“Gumbáyumijnálá” má xúʼko̱

1. Xó má eʼthí 1 Tesalonicenses 5:11, xkáʼnii ñajunʼ dí nuʼnilú xúgiáánʼ rá.

LÁ NITIAMBÁÁ náa niguma o náa niguma májáanʼ Salón ráʼ. Á mu xúʼko̱, mbáa narmáʼáan a̱jkia̱a̱nʼ timbá aʼphu̱ dí nidxu̱ʼ reunión. Asndu niraxnáa núma̱aʼ Jeobá ga̱jma̱a̱ numuu rúʼko̱. Mbáa numuu dí ra̱ʼkhá tháán nidxaaʼ rí asndu nitambi̱ya̱ʼ índo̱ nitani̱ timbá ajmúú. Gajkhun má, xúgíʼ Salón dí rígá najkha̱a̱ gamajkhu eʼni náa Jeobá. Mú rígá imbo̱o̱ʼ dí naguma dí naʼni marigá dí májánʼ ma̱ngaa naʼni dí maʼga itháán gamajkhu náa Jeobá ki xóo eʼni mbá guʼwá, nindxu̱u̱ dí xa̱bu̱ bi̱ nagún ikhí numbayúmíjná. Apóstol Pablo niʼthí ga̱jma̱a̱ numuu dí mumbaʼyúmíjná mu mambaxúlúʼ má xúʼko̱ gajmiúlú Dios índo̱ niʼnirámáʼ texto dí kayá edxu̱u̱ artículo rígi̱, 1 Tesalonicenses 5: 11 (atraxnuu).

2. Ndiéjunʼ gúʼyáá náa artículo rígi̱ rá.

² Mu majmañulú mumbaʼñún a̱ngiu̱lú ma̱ndoo mbuʼyaridáá xkri̱doo apóstol Pablo. Ikhaa niʼniminaʼ maxtáa xó má kúwi̱i̱n eʼwíinʼ. Náa artículo rígi̱ mbuʼyáá xú kaʼnii nimbáñúún a̱ngui̱i̱n muraʼníí xkujndu, mu makuwíin tsímáá gajmiún eʼwíinʼ ga̱jma̱a̱ maguaʼdáá mbá fe gújkhúʼ náa Jeobá. Guʼyáá xóo gándoo gúʼyaridáá xkridoo (1 Cor. 11:1).

PABLO NIMBÁÑÚN A̱NGUI̱I̱N MURAʼNÍÍ XKUJNDU

3. Ndiéjunʼ dí itháán gíʼdoo numuu ndiʼyoo Pablo rá.

³ Pablo nindoo kaʼñún a̱ngui̱i̱n. Numuu dí ikhaa niraʼnuu mbaʼa ga̱ʼkhu̱ dí mingíjyúuʼ, nikro̱ʼo̱o̱ kaʼñúún ga̱jma̱a̱ nigáwíinʼ a̱jkiu̱u̱n eni̱ bi̱ niraʼníí mbaʼa tsáʼkhá. Mbá miʼtsú nándáa mbújkha̱a̱ eʼni ikha jngóo nigíʼdu̱u̱ niñajunʼ mu ma̱tsi̱ dí ndayóoʼ ikhaa ga̱jma̱a̱ dí ndañúunʼ a̱ngui̱i̱n (Hech. 20:34). Ñajunʼ dí niʼni nindxu̱u̱ dí maʼni guʼwá xtíin. Índo̱ ni̱jkha̱nú náa Corinto niñajunʼ ga̱jma̱a̱ Áquila ma̱ngaa Priscila, bi̱ niguáʼdáá ikha̱á má ñajunʼ. Mú, “xúgíʼ sábado” naʼtáruʼun judíos ga̱jma̱a̱ griegos. Índo̱ ni̱ʼkha̱nú Silas ga̱jma̱a̱ Timoteo, “Pablo niʼtáraʼa kájxi̱ ajngá rawuunʼ Dios” (Hech. 18:2-5). Dí itháán nigiʼdoo numuu ndiʼyoo apóstol Pablo nindxu̱u̱ dí maʼni ñajuunʼ Jeobá. Ikhaa ninindxu̱u̱ mbáa xa̱bu̱ bi̱ niñajunʼ ikha jngóo nindoo nixnúún tsiakii a̱ngiu̱lú, ga̱jma̱a̱ niʼthúún dí xáʼyóoʼ muniña̱a̱ʼ gáʼni dí maʼndúún mbuyaridúún eʼwíinʼ ga̱jma̱a̱ dí i̱ndó muxnún dí ndañún bi̱ kúwi̱i̱n náa guʼwún muniña̱a̱ʼ runi̱ dí gíʼdoo itháán numuu, xúgíʼ dí kaʼyoo maguma mba̱a̱ Dios (Filip. 1:10).

