Kíxnuu 16

Gusnga̱jma rí nandulúʼ kuʼyáá Dió

Mú mandoo muguaʼdaa má xúʼko mbáá bí nambáxulúʼ májánʼ gajmiulúʼ, giʼdo muʼthán. Nuʼdxawíín rí eʼthi, xúʼkhii̱n má mangaa nadxawunlúʼ. Xúʼkhii̱n má mangoo nuʼthúún eʼwíínʼ rí májánʼ ga̱jma̱a̱ numuu. Kayuuʼ má xúʼkhii̱n jnii ámu nandulúʼ mambaxulúʼ májánʼ gajmiulúʼ Dió. Atayaa rí eʼthi Biblia ga̱jma̱a̱ numuu xúgíʼ rígi̱.

Mugríga̱a̱ tsejtsí mbiʼi Jeobá. «Xuniʼŋaʼ runi sakun.» (Romanos 12:12.)

Muraxnuu ajngáa raunʼ Dió náa Biblia. «Xógíʼ rí ajngóó Dió nini xa̱bu̱, Espíritu su Mikaʼjui ndeyikun muni, ikhaa ríʼkui mambayulúʼ muniʼnu̱ʼ ri gajkhun, jma̱a̱ maʼni mbuʼyáa náa rí raʼkhí iʼni̱, jma̱a̱ magüikaʼlu murí maʼsngaʼlu xujaʼni giʼmaʼlu makuwá mejanʼ jmbuu.» (2 Timoteo 3:16.)

Gusngún eʼwíínʼ ga̱jma̱a̱ numuu Dió. «Ga xúgi̱ ra aʼgua jndo inuu xógíʼ numbaa náa mámbáá xuajin, ga usjngún xa̱bu̱ rí jma̱a̱ numuu, [...] xúʼkui má usjngún rí munimbu̱u̱n xógíʼ rí gitañajunʼ rí ikháanʼla netanʼla.» (Mateo 28:19, 20.)

Guxu̱ʼmámijná gajmiulúʼ bí nambáxu̱u̱n májánʼ gajmiún Dió. «Su nambáxu̱u̱ jmiu xa̱bu̱ su nuni rí ra̱mejanʼ, muni mbáti̱ga ikhaa rí ñajunʼ rí mejanʼ.» (Proverbios 13:20.)

Gugimbáanʼ guʼwá náa eniga̱jma̱a̱ bí nutaraʼa numuu Jeobá. «Ga giʼmaʼlu rí mbuʼyáa rí xujaʼni mago mumbañu su inguaʼwín xa̱bu̱ rí maʼni aʼkunʼlu ga xúʼkui ma muʼñu xógíʼ rí mejanʼ, [...] rí índo̱ mámbáá aʼtu̱n ndxáju rí axna siakiminiʼ rí maʼni náa rí nda̱yoʼ.» (Hebreos 10:24, 25.)

Muruguambaa jma̱a̱ ñajunʼ rí naguma numuu Reino. «Ga mámbáá axna xurí kaya a̱ʼtiu̱u̱n maxná; itháan mejanʼ rí xaxna xa̱bu̱ su siyo axna, ga xúʼkui má itháan mejanʼ rí xáni mi ámu rí ikhaa naxni riʼdo xta su naʼtu̱u̱n rí maxni, murí Dió naʼni a̱ʼtiu̱nʼ kaʼyo xa̱bu̱ su naxná jama gagi.» (2 Corintios 9:7.)