Narígá xkujndu náa goʼwóo David

NDA̱WA̱Á rí David nagíʼdu̱u̱ naʼtañajunʼ náa Jerusalén, Jeobá naʼni rí maʼngu̱u̱n mbaʼa nutu soldados ndrígio̱o̱ náa nuxnamijná. Jeobá Dios nikudaminaʼ náa israelitas rí maxnún ku̱ba̱ʼ ndrígóo Canaán. Rí xúgi̱ Jeobá nimbáñun mu maʼga̱nú maʼni ndrígu̱ún xúgíʼ ku̱ba̱ʼ rí nijuaʼtun makanun.

David ni̱ndxu̱u̱ mbáa xa̱bu̱ bi̱ naʼtañajunʼ májánʼ. Ikhaa nandoo kaʼyoo Jeobá. Ikha jngó, rí phú niʼni ginii nda̱wa̱á rí niʼngo̱o̱ nixnamijná náa Jerusalén, ni̱jkha̱ kayóo ikhí e̱jna̱ rí nimbánuu dí ndrígóo Jeobá. David nandoo maʼni mbá templo náa maniñuʼ e̱jna̱ rí nimbánuu.

Nguátha tsiguʼ nda̱wa̱á, David niʼni mbá aʼkhá dí mitsaʼkháan wéñuʼ. Ikhaa ndaʼyoo dí ragíʼmaa mbayá rí ndrígóo imba̱a̱. Mú mbóo mbiʼi, índo̱ rí ikhaa jruigu náa tsu̱du̱u̱ goʼwóo rí ñajunʼ palacio, nayexirígú ga̱jma̱a̱ ndaʼyoo mbáa a̱ʼgu̱ bi̱ mitsiʼyáa wéñuʼ. Ikhaa nagumbiʼyuu Bat-seba, ga̱jma̱a̱ ajmbio̱o̱ nagumbiʼyuu Urías bi̱ ni̱ndxu̱u̱ soldado ndrígóo David.

David nandoo kaʼyoo wéñuʼ Bat-seba rí asndu naʼni rí maguwáʼ kuya̱a̱ náa palacio ndrígóo. Ajmbio̱o̱ ikhaa xtáa raxnamíjna mitsinguánʼ. David nabóoʼ ga̱jma̱a̱ Bat-seba mú nda̱wa̱á Bat-seba na̱jkha̱nú ndaʼyoo rí magiʼdaa mbáa ada̱. David naxmiéjunʼ wéñuʼ ga̱jma̱a̱ nakuʼma mbá ajngáa náa Joab bi̱ kayá edxu̱u̱ náa soldado rí matsijii Urías náa phú inún bi̱ nuxnamijná mu makhañúu. Índo̱ Urías nakháñuu, David nanigúnʼ ga̱jma̱a̱ Bat-seba.

Jeobá nakiʼnáa kaʼyoo wéñuʼ David. Ikha jngó nakuʼmaa Natán mu maʼthúu̱n ga̱jma̱a̱ numuu aʼkhúun. Ma̱ndoo ma̱ta̱ya̱a̱ gi̱i̱ Natán ga̱jma̱a̱ David. David nagáwiinʼ a̱jkiu̱u̱n dí raʼkhí kayuʼ niʼni, ikha jngó Jeobá na̱nguá exiyáa. Mú Jeobá naʼthí: ‹Numuu dí ra̱májánʼ nitani̱, marigá wéñuʼ xkujndu náa guʼwáaʼ›. ¡Ra̱ʼkhá tháán mba̱a̱ xkujndu nigiʼdoo David!

Timbá, a̱ʼdióo Bat-seba nakháñuu. Ikhú timbáa a̱ʼdióo David, Amnón, niguguaa ga̱jma̱a̱ tsiakii ndxájuu Tamar mu mabóóʼ ga̱jma̱a̱. Absalón a̱ʼdióo David, nakiʼnáa wéñuʼ ga̱jma̱a̱ numuu rígi̱ rí asndu naxíyáa Amnón. Nda̱wa̱á, Absalón naʼni rí mbaʼin xa̱bu̱ maʼndún kuyáá ga̱jma̱a̱ nagíminaʼ xóo rey. Nda̱wa̱á kayuʼ David naʼngo̱o̱ naxnamíjna ga̱jma̱a̱ Absalón, náa ikhaa nakháñuu. Xúʼko̱, David nagiʼdoo wéñuʼ xkujndu.

Índo̱ rí xtáa rarígá xúgíʼ rígi̱, Bat-seba nagiʼdaa mbáa ada̱ bi̱ nagumbiʼyuu Salomón. Índo̱ rí David naʼni xa̱bu̱ nikhi̱i̱ ndayóo nandii, Adonías a̱ʼdióo David nandoo mani̱ndxu̱u̱ rey. Ikhú David naʼni rí mbáa ndxajkun bi̱ nagumbiʼyuu Sadoc mastrámuʼ aceite náa edxu̱u̱ Salomón mu masngájma rí Salomón mani̱ndxu̱u̱ rey. Nguátha mbiʼi nda̱wa̱á David nakháñuu índo̱ rí ikhaa gíʼdoo 70 tsiguʼ. Niʼtáñajunʼ mbá 40 tsiguʼ. Rí xúgi̱ Salomón ni̱ndxu̱u̱ rey náa Israel.