4. Xkáʼnii nimbáñúún a̱ngiu̱lú Pablo ga̱jma̱a̱ Timoteo mu maʼngu̱u̱n dí nuni̱ gíníi xá.

⁴ Índo̱ xíjkhóó nigi̱ʼi̱ congregación náa Tesalónica, nigíʼdi̱i̱ nini̱ gíníi a̱ngiu̱lú nuxi̱i̱nʼ bigi̱. Índo̱ bi̱ mbaʼin xa̱bu̱ bi̱ ra̱míjíinʼ na̱nguá nixkamaa Pablo ga̱jma̱a̱ Silas, nixmajtiin tikhunʼ a̱ngiu̱lú, nigún kudiin asndu “náa inún xa̱bu̱ ñajunʼ bi̱ kúwá náa xuajen”. Nindxa̱ʼwa̱: “Xa̱bu̱ bugi̱ nanújngurámúnʼ náa inuu César” (Hech. 17:6, 7). Lá naʼngulú nundxaʼwamíjná xóo nikumu̱ún a̱ngiu̱lú buʼko̱ índo̱ xa̱bu̱ xuajen nánguá nindúún gúñún xáʼ. Rúʼko̱ gamíi maʼniún dí ní xúni̱ ga̱jma̱a̱ gagi ñajuunʼ Jeobá. Mú Pablo tándoo dí magíʼnuu xúʼko̱, maski ajndu ikhaa ga̱jma̱a̱ Silas ndiyóoʼ magún, mú nithúún a̱ngiu̱lú bi̱ kúwi̱i̱n náa congregación dí nuxi̱ʼ rúʼko̱ dí makuwíin bi̱ mumbañún. Nda̱wa̱á apóstol Pablo niʼni marmáʼáan a̱jkiu̱ún bi̱ tesalonicenses: “Nixuʼmáaxu̱ Timoteo ndxájuxu̱ […] mu maxnála tsiakii ga̱jma̱a̱ maʼni̱i̱ a̱jkia̱la mu mambáyúu fe ndrígála, mu xúʼko̱ nimbáa xákaguabaaʼ ga̱jma̱a̱ numuu ga̱ʼkhu̱ rígi̱” (1 Tes. 3:2, 3). Índo̱ Timoteo nixtáa náa Listra niguma gínáa nini̱ xa̱bu̱. Ndiʼyoo xú káʼnii Pablo nixnúún tsiakii a̱ngiu̱lú bi̱ kúwi̱i̱n náa xuajen rúʼko̱ ga̱jma̱a̱ xú káʼnii Jeobá nimbáñúún ikha jngóo niʼthúún a̱ngiu̱lú bi̱ ndiʼkhún egiʼdi̱i̱ enigajmaa̱ dí xúgíʼ má magajnúu májánʼ (Hech. 14:8, 19-22; Heb. 12:2).

