NÚMEROS

1 Iha loron primeiru fulan-segundu tinan segundu husi tempu neʼebé sira sai husi rai-Ejitu,+ Jeová koʼalia ba Moisés iha tenda reuniaun nian,+ iha rai-fuik Sinai,+ hodi dehan: 2 “Halo sensus+ ba povu Izraél ida-idak tuir sira-nia família, tuir sira-nia aman nia umakain, no ó tenke rejistu mane hotu nia naran. 3 Ó no Arão tenke rejistu ema tuir sira-nia grupu tropa sira, katak mane hotu neʼebé tinan 20 ba leten+ neʼebé bele serbí nuʼudar tropa iha Izraél.

4 “Imi tenke lori mane ida husi suku ida-idak hamutuk ho imi; sira ida-idak mak sei sai nuʼudar ulun-naʼin ba sira-nia suku.+ 5 Mane sira neʼebé sei ajuda imi mak tuirmai neʼe: husi suku Ruben mak Sedeur nia oan-mane Elizur;+ 6 husi suku Simeão mak Zurisadai nia oan-mane Selumiel;+ 7 husi suku Judá mak Aminadab nia oan-mane Nasson;+ 8 husi suku Issacar mak Zuar nia oan-mane Netanel;+ 9 husi suku Zebulão mak Helon nia oan-mane Eliab;+ 10 husi José nia oan-mane sira, katak husi suku Efraim,+ mak Amiud nia oan-mane Elisama; husi suku Manasés mak Pedazur nia oan-mane Gamaliel; 11 husi suku Benjamim mak Jideoni nia oan-mane Abidan;+ 12 husi suku Dan mak Amisadai nia oan-mane Ahiezer;+ 13 husi suku Aser mak Okran nia oan-mane Pagiel;+ 14 husi suku Gad mak Deuel nia oan-mane Eliasaf;+ 15 husi suku Naftali mak Enan nia oan-mane Aira.+ 16 Neʼe mak mane sira neʼebé bolu husi povu nia leet. Sira mak xefe+ ba sira-nia suku, ulun-naʼin ba ema rihun ba rihun iha Izraél.”+

17 Entaun Moisés no Arão hili mane sira-neʼe neʼebé Maromak hili ona. 18 Sira halibur povu hotu iha loron primeiru fulan-segundu, atu nuneʼe sira bele rejistu ema ida-idak husi tinan 20 ba leten+ tuir sira-nia naran, tuir sira-nia família, no tuir sira-nia aman nia umakain 19 hodi tuir mandamentu neʼebé Jeová fó sai ona ba Moisés. Entaun nia rejistu sira iha rai-fuik Sinai.+

20 Sira rejistu Izraél nia oan-mane primeiru Ruben nia jerasaun+ tuir sira-nia naran, tuir sira-nia família, no tuir sira-nia aman nia umakain. Sira sura mane hotu husi tinan 20 ba leten neʼebé bele serbí nuʼudar tropa, 21 no mane neʼebé rejistu ona husi suku Ruben hamutuk naʼin-46.500.

22 Sira rejistu Simeão nia jerasaun+ tuir sira-nia naran, tuir sira-nia família, no tuir sira-nia aman nia umakain. Sira sura mane hotu husi tinan 20 ba leten neʼebé bele serbí nuʼudar tropa, 23 no mane neʼebé rejistu ona husi suku Simeão hamutuk naʼin-59.300.

24 Sira rejistu Gad nia jerasaun+ tuir sira-nia naran, tuir sira-nia família, no tuir sira-nia aman nia umakain. Sira sura mane hotu husi tinan 20 ba leten neʼebé bele serbí nuʼudar tropa, 25 no mane neʼebé rejistu ona husi suku Gad hamutuk naʼin-45.650.

26 Sira rejistu Judá nia jerasaun+ tuir sira-nia naran, tuir sira-nia família, no tuir sira-nia aman nia umakain. Sira sura mane hotu husi tinan 20 ba leten neʼebé bele serbí nuʼudar tropa, 27 no mane neʼebé rejistu ona husi suku Judá hamutuk naʼin-74.600.

