Kingdom blo God i da mein mesiz blo Baibol. Zeoba go yuze dat Kingdom po meke ert Paradais, wase em bin wandem de pas. Wanem dis Kingdom? Aukam yumi sabe i bi pinis stat po rul? Wanem i bin olredi mekem? Ane wanem dis Kingdom go mekem bambai? Dis lesen, ane da neks 2 lesen apta, go ansa dem kwestin.

1. Wanem i Kingdom blo God, ane uda King blo em?

Da Kingdom i wan gabman dat Zeoba God bin setemap. King blo dis gabman i Zizas Kraist ane em rul prom eben. (Matiu 4:17; Zon 18:36) Da Baibol spikbaut Zizas: “Em gobi king wea i nogad end.” (Luk 1:32, 33) Bikoz em King blo Kingdom blo God, em go ruloba ebribodi ya lo ert.

2. Uda rul tugeda wea Zizas?

Zizas no rul mata emselp. Sam pipol go rul tugeda wea Zizas ane dempla kam prom “ebri pamlelain, ebri langus, ebri pipol ane ebri kantri lo da wold. Ane . . . dempla kam king.” (Rebaleisan 5:9, 10) Aumas pipol go rul longsaid wea Zizas Kraist? Prom da taim Zizas bin kam po ert, plenti milion pipol bin pole em. Wiswei, dempla ebriwan go rul wea em a? No. Mata 144,000 dempla go rul prom eben wea Zizas. (Rid Rebaleisan 14:1-4.) Ebridem nada Kristian stap wea ert andanit da rul blo da Kingdom.​—Song blo Sam 37:29.

3. Wiskain Kingdom blo God i mina mobeta den ol gabman blo man?

Wen ol man uda rul trai po meke gudsamting, ol nogad da paua po meke ebriting ol wandem. Ane den, sam rula uda kam apta dempla, no tingbaut wanem go elpe pipol, bikoz ol mata tingbaut demplaselp. Bat, nobodi go eba teke ples blo Zizas, da Rula blo Kingdom blo God. God bin “setemap wan kingdom wea nating ken distroi em.” (Daniel 2:44) Zizas go ruloba da ert, ane em nogo trite sam pipol mobeta den ol nada pipol. Em soe lab, em mina kea ane soe peawei, ane em go lane pipol po trite wananada lo da seimkainwei​—po soe lab, po mina kea ane soe peawei tu.​—Rid Aizaia 11:9.

4. Kingdom blo God go ruloba ert

Zizas Kraist gad mo paua po rul, den ol dem rula prom bipotaim. Rid Matiu 28:18, ane tokbaut dis kwestin ya:

• Wanem meke rul blo Zizas mina moantap den eni rul blo man?

Gabman blo man oltaim seinz, ane ebridem rula, ruloba mata smol pat blo ert. Wiswei Kingdom blo God? Rid Daniel 7:14, ane tokbaut dem kwestin ya:

• Aukam i gud po yumpla dat “nating ken distroi Kingdom” blo God?

• Aukam i gud po yumpla dat i go rul ebri pat blo ert?

5. Gabman blo man mas pinis pogud

Aukam Kingdom blo God mas tekoba gabman blo man? Plei da BIDYO, ane tokbaut dis kwestin ya.

BIDYO: Wanem i Kingdom blo God?​—Smol Pat (1:41)

• Wanem yumi luk i apen wea wold bikoz man i rul yumpla?

Rid Iklaziastis 8:9, ane tokbaut dem kwestin ya:

• Wiswei, yu tingk Kingdom blo God mas tekoba gabman blo man? Aukam?

6. Demwan uda rul lo Kingdom blo God prapa sabe mipla

Bikoz King blo yumi, Zizas, bin stap ya lo ert wase man, em “prapa sabe lo sorewei, ol misteik wea i meke yumpla wik.” (Ibrupipol 4:15) Zeoba bin suze 144,000 man ane oman, ol sebant blo em, po rul tugeda wea Zizas uda “kam prom ebri pamlelain, ebri langus, ebri pipol ane ebri kantri lo da wold.”​—Rebaleisan 5:9.

