KÍXNUU 58
Añajún má xúʼko̱ jmbu náa Jeobá
Bi̱ ni̱ndxu̱lú cristianos gajkhun tseniñamijná rí nimbá o nimbáa marikulú mbuʼyamajkuíí Jeobá. Ndu̱ya̱a̱xu gajkhun rí xúʼko̱ ku̱ma̱a̱ mangáán ga̱jma̱a̱ Jeobá ndaʼyoo rí gíʼdoo wéñuuʼ numuu dí ikháán nañajún jmbu (atraxnuu 1 Crónicas 28:9). Nguáná gamíi maʼni rí xáriejún jmbu náa Dios rá. Ga̱jma̱a̱ ndiéjunʼ gándoo gámbáyáaʼ rá.
1. Ndiéjunʼ eni eʼwíinʼ mu xuguajúnlu jmbu náa Jeobá rá.
Makuwíin tikhun xa̱bu̱ bi̱ maʼndún rí matatsiʼñáʼ ratani̱ ñajuunʼ Jeobá. Tsíin lá ñajúúnʼ ikhiin xá. Tikhun ma̱ndoo mani̱ndxu̱ún bi̱ niniña̱a̱nʼ rí gajkhun ga̱jma̱a̱ nuthi rí minduwaʼ ga̱jma̱a̱ numuu xuajñuu Dios mu xúʼko̱ muni gámbáa fe ndrígúlú. Xa̱bu̱ bugi̱ nagumbiʼñún apóstatas. Ma̱ngaa bi̱ kuya̱ edxu̱u̱ náa kiʼsngáa rí nduwaʼ, nuthi dí ragájkhun ga̱jma̱a̱ numulú mu xúʼko̱ bi̱ tsiñewumijna̱ muniña̱a̱ʼ rí gajkhun. Ra̱ʼkhá tháán migamíi nindxu̱u̱ rí maratamíjná gajmiáanʼ bi̱ tsíñún gúyá xuajñuu Dios, xóo dí matraxnuu libro ndrígu̱ún o dí nuniraʼmáʼ, rí mata̱ʼa̱a̱ʼ náa internet ndrígu̱ún o rí ma̱ta̱ya̱a̱ video rí nurawíi. Jesús niʼthí ga̱jma̱a̱ numún bi̱ nuniulú rí makawaba̱a̱ʼ fe ndrígúlú náa Jeobá, niʼthí: “Guniʼñúnla. Bi̱ nuxnún ikha bi̱ tsíkruigu̱u̱n ñajúnʼ. Á mu mbáa bi̱ tsíkruigo̱o̱ gáʼga kayáa i̱mba̱a̱ bi̱ tsíkruigo̱o̱, mbá nájmi̱i̱n gájngumíʼíin náa iñáʼ” (Mateo 15:14).
2. Xú káʼnii gusngajmá dí naguajún jmbu náa Jeobá ga̱jma̱a̱ rí xóo nuraʼwíí muʼni rá.
Numuu rí nandulú kuʼyáá Jeobá, tsíyulú mundáwamijná ga̱jma̱a̱ dí na̱ʼkha̱ náa religión rí minduwaʼ. Asndu má náa ñajunʼ ndrígúlú o náa organización rí kúwáanʼ ga̱jma̱a̱ nimbá rí nuʼni ragíʼmaa marigá mbá rí na̱ʼkha̱ náa religión rí nduwaʼ. Jeobá naʼthúu̱n xuajñuu rígi̱: “Agajnáanʼla ikhí xuajñunʼ”, xóo muʼthá Babilonia rí nindxu̱u̱ Xuajen mba̱a̱ (Apocalipsis 18:2, 4).
GAJMAÑAAʼ ITHÁAN
Atayáá ndiéjunʼ ma̱ndoo matani mu nimbáa xárikhaa mariejún jmbu náa Jeobá. Ma̱ngaa atayáá náá numuu rí matani tsínguminaʼ náa Babilonia rí nindxu̱u̱ Xuajen mba̱a̱ natasngájma dí nañajún jmbu.
3. Atiewumínaʼ náa bi̱ nusngáa rí nduwaʼ
Ndiéjunʼ gíʼmaa muʼni índo̱ guʼdxawíín mbá dí raʼkhí ga̱jma̱a̱ numuu xuajñuu Jeobá rá. Guraxnuu Proverbios 14:15 ga̱jma̱a̱ gutamíjnála rígi̱:
Ndíjkha gíʼmaa mundxaʼwáá májánʼ edxu̱lú ga̱jma̱a̱ xuʼnimbu̱lú xúgíʼ rí guʼdxawíín rá.
Guraxnuu 2 Juan 9-11 ga̱jma̱a̱ gutamíjnála rígi̱:
Lá gíʼmaa muʼtámíjná gajmiúlú apóstata ráʼ.
Mbáa gajkhun má dí tseʼtámijná gajmiúlú apóstata; mu maski ajndu xúʼko̱, xú káʼnii gándoo mato̱ʼo̱o̱ ku̱ma̱ ndrígu̱ún náa edxu̱lú xá.
Á mu nuʼgíʼ nuʼdxawíín dí raʼkhí rí nuthi ga̱jma̱a̱ numuu Jeobá o xuajñuu, xú káʼnii gáku̱mu̱u̱ ikhaa xá.