5. Xú káʼnii nimbáyúu Bryant ajngáa dí niʼthúu̱n mbáa bi̱ kayá edxu̱u̱ rá.

⁵ Ndiéjunʼ niʼni itháan Pablo mu maxnúún tsiakii a̱ngui̱i̱n xá. Índo̱ ikhaa ga̱jma̱a̱ Bernabé nitangiín náa Listra, Iconio ga̱jma̱a̱ Antioquía, “nindrigi̱i̱n bi̱ mbuya̱ edxu̱u̱ mámbá náa kúwá bi̱ nagimbíi̱n” (Hech. 14:21-23). Nikujmaa kaʼwu dí a̱ngiu̱lú bi̱ ndiya edxu̱u̱ nixnúún tsiakii a̱ngiu̱lú bi̱ kúwá náa congregación xó má eni̱ a̱ngiu̱lú bi̱ kuya̱ edxu̱u̱ dí mbiʼi xúgi̱. Guʼyáá ndiéjunʼ eʼthí ndxájulú Bryant: “Índo̱ ndiya̱a̱ 15 tsiguʼ, anu̱ʼ nigájnuu ni̱jkha̱ náa goʼwóʼ, ru̱dúʼ ni̱jkha̱ expulsada, niku̱mu̱ʼ dí niguanáti̱go̱ʼ ga̱jma̱a̱ nánguá ndi̱yo̱o̱ dí ma̱ni̱”. Ndiéjunʼ nimbáyúu xá. Ikhaa naʼthí: “Mbáa ndxájulú bi̱ mbiʼyuu Tony naʼtámíjná ga̱jma̱á nindxu̱ʼ náa reunión ga̱jma̱a̱ i̱ʼwáʼ mbiʼi. Niʼthúnʼ ndiéjunʼ nini̱ tikhuun a̱ngiu̱lú mu makuwá má xúʼko̱ gagi maski ajndu niraʼníí mbaʼa tsáʼkhá. Niguxnuu Salmo 27:10 ga̱jma̱a̱ mbaʼa aʼphu̱ naʼthúnʼ numuu Ezequías, bi̱ niʼni kájxi̱ ñajuunʼ Jeobá maski ajndu anu̱u̱ tániñuuʼ mbá májánʼ xkri̱da”. Xú káʼnii nimbáyúu Bryant rígi̱ rá. Ikhaa naʼthí: “Núma̱aʼ má ga̱jma̱a̱ tsiakii dí nixnúʼ Tony, nigíʼdu̱u̱ nini̱ kájxi̱ ñajuunʼ Jeobá ga̱jma̱a̱ rúʼko̱ niʼni maxtáá gagi wéñuʼ”. Bi̱ kuda edxu̱u̱, gakuwáanʼla xawii eni̱ a̱ngiu̱lú bi̱ xó má Bryant, ndayóoʼ majuiʼthúún “ajngáa májánʼ” mu makána̱án tsiakii (Prov. 12:25).

6. Xóo nijmuu Pablo historia ndrígu̱ún xa̱bi̱i̱ Dios mu maxnúún tsiakii eʼwíinʼ rá.

⁶ Pablo niʼni marmáʼáan a̱jkiu̱ún a̱ngui̱i̱n dí nikúwi̱i̱n “mbaʼin wéñuuʼ xa̱bu̱” bi̱ niʼngu̱u̱n niraʼníí mbaʼa enii ga̱ʼkhu̱ mingíjyúuʼ numuu dí Jeobá nixnúún tsiakii (Heb. 12:1). Ikhaa ndiʼyoo dí historia ndrígu̱ún xa̱bi̱i̱ Dios bi̱ niguájun jmbu nákha wajyúuʼ mambáñún mu xámiñún ga̱jma̱a̱ dí makuwá má xúʼko̱ náa “xuajen ndrígóo Dios bi̱ ndaʼya” (Heb. 12:22). Ma̱ngaa ma̱ndoo mambáyúlú ikháánʼ. Nuʼda̱a̱lú tsiakii índo̱ nuraxnuu xú káʼnii Jeobá nimbáyúu Gedeón, Barac, David, Samuel ga̱jma̱a̱ eʼwíinʼ (Heb. 11:32-35). Xkri̱da ndrígu̱ún a̱ngiu̱lú bi̱ kúwi̱i̱n dí mbiʼi xúgi̱ ma̱ngaa naʼni muʼda̱a̱lú tsiakii. Náa guʼwá dí phú na̱ʼkha̱ ikha nundrígú mbaʼa wéñuʼ carta ndrígu̱ún a̱ngiu̱lú, ikhiin nuthi dí nakumu̱ún dí fe ndrígu̱ún niʼni itháán gújkhúʼ índo̱ nuraxnuu historia ndrígu̱ún xa̱bi̱i̱ Jeobá bi̱ naguájún jmbu.

