LEVÍTICO

1 Jeová bolu Moisés no koʼalia ba nia husi tenda reuniaun nian,+ hodi dehan: 2 “Koʼalia ba ema Izraél no hatete ba sira: ‘Se imi ida hakarak atu fó imi-nia animál-hakiak nuʼudar sakrifísiu ba Jeová, imi tenke fó karau, bibi-malae ka bibi-timur nuʼudar sakrifísiu.+

3 “‘Se ema ida fó karau ida nuʼudar sakrifísiu sunu nian, nia tenke hili karau-aman neʼebé la iha moras.+ Nia tenke entrega karau neʼe ba Jeová ho hakarak rasik+ iha odamatan ba tenda reuniaun nian. 4 Nia tenke tau liman iha karau neʼe nia ulun leten, katak karau neʼebé nia fó nuʼudar sakrifísiu sunu nian, no Maromak sei simu ida-neʼe hodi hamoos ninia sala.

5 “‘Tuirmai oho karau-aman* neʼe iha Jeová nia oin, no Arão nia oan-mane sira neʼebé serbí nuʼudar amlulik+ tenke hasaʼe raan no hisik iha altár nia sorin hotu,+ katak altár neʼebé iha odamatan ba tenda reuniaun nian. 6 Kona-ba animál ba sakrifísiu sunu nian neʼe, tenke hasai ninia kulit no koʼa ninia isin ba pedasuk.+ 7 Arão nia oan-mane sira neʼebé serbí nuʼudar amlulik tenke sunu ahi iha altár leten+ no tau ai ba ahi. 8 Tuirmai sira tenke tau didiʼak naʼan-isin parte ida-idak husi sakrifísiu neʼe+ hamutuk ho ninia ulun no bokur neʼebé taka rins, no tau neʼe iha altár leten, iha ai neʼebé lakan daudaun nia leten. 9 Sira tenke fase animál neʼe nia tee-oan no ain sira ho bee, no amlulik tenke sunu buat hotu neʼe hodi halo suar iha altár leten atu hasaʼe nuʼudar sakrifísiu sunu nian, neʼe mak sakrifísiu neʼebé sunu iha ahi no ninia morin halo Jeová kontente.*+

10 “‘Se ema ida fó bibi-malae aman* ka bibi-timur aman nuʼudar sakrifísiu sunu nian,+ nia tenke fó bibi-aman neʼebé la iha moras.+ 11 Amlulik tenke oho bibi neʼe iha Jeová nia oin iha altár nia sorin parte norte, no Arão nia oan-mane sira neʼebé serbí nuʼudar amlulik tenke hisik raan ba altár nia sorin hotu.+ 12 Nia tenke koʼa bibi nia isin ba pedasuk, no nia tenke tau ninia isin parte ida-idak iha ai neʼebé lakan iha altár leten hamutuk ho bibi nia ulun no ninia bokur neʼebé taka rins. 13 Nia tenke fase tee-oan no ain sira ho bee, no amlulik tenke hasaʼe buat hotu neʼe no sunu hodi halo suar iha altár leten. Neʼe mak sakrifísiu sunu nian neʼebé sunu iha ahi no ninia morin halo Jeová kontente.*

14 “‘Maibé se ema ida fó manu nuʼudar sakrifísiu, nia tenke hili manu-lakateu ka manu-pombu oan hodi hasaʼe nuʼudar sakrifísiu sunu nian ba Jeová.+ 15 Amlulik tenke lori manu neʼe ba altár no tesi manu nia ulun no sunu hodi halo suar iha altár leten, maibé tenke husik raan suli iha altár nia sorin. 16 Nia tenke hasai manu nia kakaluk no fulun sira no soe iha altár nia sorin parte leste, iha fatin ahi-kadesan nian.*+ 17 Nia tenke fera manu neʼe ba rua entre ninia liras rua maibé labele tesi kotu. Tuirmai amlulik tenke sunu iha ahi hodi halo suar iha altár leten. Neʼe mak sakrifísiu sunu nian neʼebé sunu iha ahi no ninia morin halo Jeová kontente.*

2 “‘Se ema* ida fó sakrifísiu trigu* nian+ ba Jeová, ninia sakrifísiu neʼe tenke foti husi trigu uut neʼebé diʼak, no nia tenke fui mina iha leten no tau mós olíbanu* iha leten.+ 2 Tuirmai nia tenke lori sakrifísiu neʼe ba Arão nia oan-mane sira neʼebé serbí nuʼudar amlulik, no amlulik sei foti trigu uut neʼebé diʼak liman isin ida hamutuk ho mina no olíbanu, no amlulik sei sunu hodi halo suar iha altár leten atu reprezenta* sakrifísiu neʼe tomak,+ neʼe mak sakrifísiu neʼebé sunu iha ahi no ninia morin halo Jeová kontente.* 3 Buat restu husi sakrifísiu trigu nian sei sai nuʼudar Arão no ninia oan-mane sira-nian,+ neʼe mak buat neʼebé santu liu hotu+ husi sakrifísiu neʼebé sunu iha ahi hodi hasaʼe ba Jeová.

4 “‘Se ema ida fó sakrifísiu trigu nian neʼebé tunu ona iha fornu, sakrifísiu neʼe tenke halo ho trigu uut neʼebé diʼak, katak paun hanesan kelu neʼebé la iha fermentu no kahur ona ho mina ka paun mihis neʼebé la iha fermentu no kose ho mina.+

5 “‘Se ema ida fó sakrifísiu trigu nian neʼebé sona iha besi belar,+ sakrifísiu neʼe tenke halo ho trigu diʼak neʼebé la iha fermentu no kahur ho mina. 6 Tenke silu ida-neʼe ba pedasuk, no tenke fui mina iha leten.+ Neʼe mak sakrifísiu trigu nian.

7 “‘Se ema ida fó sakrifísiu trigu nian neʼebé tunu iha taxu, sakrifísiu neʼe tenke halo husi trigu uut neʼebé diʼak hamutuk ho mina. 8 Nia tenke lori sakrifísiu trigu nian neʼe ba Jeová, no entrega neʼe ba amlulik, no amlulik sei lori neʼe besik altár. 9 Amlulik tenke foti sakrifísiu trigu nian balu no sunu hodi halo suar iha altár leten atu reprezenta* sakrifísiu neʼe tomak,+ neʼe mak sakrifísiu neʼebé sunu iha ahi no ninia morin halo Jeová kontente.*+ 10 Buat restu husi sakrifísiu trigu nian sei sai nuʼudar Arão no ninia oan-mane sira-nian, neʼe mak buat neʼebé santu liu hotu husi sakrifísiu neʼebé sunu iha ahi hodi hasaʼe ba Jeová.+

11 “‘Sakrifísiu trigu nian hotu neʼebé imi fó ba Jeová labele iha fermentu,+ tanba imi labele sunu fermentu* ka bani-been atu halo suar atu sai nuʼudar sakrifísiu neʼebé sunu iha ahi hodi hasaʼe ba Jeová.

12 “‘Imi bele fó buat sira-neʼe ba Jeová nuʼudar sakrifísiu ai-han primeiru nian,+ maibé imi keta sunu neʼe iha altár hodi hasai morin neʼebé halo Maromak kontente.*

13 “‘Imi mós tenke tau masin ba sakrifísiu trigu nian hotu neʼebé imi fó; no imi labele haluha atu tau masin ba sakrifísiu trigu nian no masin neʼe sei fó-hanoin imi kona-ba Maromak nia aliansa. Imi tenke tau masin ba imi-nia sakrifísiu hotu.+

14 “‘Se imi fó sakrifísiu trigu nian ba Jeová husi trigu* primeiru, imi tenke fó trigu foun* neʼebé sona ona iha ahi no deʼut ona,* no neʼe mak sakrifísiu trigu nian husi rezultadu primeiru husi imi-nia toʼos.+ 15 Imi tenke tau mina no olíbanu iha leten. Neʼe mak sakrifísiu trigu nian. 16 Amlulik tenke sunu sakrifísiu balu hodi halo suar atu reprezenta* sakrifísiu neʼe tomak,+ neʼe katak sunu trigu* balu neʼebé deʼut ona hodi kahur ho mina hamutuk ho olíbanu hotu, neʼe mak sakrifísiu neʼebé sunu iha ahi hodi hasaʼe ba Jeová.

3 “‘Se ema ida fó karau nuʼudar sakrifísiu dame nian+ iha Jeová nia oin, maski nia fó karau-aman ka karau-inan, nia tenke fó karau neʼebé la iha moras. 2 Nia tenke tau liman ba karau nia ulun, katak karau neʼebé nia fó nuʼudar sakrifísiu. Tuirmai tenke oho karau neʼe iha odamatan ba tenda reuniaun nian; no Arão nia oan-mane sira neʼebé serbí nuʼudar amlulik tenke hisik karau neʼe nia raan iha altár nia sorin hotu. 3 Nia tenke fó parte balu husi sakrifísiu dame nian atu sunu iha ahi nuʼudar sakrifísiu ba Jeová.+ Parte neʼebé nia tenke fó mak bokur+ neʼebé taka tee-oan, bokur hotu neʼebé haleʼu tee-oan, 4 no rins rua ho bokur neʼebé taka rins sira-neʼe neʼebé besik knotak. Nia mós tenke hasai bokur neʼebé taka aten hamutuk ho rins sira.+ 5 Arão nia oan-mane sira tenke sunu buat hotu neʼe hodi halo suar iha altár leten hamutuk ho sakrifísiu sunu nian neʼebé tau ona iha ai nia leten, ai neʼebé lakan iha altár leten;+ neʼe mak sakrifísiu neʼebé sunu iha ahi no ninia morin halo Jeová kontente.*+

6 “‘Se ema ida fó bibi-malae ka bibi-timur nuʼudar sakrifísiu dame nian ba Jeová, nia tenke fó bibi-aman ka bibi-inan neʼebé la iha moras.+ 7 Se nia fó bibi-malae aman* nuʼudar sakrifísiu, nia tenke lori bibi neʼe ba Jeová nia oin. 8 Nia tenke tau liman iha bibi nia ulun, katak bibi neʼebé nia fó nuʼudar sakrifísiu. Tuirmai tenke oho bibi neʼe iha tenda reuniaun nia oin. Arão nia oan-mane sira tenke hisik bibi neʼe nia raan iha altár nia sorin hotu. 9 Nia tenke fó naʼan bokur husi sakrifísiu dame nian no sunu iha ahi hodi hasaʼe ba Jeová.+ Nia tenke hasai bibi nia ikun neʼebé bokur besik ruin kotuk, bokur neʼebé taka tee-oan, bokur hotu neʼebé haleʼu tee-oan, 10 no rins rua ho bokur neʼebé taka rins sira-neʼe neʼebé besik knotak. Nia mós tenke hasai bokur neʼebé taka aten hamutuk ho rins sira.+ 11 No amlulik tenke sunu buat hotu neʼe hodi halo suar iha altár leten nuʼudar ai-han,* neʼe mak sakrifísiu neʼebé sunu iha ahi hodi hasaʼe ba Jeová.+

12 “‘Se ema ida fó bibi-timur ida nuʼudar sakrifísiu, nia sei lori bibi neʼe ba Jeová nia oin. 13 Nia tenke tau liman iha bibi-timur neʼe nia ulun. Tuirmai tenke oho bibi neʼe iha tenda reuniaun nia oin. Arão nia oan-mane sira tenke hisik bibi neʼe nia raan iha altár nia sorin hotu. 14 Parte neʼebé nia tenke fó atu sunu iha ahi hodi hasaʼe ba Jeová mak bokur neʼebé taka tee-oan, bokur hotu neʼebé haleʼu tee-oan,+ 15 no rins rua ho bokur neʼebé taka rins sira-neʼe neʼebé besik knotak. Nia mós tenke hasai bokur neʼebé taka aten hamutuk ho rins sira. 16 Amlulik tenke sunu buat hotu neʼe hodi halo suar iha altár leten nuʼudar ai-han,* neʼe mak sakrifísiu neʼebé sunu iha ahi no ninia morin halo Maromak kontente.* Naʼan bokur hotu mak Jeová nian.+

17 “‘Neʼe mak ukun-fuan ba nafatin ba imi-nia jerasaun hotu, iha fatin hotu neʼebé imi hela bá: Imi labele han naʼan bokur no labele han raan.’”+

4 Jeová dehan tan ba Moisés: 2 “Hatete ba ema Izraél: ‘Se ema* ida halo sala la ho neon+ hodi halo buat neʼebé Jeová bandu, nia tenke halo buat tuirmai neʼe:

3 “‘Se amlulik* ida neʼebé hili* tiha ona+ mak halo sala+ no lori sala ba povu neʼe, entaun nia tenke fó karau-aman* ida neʼebé la iha moras ba Jeová nuʼudar sakrifísiu sala nian tanba ninia sala neʼe.+ 4 Nia tenke lori karau-aman neʼe ba odamatan tenda reuniaun nian+ iha Jeová nia oin no nia tenke tau liman ba karau-aman neʼe nia ulun, no nia tenke oho karau-aman neʼe iha Jeová nia oin.+ 5 Tuirmai, amlulik neʼebé hili* tiha ona+ sei foti karau-aman neʼe nia raan balu no lori tama ba tenda reuniaun nian; 6 no amlulik neʼe tenke hatama nia liman-fuan ba raan+ no hisik raan balu ba dala hitu+ iha Jeová nia oin, katak iha kortina nia oin iha fatin santu. 7 Tuirmai, amlulik mós tenke kose raan balu iha dikur sira neʼebé iha altár insensu morin nian+ neʼebé iha Jeová nia oin iha tenda reuniaun laran; no nia tenke fakar hotu karau-aman nia raan restu iha altár hun,+ katak altár ba sakrifísiu sunu nian, neʼebé iha odamatan ba tenda reuniaun nian.

8 “‘Tuirmai nia tenke hasai naʼan bokur hotu husi karau-aman neʼebé hasaʼe nuʼudar sakrifísiu sala nian, inklui bokur neʼebé taka tee-oan no bokur neʼebé haleʼu tee-oan, 9 no rins rua ho bokur neʼebé taka rins sira-neʼe neʼebé besik knotak. Nia mós tenke hasai bokur neʼebé taka aten hamutuk ho rins sira.+ 10 Nia tenke hasai buat hotu neʼe hanesan nia mós halo ho karau-aman neʼebé hasaʼe nuʼudar sakrifísiu dame nian.+ Amlulik tenke sunu buat hotu neʼe hodi halo suar iha altár ba sakrifísiu sunu nian.

11 “‘Maibé kona-ba karau-aman nia kulit no isin hamutuk ho ninia ulun, ain, tee-oan no ninia teen,+ 12 neʼe katak karau-aman tomak, nia tenke lori ba povu nia hela-fatin nia liʼur, iha fatin neʼebé moos, fatin neʼebé soe ahi-kadesan,* no nia tenke sunu buat hotu neʼe iha ai leten.+ Nia tenke sunu buat sira-neʼe iha fatin neʼebé soe ahi-kadesan.

13 “‘Se povu Izraél tomak hetan sala tanba halo sala ruma la ho neon,+ maibé kongregasaun* la hatene katak sira halo ona buat neʼebé Jeová bandu,+ 14 no bainhira hatene ona sala neʼe, kongregasaun tenke fó karau-aman* nuʼudar sakrifísiu sala nian no lori karau neʼe ba tenda reuniaun nia oin. 15 Povu nia katuas sira tenke tau sira-nia liman ba karau-aman neʼe nia ulun iha Jeová nia oin, no tenke oho karau-aman neʼe iha Jeová nia oin.

16 “‘Amlulik neʼebé hili* tiha ona tenke lori karau-aman nia raan balu ba tenda reuniaun nia laran. 17 Amlulik neʼe tenke hatama nia liman-fuan ba raan no hisik raan balu ba dala hitu iha Jeová nia oin, katak iha kortina nia oin.+ 18 Nia mós tenke kose raan balu iha dikur sira iha altár+ neʼebé iha Jeová nia oin, neʼebé iha tenda reuniaun laran; no nia tenke fakar hotu karau-aman neʼe nia raan restu iha altár hun, katak altár ba sakrifísiu sunu nian neʼebé iha odamatan ba tenda reuniaun nian.+ 19 Nia tenke hasai naʼan bokur hotu husi karau neʼe no tenke sunu hodi halo suar iha altár leten.+ 20 Nia tenke hasai buat hotu neʼe hanesan nia mós halo ho karau-aman neʼebé hasaʼe nuʼudar sakrifísiu sala nian. Amlulik tenke halo nuneʼe hodi hamoos povu nia sala,+ no povu sei hetan perdua. 21 Nia tenke haruka ema atu lori karau-aman neʼe ba povu nia hela-fatin nia liʼur no sunu, hanesan nia sunu karau-aman ida uluk.+ Neʼe mak sakrifísiu sala nian ba kongregasaun.+

22 “‘Kuandu xefe ida+ halo sala la ho neon hodi halo buat neʼebé Jeová, ninia Maromak, bandu no nia hetan sala kona-ba neʼe, 23 ka se nia hatene ona kona-ba sala neʼebé nia halo hodi kontra Maromak nia ukun-fuan, nia tenke lori bibi-timur oan* ida neʼebé la iha moras nuʼudar ninia sakrifísiu. 24 Nia tenke tau liman iha bibi-timur neʼe nia ulun no tenke oho iha fatin neʼebé baibain oho sakrifísiu sunu nian iha Jeová nia oin.+ Neʼe mak sakrifísiu sala nian. 25 Amlulik tenke foti raan balu husi sakrifísiu sala nian ho ninia liman-fuan no kose iha dikur sira+ neʼebé iha altár ba sakrifísiu sunu nian, no nia tenke fakar raan restu iha altár hun, katak altár ba sakrifísiu sunu nian.+ 26 Nia tenke foti bibi neʼe nia bokur hotu no sunu hodi halo suar iha altár nia leten, hanesan nia halo ho naʼan bokur husi sakrifísiu dame nian.+ Amlulik tenke halo nuneʼe hodi hamoos ema neʼe nia sala, no nia sei hetan perdua.

27 “‘Se ema* ida iha povu nia leet halo sala la ho neon no hetan sala tanba halo buat neʼebé Jeová bandu,+ 28 ka se nia hatene ona kona-ba sala neʼebé nia halo, nia tenke lori bibi-timur inan* ida neʼebé la iha moras nuʼudar ninia sakrifísiu ba sala neʼebé nia halo ona. 29 Nia tenke tau liman iha bibi-timur neʼe nia ulun, katak bibi neʼebé nia fó nuʼudar sakrifísiu sala nian, no tenke oho bibi neʼe iha fatin neʼebé oho animál ba sakrifísiu sunu nian.+ 30 Amlulik tenke foti raan balu ho ninia liman-fuan no kose iha dikur sira neʼebé iha altár ba sakrifísiu sunu nian, no nia tenke fakar hotu bibi neʼe nia raan restu iha altár hun.+ 31 Nia tenke hasai naʼan bokur hotu+ husi bibi neʼe hanesan nia hasai naʼan bokur husi animál ba sakrifísiu dame nian,+ no amlulik tenke sunu buat hotu neʼe hodi halo suar iha altár leten no ninia morin halo Jeová kontente.* Amlulik tenke halo nuneʼe hodi hamoos ema neʼe nia sala, no nia sei hetan perdua.

32 “‘Maibé se nia fó bibi-malae oan nuʼudar ninia sakrifísiu sala nian, nia tenke lori bibi-malae inan* ida neʼebé la iha moras. 33 Nia tenke tau liman iha bibi-malae neʼe nia ulun, katak bibi neʼebé nia fó nuʼudar sakrifísiu sala nian, no oho bibi neʼe nuʼudar sakrifísiu sala nian iha fatin neʼebé baibain oho animál ba sakrifísiu sunu nian.+ 34 Amlulik tenke foti raan balu husi sakrifísiu sala nian ho ninia liman-fuan no kose iha dikur sira neʼebé iha altár ba sakrifísiu sunu nian,+ no nia tenke fakar hotu bibi neʼe nia raan restu iha altár hun. 35 Nia tenke hasai hotu naʼan bokur husi bibi neʼe hanesan nia hasai naʼan bokur husi bibi-malae aman* ba sakrifísiu dame nian, no amlulik tenke sunu buat hotu neʼe hodi halo suar iha altár leten, hamutuk ho sakrifísiu sira neʼebé sunu iha ahi hodi hasaʼe ba Jeová.+ Amlulik tenke halo nuneʼe hodi hamoos ema neʼe nia sala, no nia sei hetan perdua.+

5 “‘Se ema* ida haree ka hatene kona-ba sala ruma, entaun nia mak sai sasin.+ Nuneʼe se nia rona tiha avizu* iha ema barak nia oin atu fó sasin hasoru ema neʼebé halo sala neʼe, maibé nia la fó sai kona-ba neʼe, nia halo ona sala. Nia tenke hatán ba ninia sala.

2 “‘Ka se ema* ida kona buat naran deʼit neʼebé la moos,* maski kona mate-isin husi animál fuik neʼebé la moos, animál-hakiak neʼebé la moos, ka animál kiʼik sira* neʼebé la moos,+ ema neʼe sei sai la moos no hetan ona sala maski nia rasik la hatene kona-ba neʼe. 3 Ka se ema ida la ho neon kona ema ruma neʼebé la moos+ ka kona buat ruma neʼebé bele halo nia sai la moos, no ikusmai nia hatene kona-ba neʼe, nia halo ona sala.

4 “‘Ka se ema* ida jura ho ansi atu halo buat ruma, maski nia jura atu halo diʼak ka halo aat, ka halo buat naran deʼit, maibé ikusmai se nia hatene katak nia jura ho ansi, nia halo ona sala.*+

5 “‘Se nia hetan sala kona-ba buat sira-neʼe ida, entaun nia tenke fó sai sala neʼebé nia halo ona.+ 6 Nia mós tenke lori ninia sakrifísiu taka sala nian ba Jeová tanba sala neʼebé nia halo ona;+ nia tenke fó bibi-inan ida nuʼudar sakrifísiu sala nian, nia bele fó bibi-malae inan ka bibi-timur inan.* Ho sakrifísiu neʼe mak amlulik sei hamoos ninia sala.

7 “‘Maibé se nia kbiit la toʼo atu fó bibi-malae ida, nia tenke lori manu-lakateu rua ka manu-pombu oan rua+ ba Jeová nuʼudar sakrifísiu taka sala nian; manu ida ba sakrifísiu sala nian no manu ida seluk ba sakrifísiu sunu nian.+ 8 Nia tenke lori manu sira-neʼe ba amlulik, no amlulik tenke hasaʼe manu ida nuʼudar sakrifísiu sala nian no koʼa manu neʼe ninia kakorok, maibé la halo kotu manu nia ulun. 9 Nia tenke hisik raan balu husi sakrifísiu sala nian iha altár nia sorin, maibé nia tenke fakar hotu raan restu iha altár hun.+ Neʼe mak sakrifísiu sala nian. 10 Nia sei hasaʼe manu ida seluk nuʼudar sakrifísiu sunu nian tuir ukun-fuan neʼebé iha ona.+ Amlulik tenke halo nuneʼe hodi hamoos ema neʼe nia sala, no ema neʼe sei hetan perdua.+

11 “‘Maibé se nia kbiit la toʼo atu fó manu-lakateu rua ka manu-pombu oan rua, nia tenke lori trigu uut neʼebé diʼak gomor isin ida*+ nuʼudar sakrifísiu sala nian. Nia labele aumenta mina ka olíbanu* ba trigu neʼe, tanba neʼe mak sakrifísiu sala nian. 12 Nia tenke lori trigu neʼe ba amlulik, no amlulik tenke foti trigu liman isin ida atu reprezenta* sakrifísiu neʼe tomak no nia tenke sunu hodi halo suar iha altár leten hanesan sakrifísiu sira neʼebé sunu iha ahi hodi hasaʼe ba Jeová. Neʼe mak sakrifísiu sala nian. 13 Amlulik tenke halo nuneʼe hodi hamoos ema neʼe nia sala, no ema neʼe sei hetan perdua.+ Trigu restu husi sakrifísiu neʼe sei sai amlulik nian,+ hanesan mós ho sakrifísiu trigu* nian.’”+

14 Jeová koʼalia tan ba Moisés, hodi dehan: 15 “Se ema* ida la hatudu laran-metin hodi halo sala la ho neon kona-ba buat santu* ba Jeová,+ nia tenke lori bibi-malae aman ida neʼebé la iha moras ba Jeová hodi sai nuʼudar sakrifísiu taka sala nian;+ no bibi neʼe nia folin tenke tuir osan-mutin* neʼebé amlulik deside ona. No osan-mutin neʼe tenke tetu tuir dasin-fuan husi fatin santu.*+ 16 Nia tenke selu multa ba sala neʼebé nia halo hasoru fatin santu no nia mós tenke aumenta porsentu ruanulu ba folin neʼe.+ Nia sei entrega neʼe ba amlulik, atu nuneʼe liuhusi bibi-malae aman neʼebé nia fó nuʼudar sakrifísiu taka sala nian, amlulik bele hamoos ema neʼe nia sala,+ no nia sei hetan perdua.+

17 “Se ema* ida halo sala tanba halo buat neʼebé Jeová bandu, maski nia halo neʼe ho neon ka lae, nia hetan ona sala no nia sei hatán ba ninia sala neʼe.+ 18 Nia tenke lori bibi-malae aman ida neʼebé la iha moras hodi tuir folin neʼebé amlulik deside ona ba nia nuʼudar sakrifísiu taka sala nian.+ Ho sakrifísiu neʼe mak amlulik sei hamoos sala neʼebé ema neʼe halo la ho neon, no nia sei hetan perdua. 19 Neʼe mak sakrifísiu taka sala nian tanba ema neʼe halo duni sala kontra Jeová.”

