí gagájnuu nda̱wa̱á.