PABLO NISNGÁJMÚÚN A̱NGUI̱I̱N XÓO GÁKÚWI̱I̱N TSÍMÁÁ GAJMIÚN EʼWÍINʼ

7. Ndiéjunʼ eʼsngúlú consejo dí nixná Pablo náa Romanos 14:19-21 rá.

⁷ I̱mba̱ dí xóo ma̱ndoo mumbaʼñún a̱ngiu̱lú nindxu̱u̱ dí mu̱ʼni̱ dí marigá tsímáá náa congregación. Tséniʼñánʼ dí mixtiʼkhu xóo endxaʼwamíjna̱ ga̱jma̱a̱ dí maʼndulú wéñuʼ maguma xó má ikháánʼ nandulú maski ajndu tsénujngurámuuʼ má dí na̱ʼkha̱ náa Biblia maʼni dí ní xákuwáanʼlu jnduʼ. Guʼyáá mbóoʼ dí nirígá náa congregación dí rígá náa Roma náa kúwi̱i̱n cristianos judíos ga̱jma̱a̱ náa eʼwíinʼ xa̱bu̱ bi̱ naguwáʼ náa i̱ʼwáʼ xuajen. Numuu dí Xtángoo dí nikhánáá Moisés nánguá má nigiʼdoo numuu nákha ikhú, ma̱ndoo má mu̱phu̱ ganitsu dí nákha gíníi xándoo mu̱phu̱ (Mar. 7:19). Tikhuun cristianos judíos nakumu̱ún má dí májánʼ mu̱phu̱ xúgíʼ enii ganitsu, mú eʼwíinʼ nduyáá dí ra̱májánʼ nindxu̱u̱ rúʼko̱. Rúʼko̱ niʼni dí muni̱ wajímijná. Pablo nixnúún mbuyáá dí gíʼdoo wéñuʼ numuu makuwíin tsímáá, niʼthúún: “Itháan májánʼ dí xátsu xuwiʼ, ni xángíin vino, ni xátani̱ nimbá dí maʼni majngrádaaʼ ndxájuaaʼ” (atraxnuu Romanos 14:19-21). Dí niʼthúún, nimbáñúún a̱ngui̱i̱n mbuyáá dí xkujndu rúʼko̱ maʼni gachíin ikhiin ga̱jma̱a̱ bi̱ kúwi̱i̱n náa nagímbíin. Ikhaa nixtáa xawii mariʼkhu̱u̱ dí eʼni mu xáʼnijngradíinʼ eʼwíinʼ (1 Cor. 9:19-22). Xó má Pablo, ikháánʼlú mangáanʼ ma̱ndoo mumbaʼñún eʼwíinʼ ga̱jma̱a̱ mu̱ʼni̱ marigá má xúʼko̱ tsímáá á mu tségi̱ʼdu̱lú numuu dí nandulú maguma i̱ndó dí nandulú ikháánʼ.

