KÍXNUU 57
Ndiéjunʼ gárígá á mu ikháán nataxuʼdamina aʼkhá rá.
Nguáná má makiéʼkháanʼ maski ajndu ikháán nandaaʼ xtayáá wéñuʼ Jeobá ga̱jma̱a̱ nataniminaʼ xó má eʼngo̱o̱ rí xátani gawíínʼ. Mú rígá tikhu aʼkhá dí itháan mbiiʼ ki xóo i̱ʼwáʼ (1 Corintios 6:9, 10). Á mú ikháán natadxúdaminaʼ aʼkhá rí mbi̱i̱ʼ rígi̱ garmáʼáan a̱jkia̱a̱nʼ rí Jeobá nandoo kaʼyaaʼ má xúʼko̱, ikhaa maxtáa xawii maʼni mba̱a̱ a̱jkiu̱u̱n kaʼyaaʼ ga̱jma̱a̱ mambáyáaʼ.
1. Ndiéjunʼ gáʼyóoʼ matani mu Jeobá maʼni mba̱a̱ a̱jkiu̱nʼ kaʼyaaʼ rá.
Índo̱ mbáa bi̱ naʼni ñajuunʼ Jeobá na̱jkha̱nú nakudaminaʼ mbá aʼkhá mbi̱i̱ʼ ga̱jma̱a̱ naku̱mu̱u̱ rí nánguá muni mba̱a̱ a̱jkiu̱u̱n kuyáá. Mú Jeobá naʼthúu̱n ajngá rígi̱ rí maʼni̱i̱ a̱jkiu̱u̱n dí niʼthún xuajñuu nákha wajyúuʼ: “Maski ajndu aʼkhá ndrígála nindxu̱u̱ maña̱ʼ xngeʼdi, maʼni̱i̱ miʼxá xóo idiʼ” (Isaías 1:18). Ikha jngóo á mú natanga̱a̱ a̱jkiu̱lú, Jeobá maʼni mbáa a̱jkiu̱ún kaʼyulú mbájkhu. Ndiéjunʼ eyoo gáʼthúún rí mata̱nga̱a̱ a̱jkia̱a̱nʼ rá. Rígi̱ nandoo gáʼthúún dí magawi̱i̱n a̱jkia̱a̱nʼ ga̱jma̱a̱ numuu aʼkhá rí nitani̱, rí matatsiʼñáʼ ratani̱ dí raʼkhí ga̱jma̱a̱ matanda̱ʼa̱a̱ Jeobá rí maʼni mba̱a̱ a̱jkiu̱u̱n kaʼyaaʼ. Dí matani tsiakimínáʼ ga̱jma̱a̱ xúgíʼ a̱jkia̱a̱nʼ mu matriʼkhu̱u̱ rí natandxa̱ʼwáá edxa̱a̱ʼ rí xkawiiʼ o rí matatsiñáán ratani dí ni̱jkha̱ kañáán matani aʼkhá ga̱jma̱a̱ dí mataʼgímináʼ maraxtaa xó má nandoo Jeobá (atraxnuu Isaías 55:6, 7).
2. Xú káʼnii ejmiuu bi̱ kuya̱ edxu̱u̱ Jeobá mu mambáyulú á mu nixuʼdámijná mbá aʼkhá rá.
Jeobá naxnúu consejo rígi̱ bi̱ nikudaminaʼ aʼkhá: “Gandxa̱ʼwún bi̱ kuya̱ edxu̱u̱ náa nagimbáanʼ” (atraxnuu Santiago 5:14, 15). Xa̱bekha bugi̱ bi̱ nitri̱gi̱i̱n ga̱jma̱a̱ espíritu santo nandún kuyáá wéñuuʼ Jeobá ga̱jma̱a̱ mugiu̱u̱, ikha jngóo nigumaa rathiin mu mumbañún bi̱ nixudami̱jna̱ aʼkhá mu xúʼko̱ mambajxíin mbu̱júu̱ gajmiún Dios (Gálatas 6:1).