4. Añajún jmbu náa Dios índo̱ mbáa ndxájulú nakudaminaʼ aʼkhá
Á mu nuʼdxawíín rí mbáa náa congregación nikudaminaʼ aʼkhá mbi̱i̱ʼ, ndiéjunʼ gíʼmaa muʼni rá. Atayáá ikha rí nuxkamaa náa xtángoo ndrígóo Dios rí nixnúún israelitas nákha wajyúuʼ. Guraxnuu Levítico 5:1.
Xó má eʼthí náa versículo rígi̱, á mu nuʼdxawíín rí mbáa nikudaminaʼ aʼkhá mbi̱i̱ʼ, mbaʼyóoʼ rí muʼthúún bi̱ kuya̱ edxu̱u̱. Mú ginii gíʼmaa muʼtháán bi̱ nikudaminaʼ aʼkhá dí maʼthúún bi̱ kuya̱ edxu̱u̱ dí niʼni. Á mu dí ikhaa na̱nguá eʼni, ikhú ma̱ndoo muʼthúún ikháanʼ bi̱ kuya̱ edxu̱u̱ numuu rí naguajún jmbu náa Jeobá, náá numuu rí matani rígi̱ natasngájma rí nandaaʼ xtayáá ga̱jma̱a̱ nañajún jmbu náa. . .
. . . Jeobá rá.
. . . náa xa̱bu̱ bi̱ nikudaminaʼ aʼkhá rá.
. . . bi̱ kúwi̱i̱n náa congregación rá.
Atambáyii mbáa ndxájulú bi̱ nikudaminaʼ xkujndu.
5. Guniʼñááʼ kiʼsngáa rí nduwaʼ
Guraxnuu Lucas 4:8 ma̱ngaa Apocalipsis 18:4, 5 ga̱jma̱a̱ gúriʼña̱a̱ graxe̱ rígi̱:
Lá rígá xóó mbiʼyuʼ náa lista ndrígóo mbá religión rí mindu̱wa̱ʼ ráʼ.
Xtáá náa mbá organización rí kaʼyoo mbá religión ráʼ.
Náa ñajunʼ rí nani, lá kaʼyoo ga̱jma̱a̱ religión rí minduwaʼ ráʼ.
Lá rígá tikhu dí ndayóoʼ maniʼñúuʼ rani̱ numuu dí na̱ʼkha̱ náa religión dí mindu̱wa̱ʼ ráʼ.
Á mu náa tikhu graxe̱ rígi̱ nariʼña̱a̱ “xúʼko̱”, ndiéjunʼ gáʼyóoʼ mani mu mariʼkuminaʼ rá.
Asndu káʼnii má, atraʼwíí matani mbá rí maʼniaaʼ maraxtaa májánʼ ga̱jma̱a̱ náa nasngájma dí nariejún jmbu náa Jeobá.
Ndiéjunʼ gátani, á mu mbáa naʼtháanʼ rí matambáyíí ga̱jma̱a̱ mbá chíʼgíiʼ mbújkha̱a̱ mu majmaa náa mbá religión rá.
RÍ NUTHI TIKHUN: “Á mu rí tséyóo dí nuthi apóstata ga̱jma̱a̱ numún testigos de Jeobá, xú káʼnii gándoo gámbáyúu rí gajkhun rá.”
Lá májánʼ marata xúʼko̱ ráʼ. Náá numuu rá.
RÍ NAGÁJNURIYO̱O̱ʼ
Á mu nandulú maguajún jmbu náa Jeobá, ndayóoʼ rí muniʼñáán rambájxulú gajmiúlú bi̱ muninduwáanʼlú.
Rí nijmañaaʼ
Náá numuu ragíʼmaa matadxawíín rí nuthi apóstata rá.
Ndiéjunʼ gíʼmaa muʼni á mu nduʼyáá dí mbáa nikudaminaʼ mbá aʼkhá mbiiʼ rá.
Ndiéjunʼ gíʼmaa muʼni mu munimbulú kiʼtáñajunʼ dí muʼni tsíngumi̱jna̱ náa religión rí minduwaʼ rá.
ATAYÁÁ ITHÁAN
Atayáá rí ma̱ndoo matani índo̱ eʼwíinʼ nuthi rí minduwaʼ ga̱jma̱a̱ numún testigos de Jeobá.
“Lá nduʼyáá xóo phú nindxu̱u̱ ráʼ.” (Bi̱ Nayejngoo, agosto tsiguʼ 2018)
Xú káʼnii gándoo gáta̱ya̱a̱ á mu mbá organización o mbá ñajunʼ rí natani kaʼyoo náa Babilonia rí nindxu̱u̱ Xuajen mba̱a̱ rá.
“Guñajunʼ gakhi̱i̱ náa iwáá mbiʼi rí kuwáánʼlu” (Bi̱ Nayejngoo, octubre tsiguʼ 2019 kutriga̱ 16-18)
Ndiéjunʼ nini tikhun bi̱ tsíñún gúyáá rí gajkhun mu muni rí makáguabaaʼ fe ndrígúlú rá.
Náa historia ndrígóo xa̱bu̱ “Ndiʼyáaʼ Dios asndu nákha chíʼgiúnʼ”, atraxnuu xóo niʼni mbáa ndxajkun dí niniñuuʼ religión dí mindu̱wa̱ʼ.
“Biblia niriʼkhuu xóo makuwá” (Bi̱ Nayejngoo, 1 ñajunʼ gu̱nʼ julio tsiguʼ 2011)