6 Jeová dehan tan ba Moisés: 2 “Se ema* ida halo sala no la hatudu laran-metin ba Jeová+ hodi lohi ninia maluk kona-ba buat neʼebé ninia maluk entrega ba nia atu tau matan,+ ka buat neʼebé ninia maluk husik ho nia, ka nia naʼok ka lohi hodi hamatak ninia maluk, 3 ka se nia hetan buat ruma no la fó fali ba ninia naʼin no bosok kona-ba neʼe, no se nia jura falsu kona-ba sala sira neʼebé nia halo,+ nia tenke halo buat tuirmai neʼe: 4 Se nia halo sala, nia tenke fó fali buat neʼebé nia naʼok, buat neʼebé nia hetan hodi hamatak ema, buat neʼebé nia foti hodi lohi ema, buat neʼebé entrega ba nia atu tau matan, ka buat neʼebé lakon no nia hetan fali, 5 ka buat neʼebé nia jura falsu, nia tenke selu fali ida-neʼe,+ no nia tenke aumenta tan porsentu ruanulu ba folin neʼebé nia selu. Nia tenke fó fali neʼe ba sasán nia naʼin iha loron neʼebé ema hatene ninia sala neʼe. 6 No nia tenke lori bibi-malae aman ida neʼebé la iha moras ba amlulik hodi hasaʼe nuʼudar sakrifísiu taka sala nian ba Jeová, hodi tuir folin neʼebé amlulik deside ona nuʼudar sakrifísiu taka sala nian.+ 7 Ho ida-neʼe, amlulik sei hamoos ema neʼe nia sala iha Jeová nia oin, no nia sei hetan perdua ba sala naran deʼit neʼebé nia halo.”+

8 Jeová dehan tan ba Moisés: 9 “Fó orden ba Arão no ninia oan-mane sira, hodi dehan: ‘Ukun-fuan kona-ba sakrifísiu sunu nian mak tuirmai neʼe:+ Imi tenke husik sakrifísiu sunu nian iha altár leten ba kalan tomak toʼo dadeer, no ahi tenke lakan nafatin iha altár neʼe. 10 Amlulik tenke uza roupa espesiál neʼebé halo husi hena-liñu,+ no uza mós kalsa badak*+ neʼebé halo husi hena-liñu. Tuirmai nia tenke hasai ahi-kadesan*+ husi sakrifísiu sunu nian neʼebé ahi han ona iha altár leten no tau ahi-kadesan neʼe iha altár sorin. 11 Depois neʼe, nia tenke hasai ninia roupa neʼe+ no uza fali roupa seluk no nia sei lori ahi-kadesan neʼe ba fatin neʼebé moos iha povu nia hela-fatin nia liʼur.+ 12 Ahi iha altár neʼe tenke lakan nafatin. Ahi neʼe labele mate. Amlulik tenke sunu ai+ iha altár leten dadeer-dadeer no tau sakrifísiu sunu nian iha leten, no nia tenke sunu naʼan bokur husi animál ba sakrifísiu dame nian hodi halo suar iha altár neʼe nia leten.+ 13 Ahi iha altár neʼe tenke lakan nafatin. Ahi neʼe labele mate.

14 “‘Neʼe mak ukun-fuan kona-ba sakrifísiu trigu* nian:+ Imi Arão nia oan-mane sira, imi mak tenke lori sakrifísiu neʼe ba altár iha Jeová nia oin. 15 Arão nia oan-mane ida sei foti trigu uut neʼebé diʼak liman isin ida husi sakrifísiu trigu nian no ho ninia mina balu no olíbanu* hotu, no nia tenke sunu buat hotu neʼe hodi halo suar iha altár leten atu reprezenta* sakrifísiu neʼe tomak no ninia morin halo Jeová kontente.*+ 16 Arão no ninia oan-mane sira tenke han buat neʼebé restu.+ Sira tenke halo ida-neʼe nuʼudar paun neʼebé la iha fermentu no han iha área santu. Sira tenke han iha pátiu* ba tenda reuniaun nian.+ 17 Labele tunu sakrifísiu neʼe hodi uza fermentu.+ Haʼu fó ida-neʼe ba sira nuʼudar sira-nia parte husi haʼu-nia sakrifísiu neʼebé sunu iha ahi.+ Neʼe mak buat neʼebé santu liu hotu,+ hanesan ho sakrifísiu sala nian no sakrifísiu taka sala nian. 18 Mane hotu husi Arão nia umakain sei han ida-neʼe.+ Neʼe mak sira-nia parte ba nafatin husi Jeová nia sakrifísiu neʼebé sunu iha ahi iha imi-nia jerasaun hotu.+ Buat hotu neʼebé kona sakrifísiu sira-neʼe sei sai santu.’”

19 Jeová dehan tan ba Moisés: 20 “Arão no ninia oan-mane sira tenke fó sakrifísiu ba Jeová iha loron neʼebé Arão simu knaar nuʼudar amlulik.+ Sakrifísiu mak tuirmai neʼe: sira tenke fó nafatin trigu uut neʼebé diʼak gomor isin ida*+ nuʼudar sakrifísiu trigu nian,+ sira tenke hasaʼe trigu sorin balun iha dadeer no sorin balun iha kalan. 21 Trigu neʼe tenke kahur ho mina no tunu iha besi belar.+ Sakrifísiu trigu nian neʼe tenke kahur didiʼak ho mina, no silu neʼe ba pedasuk nuʼudar buat neʼebé tunu ona, no hasaʼe neʼe nuʼudar buat morin neʼebé halo Jeová kontente.* 22 Amlulik neʼebé hili* ona husi Arão nia oan-mane sira-nia leet hodi troka Arão mak sei hasaʼe sakrifísiu neʼe.+ Sakrifísiu neʼe tenke hasaʼe tomak no sunu hodi halo suar ba Jeová. Neʼe mak ukun-fuan ba nafatin. 23 Amlulik nia sakrifísiu trigu nian hotu tenke sai nuʼudar sakrifísiu neʼebé hasaʼe tomak. Ema labele han ida-neʼe.”

24 Jeová koʼalia tan ba Moisés, hodi dehan: 25 “Hatete ba Arão no ninia oan-mane sira: ‘Tuirmai neʼe mak ukun-fuan kona-ba sakrifísiu sala nian:+ Imi tenke oho animál ba sakrifísiu sala nian iha fatin+ neʼebé imi oho animál ba sakrifísiu sunu nian iha Jeová nia oin. Neʼe mak buat neʼebé santu liu hotu. 26 Amlulik neʼebé hasaʼe sakrifísiu neʼe hodi hamoos sala mak sei han naʼan neʼe.+ Nia sei han neʼe iha área santu, iha pátiu tenda reuniaun nian.+

27 “‘Buat hotu neʼebé kona naʼan husi sakrifísiu neʼe sei sai santu, no kuandu ema ida hisik raan balu husi sakrifísiu neʼe no raan neʼe kona ninia roupa, imi tenke fase roupa neʼe iha área santu. 28 Sanan-rai neʼebé uza atu daʼan naʼan neʼe tenke halo rahun tiha. Maibé se naʼan neʼe daʼan iha sanan husi riti, entaun sanan neʼe tenke kose ho didiʼak no fase ho bee.

29 “‘Mane hotu neʼebé serbí nuʼudar amlulik mak tenke han ida-neʼe.+ Neʼe mak buat neʼebé santu liu hotu.+ 30 Maibé, keta han naʼan husi animál ba sakrifísiu sala nian se ninia raan lori ona ba tenda reuniaun nian atu hamoos sala iha fatin santu.+ Naʼan neʼe tenke sunu tiha.

7 “‘Ukun-fuan kona-ba sakrifísiu taka sala nian mak tuirmai neʼe:+ Neʼe mak buat neʼebé santu liu hotu. 2 Sira tenke oho animál ba sakrifísiu taka sala nian iha fatin neʼebé sira oho animál ba sakrifísiu sunu nian, no animál neʼe nia raan+ tenke hisik haleʼu altár nia sorin hotu.+ 3 Nia tenke fó animál neʼe nia bokur hotu,+ inklui animál nia ikun neʼebé bokur, bokur neʼebé taka tee-oan, 4 no rins rua ho bokur neʼebé taka rins sira-neʼe neʼebé besik knotak. Nia mós tenke hasai bokur neʼebé taka aten hamutuk ho rins sira.+ 5 Amlulik tenke sunu buat hotu neʼe hodi halo suar iha altár leten nuʼudar sakrifísiu neʼebé sunu iha ahi hodi hasaʼe ba Jeová.+ Neʼe mak sakrifísiu taka sala nian. 6 Mane hotu neʼebé serbí nuʼudar amlulik tenke han naʼan neʼe+ iha área santu. Naʼan neʼe mak buat neʼebé santu liu hotu.+ 7 Iha ukun-fuan ida deʼit ba sakrifísiu sala nian no sakrifísiu taka sala nian; no amlulik neʼebé hasaʼe sakrifísiu neʼe atu hamoos sala mak sei simu naʼan neʼe nuʼudar ninian.+

8 “‘Kuandu amlulik hasaʼe sakrifísiu sunu nian ba ema ida, animál nia kulit+ husi sakrifísiu sunu nian neʼebé fó ona ba amlulik sei sai ninian.

9 “‘Amlulik neʼebé hasaʼe sakrifísiu trigu* nian neʼebé tunu iha fornu, taxu ka besi belar,+ sakrifísiu sira-neʼe hotu sei sai ninian.+ 10 Maibé kona-ba sakrifísiu trigu nian hotu neʼebé kahur ona ho mina+ ka maran deʼit+ sei sai nuʼudar Arão nia oan-mane sira-nian; sira ida-idak sei hetan parte neʼebé hanesan.

11 “‘Neʼe mak ukun-fuan kona-ba sakrifísiu dame nian+ neʼebé ema sei hasaʼe ba Jeová: 12 Se ema ruma fó sakrifísiu neʼe atu hatudu agradese,+ nia tenke lori sakrifísiu neʼe hamutuk ho paun hanesan kelu neʼebé la iha fermentu no kahur ona ho mina, no paun mihis neʼebé la iha fermentu neʼebé kose ho mina, no paun hanesan kelu neʼebé halo husi trigu uut neʼebé diʼak, neʼebé kahur ona ho mina. 13 Nia tenke fó paun hanesan kelu neʼebé iha fermentu hamutuk ho ninia sakrifísiu dame nian hodi hatudu agradese. 14 Nia tenke fó paun fuan ida husi paun oioin* neʼebé nuʼudar parte sagradu ba Jeová; ida-neʼe sei sai amlulik nian, katak amlulik neʼebé hisik raan husi animál ba sakrifísiu dame nian.+ 15 Kona-ba naʼan husi animál ba sakrifísiu dame nian neʼebé nia hasaʼe hodi hatudu agradese, nia tenke han iha loron neʼebé hasaʼe sakrifísiu neʼe. Nia labele rai buat ida toʼo dadeer.+

16 “‘Se ninia sakrifísiu neʼe mak sakrifísiu juramentu nian+ ka sakrifísiu neʼebé nia fó ho hakarak rasik,+ entaun nia tenke han ida-neʼe iha loron neʼebé hasaʼe sakrifísiu neʼe, no buat neʼebé restu husi sakrifísiu neʼe bele han iha loron tuirmai. 17 Maibé naʼan restu husi sakrifísiu neʼe tenke sunu tiha iha loron terseiru.+ 18 Maibé, se nia han naʼan husi sakrifísiu dame nian iha loron terseiru, Maromak sei la simu ema neʼebé fó sakrifísiu neʼe. Sakrifísiu neʼe sei la lori buat diʼak ba nia; neʼe mak buat neʼebé Maromak hakribi, no ema* neʼebé han naʼan neʼe tenke hatán ba ninia sala.+ 19 Labele han naʼan neʼebé kona ona buat neʼebé la moos. Naʼan neʼe tenke sunu tiha. Ema neʼebé moos sei han naʼan neʼebé moos.

20 “‘Maibé ema* neʼebé la moos no han naʼan husi sakrifísiu dame nian neʼebé hasaʼe ona ba Jeová, ema* neʼe tenke mate hodi halakon husi povu nia leet.+ 21 Se ema* ruma kona ona buat neʼebé la moos, maski nia kona ema neʼebé la moos+ ka animál neʼebé la moos,+ ka buat naran deʼit neʼebé la moos,+ maibé nia han naʼan balu husi sakrifísiu dame nian neʼebé hasaʼe ona ba Jeová, ema* neʼe tenke mate hodi halakon husi povu nia leet.’”

22 Jeová dehan tan ba Moisés: 23 “Hatete ba ema Izraél: ‘Imi labele han naʼan bokur+ husi karau-aman, ka bibi-malae aman* ka bibi-timur. 24 Imi bele uza naʼan bokur husi animál neʼebé mate mesak deʼit no naʼan bokur husi animál neʼebé animál seluk oho ba buat naran deʼit, maibé imi labele han ida-neʼe.+ 25 Tanba ema naran deʼit neʼebé han naʼan bokur husi animál neʼebé sunu iha ahi hodi hasaʼe nuʼudar sakrifísiu ba Jeová, ema neʼe tenke mate hodi halakon husi povu nia leet.

26 “‘Imi labele han raan+ iha fatin hotu neʼebé imi hela bá, maski manu nia raan ka animál sira seluk nia raan. 27 Ema* naran deʼit neʼebé han raan, ema neʼe tenke mate+ hodi halakon husi povu nia leet.’”

28 Jeová dehan tan ba Moisés: 29 “Hatete ba ema Izraél: ‘Ema naran deʼit neʼebé hasaʼe sakrifísiu dame nian ba Jeová tenke lori parte balu husi sakrifísiu neʼe ba Jeová.+ 30 Nia tenke lori animál nia bokur+ iha nia liman rasik hamutuk ho animál nia hirus-matan nuʼudar sakrifísiu neʼebé sunu iha ahi hodi hasaʼe ba Jeová, no nia sei book buat sira-neʼe bá-mai nuʼudar sakrifísiu doko bá-mai nian+ iha Jeová nia oin. 31 Amlulik tenke sunu naʼan bokur hodi halo suar iha altár leten,+ maibé animál nia hirus-matan sei sai Arão nian no ninia oan-mane sira-nian.+

32 “‘Imi-nia animál neʼebé imi hasaʼe nuʼudar sakrifísiu dame nian,+ imi tenke fó animál neʼe nia kelen sorin loos nuʼudar parte sagradu ba amlulik. 33 Arão nia oan-mane neʼebé hasaʼe raan husi sakrifísiu dame nian no mós animál nia bokur, nia sei simu naʼan kelen sorin loos nuʼudar ninian.+ 34 Tanba haʼu foti ona animál nia hirus-matan husi sakrifísiu doko bá-mai nian no mós naʼan kelen neʼebé nuʼudar parte sagradu husi sakrifísiu dame nian, no haʼu foti buat sira-neʼe husi ema Izraél no fó ba amlulik Arão no ninia oan-mane sira. Neʼe mak ukun-fuan ba nafatin ba ema Izraél.+

35 “‘Neʼe mak parte balu neʼebé haketak husi Jeová nia sakrifísiu neʼebé sunu iha ahi hodi fó ba amlulik sira, ba Arão no ninia oan-mane sira, iha loron neʼebé nia hili sira atu serbí nuʼudar amlulik ba Jeová.+ 36 Jeová haruka ema Izraél atu fó parte neʼe ba sira iha loron neʼebé nia hili* sira nuʼudar amlulik.+ Neʼe mak ukun-fuan ba nafatin iha sira-nia jerasaun sira.’”

37 Neʼe mak ukun-fuan kona-ba sakrifísiu sunu nian,+ sakrifísiu trigu nian,+ sakrifísiu sala nian,+ sakrifísiu taka sala nian,+ sakrifísiu ordenasaun nian,+ no sakrifísiu dame nian,+ 38 hodi tuir mandamentu neʼebé Jeová fó ba Moisés iha Foho Sinai+ iha loron neʼebé nia haruka ema Izraél atu hasaʼe sira-nia sakrifísiu ba Jeová iha rai-fuik Sinai.+

8 Jeová koʼalia tan ba Moisés, hodi dehan: 2 “Lori Arão ho ninia oan-mane sira,+ no lori mós roupa amlulik nian,+ mina santu,*+ karau-aman ba sakrifísiu sala nian, bibi-malae aman rua, no paun neʼebé la iha fermentu raga ida,+ 3 no halibur povu hotu hamutuk iha odamatan ba tenda reuniaun nian.”

4 Tuirmai Moisés halo tuir duni mandamentu neʼebé Jeová fó sai ona ba nia, no povu hotu halibur hamutuk iha odamatan ba tenda reuniaun nian. 5 Moisés dehan ba povu: “Neʼe mak Jeová nia mandamentu neʼebé ita tenke halo tuir.” 6 Nuneʼe Moisés haruka Arão no ninia oan-mane sira hakbesik mai no fase sira ho bee.+ 7 Depois neʼe, Moisés tau unuk+ ba Arão, kesi sintu hena+ ba nia, tau roupa neʼebé la iha liman+ ba nia, no tau mós efod*+ ba nia, no kesi neʼe ho sintu efod nian+ hodi hametin efod neʼe ba ninia isin. 8 Tuirmai Moisés tara bornál kiʼik*+ iha Arão nia hirus-matan no tau Urim ho Tumim*+ iha bornál laran. 9 Moisés tau turbante*+ iha Arão nia ulun, no nia tau osan-mean belar neʼebé nabilan iha turbante neʼe nia oin, katak sinál santu dedikasaun nian,*+ hodi tuir mandamentu neʼebé Jeová fó sai ona ba Moisés.

10 Tuirmai Moisés foti mina santu no fui mina neʼe ba tenda santu* no ba buat hotu neʼebé iha tenda laran+ hodi halo santu buat sira-neʼe. 11 Moisés hisik mina santu balu ba dala hitu iha altár no fui mina ba altár nia sasán hotu no ba basia boot no fatin atu hatuur basia neʼe hodi halo santu buat sira-neʼe. 12 Ikusliu nia fui mina santu balu ba Arão nia ulun hodi hili nia nuʼudar amlulik no halo nia santu.*+

13 Tuirmai Moisés haruka Arão nia oan-mane sira hakbesik mai no fó-hatais roupa ba sira no kesi sintu husi hena ba sira no tau* xapeu husi hena ba sira-nia ulun,+ hodi tuir mandamentu neʼebé Jeová fó sai ona ba Moisés.

14 Moisés lori karau-aman ba sakrifísiu sala nian, no Arão ho ninia oan-mane sira tau liman ba karau-aman neʼe nia ulun.+ 15 Moisés oho karau neʼe no foti ninia raan+ ho liman-fuan no kose iha altár nia dikur sira hotu, no nia hamoos altár neʼe husi sala, maibé nia fakar raan restu iha altár hun. Hodi nuneʼe, nia halo santu no hamoos altár neʼe. 16 Depois neʼe, Moisés foti karau nia bokur hotu neʼebé taka tee-oan, bokur neʼebé taka aten, no rins rua ho bokur neʼebé taka rins sira-neʼe, no nia sunu buat hotu neʼe hodi halo suar iha altár leten.+ 17 Nia foti naʼan seluk husi karau-aman neʼe, hanesan ninia kulit, isin, no teen, no sunu neʼe iha povu nia hela-fatin nia liʼur,+ hodi tuir mandamentu neʼebé Jeová fó sai ona ba Moisés.

18 Tuirmai Moisés lori bibi-malae aman ba sakrifísiu sunu nian, no Arão ho ninia oan-mane sira tau liman ba bibi-malae aman neʼe nia ulun.+ 19 Depois neʼe, Moisés oho bibi neʼe no hisik bibi nia raan iha altár nia sorin hotu. 20 Moisés koʼa bibi-malae aman neʼe ba pedasuk, no nia sunu bibi-malae aman neʼe nia ulun, ninia naʼan pedasuk sira, hamutuk ho naʼan bokur neʼebé taka rins hodi halo suar iha altár leten. 21 Moisés fase bibi-malae aman nia tee-oan no ain sira ho bee, no nia sunu bibi tomak neʼe hodi halo suar iha altár leten. Neʼe mak sakrifísiu sunu nian neʼebé ninia morin halo Maromak kontente.* Neʼe mak sakrifísiu neʼebé sunu iha ahi hodi hasaʼe ba Jeová, hodi tuir mandamentu neʼebé Jeová fó sai ona ba Moisés.

22 Tuirmai Moisés lori bibi-malae aman ida segundu, katak bibi-malae aman ordenasaun nian,+ no Arão ho ninia oan-mane sira tau liman ba bibi-malae aman neʼe nia ulun.+ 23 Depois neʼe, Moisés oho bibi-malae neʼe no foti raan balu no kose iha Arão nia tilun-tahan loos nia parte kraik no iha ninia liman-fuan boot iha liman-loos no ninia ain-fuan boot iha ain-loos. 24 Tuirmai Moisés lori Arão nia oan-mane sira mai no kose raan balu iha sira-nia tilun-tahan sorin loos nia parte kraik no iha sira-nia liman-fuan boot iha liman-loos no sira-nia ain-fuan boot iha ain-loos; maibé Moisés hisik raan restu iha altár nia sorin hotu.+

25 Tuirmai Moisés foti bibi neʼe nia bokur, ikun neʼebé bokur, bokur hotu neʼebé taka tee-oan, bokur neʼebé taka aten, rins rua no bokur neʼebé taka rins sira-neʼe, no naʼan kelen sorin loos.+ 26 Husi raga ba paun neʼebé la iha fermentu neʼebé iha Jeová nia oin, Moisés foti paun fuan ida hanesan kelu neʼebé la iha fermentu,+ paun fuan ida hanesan kelu neʼebé kahur ho mina,+ no paun mihis ida. Tuirmai nia tau paun sira-neʼe iha bibi nia bokur no naʼan kelen sorin loos nia leten. 27 Depois neʼe, Moisés tau buat hotu neʼe iha Arão no ninia oan-mane sira-nia liman no book neʼe bá-mai nuʼudar sakrifísiu doko bá-mai nian iha Jeová nia oin. 28 Tuirmai Moisés foti buat sira-neʼe husi sira-nia liman no sunu hodi halo suar iha altár leten hamutuk ho sakrifísiu sunu nian. Neʼe mak sakrifísiu ordenasaun nian neʼebé ninia morin halo Maromak kontente.* Neʼe mak sakrifísiu neʼebé sunu iha ahi hodi hasaʼe ba Jeová.

