ARTÍCULO RÍ MUʼNIGAJMAA 7
Ñajunʼ rí guáʼdáá bi̱ kuya̱ edxu̱u̱ náa congregación
“Cristo kayá edxu̱u̱ náa congregación, numuu rí ikhaa niʼnikríya̱a̱ʼ congregación rígi̱” (EFES. 5:23).
AJMÚÚ 137 Jmbiin, guáʼdáá numún, nandulú kuʼñúún
RÍ MUʼNIGAJMAAa
1. Náá numuu rí xa̱bi̱i̱ Jeobá kúwá mbá jnduʼ rá.
NADXULÚ wéñuʼ rí kuwáanʼ náa xuajñuu Jeobá mu náá numuu rí kuwáanʼlu mbá jnduʼ rá. Mbá numuu, nindxu̱u̱ dí xúgiáanʼlú nuʼnimíjna mbuʼyamajkuíí awan rí nuri̱ya̱ʼ bi̱ kuya̱ edxu̱u̱ bi̱ Jeobá nigruigi̱i̱n. Índo̱ ikháanʼ nakru̱ʼu̱lú itháan awan dí nuri̱ya̱ʼ bi̱ kuya̱ edxu̱u̱ nakuwáanʼlu jnduʼ.
2. Xú káʼnii graxe̱ gúriʼña̱a̱ náa artículo rígi̱ rá.
2 Náa artículo rígi̱ mbuyáá ga̱jma̱a̱ numún bi̱ kuya̱ edxu̱u̱ náa congregación. Ma̱ngaa muriʼña̱a̱lu graxe̱ rígi̱: Xú káʼnii ñajunʼ guáʼdáá a̱ngiu̱lú gu̱ʼu̱ rá. Lá gajkhun dí a̱ngiu̱lú xa̱bekha ma̱ndoo mutañajúúnʼ a̱ngiu̱lú gu̱ʼu̱ rá. Lá ikháá má ñajunʼ guáʼdáá a̱ngiu̱lú bi̱ kuya̱ edxu̱u̱ náa congregación xóo mbáa bi̱ kayá edxu̱u̱ náa goʼwóo, náa a̱ʼgiu̱u̱ gajmíi̱n e̱ji̱i̱n ráʼ. Ginii guʼyáá xú káʼnii ñajunʼ guáʼdáá ga̱jma̱a̱ xú káʼnii gándoo gúʼñún a̱ngiu̱lú gu̱ʼu̱.
XÚ KÁʼNII GÍʼMAA MBUʼÑÚN A̱NGIU̱LÚ GU̱ʼU̱ RÁ.
3. Xú káʼnii gáʼndulúʼ kuʼñúún a̱ngiu̱lú gu̱ʼu̱ ga̱jma̱a̱ ñajunʼ dí nuni̱ rá.
3 Nuxniínlú núma̱aʼ a̱ngiu̱lú gu̱ʼu̱ bi̱ nuñajunʼ gakhi̱i̱ mu muñewu̱u̱n bi̱ kúwá náa guʼwún, mu mutaraʼa ajngáa rí májánʼ ga̱jma̱a̱ muruguambáá náa congregación. Maʼndulú kuʼñúún itháan á mu nduʼyáá xú káʼnii Jeobá ga̱jma̱a̱ Jesús nduñún. Ma̱ngaa xú káʼnii apóstol Pablo ndiʼyamajkhún.