28 Sira rejistu Issacar nia jerasaun+ tuir sira-nia naran, tuir sira-nia família, no tuir sira-nia aman nia umakain. Sira sura mane hotu husi tinan 20 ba leten neʼebé bele serbí nuʼudar tropa, 29 no mane neʼebé rejistu ona husi suku Issacar hamutuk naʼin-54.400.

30 Sira rejistu Zebulão nia jerasaun+ tuir sira-nia naran, tuir sira-nia família, no tuir sira-nia aman nia umakain. Sira sura mane hotu husi tinan 20 ba leten neʼebé bele serbí nuʼudar tropa, 31 no mane neʼebé rejistu ona husi suku Zebulão hamutuk naʼin-57.400.

32 Sira rejistu José nia jerasaun liuhusi Efraim+ tuir sira-nia naran, tuir sira-nia família, no tuir sira-nia aman nia umakain. Sira sura mane hotu husi tinan 20 ba leten neʼebé bele serbí nuʼudar tropa, 33 no mane neʼebé rejistu ona husi suku Efraim hamutuk naʼin-40.500.

34 Sira rejistu Manasés nia jerasaun+ tuir sira-nia naran, tuir sira-nia família, no tuir sira-nia aman nia umakain. Sira sura mane hotu husi tinan 20 ba leten neʼebé bele serbí nuʼudar tropa, 35 no mane neʼebé rejistu ona husi suku Manasés hamutuk naʼin-32.200.

36 Sira rejistu Benjamim nia jerasaun+ tuir sira-nia naran, tuir sira-nia família, no tuir sira-nia aman nia umakain. Sira sura mane hotu husi tinan 20 ba leten neʼebé bele serbí nuʼudar tropa, 37 no mane neʼebé rejistu ona husi suku Benjamim hamutuk naʼin-35.400.

38 Sira rejistu Dan nia jerasaun+ tuir sira-nia naran, tuir sira-nia família, no tuir sira-nia aman nia umakain. Sira sura mane hotu husi tinan 20 ba leten neʼebé bele serbí nuʼudar tropa, 39 no mane neʼebé rejistu ona husi suku Dan hamutuk naʼin-62.700.

40 Sira rejistu Aser nia jerasaun+ tuir sira-nia naran, tuir sira-nia família, no tuir sira-nia aman nia umakain. Sira sura mane hotu husi tinan 20 ba leten neʼebé bele serbí nuʼudar tropa, 41 no mane neʼebé rejistu ona husi suku Aser hamutuk naʼin-41.500.

42 Sira rejistu Naftali nia jerasaun+ tuir sira-nia naran, tuir sira-nia família, no tuir sira-nia aman nia umakain. Sira sura mane hotu husi tinan 20 ba leten neʼebé bele serbí nuʼudar tropa, 43 no mane neʼebé rejistu ona husi suku Naftali hamutuk naʼin-53.400.

44 Moisés no Arão hamutuk ho Izraél nia xefe naʼin-12 neʼebé reprezenta sira-nia suku ida-idak mak rejistu ema sira-neʼe. 45 Mane Izraél hotu husi tinan 20 ba leten neʼebé bele serbí nuʼudar tropa iha Izraél, neʼebé rejistu ona tuir sira-nia aman nia umakain, 46 sira hotu hamutuk naʼin-603.550.+

47 Maibé ema Levi+ la rejistu hamutuk ho suku seluk tuir sira-nia aman nia umakain.+ 48 Jeová dehan ba Moisés: 49 “Ó labele rejistu suku Levi, no ó labele sura sira hamutuk ho ema Izraél seluk.+ 50 Ó tenke hili ema Levi atu tau matan ba tenda santu* neʼebé iha Arka Aliansa nian*+ no ba ninia sasán hotu no buat hotu neʼebé parte ba tenda neʼe.+ Sira sei lori tenda santu no ninia sasán hotu,+ no sira sei halo serbisu iha tenda neʼe,+ no sira sei hela haleʼu tenda santu neʼe.+ 51 Bainhira atu muda tenda santu neʼe, ema Levi mak tenke sobu ida-neʼe;+ no bainhira harii fali tenda santu neʼe, ema Levi mak tenke harii ida-neʼe; no ema baibain* neʼebé hakbesik ba fatin sagradu tenke hetan kastigu-mate.+

