Migiñiinʼ xa̱bu̱ nigi̱ʼdi̱i̱ imbo̱o̱ nuxi̱ʼ numbaaʼ

Noé, bi̱ kuwa náa goʼwóo ga̱jma̱a̱ xujkhúʼ nitu̱ʼu̱u̱n náa arca. Jeobá nirugua̱a̱ xkrugua ga̱jma̱a̱ ikhú nigíʼdu̱u̱ nixnúu ruʼwa. Ra̱ʼkhá tháán nixnúu ruʼwa rí asndu nitu̱xu̱u̱ arca niʼni iyaʼ. Mañu mañu xúgíʼ ku̱ba̱ʼ nigúgoo. Xúgínʼ xa̱bu̱ xkawiinʼ tátu̱ʼu̱u̱n náa arca ga̱jma̱a̱ nikháñun. Mú Noé gajmíi̱n bi̱ kuwa náa goʼwóo nda̱a̱ rí nigíʼniin numuu dí nitu̱ʼu̱u̱n náa arca. Lá natatsaʼwáminaʼ xú káʼnii gagi nikuwa numuu rí ninimbu̱ún kuyáá Jeobá xáʼ.

Nixnúu gakhi̱i̱ ruʼwa mbá 40 mbiʼi ga̱jma̱a̱ 40 mbruʼun, nda̱wa̱á nituxi̱i̱. Índo̱ ni̱jkha̱ ranújngoo mbiʼi, iyaʼ ni̱jkha̱ raga̱jta̱a̱. Nda̱wa̱á arca nigrigu náa inuu mbá kúbá. Mú kaʼnííʼ rígá iyaʼ ikha jngó Noé gajmíi̱n bi̱ kuwa náa goʼwóo na̱nguá nindoo magajnún mbá nguáthá mbiʼi.

Mbiʼi ni̱jkha̱ ranújngoo ga̱jma̱a̱ iyaʼ ni̱jkha̱ rojndooʼ. Noé gajmíi̱n bi̱ kuwa náa goʼwóo nikuwa náa awúu̱n arca itháan rí mbá tsiguʼ. Ikhú Jeobá niʼthún rí ma̱ndoo magajnún. ¡Xúgíʼ nindxu̱u̱ nuxi̱ʼ! Ra̱ʼkhá tháán nidxún numuu dí Jeobá niʼni káwíin, ga̱jma̱a̱ numuu rúʼko̱ nixnáá tsigijñaʼ.

Jeobá niniguuʼ tsigijñaʼ rúʼko̱, ikha jngó nikudaminaʼ dí xátanga̱a̱ maʼni gámbóo dí rígá náa ku̱ba̱ʼ ga̱jma̱a̱ mbá ruʼwa mbiiʼ xóo rúʼko̱. Nixná mbá señal ga̱jma̱a̱ numuu dí nikudaminaʼ, niʼni rí magajnúu xtukuayaʼ mekhuíí timbá aʼphu̱. Lá nitayáá mbá miʼtsú mbáa xtukuayaʼ ikháánʼ ráʼ.

Jeobá ma̱ngaa niʼthúu̱n Noé gajmíi̱n bi̱ kuwa náa goʼwóo dí maguaʼdíin e̱jñún ga̱jma̱a̱ dí muni majtíin náa tsu̱du̱u̱ ku̱ba̱ʼ.