8. Ndiéjunʼ niʼni Pablo mu maʼnimbánuu mbá dí niʼni dí ní xárígá dí tsímáá náa congregación rá.

⁸ Ndiéjunʼ gúʼni̱ á mu mixtiʼkhu xóo ekumu̱ún ga̱jma̱a̱ numuu dí gíʼdoo wéñuʼ numuu xá. Mu marigá má xúʼko̱ tsímáá ma̱ndoo mbuʼyaridáá xkri̱doo Pablo. Náa congregación dí nirígá nákha siglo timbá nikúwi̱i̱n tikhunʼ bi̱ nithi má xúʼko̱ dí gíʼmaa muthu xtóo xuyuuʼ tsáʼkhún xa̱bu̱ bi̱ nanindxuún cristianos bi̱ na̱nguá nindxu̱ún judío, mbáa numuu dí xúʼko̱ xa̱bu̱ xúthi dí raʼkhí jma̱a̱ numún (Gál. 6:12). Maski ajndu Pablo tánigu̱u̱ʼ ga̱jma̱a̱ numuu xóo nindxaʼwamíjna̱, na̱nguá má nirikhún, dí phú niʼni ni̱jkha gaʼtamíjná gajmíin apóstoles ga̱jma̱a̱ bi̱ kuya̱ edxu̱u̱ náa Jerusalén (Hech. 15:1, 2). Xóo niʼnimbánuu xkujndu rígi̱ niʼni dí marigá má xúʼko̱ tsímáá ga̱jma̱a̱ gagi náa congregación (Hech. 15:30, 31).

9. Ndiéjunʼ gándoo gúʼni̱ mu mbuʼyaridáá xkri̱doo Pablo

⁹ Á mu naku̱mu̱u̱ mbá xkujndu gakhi̱i̱, ma̱ndoo mu̱ʼni̱ marigá má xúʼko̱ dí tsímáá á mu nuʼthúún dí muxnulú ikha a̱ngiu̱lú bi̱ Jeobá nigruigi̱i̱n mu muñewa̱a̱n náa guʼwá nagimbáanʼ. Nuxkamaa ikha dí nagájnuu náa Biblia i̱yu̱lúʼ ga̱jma̱a̱ ikha dí naxnúlú xuajñuu Jeobá. Mu̱ʼni̱ marigá dí tsímáá náa nagimbáanʼ, á mu nuʼgíʼ nuʼnimbáníí xúgíʼ ikha rúʼko̱ ga̱jma̱a̱ tséʼni i̱ndó dí nandulú ikháánʼ.

10. Ndiéjunʼ i̱mba̱ dí niʼni Pablo mu marigá dí tsímáá náa nagímbíin xá.

¹⁰ I̱mba̱ dí niʼni Pablo mu marigá dí tsímáá ikhaa nindxu̱u̱ dí xáʼthi rí nakiéʼkúún a̱ngiu̱lú, ikhaa ndiʼyoo má xúʼko̱ dí májánʼ náa eʼwíinʼ. Mbá xkri̱da, índo̱ ni̱jkha̱ rámbóo niʼnirámáʼ i̱yi̱i̱ʼ rí ni̱jkha̱ inún Romanos, niguwíi mbiʼñún a̱ngiu̱lú ga̱jma̱a̱ niʼthí dí májánʼ dí niʼni mámbáa dí ikhiin. Xú káʼnii gándoo gúʼyaridáá xkri̱doo xá. Muʼthá dí májánʼ dí nduʼyáá náa eʼwíinʼ, rúʼko̱ gáʼni dí a̱ngiu̱lú maʼndún kuyamijná itháán ga̱jma̱a̱ mambajxúun májánʼ.

11. Xkáʼnii gúʼni̱ mu marigá dí tsímáá índo̱ narígá xkujndu rá.

¹¹ Mbáa nguáná maski ajndu a̱ngiu̱lú bi̱ nambájxu̱u̱n májánʼ gajmiún Dios naguáʼdáá xkujndu, Rúʼko̱ dí nigíʼnuu Pablo ga̱jma̱a̱ Bernabé ikhiin nimbájxu̱u̱n májánʼ, mbáa dí ikhiin niʼni magi̱ʼdu̱u̱n, nindxu̱u̱ á mu dí magún kuya̱a̱ Marcos mbu̱júu̱’ náa magún gútara’a. Xú káʼnii ninimbáníí xkujndu rígi̱ xá. Náa Biblia naʼthí: “Rígi̱ niʼni rí magi̱ʼdu̱u̱n wéñuuʼ, ikha jngóo mámbáa má ni̱jkha̱ náa nindoo” (Hech. 15:37-39). Mú Pablo, Bernabé ga̱jma̱a̱ Marcos ninimbáníí xkujndu rígi̱. Xígi̱ kaʼnii nisngajma dí gíʼdoo wéñuʼ numuu náa ikhiin dí marigá tsímáá ga̱jma̱a̱ makuwi̱i̱n mbá kambájxu̱u̱n. Nda̱wa̱á Pablo niʼthí dí májánʼ numuu Bernabé ga̱jma̱a̱ Marcos (1 Cor. 9:6; Col. 4:10). Ikháánʼlú ma̱ngaa ndayóoʼ muʼnimbáníí xkujndu dí kuaʼdáá gajmiúlú a̱ngiu̱lú bi̱ kúwi̱i̱n náa guʼwá nagimbáanʼ ga̱jma̱a̱ dí mbuʼyáá dí májánʼ dí ikhiin eni̱, á mu nu̱ʼni̱ xúʼko̱ mu̱ʼni̱ dí marigá dí tsímáá ga̱jma̱a̱ makuwáanʼ mbá kambájxu̱lú (Efes. 4:3).

