Wiskain Baibol Ken Meke Laip Blo Yu Mobeta?

Yumpla aske olkain kwestin baut laip ane saparing, aukam pipol pasawei ane wanem go apen po wold bambai. Yumi woribaut ebridei samting tu, wase wiskain po meke mani o meke pamle laip api. Plenti pipol paine Baibol elpe dempla ansa dem impotant kwestin ane i gibe elp po ebridei laip tu. Wiswei, yu tingk Baibol ken elpe eniwan yu sabe?

1. Wanem sam kwestin Baibol i ansarem?

Baibol i ansa dem impotant kwestin ya: Wiskain laip bin stat? Wanem rizan yumi ya lo ert? Aukam pipol i sapa? Wanem apen wen sambodi i pasawei? Ip ebribodi wande pis, aukam i gad tumas woa? Wanem go apen po ert bambai? Baibol inkariz yumi po lukraun po ansa po demkain kwestin ane nadakain plenti pipol i mina api po paine dem ansa.

2. Wiskain Baibol ken elpe yu po gad apilaip nau?

Baibol gibe waiztok. Wanwei i mekem, i ken tise ol pamle wiskain po bi prapa api. I spik yumi wanem po mekem wen wi gad stres ane wiskain po bi api wea wok blo yumi. Yu go lan wanem Baibol i tis baut dem diprenting ane plenti mo wen yumi tokbaut dem lesen tugeda. Yu mait go gri den dat “ebri wod [lo Baibol] i . . . mina gud.”​—2 Timoti 3:16.

TINGBAUT MO NAU

Lan wiskain Baibol bin elpe pipol, wiskain yu ken bi api wen yu ridem, ane aukam i gud po gede elp po kesem prapa.

3. Baibol ken lide yumi

Baibol i wase wan strong braitlait. Wi ken yuze Baibol po sabe wanem i gudwei po meke samting ane po luk go prant po sabe wanem go apen bambai.

Rid Song blo Sam 119:105, ane tokbaut dem kwestin ya:

• Wiskain da raita blo Song blo Sam bi tingbaut Baibol?

• Wanem yu tingbaut Baibol?

4. Baibol ken ansa kwestin blo yumi

BIDYO: No Gibap! (1:48)

• Wea da bidyo, wiskain kwestin da oman bin gad?

• Wiskain Baibol stadi bin elpe em?

Baibol inkariz yumi po aske ol kwestin. Rid Matiu 7:7, ane tokbaut dis kwestin ya:

• Wanem kwestin yu gad, wea Baibol mait go ansa?

5. Yu ken bi api wen yu ride Baibol

BIDYO: Baibol Riding (2:05)

• Wea da bidyo, wiskain dem yangpipol tingbaut riding?

• Aukam dempla laik po ride Baibol nau?

Baibol spik i gad tising po gibe yumi kampot ane oup. Rid Rom 15:4, ane tokbaut dis kwestin ya:

• Wiswei, wen Baibol promis po gibe yu kampot ane oup, i meke yu wande sabe mo a?

6. Sambodi ken elpe yumi po sabe Baibol

Nomata sam pipol ride Baibol demplaselp, plenti pipol gede elp wen ol tok po sambodi baut demting. Rid Pas Misnare Wok 8:26-31, ane tokbaut dis kwestin ya:

• Wiskain yumi go sabe Baibol?​—Rid bas 30, 31.

WANEM YU BI LAN

Baibol gibe elp po ebridei laip, i ansa impotant kwestin, ane gibe pipol kampot ane oup.

Wiskain Yu Go Spik

• Wiskain waiztok yumi ken lan prom Baibol?

• Wanem sam kwestin Baibol i ansarem?

• Wanem yu wande lan prom Baibol?

PAINDAUT MO

Luk wiskain waiztok blo Baibol ken elpe yumi tidei.

“Tising Blo Baibol​—Waiztok Wea I Kipgo Poeba” (Da Wastaua Namba 1 2018)

Luk wiskain Baibol bin elpe wan man uda bin gad mina adtaim wea piling blo em prom wen em bi smolboi.

Ai Bin Paine Mai Niu Apilaip (2:53)

Luk waiztok Baibol i gad po elpe ol pamle.

“12 Secrets of Successful Families” (Awake! No. 2 2018)

Plenti pipol gad olkain aidia baut uda ruloba wold bat lan wanem Baibol eksplein baut diswan.

Wai Stadi Baibol?​—Pul Bidyo (3:13)

1. Ip man bin raite Baibol, aukam yumi spik, i kam prom God?

Da Baibol bin gad 40 dipren man uda bin raite dem buk lo ol dipren taim, so i bin teke 1600 iya po pinisem, prom iya 1513 Bipo Kraist gopo iya 98 Apta Kraist. Dem raita bin mina dipren prom wananada, bikoz sam i bin lukapta sip, o bin pisaman o bin king. Nomata dempla i dipren, ebri pat blo da Baibol mata gri. Wanem ken meke diskainting apen? Bikoz God i da tru Raita blo Baibol. (Rid 1 Tesalonika 2:13.) Dem man no bin raite tingking blo demplaselp. Bat, “i bin mata da OliSpirit i bin mube dem spesilmesizman po spik mesiz prom God.”a (2 Pita 1:21) God bin yuze em oli spirit po lide, o mube, dem man po raitemdaun tingking blo em.​—2 Timoti 3:16.