29 Tuirmai Moisés foti bibi nia hirus-matan no book neʼe bá-mai nuʼudar sakrifísiu doko bá-mai nian iha Jeová nia oin.+ Bibi-malae aman neʼe nia hirus-matan neʼebé hasaʼe nuʼudar sakrifísiu ordenasaun nian sai Moisés nian, hodi tuir mandamentu neʼebé Jeová fó sai ona ba Moisés.+

30 Moisés foti mina balu husi mina santu+ no raan balu neʼebé iha altár leten no hisik neʼe ba Arão no ninia roupa no ba Arão nia oan-mane sira no sira-nia roupa. Ho ida-neʼe, Moisés halo santu Arão no ninia roupa, no mós halo santu Arão nia oan-mane sira+ no sira-nia roupa.+

31 Tuirmai Moisés dehan ba Arão no ninia oan-mane sira: “Daʼan+ naʼan isin iha odamatan ba tenda reuniaun nian, no imi tenke han naʼan neʼe iha neʼebá hamutuk ho paun neʼebé iha raga ordenasaun nian, hodi tuir mandamentu neʼebé Maromak fó ba haʼu, hodi dehan: ‘Arão no ninia oan-mane sira tenke han ida-neʼe.’+ 32 Naʼan isin no paun restu imi tenke sunu tiha.+ 33 Imi labele sai husi odamatan ba tenda reuniaun nian durante loron hitu, toʼo loron sira ba imi-nia ordenasaun remata ona, tanba presiza loron hitu atu ordena imi nuʼudar amlulik.*+ 34 Jeová haruka ita atu halo buat hotu neʼebé ita halo ohin hodi bele hamoos imi-nia sala.+ 35 Loron no kalan imi tenke hela iha odamatan ba tenda reuniaun nian durante loron hitu,+ no imi tenke kumpre imi-nia obrigasaun ba Jeová,+ atu nuneʼe imi labele mate; tanba neʼe mak mandamentu neʼebé Maromak fó ona ba haʼu.”

36 Arão no ninia oan-mane sira halo tuir mandamentu hotu neʼebé Jeová fó sai liuhusi Moisés.

9 Iha loron ualu,+ Moisés bolu Arão no ninia oan-mane sira no Izraél nia katuas sira. 2 Moisés dehan ba Arão: “Foti karau-oan ida ba ó-nia an rasik nuʼudar sakrifísiu sala nian+ no foti mós bibi-malae aman ida nuʼudar sakrifísiu sunu nian. Animál sira-neʼe labele iha moras, no ó tenke lori animál sira-neʼe ba Jeová nia oin. 3 Maibé ó tenke hatete ba ema Izraél sira: ‘Foti bibi-timur aman ida nuʼudar sakrifísiu sala nian no karau-oan ida no bibi-malae aman* ida, animál sira-neʼe tenke tinan ida, no labele iha moras, atu hasaʼe nuʼudar sakrifísiu sunu nian. 4 Imi mós tenke foti karau-aman ida ho bibi-malae aman ida ba sakrifísiu dame nian,+ no hasaʼe animál sira-neʼe iha Jeová nia oin, hamutuk ho sakrifísiu trigu* nian+ neʼebé kahur ho mina, tanba ohin Jeová sei mosu ba imi.’”+

5 Entaun sira foti buat hotu tuir Moisés nia mandamentu no lori mai iha tenda reuniaun nia oin. Depois neʼe, povu hotu hakbesik no hamriik iha Jeová nia oin. 6 No Moisés dehan: “Neʼe mak Jeová nia mandamentu neʼebé imi tenke halo tuir, atu nuneʼe Jeová sei hatudu ninia glória ba imi.”+ 7 Tuirmai Moisés dehan ba Arão: “Hakbesik ba altár hodi hasaʼe sakrifísiu sala nian+ no sakrifísiu sunu nian atu hamoos ó-nia sala+ no ó-nia umakain nia sala; no hasaʼe povu neʼe nia sakrifísiu+ atu hamoos sira-nia sala,+ hodi tuir Jeová nia mandamentu.”

8 Arão hakbesik kedas ba altár no oho karau-oan hodi hasaʼe nuʼudar sakrifísiu sala nian ba ninia an.+ 9 Tuirmai Arão nia oan-mane sira fó karau neʼe nia raan+ ba nia, no nia hatama ninia liman-fuan iha raan neʼe no kose iha altár nia dikur sira, no nia fakar raan restu iha altár hun.+ 10 Nia foti karau nia bokur, rins, no bokur neʼebé taka aten husi karau ba sakrifísiu sala nian no sunu buat hotu neʼe hodi halo suar iha altár leten, hodi tuir mandamentu neʼebé Jeová fó sai ona ba Moisés.+ 11 Nia sunu karau nia isin no kulit iha povu nia hela-fatin nia liʼur.+

12 Tuirmai Arão oho animál ba sakrifísiu sunu nian, no Arão nia oan-mane sira fó animál nia raan ba nia, no nia hisik raan neʼe haleʼu altár nia sorin hotu.+ 13 Sira fó naʼan pedasuk sira husi sakrifísiu sunu nian ba nia hamutuk ho animál nia ulun, no nia sunu hodi halo suar iha altár leten. 14 Depois neʼe, nia fase animál neʼe nia tee-oan no mós nia ain no sunu hodi halo suar hamutuk ho sakrifísiu sunu nian iha altár leten.

15 Tuirmai Arão hasaʼe povu nia sakrifísiu no foti bibi-timur ba sakrifísiu sala nian husi povu no oho bibi neʼe hodi hasaʼe nuʼudar sakrifísiu sala nian hanesan ida primeiru. 16 Nia lori sakrifísiu sunu nian no hasaʼe sakrifísiu neʼe tuir ukun-fuan neʼebé iha ona.+

17 Tuirmai Arão hasaʼe sakrifísiu trigu nian,+ no nia tau sakrifísiu neʼe nakonu iha ninia liman no sunu hodi halo suar iha altár leten hamutuk ho sakrifísiu sunu nian neʼebé hasaʼe ona iha dadeer.+

18 Depois neʼe, Arão oho karau-aman no bibi-malae aman ba sakrifísiu dame nian ba povu neʼe. Arão nia oan-mane sira fó animál neʼe nia raan ba nia, no nia hisik raan neʼe haleʼu altár nia sorin hotu.+ 19 Kona-ba karau-aman nia naʼan bokur,+ bibi-malae aman nia ikun neʼebé bokur, bokur neʼebé taka tee-oan, rins, no bokur neʼebé taka aten,+ 20 sira tau naʼan bokur hotu neʼe iha animál nia hirus-matan, tuirmai nia sunu naʼan bokur sira-neʼe hodi halo suar iha altár leten.+ 21 Maibé kona-ba animál nia hirus-matan no kelen sorin loos, Arão book naʼan sira-neʼe bá-mai nuʼudar sakrifísiu doko bá-mai nian iha Jeová nia oin, hodi tuir Moisés nia mandamentu.+

22 Tuirmai Arão foti liman ba povu neʼe no haraik bensaun ba sira+ no nia tun husi fatin neʼebé nia hasaʼe sakrifísiu sala nian, sakrifísiu sunu nian no sakrifísiu dame nian. 23 Ikusmai Moisés no Arão tama ba tenda reuniaun nian no sai fali ba liʼur no haraik bensaun ba povu.+

Depois neʼe, Jeová hatudu sai ninia glória ba povu hotu,+ 24 no Jeová hatún ahi+ no ahi neʼe hahú han sakrifísiu sunu nian no naʼan bokur hotu neʼebé iha altár leten. Bainhira povu hotu haree ida-neʼe, sira hahú haklalak no hakneʼak hodi hakruʼuk ho oin ba rai.+

10 Liutiha tempu balu, Arão nia oan-mane Nadab no Abiú+ foti sira ida-idak nia fatin insensu nian no sira tau ahi iha laran no tau tan insensu+ iha leten. Tuirmai sira hahú sunu insensu neʼebé la tuir ukun-fuan hodi hasaʼe iha Jeová nia oin,+ no la tuir mandamentu neʼebé Maromak fó ba sira. 2 Ho ida-neʼe, Jeová hatún ahi no ahi neʼe han sira hotu,+ tan neʼe sira mate iha Jeová nia oin.+ 3 Tuirmai Moisés dehan ba Arão: “Jeová dehan nuneʼe: ‘Ema neʼebé hakbesik ba haʼu tenke hanoin-hetan katak haʼu santu,+ no povu hotu tenke fó glória ba haʼu.’” Arão kontinua nonook deʼit.

4 Entaun Moisés bolu Arão nia tiu Uziel+ nia oan-mane sira, Misael no Elzafan, no Moisés dehan ba sira: “Mai iha neʼe, lori sai imi-nia família sira-neʼe husi fatin santu ba fatin ida iha povu nia hela-fatin nia liʼur.” 5 Nuneʼe sira mai no lori sai mane sira-neʼe neʼebé sei hatais hela roupa amlulik nian, sira lori sai mate-isin sira-neʼe ba povu nia hela-fatin nia liʼur, hodi tuir buat neʼebé Moisés hatete ba sira.

6 Depois neʼe, Moisés koʼalia ba Arão no ninia oan-mane sira seluk, Eleazar no Itamar, hodi dehan: “Keta husik imi-nia fuuk sabraut ka lees imi-nia roupa,+ atu nuneʼe imi labele mate no Maromak labele sai hirus hasoru povu hotu. Imi-nia maluk husi umakain Izraél tomak sei tanis ba sira neʼebé Jeová oho ona ho ahi. 7 Imi labele sai husi odamatan ba tenda reuniaun nian, se lae imi sei mate, tanba Jeová ordena ona imi ho ninia mina santu.”*+ Entaun sira halo tuir Moisés nia liafuan.

8 Entaun Jeová dehan ba Arão: 9 “Ó no ó-nia oan-mane sira keta hemu tua-uvas ka tua seluk kuandu imi tama ba tenda reuniaun nian,+ atu nuneʼe imi sei la mate. Neʼe mak ukun-fuan ba nafatin iha imi-nia jerasaun hotu. 10 Hodi nuneʼe imi bele haketak buat santu husi buat neʼebé foʼer, no haketak buat neʼebé la moos* husi buat neʼebé moos,*+ 11 no hanorin ema Izraél kona-ba ukun-fuan hotu neʼebé Jeová fó sai ba sira liuhusi Moisés.”+

12 Tuirmai Moisés koʼalia ba Arão no ba Eleazar no Itamar, katak Arão nia oan-mane sira neʼebé sei moris hela, hodi dehan: “Foti sakrifísiu trigu* nian neʼebé restu husi Jeová nia sakrifísiu neʼebé sunu iha ahi no imi tenke halo paun neʼebé la iha fermentu no han neʼe besik altár,+ tanba neʼe mak buat neʼebé santu liu hotu.+ 13 Imi tenke han neʼe iha área santu,+ tanba neʼe mak ó-nia parte no ó-nia oan-mane sira-nia parte husi Jeová nia sakrifísiu neʼebé sunu ho ahi, neʼe mak mandamentu neʼebé haʼu simu. 14 Ó no ó-nia oan-mane no ó-nia oan-feto sira+ tenke han animál nia hirus-matan husi sakrifísiu doko bá-mai nian no naʼan kelen neʼebé nuʼudar parte sagradu+ no han neʼe iha fatin neʼebé moos, tanba buat sira-neʼe fó ona ba ó nuʼudar ó-nia parte no ó-nia oan-mane sira-nia parte husi sakrifísiu dame nian husi ema Izraél. 15 Sira tenke lori animál nia kelen neʼebé nuʼudar parte sagradu no animál nia hirus-matan husi sakrifísiu doko bá-mai nian hamutuk ho animál nia bokur neʼebé sunu iha ahi hodi hasaʼe nuʼudar sakrifísiu ba Maromak, atu nuneʼe bele doko bá-mai iha Jeová nia oin; no neʼe sei sai nuʼudar ó no ó-nia oan-mane sira-nia parte ba nafatin,+ hodi tuir Jeová nia mandamentu.”

16 Moisés hakaʼas an atu buka bibi-timur ba sakrifísiu sala nian,+ no nia haree katak bibi neʼe sunu ona iha ahi. Entaun nia sai hirus ba Arão nia oan-mane Eleazar no Itamar, neʼebé sei moris hela, no Moisés dehan: 17 “Tanbasá mak imi la han naʼan husi sakrifísiu sala nian iha área santu?+ Neʼe mak buat neʼebé santu liu hotu no nia fó ona ida-neʼe ba imi atu nuneʼe imi bele hasai povu nia sala no hamoos sira-nia sala iha Jeová nia oin. 18 Haree bá! Bibi nia raan seidauk lori ba fatin santu nia laran.+ Tuir loloos, imi tenke han naʼan neʼe iha área santu, hodi tuir mandamentu neʼebé haʼu simu.” 19 Arão hatán ba Moisés, dehan: “Ohin sira hasaʼe sira-nia sakrifísiu sala nian no sakrifísiu sunu nian iha Jeová nia oin,+ maibé buat aat sira-neʼe kona haʼu. Se ohin haʼu han ona naʼan husi sakrifísiu sala nian, ida-neʼe sei halo Jeová kontente ka lae?” 20 Bainhira Moisés rona tiha kona-ba neʼe, nia sente kontente.

11 Tuirmai Jeová dehan ba Moisés no Arão: 2 “Fó-hatene ba ema Izraél: ‘Tuirmai neʼe mak animál sira iha rai neʼebé imi bele han:+ 3 Imi bele han animál neʼebé ninia ain-kukun sakat ba rua no fahe iha klaran no mós nata fali ai-han neʼebé nia tolan ona.

4 “‘Maibé imi labele han animál tuirmai neʼe neʼebé nata fali ai-han neʼebé nia tolan ka iha ain-kukun neʼebé sakat ba rua: kuda-kamelu, neʼebé nata fali ai-han neʼebé nia tolan ona maibé ninia ain-kukun la sakat ba rua. Neʼe mak buat neʼebé la moos* ba imi.+ 5 No mós koellu-hiraks,+ neʼebé nata fali ai-han neʼebé nia tolan ona maibé ninia ain-kukun la sakat ba rua. Neʼe mak buat neʼebé la moos ba imi. 6 No mós koellu neʼebé nata fali ai-han neʼebé nia tolan ona maibé ninia ain-kukun la sakat ba rua. Neʼe mak buat neʼebé la moos ba imi. 7 No mós fahi,+ tanba ninia ain-kukun sakat ba rua no fahe iha klaran maibé nia la nata fali ai-han neʼebé nia tolan ona. Neʼe mak buat neʼebé la moos ba imi. 8 Imi labele han animál sira-neʼe nia naʼan ka kona sira-nia mate-isin. Animál sira-neʼe mak buat neʼebé la moos ba imi.+

9 “‘Tuirmai neʼe mak buat hotu iha bee laran neʼebé imi bele han: Imi bele han ikan naran deʼit neʼebé iha liras no kikit maski neʼe husi tasi ka mota.+ 10 Maibé buat naran deʼit neʼebé iha tasi no iha mota neʼebé la iha liras no kikit, husi kriatura hotu neʼebé nani no kriatura moris* hotu neʼebé iha bee laran, neʼe mak buat neʼebé imi tenke hakribi. 11 Sin, neʼe mak buat neʼebé imi tenke hakribi no imi labele han sira-nia naʼan+ no imi tenke hakribi sira-nia mate-isin. 12 Buat naran deʼit neʼebé iha bee laran neʼebé la iha liras no kikit, neʼe mak buat neʼebé imi tenke hakribi.

13 “‘Tuirmai neʼe mak animál neʼebé semo neʼebé imi tenke hakribi; imi keta han buat sira-neʼe, tanba imi tenke hakribi buat sira-neʼe: manu-makikit,+ manu-makikit tasi, manu-abutre metan,+ 14 manu-makikit mean no manu-makikit metan ho modelu oioin, 15 manu-metan hotu ho modelu oioin, 16 manu-avestrús, manu-kakuuk, manu-tasi, manu-falkaun hotu ho modelu oioin, 17 manu-kakuuk kiʼik no manu-kakuuk tilun naruk, manu-tasi metan, 18 manu-sizne, manu-pelikanu, manu-abutre, 19 manu-segoña, manu-tasi garsa ho modelu oioin, manu-poupa no niki. 20 Imi mós tenke hakribi insetu* hotu neʼebé iha liras no neʼebé mós bele laʼo.*

21 “‘Kona-ba insetu hotu neʼebé iha liras no neʼebé mós bele laʼo, imi bele han deʼit insetu neʼebé iha ain naruk rua tan neʼebé uza atu haksoit. 22 Husi buat sira-neʼe, imi bele han gafañotu ho modelu oioin+ no grilu. 23 Insetu seluk hotu neʼebé iha liras no mós bele laʼo mak buat neʼebé imi tenke hakribi. 24 Se imi han buat sira-neʼe imi sei sai la moos. Ema naran deʼit neʼebé kona insetu sira-neʼe nia mate-isin sei sai la moos toʼo kalan.+ 25 Ema neʼebé foti insetu sira-neʼe nia mate-isin tenke fase ninia roupa;+ no nia sei sai la moos toʼo kalan.

26 “‘Animál naran deʼit neʼebé ain-kukun sakat maibé laʼós fahe iha klaran no la nata ai-han neʼebé nia tolan ona, neʼe mak la moos ba imi. Ema neʼebé kona animál sira-neʼe sei sai la moos.+ 27 Kriatura hotu neʼebé laʼo ho ain haat neʼebé belar,* neʼe la moos ba imi. Ema neʼebé kona sira-nia mate-isin sei sai la moos toʼo kalan. 28 Ema neʼebé foti animál sira-neʼe nia mate-isin tenke fase ninia roupa,+ no nia sei sai la moos toʼo kalan.+ Animál sira-neʼe mak la moos ba imi.

29 “‘Tuirmai neʼe mak animál iha rai neʼebé la moos ba imi: laho-toupeira, laho kiʼik,+ lafaek rai-maran hotu ho modelu oioin, 30 teki, lafaek rai-maran neʼebé boot, tokee-salamandra, tokee rai-maran, no tokee-kamaleaun. 31 Kriatura hotu neʼe mak la moos ba imi.+ Ema neʼebé kona animál sira-neʼe nia mate-isin sei sai la moos toʼo kalan.+

32 “‘Sasán hotu neʼebé kona animál sira-neʼe nia mate-isin sei sai la moos maski neʼe sasán neʼebé halo husi ai, roupa, animál kulit ida, ka hena karón.* Sasán naran deʼit neʼebé imi uza tenke fase ho bee, no neʼe sei sai la moos toʼo kalan; tuirmai sei sai moos* fali. 33 Se animál sira-neʼe mate iha sanan-rai nia laran, imi tenke baku rahun ida-neʼe, no buat naran deʼit neʼebé iha laran sei sai la moos.+ 34 Ai-han hotu neʼebé kona bee husi sanan neʼe nia laran sei sai la moos, no buat naran deʼit neʼebé iha sanan neʼe nia laran atu ema hemu sei sai la moos. 35 Buat naran deʼit neʼebé animál sira-neʼe nia mate-isin kona sei sai la moos. Maski neʼe kona fornu ka fogaun kiʼik, imi tenke halo rahun neʼe hotu. Buat sira-neʼe mak la moos no sei nafatin la moos ba imi. 36 Se animál sira-neʼe mate iha bee-matan ka tanke* hodi rai bee, buat sira-neʼe sei moos nafatin, maibé ema naran deʼit neʼebé kona animál sira-neʼe nia mate-isin sei sai la moos. 37 Se animál sira-nia mate-isin kona fini balu neʼebé atu kuda, ida-neʼe sei moos nafatin. 38 Maibé se imi tau bee iha fini no animál sira-neʼe nia mate-isin parte balu monu kona ida-neʼe, fini neʼe sei sai la moos ba imi.

39 “‘Se animál neʼebé imi bele han ninia naʼan mak mate mesak deʼit, entaun ema neʼebé kona ninia mate-isin sei sai la moos toʼo kalan.+ 40 Ema neʼebé han naʼan husi animál neʼe nia mate-isin tenke fase ninia roupa, no nia sei sai la moos toʼo kalan.+ Ema neʼebé foti animál nia mate-isin tenke fase ninia roupa, no nia sei sai la moos toʼo kalan. 41 Animál kiʼik sira iha rai mak buat neʼebé imi tenke hakribi.+ Imi labele han ida-neʼe. 42 Imi labele han animál neʼebé dolar ho kabun, animál neʼebé laʼo ho ain haat, ka animál kiʼik hotu neʼebé iha ain barak, tanba imi tenke hakribi duni buat sira-neʼe.+ 43 Imi keta hafoʼer imi-nia an no sai la moos tanba animál sira-neʼe.+ 44 Haʼu mak Jeová, imi-nia Maromak,+ no imi tenke halo santu* imi-nia an no sai santu,+ tanba haʼu santu.+ Entaun imi labele halo imi-nia an sai la moos tanba animál kiʼik sira neʼebé book an iha rai. 45 Haʼu mak Jeová, ida neʼebé lori imi sai husi rai-Ejitu atu sai imi-nia Maromak,+ no imi tenkesér sai santu,+ tanba haʼu santu.+

46 “‘Neʼe mak ukun-fuan kona-ba animál sira, animál neʼebé semo, kriatura moris* hotu neʼebé book an iha bee laran, no kona-ba kriatura* hotu neʼebé iha rai, 47 atu nuneʼe imi bele haketak buat neʼebé la moos husi buat moos no haketak kriatura neʼebé imi bele han no labele han.’”+

12 Jeová dehan tan ba Moisés: 2 “Hatete ba ema Izraél: ‘Se feto ida sai isin-rua no tuur-ahi oan-mane ida, feto neʼe sei sai la moos ba loron hitu, hanesan ho loron sira neʼebé nia sai la moos kuandu hetan menstruasaun.+ 3 No iha loron ualu, imi tenke halo sirkunsizaun* ba labarik neʼe nia kulit iha oin-lulik.+ 4 Feto neʼe sei kontinua atu hamoos an husi raan durante loron 33 tan. Nia labele kona buat santu, no nia labele tama ba fatin santu toʼo nia kumpre ona ninia loron hamoos an nian.

5 “‘Se nia tuur-ahi oan-feto ida, nia sei sai la moos ba loron 14, hanesan ho loron sira neʼebé nia sai la moos kuandu hetan menstruasaun. Nia sei kontinua hamoos an husi raan durante loron 66 tan. 6 Bainhira loron hamoos an nian ba oan-mane ka oan-feto remata ona, feto neʼe tenke lori bibi-malae aman neʼebé seidauk toʼo tinan ida hodi hasaʼe nuʼudar sakrifísiu sunu nian+ no lori manu-pombu oan ida ka manu-lakateu ida nuʼudar sakrifísiu sala nian hodi entrega ba amlulik iha odamatan ba tenda reuniaun nian. 7 Amlulik tenke hasaʼe sakrifísiu neʼe iha Jeová nia oin hodi hamoos feto neʼe nia sala, no feto neʼe sei sai moos fali tanba ninia raan neʼebé sai. Neʼe mak ukun-fuan kona-ba feto neʼebé tuur-ahi oan-mane ida ka oan-feto ida. 8 Maibé se nia la iha kbiit atu fó bibi-malae ida, nia tenke lori manu-lakateu rua ka manu-pombu oan rua,+ manu ida ba sakrifísiu sunu nian no manu ida seluk ba sakrifísiu sala nian, no amlulik sei hasaʼe sakrifísiu hodi hamoos feto neʼe nia sala, no nia sei sai moos.’”