Xú káʼnii embáyuluʼ bi̱ kuya̱ edxu̱u̱ índo̱ nuxuʼdamijná aʼkhá rá. A̱jmi̱i̱n o ajtsíin dí ikhiin nuraxnuu Biblia mu mumbáyulú makru̱ʼu̱lú rí niʼni raʼkhí ni̱ndxu̱u̱. Ma̱ngaa muxnulú mbá májánʼ consejo rí na̱ʼkha̱ ikhí ma̱ngaa tsiakii rí ndayúlú mu xúʼko̱ ni xátangaán muʼni aʼkhá mbu̱júu̱. Á mú bi̱ niʼni aʼkhá tsétanga̱a̱ a̱jkiu̱u̱n ikhú bi̱ kuya̱ edxu̱u̱ muriya̱a̱ʼ náa congregación mu xúʼko̱ ma̱ndoo muñewu̱u̱n bi̱ naguanún náa congregación.
GAJMAÑAAʼ ITHÁAN
Gangajuaaʼ ga̱jma̱a̱ gakruaʼaʼ májánʼ dí Jeobá naʼni mu mambáyulú á mu nuxuʼdamijná mbá aʼkhá.
3. Rí muʼthá aʼkhá dí niʼni nambáyulúʼ maʼni̱i̱ a̱jkiu̱lú
Asndu ndiéjunʼ má aʼkhá rí nuxuʼdámijna naʼni gawúúnʼ Jeobá ikha jngóo gíʼmaa muʼtá dí náa nangawaán. Guraxnuu Salmo 32:1-5 ga̱jma̱a̱ gutamíjnála rígi̱:
Ndíjkha rí gíʼdoo numuu muʼtá aʼkhá rí niʼni náa Jeobá ki xóo murkaʼwulu rá.
Á mu nuʼtháán Jeobá aʼkhá dí ni̱ʼni̱ ga̱jma̱a̱ nuʼthúún bi̱ kuya̱ edxu̱u̱, nambáyulúʼ naʼni̱i̱ a̱jkiu̱lú. Gu̱ya̱a̱ VIDEO ga̱jma̱a̱ gutamíjnála rígi̱:
Mu Canon mata̱nga̱a̱ mbu̱júu̱ náa Jeobá xú káʼnii nimbayíí bi̱ kuya̱ edxu̱u̱ xá.
Gíʼdoo numuu manindxu̱lú xa̱bu̱ guabaaʼ ga̱jma̱a̱ muʼthúún rí gajkhun bi̱ kuya̱ edxu̱u̱ numuu rí ikhiin kúwá mumbayulúʼ. Guraxnuu Santiago 5:16 ga̱jma̱a̱ gutamíjnála rígi̱:
Naku̱ma̱a̱ʼ rí maʼniún gakhii a̱ngiu̱lú bi̱ kuya̱ edxu̱u̱ mumbayulúʼ á mu nuʼthúún dí gajkhun ráʼ. Náá numuu rá.
Arathá aʼkhá rí nitani̱, arathún dí gajkhun bi̱ kuya̱ edxu̱u̱ ga̱jma̱a̱ atani̱ xó má naʼtháanʼ Jeobá.
4. Jeobá nagáwíinʼ a̱jkiu̱u̱n kaʼñún bi̱ nuxudamijná aʼkhá
Á mu mbáa bi̱ nikudaminaʼ aʼkhá naʼni gaʼduunʼ xtángoo ndrígóo Jeobá, ndayóoʼ muriya̱a̱ʼ náa congregación. Ma̱ngaa nuniʼñáánʼ rambájxulu gajmiulúʼ. Guraxnuu 1 Corintios 5:6, 11 ga̱jma̱a̱ gutamíjnála rígi̱:
Xó má eʼni levadura dí naʼni makajxi̱i̱ pan, xú káʼnii gágumaa gachíín a̱ngiu̱lú bi̱ kúwá náa congregación á mu nambájxulu gajmiulúʼ xa̱bu̱ bi̱ naʼni aʼkhá ga̱jma̱a̱ bi̱ tsétanga̱a̱ a̱jkiu̱u̱n rá. Náá numuu rá.
Bi̱ kuya̱ edxu̱u̱ nduyaridáá xóo egáwíin a̱jkiu̱u̱n Jeobá, ikhiin nuxuʼmamijná ga̱jma̱a̱ numbañúún bi̱ nigajniín náa congregación. Mbaʼin nitangiín, numuu rí maski ajndu gakhii nixprigún, mú nimbáñun mbuyáá dí raʼkhí nini. (Salmo 141:5).
