¡Májánʼ nindxu̱u̱ rí muʼgua kanuu náa Dios!

1, 2. a) Ndiéjunʼ eyóoʼ muʼni mu mambajxúlú májánʼ gajmiúlú mbáa rá. b) Ndiéjunʼ gúʼyáá náa artículo rígi̱ rá.

ATATSAʼWÁMINAʼ ga̱jma̱a̱ numuu mbáa bi̱ nambájxáaʼ májánʼ ga̱jma̱a̱ʼ. Mbáa ikháán nambájxa̱a̱ʼ májánʼ ga̱jma̱a̱ʼ numuu dí natatsiniiʼ májánʼ, nitayáá xóo nixtáa ga̱jma̱a̱ nijmañaaʼ ndiéjunʼ dí nanigu̱u̱ʼ ga̱jma̱a̱ ndiéjunʼ dí tsénigu̱u̱ʼ. Nitayáá xóo májáanʼ xa̱bu̱ nindxu̱u̱ ga̱jma̱a̱ ikháán nindaaʼ mani̱ndxa̱a̱ʼ xó má ikhaa. Rúʼko̱ niʼni dí maʼndaaʼ xtayáá wéñuuʼ.

² Mu ma̱ndoo mambajxáaʼ májánʼ ga̱jma̱a̱ʼ mbáa, ndayóoʼ mbiʼi mu matatsiʼniiʼ, xúʼko̱ má gíʼmaa muríyaʼ mbiʼi muniʼniiʼ Jeobá mu xúʼko̱ mambájxulú májánʼ gajmiúlú. Ikha jngóo náa artículo rígi̱ mbuʼyáá xú káʼnii gándoo gúʼni mu mu̱ʼgua̱ kanuu itháán mijngii náa Jeobá. Mú ginii, mbuʼyáá xú káʼnii gámbáyulú dí muʼni rígi̱.

3. Ndiéjunʼ gámbáyulú dí muʼgua kanuu náa Jeobá rá. Atagíʼ mbá xkri̱da.

³ Gíʼdoo wéñuuʼ numuu dí mundxa̱ʼwa̱míjna̱ náá numuu gíʼmaa muʼgua kanuu náa Jeobá (Sal. 63:​6-8). Guʼgíʼ mbá xkri̱da mu ma̱ndoo makru̱ʼu̱lú itháan májánʼ. Nduʼyáá dí gíʼmaa muphiʼtsu májánʼ, muʼwan mbajinʼ iyaʼ, muʼni ejercicio ga̱jma̱a̱ mbuʼyáa májánʼ jxu̱lú. Maski ajndu xúʼko̱ nguáná nuniʼñááʼ ruʼni rígi̱, ga̱jma̱a̱ tséñewumíjna̱. Mú á mu nundxa̱ʼwa̱míjna̱ xú káʼnii gámbáyulú dí muʼni rígi̱, mbáa maʼndulú muñewamíjna̱ itháan. Ikháá má kayuuʼ á mu nundxa̱ʼwa̱míjna̱ xú káʼnii gámbáyulú dí muʼgua kanuu náa Dios, rúʼko̱ gáʼni dí maʼndulú muʼgua kanuu itháan náa ikhaa ga̱jma̱a̱ mambájxulú itháan májánʼ gajmiúlú (Sal. 119:​27-30).

4. Ndiéjunʼ niʼthí bi̱ niʼnirámáʼ Salmo 73:28 rá.

⁴ (Atraxnuu Salmo 73:28).a Bi̱ niʼnirámáʼ Salmo 73, ninindxu̱u̱ mbáa bi̱ na̱ʼkha̱ náa xuajin chíʼgíiʼ ndrígóo Leví ga̱jma̱a̱ naʼni ajmúú náa guʼwá rí nduyamajkuíí Dios. Mbáa ikhaa mba̱yu̱u̱ʼ má tsiguʼ naʼni ñajuunʼ Jeobá xó má kaʼyoo, mú ni̱jkha̱nú ndiʼyoo dí gíʼdoo wéñuuʼ numuu marmáʼáan a̱jkiu̱u̱n dí májánʼ nindxu̱u̱ rí maʼga̱ kanuu náa Dios. Ga̱jma̱a̱ nindoo rí eʼwíinʼ mbuyáá dí májánʼ nindxu̱u̱ dí mambajxúún gajmiún Dios. Ikha jngóo dí xúgi̱, mbuʼyáá xú káʼnii gámbáyulú dí muʼni rígi̱.

