Lá najmaʼ má aplicación JW Library ráʼ.

Aplicación JW Library nindxu̱u̱ mbá programa dí xáratsi náa ma̱ndoo matrígú Biblia ga̱jma̱a̱ eʼwáʼ i̱yi̱i̱ʼ, xó má video ga̱jma̱a̱ aʼwá rí nigixi̱i̱, náa teléfono, tableta o computadora.

XÓO GARAʼDÁÁ. Ataʼaʼ náa Internet ayuʼ náa tienda de aplicaciones, atrígú ga̱jma̱a̱ atani instalar JW Library. Aplicación ríge̱ rígá mu majmaa náa mixtiʼkhu dispositivos. Índo̱ xtaa náa Internet, atambáʼtá aplicación ga̱jma̱a̱ atraʼwíí rí eyaʼ matrígú mu maraʼdáá náa teléfono, tableta o computadora. Á mu na̱nguá xtaʼdáá Internet, gajmaʼ Internet dí rígá náa guʼwá nagimbáanʼ, náa biblioteca náa nagún mbaʼin xa̱bu̱ o náa mbá cafetería. Índo̱ guámbáʼ má nindrígú i̱yi̱i̱ʼ, xáʼyóoʼ má Internet mu majmaʼ. Numuu rí maʼga̱ ragájnuu i̱ʼwáʼ rí nuxi̱ʼ, mbaʼyóoʼ mata̱ʼa̱ʼ nguáthá mbiʼi nda̱wa̱á mu matandrígú i̱ʼwáʼ rí nuxi̱ʼ dí na̱jkha̱ ragájnuu.

NÁA NUMUU DÍ MARAʼDÁÁ. JW Library nayambáá wéñuʼ mu matanigajmaa mbáwiin ga̱jma̱a̱ ndrígóo reunión. Ma̱ngaa najmaa wéñuʼ mu marataráʼa, mú itháan índo̱ naratáraʼa asndu náa.