52 “Ema Izraél ida-idak tenke harii sira-nia tenda iha fatin neʼebé deside ona ba sira, ema ida-idak tuir sira-nia grupu suku tolu,*+ tuir sira-nia grupu tropa nian. 53 Ema Levi tenke hela haleʼu tenda santu neʼebé iha Arka Aliansa nian,* atu nuneʼe haʼu labele sai hirus hasoru povu Izraél tomak;+ no ema Levi iha knaar atu tau matan ba* tenda santu neʼebé iha Arka Aliansa nian.”*+

54 Povu Izraél halo tuir mandamentu hotu neʼebé Jeová fó sai ona ba Moisés. Sira halo nuneʼe duni.

2 Jeová koʼalia ba Moisés no Arão, hodi dehan: 2 “Ema Izraél tenke harii tenda iha fatin neʼebé deside ona ba sira-nia grupu suku tolu,+ no sira ida-idak tenke harii tenda besik sinál ba sira-nia aman nia umakain. Sira tenke harii tenda ho oin hateke ba tenda reuniaun nian, no harii haleʼu tenda neʼe.

3 “Suku tolu sei hela iha parte leste, iha fatin neʼebé loro-matan saʼe. Suku Judá mak hela iha sira-nia grupu tropa neʼe nia klaran; xefe ba Judá nia oan-mane sira mak Aminadab nia oan-mane Nasson.+ 4 Ninia tropa neʼebé rejistu ona hamutuk naʼin-74.600.+ 5 Suku Issacar mak hela iha ninia sorin; xefe ba Issacar nia oan-mane sira mak Zuar nia oan-mane Netanel.+ 6 Ninia tropa neʼebé rejistu ona hamutuk naʼin-54.400.+ 7 Suku Zebulão mak hela iha suku Judá nia sorin seluk; xefe ba Zebulão nia oan-mane sira mak Helon nia oan-mane Eliab.+ 8 Ninia tropa neʼebé rejistu ona hamutuk naʼin-57.400.+

9 “Mane hotu neʼebé rejistu ona husi suku Judá nia grupu tropa nian hamutuk naʼin-186.400. Sira mak grupu primeiru atu sobu sira-nia tenda bainhira muda.+

10 “Suku tolu sei hela iha parte súl. Suku Ruben mak hela iha sira-nia grupu tropa neʼe nia klaran;+ xefe ba Ruben nia oan-mane sira mak Sedeur nia oan-mane Elizur.+ 11 Ninia tropa neʼebé rejistu ona hamutuk naʼin-46.500.+ 12 Suku Simeão mak hela iha ninia sorin; xefe ba Simeão nia oan-mane sira mak Zurisadai nia oan-mane Selumiel.+ 13 Ninia tropa neʼebé rejistu ona hamutuk naʼin-59.300.+ 14 Suku Gad mak hela iha suku Ruben nia sorin seluk; xefe ba Gad nia oan-mane sira mak Ruel nia oan-mane Eliasaf.+ 15 Ninia tropa neʼebé rejistu ona hamutuk naʼin-45.650.+

16 “Mane hotu neʼebé rejistu ona husi suku Ruben nia grupu tropa nian hamutuk naʼin-151.450. Sira mak grupu segundu atu sobu sira-nia tenda bainhira muda.+

17 “Bainhira muda tenda reuniaun nian,+ ema Levi nia tenda tenke iha tenda sira seluk nia klaran.

“Sira tenke laʼo tuituir malu hanesan dalan neʼebé sira harii sira-nia tenda,+ hodi sira ida-idak laʼo tuir sira-nia fatin, tuir sira-nia grupu suku tolu.

18 “Suku tolu sei hela iha parte oeste. Suku Efraim mak hela iha sira-nia grupu tropa neʼe nia klaran; xefe ba Efraim nia oan-mane sira mak Amiud nia oan-mane Elisama.+ 19 Ninia tropa neʼebé rejistu ona hamutuk naʼin-40.500.+ 20 Suku Manasés mak hela iha ninia sorin;+ xefe ba Manasés nia oan-mane sira mak Pedazur nia oan-mane Gamaliel.+ 21 Ninia tropa neʼebé rejistu ona hamutuk naʼin-32.200.+ 22 Suku Benjamim mak hela iha suku Efraim nia sorin seluk; xefe ba Benjamim nia oan-mane sira mak Jideoni nia oan-mane Abidan.+ 23 Ninia tropa neʼebé rejistu ona hamutuk naʼin-35.400.+