RÍ MUʼGUA KANUU NÁA DIOS NAʼNI RÍ MAKUWÁANʼ GAGI

5. a) Ndíjkha rí nakuwáanʼ gagi índo̱ na̱jkua̱ kanuu itháan náa Jeobá rá. b) Xú káʼnii embáyáaʼ ga̱jma̱a̱ nañewa̱a̱nʼ ikháán ku̱ma̱ ndrígóo Jeobá rá. (Proverbios 2:​6-16.)

⁵ Á mu na̱jkua̱ kanuu itháán náa Jeobá, itháán má gagi gákuwáánʼlú (Sal. 65:4). Rígá mbaʼa numuu dí nuʼtálú rígi̱, mbá dí ikhaa nindxu̱u̱ dí índo̱ nuʼnimbulú consejo rí na̱ʼkha̱ náa Ajngá rawuunʼ Dios, itháán má májánʼ nakuwáanʼlu. Ga̱jma̱a̱ dí na̱ʼkha̱ ikhí nambáyulú muraʼwíí májánʼ bi̱ mambájxulú gajmiúlú ga̱jma̱a̱ nambáyulú mu xúxuʼdamijná aʼkhá mbi̱i̱ʼ (atraxnuu Proverbios 2:​6-16). Ikha jngóo náa Biblia naʼthí: “Tsímáá xtáa xa̱bu̱ bi̱ naxkamaa itháán ku̱ma̱ ga̱jma̱a̱ xa̱biya̱ bi̱ najmañuuʼ naraʼwíí dí májánʼ ga̱jma̱a̱ dí ra̱májánʼ” (Prov. 3:13).

6. Náá numuu dí mbáa salmista nindátígo̱o̱ gagi rá.

⁶ Mú rígi̱ na̱nguá eyoo gáʼthúu̱n dí bi̱ nambájxu̱u̱n gajmiún Jeobá nditháan xákúwá ngíná. Numuu dí asndu bi̱ niʼnirámáʼ Salmo 73 nindátígo̱o̱ gagi índo̱ nindxa̱ʼwáminaʼ dí raʼkhí, numuu rí ndiʼyoo dí xa̱bu̱ bi̱ tséyamajkuíí Dios ni má tsénimbu̱u̱n kuyáá nakúwá itháán májánʼ. Xúgíʼ rígi̱ niʼni dí salmista bugi̱ makiʼnáa wéñuuʼ asndu nixígu kaʼñún. Nikumu̱u̱ rí xa̱bu̱ ra̱míjíinʼ bi̱ najmangu̱u̱nʼ, bi̱ nuni̱ mbaʼumíjna̱ guáʼdáá má xúʼko̱ rí nda̱ñúunʼ, na̱nguá eʼniún nandii, tsémíniiʼ, mú raʼkhí xóo nindxa̱ʼwáminaʼ (Sal. 73:​3-7, 12). Numuu rí ndiʼyoo dí tségumaa xó má kaʼyoo ikha jngóo nindxa̱ʼwáminaʼ dí nda̱a̱ má numuu dí maʼni ñajuunʼ Jeobá. Ra̱ʼkhá tháán nixtáa ngíná dí niʼthí: “Nakujmaa kaʼwu rí nda̱a̱ má numuu rí maʼni kaʼwu a̱jkiu̱nʼ, ni má rí majñáa ñawúnʼ mu masngajmá dí ragúʼdoo aʼkhúnʼ” (Sal. 73:13).

