5. Paite eniting dat mait stape yu prom baptaiz

Wen yu suz po gibe laip blo yu po Zeoba ane gede baptaiz, yumi ebribodi stil go gad problem. Po luk wanem samwan bin mekem, plei da BIDYO, ane tokbaut dem kwestin ya.

BIDYO: Lab po Zeoba Ken Bite Eni Problem (5:22)

• Lo da bidyo, wanem problem Narangerel bin nid po paitem po serbe Zeoba?

• Wiskain em lab po Zeoba, bin elpe em po bite dem problem?

Rid Proberb 29:25 ane 2 Timoti 1:7, ane tokbaut dis kwestin ya:

• Wanem gibe yumi strong po no prait, sole yumi ken paite dem problem?

I mina impotant po trase Zeoba mo nau. Meke taim ebridei po prea ane ride Wod blo em tu. Ebritaim gopo amenmiting. Demting go redi yu, sole yu ken stanap strong ane no prait wen pipol go meke trabol po yu, iben ip i kam prom pamle. Misnareman Pol bin gad pipol kamap gense em plentitaim, bat em spik: “Diswan da AntapGod [Zeoba] uda i elpe mi, so ai nomo go prait nau.”—Ibrupipol 13:6.

Wen yumi go amenwok ebritaim, i lane yumi sole wi no prait po tok. Wa, i lane yumi po trase Zeoba ane no prait prom wanem pipol i tingk. (Proberb 29:25) Ip yu lan nau po stanap po pris, no prait, yu go redi yuselp, bambai wen gabman gense wok blo mipla, yu nogo laue dempla po stape yu.—1 Tesalonika 2:2.