24 “Mane hotu neʼebé rejistu ona husi suku Efraim nia grupu tropa nian hamutuk naʼin-108.100. Sira mak grupu terseiru atu sobu sira-nia tenda bainhira muda.+

25 “Suku tolu sei hela iha parte norte. Suku Dan mak hela iha sira-nia grupu tropa neʼe nia klaran; xefe ba Dan nia oan-mane sira mak Amisadai nia oan-mane Ahiezer.+ 26 Ninia tropa neʼebé rejistu ona hamutuk naʼin-62.700.+ 27 Suku Aser mak hela iha ninia sorin; xefe ba Aser nia oan-mane sira mak Okran nia oan-mane Pagiel.+ 28 Ninia tropa neʼebé rejistu ona hamutuk naʼin-41.500.+ 29 Suku Naftali mak hela iha suku Dan nia sorin seluk; xefe ba Naftali nia oan-mane sira mak Enan nia oan-mane Aira.+ 30 Ninia tropa neʼebé rejistu ona hamutuk naʼin-53.400.+

31 “Mane hotu neʼebé rejistu ona husi suku Dan nia grupu tropa nian hamutuk naʼin-157.600. Sira mak grupu ikusliu atu sobu sira-nia tenda bainhira sira muda,+ hodi tuir sira-nia grupu suku tolu.”

32 Neʼe mak ema Izraél neʼebé rejistu tuir sira-nia aman nia umakain; no mane hotu neʼebé rejistu ona atu serbí nuʼudar tropa mak hamutuk naʼin-603.550.+ 33 Maibé sira la rejistu ema Levi+ hamutuk ho ema Izraél seluk,+ hodi tuir mandamentu neʼebé Jeová fó sai ona ba Moisés. 34 Ema Izraél halo tuir mandamentu hotu neʼebé Jeová fó ba Moisés. Neʼe mak dalan neʼebé sira harii sira-nia tenda tuir grupu suku tolu+ no dalan neʼebé sira sobu sira-nia tenda,+ tuir sira ida-idak nia família no tuir sira-nia aman nia umakain.

3 Tuirmai neʼe mak Arão no Moisés nia jerasaun* iha loron neʼebé Jeová koʼalia ho Moisés iha Foho Sinai.+ 2 Arão nia oan-mane sira-nia naran mak tuirmai neʼe: oan-mane primeiru mak Nadab, tuirmai Abiú,+ Eleazar+ no Itamar.+ 3 Neʼe mak Arão nia oan-mane sira-nia naran, sira simu ona mina santu* no ordena* ona atu serbí nuʼudar amlulik.+ 4 Maibé Nadab no Abiú mate iha Jeová nia oin bainhira sira sunu ahi neʼebé la tuir ukun-fuan hodi hasaʼe ba Jeová+ iha rai-fuik Sinai, no sira la iha oan-mane ida. Maibé Eleazar+ no Itamar+ kontinua serbí nuʼudar amlulik hamutuk ho sira-nia aman Arão.

5 Tuirmai Jeová dehan ba Moisés: 6 “Lori ema husi suku Levi+ mai, no haruka sira hamriik iha amlulik Arão nia oin, no sira sei ajuda nia.+ 7 Sira tenke kumpre sira-nia knaar ba nia no ba povu hotu iha tenda reuniaun nian hodi halo sira-nia serbisu iha tenda santu neʼe. 8 Sira tenke tau matan ba sasán hotu+ iha tenda reuniaun nian no halaʼo sira-nia knaar ba ema Izraél hodi halaʼo serbisu iha tenda santu.+ 9 Ó tenke entrega ema Levi ba Arão no ninia oan-mane sira. Sira mak ema neʼebé fó ona ba Arão nuʼudar prezente husi ema Izraél nia leet.+ 10 Ó tenke hili Arão no ninia oan-mane sira, no sira sei halo sira-nia knaar nuʼudar amlulik,+ no ema baibain* neʼebé hakbesik ba fatin sagradu tenke hetan kastigu-mate.”+

11 Jeová kontinua koʼalia ba Moisés, hodi dehan: 12 “Haʼu foti ema Levi husi ema Izraél nia leet hodi troka ema Izraél nia oan-mane primeiru* hotu,+ no ema Levi sei sai haʼu-nian. 13 Tanba oan primeiru hotu mak haʼu-nian.+ Iha loron neʼebé haʼu oho oan primeiru hotu iha rai-Ejitu,+ haʼu halo santu* ona Izraél nia oan primeiru ba haʼu-nia an, oan primeiru husi ema no animál.+ Sira hotu sai haʼu-nian. Haʼu mak Jeová.”