7. Ndiéjunʼ gándoo muʼni índo̱ kuwáanʼlu ngíná rá. (Atayáá xtiʼkhuu.)

⁷ Maski ajndu salmista nixtáa wéñuuʼ ngíná mú ikhaa ndiyáʼ rí maʼni mu xáxtáa má xúʼko̱ ngíná. Ikhaa nito̱ʼo̱o̱ “náa goʼwóo Dios rí kaʼwu ga̱jma̱a̱ mitsaanʼ” ga̱jma̱a̱ ikhí Jeobá niriʼkhu̱u̱ xóo endxa̱ʼwáminaʼ salmista bugi̱ (Sal. 73:​17-19). Numuu rí Jeobá nindxu̱u̱ bi̱ itháán nambájxulú májánʼ gajmiúlú, ikha jngóo ikhaa ndaʼyoo índo̱ ikháanʼ kuwáanʼlu ngíná, á mu ikháanʼlu kuwáanʼ xígi̱ kaʼnii ma̱ndoo muʼtákáñíí Jeobá ga̱jma̱a̱ gunda̱ʼa̱a̱ dí mambáyulú mbuʼyáá ndiéjunʼ gúʼnilú. Consejo rí na̱ʼkha̱ náa Ajngá rawuunʼ ga̱jma̱a̱ tsiaki̱i̱ dí gúxna̱a̱ʼ a̱ngiu̱lú mambáyulú mu muʼni má xúʼko̱ ñajuunʼ Dios. Maski ajndu ikháanʼlu kuwáanʼ ngíná ga̱jma̱a̱ naxmiéjunlú, Jeobá maʼni̱i̱ a̱jkiu̱lú (Sal. 94:19).b

RÍ MUʼGUA KANUU NÁA DIOS NAMBÁYULÚ MU MAKUWÁANʼ MÁJÁNʼ XÚGI̱ GA̱JMA̱A̱ NDA̱WA̱Á

8. Aratá i̱ʼwáʼ xú káʼnii embáyulú dí muʼgua kanuu náa Dios.

⁸ Rígá a̱jma̱ numuu dí nambáyulú mu muʼgua kanuu náa Dios. Timbá, naʼni dí makuwáanʼ májánʼ xúgi̱. Ga̱jma̱a̱ dí raga̱jma̱, kua̱ʼthi̱i̱n marigá mbá rí májánʼ nda̱wa̱á (Jer. 29:11). Ikha jngóo guʼyáá xú káʼnii embáyulú mámbá dí ikhaa.

9. Ndíjkha nakuwáanʼ itháan gagi índo̱ nu̱ʼni̱ ñajuunʼ Jeobá rá.

⁹ Rí na̱jkua̱ kanuu náa Jeobá nambáyulú mbuʼyáá rí gíʼdoo numuu rí kuwáanʼ. Dí mbiʼi xúgi̱ mbaʼin xa̱bu̱ nuta dí ndawa̱a̱ Dios, ikha jngóo tikhuun na̱nguá eyá dí gíʼdoo numuu dí nakúwá ga̱jma̱a̱ nakumu̱ún dí maʼga̱nú mbóo mbiʼi dí xa̱bu̱ mambíin. Mú núma̱aʼ dí nijmañulúʼ dí naʼthí náa Ajngá rawuunʼ Dios, nduʼyáálu gajkhun dí xtáa mbáa Dios ga̱jma̱a̱ rí xúgíʼ dí gúʼni ga̱jma̱a̱ numuu ikhaa xánindxu̱u̱ ndíí, numuu dí ikhaa “maʼni numi̱ín bi̱ nduyáaʼ ga̱jma̱a̱ xúgíʼ a̱jkiu̱ún” (Heb. 11:6). Anu̱lú Jeobá bi̱ xtáa mekhuíí niʼniáanʼlu mu ma̱ndoo mbuʼyamajkuíí. Ikha jngóo gajkhun nakuwáanʼ gagi índo̱ nu̱ʼni̱ ñajuunʼ (Deut. 10:​12, 13).

10. Xó má eʼthí náa Salmo 37:​29, ndiéjunʼ eguáʼthi̱i̱n bi̱ nakumu̱ún kuyáá Jeobá rá.

¹⁰ Mbaʼin xa̱bu̱ na̱nguá kuáʼti̱i̱n dí marigá dí májánʼ nda̱wa̱á. I̱ndó má nuñajunʼ, nuguáʼdiin e̱jñu̱ún ga̱jma̱a̱ nuyejxi̱i̱ mbújkha̱a̱ mu majmúún índo̱ gáʼga̱nú mbiʼi dí ni xáʼngu̱u̱n muñajunʼ. Ikhiin na̱nguá eyáá ndiéjunʼ nindxu̱u̱ dí nakudaminaʼ maʼni Jeobá nda̱wa̱á, mú ikháanʼlu nduʼyáá dí ikhaa nikudaminaʼ mañewu̱u̱n xa̱bi̱i̱ (Sal. 25:​3-5; 1 Tim. 6:17). Nakumuluʼ kuʼyáá Jeobá Dios bi̱ nambájxulú gajmiúlú ga̱jma̱a̱ nduʼyáá dí rígá mbaʼa dí ra̱ʼkhá tháán mitsaanʼ, mbá dí ikhaa nindxu̱u̱ dí ma̱ndoo mbuʼyamajkuíí Jeobá asndu kámuu náa Ku̱ba̱ʼ mitsaanʼ (atraxnuu Salmo 37:29).c