13 Jeová koʼalia tan ba Moisés no Arão, hodi dehan: 2 “Se ema ida iha bubu ruma, ka kanek neʼebé maran ona, ka sinál hanesan hena-mutin mosu iha kulit neʼebé bele sai moras-lepra,*+ entaun tenke lori nia ba amlulik Arão ka ba ninia oan-mane sira neʼebé mós amlulik.+ 3 Amlulik tenke haree didiʼak moras iha ema neʼe nia kulit. Kuandu isin-fulun neʼebé iha kulit neʼe sai mutin no moras neʼe tama kleʼan ba isin, neʼe mak moras-lepra. Amlulik tenke haree didiʼak ida-neʼe no fó sai katak ema neʼe la moos.* 4 Maibé se sinál hanesan hena-mutin neʼe la tama kleʼan ba isin no isin-fulun la sai mutin, amlulik sei haketak ema moras neʼe ba loron hitu.+ 5 Iha loron hitu, amlulik sei haree didiʼak fali nia, no se moras neʼe la iha ona no la aumenta ka sai boot iha kulit, amlulik tenke haketak nia ba loron hitu tan.

6 “Iha loron hitu, amlulik tenke haree fali nia, no se moras neʼe lakon uitoan no la aumenta ka sai boot iha kulit, amlulik sei fó sai katak nia moos* ona;+ tanba neʼe mak kanek deʼit. Ema neʼe tenke fase ninia roupa no sei sai moos. 7 Se nia hasoru ona amlulik atu fó sai katak nia moos ona, maibé moras* neʼe aumenta no sai boot iha kulit entaun nia tenke hasoru tan amlulik ba dala segundu. 8 Amlulik tenke haree didiʼak moras neʼe, no se amlulik haree katak moras neʼe aumenta no sai boot iha kulit, nia tenke fó sai katak ema neʼe la moos. Neʼe mak moras-lepra.+

9 “Se ema ida hetan moras-lepra, entaun tenke lori nia ba amlulik, 10 no amlulik sei haree didiʼak ema neʼe.+ Se iha bubu mutin iha kulit no neʼe halo isin-fulun sai mutin no kulit nakloke ona+ iha bubu neʼe, 11 neʼe mak moras-lepra neʼebé makaʼas tebes iha kulit, no amlulik sei fó sai katak ema neʼe la moos ona. Amlulik la presiza haketak nia+ atu bele haree fali, tanba nia la moos. 12 Maibé se moras-lepra neʼe aumenta no sai boot iha kulit no kona isin-lolon tomak husi ulun toʼo ain, tuir buat neʼebé amlulik bele haree, 13 no se amlulik haree didiʼak ona ema neʼe no haree katak moras-lepra kona isin-lolon tomak, entaun amlulik sei fó sai katak ema neʼe nia moras labele daʼet ona.* Ninia kulit hotu iha ninia isin sai mutin, no nia moos ona. 14 Maibé se kanek iha ninia kulit nakloke fali, nia sei sai la moos. 15 Bainhira amlulik haree kanek ruma neʼebé nakloke ona, amlulik sei fó sai katak ema neʼe la moos.+ Kanek neʼebé nakloke ona mak la moos. Neʼe mak moras-lepra.+ 16 Maibé se kulit neʼebé nakloke ona sai mutin fali, entaun ema neʼe tenke bá hasoru amlulik. 17 Amlulik sei haree didiʼak ema neʼe,+ no se kulit neʼebé iha moras neʼe sai mutin ona, amlulik sei fó sai katak ema moras neʼe, agora moos ona. Nia moos ona.

18 “Se mosu fisur iha ema nia kulit no neʼe sai diʼak ona, 19 maibé se mosu fali bubu mutin ka sinál hanesan hena-mutin ka mean iha fatin neʼebé uluk iha fisur, entaun ema neʼe tenke hatudu ninia an ba amlulik. 20 Amlulik tenke haree didiʼak moras neʼe,+ no se ida-neʼe tama kleʼan ba isin no isin-fulun iha kulit mós sai mutin, entaun amlulik sei fó sai katak ema neʼe la moos ona. Neʼe mak moras-lepra neʼebé mosu iha fisur nia fatin. 21 Maibé se amlulik haree didiʼak moras neʼe, no haree katak la iha isin-fulun mutin iha fatin neʼe no neʼe la tama kleʼan ba isin no nia lakon uitoan ona, entaun amlulik sei haketak ema neʼe ba loron hitu.+ 22 Se amlulik haree katak ida-neʼe aumenta no sai boot iha kulit, entaun amlulik sei fó sai katak ema neʼe la moos. Neʼe mak moras ida. 23 Maibé se sinál hanesan hena-mutin ka mean neʼe iha deʼit fatin ida no la aumenta ka sai boot, entaun neʼe mak bubu deʼit tanba fisur, no amlulik sei fó sai katak ema neʼe moos.+

24 “Se ema ida iha kanek iha kulit tanba kona ahi, no sinál hanesan hena-mutin ka mean mosu iha kanek neʼe, 25 amlulik tenke haree didiʼak sinál hanesan hena-mutin ka mean neʼe. Se isin-fulun iha parte neʼe sai mutin no tama kleʼan ba isin, neʼe mak moras-lepra neʼebé mosu iha kanek neʼe, no amlulik sei fó sai katak ema neʼe la moos. Neʼe mak moras-lepra. 26 Maibé se amlulik haree sinál hanesan hena-mutin ka mean neʼe no hetan katak la iha isin-fulun neʼebé mutin no la kleʼan liu fali kulit no lakon uitoan ona, entaun amlulik sei haketak ema neʼe ba loron hitu.+ 27 Amlulik tenke haree fali nia iha loron hitu, no se kanek neʼe loloos aumenta no sai boot ona iha kulit, entaun amlulik sei fó sai katak ema neʼe la moos. Neʼe mak moras-lepra. 28 Maibé se sinál hanesan hena-mutin ka mean neʼe iha deʼit fatin ida no la aumenta ka sai boot no lakon uitoan ona, neʼe mak bubu husi kanek deʼit, no amlulik sei fó sai katak ema neʼe moos tanba neʼe mak bubu neʼebé mosu husi kanek neʼe.

29 “Kuandu mane ka feto ida hetan moras iha ulun ka iha hasahún, 30 amlulik tenke haree didiʼak moras neʼe.+ Se moras neʼe tama kleʼan ba isin no mós se fuuk ka hasarahun sai kinur no lotuk, entaun amlulik sei fó sai katak ema neʼe la moos; neʼe mak moras neʼebé kona ulun-kulit ka hasarahun. Neʼe mak moras-lepra neʼebé kona ulun ka hasahún. 31 Maibé se amlulik haree katak moras neʼe la tama kleʼan ba isin no la iha fuuk ka hasarahun metan, amlulik tenke haketak ema moras neʼe ba loron hitu.+ 32 Amlulik tenke haree fali moras neʼe iha loron hitu, no se ida-neʼe la aumenta ka sai boot no la iha fuuk ka hasarahun neʼebé kinur iha fatin neʼe no moras neʼe la tama kleʼan ba isin, 33 ema neʼe tenke koi nia fuuk ka hasarahun sira-neʼe, maibé nia labele koi fuuk ka hasarahun iha fatin neʼebé iha moras neʼe. Tuirmai amlulik tenke haketak ema moras neʼe ba loron hitu tan.

34 “Iha loron hitu, amlulik tenke haree fali fatin neʼebé iha moras neʼe, no se moras iha ulun-kulit no hasarahun la aumenta ka sai boot iha kulit no neʼe la kleʼan liu fali isin, entaun amlulik tenke fó sai katak ema neʼe moos, no ema neʼe tenke fase ninia roupa no sei sai moos. 35 Maibé se moras neʼe loloos aumenta no sai boot iha kulit bainhira nia sai moos ona, 36 entaun amlulik tenke haree didiʼak ema neʼe, no se moras neʼe aumenta no sai boot iha kulit, amlulik lalika buka tan fuuk ka hasarahun neʼebé kinur; ema neʼe la moos. 37 Maibé se amlulik haree katak moras neʼe la aumenta ka sai boot iha kulit no fuuk ka hasarahun metan moris iha fatin neʼe, entaun moras neʼe diʼak ona. Ema neʼe moos ona, no amlulik sei fó sai katak nia moos.+

38 “Se sinál hanesan hena-mutin mosu iha mane ka feto ida nia kulit, 39 amlulik tenke haree didiʼak ida-neʼe.+ Se sinál hanesan hena-mutin iha kulit lakon uitoan ona, neʼe mak moras baibain deʼit neʼebé kona kulit no la perigozu. Ema neʼe mak moos.

40 “Se mane ida nia fuuk monu no sai ulun-molik, nia mak moos. 41 Se ninia fuuk iha ninia ulun parte oin mak monu no sai ulun-molik iha parte neʼe, nia mak moos. 42 Maibé se kulit mean kahur ho mutin mak iha ninia ulun-kulit iha parte neʼebé ulun-molik ka iha ninia reen-toos, neʼe mak moras-lepra neʼebé mosu iha ninia ulun-kulit ka ninia reen-toos. 43 Amlulik tenke haree didiʼak ema neʼe, no se bubu iha kulit neʼe mak mean kahur ho mutin iha parte neʼebé ulun-molik ka iha ninia reen-toos no ida-neʼe haree hanesan moras-lepra iha ninia kulit, 44 nia moras-lepra. Nia la moos, no amlulik tenke fó sai katak ema neʼe la moos tanba moras iha ninia ulun. 45 Kona-ba ema neʼebé iha moras-lepra, nia tenke uza roupa neʼebé naklees no ninia fuuk labele sui no nia tenke taka ninia ibun* ho hena no hakilar dehan: ‘La moos, la moos!’ 46 Nia sei sai la moos durante tempu hotu neʼebé nia kona moras neʼe. Tanba nia la moos, nia tenke hela ketak husi ema seluk. Nia tenke hela iha povu nia hela-fatin nia liʼur.+

47 “Se moras-lepra kona roupa ida, maski nia kona roupa husi bibi-malae nia fulun ka roupa husi hena-liñu, 48 ka iha kabas sira iha hena-liñu ka iha hena husi bibi-malae nia fulun, ka iha animál nia kulit ka buat neʼebé halo husi kulit, 49 no noda neʼebé kór-kinur kahur ho matak ka mean kona roupa ruma, animál nia kulit, kabas, ka buat naran deʼit neʼebé halo husi kulit, ida-neʼe kona ona moras-lepra, no tenke hatudu neʼe ba amlulik. 50 Amlulik tenke haree didiʼak moras neʼe, no nia tenke haketak sasán neʼebé kona moras neʼe ba loron hitu.+ 51 Bainhira nia haree didiʼak fali moras neʼe iha loron hitu no haree katak moras neʼe aumenta ona ka sai boot iha roupa, kabas, ka animál nia kulit maski animál nia kulit neʼe uza ba buat naran deʼit, entaun neʼe mak moras-lepra neʼebé bele hadaʼet, no neʼe la moos.+ 52 Nia tenke sunu roupa neʼe ka sunu kabas husi bibi-malae nia fulun ka hena-liñu ka buat naran deʼit husi animál nia kulit neʼebé kona ona moras neʼe, tanba neʼe mak moras-lepra neʼebé bele hadaʼet. Neʼe tenke sunu tiha.

53 “Maibé se amlulik haree didiʼak sasán neʼe no haree katak moras neʼe la aumenta ka sai boot iha roupa neʼe ka kabas ka sasán husi animál nia kulit, 54 entaun amlulik tenke haruka sira atu fase sasán neʼebé kona moras neʼe, no nia sei haketak buat sira-neʼe ba loron hitu tan. 55 Bainhira sira fase didiʼak ona sasán neʼebé kona moras neʼe, amlulik tenke haree didiʼak fali sasán neʼe. Se amlulik haree katak neʼe la troka buat ida, maski moras neʼe la aumenta ka sai boot, maibé neʼe la moos. Imi tenke sunu sasán neʼe tanba ida-neʼe sai dodok ona maski husi laran ka husi liʼur.

56 “Maibé se amlulik haree ona sasán neʼe no parte neʼebé kona moras besik lakon ona bainhira sira fase ho didiʼak, entaun nia tenke lees sai parte neʼe husi roupa neʼe ka husi animál nia kulit ka husi kabas. 57 Maibé, se moras neʼe sei mosu iha parte seluk husi roupa neʼe ka husi kabas ka sasán neʼebé halo husi animál nia kulit, entaun moras neʼe aumenta no sai boot ona, no imi tenke sunu buat naran deʼit neʼebé kona moras neʼe.+ 58 Maibé kuandu moras neʼe lakon ona husi roupa neʼe ka husi kabas ka sasán neʼebé halo husi animál nia kulit neʼebé imi fase ona, entaun tenke fase tan ba dala segundu, no neʼe sei sai moos.

59 “Neʼe mak ukun-fuan kona-ba moras-lepra neʼebé kona roupa husi bibi-malae fulun ka husi hena-liñu, ka kabas, ka sasán husi animál nia kulit, atu nuneʼe amlulik bele fó sai katak sasán neʼe moos ka la moos.”

14 Jeová koʼalia tan ba Moisés, hodi dehan: 2 “Neʼe mak ukun-fuan kona-ba ema neʼebé moras-lepra atu kumpre iha tempu neʼebé amlulik fó sai katak nia moos ona. Ema tenke lori nia ba amlulik.+ 3 Amlulik tenke sai ba povu nia hela-fatin nia liʼur no haree didiʼak ema neʼe. Se moras-lepra neʼe diʼak ona, 4 amlulik sei haruka nia atu lori manu moris rua neʼebé moos, ai-sedru, hena mean no ai-isopu atu hamoos nia.+ 5 Amlulik tenke haruka ema atu oho manu ida iha sanan-rai leten neʼebé iha bee moos. 6 Maibé nia tenke lori manu neʼebé moris hamutuk ho ai-sedru, hena mean no ai-isopu, no hoban buat sira-neʼe ba raan husi manu neʼebé oho ona iha bee moos leten. 7 Tuirmai nia tenke hisik neʼe dala hitu ba ema neʼebé hamoos nia an husi moras-lepra no fó sai katak ema neʼe moos ona, no nia sei husik livre manu neʼebé moris ba rai-luan.+

8 “Ema neʼebé tuir serimónia hamoos an tenke fase ninia roupa no koi ninia fuuk no isin-fulun hotu no hariis, no nia sei sai moos. Depois neʼe, nia bele tama ba povu nia hela-fatin, maibé nia sei hela deʼit iha ninia tenda nia liʼur durante loron hitu. 9 Iha loron hitu, nia tenke koi ninia fuuk no hasarahun no matan-fulun. Bainhira nia koi hotu ona, nia sei fase ninia roupa no hariis, no nia sei sai moos.

10 “Iha loron ualu, nia tenke lori bibi-malae aman* rua neʼebé la iha moras, bibi-malae inan ida neʼebé seidauk toʼo tinan ida no la iha moras,+ trigu uut neʼebé diʼak gomor isin tolu* neʼebé kahur ona ho mina nuʼudar sakrifísiu trigu* nian,+ no mina mililitru 310;*+ 11 no amlulik neʼebé fó sai katak ema neʼe moos ona sei lori ema neʼe hamutuk ho ninia sakrifísiu sira ba Jeová nia oin iha odamatan ba tenda reuniaun nian. 12 Amlulik tenke foti bibi-malae aman* ida no hasaʼe neʼe nuʼudar sakrifísiu taka sala nian+ hamutuk ho mina mililitru 310, no nia sei book neʼe bá-mai nuʼudar sakrifísiu doko bá-mai nian iha Jeová nia oin.+ 13 Tuirmai nia tenke oho bibi-malae aman* neʼe iha fatin neʼebé baibain oho animál ba sakrifísiu sala nian no sakrifísiu sunu nian+ iha pátiu iha tenda santu, no sakrifísiu taka sala nian sei sai amlulik nian hanesan ho sakrifísiu sala nian.+ Neʼe mak buat neʼebé santu liu hotu.+

14 “Tuirmai, amlulik sei foti raan balu husi sakrifísiu taka sala nian, no amlulik sei kose ba ema neʼebé hamoos an nia tilun-tahan loos nia parte kraik no liman-fuan boot iha liman-loos no ain-fuan boot iha ain-loos. 15 No amlulik tenke foti mina balu husi mina mililitru 310+ no fui neʼe ba ninia liman-karuk laran. 16 Depois neʼe, amlulik tenke hatama ninia liman-fuan loos ba mina neʼebé iha nia liman-karuk laran no hisik mina neʼe ba dala hitu iha Jeová nia oin. 17 Tuirmai, amlulik sei uza mina restu neʼebé iha nia liman laran hodi kose ba ema neʼe nia tilun-tahan loos nia parte kraik no liman-fuan boot iha liman-loos no ain-fuan boot iha ain-loos, no amlulik sei kose mina neʼe iha fatin neʼebé nia kose ona raan husi sakrifísiu taka sala nian. 18 Amlulik sei tau mina restu neʼebé iha ninia liman laran ba ema neʼe nia ulun, ho ida-neʼe mak amlulik sei hamoos ema neʼe nia sala iha Jeová nia oin.+

19 “Amlulik tenke hasaʼe sakrifísiu sala nian+ hodi hamoos ema neʼe nia sala, no depois neʼe, nia tenke oho animál ba sakrifísiu sunu nian. 20 Amlulik sei hasaʼe sakrifísiu sunu nian no sakrifísiu trigu nian+ iha altár leten, ho ida-neʼe, amlulik sei hamoos ema neʼe nia sala,+ no nia sei sai moos.+

21 “Maibé, se nia kiak no la iha kbiit, entaun nia tenke lori bibi-malae aman* ida nuʼudar sakrifísiu taka sala nian hodi uza ba sakrifísiu doko bá-mai nian, atu bele hamoos ninia sala, no lori mós trigu uut neʼebé diʼak gomor isin ida* neʼebé kahur ona ho mina nuʼudar sakrifísiu trigu nian, mina mililitru 310, 22 no manu-lakateu rua ka manu-pombu oan rua hodi tuir ninia kbiit. Manu ida sei uza nuʼudar sakrifísiu sala nian, no manu seluk sei uza nuʼudar sakrifísiu sunu nian.+ 23 Iha loron ualu,+ nia tenke lori buat sira-neʼe ba amlulik iha odamatan ba tenda reuniaun nian iha Jeová nia oin atu halo serimónia hodi hatudu sai katak nia moos ona.+

24 “Amlulik tenke foti bibi-malae aman* ba sakrifísiu taka sala nian+ no mina mililitru 310, no amlulik sei book neʼe bá-mai nuʼudar sakrifísiu doko bá-mai nian iha Jeová nia oin.+ 25 Amlulik sei oho bibi-malae aman* neʼe ba sakrifísiu taka sala nian, no nia sei foti raan balu husi bibi-malae neʼe no kose ba ema neʼebé hamoos an nia tilun-tahan loos nia parte kraik no liman-fuan boot iha liman-loos no ain-fuan boot iha ain-loos.+ 26 Amlulik sei fui mina balu iha ninia liman-karuk laran,+ 27 no tuirmai amlulik sei hatama ninia liman-fuan loos ba mina neʼebé iha ninia liman-karuk no hisik dala hitu iha Jeová nia oin. 28 Amlulik tenke foti mina balu neʼebé iha ninia liman no kose ba ema neʼe nia tilun-tahan loos nia parte kraik no liman-fuan boot iha liman-loos no ain-fuan boot iha ain-loos, katak iha fatin neʼebé nia kose ona raan husi sakrifísiu taka sala nian. 29 Amlulik sei tau mina restu neʼebé iha nia liman laran ba ema neʼe nia ulun, ho ida-neʼe mak amlulik sei hamoos ema neʼe nia sala iha Jeová nia oin.

30 “Nia tenke hasaʼe manu-lakateu ida ka manu-pombu oan ida nuʼudar sakrifísiu, hodi tuir ema neʼe nia kbiit,+ 31 manu ida nuʼudar sakrifísiu sala nian no ida seluk nuʼudar sakrifísiu sunu nian+ hamutuk ho sakrifísiu trigu nian; sakrifísiu sira-neʼe tuir ninia kbiit; ho ida-neʼe amlulik sei hamoos ema neʼe nia sala iha Jeová nia oin.+

32 “Neʼe mak ukun-fuan ba ema neʼebé uluk iha moras-lepra maibé la iha kbiit kuandu halo serimónia atu hatudu sai katak nia moos ona.”

33 Tuirmai Jeová dehan tan ba Moisés no Arão: 34 “Bainhira imi tama ba rai-Kanaan+ neʼebé haʼu sei fó ba imi nuʼudar liman-rohan,+ no haʼu husik moras-lepra kona uma ida iha imi-nia rai,+ 35 uma-naʼin neʼe tenke bá fó-hatene ba amlulik, hodi dehan: ‘Iha noda ruma mosu iha haʼu-nia uma nia didin. Neʼe haree hanesan moras-lepra.’ 36 Amlulik sei haruka atu hasai tiha buat hotu iha uma laran antes nia mai atu haree didiʼak moras neʼe, atu nuneʼe nia labele fó sai katak buat hotu iha uma laran mak la moos; no depois neʼe, amlulik sei mai atu haree uma neʼe. 37 Nia sei haree didiʼak parte neʼebé kona moras neʼe, no se uma nia didin iha noda kór-kinur kahur ho matak ka mean no noda neʼe tama kleʼan liu ba didin laran, 38 amlulik sei sai husi uma neʼe hodi laʼo ba odamatan no taka uma neʼe ba loron hitu.+

39 “Tuirmai amlulik tenke fila fali iha loron hitu no haree didiʼak fali uma neʼe. Se moras neʼe daʼet ona iha uma nia didin-lolon sira, 40 amlulik sei haruka atu sobu fatuk sira neʼebé kona moras neʼe husi didin no soe ba sidade nia liʼur iha fatin neʼebé baibain ema soe buat neʼebé la moos. 41 Tuirmai nia sei haruka atu hasai simente no hasai reboka sira hotu iha didin iha uma laran, no buat sira-neʼe tenke soe tiha iha sidade nia liʼur iha fatin neʼebé baibain ema soe buat neʼebé la moos. 42 Depois neʼe, nia tenke tau fali fatuk seluk iha fatin neʼe, no uza simente foun no reboka fali uma neʼe.

43 “Maibé se moras neʼe mosu fali iha uma nia didin bainhira hasai tiha ona fatuk, no hamoos didiʼak no reboka fali ona, 44 amlulik tenke bá haree didiʼak uma neʼe. Se moras neʼe daʼet ona iha uma neʼe, entaun neʼe mak moras-lepra neʼebé bele daʼet.+ Uma neʼe la moos. 45 Tuirmai nia sei haruka atu sobu hotu uma neʼe, katak uma neʼe nia fatuk sira, ai sira, ninia reboka hotu no simente sira, no tenke lori buat sira-neʼe ba sidade nia liʼur iha fatin neʼebé baibain ema soe buat neʼebé la moos.+ 46 Se ema ida tama iha uma neʼe iha loron sira neʼebé uma neʼe taka tiha ona,+ ema neʼe sei sai la moos toʼo kalan;+ 47 ema neʼebé toba iha uma neʼe tenke fase ninia roupa, no mós ema neʼebé han iha uma neʼe tenke fase ninia roupa.

48 “Maibé, se amlulik mai no haree katak moras neʼe la daʼet iha uma neʼe bainhira reboka fali ona, amlulik sei fó sai katak uma neʼe moos ona, tanba moras neʼe la iha ona. 49 Atu bele hamoos uma neʼe nia sala, nia tenke lori manu rua, ai-sedru, hena mean no ai-isopu.+ 50 Nia sei oho manu ida iha sanan-rai nia leten neʼebé iha bee moos iha laran. 51 Tuirmai nia tenke lori ai-sedru, ai-isopu, hena mean, no manu neʼebé moris, no nia sei hoban buat sira-neʼe hotu ba raan husi manu neʼebé oho tiha ona no ba bee neʼebé moos, no nia tenke hisik ba uma neʼe dala hitu.+ 52 Nia sei hamoos uma neʼe nia sala ho manu nia raan, bee neʼebé moos, manu neʼebé moris, ai-sedru, ai-isopu no hena mean. 53 Tuirmai nia tenke lori manu neʼebé moris ba sidade nia liʼur no husik livre ba rai-luan hodi hamoos sala ba uma neʼe, no uma neʼe sei sai moos.

