Baibol stadi gad mina plenti gudsamting po elpe yu. Bat, yu mait painem ad po stadi. Samtaim, yu mait tingk yu wande stape Baibol stadi blo yu. Aukam i impotant po mata mekem? Wanem go elpe yu po kipgo ane no gibap, nomata i ad?

1. Aukam Baibol stadi i impotant?

“Da wod blo God i gad obamak stronglaip ane paua wea i wok insaid laip blo yumpla.” (Ibrupipol 4:12) Da Baibol i mina spesil bikoz i soe tingking blo God ane wiskain em labe yu. Yu go lan po sabe plenti dipren samting, ane yu go kese mobeta laip ane lukpowad po wanem go apen bambai. Bat, da mein rizan i impotant, Baibol i elpe yu po kam pren blo Zeoba. Wen yu stadi, yu go laue da paua blo da Baibol po wok insaid laip blo yu, ane mekem mobeta.

2. Aukam i impotant po prapa tingbaut wiskain trutok blo Baibol i mina spesil?

Trutok blo Baibol i mina spesil wase perl ane gold. Daswai Baibol inkariz yumpla po “baie trutok ane no selem.” (Proberb 23:23) Wen yumi tingbaut wiskain trutok blo Baibol i mospesil den eniting, yumi go wok ad po kipgo po stadi em​—ane no laue eniting po bloke yumi.​—Rid Proberb 2:4, 5.

3. Wiskain Zeoba ken elpe yu kipgo wea stadi?

Bikoz Zeoba bin Meke yumi, ane em Pren blo yumi, em wande elpe yu po lanbaut em. Em ken gibe yu “da piling po prapa lisen em ane da strong” po stadi Baibol. (Rid Pilipi 2:13.) Em ken elpe yu ip yu pil slaik po stadi o po meke demting yu lanem. Wen trabol kam o pamle ane pren gense yu, em ken gibe yu da strong yu nidem. Ebritaim aske Zeoba lo prea po elpe yu sole yu ken kipgo wea Baibol stadi blo yu.​—1 Tesalonika 5:17.

TINGBAUT MO NAU

4. Meke Baibol stadi blo yu mina impotant

Samtaim laip i mina bizi ane i nogad taim po stadi Baibol. Wanem ken elpe yumi? Rid Pilipi 1:10, ane tokbaut dem kwestin ya:

• Wanem yu tingk i “prapa impotant” samting wea laip?

• Wanem yu go mekem po soe Baibol stadi i impotant po yu?

1. Ip yu go pilemap wan baket wea san pas, ane den trai po pute ston insaid tu, dem ston nogo pit

2. Ip yu pute dem ston insaid pas, yu go gad rum po pute plenti san. Seimkainwei, ip yu pute dem “prapa impotant” ting pas wea laip blo yu, yu ken meke demting, ane stil gad taim po meke ol nada samting apta

Yumi nide God, ane yumi pil rait insaid wen wi stadi Baibol​—bikoz God bin meke yumi diswei po sabe ane wosip em. Rid Matiu 4:4, ane tokbaut dis kwestin ya:

• Wen yu meke Baibol stadi impotant wea laip, wiskain i go elpe yu?

5. Kipgo ane no gibap wen pipol gense yu

BIDYO: Riwod Po Kipgo ane No Gibap (5:22)

• Lo da bidyo, wanem ol pren ane pamle blo Francesco bin tingk wen em spik dempla baut wanem em bin lan?

• Wanem gudsamting bin apen bikoz em bin kipgo ane no gibap?

Rid 2 Timoti 2:24, 25, ane tokbaut dem kwestin ya:

• Wanem ol pamle ane pren spikbaut wanem yu lanem?

• Prom dem skripsa lo Baibol, wiskain wei yu go ansa wen samwan no api po luk yu stadi Baibol? Aukam?

6. Oltaim trase Zeoba po elpe yu

BIDYO: Zeoba Elpe Yumi po Seinz (3:56)

• Lo da bidyo, wanem Jim bin mekem po seinz po plize Zeoba?

• Wanem yu laik baut Jim?