4. Xú káʼnii esngájma náa Biblia dí Jeobá ikháá má eʼyamajkhún gu̱ʼu̱ ga̱jma̱a̱ xa̱bekha rá.
4 Náa Biblia naʼthí dí Jeobá ndaʼyamajkhún ikháá má gu̱ʼu̱ ga̱jma̱a̱ xa̱bekha. Mbá xkri̱da, nasngájma dí nákha siglo timbá Jeobá nixnúún xí kaʼwu gu̱ʼu̱, xó má xa̱bekha mu ma̱ndoo muni̱ milagro, ga̱jma̱a̱ dí muthi mixtiʼkhu ajngáa (Hech. 2:1-4, 15-18). Ma̱ngaa gu̱ʼu̱ ga̱jma̱a̱ xa̱bekha nixtaʼwíin ga̱jma̱a̱ xi̱ʼ kaʼwu mu ma̱ndoo mutañajunʼ gajmiún Cristo (Gal. 3:26-29). Xó má gu̱ʼu̱ ga̱jma̱a̱ xa̱bekha ma̱ndoo mundrígú dí makuwá kámuu mbiʼi náa tsu̱du̱u̱ ku̱ba̱ʼ (Apoc. 7:9, 10, 13-15). Ga̱jma̱a̱ xó má xa̱bekha ga̱jma̱a̱ gu̱ʼu̱ nindrigú ñajunʼ rí mutaraʼa ajngáa rí májánʼ (Mat. 28:19, 20). Náa Hechos naʼthí, ñajunʼ dí niʼni mbáa ndxájulú bi̱ nigumbiʼyuu Priscila ga̱jma̱a̱ ajmbio̱o̱ bi̱ mbiʼyuu Áquila, ‹ikhaa nimbáyúu makro̱ʼo̱o̱› dí gajkhun mbáa xa̱bu̱ bi̱ nagumbiʼyuu Apolos (Hech. 18:24-26).
5. Xó má eʼthí náa Lucas 10:38, 39, 42 xú káʼnii ndiʼñún gu̱ʼu̱ Jesús rá.
5 Jesús ndiʼyamajkhún gu̱ʼu̱. Ikhaa na̱nguá niʼni xó má nini̱ fariseos, rí na̱nguá ndiyamajkhún gu̱ʼu̱ ga̱jma̱a̱ rí asndu tséthún náa rí kúwá mbaʼin xa̱bu̱, ma̱ngaa tsésngúún rí naʼthí náa Ajngá rawuunʼ Dios. Mú ikhaa niʼsngúún gu̱ʼu̱ rí naʼthí náa Ajngá rawuunʼ Dios xó má niʼni gajmíi̱n eʼwíinʼ discípulos ndrígóob (atraxnuu Lucas 10:38, 39,c 42).d Ma̱ngaa niniñuuʼ rí gu̱ʼu̱ magún náa ikhaa ni̱jkha̱ gáʼtaraʼa (Luc. 8:1-3). Ga̱jma̱a̱ Jesús nixnúún mbá ñajunʼ kiejunʼ gu̱ʼu̱, rí muthún apóstoles dí ikhaa nigabi̱i̱ náa iñá wajinʼ (Juan 20:16-18).
6. Xú káʼnii ndiʼyamajkhún gu̱ʼu̱ Pablo rá.
6 Apóstol Pablo nixna ku̱ma̱a̱ Timoteo rí mbaʼyamajkún gu̱ʼu̱. Niʼthúu̱n rí gu̱ʼu̱ bi̱ guanii ‹mbaʼñúún xó ru̱dúu̱› ga̱jma̱a̱ bi̱ gua̱ʼxa̱áʼ ‹mbaʼñúún xóo a̱ngui̱i̱n› (1 Tim. 5:1, 2). Pablo niʼni tsiakimínáʼ wéñuʼ mu mambáyúu Timoteo mu xúʼko̱ mani̱ndxu̱u̱ mbáa májáanʼ cristiano mú ikhaa má ndiʼyoo bi̱ nimbáyúu itháan nindxu̱u̱ ru̱dúu̱ ga̱jma̱a̱ xíñuuʼ Timoteo bi̱ nisngáá rí naʼthí náa ‹Ajngá rawuunʼ Dios› (2 Tim. 1:5; 3:14, 15). Índo̱ Pablo niʼnirámáʼ cartas niʼnirámáʼ mbiʼñún a̱ngiu̱lú gu̱ʼu̱ náa i̱yi̱i̱ʼ rí nikuʼma náa Roma. Raʼkháa i̱ndó ndiʼyoo ñajunʼ dí nuni̱ a̱ngiu̱lú gu̱ʼu̱ ma̱ngaa ndiʼyamajkhún numuu rí ikhiin ni̱ndxu̱ún bi̱ nutaraʼa (Rom. 16:1-4, 6, 12; Filip. 4:3).