54 “Neʼe mak ukun-fuan kona-ba moras-lepra, moras iha ulun-kulit ka hasarahun,+ 55 moras-lepra neʼebé mosu iha roupa+ ka uma,+ 56 no kona-ba bubu, kanek neʼebé maran, no sinál hanesan hena-mutin iha kulit,+ 57 atu bele hatene buat ruma mak moos ka la moos.+ Neʼe mak ukun-fuan kona-ba moras-lepra.”+

15 Jeová koʼalia tan ba Moisés no Arão, hodi dehan: 2 “Koʼalia ba ema Izraél no hatete ba sira: ‘Se mane ida iha moras been sai husi ninia oin-lulik,* ninia moras neʼe halo nia sai la moos.+ 3 Nia sei sai la moos tanba ninia moras neʼe maski been neʼe kontinua sai husi ninia oin-lulik ka entupidu tiha, nia nafatin la moos.

4 “‘Kama neʼebé ema moras neʼe toba bá sei sai la moos, no buat naran deʼit neʼebé nia tuur iha leten sei sai la moos. 5 Ema neʼebé kona ema moras neʼe nia kama, ema neʼe tenke fase ninia roupa no hariis. Nia sei sai la moos toʼo kalan.+ 6 Ema neʼebé tuur iha fatin neʼebé uluk ema moras neʼe tuur ona, nia tenke fase ninia roupa no hariis. No nia sei sai la moos toʼo kalan. 7 Ema neʼebé kona ema moras neʼe tenke fase ninia roupa no hariis. Nia sei sai la moos toʼo kalan. 8 Se ema moras neʼe tafui kona ema neʼebé moos, ema neʼe tenke fase ninia roupa no hariis. Nia sei sai la moos toʼo kalan. 9 Sela* neʼebé ema moras neʼe tuur ona bá sei sai la moos. 10 Ema neʼebé kona sasán sira neʼebé ema moras neʼe tuur iha leten, ema neʼe sei sai la moos toʼo kalan, no ema neʼebé lori sasán sira-neʼe tenke fase ninia roupa no hariis. Nia sei sai la moos toʼo kalan. 11 Se ema neʼebé iha moras neʼe+ la fase ninia liman no nia kaer ema ida, ema neʼe tenke fase ninia roupa no hariis. Nia sei sai la moos toʼo kalan. 12 Se ema neʼebé iha moras neʼe kona sanan-rai ida, neʼe tenke halo rahun tiha, no se nia kona bikan husi ai, ida-neʼe tenke fase tiha ho bee.+

13 “‘Bainhira mane ida sai diʼak ona husi ninia moras been sai, nia tenke sura loron hitu nuʼudar tempu ba nia atu sai moos, no nia tenke fase ninia roupa no hariis ho bee moos. Nuneʼe nia sei sai moos.+ 14 Iha loron ualu, nia tenke lori manu-lakateu rua ka manu-pombu oan rua+ hodi bá iha Jeová nia oin iha odamatan tenda reuniaun nian no fó manu sira-neʼe ba amlulik. 15 Amlulik tenke hasaʼe manu ida nuʼudar sakrifísiu sala nian no ida seluk nuʼudar sakrifísiu sunu nian, ho ida-neʼe, amlulik sei hamoos ema neʼe nia sala iha Jeová nia oin kona-ba ninia moras neʼe.

16 “‘Se mane ida nia esperma suli sai, nia tenke hariis no nia sei sai la moos toʼo kalan.+ 17 Se esperma kona roupa ruma no sasán neʼebé halo husi animál nia kulit, nia tenke fase buat sira-neʼe hotu ho bee, no neʼe sei sai la moos toʼo kalan.

18 “‘Kuandu mane ida toba* ho feto ida no ninia esperma suli sai, sira tenke hariis. Sira sei sai la moos toʼo kalan.+

19 “‘Se feto ida nia raan sai tanba menstruasaun, nia sei kontinua la moos durante loron hitu.+ Ema neʼebé kona nia sei sai la moos toʼo kalan.+ 20 Fatin hotu neʼebé nia toba bá durante tempu neʼebé nia la moos tanba ninia menstruasaun, neʼe sei sai la moos, no buat hotu neʼebé nia tuur iha leten sei sai la moos.+ 21 Ema neʼebé kona feto neʼe nia kama tenke fase ninia roupa no hariis. Nia sei sai la moos toʼo kalan. 22 Ema neʼebé kona sasán neʼebé feto neʼe tuur iha leten tenke fase ninia roupa no hariis. Nia sei sai la moos toʼo kalan. 23 Ema neʼebé kona kama ka sasán seluk neʼebé feto neʼe tuur ona iha leten, ema neʼe sei sai la moos toʼo kalan.+ 24 Se mane ida toba hamutuk ho nia no mane neʼe sai la moos tanba feto neʼe nia menstruasaun,+ mane neʼe sei la moos durante loron hitu, no kama neʼebé mane neʼe toba bá sei sai la moos.

25 “‘Kuandu feto ida nia raan suli sai ba loron barak+ maski neʼe laʼós tempu neʼebé baibain nia hetan menstruasaun,+ ka se nia raan suli sai ba loron barak liu fali loron neʼebé baibain nia hetan menstruasaun, nia sei sai la moos durante loron hotu neʼebé ninia raan suli sai, hanesan ho loron sira neʼebé nia sai la moos tanba ninia menstruasaun. 26 Kama neʼebé nia toba bá durante loron sira neʼebé nia raan suli sai, kama neʼe sei sai la moos hanesan ho kama neʼebé nia toba bá kuandu nia hetan menstruasaun,+ no sasán neʼebé nia tuur ona iha leten sei sai la moos hanesan ho tempu neʼebé nia hetan menstruasaun. 27 Ema neʼebé kona buat sira-neʼe sei sai la moos, no tenke fase ninia roupa no hariis. Nia sei sai la moos toʼo kalan.+

28 “‘Maibé kuandu feto neʼe nia raan suli para ona, nia tenke sura loron hitu husi tempu neʼe, no depois nia sei sai moos.+ 29 Iha loron ualu, nia tenke lori manu-lakateu rua ka manu-pombu oan rua,+ no nia sei lori manu sira-neʼe ba amlulik iha odamatan tenda reuniaun nian.+ 30 Amlulik tenke hasaʼe manu ida nuʼudar sakrifísiu sala nian no ida seluk nuʼudar sakrifísiu sunu nian; ho ida-neʼe, amlulik sei hamoos feto neʼe nia sala iha Jeová nia oin kona-ba ninia raan suli neʼebé halo nia la moos.+

31 “‘Hodi halo nuneʼe, imi sei ajuda ema Izraél sira atu bele sai moos, atu nuneʼe sira labele mate tanba sira la moos hodi hafoʼer haʼu-nia tenda santu neʼebé iha sira-nia leet.+

32 “‘Neʼe mak ukun-fuan kona-ba mane neʼebé iha moras been suli sai, mane neʼebé la moos tanba esperma sai,+ 33 no ukun-fuan kona-ba feto ida durante tempu neʼebé nia hetan menstruasaun,+ mane ka feto neʼebé iha moras been sai husi sira-nia isin,+ no mane neʼebé toba ho feto neʼebé la moos.’”

16 Jeová koʼalia ba Moisés bainhira Arão nia oan-mane naʼin-rua mate ona tanba sira hakbesik ba Jeová.+ 2 Jeová hatete ba Moisés: “Fó-hatene ba ó-nia maun Arão atu labele tama arbiru iha fatin santu+ iha kortina kotuk,+ katak iha Arka matan nia oin, atu nuneʼe nia labele mate,+ tanba haʼu sei mosu iha kalohan+ iha Arka nia matan leten.+

3 “Buat neʼebé Arão tenke lori kuandu nia tama ba fatin santu mak tuirmai neʼe: karau-aman* ida nuʼudar sakrifísiu sala nian+ no bibi-malae aman ida nuʼudar sakrifísiu sunu nian.+ 4 Nia tenke uza unuk santu husi hena-liñu,+ no uza kalsa badak* husi hena-liñu+ atu taka nia isin, no nia tenke kesi sintu husi hena-liñu+ no tenke tau turbante* husi hena-liñu ba nia ulun.+ Buat sira-neʼe mak roupa santu.+ Nia tenke hariis ho bee+ no hatais roupa sira-neʼe.

5 “Povu Izraél+ tenke fó ba nia bibi-timur oan* rua ba sakrifísiu sala nian no bibi-malae aman ida ba sakrifísiu sunu nian.

6 “Tuirmai Arão tenke hasaʼe karau-aman ba sakrifísiu sala nian, ba ninia an rasik, ho ida-neʼe nia sei hamoos ninia sala+ no ninia umakain nia sala.

7 “Depois neʼe, Arão tenke foti bibi-timur rua neʼe no lori sira mai hodi hamriik iha Jeová nia oin iha odamatan ba tenda reuniaun nian. 8 Arão sei dada sorteiu* kona-ba bibi-timur rua neʼe, atu hatene bibi ida-neʼebé mak sei sai Jeová nian no ida-neʼebé mak sei sai Azazel* nian. 9 Arão sei lori bibi-timur neʼebé sai Jeová nian liuhusi dada sorteiu+ no hasaʼe neʼe nuʼudar sakrifísiu sala nian. 10 Maibé kona-ba bibi-timur Azazel nian neʼebé deside liuhusi dada sorteiu, nia tenke lori neʼe moris hodi hamriik iha Jeová nia oin no halo serimónia hamoos sala nian iha bibi neʼe nia leten, no husik livre bibi neʼe ba rai-fuik+ nuʼudar bibi Azazel nian.

11 “Arão tenke hasaʼe karau-aman ba sakrifísiu sala nian, ba ninia an rasik, hodi hamoos ninia sala no ninia umakain nia sala; depois neʼe, nia sei oho karau-aman ba sakrifísiu sala nian, neʼebé hasaʼe ba nia an rasik.+

12 “Tuirmai Arão sei foti fatin insensu nian+ neʼebé nakonu ho ahi-klaak husi altár leten+ iha Jeová nia oin no foti insensu morin+ neʼebé diʼak liman isin rua, no nia sei lori buat sira-neʼe ba fatin santu iha kortina kotuk.+ 13 Nia mós sei tau insensu ba ahi iha Jeová nia oin,+ no insensu nia suar sei taka Arka nia matan,+ katak Arka Aliansa nian,*+ atu nuneʼe nia labele mate.

14 “Arão tenke foti karau-aman nia raan balu+ no hisik neʼe ho ninia liman-fuan iha Arka nia matan oin iha parte leste, no nia sei hisik raan balu dala hitu iha Arka nia matan oin+ ho ninia liman-fuan.

15 “Tuirmai Arão tenke oho bibi-timur ba sakrifísiu sala nian, neʼebé hasaʼe ba povu neʼe,+ no nia sei lori bibi-timur neʼe nia raan ba fatin santu iha kortina kotuk+ no halo hanesan ho buat neʼebé nia halo ona ba raan+ husi karau-aman; nia tenke hisik raan ba Arka nia matan oin.

16 “Arão tenke hamoos fatin santu husi ema Izraél nia hahalok la moos* no husi sira-nia hahalok kontra no sira-nia sala,+ no neʼe mak buat neʼebé nia tenke halo ba tenda reuniaun nian neʼebé iha sira-nia leet, katak sira neʼebé halo hahalok la moos.

17 “Ema seluk labele tama iha tenda reuniaun nian husi tempu neʼebé Arão tama atu hamoos ema nia sala iha fatin santu toʼo nia sai fali. Nia sei hamoos ninia sala no ninia umakain nia sala+ no kongregasaun Izraél tomak nia sala.+

18 “Tuirmai Arão sei sai hodi laʼo ba altár+ neʼebé iha Jeová nia oin, no nia sei halo santu altár neʼe, no nia sei foti karau-aman nia raan balu no bibi-timur nia raan balu no kose iha dikur sira iha altár nia sorin hotu. 19 Nia mós tenke hisik raan balu iha altár leten ba dala hitu ho ninia liman-fuan hodi bele hamoos altár neʼe no halo santu neʼe husi ema Izraél nia hahalok neʼebé la moos.

20 “Bainhira Arão remata ona serimónia hamoos sala nian+ ba fatin santu no ba tenda reuniaun nian no altár,+ nia mós sei lori bibi-timur neʼebé moris.+ 21 Arão sei tau nia liman rua ba bibi-timur moris nia ulun no fó sai Izraél nia sala no sira-nia hahalok kontra hotu, no neʼe hanesan nia tau sala sira-neʼe hotu iha bibi-timur neʼe nia ulun+ no nia haruka mane neʼebé simu knaar* atu husik livre bibi-timur neʼe ba rai-fuik. 22 Bibi-timur neʼe mak sei lori sira-nia sala hotu+ iha ninia leten hodi tama ba rai-maran,+ no nia sei husik livre bibi-timur neʼe ba rai-fuik.+

23 “Depois neʼe, Arão tenke tama ba tenda reuniaun nian no hasai ninia roupa husi hena-liñu neʼebé nia uza bainhira tama ba fatin santu, no nia sei husik roupa sira-neʼe iha neʼebá. 24 Nia tenke hariis+ iha área santu no uza ninia roupa;+ tuirmai nia sei sai no hasaʼe ninia sakrifísiu sunu nian+ no povu nia sakrifísiu sunu nian,+ ho ida-neʼe, nia sei hamoos ninia sala rasik no povu nia sala.+ 25 Nia sei sunu naʼan bokur husi sakrifísiu sala nian atu halo suar iha altár leten.

26 “Mane neʼebé lori sai bibi-timur Azazel nian+ tenke fase ninia roupa no hariis, depois neʼe, nia bele tama ba povu nia hela-fatin.

27 “Karau-aman no bibi-timur ba sakrifísiu sala nian, neʼebé ninia raan lori tama ona ba fatin santu atu hamoos sala, tenke lori ba povu nia hela-fatin nia liʼur, no tenke sunu animál sira-neʼe nia kulit, isin no teen.+ 28 Ema neʼebé sunu buat hotu neʼe tenke fase ninia roupa no hariis, depois neʼe, nia bele tama ba povu nia hela-fatin.

29 “Neʼe sei sai nuʼudar ukun-fuan ba nafatin ba imi: Iha loron sanulu fulan-hitu, imi tenke hatudu katak imi triste* tanba imi-nia sala no imi labele halo serbisu ida,+ maski rai-naʼin ka ema estranjeiru neʼebé hela iha imi-nia leet. 30 Iha loron neʼe sei iha serimónia atu hamoos imi-nia sala,+ atu fó sai katak imi moos* ona. Imi sei sai moos husi imi-nia sala hotu iha Jeová nia oin.+ 31 Neʼe mak loron Sábadu ida atu imi deskansa husi serbisu hotu, no imi tenke hatudu katak imi triste tanba imi-nia sala.+ Neʼe mak ukun-fuan neʼebé ba nafatin.

32 “Amlulik neʼebé hili* ona+ no ordena* ona atu serbí nuʼudar amlulik*+ hodi troka ninia aman,+ sei halo serimónia hamoos sala nian no uza roupa husi hena-liñu,+ katak roupa santu.+ 33 Nia sei halo santu fatin sagradu,+ tenda reuniaun nian+ no altár;+ no nia sei hamoos amlulik sira-nia sala no kongregasaun tomak nia sala.+ 34 Neʼe sei sai nuʼudar ukun-fuan ba nafatin ba imi,+ atu hamoos ema Izraél nia sala hotu tinan ida dala ida.”+

Entaun Arão halo tuir duni mandamentu neʼebé Jeová fó sai ona ba Moisés.

17 Jeová dehan tan ba Moisés: 2 “Koʼalia ba Arão no ninia oan-mane sira no ba ema Izraél hotu no hatete ba sira: ‘Jeová fó mandamentu tuirmai neʼe:

3 “‘“Se ema ida husi umakain Izraél oho karau-aman ka bibi-malae aman* ka bibi-timur iha povu nia hela-fatin ka se nia oho iha hela-fatin nia liʼur, 4 maibé nia la lori neʼe ba odamatan tenda reuniaun nian atu hasaʼe nuʼudar sakrifísiu ba Jeová iha Jeová nia tenda santu nia oin, ema neʼe sei hetan sala kona-ba raan. Nia fakar ona raan, no ema neʼe tenke mate hodi halakon husi povu nia leet. 5 Ho ida-neʼe, ema Izraél labele oho tan animál sakrifísiu nian iha rai-luan, maibé sira sei lori animál sira-neʼe ba Jeová iha odamatan tenda reuniaun nian ba amlulik. Sira tenke fó animál sira-neʼe nuʼudar sakrifísiu dame nian ba Jeová.+ 6 Depois neʼe, amlulik tenke hisik raan ba Jeová nia altár leten iha odamatan tenda reuniaun nian no sunu animál nia bokur hodi halo suar no ninia morin halo Jeová kontente.*+ 7 Hodi nuneʼe sira labele hasaʼe tan sakrifísiu ba maromak sira neʼebé halo hanesan bibi-timur,*+ neʼebé sira adora hodi la hatudu laran-metin.*+ Neʼe sei sai nuʼudar ukun-fuan ba nafatin iha imi-nia jerasaun hotu.”’

8 “Ó tenke dehan ba sira: ‘Se ema ida husi umakain Izraél ka ema estranjeiru ida neʼebé hela iha imi-nia leet fó sakrifísiu sunu nian ka sakrifísiu ida 9 no la lori neʼe ba odamatan tenda reuniaun nian atu hasaʼe ba Jeová, ema neʼe tenke mate hodi halakon husi povu nia leet.+

10 “‘Se ema ida husi umakain Izraél ka ema estranjeiru ida neʼebé hela iha imi-nia leet han raan husi kriatura ruma,+ haʼu sei la simu ema* neʼe tanba nia han raan, no haʼu sei oho nia husi povu nia leet. 11 Tanba kriatura hotu nia moris* mak iha ninia raan,+ no haʼu fó ona raan ba altár leten+ atu imi bele hamoos imi-nia sala rasik, tanba raan mak sei hamoos sala+ liuhusi moris neʼebé iha raan neʼe nia laran. 12 Tan neʼe mak haʼu dehan ba povu Izraél: “Imi* labele han raan, no ema estranjeiru neʼebé hela iha imi-nia leet+ mós labele han raan.”+

13 “‘Se ema Izraél ida ka ema estranjeiru ida neʼebé hela iha imi-nia leet kasa no kaer animál fuik ida ka manu ida neʼebé bele han, nia tenke fakar animál neʼe nia raan+ no taka ho rai-rahun. 14 Tanba kriatura hotu nia moris* mak iha ninia raan. Tan neʼe mak haʼu dehan ba ema Izraél: “Imi labele han raan husi kriatura hotu tanba kriatura hotu nia moris* mak iha ninia raan. Ema neʼebé han raan tenke hetan kastigu-mate.”+ 15 Se ema* ida, maski rai-naʼin ka ema estranjeiru, han naʼan husi animál neʼebé mate mesak deʼit ka animál neʼebé animál fuik mak lees mate,+ entaun nia tenke fase ninia roupa no hariis. No nia sei sai la moos* toʼo kalan.+ Tuirmai nia sei sai moos* fali. 16 Maibé se nia la fase ninia roupa no hariis, nia sei hatán ba ninia sala.’”+

18 Jeová koʼalia tan ba Moisés, hodi dehan: 2 “Koʼalia ba ema Izraél no hatete ba sira: ‘Haʼu mak Jeová, imi-nia Maromak.+ 3 Imi labele hatudu hahalok hanesan ema iha rai-Ejitu, rai neʼebé uluk imi hela bá, no imi labele halo buat neʼebé ema iha rai-Kanaan halo, rai neʼebé haʼu sei lori imi bá.+ No imi labele halo tuir sira-nia toman. 4 Imi tenke halo tuir haʼu-nia desizaun no ukun-fuan.+ Haʼu mak Jeová, imi-nia Maromak. 5 Imi tenke moris tuir haʼu-nia ukun-fuan no haʼu-nia desizaun sira; ema neʼebé halo nuneʼe sei hetan moris liuhusi buat sira-neʼe.+ Haʼu mak Jeová.

6 “‘Ema ida labele hakbesik ba ninia família rasik atu halo relasaun seksuál* ho nia.+ Haʼu mak Jeová. 7 Ó labele halo relasaun seksuál ho ó-nia aman, no ó labele halo relasaun seksuál ho ó-nia inan. Nia mak ó-nia inan, no ó labele halo relasaun seksuál ho nia.

8 “‘Ó labele halo relasaun seksuál ho ó-nia aman nia feen.+ Ida-neʼe katak ó hamoe ó-nia aman.*

9 “‘Ó labele halo relasaun seksuál ho ó-nia feton, katak ó-nia aman nia oan-feto ka ó-nia inan nia oan-feto, maski nia moris iha umakain neʼebé hanesan ka la hanesan.+

10 “‘Ó labele halo relasaun seksuál ho ó-nia oan-mane nia oan-feto ka ó-nia oan-feto nia oan-feto, tanba halo relasaun seksuál ho sira sei hamoe ó-nia an rasik.

11 “‘Ó labele halo relasaun seksuál ho ó-nia aman nia feen nia oan-feto, katak ó-nia aman nia oan, tanba nia mak ó-nia feton.

12 “‘Ó labele halo relasaun seksuál ho ó-nia aman nia feton. Nia mak ó-nia aman nia família rasik.+

13 “‘Ó labele halo relasaun seksuál ho ó-nia inan nia biin ka alin-feto, tanba nia mak ó-nia inan nia família rasik.

14 “‘Ó labele hamoe ó-nia aman nia maun ka alin* hodi halo relasaun seksuál ho ninia feen. Nia mak ó-nia tia.+

15 “‘Ó labele halo relasaun seksuál ho ó-nia feto-foun.+ Nia mak ó-nia oan-mane nia feen, no ó labele halo relasaun seksuál ho nia.

16 “‘Ó labele halo relasaun seksuál ho ó-nia maun ka alin nia feen,+ tanba ida-neʼe hamoe ó-nia maun ka alin.*

17 “‘Ó labele halo relasaun seksuál ho feto ida no mós ninia oan-feto.+ Ó labele halo relasaun seksuál ho ninia oan-mane nia oan-feto ka ninia oan-feto nia oan-feto. Sira mak ninia família rasik; neʼe mak hahalok neʼebé foʼer tebes.*

18 “‘Ó labele hola tan ó-nia feen nia biin ka alin-feto nuʼudar feen segundu+ no halo relasaun seksuál ho nia bainhira ninia biin ka alin moris hela.

19 “‘Ó labele hakbesik ba feto ida hodi halo relasaun seksuál durante tempu neʼebé nia la moos* tanba menstruasaun.+

20 “‘Ó labele halo relasaun seksuál ho ó-nia maluk* nia feen hodi halo ó-nia an sai la moos.*+

21 “‘Ó labele fó* ó-nia oan ruma ba Molec.*+ Ó labele hafoʼer ó-nia Maromak nia naran iha dalan hanesan neʼe.+ Haʼu mak Jeová.

22 “‘Ó labele toba* ho mane ida hanesan ó toba ho feto ida.+ Neʼe mak hahalok neʼebé aat tebes.

23 “‘Mane ida labele halo relasaun seksuál ho animál no sai la moos ho hahalok neʼe; no feto ida labele fó ninia an hodi halo relasaun seksuál ho animál.+ Neʼe mak hahalok neʼebé laʼós baibain.