PABLO NIMBÁÑÚÚN A̱NGUI̱I̱N MU MAʼNI GÚJKHÚʼ FE NDRÍGU̱ÚN

12. Ndiéjunʼ nindxu̱u̱ tikhu ga̱ʼkhu̱ dí nuraʼníí a̱ngiu̱lú rá.

¹² Numbaʼñún a̱ngiu̱lú índo̱ nu̱ʼni̱ maʼni itháan gújkhúʼ fe ndrígu̱ún náa Jeobá. Tikhunʼ ndayóoʼ maʼngu̱u̱n índo̱ nuni̱ májtiinʼ bi̱ kuñúún bi̱ na̱nguá nindxu̱ún testigos o a̱ngiu̱ún bi̱ nuñajunʼ gajmiún ma̱ngaa bi̱ nagún gajmiún escuela. Eʼwíinʼ nandoo káñún o ndaʼyóoʼ munimíjna̱ ga̱jma̱a̱ numuu dí nagáwúúnʼ ga̱jma̱a̱ eʼwíinʼ niʼníí má tsiguʼ nijngún iyááʼ ga̱jma̱a̱ kúwá ruguáʼthi̱i̱n maguma gámbáa xúgíʼ dí ra̱májánʼ náa numbaaʼ rígi̱. Xúgíʼ rígi̱ naʼni makáguabaaʼ fe ndrígóo mbá cristiano. Bi̱ nikúwi̱i̱n náa congregación dí nirígá nákhá siglo timbá niraʼníí ikháá kayuuʼ má ga̱ʼkhu̱ rígi̱. Ndiéjunʼ niʼni Pablo mu maxnúún tsiakii xá.

13. Xóo nimbáñún Pablo bi̱ nunimájti̱i̱nʼ numuu dí nindxu̱ún cristiano xá.

¹³ Pablo nijmuu Escrituras mu maʼni gújkhúʼ fe ndrígu̱ún a̱ngui̱i̱n. Mbáa cristianos bi̱ nindxu̱ún judíos na̱nguá ndiyáá xú káʼnii gúriʼñúún bi̱ kuñúún índo̱ nithúún dí religión ndrígu̱ún judíos nindxu̱u̱ itháan májánʼ ki xóo náa nagún bi̱ cristiano. I̱yi̱i̱ʼ dí niʼnirámáʼ Pablo náa inún hebreos niʼni dí muda̱a̱ wéñuʼ tsiakii (Heb. 1:5, 6; 2:2, 3; 9:24, 25). Cristianos buʼko̱ nindoo nijmún dí ma̱ndoo mundxa̱ʼwa̱míjna̱ dí niʼthí Pablo mu xúʼko̱ muthúún bi̱ nuthi wéñúúnʼ. IKháánʼlú rá. Xú káʼnii gándoo gúmbaʼñúún a̱ngiu̱lú bi̱ numíníiʼ ga̱jma̱a̱ numuu dí nunimájti̱i̱nʼ eʼwíinʼ xa̱bu̱ rá. Muʼsngúún dí majmúún májánʼ i̱yu̱lúʼ mu majmíin muriʼña̱a̱ dí gúrajxu̱u̱n. Mbá xkri̱da, ma̱ndoo mumbaʼñún jiámá ga̱jma̱a̱ wa̱ʼxaʼ mu mbuyáá xú káʼnii gándoo gúthi dí nunimbu̱ún dí xtáa mbáa tsáa bi̱ niʼniwíi xúgíʼ dí rígá ga̱jma̱a̱ folleto ¿Es la vida obra de un Creador? Ga̱jma̱a̱ El origen de la vida. Cinco cuestiones dignas de análisis.

