Lá nitayáá dí gajkhun nindxu̱u̱ ráʼ.

Lá Dios niʼni numbaaʼ ga̱jma̱a̱ dí makuwáánʼ o nirígá ikháá che̱ʼ. Rí nithi tikhuun xa̱bu̱ bi̱ najmañún bi̱ na̱ʼkha̱ mbiʼñún náa nagi̱ʼdu̱u̱ artículo rígi̱ ga̱jma̱a̱ dí na̱ʼkha̱ raʼthí náa Biblia nindxu̱u̱ mixtiʼkhu kayuuʼ xóo extiʼña̱a̱ graxe̱ rígi̱. Mbaʼin xa̱bu̱ nuthi rí gajkhun nindxu̱u̱ dí nuthi científico, mú eʼwíinʼ nuthi rí gajkhun nindxu̱u̱ dí na̱ʼkha̱ raʼthí náa Biblia. Ikha jngóo mbaʼin xa̱bu̱ nagiʼdu̱u̱n ga̱jma̱a̱ numuu rígi̱ náa libros dí naxtango̱jo̱o̱ wéñuuʼ ga̱jma̱a̱ náa televisión. Eʼwíinʼ xa̱bu̱ tséyáá ndiéjunʼ gundxaʼwamíjna̱.

Mbáa maestriaaʼ nisngáaʼ dí numbaaʼ ga̱jma̱a̱ rí makuwáánʼ nirígá ikháá, dí ndawa̱a̱ tsáa Niʼni. O mbáa nitha̱a̱nʼ bi̱ nusngáa náa mbá religión dí xtáa mbáa bi̱ Niʼniwíi. Mú, lá nisngajmaaʼ ma̱ta̱ya̱a̱ dí gajkhun nindxu̱u̱ rígi̱ xáʼ. O ikhiin i̱ndó nitha̱a̱nʼ matatsimbaaʼ numuu dí rúʼko̱ xándoo matanigaʼduunʼ che̱ʼ.

Mbáa ikháán nitrajximínáʼ ga̱jma̱a̱ numuu rígi̱ o nitatsaʼwáminaʼ rí maʼni mingíjyúuʼ ma̱ta̱ya̱a̱ rí xtáa bi̱ Niʼniwíi. O nitrajximínáʼ á mu gíʼdoo numuu ma̱ta̱ya̱a̱ xóo extiʼña̱a̱ graxe̱ rígi̱.

Náa i̱yi̱i̱ʼ rígi̱ ma̱ta̱ya̱a̱ ndiéjunʼ nimbáñúún tikhun xa̱bu̱ mu mbuyáá dí xtáa mbáa bi̱ Niʼniwíi. Nda̱wa̱á majmañaaʼ ndíjkha rí gíʼdoo wéñuuʼ numuu ma̱ta̱ya̱a̱ xú kaʼnii nigi̱ʼdu̱u̱ nikuwáánʼ.