24 “‘Keta hafoʼer imi-nia an ho hahalok sira-neʼe, tanba ema iha nasaun seluk halo hahalok sira-neʼe hotu, no neʼe halo sira-nia an sai la moos; haʼu sei duni sai sira husi imi-nia oin.+ 25 Tan neʼe mak rai neʼe sai la moos, no haʼu sei lori kastigu ba ema iha rai neʼe tanba sira-nia sala, no rai sei muta sai sira.+ 26 Maibé kona-ba imi, imi tenke halo tuir haʼu-nia ukun-fuan no desizaun sira,+ no imi labele halo hahalok aat sira-neʼe, maski ema rai-naʼin ka ema estranjeiru neʼebé hela iha imi-nia leet.+ 27 Tanba ema neʼebé hela iha rai neʼe antes imi mak halo hahalok aat hotu neʼe,+ no agora rai neʼe sai la moos ona. 28 Maibé, se imi la hafoʼer rai neʼe, rai neʼe mós sei la muta sai imi hanesan nia muta sai nasaun sira antes imi. 29 Se ema ruma halo hahalok aat sira-neʼe ida, ema* neʼe tenke mate hodi halakon husi povu nia leet. 30 Imi tenke kumpre imi-nia obrigasaun ba haʼu hodi la halo tuir toman aat sira-neʼe neʼebé ema halo ona antes imi,+ atu nuneʼe imi la halo imi-nia an sai la moos tanba hahalok sira-neʼe. Haʼu mak Jeová, imi-nia Maromak.’”

19 Jeová koʼalia tan ba Moisés, hodi dehan: 2 “Koʼalia ba povu Izraél tomak no hatete ba sira: ‘Imi tenkesér sai santu, tanba haʼu Jeová, imi-nia Maromak, mak santu.+

3 “‘Imi ida-idak tenke respeitu* imi-nia inan no aman,+ no imi tenke halaʼo haʼu-nia Sábadu.+ Haʼu mak Jeová, imi-nia Maromak. 4 Keta adora maromak sira neʼebé folin-laek+ ka halo maromak sira husi besi ba imi-nia an.+ Haʼu mak Jeová, imi-nia Maromak.

5 “‘Se imi hasaʼe sakrifísiu dame nian ba Jeová,+ imi tenke hasaʼe sakrifísiu neʼe iha dalan neʼebé Maromak bele simu imi.+ 6 Imi tenke han naʼan husi sakrifísiu neʼe iha loron neʼe kedas no iha loron tuirmai, maibé naʼan neʼebé restu toʼo loron terseiru imi tenke sunu tiha.+ 7 Maibé, se imi han naʼan balu neʼe iha loron terseiru, ida-neʼe mak buat neʼebé la diʼak no haʼu sei la simu. 8 Ema neʼebé han naʼan neʼe sei hatán ba ninia sala tanba nia hafoʼer ona buat santu ba Jeová, no ema neʼe tenke mate hodi halakon husi povu nia leet.

9 “‘Bainhira imi koʼa ai-han sira iha imi-nia toʼos, imi labele koʼa hotu ai-han iha imi-nia toʼos ninin sira no imi labele hili fali buat restu neʼebé imi koʼa.+ 10 No mós imi labele halibur uvas-fuan restu husi imi-nia toʼos-uvas no imi labele hili uvas-fuan neʼebé namkari iha toʼos-uvas. Imi tenke husik neʼe ba ema kiak sira*+ no ema estranjeiru. Haʼu mak Jeová, imi-nia Maromak.

11 “‘Imi labele naʼok,+ labele lohi+ no labele hamatak imi-nia maluk. 12 Imi labele jura hodi haʼu-nia naran atu bosok,+ tanba ida-neʼe hafoʼer imi-nia Maromak nia naran. Haʼu mak Jeová. 13 Imi labele lohi hodi hamatak imi-nia maluk,+ no imi labele naʼok.*+ Imi labele rai hela serbisu-naʼin nia kolen ba kalan tomak toʼo dadeer.+

14 “‘Imi labele fó-malisan ba* ema tilun-diuk ka tau fatuk atu halo ema matan-delek sidi,+ no imi tenke hamtaʼuk imi-nia Maromak.+ Haʼu mak Jeová.

15 “‘Imi labele hatudu hahalok todan ba sorin kuandu tesi-lia. Imi labele todan ba sorin ba ema kiak ka apoia deʼit ema riku.+ Imi tenke tesi-lia ba imi-nia maluk tuir justisa.

16 “‘Imi labele koʼalia aat hodi hafoʼer ema nia naran no habelar liafuan aat neʼe iha povu nia leet.+ Imi labele hamriik hasoru imi-nia maluk nia moris.*+ Haʼu mak Jeová.

17 “‘Imi labele odi imi-nia maluk iha imi-nia laran.+ Imi tenke hakaʼas an atu fó konsellu ba imi-nia maluk,+ atu nuneʼe imi la lori sala hamutuk ho nia.

18 “‘Imi labele selu fali hahalok aat+ ka rai odi ba imi-nia maluk ida iha povu nia leet, no imi tenke hadomi imi-nia maluk hanesan imi-nia an rasik.+ Haʼu mak Jeová.

19 “‘Imi tenke halo tuir haʼu-nia ukun-fuan: Imi labele fó kaben ba animál oin rua. Imi labele kuda fini oin rua iha imi-nia toʼos,+ no imi labele uza roupa neʼebé suku husi kabas oin rua.+

20 “‘Se mane ida toba ho feto ida no halo relasaun seksuál ho nia no feto neʼe mak atan ida neʼebé ninia naʼi promete ona atu sai mane seluk nia feen, maibé feto neʼe nia folin seidauk selu kotu ka seidauk husik livre, entaun sira tenke simu kastigu. Maibé, imi labele oho sira, tanba feto neʼe seidauk sai livre. 21 Mane neʼe tenke lori ninia sakrifísiu taka sala nian ba Jeová iha odamatan tenda reuniaun nian, katak bibi-malae aman ba sakrifísiu taka sala nian.+ 22 Amlulik sei hamoos ema neʼe nia sala liuhusi bibi-malae aman ba sakrifísiu taka sala nian iha Jeová nia oin tanba sala neʼebé ema neʼe halo ona, no nia sei hetan perdua ba ninia sala neʼe.

23 “‘Bainhira imi tama ba rai neʼe no imi kuda ai-horis ruma atu han, imi tenke haree ai neʼe nia fuan nuʼudar buat neʼebé la moos no bandu. Ai neʼe sei bandu* ba imi durante tinan tolu. Imi labele han nia fuan. 24 Maibé iha tinan haat, ai neʼe nia fuan hotu sei sai santu no neʼe sei sai tempu haksolok nian iha Jeová nia oin.+ 25 Tuirmai, iha tinan lima, imi bele han ai neʼe nia fuan, no ai neʼe sei fó fuan barak tan ba imi. Haʼu mak Jeová, imi-nia Maromak.

26 “‘Imi labele han buat neʼebé iha raan.+

“‘Imi labele buka sinál atu siʼik futuru ka halo masonik.+

27 “‘Imi labele tesi* imi-nia fuuk iha ulun sorin-sorin deʼit* ka tesi aat imi-nia hasarahun ninin.+

28 “‘Imi labele halo kanek iha imi-nia isin tanba ema mate,*+ no imi labele halo tato iha imi-nia isin. Haʼu mak Jeová.

29 “‘Keta hamoe imi-nia oan-feto hodi halo nia sai feto-aat,*+ se lae imi-nia rai sei sai foʼer tanba ema faʼan sira-nia an no nakonu ho hahalok foʼer.+

30 “‘Imi tenke halaʼo haʼu-nia Sábadu,+ no imi tenke hatudu respeitu* ba haʼu-nia fatin sagradu. Haʼu mak Jeová.

31 “‘Imi labele bá atu husu ema neʼebé koko atu koʼalia ho ema mate,+ no labele husu ema neʼebé siʼik futuru+ tanba neʼe sei halo imi sai la moos.* Haʼu mak Jeová, imi-nia Maromak.

32 “‘Imi tenke hatudu respeitu ba ema neʼebé fuuk mutin,+ no imi tenke hafolin katuas sira,+ no imi tenke hamtaʼuk imi-nia Maromak.+ Haʼu mak Jeová.

33 “‘Se ema estranjeiru ida hela ho imi iha imi-nia rai, imi labele halo aat ba nia.+ 34 Imi tenke haree ema estranjeiru neʼebé hela iha imi-nia leet hanesan ema rai-naʼin;+ no imi tenke hadomi sira hanesan imi-nia an rasik, tanba uluk imi hela iha rai-Ejitu nuʼudar ema estranjeiru.+ Haʼu mak Jeová, imi-nia Maromak.

35 “‘Kuandu imi sukat buat ruma nia naruk, todan, ka sukat buat been ruma, imi labele bosok.+ 36 Imi tenke uza dasin neʼebé loos, buat neʼebé loos atu sukat todan, sukat buat neʼebé maran* no sukat buat neʼebé been.*+ Haʼu mak Jeová, imi-nia Maromak, neʼebé lori imi sai husi rai-Ejitu. 37 Tan neʼe, imi tenke halo tuir haʼu-nia ukun-fuan no desizaun hotu, no imi tenke moris tuir buat sira-neʼe.+ Haʼu mak Jeová.’”

20 Jeová koʼalia tan ba Moisés, hodi dehan: 2 “Ó tenke koʼalia ba ema Izraél: ‘Se ema Izraél ida no ema estranjeiru ida neʼebé hela iha Izraél nia leet entrega ninia oan ruma ba Molec,* imi tenke oho tiha ema neʼe.+ Povu iha rai neʼe tenke tuda mate nia. 3 Haʼu rasik sei la simu ema neʼe, no haʼu sei oho nia hodi halakon nia husi povu nia leet, tanba nia entrega ona ninia oan balu ba Molec no hafoʼer haʼu-nia fatin santu+ no haʼu-nia naran santu. 4 Se povu iha rai neʼe ho neon taka matan ba buat neʼebé mane neʼe halo kuandu nia entrega ninia oan ba Molec no sira la oho nia,+ 5 entaun haʼu rasik sei la simu mane neʼe no ninia família.+ Haʼu sei oho mane neʼe hodi halakon nia husi povu nia leet hamutuk ho ema hotu neʼebé mós adora Molec hodi la hatudu laran-metin ba haʼu.*

6 “‘Se ema* ruma husu konsellu ba ema neʼebé koko atu koʼalia ho ema mate+ no ema neʼebé siʼik futuru+ hodi la hatudu laran-metin ba haʼu,* haʼu sei kontra hasoru ema* neʼe no oho nia hodi halakon nia husi povu nia leet.+

7 “‘Imi tenke halo santu* imi-nia an no sai santu,+ tanba haʼu mak Jeová, imi-nia Maromak. 8 Imi tenke halo tuir haʼu-nia ukun-fuan no kumpre ida-neʼe.+ Haʼu mak Jeová, Maromak neʼebé halo imi santu.+

9 “‘Se ema ruma fó-malisan ba* ninia aman ka inan, imi tenke oho tiha ema neʼe.+ Tanba nia fó-malisan ba ninia aman ka inan, entaun nia rasik tenke lori todan ba ninia sala.*

10 “‘Kona-ba mane neʼebé halo sala seksuál ho mane seluk nia feen,* imi tenke oho tiha mane no feto neʼebé halo sala seksuál neʼe.*+ 11 Mane neʼebé toba* ho ninia aman nia feen mak halo moe ninia aman.*+ Entaun imi tenke oho tiha mane no feto neʼe. Sira tenke lori todan ba sira-nia sala rasik. 12 Se mane ida toba* ho ninia feto-foun, entaun imi tenke oho hotu sira naʼin-rua. Neʼe mak hahalok neʼebé laʼós baibain. Sira tenke lori todan ba sira-nia sala rasik.+

13 “‘Se mane ida toba* ho mane seluk hanesan nia toba ho feto ida, entaun sira naʼin-rua halo ona buat neʼebé aat tebes.+ Imi tenke oho tiha sira. Sira tenke lori todan ba sira-nia sala rasik.

14 “‘Se mane ida hola feto ida no mós halo relasaun seksuál ho feto neʼe nia inan, neʼe mak hahalok neʼebé foʼer tebes.*+ Imi tenke sunu sira hotu,+ atu nuneʼe hahalok foʼer labele kontinua iha imi-nia leet.

15 “‘Se mane ida halo relasaun seksuál ho animál, imi tenke oho tiha nia, no imi mós tenke oho animál neʼe.+ 16 Se feto ida hakbesik ba animál atu halo relasaun seksuál ho animál neʼe,+ imi tenke oho feto neʼe no animál neʼe. Sira tenke mate. Sira tenke lori todan ba sira-nia sala rasik.

17 “‘Se mane ida halo relasaun seksuál ho ninia feton, katak ninia aman nia oan-feto ka ninia inan nia oan-feto, no se nia haree feto neʼe nia isin-tanan no feto neʼe haree ninia isin-tanan, neʼe mak hahalok foʼer.+ Sira tenke hetan kastigu-mate iha povu nia oin. Nia hamoe ona ninia feton.* Nia tenke hatán ba ninia sala.

18 “‘Se mane ida toba* ho feto neʼebé hetan menstruasaun no halo relasaun seksuál ho feto neʼe, entaun sira la hatudu respeitu ba feto neʼe nia raan.+ Sira naʼin-rua tenke hetan kastigu-mate hodi halakon husi povu nia leet.

19 “‘Ó labele halo relasaun seksuál ho ó-nia inan nia biin ka alin ka ó-nia aman nia biin ka alin, tanba ida-neʼe hamoe ó-nia família rasik.+ Ema sira neʼebé halo nuneʼe tenke hatán ba sira-nia sala. 20 Mane neʼebé toba* ho ninia tiu nia feen hamoe ona ninia tiu.*+ Entaun feto no mane neʼe tenke hatán ba sira-nia sala. Sira tenke mate hodi la iha oan. 21 Se mane ida hola ninia maun ka alin nia feen, neʼe mak hahalok neʼebé aat tebes.+ Nia hamoe ona ninia maun ka alin.* Sira tenke mate hodi la iha oan.

22 “‘Imi tenke halo tuir haʼu-nia ukun-fuan no desizaun hotu+ no moris tuir ida-neʼe,+ atu nuneʼe rai neʼebé haʼu lori imi bá atu hela sei la muta sai imi.+ 23 Imi labele halo tuir toman husi nasaun sira neʼebé haʼu sei duni sai husi imi-nia oin,+ tanba sira halo hahalok aat sira-neʼe hotu no haʼu hakribi sira.+ 24 Tan neʼe mak haʼu dehan ba imi: “Imi sei foti sira-nia rai, no haʼu sei fó rai neʼe ba imi nuʼudar liman-rohan, rai neʼebé iha susubeen no bani-been barak.+ Haʼu mak Jeová, imi-nia Maromak, neʼebé haketak ona imi husi povu sira seluk.”+ 25 Imi tenke haketak animál neʼebé moos no la moos, no haketak manu sira neʼebé moos no la moos;+ imi labele hafoʼer imi-nia an tanba animál ida ka manu ka animál neʼebé dolar iha rai neʼebé haʼu haketak ona nuʼudar buat neʼebé la moos ba imi.+ 26 Imi tenke sai santu ba haʼu tanba haʼu, Jeová, mak santu,+ no haʼu haketak ona imi husi povu sira seluk hodi sai haʼu-nian.+

27 “‘Imi tenke oho tiha mane ka feto neʼebé koko atu koʼalia ho ema mate ka siʼik futuru.+ Povu neʼe tenke tuda mate sira. Sira tenke lori todan ba sira-nia sala.’”

21 Jeová dehan tan ba Moisés: “Koʼalia ba amlulik Arão nia oan-mane sira, no hatete ba sira: ‘Ema ida keta hafoʼer ninia an tanba ema* neʼebé mate iha povu nia leet.+ 2 Maibé nia bele hafoʼer ninia an tanba ninia família rasik, ninia inan, aman, oan-mane, oan-feto, maun ka alin-mane, 3 no nia bele hafoʼer ninia an tanba ninia feton mate se ninia feton neʼe mak virjen no hela ho nia* no seidauk kaben. 4 Maibé nia labele halo nuneʼe se feto neʼe sai ona feen ba mane ida iha povu nia leet tanba neʼe hamoe ninia an rasik. 5 Amlulik sira labele koi molik sira-nia ulun+ ka koi sira-nia hasarahun ninin ka halo kanek iha sira-nia isin.+ 6 Sira tenke sai santu ba sira-nia Maromak,+ no sira labele hafoʼer sira-nia Maromak nia naran,+ tanba sira mak hasaʼe Jeová nia sakrifísiu neʼebé sunu iha ahi, katak hasaʼe ai-han* ba sira-nia Maromak, no sira tenkesér santu.+ 7 Sira labele kaben ho feto-aat,*+ feto neʼebé ema hafoʼer ona,* ka feto neʼebé soe-malu ho nia laʼen,+ tanba amlulik mak santu ba ninia Maromak. 8 Imi povu sira tenke haree amlulik nuʼudar santu,+ tanba nia mak hasaʼe imi-nia Maromak nia ai-han. Nia tenke sai santu ba imi, tanba haʼu Jeová mak santu, haʼu mak Maromak neʼebé halo imi santu.+

9 “‘Se amlulik nia oan-feto hafoʼer ninia an hodi sai feto-aat,* neʼe katak nia hamoe ninia aman. Imi tenke sunu feto neʼe.+

10 “‘Amlulik boot neʼebé hili ona husi ninia maun-alin sira-nia leet, neʼebé simu ona mina santu* iha ninia ulun+ no ordena* ona atu uza roupa amlulik nian,+ nia labele husik ninia fuuk sabraut ka lees ninia roupa.+ 11 Nia labele hakbesik ba ema nia mate-isin;*+ nia labele hafoʼer ninia an, maski ninia aman ka inan mak mate. 12 Nia labele sai husi fatin sagradu no labele hafoʼer ninia Maromak nia fatin sagradu,+ tanba sinál dedikasaun nian, katak ninia Maromak nia mina santu+ mak iha ninia ulun leten. Haʼu mak Jeová.

13 “‘Nia tenke hola feto virjen nuʼudar ninia feen.+ 14 Nia labele kaben ho feto-faluk, feto neʼebé soe-malu, feto neʼebé mane hafoʼer ona, ka feto-aat; maibé nia tenke hola feto virjen iha povu nia leet nuʼudar ninia feen. 15 Nia labele hamoe ninia oan no bei-oan sira iha povu nia leet,+ tanba haʼu mak Jeová, Maromak neʼebé halo nia santu.’”*

16 Jeová koʼalia tan ba Moisés, hodi dehan: 17 “Hatete ba Arão: ‘Mane sira husi ó-nia oan no bei-oan sira neʼebé aleijadu labele hakbesik atu hasaʼe ai-han ba Maromak ba nafatin. 18 Se mane ida iha aleijadu ruma, nia labele hakbesik ba fatin santu: mane neʼebé matan-delek ka ain-aat ka inus-sakat, ka liman sorin ka ain sorin ida naruk liu, 19 ka mane neʼebé ain ruin tohar ka liman ruin tohar, 20 kotuk bonko ka ema tuuk,* ka mane neʼebé iha problema iha matan, ka moras kulit,* ka infesaun kulit nian* ka mane neʼebé ninia tolun iha oin-lulik estraga ona.+ 21 Mane ida husi amlulik Arão nia oan no bei-oan neʼebé aleijadu labele hasaʼe Jeová nia sakrifísiu neʼebé sunu iha ahi. Tanba nia mak aleijadu, entaun nia labele hakbesik atu hasaʼe ai-han ba Maromak. 22 Nia bele han ninia Maromak nia ai-han husi buat neʼebé santu liu hotu+ no mós buat neʼebé santu.+ 23 Maibé, nia labele hakbesik ba kortina+ ka altár,+ tanba nia aleijadu; no nia labele hafoʼer haʼu-nia fatin sagradu,+ tanba haʼu mak Jeová, Maromak neʼebé halo sira santu.’”+

24 Entaun Moisés koʼalia ba Arão no ninia oan-mane sira no ba ema Izraél hotu.

22 Jeová koʼalia tan ba Moisés, hodi dehan: 2 “Koʼalia ba Arão no ninia oan-mane sira katak sira tenke kuidadu kona-ba oinsá hasaʼe* sakrifísiu santu neʼebé ema Izraél hasaʼe ba haʼu,+ no sira labele hafoʼer haʼu-nia naran santu.+ Haʼu mak Jeová. 3 Hatete ba sira: ‘Iha imi-nia jerasaun hotu, se imi-nia oan ida la moos* no hakbesik ba sakrifísiu santu neʼebé ema Izraél halo santu ona ba Jeová, ema* neʼe tenke mate hodi halakon husi haʼu-nia oin.+ Haʼu mak Jeová. 4 Mane ida husi Arão nia oan no bei-oan sira neʼebé iha moras-lepra+ ka moras been sai husi oin-lulik+ labele han sakrifísiu santu toʼo nia sai moos* ona,+ nuneʼe mós ho mane neʼebé kona ema neʼebé la moos ona tanba kaer ema nia mate-isin,*+ ka mane neʼebé esperma sai,+ 5 ka mane neʼebé kona animál kiʼik neʼebé la moos+ ka mane neʼebé kona ema neʼebé la moos tan razaun oioin.+ 6 Ema* neʼebé kona buat sira-neʼe sei sai la moos toʼo kalan no labele han sakrifísiu santu, só deʼit se nia hariis ona.+ 7 Bainhira loro-matan tun ona, nia sei sai moos, depois neʼe, nia bele han sakrifísiu santu balu tanba neʼe mak ninia ai-han.+ 8 No mós, nia labele han naʼan husi animál neʼebé mate mesak deʼit ka ida neʼebé animál fuik lees tanba nia sei sai la moos hodi han naʼan neʼe.+ Haʼu mak Jeová.

9 “‘Sira tenke kumpre sira-nia obrigasaun ba haʼu, atu nuneʼe sira labele hetan sala no mate tanba la kumpre sira-nia obrigasaun no tanba hafoʼer buat neʼebé santu. Haʼu mak Jeová, Maromak neʼebé halo sira santu.*

10 “‘Ema baibain* labele han buat neʼebé santu.+ No ema estranjeiru neʼebé nuʼudar bainaka ba amlulik ka ema neʼebé nia selu atu halo serbisu labele han buat neʼebé santu. 11 Maibé se amlulik sosa ema* ruma ho ninia osan rasik, ema neʼe bele han buat santu neʼe. Atan neʼebé moris iha ninia umakain mós bele han ninia ai-han.+ 12 Se amlulik nia oan-feto kaben ho mane neʼebé laʼós amlulik,* nia labele han ai-han husi kontribuisaun santu. 13 Maibé se amlulik nia oan-feto neʼe sai faluk ka soe-malu no nia la iha oan, no nia fila fali ba ninia aman nia uma hanesan iha tempu joven, nia bele han ninia aman nia ai-han;+ maibé ema baibain* labele han ida-neʼe.

14 “‘Se ema ida han ai-han husi sakrifísiu santu la ho neon, nia tenke fó fali neʼe ba amlulik no aumenta tan porsentu ruanulu.+ 15 Hodi nuneʼe sira labele hafoʼer sakrifísiu santu neʼebé ema Izraél fó ba Jeová,+ 16 no halo ema Izraél hetan kastigu tanba sira halo sala hodi han sakrifísiu santu; haʼu mak Jeová, Maromak neʼebé halo sira santu.’”

17 Jeová koʼalia tan ba Moisés, hodi dehan: 18 “Koʼalia ba Arão no ninia oan-mane sira no ba ema Izraél tomak no hatete ba sira: ‘Bainhira ema Izraél ida ka ema estranjeiru ida iha Izraél lori sakrifísiu sunu nian+ ba Jeová atu kumpre ninia juramentu ka atu fó sakrifísiu ho hakarak rasik,+ 19 nia tenke lori animál ida neʼebé la iha moras+ husi ninia karau-aman, bibi-malae aman,* ka bibi-timur aman, atu nuneʼe Maromak bele simu nia. 20 Imi labele fó animál neʼebé iha moras ruma,+ tanba ho ida-neʼe, Maromak sei la simu imi.