14. Ndiéjunʼ niʼni Pablo maski ajndu nigiʼdoo wéñuʼ dí maʼni xóo dí maʼtáraʼa ga̱jma̱a̱ dí maʼsngáa xá.

¹⁴ Pablo nixkajxi̱i̱n a̱ngiu̱lú mu ‹muni̱ rí májánʼ› mu xúʼko̱ musngajma ngajua (Heb. 10:24). Raʼkháa i̱ndó niʼthíí ikhaa ma̱ngaa nigíʼ niʼni, mbá xkri̱da, índo̱ nirígá ewiʼ náa a̱ngiu̱lú bi̱ kúwi̱i̱n náa Judea, Pablo ninindxu̱u̱ mbáa bi̱ ndiyá edxu̱u̱ mu mambáñún (Hech. 11:27-30). Maski ajndu ikhaa nigiʼdoo wéñuʼ dí maʼni xóo dí maʼtáraʼa ga̱jma̱a̱ maʼsngáa, mú ikhaa ndiyáʼ má xúʼko̱ xóo mambáñún a̱ngiu̱lú bi̱ gíníi (Gál. 2:10). Xúʼko̱ nimbáñún a̱ngiu̱lú mu mbuyáá dí Jeobá má gáñewu̱u̱n. Mbiʼi xúgi̱ ikháanʼ ma̱ngaa numbaʼñúún maʼni gújkhúʼ fe ndrígu̱ún a̱ngiu̱lú índo̱ najmulú mbiʼi ndrígúlú, tsiakii ndrígúlú ga̱jma̱a̱ dí najmañulú nu̱ʼni̱ náa mu̱ʼgua̱ gúyambáá índo̱ narígá gamiéjunʼ ma̱ngaa á mu nurajkuáa má xúʼko̱ mbújkha̱a̱ náa mixtiembáá náa xúgíʼ numbaaʼ. Á mu nu̱ʼni̱ xúgíʼ rígi̱ mumbaʼñún a̱ngiu̱lú maku̱mu̱ún kuyáá Jeobá dí ikhaa nditháan xániñúnʼ.

15, 16. Xóo gíʼmaa mu̱ʼni̱ gajmiúlú bi̱ nikáguabaaʼ fe ndrígu̱ún rá.

¹⁵ Pablo tániñúnʼ bi̱ nikáguabaaʼ fe ndrígu̱ún. Nixmiéjuunʼ kaʼñún, niʼthún ajngáa dí mambáñun ga̱jma̱a̱ ajngáa wabaʼ (Heb. 6:9; 10:39). Mbá xkri̱da, náa i̱yi̱i̱ʼ dí niʼnirámáʼ náa inún Hebreos, mbaʼa aʼphu̱ niʼthí “ikháanʼlu”, na̱nguá niʼthí “ikháanʼla”, mu maʼthí dí ikhaa ma̱ngaa ndayóoʼ maʼnimbánuu consejo dí naxná (Heb. 2:1, 3). Xó má Pablo ikháanʼlu ma̱ngaa tséniʼñún a̱ngiu̱lú bi̱ nikáguabaaʼ fe ndrígu̱ún. Nusngajmún dí naxmiéjunlú kuʼñúún mu mumbaʼñún, xúʼko̱ nusngajmá dí nandulú kuʼñúún. Garmáʼáan a̱jkiu̱lú dí ajngáa dí gúʼthá gíʼdoo wéñuʼ numuu, mú ma̱ngaa gíʼdoo wéñuʼ numuu dí muʼthá ga̱jma̱a̱ wabaʼ.

