José nindxu̱u̱ a̱ʼdióo Jacob bi̱ itháan chíʼgíʼ. A̱ngui̱i̱n bi̱ itháan wanuu niguánu ndiyáá dí Jacob itháan nangajo̱o̱ kaʼyoo ikhaa. Xú káʼnii nikumu̱ún ku̱ma̱ʼ ikháánʼ xá. Nixígu̱u̱n ga̱jma̱a̱ niguiñunʼ kuyáá. Mbóo mbiʼi, ikhaa nigundaa ga̱jma̱a̱ niʼthún a̱ngui̱i̱n dí nigundaa. Ikhiin nikumu̱ún dí xnuʼndaa rúʼko̱ nandoo gáʼthi dí maʼga̱nú mbóo mbiʼi dí ikhiin musmbati̱gu̱u̱n náa inuu. Ikha jngó niwiñunʼ kuyáá itháan.

Mbóo mbiʼi, a̱ngui̱i̱n José kuwa ruñawu̱u̱n mugu̱ náa mijngii xuajen dí mbiʼyuu Siquem. Ikhú Jacob nikuʼmaa maʼga̱ José mu mbaʼyoo xóo kuwa a̱ngui̱i̱n. Índo̱ ndiyáá na̱ʼkha̱ tsínguánʼ, nigíʼdi̱i̱ nithi: “Aʼkhi̱ e̱ʼkha̱ xa̱bu̱ bi̱ nagundaa. ¡Guxíyáalú!”. Ikha jngó nirujtuwiin ga̱jma̱a̱ nidama̱ʼa̱a̱n náa mbá iñáʼ mi̱jnu̱ʼ. Mú ndxájuu bi̱ mbiʼyuu Judá niʼthí: “Xúxíyáa. Itháan májánʼ mugujua̱a̱, mu mani̱ndxu̱u̱ mbáa ñumbáá”. Ikhaa rúʼko̱ nini. Nigujua̱a̱ ga̱jma̱a̱ mbá 20 mbújkha̱a̱ plata, niʼtsi̱i̱ mbáa xa̱bu̱ bi̱ na̱ʼkha̱ náa xuajen dí mbiʼyuu Madián bi̱ ikhú mbiʼi xtáa ra̱jkha̱ náa Egipto.

Nda̱wa̱á, a̱ngui̱i̱n José nirmajan xtíñuu náa eʼdiuu mbáa tsu̱jtuunʼ, nigún ku̱ñu̱u̱n xtíin náa anu̱ún ga̱jma̱a̱ niraxi̱i̱: “Lá raʼkháa xtíñuu a̱ʼdiáaʼ rígi̱ ráʼ.” Jacob nikumu̱u̱ dí mbáa xujkhú xáná nixíyáa José ga̱jma̱a̱ nixtáa gíná wéñuʼ. Nimbáa táʼngo̱o̱ maʼni̱i̱ a̱jkiu̱u̱n.

Índo̱ niguánu náa Egipto, mbáa bi̱ naʼtáñajúnʼ soldado bi̱ nagumbiʼyuu Potifar niʼtsi̱i̱ José mu mani̱ndxu̱u̱ ñumbáá ndrígóo. Mú Jeobá xtáa ga̱jma̱a̱ José. Potifar ndiʼyoo dí José nindxu̱u̱ mbáa bi̱ nañejunʼ májánʼ ga̱jma̱a̱ dí nindxu̱u̱ mbáa xa̱bu̱ májáánʼ. Nguáthá mbiʼi nda̱wa̱á, ni̱jkha̱nú ndiyá edxu̱u̱ náa xúgíʼ rí gíʼdoo Potifar.

A̱ʼgiu̱u̱ Potifar ndiʼyoo dí tsiʼyáa José ga̱jma̱a̱ gújkuííʼ, ga̱jma̱a̱ mbaʼa nuthu naʼthúu̱n dí mabóoʼ ga̱jma̱a̱. Dí niʼni José rá. Tándoo ga̱jma̱a̱ niʼthúu̱n: “Na̱nguá, raʼkhí nindxu̱u̱ rúʼko̱. Tátá naku̱mu̱u̱ kaʼyoʼ ikhúúnʼ, ikháánʼ ni̱ndxa̱ʼ a̱ʼgiu̱u̱. Á mu na̱bo̱ʼ ga̱jma̱á ni̱ndxa̱ʼ, maxtáá rani̱ aʼkhá náa inuu Dios”.

Mbá miʼtsú, a̱ʼgiu̱u̱ Potifar niʼniuu tsiakii José mu mabóoʼ ga̱jma̱a̱. Nigujtun xtíñuu, mú José nigájnuu ragáyúu. Índo̱ Potifar ni̱ʼkha̱núu náa goʼwóo, a̱ʼgiu̱u̱ niʼninduwaʼ, niʼthúu̱n dí José nigujtuwin ga̱jma̱a̱ tsiakii. Potifar nikiʼnáa wéñuʼ ikha jngó nikudaaʼ guʼwá e̱jua̱nʼ. Mú Jeobá na̱nguá nigumuu kaʼyoo José.