• Wiswei, i meke yu pilgud po sabe Zizas ane demwan uda rul wea em, prapa sabe wiskain yumi pil ane ol problem pipol gad? Aukam?

7. Kingdom blo God gad ol mobeta lo den gabman blo man

Ol gabman meke lo wea i spostu elp ane lugaut pipol blo dempla. Kingdom blo God gad ol lo tu, wea pipol blo em mas pole em. Rid 1 Korint 6:9-11, ane tokbaut dem kwestin ya:

• Wanem yu tingk da wold gobi laik wen ebribodi pole lo blo God?a

• Wiswei, yu tingk Zeoba i gad da rait po spik pipol, uda kam andanit dat Kingdom, mas soe rispekt po lo blo em? Aukam?

• Wanem soe ol pipol uda no obei dem lo, ken seinz?​—Rid 1 Korint 6:11.

WANEM YU BI LAN

Kingdom blo God i wan prapa gabman de antap eben ane i go ruloba ert.

Wiskain Yu Go Spik

• Uda demwan uda rul lo Kingdom blo God?

• Wiskain Kingdom blo God i mina mobeta den eni gabman blo man?

• Wanem sam ting Zeoba spik ol pipol, uda stap andanit da Kingdom, mas mekem?

PAINDAUT MO

Tingbaut wanem Zizas bin tis baut wea da Kingdom go stap.

“Is the Kingdom of God in Your Heart?” (Web article)

Aukam i mina impotant po ol Zeoba Witnis po tekesaid lo Kingdom blo God pas, ane ol no tekesaid po rul blo man?

Devoted to Godʼs Kingdom (1:43)

Stadi wanem Baibol eksplein baut dem 144,000 uda Zeoba bin suzem, po rul tugeda wea Zizas.

“Who Go to Heaven?” (Web article)

Wanem bin meke wan oman insaid zeilaus, bilib mata God ken tekemaut nugud tritment blo man ane meke wold mo nais?

“How I Found the Answer to Injustice” (Awake!, November 2011)

Kingdom blo God bin stat po rul prom eben lo da iya 1914. Da lasdei po man po rul, i bin stat prom dis seim taim tu. Wiskain yumi sabe dis? Yumi go luk wanem Baibol olredi pinis sabe ane spik go apen, wea wold nau ane wiskain pipol go akt, ane wiskain i kam tru prom 1914.

1. Wanem spesilmesiz prom Baibol bin soem, baut da Kingdom blo God?

Baibol buk blo Daniel bin tokbaut da taim, wea i kolem “seben iya,” i go pasbai, den, Kingdom blo God go stat po rul. (Daniel 4:16, 17) Baut 600 iya apta, Zizas bin tokbaut dem ‘seben iya’ wase diskain, “dat taim wen God go spik po [dem neisin], “Nomo nau, i pinis.”” Zizas bin tis, i no bin apen yet, wea taim blo em. (Luk 21:24) Yumi go luk, da seben iya bin pinis lo 1914.

2. Wanem apen wea wold ane wiskain pipol i akt apta 1914?

Ol klostuman blo Zizas bin aske em: “Wattaim i go apen? Ane i go gad eni sain po soem dat yu ya kambaik ane wen dis wold i go pinis?” (Matiu 24:3) Zizas tok gobaigen po dempla, ane spik i go gad ol dipren samting apen wea wold, wen em gobi King ane stat po rul Kingdom blo God lo eben. Sam dem diprenting i woa, pipol nogad kaikai ane i go gad ertseik. (Rid Matiu 24:7.) Ane, da Baibol olredi sabe wei blo pipol wea da “lasdei”, ane, laip “i go gad nadakain tumas trabol.” (2 Timoti 3:1-5) Wanem yumi luk wea wold ane wiskain pipol i akt, i mina kam tru prom 1914.

