Kíxnuu 17

Giʼmáanʼ muʼniu̱n rí májánʼ ámu nandulúʼ muguaʼdíín má xúʼko bí nambáxulúʼ májánʼ gajmiulúʼ

Rí mambaxulúʼ májánʼ gajmiulúʼ mbáá, nagajnu̱ ndu náa amiulúʼ. Ámu itháan ga̱jma̱ñaʼ ga̱jma̱a̱ numuu Jeobá, itháan gaʼndaʼ xtayáa, mangoo maʼndaʼ matani ñajunʼ. Rígi̱ gaʼnian mi̱dxu̱ʼ ki̱dxu̱ʼ Jesukristo (Mateo 28:19). Mandoo mambaxa̱ʼ májánʼ ga̱jma̱ʼ Dió kámuu mbiʼi ámu nataxunguaminaʼ náa kúwiin bí nutaraʼa numuu Jeobá. Káʼnii lá eyooʼ matani mú mandoo maraxtaa ikhí.

Ámu natatsimbaa xtángoo ndrígo̱o̱ Dió natasngájma rí nandaʼ xtayáa. «Murí xa̱bu̱ su naʼni a̱ʼtiu̱u̱n kaʼyo Dió naʼnimbo̱o̱ rí naʼtañajunʼ Dió: xógíʼ rí gitañajunʼ Dió ramingijiuʼ eʼyoo xa̱bu̱ suʼkui murí ikhaa maʼnimbo̱o̱ jma̱a̱ kañiʼ a̱ʼtiu̱u̱n.» (1 Juan 5:3.)

Atagi̱ʼ matani rí e̱jma̱ñaʼ. Rígi̱ nakujmaa rí niʼni kuentu Jesús. Mbáá xa̱bu̱ na̱jma̱ñuu wéñuʼ, niʼni goʼóo ná inuu itsí, mbáá xa̱bu̱ skaguinʼ niʼni ná inuu jui̱ʼi̱. Índo̱ ni̱ʼkha̱ ruʼwa mbiiʼ, guʼwá rí niguma ná inu itsí tajngudiri̱ga̱a̱, mú guʼwá rí niguma ná inuu jui̱ʼi̱ ajndu niwaan xú niguambári̱ga̱a̱. Jesús niʼthi rí xa̱bu̱ bí nudxawíín rí ikhaa eʼsngáá nindxu̱u̱n xóo xa̱bu̱ bí na̱jma̱ñuu wéñuʼ bí niʼni goʼóo ná inuu itsí. Mangoo niʼthi rí bí nudxawíín rí eʼsngáá ikhaa mú tsegi̱ʼ muni rí edxawiin nindxu̱u̱n xóo xa̱bu̱ skaguinʼ bí niʼni goʼóo ná inuu jui̱ʼi̱. Ná lá biʼyaa xa̱bu̱ eyaaʼ manindxa̱ʼ ikháánʼ rá. (Mateo 7:24-27.)

Araxnáximinaʼ náa Dió. Mandoo marata̱a̱n Jeobá ga̱jma̱a̱ rí matagriga̱a̱ marata̱a̱n rí nandaaʼ matani rí nandoo ikhaa kámuu mbiʼi. Ámu nuʼni rí nanigu̱ʼ Dió, nusngájmá rí najkua̱ ki̱dxu̱ʼ Jesukristo (Mateo 11:29).

Gajnguanʼ iyááʼ. «Mitsuwan, arajña aʼkhánʼ, atagruiga̱a̱ mbiʼyuu Señor.» (Hechos 22:16.)

Atani má xúʼkhii̱n ñajunʼ Dió. «Ajndo xógíʼ ñujunʼ rí ikháanʼla nuni, mejanʼ aʼkunʼla uni, uni xurí Señor, ra̱ʼkháa xurí numuu xa̱bu̱ u.» (Colosenses 3:23.)