14 Jeová koʼalia tan ba Moisés iha rai-fuik Sinai,+ hodi dehan: 15 “Halo rejistu ba Levi nia oan-mane sira tuir sira-nia aman nia umakain no tuir sira-nia família. Ó tenke rejistu mane hotu hahú husi fulan ida ba leten.”+ 16 Entaun Moisés rejistu sira tuir Jeová nia orden, tuir buat neʼebé nia hatete ba Moisés. 17 Levi nia oan-mane sira-nia naran mak tuirmai neʼe: Gerson, Kohat no Merari.+

18 Gerson nia oan-mane sira-nia naran tuir sira-nia família mak tuirmai neʼe: Libni no Simei.+

19 Kohat nia oan-mane sira tuir sira-nia família mak Amram, Izar, Hebron no Uziel.+

20 Merari nia oan-mane sira tuir sira-nia família mak Mali+ no Musi.+

Neʼe mak Levi nia família tuir sira-nia aman nia umakain.

21 Gerson nia jerasaun mak família Libni+ no família Simei. Sira mak família husi Gerson. 22 Sira-nia mane hotu neʼebé rejistu ona husi fulan ida ba leten hamutuk naʼin-7.500.+ 23 Família Gerson hela iha tenda santu nia kotuk+ iha sorin parte oeste. 24 Xefe ba Gerson nia umakain* mak Lael nia oan-mane Eliasaf. 25 Gerson nia oan-mane sira-nia serbisu+ iha tenda santu mak atu tau matan ba tenda santu neʼe,+ hena neʼebé taka tenda neʼe+ iha laran no liʼur, kortina+ iha odamatan ba tenda reuniaun nian, 26 hena+ neʼebé haleʼu pátiu,* kortina+ iha odamatan ba pátiu neʼebé haleʼu tenda santu no altár, tenda nia tali sira, no mós tau matan ba serbisu hotu neʼebé liga ho buat sira-neʼe.

27 Kohat nia jerasaun mak família Amram, família Izar, família Hebron no família Uziel. Sira mak família husi Kohat.+ 28 Mane hotu neʼebé rejistu ona husi fulan ida ba leten hamutuk naʼin-8.600; sira-nia knaar mak atu tau matan ba fatin santu.+ 29 Família sira husi Kohat nia jerasaun hela iha tenda santu nia sorin parte súl.+ 30 Xefe ba Kohat nia umakain mak Uziel+ nia oan-mane Elizafan. 31 Sira-nia knaar mak atu tau matan ba Arka,+ meza,+ ahi-oan fatin,+ altár sira,+ sasán sira+ neʼebé uza ba serbisu iha fatin santu, kortina,+ no serbisu hotu neʼebé liga ho buat sira-neʼe.+

32 Ulun-naʼin boot husi ema Levi mak amlulik Arão nia oan-mane Eleazar,+ neʼebé iha knaar atu tau matan ba ema neʼebé halo serbisu iha fatin santu.

33 Merari nia jerasaun mak família Mali no família Musi. Sira mak família husi Merari.+ 34 Mane hotu neʼebé rejistu ona husi fulan ida ba leten hamutuk naʼin-6.200.+ 35 Xefe ba Merari nia umakain mak Abihail nia oan-mane Zuriel. Sira hela iha tenda santu nia sorin parte norte.+ 36 Merari nia oan-mane sira-nia knaar mak atu tau matan ba arus sira+ iha tenda santu neʼe, tenda nia ai-lolon sira,+ ai-riin sira,+ hun sira, no sasán hotu,+ no serbisu hotu neʼebé liga ho buat sira-neʼe,+ 37 no sira mós tau matan ba ai-riin sira neʼebé haleʼu pátiu no riin hun sira,+ pregu sira, no tenda nia tali sira.