Índo̱ José xtáa náa guʼwá e̱jua̱nʼ, faraón, rey ndrígóo Egipto, nigiʼdoo a̱jma̱ xnuʼndaa dí nimbáa tséʼngo̱o̱ maʼtájuíi. Ikhú mbáa bi̱ nañajunʼ náa goʼwóo Faraón niʼthúu̱n dí José najmaa maʼtájuíi. Ikha jngó faraón niʼthún maguwáʼ ku̱ya̱a̱ mbá nacha̱ José.

Faraón niraxu̱u̱: “Lá majmáán marathu̱nʼ ndiéjunʼ eyoo gáʼthi dí nigúndaa ráʼ.” José niriʼñuu: “Egipto magiʼdoo wéñuʼ ganitsu mbá juwan tsiguʼ, nda̱wa̱á ma̱ʼkha̱ mbá juwan tsiguʼ rí xárígá ganitsu. Atayáaʼ mbáa xa̱bu̱ bi̱ najmañuu wéñuʼ mu maguxi̱i̱ ganitsu mu xúʼko̱ xa̱bu̱ xákhañun ga̱jma̱a̱ ewiʼ”. Faraón niʼthúu̱n: “¡Naʼgínʼ ikháánʼ! Ikháánʼ manindxa̱ʼ bi̱ maʼni a̱jmi̱i̱n xa̱bu̱ bi̱ magiʼdoo itháan numuu náa Egipto”. Mú xú káʼnii ndiʼyoo José ndiéjunʼ eyoo gáʼthúu̱n xnuʼndoo faraón rá. Numuu dí Jeobá nimbáyúu.

José niguxi̱i̱ ganitsu mbá juwan tsiguʼ. Nda̱wa̱á nirígá ewiʼ náa xúgíʼ xuajen, xó má niʼthí ikhaa, ga̱jma̱a̱ xa̱bu̱ naguwáʼ náa xúgíʼ xuajen mu mutsi ganitsu. Jacob niʼdxaun dí rígá ganitsu náa Egipto ikha jngó nikuʼmiin mbá 10 e̱ji̱i̱n mu magún gutsi mangiin.

E̱ji̱i̱n Jacob nigún gúyáá José ga̱jma̱a̱ ikhaa niʼniniúnʼ má nacha̱. Mu a̱ngui̱i̱n na̱nguá niniʼniiʼ ikhaa. Nismbáti̱gu̱u̱n náa inuu José, xó má nigundaa nákha nindxu̱u̱ dxámá. Nindoo mbaʼyoo á mu xóó nawiñunʼ kuyáá, ikha jngó niʼthún: “Ikháanʼ nuyama ga̱jma̱a̱ niguwaʼ gúya̱a̱ á mu dí xuajñuxu gíʼdoo tsiakii”. Ikhiin niriʼña: “¡Ikháanʼ na̱nguá ni̱ndxu̱xu̱ʼ bi̱ nuyama! Naguwaxu náa xuajen Canaán. Nini̱ndxu̱xu̱ʼ mbá 12, mú mbáa nikháñu má, ga̱jma̱a̱ bi̱ itháan chíʼgíʼ niguanúu ga̱jma̱a̱ anu̱xu̱”. José niʼthúu̱n: “Aguwaʼ ku̱ya̱a̱ bi̱ itháan chíʼgíʼ mu xúʼko̱ manimbo̱ʼ ka̱ya̱la”. Ikhú nitangi̱i̱n náa goʼwóo anu̱u̱.

Bi̱ kuwa náa goʼwóo Jacob niguámbu̱u̱n mbu̱júu̱ ganitsu, ga̱jma̱a̱ ikhaa nikunguinʼ mbu̱júu̱ e̱ji̱i̱n náa Egipto. Dí xúgi̱ nigún ku̱ya̱a̱ Benjamín, bi̱ itháan giʼtháá. Mu mbaʼyoo xú kaʼniún a̱ngui̱i̱n, José nirajkuáa copa dí plata náa gúxta̱a̱ ndrígóo Benjamín ga̱jma̱a̱ niʼnigámii dí niʼni kúwáʼ. Índo̱ bi̱ nuñajunʼ náa José nixkamaa copa náa gúxta̱a̱, a̱ngui̱i̱n na̱nguá eyoo gunimbu̱u̱n. Nitakháñii José dí maxnún castigo ikhiin asndu ndiéjunʼ má eyoo mú xáxnúu castigo Benjamín.

Xúʼko̱ ndiʼyoo José dí a̱ngui̱i̱n niriʼkumijná. Nánguá niʼngo̱o̱ itháan, nigíʼdu̱u̱ nimbiyaʼ ga̱jma̱a̱ niʼthí: “Ni̱ndxu̱ʼ José giʼtiala. Lá xóó xtáa anu̱lú ráʼ.” A̱ngui̱i̱n niguanún tsiánguá. José niʼthún: “Xáxmiéjuanla ga̱jma̱a̱ numuu dí niniuʼ. Dios nikuʼmún ma̱ʼkhá gi̱jyooʼ mu mani káwáanʼ. Mú nacha̱ aguwaʼ ku̱ya̱a̱ anu̱ʼ”.

A̱ngui̱i̱n José nigún guʼwún gútháán anu̱ún xúgíʼ dí májánʼ dí nirígá ga̱jma̱a̱ niguwáʼ ku̱ya̱a̱ náa Egipto. Ninújngoo mba̱yu̱ʼ tsiguʼ, José ga̱jma̱a̱ anu̱u̱ nitangi̱ín ndiyamijná.