Raun da wold, ol pipol gad dipren tingking baut alkol.a Sam pipol enzoi sam dringk wen ol tugeda wea ol pren. Nada pipol suz no po dringk. Bat, nada pipol dringk obamak ane spakap. Wanem Baibol i spikbaut alkol?

1. Wiswei, i rong po dringk alkol a?

Da Baibol no spik i rong po dringk alkol. Wa, wen Baibol tokbaut plenti dem gudsamting God bin gibe yumpla, i spik yumi “wain i meke at blo man mina api.” (Song blo Sam 104:14, 15) Sam man ane oman wea Baibol, uda sebant blo God, bin dringk alkol.​—1 Timoti 5:23.

2. Wanem elp Baibol i gibem po demwan uda suz po dringk alkol?

Zeoba eite dat pasin blo dringk obamak ane spakap. (Galasia 5:21) Wod blo em i spik: “No sidaun wea demwan uda tumas dringk wain.” (Proberb 23:20) So ip yumi suz po dringk​—nomata yumi wea ol nada pipol, o i mata yuselp​—wi mas no dringk tumas wea yumi nogo tingk stret, o kan kontrol wiskain wi tok ane wanem wi mekem, o wea i go damiz yumi bodi. Ip i ad po kontrol aumas yumi dringk, i bes po mata stap prom dringk.

3. Wiskain yumi ken soe rispekt po wanem nada pipol suzem, wen i kam po alkol?

Ebriwan mas suz ip ol wande dringk alkol. Yumi nogo zaze nada pipol uda suz po dringk mata lelbet, no obamak. Ane wi mas no pose sambodi po dringk ip ol no wandem. (Rom 14:10) Mait yumi nogo dringk ip i go meke nada pipol pil nadakain. (Rid Rom 14:21.) Yumi “no mata tingbaut po elpe [miplaselp], bat mas tingbaut po elpe ol nada [pipol].”​—Rid 1 Korint 10:23, 24.

TINGBAUT MO NAU

4. Tingbaut pas ip yu go dringk

Wanem Zizas bin tingbaut alkol? Paindaut da ansa, wen yu lanbaut da pas mirikal em bin mekem. Rid Zon 2:1-11, ane tokbaut dem kwestin ya:

• Wanem dis mirikal lane yumi baut Zizas tingking, wen i kam po alkol ane demwan uda dringk em?

• Bikoz Zizas no bin zaz demwan uda dringk alkol, wanem tingking ol Kristian mas gad, ip samwan suz po dringk?

Bat, nomata wan Kristian i lau po dringk, i gad dipren taim wea em mas tingbaut pas ip em go dringk. Rid Proberb 22:3, ane tingbaut dem dipren taim ya, po elpe yu sabe ip i raittaim po dringk:

• Yu go draibe ka o bot, o meke wok wea big o smol masin.

• Yu pamle ane kare beibi insaid beli.

• Dokta spik yu no po dringk.

• I ad po yu po kontrol aumas yu dringk.

• Wea yu stap, gabman lo spik yu no lau po dringk alkol.

• Yu sidaun wea sambodi, uda suz no po dringk enimo, bikoz i bin ad po em po kontrol alkol.

Wiswei, yu tingk i orait po gad alkol wea weding pisting o pati a? Po elpe yu suz wanem po mekem, plei da BIDYO.

BIDYO: I Orait Po Sere Alkol Po Nada Pipol? (2:41)

Rid Rom 13:13 ane 1 Korint 10:31, 32. Apta yu ride dem skripsa, tokbaut dis kwestin ya:

• Wiskain dem skripsa ken elpe yu sabe wanem po mekem, sole yu plize Zeoba?

5. Meke main pas, baut aumas yu go dringk

Ip yu suz po dringk alkol, rimemba dis: Zeoba spik i no rong po dringk alkol, bat em spik i rong po dringk obamak. Aukam? Rid Ozeia 4:11, 18, ane tokbaut dis kwestin ya:

• Wanem ken apen wen samwan dringk tumas?

