2. Wanem sam wei po soe tru pasin wea laip ebridei?

Zeoba wande yumi po “mata tok trutok po ol neiba blo yumpla.” (Episis 4:25) So wanem i min? Wen wi tok po ol pamle, o wokmet, o amenbala ane sisi, o gabman pipol, wi no lai o gibe ol rong inpomeisin. Pipol uda soe tru pasin ane no sabe lai, nogo stil prom nada pipol o blape dempla. (Rid Proberb 24:28 ane Episis 4:28.) Ane dempla pei ebri taksmani dempla mas pei, gobaigen po gabman. (Rom 13:5-7) Wen yumi meke demkain wei, mipla soe wi “mata wande meke ebriting wea da raitwei.”​—Ibrupipol 13:18.

Zizas bin tise em klostuman ol “mas no mekem wiskain dis wold i meke samting.” (Zon 15:19) So, yumi mas no tekesaid blo ol samting blo wold​—wase ol politik samting ane woa. Bat wea ebridei laip, samtaim i maitbi ad po stap prom tekesaid. Pipol mait moke mipla, bikoz wi no zoine said. Wiskain yumi ken meikso wi no tekesaid blo da wold, bat mata tekesaid wea Zeoba God?

1. Wiskain ol prapa Kristian tingbaut gabman blo man?

Ol Kristian soe rispekt po gabman. Mipla meke wanem Zizas spik ane “gibe da bigking wanem blo em”​—so, mipla obei ol lo blo da kantri, wase dem lo po peibaik taksmani. (Mak 12:17) Baibol tis dat Zeoba da wan uda laue ol gabman blo man po rul. (Rom 13:1) So, wi sabe ol gabman blo man gad paua, bat i no moantap den God, i mata lelbet paua. Yumi luk po God blo yumi ane Kingdom blo em lo eben, po piksemap ebri nugudting wold i gad.

2. Wiskain yumi ken soe dat yumi no tekesaid?

Seimkainwei wase Zizas bin mekem, yumi no teke pat wea ol politik samting. Wen ol pipol bin luk Zizas meke wan mirikal, ol bin trai po meke em king ya lo ert, bat em no bin laue dempla. (Zon 6:15) Aukam? Em bin spik bambai, “Da ples wea ai king i no blo dis wold.” (Zon 18:36) So, bikoz yumi pole Zizas, i gad sam wei po soe wi no tekesaid wea dis wold. Wanwei, wen i woataim, mipla no zoinem. (Rid Maika 4:3.) Ebri kantri gad samting po mak uda dempla, wase flag, ane yumi soe rispekt po demkainting, bat yumi no stanap po gibe em ona, bikoz i seim wase wosip. (1 Zon 5:21) Ane yumi no teke wansaid oba nadasaid blo eni gabman grup o man uda ran po lide dem grup. Lo diskainwei ane nadawei tu, yumi ken soe wi mata lo said blo gabman blo God​—wa, Kingdom blo em.

TINGBAUT MO NAU

3. Ol prapa Kristian no tekesaid

Zizas ane klostuman blo em bin soe wanem da raitwei po mekem. Rid Rom 13:1, 5-7 ane 1 Pita 2:13, 14. Den, plei da BIDYO ane tokbaut dem kwestin ya.

BIDYO: Ol Prapa Kristian No Tekesaid Blo Dis Wold​—Pat 1 (4:28)

• Aukam yumi mas soe rispekt po gabman blo man?

• Lo wiskain wei ken yumi soe wi kam andanit lo blo dempla?

Wen i woataim, sam kantri mait spik ol no tekesaid blo da pait, bat dempla stil elpe dem 2 said wea nadawei. Wanem ol prapa Kristian go mekem? Rid Zon 17:16. Den, plei da BIDYO ane tokbaut dis kwestin ya.

BIDYO: Ol Prapa Kristian No Tekesaid Blo Dis Wold​—Pat 2 (3:11)

• Wiskain yumi ken soe wi no tekesaid?

Wotip wan gabman wande yu po meke samting wea i go gense lo blo God? Rid Pas Misnare Wok 5:28, 29. Den, plei da BIDYO ane tokbaut dem kwestin ya.

BIDYO: Ol Prapa Kristian No Tekesaid Blo Dis Wold​—Pat 3 (1:18)

• Ip lo blo gabman ane lo blo God no gri, uda yumi mas obei?

• Trai tingbaut, lo wiskain taim mait ol Kristian no obei lo blo man?

4. No tekesaid wea yumi tingking ane wanem yumi mekem

Rid 1 Zon 5:21. Den, plei da BIDYO ane tokbaut dem kwestin ya.

BIDYO: Aukam Ol Prapa Kristian No Nid Po Prait​—Sole Ol No Tekesaid (2:49)

• Lo da bidyo, aukam Ayenge bin suz no po zoin da gabman pati, o teke pat wea dat kastam po stanap po flag?

• Wiswei, yu tingk em bin suze da raitwei a?

Wanem nada samting ken kamap, wea i gobi ad po no tekesaid? Plei da BIDYO, ane tokbaut dem kwestin ya.

BIDYO: Ol Lesen Prom Da Wastaua—No Zoin Wen Wold Sapot Ol Dipren Said (5:16)

• Wiskain yumi ken stap prom tekesaid, wen yumi wase sport ane ol pipol prom ol dipren kantri plei gense wananada?

• Wotip dem gabman lida suz po meke samting dat i gud po yumi, o mait ert yumi, wiskain yumi ken stap prom tekesaid den?

• Wiskain demting yu luk wea niuz o pipol yumi angraun, mait seinze main blo yumi, so wi wande tekesaid?

WANEM YU BI LAN

Ol Kristian traiad po stap prom tekesaid, wea wanem ol tingk, spik ane wanem ol mekem, wen i kam po ol politik samting.

Wiskain Yu Go Spik

• Wanem ol gabman blo man, gad da rait po aske yumi po mekem?

• Aukam yumi mas oltaim stap prom tekesaid wea ol politik samting?

• Wanem samting ken kamap, wea i gobi ad po yumi, po no tekesaid?

PAINDAUT MO

Wanem yumi mait nid po gibap, sole yu go mata stap prom tekesaid?

Jehovah Has Never Let Us Down (3:14)

Wanem ol pamle ken mekem pas, po bi redi ip samting ad kamap, sole ol no tekesaid?

No Teke Pat, Soe Kristian Neutrality Iben Raun Plenti Pipol (4:25)

Wan man bin paindaut, i gad samting mo impotant den po pait po kantri blo yu.

“God i Ken Meke Eniting” (5:19)

Ridbaut wiskain yu ken soe yu no teke pat wea dis wold, wen i kam po wok yu suzem.

“Each One Will Carry His Own Load” (The Watchtower, March 15, 2006)