7. Xú káʼnii graxe̱ gúriʼña̱a̱ rá.
7 Xó má nasngájma náa kutriga̱ rí ninújngoo, dí nda̱a̱ náa Ajngá rawuunʼ Dios náa nasngájma rí a̱ngiu̱lú gu̱ʼu̱ na̱nguá guáʼdáá numún náa a̱ngiu̱lú xa̱bekha, a̱ngiu̱lú gu̱ʼu̱ bi̱ májánʼ a̱jkiu̱ún nuni̱ májánʼ ñajunʼ ndrígu̱ún ga̱jma̱a̱ bi̱ kuya̱ edxu̱u̱ nakumu̱ún kuñún, rí ikhiin nuni̱ dí marigá rí tsímáá ga̱jma̱a̱ rí makuwá mbá kambájxu̱u̱n náa congregación. Mú tikhu graxe̱ ndayóoʼ maxtiʼña̱a̱. Mbá xkri̱da: Náá numuu rí Jeobá ndaʼyoo rí a̱ngiu̱lú gu̱ʼu̱ nguáná ndayóoʼ muruguáá edxu̱ún rá. Numuu rí i̱ndó a̱ngiu̱lú xa̱bekha kuya̱ edxu̱u̱ ga̱jma̱a̱ siervos ministeriales náa congregación, mú, lá rúʼko̱ eyoo gáʼthúu̱n rí ikhiin nutañajúúnʼ a̱ngiu̱lú gu̱ʼu̱ xáʼ.
LÁ XÚGÍINʼ XA̱BEKHA KUYA̱ EDXU̱U̱ NÁA A̱NGIU̱LÚ GU̱ʼU̱ RÁ.
8. Xóo eʼthí náa Efesios 5:23, náá numuu dí raʼkháa xúgíinʼ xa̱bekha kuya̱ edxu̱u̱ náa a̱ngiu̱lú gu̱ʼu̱ rá.
8 Nimbáa ndxájulú na̱nguá kayá edxu̱u̱ náa a̱ngiu̱lú gu̱ʼu̱ i̱ndó Cristo nindxu̱u̱ bi̱ kayá edxu̱u̱ náa xúgíinʼ a̱ngiu̱lú gu̱ʼu̱ bi̱ kúwá náa congregación (atraxnuu Efesios 5:23).e Náa mbá guʼwíin, xa̱biya̱ kayá edxu̱u̱ náa a̱ʼgiu̱u̱. Maski ajndu ada̱ nijngúun má iyááʼ mú ikhaa na̱nguá kayá edxu̱u̱ náa ru̱dúu̱ (Efes. 6:1, 2). A̱ngiu̱lú bi̱ kuya̱ edxu̱u̱ náa congregación awáán guáʼdáá ñajunʼ xóo mbu̱ya̱ edxu̱u̱ náa a̱ngiu̱lú gu̱ʼu̱ ga̱jma̱a̱ náa a̱ngiu̱lú xa̱bekha (1 Tes. 5:12; Heb. 13:17). A̱ngiu̱lú gu̱ʼu̱ bi̱ xóó tsínuju̱nʼ bi̱ nánguá kúwá gajmiún anún nduyamajkhún má xúʼko̱ ikhiin ga̱jma̱a̱ bi̱ kuya̱ edxu̱u̱. Xó má a̱ngiu̱lú xa̱bekha náa congregación, mbawíí Jesús kayá edxu̱u̱ náa ikhiin.
A̱ngiu̱lú bi̱ xóó tsínigu̱nʼ bi̱ nánguá kúwá gajmiún anún mbáwíí Jesús kayá edxu̱u̱ náa ikhiin (Atayáá kutriga̱ 8).
9. Náá numuu rí a̱ngiu̱lú gu̱ʼu̱ nguáná ndayóoʼ muruguáá edxu̱ún rá.
9 Gajkhun má rí Jeobá nigruigi̱i̱n a̱ngiu̱lú xa̱bekha mu mbuya̱ edxu̱u̱ náa congregación, raʼkhíin a̱ngiu̱lú gu̱ʼu̱ (1 Tim. 2:12). Náá numuu rá. Ikháá má numuu rí xóo nigíiʼ Jesús mu mayéʼga edxu̱u̱ náa xa̱biya̱, mu xúʼko̱ marigá mbá májánʼ awan náa Congregación. Mú á mu mbáa ndxájulú a̱ʼgu̱ gáʼyóoʼ maʼni mbá ñajunʼ rí kaʼyoo maʼni mbáa xa̱biya̱, Jeobá naʼthúu̱n dí ndayóoʼ marugoo edxu̱u̱ (1 Cor. 11: 4-7).f Mú raʼkháa mu masngájma dí raguáʼdáá numún, nindxu̱u̱ mu masngájma dí nduyamajkuíí bi̱ kayá edxu̱u̱. Dí xúgi̱ guriʼña̱a̱lu graxe̱: Asndu náá jmariga̱a̱ kaʼyoo maʼtáñajunʼ mbáa xa̱bu̱ nikhi̱i̱ náa goʼwóo ga̱jma̱a̱ bi̱ kuya̱ edxu̱u̱ náa congregación rá.