Wanem ken elpe yumi no po dringk tumas? Yumi masbi ambol, o sabe wen nap i nap, po yuselp. Rid Proberb 11:2, ane tokbaut dis kwestin ya:

• Aukam i gud aidia po sabe pas, aumas alkol i nap po yu, po meikso yu nogo oba dat mak?

6. Wanem ken elpe samwan uda wande stap prom tumas dringk

BIDYO: ‘Ai Taiat Prom Wanem Ai Mekem Wea Mai Laip’ (6:32)

• Lo da bidyo, wanem bin apen wen Dmitry bin dringk?

• Wiswei, i bin izi po em po stap prom dringk wantaim a?

• Wanem bin elpe em bambai, sole em ken gibap prom dringk?

Rid 1 Korint 6:10, 11, ane tokbaut dem kwestin ya:

• Wanem Baibol spikbaut dringk po spak?

• Wanem soe yumi, dat samwan uda dringk obamak, ken seinz?

Rid Matiu 5:30 NWT, ane tokbaut dis kwestin ya:

• Dis stori wea samwan mas kate an blo dempla, min dempla mait nid po stap prom meke samting nugud, po plize Zeoba. Wanem yu ken mekem, ip i ad po yu po stap prom tumas dringk?b

Rid 1 Korint 15:33, ane tokbaut dis kwestin ya:

• Wanem go apen ip yu angraun wea ol pren, uda laik po spakap ane dringk?

WANEM YU BI LAN

Alkol i samting prom Zeoba po enzoi em, bat em mina eite dat pasin blo obamak dringk ane spakap.

Wiskain Yu Go Spik

• Wanem Baibol spikbaut alkol?

• Wanem badting ken apen po sambodi, ip ol dringk tumas?

• Wiskain yumi ken soe rispekt po wanem ol nada pipol suzem, wen i kam po alkol?

PAINDAUT MO

Wiskain ol yangpipol ken suz wanem i gud, wen i kam po alkol?

Tingk Bipo Yu Dringk (2:31)

Paindaut wanem yu ken mekem, po paite problem wea alkol.

“Keeping Alcohol in Its Place” (The Watchtower, January 1, 2010)

Wiswei, ken ol Kristian, liptemap wain glas po nake glas blo nada pipol, wase toasting?

“Questions From Readers” (The Watchtower, February 15, 2007)

Lo da stori “I Was a Bottomless Barrel,” luk wiskain wan man bin stap prom mata deilait.

“The Bible Changes Lives” (The Watchtower, May 1, 2012)

Yumi ebriwan no dresap seimwei, wa, wi laik po suz wanem wi go werem. Ip yumi pole sam Baibol skripsa baut da wei wi dresap, wi ken plize Zeoba tu. Tekenotis sam dem skripsa ya daun.

1. Wanem skripsa ken gaide yumi wen i kam po klos ane wiskain wi go luk laik?

Yumi mas suze “klos wea i luk gud ane i kaba bodi blo [mipla]. Ane [mipla] mas no dresap po stail so ol pipol go wase [mipla],” ane yumi mas luk klin sole ol nada pipol go sabe wi “wosip God.” (1 Timoti 2:9, 10) Tingbaut 4 wei dis skripsa ken elpe yu: (1) Klos blo yumi mas “luk gud.” Mait yu olredi luk wea dem amenmiting, ol pipol blo Zeoba dresap lo plenti diprenwei, bat klos ane eyastail blo dempla soe rispekt po God. (2) Wen mipla “kaba bodi” i min mipla nogo were klos wea i go meke pipol gede rong tingking, ane wi nogo obamak dresap sole pipol go tekenotis mipla. (3) Mipla “mas no dresap po stail,” so i min wi no kasa kopi o pole ebri niu klos o eyastail i kamaut. (4) Da wei yumi luk mas oltaim soe dat yumi “wosip God” sole nada pipol go sabe wi wosip da tru God.—1 Korint 10:31.

