“Guini gambaxiʼ gajmaʼ dxiyaʼ”

Atatsaʼwáminaʼ rí xtaa náa Galilea, nákha nixtáa Jesús. Ga̱jma̱a̱ ikháánʼ na̱dxu̱ʼ asndu náa Jerusalén mu mataniriyaʼ ndxa̱a̱ Cabañas. Ma̱ngaa a̱ngia̱nʼ bi̱ ikhaa má creencia ndrígu̱ún niguwáʼ náa mbaʼa xuajen. Dí xúgi̱ nandaʼ maraxnaxí mbá tsigijñaʼ náa Jeobá. Ikha jngó na̱dxu̱ʼ náa xúgíʼ calle ndrígóo xuajen mú mi̱dxu̱ʼnú náa templo, ga̱jma̱a̱ na̱dxu̱ʼ jcháa mbáa tsu̱jtuunʼ. Índo̱ na̱dxu̱ʼnú náa templo asndu rakáʼnii mata̱ʼa̱a̱ numuu rí kuwa mbaʼin wéñuʼ xa̱bu̱ bi̱ nandún muxnaxi̱ tsigijñaʼ. Mú dí xúgi̱ kaʼyaʼ maraxnaxíi tsu̱jtuunʼ náa dxájkuun. Mú, índo̱ inu maraxnaxíi narmáʼáan a̱jkia̱nʼ rí mbáa ndxájuaʼ, bi̱ mbáa xtáa náa majñu̱ʼ xa̱bu̱ bi̱ mbaʼin buʼko̱ o asndu náa má náa xuajen, nakiʼnáa kaʼyáʼ. Jesús naʼthí ndiéjunʼ gíʼmaa matani (atraxnuu Mateo 5:24). Ndiéjunʼ gíʼmaa matani ikháánʼ ga̱jma̱a̱ ndxájuaʼ bi̱ nitani̱ gawíínʼ mu matanimbaníí xtágabu rí niʼthí Jesús ga̱jma̱a̱ matani dí marigá dí tsímáá rá. Araxnííʼ náa kaʼyoo.

RÍ GÍʼMAA MATANI IKHÁÁNʼ

• Maratha̱a̱n ndxájuaʼ i̱ndó á mu nakumaanʼ rí gíʼdoo mbá numuu makiʼnáa.

• Maratha̱a̱n mu mbaʼyoo rí ikhaa gíʼdoo aʼkhúun numuu rí tséʼngo̱o̱ a̱jkiu̱u̱n.

• Matadxawíín rí gaʼthí maski ajndu xakruaʼaʼ xúgíʼ ma̱ngaa na̱nguá nindaaʼ matanigawíínʼ, ma̱ngaa maratha̱a̱n rí maʼni mba̱a̱ a̱jkiu̱u̱n kaʼyaʼ.

RÍ GÍʼMAA MAʼNI NDXÁJUAʼ

• Maʼthúún eʼwíínʼ a̱ngiu̱lú bi̱ kuwa náa congregación rí ikháánʼ nitani̱, mu ikhiin mumbayíí.

• Maʼtháanʼ xúgíʼ rí nitani̱, ga̱jma̱a̱ rí maratha rí xtaʼdáá aʼkhánʼ.

• Mbaʼyoo rí ni̱ndxa̱ʼ xa̱bu̱ guabaaʼ ga̱jma̱a̱ tsiakii rí ndiyáʼ mu maratha̱a̱n ma̱ngaa rí maʼni mba̱a̱ a̱jkiu̱u̱n kaʼyaʼ.

Maski ajndu mbiʼi xúgi̱ tsexnaxíí tsigijñaʼ mu mbuʼyamajkuíí Dios, ndiéjunʼ rí niʼthí Jesús rí makuwánʼ tsímáá gajmiúlú a̱ngiu̱lú ga̱jma̱a̱ rí mbuʼyamajkuíí Dios xóo gíʼmaa rá.