BI̱ NUTAÑAJUNʼ GUʼWÁÁ GA̱JMA̱A̱ BI̱ KUYA̱ EDXU̱U̱ NÁA NAGIMBÁANʼ
10. Náá numuu rí mbáa bi̱ kayá edxu̱u̱ ma̱ndoo maku̱mu̱u̱ rí kaʼyoo magruiga̱ awan náa congregación rá.
10 Bi̱ kuya̱ edxu̱u̱ nandún kuyáá Cristo ga̱jma̱a̱ mugiu̱u̱ Jeobá bi̱ Jesús nixnangawún mu muñewu̱u̱n (Juan 21:15-17). Mbáa bi̱ kayá edxu̱u̱ ma̱ndoo maʼga̱nú mandxaʼwáminaʼ rí ikhaa nindxu̱u̱ anún náa congregación. Ma̱ndoo “mandxaʼwáminaʼ rí xóo mbáa xa̱bu̱ nikhi̱i̱ bi̱ kayá edxu̱u̱ náa mbá guʼwá ndayóo rí magruiga̱ awan mu mañewu̱u̱n bi̱ kúwá náa goʼwóo, xúʼko̱ má mbáa bi̱ kayá edxu̱u̱ náa congregación ndayóo rí magruiga̱ awan mu mañewu̱u̱n mugiu̱u̱ Dios”. Ma̱ndoo marigá rígi̱ á mu tikhun a̱ngiu̱lú xa̱bekha o a̱ngiu̱lú gu̱ʼu̱ mutún bi̱ kuya̱ edxu̱u̱ rí muraʼwíi rí gúni̱. Mú, bi̱ kuya̱ edxu̱u̱ náa congregación lá ikháá má ñajunʼ dí nuni̱ bi̱ kuya̱ edxu̱u̱ náa mbá guʼwá rá.
Bi̱ kuya̱ edxu̱u̱ náa congregación mbuyáá á mu kúwá májánʼ bi̱ nuñewu̱u̱n ikhiin. Jeobá nixnúún ñajunʼ bi̱ kuya̱ edxu̱u̱ dí munimbáníí xkujndu ga̱jma̱a̱ nixnúún mbá ñajunʼ kiejunʼ, rí murawíin bi̱ tsétanga̱a̱ a̱jkiu̱ún ga̱jma̱a̱ numuu aʼkhá rí nini̱ náa congregación. (Atayáá kutriga̱ 11 ga̱jma̱a̱ 12).
11. Xú káʼnii embánii ñajunʼ rí guáʼdáá bi̱ kuya̱ edxu̱u̱ náa mbá guʼwá ga̱jma̱a̱ náa congregación rá.
11 Apóstol Pablo niʼthí dí rígá tikhu rí nambánii mixtiʼkhu xóo naʼtáñajunʼ mbáa xa̱bu̱ nikhi̱i̱ náa guʼwáá ga̱jma̱a̱ mbáa bi̱ kayá edxu̱u̱ náa congregación (1 Tim. 3:4, 5). Mbá xkri̱da, Jeobá nandoo rí mbá xúgíinʼ bi̱ kúwá náa mbá guʼwá munimbu̱u̱n kuyáá bi̱ kayá edxu̱u̱ ga̱jma̱a̱ nandoo rí bi̱ kúwá náa congregación munimbu̱u̱n kuñún bi̱ kuya̱ edxu̱u̱ (Col. 3:20). Jeobá nagi̱ʼthu̱u̱n rí bi̱ kuya̱ edxu̱u̱ náa mbá guʼwá ga̱jma̱a̱ bi̱ kuya̱ edxu̱u̱ náa congregación mbuyáá á mu kúwá májánʼ bi̱ nuñewu̱u̱n. Mambáa dí ikhiin naxmiéjúúnʼ kuñún bi̱ nuñewu̱u̱n. Xó má eʼni mbáa xa̱bu̱ nikhi̱i̱ gajmíi̱n bi̱ kúwá náa goʼwóo, xúʼko̱ má kayuuʼ eni̱ bi̱ kuya̱ edxu̱u̱ rí nuñewu̱u̱n a̱ngiu̱lú índo̱ kúwá mbiʼi mingíjyúuʼ (Sant. 2:15-17). Ma̱ngaa Jeobá nagi̱ʼthu̱u̱n rí bi̱ kuya̱ edxu̱u̱ congregación ga̱jma̱a̱ xa̱bu̱ guanii bi̱ kuya̱ edxu̱u̱ náa mbá guʼwá rí mugíʼ mbá májánʼ awan ‹mu xúthi itháan rí na̱ʼkha̱ náa Biblia› (1 Cor. 4:6).