Rid Ibrupipol 11:6, ane tokbaut dem kwestin ya:

• Wanem Zeoba go mekem po demwan uda “lukraun po em”​—po demwan uda wande traiad po sabe em ane plize em?

• Prom dis skripsa, yu tingk i meke Zeoba api, po luk yu traiad po stadi Baibol? Aukam yu tingk demkain?

WANEM YU BI LAN

Samtaim i no izi, bat Baibol stadi go elpe yu po kese apilaip poeba. Oltaim kip trase Zeoba ane em go blese yu.

Wiskain Yu Go Spik

• Aukam trutok blo Baibol i spesil po yu?

• Wanem yu go mekem po soe Baibol stadi i “prapa impotant” po yu?

• Aukam yu mas aske Zeoba po elpe yu kipgo wea Baibol stadi blo yu?

PAINDAUT MO

Luk 4 diprenting wea i elpe pipol yuze taim blo dempla waizwei.

“How to Invest Your Time Wisely” (Awake!, February 2014)

Tekenotis wiskain Zeoba bin elpe wan oman, wen man blo em bin trai po stapem prom plize God.

Zeoba Meke Yumi Strong Wen Yumi Serbe Em (5:05)

Luk wanem bin elpe wan man, wen oman blo em bin kipgo ane no gibap.

Ai Wande Prube Em Rong (6:30)

Samtaim pipol spik ol Zeoba Witnis splitap ol pamle. Wiswei, i tru a?

“Do Jehovahʼs Witnesses Break Up Families or Build Them Up?” (Web article)

Yumi ebribodi mas suz wanem wi go mekem. Plenti demting wi suzem, ken bi gud po yumi o bad, ane i ken seinze wiskain yumi i pren blo Zeoba. Wase wen yumi tingbaut wea wi go stap, o wiskain po gede mani wi nidem, o po maret. Wen yumi suze gudwei wea laip, yumi gobi api ane plize Zeoba.

1. Wiskain yu ken yuze Baibol po elpe yu suze wiswei i gud?

Bipo yumi suz wanem po mekem, prea po Zeoba ane stadi Baibol, po luk wanem tingking blo Zeoba. (Rid Proberb 2:3-6.) Samtaim Zeoba gibe klia oda o lo. Ip i demkain, den, da bes wei, i po mata lisen po em.

Bat, wotip i nogad eni klia lo prom Baibol, po spik yu wanem po mekem? Zeoba stil go lide yu “lo da wei yu mas wagbaut.” (Aizaia 48:17) Wiskain em ken mekem? I mait gad Baibol skripsa dat ken lide yu. Sam Baibol skripsa kare impotant tising wea i kese tingking ane piling blo God. Wen yumi ride stori prom Baibol, wi ken lan dem piling blo God. Den, wen yumi sabe wiskain Zeoba pil baut samting, yumi ken suze wei dat ken plize em.

2. Wanem yu mas tingbaut pas, bipo yu suz po meke samting?

Da Baibol spik: “Da smatwan go teke taim po tingbaut ebridem step ol mekem.” (Proberb 14:15) Dasmin, bipo wi suze samting, yumi mas teke taim po tingbaut wanem wi go mekem. Wen yu kam po tingbaut samting, aske yuselp: ‘Wanem Baibol skripsa go elpe mi? Wanem da rait samting po mekem? Wanem go apen po ol nada pipol prom wanem ai suzem? Ane mo impotant, wanem go meke Zeoba api?’​—Proberb 27:12.

Zeoba gad da rait po spik yumi wanem i gud ane wanem i bad. Wen wi kam po prapa sabe lo ane tising blo em, ane pil strong po pole demting, wi tise miplaselp po gad gudsens. Dis sens i da piling yumi gad insaid po sabe ip samting i rait o rong. (Rom 2:14, 15) Wen yu tise yuselp, o sens blo yu, po sabe mo baut wanem i rait ane rong, i go elpe yu suz wanem i gud po yu.

TINGBAUT MO NAU

3. Laue Baibol po elpe yu

BIDYO: Laue Tising Blo Baibol Po Lide Yu (5:54)

• Wanem mina nais gipt Zeoba bin gibe yumi?

• Aukam Zeoba bin laue yumi po suz po miplaselp wiswei po go?