38 Moisés no Arão no ninia oan-mane sira mak hela iha tenda santu nia oin iha sorin parte leste, iha tenda reuniaun nia oin. Sira-nia knaar mak atu tau matan ba fatin sagradu nuʼudar sira-nia obrigasaun hodi reprezenta ema Izraél. Ema baibain* neʼebé hakbesik ba fatin sagradu tenke hetan kastigu-mate.+

39 Mane Levi hotu husi fulan ida ba leten neʼebé Moisés no Arão rejistu ona tuir sira-nia família hodi tuir Jeová nia orden, hamutuk naʼin-22.000.

40 Tuirmai Jeová dehan ba Moisés: “Halo rejistu ba ema Izraél nia oan-mane primeiru hotu husi fulan ida ba leten,+ ó tenke sura sira, no halo lista ba sira-nia naran. 41 Ó tenke foti ema Levi ba haʼu hodi troka ema Izraél nia oan primeiru hotu,+ no foti ema Levi nia animál-hakiak sira hodi troka ema Izraél nia animál-hakiak nia oan primeiru hotu.+ Haʼu mak Jeová.” 42 Tuirmai Moisés rejistu ema Izraél nia oan-mane primeiru hotu, hodi tuir mandamentu neʼebé Jeová fó sai ona ba nia. 43 Oan-mane primeiru hotu neʼebé rejistu ona hahú husi fulan ida ba leten hamutuk naʼin-22.273.

44 Jeová koʼalia tan ba Moisés, hodi dehan: 45 “Foti ema Levi hodi troka ema Izraél nia oan primeiru hotu, no foti ema Levi nia animál-hakiak hodi troka ema Izraél nia animál-hakiak, no ema Levi tenke sai haʼu-nian. Haʼu mak Jeová. 46 Ema Izraél iha oan primeiru naʼin-273 neʼebé barak liu fali ema Levi.+ Entaun atu sosa fali+ oan primeiru naʼin-273 neʼe, 47 ó tenke foti osan-mutin 5* ba ema ida-idak,+ neʼebé tetu tuir dasin-fuan husi fatin santu.* Dasin-fuan ida nia todan mak gera 20.*+ 48 Ó tenke fó osan neʼe ba Arão no ninia oan-mane sira nuʼudar folin atu sosa fali oan primeiru neʼebé barak liu ema Levi.” 49 Entaun Moisés foti osan atu sosa fali oan primeiru sira neʼebé barak liu fali ema Levi. 50 Nia foti osan husi ema Izraél nia oan-mane primeiru hamutuk osan-mutin 1.365,* neʼebé tetu tuir dasin-fuan husi fatin santu. 51 Tuirmai Moisés fó osan neʼe ba Arão no ninia oan-mane sira hodi tuir Jeová nia liafuan,* hodi tuir mandamentu neʼebé Jeová fó sai ona ba Moisés.

4 Jeová koʼalia ba Moisés no Arão, hodi dehan: 2 “Halo sensus ba Kohat nia oan-mane sira+ husi Levi nia oan-mane sira-nia leet, tuir sira-nia família no sira-nia aman nia umakain. 3 Rejistu mane hotu husi tinan 30+ toʼo 50+ neʼebé sai parte ba grupu neʼebé halo serbisu iha tenda reuniaun nian.+

4 “Neʼe mak serbisu neʼebé Kohat nia oan-mane sira halo iha tenda reuniaun nian.+ Serbisu neʼe mak kona-ba buat neʼebé santu liu hotu: 5 Bainhira atu muda tenda, Arão no ninia oan-mane sira tenke tama hodi hasai kortina+ neʼebé besik Arka no taka Arka Aliansa nian*+ ho kortina neʼe. 6 Sira tenke taka tan ho asu-tasi* nia kulit no nahe tan hena kór-azúl iha leten no tau ninia ai-loos iha fatin hodi hiʼit.+