3. Aukam wold bin kam nadakain nugud apta Kingdom blo God bin stat po rul?

Sottaim apta Zizas bin kam King blo Kingdom blo God, em bin paite Satana ane dem debolspirit antap lo eben. Satana bin luze dat pait. Da Baibol spik dat em “ane ol einzel blo em . . . bin sakwei ausaid prom eben godaun po ert.” (Rebaleisan 12:9, 10, 12) Satana i nadakain wail bikoz em sabe em gad sottaim lept, em go pinis. So, i polt blo em, po ebridem saparing ane pein, ebriwea wea ert. Wa, i meke sens wold i nadakain nugud! Kingdom blo God go strete ebridem problem wold i gad.

TINGBAUT MO NAU

4. Spesilmesiz blo Baibol mak 1914

BIDYO: Kingdom blo God Bin Stat Po Rul lo 1914 (5:02)

Bipotaim, God bin meke King Nebukadneza blo Babilon, gad drim wea God bin soe em samting impotant go apen bambai. Yumi ken ridbaut dat drim ane wiskain Daniel bin ekspleinem wea Baibol. I soe kliawan da drim bin baut kingdom blo Nebukadneza ane Kingdom blo God.​—Rid Daniel 4:17.a

Rid Daniel 4:20-26, ane luk da piksa baut da big tri, po ansa dem kwestin ya:

• (1) Wanem Nebukadneza bin luk wea drim blo em?—Rid Daniel 4:20 ane 21.

• (2) Wanem go apen po da tri?​—Rid Daniel 4:23.

• (3) Wanem go apen wen dem “seben iya” go pinis?—Rid Daniel 4:26.

Wiskain da Drim Baut da Tri, i Tokbaut Kingdom blo God

DA SPESILMESIZ BAUT DA TRI (Daniel 4:20-36)

Ruling paua

(1) Wan nadakain big tri

Ruling paua i spel pas

(2) “Katemdaun da tri,” ane “laue seben iya po pasbai”

Ruling paua stat gen

(3) “Kingdom blo yu go kambaik po yu”

Pastaim dis spesilmesiz bin kam tru . . .

• (4) Da tri, i min uda?​—Rid Daniel 4:22.

• (5) Wen rul blo em bin stap?​—Rid Daniel 4:29-33.

• (6) Wanem bin apen po Nebukadneza wen dem “seben iya” bin pinis?​—Rid Daniel 4:34-36.

PASTAIM DIS SPESILMESIZ BIN KAM TRU

Ruling paua

(4) Nebukadneza, King blo Babilon

Ruling paua i spel pas

(5) Apta iya 606 Bipo Kraist, stupit sens bin kese main blo Nebukadneza ane em stap prom rul po seben iya

Ruling paua stat gen

(6) Sens blo Nebukadneza bin kamgudgen ane em stat po rul gen

Sekantaim dis spesilmesiz bin kam tru . . .

• (7) Da tri, i min uda?​—Rid 1 Kronikal 29:23.

• (8) Wen rul blo dempla bin stap? Wiskain yumi sabe dempla no bin rul wen Zizas bin ya wea ert?​—Rid Luk 21:24.

• (9) Wen dis rul bin stat gen ane wea?

SEKANTAIM DIS SPESILMESIZ BIN KAM TRU

Ruling paua

(7) God yuze ol king blo Izrael po rul po em

Ruling paua i spel pas

(8) Zarusalem bin distroi, so no king blo Izrael bin rul po 2,520 iya

Ruling paua stat gen

(9) Zizas bin kam King ane stat po rul Kingdom blo God wea eben

5. Da wold bin seinz apta 1914

Plei da BIDYO.