• Wanem em bin gibe yumi po elpe yumi po suz da bes wei po go?

Po luk wan demkain Baibol tising, rid Episis 5:15, 16. Den tokbaut wiskain yu ken “yuze ebri sans po meke gudsamting” po . . .

• ride Baibol ebritaim.

• kam mobeta wea maretlaip, o mobeta papa, mama, boi pikinini, o gel pikinini.

• gopo ol amenmiting.

4. Lane yuselp po kese gudsens sole yu suze wiswei i gud

BIDYO: “No Laue Eniting Po Spoile Gudsens Blo Yu” (5:13)

• Lo da bidyo, wanem da sisi bin mekem, po lane emselp po gad gudsens, sole em sabe wiskain po plize Zeoba?

Aukam mipla no aske nada pipol po suze wanem po mekem? Rid Ibrupipol 5:14, ane tokbaut dem kwestin ya:

• I maitbi moizi po aske samwan po suz po mipla wanem po mekem, bat wanem yumi mas sabe po miplaselp?

• Wanem gudsamting mipla gad po lukap, po elp lane yuselp po suz wanem i gud po yu?

5. Soe rispekt po wanem nada pipol suzem

Ol dipren pipol go suze ol dipren samting ol wande mekem. Wiskain yumi ken soe rispekt po wanem nada pipol suzem po mekem? Tingbaut 2 stori ya:

Stori 1: Wan sisi uda laik po yuze mekap ane were lipstik, bin mub gopo wan kongrigeisin wea i gad plenti amensisi uda tekenotis demkainting, ane tingk i obamak po werem.

Rid Rom 15:1 ane 1 Korint 10:23, 24, ane tokbaut dem kwestin ya:

• Prom dem skripsa, wanem dat sisi mait suz po mekem? Wanem yu go mekem ip yu wea samwan uda bilib i rong po meke dat samting?

Stori 2: Wan bala sabe Baibol spik i no rong po dringk lelbet wain o alkol, bat em suz no po dringk eni demkainting. Den, em gopo kaikai wea aus blo samwan ane em luk sam amenbala i dringk de.

Rid Iklaziastis 7:16 ane Rom 14:1, 10, ane tokbaut dem kwestin ya:

• Prom dem skripsa, wanem dat bala mait suz po mekem? Wanem yu go mekem ip yu luk samwan meke samting wea yu tingk i rong?

Wanem demting go elpe yu suze da raitwei po go wea laip?

1. Aske Zeoba po elpe yu po suze wanem po mekem.​—Zemes 1:5.

2. Meke stadi ane lukap Baibol ane ol nada Baibol stadi buk po paine ol rait skripsa po yuzem wea laip blo yu. Yu mait wande tok po ol nada Kristian uda sabe Baibol tu.

3. Tingk pas ane tekenotis wiskain yu go pil wen yu suz po meke samting ane wiskain i go meke ol nada pipol pil.

WANEM YU BI LAN

Wen wi sabe wanem Zeoba pil baut samting, yumi go suze da raitwei po meke samting wea laip. Yumi mas tingk pas baut wanem wi go mekem, bikoz i ken elpe pipol o erte dempla tu.

Wiskain Yu Go Spik

• Wiskain yu ken suz po meke samting sole i go plize Zeoba?

• Wiskain yu ken lane yuselp, po gad gudsens?

• Wiskain yumi ken soe rispekt wen nada pipol suzem wanem ol wande mekem?

PAINDAUT MO

Wiskain yu ken sabe wanem wei po suzem, po meke yu moklostu pren blo God?

“Make Decisions That Honor God” (The Watchtower, April 15, 2011)

Lan mo baut wiskain Zeoba gibe waiztok po elpe yumi.

Jehovah Guides His People (9:50)

Lan wanem bin elpe wan man, meke main baut wiswei po go wea em laip.

Mata Zeoba Meke Ebri Gudting Em Promis (5:46)

Lan mo baut wiskain yumi ken plize Zeoba, wen em no bin gibe klia lo, baut wanem po mekem.

“Do You Always Need a Bible Command?” (The Watchtower, December 1, 2003)