11. a) Xú káʼnii embáyulú dí muʼgua kanuu náa Dios rá. b) Xú káʼnii eku̱mu̱u̱ índo̱ nuʼnilú rígi̱ xá.

¹¹ Rígá i̱ʼwáʼ dí mambáyulú muʼgua kanuu náa Dios, xóo rí ikhaa nakudaminaʼ maʼni mba̱a̱ a̱jkiu̱u̱n kaʼyoo aʼkhá ndrígulú á mu ikháanʼ natanga̱a̱ a̱jkiu̱lú (Is. 1:18). Rígi̱ eyoo gáʼthúu̱n dí xáʼyóoʼ maʼni gawúnlú má xúʼko̱ ku̱ma̱ ndrígulú ga̱jma̱a̱ numuu rí ni̱ʼni̱ nákha niʼníí (Sal. 32:​1-5). Ma̱ngaa ma̱ndoo muʼni dí maxtáa gagi ga̱jma̱a̱ rígi̱ maʼni dí ikháanʼ maʼdxulu (Prov. 23:15). Mbáa na̱ʼkha̱ edxa̱a̱ʼ i̱ʼwáʼ xóo Jeobá niʼni tsajkurámáánʼ numuu dí nambájxáaʼ ga̱jma̱a̱ʼ ikhaa. Mú rí xúgi̱ mbuʼyáá ndiéjunʼ gúʼni mu muʼgua kanuu mámbá mbiʼi itháan náa ikhaa.

DÍÍ GÚʼNI MU MUʼGUA KANUU ITHÁAN NÁA DIOS RÁ.

12. Ndiéjunʼ gíʼmaa matani̱ mu mambajxáaʼ itháan ga̱jma̱a̱ʼ Jeobá rá.

¹² Á mu ikháán nijnguáanʼ má iyááʼ, nandoo gáʼthúu̱n dí nijmañaaʼ ga̱jma̱a̱ numuu Jeobá ma̱ngaa numuu Jesús. Nitanga̱a̱ a̱jkia̱a̱nʼ náa rí nikiéʼkháanʼ, nitasngájma fe náa Dios ga̱jma̱a̱ nitani̱ tsiakimínáʼ mu matatsi̱mba̱a̱ʼ ikha ndrígóo, mú ndayóoʼ muʼni má xúʼko̱ rígi̱ mu mambájxulú mámbá mbiʼi itháan gajmiúlú Jeobá (Col. 2:6).

13. Aratá ajtsú dí nambáyulú mu muʼgua kanuu itháan náa Jeobá.

¹³ Rí mambáyulú muʼgua kanuu mámbá mbiʼi itháan náa Jeobá nindxu̱u̱: 1) Gíʼmaa muraxnuu má xúʼko̱ ga̱jma̱a̱ muʼnigajma̱a̱ Biblia. Tsíyulú dí i̱ndó muraxnuu mu majmañulú numuu Jeobá, nandulúʼ mbuʼyáá ndiéjunʼ eyoo ikhaa dí muʼnilú ga̱jma̱a̱ nandulúʼ muʼnimbáníí ikha dí na̱ʼkha̱ náa Ajngá rawuunʼ (Efes. 5:​15-17). 2) Nandulúʼ dí fe ndrígulú maʼni itháan gújkhúʼ, ikha jngóo nundxaʼwamíjna̱ xúgíʼ rí nasngájma dí Jeobá nandoo kaʼyoo mámbáa dí ikháanʼlu. 3) Gíʼmaa mawi̱yulú xúgíʼ dí tsénigu̱u̱ʼ Jeobá ga̱jma̱a̱ tsémbájxulú gajmiúlú bi̱ nuni̱ dí ra̱májánʼ (Sal. 1:1; 101:3).