2. Aukam yumi mas tingbaut amenbala ane sisi blo mipla, wen wi suz wanem po werem?

I tru, yumi ken suze wanem yumi wande werem. Bat, yumi stil mas tingbaut wiswei ol nada pipol go tekenotis klos blo mipla, sole ol no pil bad. Mipla trai no po apset enibodi, bikoz wi wande “plize ol nada pipol . . . elpe ebri Kristian po kam strong.”—Rid Rom 15:1, 2.

3. Wiskain da wei wi dresap ken elpe pipol wande lan mo baut Zeoba?

Yumi oltaim trai po dresap lo da raitwei, bat wi wande teke taim po tingbaut wiskain wi dresap wen wi gopo amenmiting o meke amenwok. Mipla no wande pipol po teke mo notis wanem mipla werem, bambai ol nogo lisen da impotant mesiz wi karem po dempla. Bat, wi wande da wei wi luk o wanem wi werem po elpe pipol wande lan mo baut God ane “i go spik da tising baut God uda i seibe yumpla.”—Taitas 2:10.

TINGBAUT MO NAU

4. Wen yumi dresap nais i soe rispekt po Zeoba

Wanem da mein rizan po meikso yumi luk nais? Rid Song blo Sam 47:2, ane tokbaut dem kwestin ya:

• Wen yumi gopo were samting, aukam i impotant po rimemba wiskain ol pipol mait tingbaut Zeoba?

• Yu tingk i impotant po tingbaut wanem wi werem po amenmiting o wen wi gopo meke amenwok? Aukam?

5. Wiskain yumi ken suz gudwei wen i kam po klos o wiskain wi go luk laik

Plei da BIDYO.

BIDYO: “Meke Ebriting Sole i Gibe Glori po God” (10:18)

Nomata klos blo yumi maitbi dia o kos lelbet, i masbi klin ane prapa po dat samting wea wi mekem. Rid 1 Korint 10:24 ane 1 Timoti 2:9, 10. Den, tokbaut aukam wi mas trai no po were klos wase diskain ya . . .

• klos wea i slaik, rek o dati.

• klos wea i soe tumas bodi, o ken meke pipol gad nugud main, bikoz da klos i tu tait.

Ol Kristian no pole Lo blo Mozes enimo, bat ol ken lanbaut da wei Zeoba i tingk, prom dat lo. Rid Dutaronami 22:5, ane tokbaut dis kwestin ya:

• Aukam man mas no dresap wase oman, ane oman mas no dresap wase man?

Rid 1 Korint 10:32, 33 ane 1 Zon 2:15, 16, ane tokbaut dem kwestin ya:

• Aukam i impotant po tingbaut wanem wi werem sole wi no apset sam pipol wea wi stap, o insaid da kongrigeisin?

• Wiskain klos pipol i werem wea yu stap?

• Yu tingk sam klos ol werem, no prapa po Kristian po werem tu a? Aukam?

WANEM YU BI LAN

Wen wi suze gudwei baut wiskain wi luk, wi soe rispekt po Zeoba ane po nada pipol.

Wiskain Yu Go Spik

• Aukam wanem wi werem ane wiskain wi luk, i impotant po Zeoba?

• Wanem sam skripsa wi ken yuzem po elpe yumi suz wiskain wi wande luk?

• Wiskain da wei wi luk mait seinze da wei ol nada pipol tingbaut tru wosip?

PAINDAUT MO

Wen pipol luk wanem yu werem, wanem ol go tingk baut yu?

“How Do I Look?” (Web article)

Lan aukam yu mas tingk pas bipo yu ink.

“What Does the Bible Say About Tattoos?” (Web article)

Tingbaut ol nada skripsa prom Baibol dat ken elpe yumi suz wanem po werem.

“Does Your Style of Dress Glorify God?” (The Watchtower, September 2016)

Wiskain wan oman uda wande plize God, bin lan i aptu ebribodi, wiskain ol wande dresap?

“Dress and Grooming Was My Stumbling Block” (Awake!, December 22, 2003)