¹⁶ Pablo niʼthún a̱ngui̱i̱n dí Jeobá tsémbumuu xúgíʼ ñajunʼ májánʼ dí ikhiin nini̱ (Heb. 10:32-34). Ikháánʼlú ma̱ngaa ma̱ndoo mu̱ʼni̱ ikháá má kayuuʼ xúʼko̱ índo̱ gúmbaʼñún a̱ngiu̱lú bi̱ nikáguabaaʼ fe ndrígu̱ún. Ma̱ndoo mundu̱ʼu̱u̱n dí muthulú xóo niniʼnuuʼ dí gajkhun o mumbaʼñún marmáʼáan a̱jkiu̱ún mbiʼi rí ndiyáá xú káʼnii Jeobá nimbáñún. Ikhú gúʼthúún dí Jeobá támbumuu xúgíʼ ngajua dí ikhiin nisngajma nákha ginii ga̱jma̱a̱ dí ikhaa xániñúnʼ nda̱wa̱á (Heb. 6:10; 13:5, 6). Á mu nuʼthúún xúgíʼ rígi̱ maʼni dí a̱ngiu̱lú muda̱a̱ tsiakii ga̱jma̱a̱ maʼndún muni̱ má xúʼko̱ ñajuunʼ Jeobá.

“GUXNAMÍJNÁLA TSIAKII”

17. Xóo gúʼni̱ mu mumbaʼñún itháan májánʼ eʼwíinʼ rá.

¹⁷ Índo̱ nanújngoo mba̱yu̱u̱ʼ mbiʼi bi̱ naʼni guʼwá najmañuu itháan. Ikháánʼlú ma̱ngaa ma̱ndoo majmañulú mu̱ʼni̱ itháán májánʼ ñajunʼ dí mumbaʼñún eʼwíinʼ. Guʼthúún a̱ngiu̱lú xkri̱da ndrígu̱ún xa̱bi̱i̱ Dios bi̱ niʼngu̱u̱n niguájun jmbu mu xúʼko̱ muda̱a̱ tsiakii ga̱jma̱a̱ maʼngu̱u̱n muraʼníí tsáʼkhá. Guʼthá má xúʼko̱ dí májánʼ rí nduʼyáá náa eʼwíinʼ mu xúʼko̱ marigá dí tsímáá, guñeʼwa̱a̱n índo̱ gákága̱a̱ mbá xkujndu ga̱jma̱a̱ guʼnimbáníí xkujndu dí gákumu̱u̱. Guʼthúún dí na̱ʼkha̱ raʼthí náa Biblia mu xúʼko̱ mumbaʼñún a̱ngiu̱lú maʼni itháán gújkhúʼ fe ndrígu̱ún, guxnúún bi̱ nda̱ñúunʼ ga̱jma̱a̱ gumbaʼñún bi̱ nikáguabaaʼ fe ndrígu̱ún.

18. Ndiéjunʼ gátani̱ ikháán rá.

¹⁸ Bi̱ nuyambáá náa naguma guʼwá náa nagimbáanʼ nakúwi̱i̱n gagi wéñuʼ. Ikháanʼlu ma̱ngaa ma̱ndoo makuwáanʼlu gagi índo̱ numbaʼñún a̱ngiu̱lú mu mambajxúun má xúʼko̱ gajmiún Dios. Mixtiʼkhu nindxu̱u̱ índo̱ naguma mbá guʼwá, numuu dí índo̱ mbá guʼwá ndajyúuʼ naguámbari̱ga̱a̱, mú dí mumbaʼñún a̱ngiu̱lú ndajyúuʼ kámuu. Ikha jngóo gu̱ʼni̱ asndu xó má eʼngo̱o̱ mu muʼgíʼ mu̱ʼni̱ ajngáa dí na̱ʼkha̱ raʼthí náa 1 Tesalonicenses 5:11: “Guxnamíjnála tsiakii, gumbáyumijnálá”.