14. Xó má eʼthí náa 1 Corintios 10:​31, ndiéjunʼ gúʼni mu musngajmá dí nandulúʼ mu̱ʼni̱ dí nanigu̱u̱ʼ Jeobá náa xúgíʼ dí nu̱ʼni̱ rá. (Atayáá ma̱ngaa xtiʼkhuu.)

¹⁴ (Atraxnuu 1 Corintios 10:31). Ra̱ʼkhá tháán gíʼdoo numuu dí muʼni dí nanigu̱u̱ʼ ga̱jma̱a̱ rí maʼni maxtáa gagi Jeobá, rígi̱ raʼkháa i̱ndó nandoo gáʼthúu̱n dí magajnulúʼ gúʼtáráʼa o muʼgua reunión. Xúgíʼ rí nuʼni mámbá mbiʼi gíʼmaa masngájma dí nandulúʼ muʼni dí nanigu̱u̱ʼ ikhaa. Nduʼyáá rí Jeobá nandoo dí muʼthá dí gajkhun náa xúgíʼ ga̱jma̱a̱ muxná rí guaʼdáá (2 Cor. 8:21; 9:7). Jeobá ma̱ngaa nandoo dí muñewa̱a̱n vida ndrígulú numuu rí nindxu̱u̱ mbá regalo dí ikhaa nixnúlú. Nusngajmalú rígi̱ índo̱ nuñewa̱a̱n xóo nuphiʼtsulú ga̱jma̱a̱ tsénújngoo e̱ʼwa̱a̱n iyaʼ najnga̱a̱ ma̱ngaa nduʼyáʼ i̱ʼwáʼ dí mambáyulú mu xáʼniulú nandii. Índo̱ ndaʼyoo dí nuʼni tsiakimíjna̱ muʼni dí nanigu̱u̱ʼ ikhaa, maski ajndu nakujmaa dí ragíʼdoo numuu, Jeobá nandoo kaʼyulú itháan (Luc. 16:10).

15. Xú káʼnii gíʼthu̱u̱n Jeobá dí muʼniu̱u̱lú xa̱bu̱ rá.

¹⁵ Jeobá naʼniún rí májánʼ xa̱bu̱ bi̱ nuni̱ rí jmbu ga̱jma̱a̱ bi̱ tséni̱ rí jmbu (Mat. 5:45). Ikhaa nagi̱ʼthu̱u̱n dí mu̱ʼni̱ xó má eʼni ikhaa. Nandoo dí xa̱bi̱i̱ “xúthi dí raʼkhí ga̱jma̱a̱ numuu nimbáa, xúyáʼ muguáʼdáá xkujndu” ga̱jma̱a̱ nandoo dí “xákiʼníin kuñún xa̱bu̱” (Tito 3:2). Ikha jngóo tséʼni mbaʼumijnalú náa xa̱bu̱ bi̱ tsénimbu̱ún dí ikháanʼ nuʼnimbulú (2 Tim. 2:​23-25). Á mu nuʼniu̱u̱n má xúʼko̱ rí májánʼ xa̱bu̱ mambájxulú itháan gajmiúlú Jeobá.

MANDOO MUʼGUA KANUU NÁA DIOS MASKI AJNDU NIKIÉʼKULÚ

16. Xú káʼnii ni̱jkha̱nú nikumu̱u̱ bi̱ niʼnirámáʼ Salmo 73 rá.

¹⁶ Á mu narígá mbá mbiʼi dí nakumulú dí Jeobá nánguá xtáa ga̱jma̱á nindxu̱lú rá. Gundxaʼwamíjna̱ dí nigíʼnuu bi̱ niʼnirámáʼ Salmo 73. Ikhaa nigáwíinʼ a̱jkiu̱u̱n ga̱jma̱a̱ niʼthí: “Ikhúún nigíʼ magajnúri̱yo̱ʼ náa kamba̱a̱ rí májánʼ, nigíʼ maxnúʼndiu̱u̱nʼ” (Sal. 73:2). Niʼthí dí ra̱ʼkhá tháán ‹nixtáa ngíná a̱jkiu̱nʼ› rí ‹tándxaʼwamínáʼ májánʼ›, ga̱jma̱a̱ náa inuu Dios ‹ninindxu̱ʼ xóo mbáa xujkhúʼ bi̱ tséndxaʼwamínaʼ› (Sal. 73:​21, 22). Lá nikumu̱u̱ dí Jeobá ni xándoo kaʼyoo ga̱jma̱a̱ numuu rí nindxu̱u̱ xa̱bu̱ aʼkhá ma̱ngaa dí nijngawa̱a̱n xáʼ.