Jeobá nixnúún ñajunʼ muni̱ bi̱ kuya̱ edxu̱u̱ náa mbá guʼwá nindrígu ñajunʼ rí muri̱ya̱ʼ awan mu mugíʼ munimbáníí bi̱ kúwá náa guʼwún. Mbáa xa̱bu̱ nikhi̱i̱ bi̱ májánʼ a̱jkiu̱u̱n bi̱ kayá edxu̱u̱ náa mbá guʼwá ginii narajxu̱u̱ a̱ʼgiu̱u̱ nákhá xóó tsíriyaʼ mbá awan. (Atayáá kutriga̱ 13).
12, 13. Xó má eʼthí Romanos 7:2, xú káʼnii mixtiʼkhu ñajunʼ eni̱ bi̱ kuya̱ edxu̱u̱ náa mbá guʼwá ga̱jma̱a̱ bi̱ kuya̱ edxu̱u̱ náa congregación rá.
12 Bi̱ kuya̱ edxu̱u̱ náa mbá congregación mixtiʼkhu ñajunʼ guáʼdáá ki xóo bi̱ kuya̱ edxu̱u̱ náa mbá guʼwá. Jeobá nixnúún ñajunʼ bi̱ kuya̱ edxu̱u̱ dí munimbáníí xkujndu ga̱jma̱a̱ nixnúún mbá ñajunʼ kiejunʼ, rí murawíin bi̱ tsétanga̱a̱ a̱jkiu̱ún ga̱jma̱a̱ numuu aʼkhá rí nini̱ náa congregación (1 Cor. 5:11-13).
13 I̱mba̱ rí niʼni Jeobá, rí nixnúún ñajunʼ muni̱ bi̱ kuya̱ edxu̱u̱ náa mbá guʼwá, raʼkháa xóo ñajunʼ rí nuni̱ bi̱ kuya̱ edxu̱u̱ náa congregación. Mbá dí ikhaa nindxu̱u̱ rí xa̱bu̱ guanii muri̱ya̱ʼ awan rí mugíʼ munimbáníí bi̱ kúwá náa guʼwún (atraxnuu Romanos 7:2).g Mbá xkri̱da mbáa bi̱ kayá edxu̱u̱ náa mbá guʼwá kaʼyoo dí maraʼwíí náa hora gáʼyooʼ maguáʼnuunʼ e̱ji̱i̱n náa goʼwóoʼ dí mbruʼun. Ga̱jma̱a̱ kaʼyoo rí maxprígún e̱ji̱i̱n á mu tsénimbu̱ún awan dí niríyaʼ (Efes. 6:1). Mbáa xa̱bu̱ nikhi̱i̱ bi̱ májánʼ a̱jkiu̱u̱n bi̱ kayá edxu̱u̱ náa mbá guʼwá ginii narajxu̱u̱ a̱ʼgiu̱u̱ nákhá xóo tsíriya̱ʼ mbá awan, nda̱wa̱á nugíʼ nuni̱ numuu rí ni̱ndxu̱ún ‹mbóó xuwiʼ› (Mat. 19:6).h
ATAYAMAJKUÍÍ CRISTO XÓO BI̱ KAYÁ EDXU̱U̱ NÁA CONGREGACIÓN
Jeobá kayá edxu̱u̱ náa Jesús, ikha jngóo nigíiʼ mu mayéʼga edxu̱u̱ náa congregación. (Atayáá kutriga̱ 14).
