Timbáa rey náa Israel asndu índo̱ nigún kudiin xóo esclavo náa Babilonia

Saúl na̱jkha̱nú nanindxu̱u̱ timbáa rey náa Israel. Mú Jeobá táʼndoo gáʼyoo, ikha jngó David nixtiyáaʼ mu maʼni xtiʼkuriyaaʼ Saúl xóo rey. Mbaʼa rí exkamaa ga̱jma̱a̱ numuu David. Nákha dxámá, nixnamíjna ga̱jma̱a̱ Goliat xa̱bu̱ bi̱ mba̱yi̱i̱ʼ wéñuʼ. Nda̱wa̱á nigájnuu ragáyúu náa rey Saúl xa̱bu̱ bi̱ naxígúu kaʼyoo. Ikhú mbáa a̱ʼgu̱ bi̱ nandxa̱ʼóo májánʼ edxu̱u̱ bi̱ nagumbiʼyuu Abigaíl tániñuʼ rí David maxíyáa mbáa xa̱bu̱.

Nda̱wa̱á gájmañuluʼ itháan ga̱jma̱a̱ numuu Salomón, a̱ʼdióo David, bi̱ niriʼkuriyaʼ David xóo rey náa Israel. Ajtsúun reyes bi̱ nikuwa ginii náa Israel nitañejunʼ 40 tsiguʼ mámbáa. Nda̱wa̱á rí nikháñu Salomón, xuajin ndrígóo Israel niwiʼthíin a̱jma̱ reinos, mbáa reino rígá xígií náa norte ga̱jma̱a̱ imba̱a̱ reino rígá xígií náa sur.

Reino bi̱ naʼtañajunʼ náa mbá 10 xuajin ma̱jkha̱ʼ ndrígóo norte, ndijyúuʼ 257 tsiguʼ nákha xóó xa̱bu̱ asirios tseni gámbáa reino bugi̱. Ikhú, 133 tsiguʼ nda̱wa̱á, reino bi̱ naʼtañajunʼ náa a̱jma̱ xuajen ma̱jkha̱ʼ ndrígóo sur niguma gámbáa ma̱ngaa. Ikhú nigún kudiin israelitas xóo esclavo náa Babilonia. NÍʼKHÓO 4 naʼthí rí nirígá mbá 510 tsiguʼ ga̱jma̱a̱ tsiguʼ rúʼko narígá mbaʼa wéñuʼ rí mitsaan mbuʼyáá.