17. a) Ndiéjunʼ niʼni salmista índo̱ ra̱ʼkhá tháán nixtáa ngíná rá. b) Ndiéjunʼ eʼsngúlú dí nigíʼnuu xá. (Atayáá ma̱ngaa xtiʼkhuu.)

¹⁷ Á mu salmista nikumu̱u̱ dí Jeobá nánguá eyoo kaʼyoo mú mbáa tájyúuʼ má dí nikumu̱u̱ xígi̱ kaʼnii, numuu rí índo̱ ikhaa nixtáa itháan ngíná ndiʼyoo dí itháan májánʼ nindxu̱u̱ dí maʼga kanuu náa Jeobá. Salmista bugi̱ niʼthúu̱n Jeobá: “Mú rí xúgi̱ xtáá má xúʼko̱ ga̱jma̱á nindxa̱a̱ʼ, ga̱jma̱a̱ ikháán xtajthuun ñawúnʼ mújúnʼ. Naraxná ikhoʼ ga̱jma̱a̱ consejo ndrígáaʼ, ma̱ngaa naʼni a̱jkia̱a̱nʼ xtayoʼ” (Sal. 73:​23, 24). Mangáánʼ ndayóoʼ munda̱ʼa̱a̱ Jeobá dí maxnúlú tsiaki̱i̱ índo̱ nakumulú dí fe ndrígulú nakhá guabaaʼ o índo̱ nakumulú dí nánguá guaʼdáá numulú (Sal. 73:26; 94:18). Á mu narígá mbá mbiʼi dí nagájnuriyulu náa kamba̱a̱ dí májánʼ ma̱ndoo matangaán náa Jeobá, numuu dí “ikhaa xtáa xawii mu maʼni mba̱a̱ a̱jkiu̱u̱n kaʼyulú” (Sal. 86:5). Itháan índo̱ nakuwáanʼ ngíná wéñuuʼ o nakhá guabáanʼ ikhú gíʼmaa muʼgua kanuu itháán náa Jeobá (Sal. 103:​13, 14).

GU̱ʼGUA̱ KANUU MÁ XÚʼKO̱ NÁA DIOS

18. Ndíjkha rí ma̱ndoo muʼgua kanuu má xúʼko̱ náa Jeobá rá.

¹⁸ Ma̱ndoo muʼgua kanuu má xúʼko̱ náa Jeobá, numuu rí nditháan xúniʼñáánʼ rajmañulu ga̱jma̱a̱ numuu ikhaa. Náa Biblia naʼthí rí najmañuu Jeobá ga̱jma̱a̱ ku̱ma̱ ndrígóo ma̱ngaa kambo̱o̱ ‹nimbáa xáʼngo̱o̱ gáʼyoo› (Rom. 11:33).

19. Ndiéjunʼ eʼni mbuʼyáá Salmo rígi̱ rá.

¹⁹ Salmo 79:13 naʼthí: “Ikhú Ikháanʼxu̱ bi̱ nindxu̱xu̱ xa̱bu̱ xuajñaanʼ, mugia̱a̱ʼ bi̱ natiewu̱u̱n asndu kámuu gúxnáaʼxu̱ núma̱aʼ mu̱ni̱ mba̱a̱nʼxu̱ náa xúgíinʼ e̱ji̱n bi̱ gáguwáʼ rakúwá nda̱wa̱á”. Xátani a̱jma̱ a̱jkia̱a̱nʼ dí á mu nadxuʼ kanuu má xúʼko̱ náa Jeobá, ikhaa maʼni tsajkurámáánʼ asndu kámuu ga̱jma̱a̱ ikháán ma̱ndoo marata̱: “Dios nindxu̱u̱ xó mbá itsí rí ma̱ndoo maku̱mu̱ʼ ka̱yo̱o̱ ga̱jma̱a̱ xúgíʼ a̱jkiu̱nʼ, ikhaa nindxu̱u̱ bi̱ kaʼyoʼ asndu kámuu” (Sal. 73:26).