Isaias
16 Haruka bibi-malae aman ida ba ukun-naʼin iha rai neʼe,
Haruka bibi neʼe husi Sela liuhusi rai-fuik
Hodi bá sidade Siaun* nia foho.
2 Iha fatin atu hakur Mota Arnon,+
Ema Moab sei sai hanesan manu ida neʼebé ema duni sai tiha husi ninia knuuk.+
3 “Fó konsellu, no halo tuir ó-nia desizaun bá.
Iha meiudia, fó mahon ho lalatak neʼebé nakukun hanesan iha kalan.
Subar ema neʼebé halai namkari no keta entrega fali sira neʼebé halai.
4 Oh Moab, husik haʼu-nia povu neʼebé halai namkari atu hela iha ó-nia leet.
Sai nuʼudar subar-fatin ba sira husi ida neʼebé iha kbiit atu halakon.+
Ida neʼebé siʼak no hanehan ema seluk sei mate,
No tempu harahun nian sei remata,
No sira neʼebé sama ema seluk sei lakon husi rai.
5 Tuirmai Maromak sei harii metin kadunan ida ho hahalok domin neʼebé laran-metin.
Ukun-naʼin neʼebé tuur iha kadunan iha David nia tenda sei hatudu laran-metin;+
Nia sei tesi-lia ho loloos no sei lalais atu halaʼo justisa.”+
6 Ita rona ona kona-ba Moab nia hahalok foti an, nia foti an tebetebes,+
Ninia hahalok loko an, foti an no ninia hirus;+
Maibé ninia liafuan sira neʼebé folin-laek sei sai saugati deʼit.
7 Tan neʼe, Moab sei tanis tanba kona susar;
Ema Moab hotu sei tanis.+
Sira neʼebé hetan baku sei halerik tanba la iha tan dose uvas-maran husi Kir-Hareset.+
8 Toʼos iha Hesbon+ sai namlaek ona.
Ukun-naʼin husi nasaun sira sama ona uvas-hun iha Sibma,+
No mós ninia sanak neʼebé nakonu ho uvas-fuan mean,
Uluk ninia sanak sira nani toʼo Jazer,+
Sira nani toʼo rai-fuik.
Ninia dikin buras no nani toʼo tasi.
9 Tan neʼe mak haʼu sei tanis kona-ba uvas-hun iha Sibma hanesan haʼu mós tanis ba Jazer.
Oh Hesbon no Eleale, haʼu-nia matan-been sei habokon imi,+
Tanba ema la haklalak tan kona-ba imi-nia ai-fuan iha tempu koʼa nian.*
10 Haksolok no kontente lakon ona husi toʼos ai-fuan nian,
No la iha ona knananuk ksolok nian ka lian haklalak nian iha toʼos-uvas.+
Ema neʼebé halo tua-uvas la sama tan uvas-fuan iha fatin sama uvas nian,
Tanba haʼu mak hapara lian haklalak nian.+
11 Tan neʼe mak haʼu-nia laran la hakmatek kona-ba Moab,+
Hanesan arpa nia talin neʼebé book an kuandu ema toka,
No haʼu-nia laran la hakmatek kona-ba Kir-Hareset.+
12 Maski Moab halo kole ninia an iha fatin aas no harohan iha ninia fatin sagradu, maibé ninia orasaun sei sai saugati deʼit.+
13 Neʼe mak liafuan neʼebé uluk Jeová koʼalia kona-ba Moab. 14 Agora Jeová dehan: “Iha tinan tolu nia laran, tuir tinan sira ba serbisu-naʼin,* mak Moab sei lakon ninia glória ho susar oioin, no ninia ema sira neʼebé restu sei hela uitoan deʼit no la vale.”+