21 “‘Se mane ida fó sakrifísiu dame nian+ ba Jeová atu kumpre ninia juramentu ka nuʼudar sakrifísiu neʼebé fó ho hakarak rasik, entaun sakrifísiu neʼe tenkesér animál ida neʼebé la iha moras husi ninia karau ka bibi sira, atu Maromak bele simu nia. Animál sira-neʼe labele iha moras ida. 22 Animál neʼebé imi fó nuʼudar sakrifísiu labele matan-delek, ruin tohar, labele iha kanek, manu-raan, kanek neʼebé tasak, ka infesaun kulit nian;* imi labele fó animál sira-neʼe ba Jeová ka hasaʼe sakrifísiu hanesan neʼe iha altár leten ba Jeová. 23 Imi bele lori karau ka bibi-malae neʼebé ninia ain ida naruk liu ka badak liu hodi sai nuʼudar sakrifísiu neʼebé imi fó ho hakarak rasik, maibé labele lori neʼe nuʼudar sakrifísiu juramentu nian tanba Maromak sei la simu. 24 Imi labele lori animál ida ba Jeová se animál neʼe nia tolun iha oin-lulik aat ona ka rahun ona ka dada sai ona ka koʼa sai ona, no imi labele hasaʼe animál sira hanesan neʼe nuʼudar sakrifísiu iha imi-nia rai. 25 Imi labele hasaʼe animál hanesan neʼe husi ema estranjeiru nia liman nuʼudar ai-han* ba imi-nia Maromak, tanba neʼe la diʼak no iha moras. Maromak sei la simu buat sira-neʼe.’”

26 Jeová koʼalia tan ba Moisés, hodi dehan: 27 “Bainhira karau-aman ka bibi-malae aman* ka bibi-timur ida moris mai, ida-neʼe sei kontinua hamutuk ho ninia inan ba loron hitu,+ maibé husi loron ualu ba oin, Jeová bele simu ida-neʼe nuʼudar sakrifísiu neʼebé sunu iha ahi hodi hasaʼe ba nia. 28 Kona-ba karau ka bibi-malae, imi labele oho animál neʼe no ninia oan iha loron neʼebé hanesan.+

29 “Se imi hasaʼe sakrifísiu atu hatudu agradese ba Jeová,+ imi tenke hasaʼe neʼe hodi Maromak bele simu imi. 30 Imi tenke han ai-han husi sakrifísiu neʼe iha loron neʼe kedas. Imi labele husik buat balu toʼo dadeer.+ Haʼu mak Jeová.

31 “Imi tenke halo tuir no moris tuir haʼu-nia mandamentu sira.+ Haʼu mak Jeová. 32 Imi labele hafoʼer haʼu-nia naran santu,+ no haʼu tenke sai santu iha ema Izraél nia leet.+ Haʼu mak Jeová, Maromak neʼebé halo imi santu,+ 33 Maromak neʼebé lori imi sai husi rai-Ejitu atu hatudu ba imi katak haʼu mak Maromak.+ Haʼu mak Jeová.”

23 Jeová koʼalia tan ba Moisés, hodi dehan: 2 “Koʼalia ba ema Izraél no hatete ba sira: ‘Festa sira+ neʼebé Jeová haruka imi atu halaʼo+ mak reuniaun boot santu. Imi tenke fó sai festa sira-neʼe tuir ninia tempu:

3 “‘Imi bele halo serbisu ba loron neen, maibé iha loron hitu mak loron Sábadu hodi imi deskansa husi serbisu hotu,+ neʼe mak reuniaun boot santu. Imi labele halo serbisu naran deʼit. Neʼe mak loron Sábadu ba Jeová iha fatin hotu neʼebé imi hela bá.+

4 “‘Tuirmai neʼe mak festa sira ba Jeová tuir tempu, katak reuniaun boot santu neʼebé imi tenke fó sai tuir tempu neʼebé deside tiha ona: 5 Iha loron 14 fulan-primeiru,+ iha rai-nakaras* mak loron Páskua*+ ba Jeová.

6 “‘Iha loron 15 husi fulan neʼe mak loron primeiru ba Festa Paun Fermentu-Laek nian ba Jeová.+ Ba loron hitu imi tenke han paun neʼebé la iha fermentu.+ 7 Iha loron primeiru, imi tenke halaʼo reuniaun boot santu.+ Imi labele halo serbisu todan naran deʼit. 8 Maibé ba loron hitu imi tenke fó sakrifísiu neʼebé sunu iha ahi hodi hasaʼe ba Jeová. Iha loron hitu sei iha reuniaun boot santu. Imi labele halo serbisu todan naran deʼit.’”

9 Jeová koʼalia tan ba Moisés, hodi dehan: 10 “Koʼalia ba ema Izraél no hatete ba sira: ‘Kuandu imi tama ona ba rai neʼebé haʼu fó ba imi no imi koʼa ona sevada husi imi-nia toʼos, imi tenke lori sevada-futun ida husi imi-nia sevada primeiru+ ba amlulik.+ 11 Amlulik sei book sevada-futun neʼe bá-mai iha Jeová nia oin atu nia bele simu imi. Amlulik tenke book neʼe bá-mai iha loron depois loron Sábadu. 12 Iha loron neʼebé imi fó sevada-futun ida atu doko bá-mai, imi tenke fó mós bibi-malae aman neʼebé seidauk toʼo tinan ida no la iha moras hodi hasaʼe nuʼudar sakrifísiu sunu nian ba Jeová. 13 Imi tenke fó mós trigu uut neʼebé diʼak gomor isin rua* neʼebé kahur ona ho mina nuʼudar sakrifísiu trigu* nian, hodi sai nuʼudar sakrifísiu neʼebé sunu iha ahi atu hasaʼe ba Jeová, no ninia morin halo Maromak kontente.* Imi tenke fó tua-uvas litru ida* nuʼudar sakrifísiu hemu nian. 14 Imi labele han paun naran deʼit, ka labele han trigu* neʼebé sona ona, ka trigu foun toʼo loron neʼebé imi lori sakrifísiu ba imi-nia Maromak. Neʼe mak ukun-fuan ba nafatin ba imi-nia jerasaun hotu iha fatin hotu neʼebé imi hela bá.

15 “‘Imi tenke sura semana hitu* husi loron depois loron Sábadu neʼe, katak husi loron neʼebé imi lori imi-nia sevada-futun ida nuʼudar sakrifísiu doko bá-mai nian.+ Imi tenke sura semana hitu neʼe tomak. 16 Imi tenke sura loron 50,+ neʼe katak liutiha semana hitu* no loron ida, no tuirmai imi tenke hasaʼe sakrifísiu trigu* foun ida tan ba Jeová.+ 17 Imi tenke lori paun fuan rua husi imi-nia uma nuʼudar sakrifísiu doko bá-mai nian. Paun sira-neʼe tenke halo husi trigu uut neʼebé diʼak gomor isin rua. Imi tenke tunu paun sira-neʼe ho fermentu,+ no hasaʼe ba Jeová nuʼudar ai-han primeiru husi imi-nia toʼos.+ 18 Imi tenke fó paun sira-neʼe hamutuk ho bibi-malae oan* hitu neʼebé la iha moras no ida-idak tenke tinan ida, no fó mós karau-aman* ida no bibi-malae aman rua.+ Buat sira-neʼe sei sai nuʼudar sakrifísiu sunu nian ba Jeová hamutuk ho sakrifísiu trigu nian no sakrifísiu hemu nian, hodi sai nuʼudar sakrifísiu neʼebé sunu iha ahi, no ninia morin halo Jeová kontente.* 19 Imi tenke fó bibi-timur oan nuʼudar sakrifísiu sala nian+ no bibi-malae oan* rua no ida-idak tenke tinan ida, hodi sai nuʼudar sakrifísiu dame nian.+ 20 Amlulik sei book buat sira-neʼe bá-mai hamutuk ho paun sira husi ai-han primeiru, hodi sai nuʼudar sakrifísiu doko bá-mai nian iha Jeová nia oin, hamutuk ho bibi-malae oan rua. Buat sira-neʼe sei sai nuʼudar buat santu ba Jeová no sai amlulik nian.+ 21 Iha loron neʼe imi sei fó sai+ kona-ba reuniaun boot santu ba imi. Imi labele halo serbisu todan naran deʼit. Neʼe mak ukun-fuan ba nafatin ba imi-nia jerasaun hotu iha fatin hotu neʼebé imi hela bá.

22 “‘Bainhira imi koʼa ai-han iha imi-nia toʼos, imi labele koʼa hotu ai-han sira iha imi-nia toʼos ninin no imi labele hili fali buat restu neʼebé imi koʼa ona.+ Imi tenke husik neʼe ba ema kiak*+ no ema estranjeiru.+ Haʼu mak Jeová, imi-nia Maromak.’”

23 Jeová koʼalia tan ba Moisés, hodi dehan: 24 “Hatete ba ema Izraél: ‘Iha loron primeiru fulan-hitu, imi tenke deskansa husi imi-nia serbisu hotu; imi tenke fó sai loron neʼe hodi huu trombeta atu fó-hanoin+ katak loron neʼe imi halaʼo reuniaun boot neʼebé santu. 25 Imi labele halo serbisu todan naran deʼit, no imi tenke hasaʼe sakrifísiu neʼebé sunu iha ahi hodi hasaʼe ba Jeová.’”

26 Jeová koʼalia tan ba Moisés, hodi dehan: 27 “Maibé, iha loron sanulu fulan-hitu mak Loron Hamoos Sala nian.*+ Imi tenke halaʼo reuniaun boot santu, no imi tenke hatudu katak imi triste* kona-ba imi-nia sala+ no hasaʼe sakrifísiu neʼebé sunu iha ahi hodi hasaʼe ba Jeová. 28 Iha Loron Hamoos Sala nian, imi labele halo serbisu naran deʼit tanba neʼe mak loron atu hamoos imi-nia sala+ iha Jeová, imi-nia Maromak, nia oin. 29 Kona-ba ema* neʼebé la hatudu triste* ba ninia sala iha loron neʼe, ema neʼe tenke mate hodi halakon husi povu nia leet.+ 30 Ema* neʼebé halo serbisu ruma iha loron neʼe, haʼu sei halakon nia husi povu nia leet. 31 Imi labele halo serbisu ida. Neʼe mak ukun-fuan ba nafatin ba imi-nia jerasaun hotu iha fatin hotu neʼebé imi hela bá. 32 Neʼe mak loron Sábadu ba imi atu deskansa husi serbisu hotu, no imi sei hatudu triste kona-ba imi-nia sala+ iha loron sia husi fulan neʼe iha kalan. Imi tenke selebra imi-nia loron Sábadu husi rai-nakaras toʼo rai-nakaras iha loron tuirmai.”

33 Jeová koʼalia tan ba Moisés, hodi dehan: 34 “Hatete ba ema Izraél: ‘Iha loron 15 fulan-hitu mak loron Festa Barraka nian* ba Jeová neʼebé sei halaʼo ba loron hitu.+ 35 Iha loron primeiru imi tenke halaʼo reuniaun boot santu, no imi labele halo serbisu todan naran deʼit. 36 Ba loron hitu imi tenke hasaʼe sakrifísiu neʼebé sunu iha ahi hodi hasaʼe ba Jeová. No iha loron ualu, imi tenke halaʼo reuniaun boot santu,+ no imi tenke hasaʼe sakrifísiu neʼebé sunu iha ahi hodi hasaʼe ba Jeová. Neʼe mak reuniaun espesiál. Imi labele halo serbisu todan naran deʼit.

37 “‘Neʼe mak festa sira+ ba Jeová neʼebé imi tenke fó sai tuir ninia tempu nuʼudar reuniaun boot santu+ atu hasaʼe sakrifísiu neʼebé sunu iha ahi hodi hasaʼe ba Jeová. Sakrifísiu sira-neʼe mak sakrifísiu sunu nian+ hamutuk ho sakrifísiu trigu nian+ no sakrifísiu hemu nian+ tuir programa neʼebé iha ba loron ida-idak. 38 Sakrifísiu sira-neʼe la inklui sakrifísiu neʼebé imi hasaʼe iha loron Sábadu ba Jeová,+ imi-nia prezente sira,+ imi-nia sakrifísiu juramentu nian,+ no imi-nia sakrifísiu neʼebé imi fó ho hakarak rasik,+ neʼebé imi tenke fó ba Jeová. 39 Maibé, iha loron 15 fulan-hitu, bainhira imi halibur ona ai-han sira husi imi-nia toʼos, imi tenke selebra festa ba Jeová durante loron hitu.+ Iha loron primeiru imi tenke deskansa husi serbisu hotu no iha loron ualu imi tenke deskansa husi imi-nia serbisu hotu.+ 40 Iha loron primeiru, imi tenke foti ai-fuan husi ai-hun neʼebé diʼak liu, ai-palmeira sanak,+ ai-sanak neʼebé iha tahan barak no ai-koupos sanak besik mota,* no imi tenke haksolok+ iha Jeová, imi-nia Maromak, nia oin durante loron hitu.+ 41 Imi tenke selebra festa neʼe nuʼudar festa ba Jeová ba loron hitu tinan-tinan.+ Neʼe mak ukun-fuan ba nafatin ba imi, husi jerasaun ba jerasaun, imi tenke selebra festa neʼe iha fulan-hitu. 42 Imi tenke hela iha barraka ba loron hitu.+ Ema Izraél hotu tenke hela iha barraka, 43 atu nuneʼe jerasaun sira iha futuru bele hatene+ katak haʼu halo ema Izraél hela iha barraka bainhira haʼu lori sira sai husi rai-Ejitu.+ Haʼu mak Jeová, imi-nia Maromak.’”

44 Entaun Moisés fó sai ba ema Izraél kona-ba festa sira ba Jeová hodi tuir ninia tempu.

24 Jeová koʼalia tan ba Moisés, hodi dehan: 2 “Haruka ema Izraél atu lori mina-oliveira neʼebé moos hodi uza ba ahi-oan sira, atu nuneʼe ahi-oan bele lakan nafatin.+ 3 Kalan-kalan Arão tenke sunu lakan ahi-oan sira no halo arranju atu tau matan hodi ahi-oan sira-neʼe kontinua lakan iha Jeová nia oin toʼo dadeer, katak ahi-oan sira iha kortina nia oin neʼebé besik Arka Aliansa nian,* iha tenda reuniaun nia laran. Neʼe mak ukun-fuan ba nafatin ba imi-nia jerasaun hotu. 4 Nia tenke kontinua tau matan ba ahi-oan sira iha ahi-oan fatin+ neʼebé halo husi osan-mean neʼebé moos iha Jeová nia oin.

5 “Ó tenke foti trigu uut neʼebé diʼak no tunu paun 12 neʼebé hanesan kelu. Paun ida-idak tenke halo ho trigu gomor isin rua.* 6 Ó tenke tau paun sira-neʼe iha fatin rua, fatin ida-idak tenke hada paun fuan neen,+ no tau iha meza neʼebé halo husi osan-mean neʼebé moos iha Jeová nia oin.+ 7 Ó tenke tau olíbanu* iha paun fatin ida-idak nia leten, no ó sei sunu ida-neʼe ba Jeová atu reprezenta* paun neʼe.+ 8 Iha loron Sábadu ida-idak, nia tenke tau paun iha Jeová nia oin.+ Neʼe mak aliansa ba nafatin ho ema Izraél. 9 Paun neʼe sei sai Arão no ninia oan-mane sira-nian,+ no sira sei han neʼe iha área santu,+ tanba neʼe mak buat neʼebé santu liu hotu ba amlulik husi Jeová nia sakrifísiu neʼebé sunu iha ahi. Neʼe mak ukun-fuan ba nafatin.”

10 Iha tempu neʼebá iha mane ida neʼebé ninia inan mak ema Izraél no ninia aman mak ema Ejitu,+ no nia tuku malu ho mane Izraél ida iha povu nia hela-fatin. 11 Feto Izraél neʼe nia oan-mane koʼalia aat no fó-malisan ba Maromak nia naran.*+ Tan neʼe, sira lori nia ba Moisés.+ Ninia inan nia naran mak Selomita, Dibri nia oan-feto husi suku Dan. 12 Entaun sira sulan mane neʼe toʼo Jeová fó sai ho klaru desizaun ba sira.+

13 Tuirmai Jeová dehan ba Moisés: 14 “Lori ema neʼebé fó-malisan neʼe ba povu nia hela-fatin nia liʼur, no ema hotu neʼebé rona nia fó-malisan tenke tau sira-nia liman iha ninia ulun, no tuirmai povu hotu tenke tuda mate nia.+ 15 Depois neʼe, ó tenke fó-hatene ba ema Izraél: ‘Se ema ida koʼalia aat ninia Maromak, nia sei hatán ba ninia sala. 16 Imi tenke oho tiha ema neʼebé koʼalia aat Jeová nia naran.+ Povu tomak tenke tuda mate nia. Imi tenke oho tiha ema estranjeiru no mós ema rai-naʼin neʼebé koʼalia aat Maromak nia naran.

17 “‘Se ema ida oho ema* seluk, imi tenke oho tiha ema neʼe.+ 18 Ema neʼebé baku no oho ema seluk nia animál-hakiak ida, nia tenke selu multa kona-ba neʼe, tanba moris troka moris.* 19 Se ema ruma halo kanek ninia maluk, entaun tenke halo ba nia tuir buat neʼebé nia halo ona.+ 20 Ruin troka ruin,* matan troka matan, nehan troka nehan, no tenke halo ba nia hanesan buat neʼebé nia halo ona ba ema seluk.+ 21 Ema neʼebé baku no oho animál ida tenke selu multa kona-ba neʼe,+ maibé ema neʼebé baku no oho ema seluk tenke mate.+

22 “‘Iha lei ida deʼit ba imi hotu, maski ema estranjeiru ka rai-naʼin,+ tanba haʼu mak Jeová, imi-nia Maromak.’”

23 Tuirmai Moisés koʼalia ba ema Izraél, no sira lori ema neʼebé fó-malisan neʼe ba povu nia hela-fatin nia liʼur, no tuda mate nia iha neʼebá.+ Ho ida-neʼe, ema Izraél halo tuir duni mandamentu neʼebé Jeová fó sai ona ba Moisés.

25 Jeová koʼalia tan ba Moisés iha Foho Sinai, hodi dehan: 2 “Koʼalia ba ema Izraél no hatete ba sira: ‘Bainhira imi tama ona ba rai neʼebé haʼu fó ba imi,+ imi tenke halo tuir ukun-fuan kona-ba tinan Sábadu nian ba Jeová no husik rai neʼe deskansa.+ 3 Ba tinan neen imi tenke kuda fini iha imi-nia toʼos, no ba tinan neen imi tenke aparu uvas iha imi-nia toʼos, no imi sei halibur rezultadu husi imi-nia toʼos.+ 4 Maibé iha tinan hitu, rai neʼe tenke deskansa husi buat hotu, neʼe mak tinan Sábadu* nian ba Jeová. Imi labele kuda fini ruma iha imi-nia toʼos ka aparu uvas iha imi-nia toʼos. 5 Imi labele koʼa no halibur buat neʼebé moris rasik husi fini neʼebé uluk imi husik hela bainhira imi koʼa, no imi labele halibur uvas-fuan husi uvas neʼebé imi la aparu. Iha tinan neʼe, rai neʼe tenke deskansa husi buat hotu. 6 Maibé, imi bele han ai-han neʼebé moris rasik iha rai durante ninia tinan Sábadu nian; imi bele han buat sira-neʼe, nuneʼe mós ho imi-nia atan-mane no atan-feto, imi-nia serbisu-naʼin neʼebé imi selu, no ema estranjeiru neʼebé hela ho imi bele han buat sira-neʼe, 7 no mós buat sira-neʼe sei sai nuʼudar ai-han ba animál-hakiak no animál fuik sira iha imi-nia rai. Sin, ema no animál sira bele han buat hotu neʼebé moris rasik husi rai neʼe.

8 “‘Imi tenke sura tinan Sábadu nian ba dala hitu, neʼe katak tinan hitu ba dala hitu, entaun tempu neʼe sura hamutuk mak tinan 49. 9 Tuirmai imi tenke huu dikur ho lian makaʼas iha loron sanulu fulan-hitu; no iha Loron Hamoos Sala nian,*+ imi tenke huu dikur hodi ema hotu iha rai neʼe bele rona. 10 Imi tenke halo santu tinan 50 nian no fó sai liberdade ba ema hotu neʼebé hela iha rai neʼe.+ Neʼe sei sai nuʼudar Tinan Livre nian ba imi, no imi ida-idak tenke fila fali ba rai neʼebé imi simu ona nuʼudar liman-rohan no tenke fila fali ba imi-nia família.+ 11 Tinan 50 nian sei sai nuʼudar Tinan Livre nian ba imi. Imi labele kuda fini no labele koʼa ka halibur buat neʼebé moris rasik husi fini neʼebé uluk imi husik hela, no imi labele halibur uvas-fuan husi uvas neʼebé imi la aparu.+ 12 Neʼe mak Tinan Livre nian. Neʼe tenke sai santu ba imi. Imi bele han deʼit buat neʼebé moris rasik husi rai neʼe.+

13 “‘Iha Tinan Livre nian, imi ida-idak tenke fila fali ba rai neʼebé imi simu ona nuʼudar liman-rohan.+ 14 Se imi faʼan buat ruma ba imi-nia maluk ka sosa buat ruma husi nia, keta hamatak imi-nia maluk.+ 15 Bainhira imi sosa rai husi imi-nia maluk, imi tenke sura tinan sira depois Tinan Livre nian neʼe, no imi-nia maluk tenke tau folin ba rai neʼe tuir tinan sira neʼebé sei iha atu kuda fini toʼo Tinan Livre nian tuirmai.+ 16 Entaun, se iha tan tinan barak, nia bele hasaʼe folin, no se iha tinan uitoan deʼit ona, nia tenke hatún folin, tanba nia faʼan ba ó tuir tinan sira neʼebé sei iha hodi kuda fini iha rai neʼe toʼo Tinan Livre nian tuirmai. 17 Imi labele hamatak imi-nia maluk,+ no imi tenke hamtaʼuk imi-nia Maromak,+ tanba haʼu mak Jeová, imi-nia Maromak.+ 18 Hodi halo tuir haʼu-nia ukun-fuan no desizaun sira, imi sei moris hakmatek iha rai neʼe.+ 19 Rai neʼe sei fó rezultadu ba imi,+ no imi sei han toʼo bosu no imi sei hela ho seguru.+

20 “‘Maibé se imi dehan: “Saida mak ami sei han iha tinan hitu tanba ami la kuda fini no la halibur ninia rezultadu?”+ 21 Haʼu sei haraik bensaun ba imi iha tinan neen, no rai sei fó ai-han neʼebé natoon ba tinan tolu.+ 22 Tuirmai imi bele kuda fini iha tinan ualu, maibé imi sei kontinua han ai-han uluk nian toʼo tinan sia. Imi sei han ai-han uluk nian toʼo imi koʼa ai-han foun.

23 “‘Imi labele faʼan imi-nia rai atu sai ema seluk nian ba nafatin,+ tanba rai neʼe mak haʼu-nian.+ No ba haʼu, imi mak hanesan ema estranjeiru no ema laʼo-rai.+ 24 Kona-ba rai hotu neʼebé imi sei simu nuʼudar liman-rohan, rai-naʼin iha direitu atu sosa fali ninia rai.

