Lá natagíminaʼ majmañaaʼ xúgíʼ rí naʼsngáa Jeobá ráʼ.

1. Ndiéjunʼ rí ejuiʼsngúún xa̱bu̱ rá.

¹ Bi̱ “Naʼsngáa itháan májánʼ”, Jeobá, gíʼdoo numuu rí xa̱bi̱i̱ majuiʼsngúún itháan májánʼ (Is. 30:20). Rí mbiʼi xúgi̱, naʼni rí miʼsngúún mbaʼin wéñuʼ xa̱bu̱ xóo rí nimbá miʼtsú tárígá. Xó má niʼtáriyaʼ Isaías, ra̱ʼkhá tháán mbaʼin xa̱bu̱ bi̱ kuwa náa xúgíʼ tsu̱du̱u̱ ku̱ba̱ʼ nuxuʼmamijná náa xuajñu Jeobá (Is. 2:2). Náa numuu rá. Mu mixnún ikha náa guaʼyaa kambo̱o̱ Dios, xúʼko̱, mu Jeobá maʼsngúún (Is. 2:3).

2. Xú káʼnii embáyaʼ ikháánʼ rí naʼsngáa Jeobá rá.

² Najuiʼsngúlúʼ kuduun kayuʼ. ¡Ra̱ʼkhá tháán embáyuluʼ rí naʼsngúlúʼ Jeobá! Rígi̱ naʼni mbuʼyáá rí Dios gíʼdoo mbiʼyuu ga̱jma̱a̱ rí naxmiéjunʼ kaʼyulúʼ (Sal. 83:18; 1 Ped. 5:6, 7). Ma̱ngaa nambáyulúʼ maxtiʼña̱a̱ graxe̱ rí nuʼni rí gíʼdoo wéñuʼ numuu xó má: Náa numuu rí nakuwáanʼ tsingíná ga̱jma̱a̱ rí nakháñulú rá. Xú káʼnii gándoo gakuwáanʼ gagi rá. Náa numuu rí kuwáanʼlu rá. Mú raʼkháa i̱ndó rúʼko̱, Jeobá naʼsngúlúʼ ikha rí naʼni makuwáanʼ itháan májánʼ (Jos. 1:8).

3. Náa numuu rí najuiʼsngúún muraxnuu ga̱jma̱a̱ muniraʼmáʼ xa̱bu̱ ma̱ngaa xú káʼnii gambáyuluʼ á mu nuʼgíʼ nuʼni rá.

³ Jeobá ma̱ngaa naʼsngúún xa̱bu̱ bi̱ tsíjmañún gúraxnuu ga̱jma̱a̱ bi̱ tsíjmañún gúniraʼmáʼ. Rí najuiʼsngúún muraxnuu ga̱jma̱a̱ muniraʼmáʼ dí narígá náa congregación nambáñun mbaʼin wéñuʼ publicadores ga̱jma̱a̱ eʼwíínʼ xa̱bu̱ bi̱ nandún majmañún numuu Biblia. Á mu ndayóoʼ, xúgínʼ bi̱ kuya̱ edxu̱u̱ náa mbá congregación ma̱ndoo muriyaʼ awan mu majuiʼsngáa náa congregación. Rígi̱ nambáñun “bi̱ nagún ikhí mu majmañún muraxnuu ga̱jma̱a̱ muniraʼmáʼ mu xúʼko̱ ma̱ndoo munigajmaa Biblia ga̱jma̱a̱ musngúún eʼwíínʼ dí gajkhun” (km 10/11 ináa 4; be ináa 21-23). Á mu nuʼgími̱jna̱ majmañulúʼ májánʼ mambáyulúʼ makuwáanʼ gagi rí mbiʼi xúgi̱ ga̱jma̱a̱ nda̱wa̱á náa numbaaʼ nuxi̱ʼ (Sal. 119:105; Juan 17:3).