BIDYO: Wold Bin Seinz Apta 1914 (1:10)

Zizas bin tokbaut demting go apen wea wold apta em kam King. Rid Luk 21:9-11, ane tokbaut dis kwestin ya:

• Prom wanem Zizas bin tokbaut, wanem samting yu luk o lisenbaut i apen raun wold?

Misnareman Pol bin tokbaut wiskain pipol go akt lo dem lasdei wea man i rul. Rid 2 Timoti 3:1-5, ane tokbaut dis kwestin ya:

• Wiswei, yu bin luk pipol i akt demkainwei a?

6. Wanem yu mekem soe yu bilib Kingdom blo God i rul nau

Rid Matiu 24:3, 14, ane tokbaut dem kwestin ya:

• Wanem impotant wok soe Kingdom blo God i rul nau?

• Wiskain yu ken teke pat lo dis amenwok?

Kingdom blo God i rul nau, ane i mina klostu po da taim wen i go tekoba ert. Rid Ibrupipol 10:24, 25, ane tokbaut dis kwestin ya:

• Wanem yumi mas mekem bikoz “taim po dat dei . . . i kam klostu nau”?

WANEM YU BI LAN

Spesilmesiz prom Baibol, ane wanem i apen raun wold prube Kingdom blo God i rul nau. Yumi soe yumi bilib da Kingdom i rul, wen yumi prisbaut em, ane gopo amenmiting.

Wiskain Yu Go Spik

• Wanem bin apen wen da “seben iya” bin pinis, wea Baibol buk blo Daniel i tokbaut?

• Wanem elpe yu po prapa bilib da Kingdom blo God bin stat po rul lo 1914?

• Wanem yu ken mekem po soe yu bilib da Kingdom i rul nau?

PAINDAUT MO

Lan wanem demwan uda stadi ol bipotaim samting, bin raitbaut wiskain wold bin seinz apta 1914.

“When Morals Declined Dramatically” (Awake!, April 2007)

Ridbaut wiskain da sain lo Matiu 24:14 bin seinze laip blo wan man.

“I Loved Baseball More Than Anything!” (The Watchtower No. 3 2017)

Wiskain yumi sabe da spesilmesiz prom Daniel sapta 4 i tokbaut Kingdom blo God?

“When Did Godʼs Kingdom Begin Ruling? (Part 1)” (The Watchtower, October 1, 2014)

Wanem prubem dem “seben iya” lo Daniel sapta 4 bin pinis wea 1914?

“When Did Godʼs Kingdom Begin Ruling? (Part 2)” (The Watchtower, November 1, 2014)

Kingdom blo God i olredi rul antap eben. I no long nau, i go ruloba ert ane ebriting wea ert gobi mobeta. Yumi go luk ya nau, sam dem gudting da Kingdom go mekem.

1. Wiskain Kingdom blo God go meke pis ane peawei kam po ert?

Zizas, King blo Kingdom blo God, go distroi ol nugudpipol ane ol gabman wea wan woa, ane Baibol kolem Amagedon. (Rebaleisan 16:14, 16) Lo dat taim, dis promis blo Baibol go kam tru: “I no long nau, ane i nomo go gad nugudpipol.” (Song blo Sam 37:10) Zizas go yuze Kingdom po meikso ebriwea lo ert go gad pis ane peawei.​—Rid Aizaia 11:4.

2. Wanem laip gobi laik wen God meke wanem em wandem lo ert?

Andanit da Kingdom rul blo God, “dempla uda i rait ane stret go gede ert, ane dempla go stap ya poeba.” (Song blo Sam 37:29) Tingbaut kai! Ebriwan lo ert gobi gud ane soe peawei, ane ol go lab Zeoba, ane wananada! Nobodi go gede sik, ane ebriwan go stap laip poeba.