14. a) Xó má naʼthí náa Marcos 10:45, náá numuu dí Jeobá nigíiʼ Jesús xóo bi̱ mayéʼga edxu̱u̱ náa congregación rá. b) Xú káʼnii ñajunʼ eni̱ bi̱ Cuerpo Gobernate rá. (Atayáá kúgu̱maʼá “Ñajunʼ rí nuni̱ bi̱ Cuerpo Gobernante”.)
14 Ga̱jma̱a̱ rí niʼnikáwáanʼ Jeobá niʼtsi̱i̱ mámbáa bi̱ xtáa náa congregación ma̱ngaa xúgíinʼ xa̱bu̱ bi̱ gúguaʼdáá fe náa Jesús (atraxnuu Marcos 10:45;i Hechos 20:28; 1 Cor. 15:21, 22). Ikha jngóo nigíiʼ Jesús bi̱ niʼnikáwáanlu mu mayéʼga edxu̱u̱ náa congregación. Jesús naʼtáñajúnʼ ga̱jma̱a̱ naríyaʼ awan mu mambanúu náa xúgíinʼ bi̱ kúwá náa guʼwáá ga̱jma̱a̱ bi̱ kúwá náa congregación (Gál. 6:2). Mú raʼkháa i̱ndó rígi̱ rí niʼni Jesús, rígá dí xóó naʼni itháan, naxnúlú rí ndayúlú mámbáa dí ikháanʼ (Efes. 5:29).
15, 16. Ndiéjunʼ ejmañaaʼ dí naʼthí ndxájulú Marley ga̱jma̱a̱ Benjamín rá.
15 A̱ngiu̱lú gu̱ʼu̱ nusngajma rí nduyamajkuíí Cristo índo̱ nunimbu̱ún awan dí nuri̱ya̱ʼ bi̱ kuya̱ edxu̱u̱. Mbáa ndxájulú a̱ʼgu̱ bi̱ mbiʼyuu Marley bi̱ xtáa náa Estados Unidos, ikhaa naʼthí: “Ndayamajkhuu rí ni̱ndxu̱ʼ xóo mbáa a̱ʼgu̱ bi̱ gíʼdaa ajmbio̱o̱ ga̱jma̱a̱ náa congregación. Ndayóoʼ rí ma̱ni̱ tsiakimínáʼ má xúʼko̱ mu mbayamajkuu ñajunʼ rí nixnúu Jeobá a̱jmbio̱ʼ ga̱jma̱a̱ eʼwíinʼ bi̱ kuya̱ edxu̱u̱ náa congregación. Mú a̱jmbio̱ʼ ga̱jma̱a̱ a̱ngiu̱lú bi̱ kúwá náa congregación nduyamajkhuʼ ma̱ngaa nuthi rí nduyamajkuíí ñajunʼ rí na̱ni̱”.
16 A̱ngiu̱lú nusngajma rí nduyamajkuíí awan rí naríyaʼ mbáa ndxájulú bi̱ kayá edxu̱u̱ ga̱jma̱a̱ xúʼko̱ nusngajma rí nduyamajkhún eʼwíinʼ a̱ngiu̱lú gu̱ʼu̱. Mbáa ndxájulú bi̱ mbiʼyuu Benjamín xtáa náa Inglaterra naʼthí: “Nijmañuʼ wéñuʼ náa comentario ndrígún a̱ngiu̱lú gu̱ʼu̱ índo̱ nuxna náa reunión ga̱jma̱a̱ consejo ndrígu̱ún xóo nuthi rí matanigajmaa̱ dí xóo marataráʼa mu marasngáa itháan májánʼ. Nda̱yo̱o̱ rí ñajunʼ dí nuni̱ gíʼdoo wéñuʼ numuu”.
17. Náá numuu rí gíʼmaa mbuʼyamajkuíí ikha rí nagruiga̱ Jeobá náa congregación rá.
17 Índo̱ xúgíinʼ bi̱ kúwá náa congregación nduyamajkuíí awan rí nagíʼ mbáa bi̱ kayá edxu̱u̱ náa congregación, ikhú ikhiin nakru̱ʼu̱u̱n ga̱jma̱a̱ xúʼko̱ nakúwá gagi ga̱jma̱a̱ tsímáá náa congregación, mú rí itháan gíʼdoo numuu rí nuni̱ mba̱a̱ Anu̱lú Jeobá bi̱ xtáa mekhuíí (Sal. 150:6).