Xú kaʼnii esngájma Jeobá dí nagáwíin a̱jkiu̱u̱n, nakro̱ʼo̱o̱ ga̱jma̱a̱ nandoo kaʼñún bi̱ nuxudamijná aʼkhá rá.
5. Jeobá naʼni mba̱a̱ a̱jkiu̱u̱n kaʼyulú á mu natanga̱a̱ a̱jkiu̱lú
Jesús nijmuu mbá xkri̱da mu mambáyulúʼ makru̱ʼu̱lú xóo eku̱mu̱u̱ Jeobá índo̱ mbáa natanga̱a̱ a̱jkiu̱u̱n. Guraxnuu Lucas 15:1-7 ga̱jma̱a̱ gutamíjnála rígi̱:
Ndiéjunʼ eʼsngúlúʼ náa xkri̱da rígi̱ ga̱jma̱a̱ numuu Jeobá rá.
Guraxnuu Ezequiel 33:11 ga̱jma̱a̱ gutamíjnála rígi̱:
Ndiéjunʼ rí gíʼdoo numuu mbaʼyóoʼ muʼgíʼ muʼni mu musngajmá dí gajkhun nitanga̱a̱ a̱jkia̱lúʼ rá.
Jeobá nindxu̱u̱ xóo mbáa báxtúu bi̱ naxmiéjuunʼ.
RÍ NUTHI TIKHUN: “Namíñunʼ dí bi̱ kuya̱ edxu̱u̱ muriñu̱u̱nʼ náa congregación á mu nathún dí nini̱”.
Ndiéjunʼ gáratha̱a̱n ikháán mbáa bi̱ nandxaʼwamina xúʼko̱ rá.
RÍ NAGÁJNURIYO̱O̱ʼ
Jeobá maʼni mba̱a̱ a̱jkiu̱u̱n kaʼyulú á mu natanga̱a̱ gajkhun a̱jkiu̱lú náa aʼkhá dí niʼni ga̱jma̱a̱ á mu nánguá tangán muʼni mbu̱júu̱ʼ.
Rí nijmañaaʼ
Ndíjkha rí májánʼ muʼthán Jeobá aʼkhá dí niʼni rá.
Ndiéjunʼ gáʼyóoʼ muʼni mu Jeobá maʼni mba̱a̱ a̱jkiu̱u̱n kaʼyoo aʼkhá ndrígúlú rá.
Á mu rí nuxuʼdamijná mbá aʼkhá mbi̱i̱ʼ, ndíjkha rí gíʼmaa mundu̱ʼu̱u̱n bi̱ kuya̱ edxu̱u̱ mumbáyulú rá.
ATAYÁÁ ITHÁAN
Atayáá xú káʼnii mbáa xa̱bu̱ nimbáyúu rí xóo nagáwíin a̱jkiu̱u̱n Jeobá, xó má naʼthí náa Isaías 1:18.
Xú káʼnii embañún bi̱ kuya̱ edxu̱u̱ a̱ngiu̱lú bi̱ nixudamíjna̱ aʼkhá mbiiʼ rá.
“Ancianos, gúmbáñún bi̱ nixudamíjna̱ aʼkhá mbii’” (Bi̱ Nayejngoo, agosto tsiguʼ 2024)
Atayáá xú kaʼnii nagáwíin a̱jkiu̱ún kuyáá ga̱jma̱a̱ nandún kuyáá bi̱ tsétanga̱a̱ a̱jkiu̱u̱n índo̱ nakiéʼkhúun.
“Xóo extambáñún bi̱ nirawíin náa congregación” (Bi̱ Nayejngoo, agosto tsiguʼ 2024)
Atayáá náa historia ndrígóo xa̱bu̱ “Ndayóoʼ rí matangáan náa Jeobá” atayáá náa naʼthí, mbáa xa̱bu̱ nikumu̱u̱ rí Jeobá xtáa ra̱ʼkha̱a̱ kayáa náa dí gajkhun bu̱júu̱ʼ.
“Biblia niriʼkhuu xóo makuwá” (Bi̱ Nayejngoo, 1 ñajunʼ gu̱nʼ abril tsiguʼ 2012)