3. Wanem Kingdom blo God go mekem apta ol nugudpipol i pinis?

Apta ol nugudpipol go pinis, Zizas gobi King ane rul po 1,000 iya. Lo dat taim, Zizas ane dem 144,000 uda go rul wea em, go elpe pipol lo ert, po nomo gad sin, so, dempla go gad nating rong wea main ane bodi. Wen dem 1,000 iya i pinis, ebriwea lo ert go kam mina nais paradais, wea ebri pipol gobi api bikoz ol obei lo blo Zeoba. Den, Zizas go gibe dat Kingdom gobaigen po Papa blo em, Zeoba. Diswan gobi mina mospesil den eni nada taim bipo, bikoz i go “ona ane kare neim blo [Zeoba] antap.” (Matiu 6:9, 10) I go prubem dat Zeoba i wan gud Rula uda kea po pipol blo em. Zeoba go distroi Satana, ol dem nugudspirit, ane demwan uda wande go gense rul blo Em. (Rebaleisan 20:7-10) Kingdom blo God go meke ebriting mata rait ane i go stap demkain poeba.

TINGBAUT MO NAU

4. Kingdom blo God go kamaut ol gabman blo man

“Man bin bos oba nadaman, wea i erte dempla.” (Iklaziastis 8:9) Zeoba go yuze Kingdom blo em po kamaut ol nugud tritment blo man.

Rid Daniel 2:44 ane 2 Tesalonika 1:6-8, ane tokbaut dem kwestin ya:

• Wanem Zeoba ane Boi blo em, Zizas, go mekem, po ol gabman blo man ane demwan uda pole dempla?

• Wiskain demting yu bin lanbaut Zeoba ane Zizas, elpe yu po prapa bilib, dat wanem demtu go mekem, i mina rait ane peawei?

5. Zizas i da bes King

Bikoz Zizas i King blo Kingdom blo God, em go elpe pipol lo ert wea mina plenti wei. Plei da BIDYO po luk wiskain Zizas olredi bin soe em wande elpe pipol, ane wiskain God bi gibe em da paua po mekem.

BIDYO: Zizas Bin Soe Wanem da Kingdom Go Mekem (1:13)

Demting Zizas bin mekem wen em bin wea ert, bin soe kliawan wanem da Kingdom go mekem bambai. Wanem blesing wea dis list ya, yu mina lukpowad po? Rid dem skripsa po lan mo baut dem blesing.

6. Kingdom blo God go meke ebriting prapa nais bambai

BIDYO: Luk Wiskain Laip Gobi Mina Spesil Bambai (4:38)

Rid Song blo Sam 145:16, ane tokbaut dis kwestin ya:

• Wiskain i meke yu pil po sabe Zeoba go gibe “ebriting wea i laip  . . . wanem ol prapa wandem”?

WANEM YU BI LAN

Kingdom blo God go meke wanem God wandem. I go seinze da ert po kam wan big paradais, wea i go gad gudpipol uda wosip Zeoba poeba.

Wiskain Yu Go Spik

• Wiskain Kingdom blo God go ona neim blo Zeoba?

• Aukam yumi ken bilib Kingdom blo God, go meke ol promis blo Baibol kam tru?

• Prom ol dem gudting da Kingdom go mekem, wanem spesil samting yu lukpowad po?

PAINDAUT MO

Paindaut wanem Amagedon i min.

“What Is the Battle of Armageddon?” (Web article)

Stadi demting Zizas spik go apen tru dat “trabol [wea] i gobi prapa nadakain monugud.”—Matiu 24:21.

“What Is the Great Tribulation?” (Web article)

Luk wiskain ol pamle ken tingbaut wanem laip gobi laik tugeda wea Paradais.

Wanem Yu Wande Mekem lo Paradais (1:50)

Lo dis stori, “I Was Troubled by Many Questions,” lan wiskain wan man bin gense rul blo gabman bat em bin paine ansa po wanem em lukraun po.

“The Bible Changes Lives” (The Watchtower, January 1, 2012)