AJMÚÚ 123 Guguajún jmbu ga̱jma̱a̱ guʼnimbulú’
a Xú káʼnii ñajunʼ guáʼdáá a̱ngiu̱lú gu̱ʼu̱ náa congregación rá. Xúgíinʼ a̱ngiu̱lú xa̱bekha ma̱ndoo mutañajúnʼ a̱ngiu̱lú gu̱ʼu̱ ráʼ. Bi̱ kuya̱ edxu̱u̱ náa congregación ga̱jma̱a̱ bi̱ kuya̱ edxu̱u̱ náa mbá guʼwá ikhaa ñajunʼ guáʼdáá xáʼ. Náa artículo rígi̱ mbuʼyáá xú káʼnii eriʼña̱a̱ Biblia graxe̱ rígi̱.
b Atayáá Bi̱ Nayejngoo dí nigájnuu gu̱nʼ septiembre tsiguʼ 2020 náa kutriga̱ 6 rí kayá edxu̱u̱ “Gumbáñuun a̱ngiu̱lú gu̱ʼu̱”.
c Lucas 10:38, 39: “Índo̱ kúwá ragún náa kamba̱a̱, ikhaa nito̱ʼo̱o̱ náa xuajin chíʼgíiʼ. Ikhí mbáa a̱ʼgu̱ bi̱ nagumbiʼyuu Marta, nigriguíi Jesús náa goʼwóo. Ikhaa gíʼdaa giʼtio̱o̱ bi̱ mbiʼyuu María, bi̱ nigi̱ʼi̱ náa inuu rajkúu Señor ga̱jma̱a̱ niʼdxuun rí niʼthí.”
d Lucas 10:42: “Tséyóoʼ má mbaʼa, o káaʼ mbóó rí ndayóoʼ. María niraʼwíí rí itháan májánʼ ga̱jma̱a̱ nimbáa xáriya kaʼyu̱úʼ”.
e Efesios 5:23: “Numuu rí xa̱biya̱ kayá edxu̱u̱ náa a̱ʼgiu̱u̱ xó má Cristo kayá edxu̱u̱ náa congregación, numuu rí ikhaa niʼnikríya̱a̱ʼ congregación rígi̱.”
f Atayáá kúgumaʼá “Nguáná gíʼmaa marugoo edxu̱u̱ mbáa ndxájulú a̱ʼgu̱ rá.”
g Romanos 7:2: “Mbá xkri̱da, mbáa aguʼ bi̱ ninújúúnʼ ikhaa kaʼyoo maʼnimbo̱o̱ xtángoo dí nagíʼ ajmbio̱o̱; mú á mu ajmbio̱o̱ nikháñuu, ikhú nándáa xtángoo náa ikhaa.”
h Mu mbuyáá náa congregación gágún bi̱ mbá guʼwi̱i̱n atayáá Bi̱ Nayejngoo dí nigájnuu gu̱nʼ agosto tsiguʼ 2020 náa kutriga̱ 17 asndu 19 náa kayá edxu̱u̱ “Xúgiáánʼ kuáʼdáá numulúʼ náa xuajñuu Jeobá”.
i Marcos 10:45: “Numuu rí asndu A̱ʼdióo xa̱biya̱ táʼkha̱ mu maguma mbaʼwi̱i̱, ikhaa ni̱ʼkha̱ gáʼni mbaʼwu̱u̱n xa̱bu̱ ga̱jma̱a̱ mu maxná vida ndrígóo mu matsiwíin mbaʼin xa̱bu̱”.
j Mú ma̱ndoo ma̱ta̱ya̱a̱ itháan ga̱jma̱a̱ numuu graxe̱ rígi̱, atayáá náa libro “Guni rí Dios ma̱ndoo kaʼyala”, ináa 209 asndu 212.
k Mu ma̱ta̱ya̱a̱ itháan ñajunʼ rí nuni̱ bi̱ Cuerpo Gobernante, atayáá La Atalaya dí nigájnuu 15 ñajunʼ gu̱nʼ Julio tsiguʼ 2013 ináa 20 asndu 25.