25 “‘Se imi-nia maluk ida sai kiak no nia tenke faʼan ninia rai ruma, ninia família besik neʼebé iha direitu atu sosa fali rai neʼe tenke mai no sosa fali buat neʼebé ninia família faʼan ona.+ 26 Se ema ida la iha família neʼebé iha direitu atu sosa fali, maibé nia rasik sai riku ona no iha kbiit atu sosa fali rai neʼe, 27 nia tenke sura folin husi rai neʼe nia rezultadu durante tinan sira neʼebé nia faʼan ona rai neʼe, no nia la presiza selu osan ba tinan sira-neʼe. Maibé nia sei selu deʼit folin neʼebé restu ba ema neʼebé uluk sosa ninia rai. Tuirmai nia bele hetan fali ninia rai.+

28 “‘Maibé se nia la iha kbiit atu sosa fali ninia rai husi ema neʼebé sosa ida-neʼe, entaun rai neʼebé nia faʼan ona sei kontinua sai ema neʼe nian toʼo Tinan Livre nian;+ no rai neʼe sei fó fali ba nia iha Tinan Livre nian, no nia sei simu fali ninia rai neʼe.+

29 “‘Se mane ida faʼan ninia uma neʼebé iha sidade nia moru laran, entaun nia sei iha direitu atu sosa fali uma neʼe toʼo tinan neʼe nia rohan hahú husi tempu neʼebé nia faʼan ona uma neʼe; ninia direitu atu sosa fali+ sei vale ba tinan ida tomak. 30 Maibé se nia la sosa fali uma neʼe husi ema neʼebé sosa uma neʼe antes tinan ida remata, uma neʼebé iha sidade nia moru laran sei sai nuʼudar ema neʼe nian ba nafatin iha ninia jerasaun hotu. Iha Tinan Livre nian, uma neʼe sei la fó fali ba nia naʼin uluk nian. 31 Maibé, uma sira iha povu nia hela-fatin neʼebé moru la haleʼu, imi tenke haree uma sira-neʼe nuʼudar parte husi rai-luan iha sidade nia liʼur. Uma-naʼin sei iha nafatin direitu atu sosa fali uma neʼe, no tenke fó fali ida-neʼe ba nia iha Tinan Livre nian.

32 “‘Kona-ba ema Levi nia uma neʼebé iha sira-nia sidade laran,+ ema Levi sei iha direitu nafatin atu sosa fali sira-nia uma. 33 Maibé se ema Levi ida la sosa fali ninia uma neʼebé nia faʼan ona, no uma neʼe mak iha sidade neʼebé ema Levi simu nuʼudar sira-nian, entaun tenke fó fali uma neʼe ba nia iha Tinan Livre nian,+ tanba ema Levi nia uma sira iha sidade neʼe mak sira-nia liman-rohan iha ema Izraél nia leet.+ 34 Liután neʼe, sira labele faʼan rai-luan+ neʼebé haleʼu sira-nia sidade sira, tanba neʼe mak sira-nia liman-rohan ba nafatin.

35 “‘Se imi-nia maluk neʼebé hela besik imi sai kiak no labele tau matan ba ninia an rasik, imi tenke tau matan ba nia+ hanesan imi halo ba ema estranjeiru no ema laʼo-rai,+ atu nuneʼe nia bele kontinua moris iha imi-nia leet. 36 Keta husu osan-funan ka buka atu manán buat ruma husi nia.+ Imi tenke hamtaʼuk imi-nia Maromak,+ nuneʼe imi-nia maluk neʼe bele kontinua moris iha imi-nia leet. 37 Imi labele fó-empresta imi-nia osan ho funan+ ka fó imi-nia ai-han hodi manán buat ruma husi nia. 38 Haʼu mak Jeová, imi-nia Maromak, Maromak neʼebé lori imi sai husi rai-Ejitu+ hodi fó rai-Kanaan ba imi, atu hatudu haʼu-nia an ba imi nuʼudar imi-nia Maromak.+

39 “‘Se imi-nia maluk neʼebé hela besik imi sai kiak no nia tenke faʼan ninia an ba imi nuʼudar atan,+ imi labele obriga nia atu halo serbisu hanesan atan baibain.+ 40 Imi tenke haree nia hanesan serbisu-naʼin neʼebé imi selu,+ hanesan ema laʼo-rai. Nia tenke serbí imi toʼo Tinan Livre nian. 41 Tuirmai nia sei husik imi, nia no ninia oan sira hamutuk ho nia, hodi fila fali ba ninia família. Nia tenke fila fali ba ninia beiʼala nia rai.+ 42 Tanba sira mak haʼu-nia atan neʼebé haʼu lori sai husi rai-Ejitu.+ Sira labele faʼan sira-nia an nuʼudar atan hanesan atan baibain. 43 Imi labele halo aat ba nia,+ no imi tenke hamtaʼuk imi-nia Maromak.+ 44 Imi-nia atan-mane no atan-feto tenke mai husi nasaun sira neʼebé haleʼu imi. Imi bele sosa atan-mane no atan-feto husi nasaun sira-neʼe. 45 No mós imi bele sosa atan husi ema estranjeiru neʼebé hela iha imi-nia leet nia oan sira neʼebé moris ba sira iha imi-nia rai,+ katak husi sira no sira-nia família, no sira sei sai imi-nian. 46 Imi bele entrega sira ba imi-nia oan nuʼudar sira-nian ba nafatin. Imi bele uza sira nuʼudar serbisu-naʼin, maibé imi labele halo aat ba imi-nia maluk ema Izraél.+

47 “‘Maibé se ema estranjeiru ka ema laʼo-rai iha imi-nia leet sai riku no imi-nia maluk ida sai kiak no nia tenke faʼan ninia an nuʼudar atan ba ema estranjeiru ka ema laʼo-rai neʼebé hela iha imi-nia leet, ka ba ema estranjeiru nia família ida, 48 nia sei nafatin iha direitu atu sosa fali ninia an bainhira nia faʼan tiha ninia an nuʼudar atan. Ninia maluk ida bele sosa fali nia,+ 49 ka ninia tiu ka tiu nia oan-mane bele sosa fali nia, ka ninia família besik bele sosa fali nia.

“‘Ka se nia sai riku ona, nia mós bele sosa fali ninia an rasik.+ 50 Nia no ema neʼebé sosa nia tenke sura hamutuk tinan sira neʼebé nia faʼan ninia an nuʼudar atan toʼo Tinan Livre nian,+ no osan folin atu sosa nia tenke tuir tinan sira-neʼe.+ Folin ba ninia serbisu iha loron ida-idak durante tempu neʼe tenke sura tuir folin ba serbisu-naʼin ida.+ 51 Maibé se iha tinan barak hela toʼo Tinan Livre nian, entaun nia tenke selu fali osan ba tinan sira-neʼe hodi bele sosa fali ninia an. 52 Maibé se iha tinan uitoan deʼit mak hela toʼo Tinan Livre nian, entaun nia rasik tenke sura no selu ba ema neʼebé sosa nia ho osan folin tuir tinan sira-neʼe. 53 Nia tenke kontinua serbí ninia naʼi tinan ida-idak nuʼudar serbisu-naʼin ida; no imi tenke kuidadu atu ninia naʼi la hanehan nia.+ 54 Maibé, se nia labele sosa fali ninia an tuir ukun-fuan sira-neʼe, entaun nia no ninia oan sira hamutuk ho nia sei sai livre iha Tinan Livre nian.+

55 “‘Tanba ema Izraél mak haʼu-nia atan rasik. Sira mak haʼu-nia atan neʼebé haʼu lori sai husi rai-Ejitu.+ Haʼu mak Jeová, imi-nia Maromak.

26 “‘Imi labele halo maromak sira neʼebé folin-laek ba imi-nia an rasik,+ imi labele halo estátua+ ka halo fatuk lulik* ba imi-nia an, no imi labele tau fatuk ida neʼebé bahat ona+ iha imi-nia rai atu imi hakneʼak ba nia;+ tanba haʼu mak Jeová, imi-nia Maromak. 2 Imi tenke halaʼo haʼu-nia Sábadu no hatudu respeitu* ba haʼu-nia fatin sagradu. Haʼu mak Jeová.

3 “‘Se imi kontinua halo tuir haʼu-nia ukun-fuan no mandamentu sira no moris tuir buat sira-neʼe,+ 4 haʼu sei fó duni udan hodi tuir ninia tempu neʼebé loos,+ no rai sei fó rezultadu,+ no ai-hun sira iha toʼos sei fó fuan. 5 Imi-nia tempu sama trigu* nian sei sai naruk toʼo tempu koʼa uvas-fuan nian, no imi-nia tempu koʼa uvas-fuan sei sai naruk toʼo tempu kuda fini nian; no imi sei han ai-han toʼo bosu no moris hakmatek iha imi-nia rai.+ 6 Haʼu sei lori dame ba rai neʼe,+ no imi sei toba no la iha ema ida mak halo imi taʼuk;+ no haʼu sei halakon animál fuik neʼebé siʼak husi rai neʼe, no ema sei la kontra imi ho surik funu nian. 7 Imi sei duni tuir imi-nia inimigu, no imi sei oho sira ho surik. 8 Imi naʼin-lima sei duni tuir ema naʼin-100, no imi naʼin-100 sei duni tuir ema naʼin-10.000, no imi sei oho imi-nia inimigu ho surik.+

9 “‘Haʼu sei haraik bensaun ba imi no halo imi iha oan barak no sai barak liután,+ no haʼu sei kumpre haʼu-nia aliansa ho imi.+ 10 Bainhira imi sei han hela ai-han neʼebé imi koʼa iha tinan antes neʼe, imi presiza hasai hotu ai-han sira-neʼe hodi bele iha fatin atu rai ai-han neʼebé imi foin koʼa. 11 No haʼu sei harii haʼu-nia tenda santu iha imi-nia leet,+ no haʼu* sei la nega imi. 12 Haʼu sei laʼo iha imi-nia leet no sai imi-nia Maromak,+ no imi rasik sei sai haʼu-nia povu.+ 13 Haʼu mak Jeová, imi-nia Maromak, Maromak neʼebé lori imi sai husi rai-Ejitu hodi imi la sai tan sira-nia atan, no haʼu halo tohar imi-nia ai-leba neʼebé imi uza atu lori naha todan no halo imi hamriik loos hodi laʼo ho ulun hiʼit saʼe.

14 “‘Maibé, se imi la rona haʼu ka la halo tuir haʼu-nia mandamentu hotu,+ 15 no se imi la simu haʼu-nia ukun-fuan sira,+ no se imi hakribi haʼu-nia desizaun sira hodi la halo tuir haʼu-nia mandamentu hotu, no imi kontra haʼu-nia aliansa,+ 16 haʼu rasik sei halo buat tuirmai neʼe ba imi: Haʼu sei kastigu imi ho susar sira, ho meʼar-raan* no isin-manas makaʼas, neʼebé sei halo imi-nia matan sai aat no halo imi-nia forsa sai fraku. Fini neʼebé imi kuda sei sai saugati deʼit, tanba imi-nia inimigu mak sei han hotu ninia rezultadu.+ 17 Haʼu sei fila oin hodi kontra imi, no imi-nia inimigu sei manán imi;+ no ema neʼebé odi imi sei sama imi,+ no imi sei halai maski ema ida la duni tuir imi.+

18 “‘Maibé se susar sira-neʼe kona ona imi no imi kontinua la rona haʼu, haʼu sei fó kastigu ba imi dala hitu liu fali ida uluk nian tanba imi-nia sala. 19 Haʼu sei harahun imi-nia hahalok foti an ho ulun-toos no halo imi-nia lalehan sai hanesan besi*+ no imi-nia rai sai hanesan riti.* 20 Imi sei uza imi-nia kbiit saugati deʼit, tanba imi-nia rai sei la fó rezultadu,+ no ai-hun sira iha rai neʼe sei la fó fuan.

21 “‘Maibé se imi kontinua kontra haʼu no lakohi rona haʼu, entaun haʼu sei fó kastigu ba imi dala hitu tan liu fali uluk nian, tuir imi-nia sala. 22 Haʼu sei haruka animál fuik ba imi-nia leet,+ no sira sei oho imi-nia oan+ no imi-nia animál-hakiak sira no hamenus imi-nia povu, no imi-nia dalan sira sei sai mamuk.+

23 “‘Maibé se imi hetan ona kastigu sira-neʼe no imi lakohi nafatin simu haʼu-nia dixiplina+ no hakarak nafatin kontra haʼu, 24 entaun haʼu mós sei kontra hasoru imi, no haʼu rasik sei fó kastigu ba imi ba dala hitu tanba imi-nia sala. 25 Haʼu sei kastigu imi ho surik tanba imi hakotu aliansa ho haʼu.+ Se imi halibur hamutuk iha sidade sira, haʼu sei haruka moras ba imi-nia leet,+ no haʼu sei entrega imi ba inimigu nia liman.+ 26 Kuandu haʼu estraga paun* neʼebé imi rai hela,*+ iha tempu neʼe feto naʼin-sanulu sei tunu paun iha fornu ida deʼit no tuirmai sira sei tetu paun neʼe no fó uitoan deʼit ba imi,+ no imi sei han maibé sei la sai bosu.+

27 “‘Maibé se imi hetan ona kastigu sira-neʼe no imi la rona haʼu no hakarak nafatin kontra haʼu, 28 haʼu sei aumenta haʼu-nia kastigu ba imi,+ no haʼu rasik sei kastigu imi ba dala hitu tanba imi-nia sala. 29 Imi sei han imi-nia oan-mane rasik, no imi sei han imi-nia oan-feto rasik.+ 30 Haʼu sei halakon imi-nia fatin aas* sira neʼebé lulik+ no tesi imi-nia altár insensu nian no haʼu sei butuk imi-nia mate-isin hamutuk ho imi-nia estátua sira neʼebé haʼu hakribi* neʼebé la iha moris,+ no haʼu* sei fila kotuk ba imi hodi hakribi imi.+ 31 Haʼu sei halakon imi-nia sidade sira ho surik+ no halo mamuk imi-nia fatin santu sira, no haʼu sei la horon tan suar morin neʼebé halo haʼu kontente* husi imi-nia sakrifísiu. 32 Haʼu rasik sei halo rai neʼe sai mamuk,+ no imi-nia inimigu neʼebé sei hela iha rai neʼe sei hateke ho hakfodak ba rai neʼe.+ 33 Haʼu sei halo imi namkari ba nasaun sira-nia leet,+ no haʼu sei losu surik hodi duni tuir imi;+ no imi-nia rai sei sai mamuk+ no imi-nia sidade sira sei rahun tiha.

34 “‘Iha tempu neʼebá imi sei hela iha imi-nia inimigu nia rai, durante tempu neʼe imi-nia rai sei sai mamuk no rai neʼe sei selu fali ninia Sábadu sira. Iha tempu neʼebá rai sei deskansa,* tanba rai tenke selu fali ninia Sábadu sira.+ 35 Rai sei deskansa durante tempu hotu neʼebé rai neʼe sai mamuk, tanba uluk bainhira imi hela iha rai neʼe, imi la halo tuir ukun-fuan Sábadu nian, no imi la husik rai neʼe deskansa.

36 “‘Kona-ba sira neʼebé la mate,+ haʼu sei halo sira sai laran-taridu iha sira-nia inimigu nia rai; no lian husi ai-tahan neʼebé anin huu sei halo sira halai, no sira sei halai hanesan ema neʼebé halai husi surik no sei monu maski ema la duni tuir sira.+ 37 Sira sei xoke malu no monu hanesan ema neʼebé halai husi surik maski ema ida la duni tuir sira. Imi sei la iha forsa atu tahan imi-nia inimigu.+ 38 Imi barak sei mate iha nasaun sira-nia leet,+ no imi-nia inimigu nia rai sei tolan imi. 39 Imi neʼebé moris hela sei hetan susar* iha imi-nia inimigu nia rai+ tanba imi-nia sala. Sin, sira sei hetan susar tanba sira-nia aman nia sala.+ 40 Tuirmai sira sei fó sai sira-nia sala rasik+ no sira-nia aman nia sala no sira-nia hahalok neʼebé la laran-metin, no rekoñese katak sira la hatudu laran-metin ba haʼu hodi kontra haʼu.+ 41 Tan neʼe mak haʼu mós kontra sira+ hodi lori sira ba sira-nia inimigu nia rai.+

“‘Karik iha tempu neʼebá mak sira-nia laran la toos* tan no sira sei sai haraik an,+ no sira sei selu hotu sira-nia sala. 42 No haʼu sei hanoin-hetan haʼu-nia aliansa ho Jacob,+ no haʼu-nia aliansa ho Isaac,+ no haʼu sei hanoin-hetan haʼu-nia aliansa ho Abraão,+ no haʼu sei hanoin-hetan rai neʼe. 43 Durante tempu neʼebé sira husik deʼit rai neʼe, rai neʼe sei selu hotu ninia Sábadu sira+ no sai mamuk kuandu sira la iha; no sira sei selu sira-nia sala, tanba sira la simu haʼu-nia desizaun no sira hakribi haʼu-nia ukun-fuan sira.+ 44 Maski nuneʼe, bainhira sira hela iha sira-nia inimigu nia rai, haʼu sei nunka husik sira mesak deʼit+ no haʼu sei la soe sira toʼo halakon sira hotu tanba neʼe kontra haʼu-nia aliansa+ ho sira, haʼu mak Jeová, sira-nia Maromak. 45 Tanba sira mak haʼu sei hanoin-hetan haʼu-nia aliansa ho sira-nia beiʼala+ neʼebé haʼu lori sai husi rai-Ejitu iha nasaun sira seluk nia oin,+ hodi halo nuneʼe haʼu bele sai sira-nia Maromak. Haʼu mak Jeová.’”

46 Jeová fó mandamentu, desizaun, no ukun-fuan sira-neʼe ba ema Izraél iha Foho Sinai liuhusi Moisés.+

27 Jeová koʼalia tan ba Moisés, hodi dehan: 2 “Koʼalia ba ema Izraél no hatete ba sira: ‘Se mane ida halo juramentu espesiál ida+ atu entrega ninia ema* ida nia folin ba Jeová tuir folin neʼebé deside ona, 3 entaun mane neʼebé tinan 20 toʼo tinan 60, nia folin mak osan-mutin 50* neʼebé tetu tuir dasin-fuan husi fatin santu.* 4 Maibé se neʼe mak ba feto ida, folin neʼebé deside ona mak osan-mutin 30.* 5 Maibé se sira-nia idade mak husi tinan 5 toʼo tinan 20, entaun folin ba mane ida mak osan-mutin 20* no feto ida mak osan-mutin 10.* 6 Maibé se sira-nia idade mak fulan ida toʼo tinan lima, entaun folin ba mane ida mak osan-mutin 5* no feto ida mak osan-mutin 3.*

7 “‘Se sira-nia idade mak tinan 60 ka liu, entaun folin ba mane ida mak osan-mutin 15* no feto ida mak osan-mutin 10. 8 Maibé se ema neʼe kiak loos atu selu folin neʼebé deside ona,+ entaun nia tenke mai hodi hamriik iha amlulik nia oin, no amlulik sei deside kona-ba folin neʼebé nia presiza selu. Amlulik sei fó sai folin neʼe tuir ema neʼebé halo juramentu neʼe nia kbiit.+

9 “‘Se ema ida halo juramentu kona-ba animál ida neʼebé diʼak atu hasaʼe nuʼudar sakrifísiu ba Jeová, entaun animál naran deʼit neʼebé nia fó ba Jeová sei sai buat santu. 10 Nia labele troka animál neʼebé diʼak ho animál neʼebé aat ka troka animál neʼebé aat ho animál neʼebé diʼak. Maibé se nia presiza duni atu troka animál ida ho animál seluk, animál uluk nian no mós animál neʼebé nia troka sei sai buat santu. 11 Se neʼe mak animál neʼebé la moos+ no labele hasaʼe nuʼudar sakrifísiu ba Jeová, entaun nia tenke lori animál neʼe ba amlulik nia oin. 12 Amlulik sei tau folin ba animál neʼe, maski animál neʼe diʼak ka aat. Folin neʼebé amlulik deside mak metin ona. 13 Maibé se nia hakarak sosa fali animál neʼe, nia tenke aumenta porsentu ruanulu ba folin neʼebé deside ona.+

14 “‘Se ema ida dehan katak nia sei fó* ninia uma ba Jeová, entaun amlulik sei tau folin ba uma neʼe, maski uma neʼe diʼak ka aat. Folin neʼebé amlulik deside ona mak sei sai uma neʼe nia folin.+ 15 Maibé se ema neʼebé fó ona ninia uma hakarak atu sosa fali uma neʼe, nia tenke aumenta osan porsentu ruanulu husi folin neʼebé deside ona, no uma neʼe sei sai fali ninian.

16 “‘Se ema ida dehan katak nia sei fó ninia toʼos sorin balu ba Jeová, entaun folin ba toʼos neʼe sei deside tuir fini neʼebé presiza atu kuda iha toʼos neʼe: fini sevada omer isin ida* nia folin mak osan-mutin 50.* 17 Se nia hakarak fó ninia toʼos neʼe hahú husi Tinan Livre nian,+ entaun folin neʼebé deside ona sei metin nafatin. 18 Se nia fó ninia toʼos depois Tinan Livre nian, entaun amlulik sei sura folin ba nia tuir tinan neʼebé sei iha toʼo Tinan Livre nian tuirmai, no tenke hamenus husi folin neʼebé deside ona.+ 19 Maibé se ema neʼebé fó toʼos neʼe hakarak sosa fali ninia toʼos, nia tenke aumenta porsentu ruanulu ba folin neʼebé deside tiha ona, no toʼos neʼe sei sai fali ninian nafatin. 20 Se nia la sosa fali toʼos neʼe no ema faʼan fali toʼos neʼe ba ema seluk, entaun nia labele sosa fali toʼos neʼe. 21 Bainhira toʼos neʼe husik livre tiha iha Tinan Livre nian, ida-neʼe sei sai buat santu ba Jeová, no toʼos neʼe sai buat neʼebé entrega ona ba Maromak. No neʼe sei sai amlulik nian.+

22 “‘Se mane ida dehan katak nia fó rai neʼebé nia sosa ona ba Jeová, maibé rai neʼe laʼós ninia liman-rohan,+ 23 amlulik tenke sura rai neʼe nia folin neʼebé deside ona hodi tuir tinan sira neʼebé sei iha toʼo Tinan Livre nian, no nia sei fó folin neʼe iha loron neʼe kedas.+ Osan neʼe mak buat neʼebé santu ba Jeová. 24 Iha Tinan Livre nian, rai neʼe sei fó fali ba ema neʼebé uluk faʼan ba nia, katak fó fali ba rai-naʼin uluk nian.+

25 “‘Folin hotu tenke tetu tuir dasin-fuan husi fatin santu. Dasin-fuan ida nia todan mak gera 20.*

26 “‘Maibé, ema labele dehan katak nia sei fó animál oan primeiru, tanba animál oan primeiru mak Jeová nian.+ Maski karau ka bibi-malae, buat hotu neʼe mak Jeová nian ona.+ 27 Maibé se neʼe mak oan primeiru husi animál neʼebé la moos no nia sosa fali tuir folin neʼebé deside ona, entaun nia tenke aumenta tan porsentu ruanulu ba folin neʼe.+ Maibé se nia la sosa fali animál neʼe, animál neʼe sei faʼan tuir folin neʼebé deside ona.

28 “‘Maibé ema labele faʼan ka sosa fali buat neʼebé nia deside atu entrega ba Jeová ba nafatin* husi ninia rikusoin sira, maski nia entrega ema ka animál ka ninia toʼos. Buat hotu neʼebé nia entrega mak santu liu hotu ba Jeová.+ 29 Liután neʼe, labele sosa fali ema neʼebé haketak ona atu halakon tiha.+ Ema neʼe tenke mate.+

30 “‘Porsentu sanulu+ husi rai neʼe, maski rezultadu husi toʼos ka ai-fuan ruma, buat hotu neʼe mak Jeová nian. Neʼe mak buat neʼebé santu ba Jeová. 31 Se ema ida hakarak atu sosa fali ninia porsentu sanulu, nia tenke aumenta porsentu ruanulu tan ba folin neʼe. 32 Porsentu sanulu husi karau no bibi sira tenke sai buat santu ba Jeová. Bainhira bibi-atan sura* ninia animál sira, nia tenke haketak animál ida husi animál sanulu atu fó ba Maromak. 33 Bibi-atan labele haree fali animál neʼe maski animál neʼe diʼak ka aat, ka labele troka fali animál neʼe. Maibé se nia troka, entaun animál ida uluk no animál neʼebé troka tenke sai buat santu.+ Nia labele sosa fali animál neʼe.’”

34 Jeová fó mandamentu sira-neʼe ba ema Izraél liuhusi Moisés iha Foho Sinai.+