7 “Sira mós tenke nahe hena kór-azúl ba meza neʼebé tau paun santu,+ no sira sei tau bikan, kopu, manko no buli ba sakrifísiu hemu nian iha leten;+ no sira tenke husik nafatin paun+ neʼebé baibain hasaʼe nuʼudar sakrifísiu. 8 Sira tenke nahe hena mean iha buat sira-neʼe nia leten no taka tan ho asu-tasi nia kulit no tau ninia ai-loos iha fatin hodi hiʼit.+ 9 Tuirmai sira tenke foti hena kór-azúl no taka ahi-oan fatin,+ hamutuk ho ninia ahi-oan sira,+ besi-habit, fatin ba ahi-oan nia kabas,+ no fatin mina nian hotu neʼebé uza ba ahi-oan. 10 Sira tenke falun ahi-oan fatin neʼe hamutuk ho ninia sasán hotu ho asu-tasi nia kulit no tau neʼe iha ai-loos hodi hiʼit. 11 No sira tenke nahe hena kór-azúl ba altár osan-mean nian,+ taka tan ho asu-tasi nia kulit, no tau ninia ai-loos iha fatin hodi hiʼit.+ 12 Tuirmai sira tenke foti sasán hotu+ neʼebé uza beibeik ba serbisu iha fatin santu no tau sira iha hena kór-azúl nia laran no taka tan ho asu-tasi nia kulit no tau buat sira-neʼe iha ai-loos ida hodi hiʼit.

13 “Sira tenke hasai ahi-kadesan* husi altár+ no nahe hena kór-violeta iha altár leten. 14 Sira tenke tau sasán hotu iha leten, katak sasán neʼebé uza ba serbisu iha altár neʼe; neʼe mak ninia ahi-anar fatin, garfu, kanuru boot no manko sira;+ no sira tenke nahe asu-tasi nia kulit hodi taka altár neʼe no tau ai-loos iha ninia fatin hodi hiʼit altár.+

15 “Arão no ninia oan-mane sira tenke taka uluk fatin santu+ no sasán hotu husi fatin santu kuandu ema Izraél sira atu muda. Tuirmai mak Kohat nia oan-mane sira sei mai no hiʼit buat sira-neʼe,+ maibé sira labele kaer fatin santu atu nuneʼe sira labele mate.+ Neʼe mak Kohat nia oan-mane sira-nia knaar iha tenda reuniaun nian.

16 “Amlulik Arão nia oan-mane Eleazar+ iha knaar atu tau matan ba mina ba ahi-oan sira,+ insensu morin,+ sakrifísiu trigu* nian neʼebé hasaʼe beibeik, no mina santu.*+ Nia tenke tau matan ba tenda santu tomak no ba buat hotu iha laran, neʼe inklui fatin santu no ninia sasán hotu.”

17 Jeová koʼalia tan ba Moisés no Arão, hodi dehan: 18 “Keta husik família Kohat nian+ lakon husi ema Levi nia leet. 19 Maibé halo nuneʼe ba sira atu sira bele kontinua moris no la mate tanba hakbesik ba buat neʼebé santu liu hotu.+ Arão no ninia oan-mane sira tenke tama tenda reuniaun nian no fó knaar ba sira ida-idak no hatudu ba sira buat neʼebé sira tenke lori. 20 Sira labele tama hodi haree buat santu maski lalais deʼit, se lae sira sei mate.”+

21 Tuirmai Jeová koʼalia ba Moisés, hodi dehan: 22 “Ó tenke halo sensus ba Gerson nia oan-mane sira+ tuir sira-nia aman nia umakain no sira-nia família. 23 Ó tenke rejistu mane hotu husi tinan 30 toʼo 50 neʼebé sai parte ba grupu neʼebé halo serbisu iha tenda reuniaun nian. 24 Serbisu neʼebé família Gerson tenke halo no sasán neʼebé sira lori mak tuirmai neʼe:+ 25 Sira sei lori hena tenda nian sira husi tenda santu,+ katak tenda reuniaun nian, ninia hena neʼebé taka tenda, asu-tasi nia kulit neʼebé taka iha leten,+ kortina iha odamatan ba tenda reuniaun nian,+ 26 hena neʼebé tara haleʼu pátiu,*+ kortina iha odamatan ba pátiu+ neʼebé haleʼu tenda santu no altár neʼe, tenda nia tali sira no sira-nia sasán hotu no buat hotu neʼebé uza ba serbisu iha tenda santu. Neʼe mak sira-nia knaar. 27 Arão no ninia oan-mane sira tenke tau matan ba serbisu hotu no buat hotu neʼebé Gerson nia oan-mane sira+ lori; imi tenke fó knaar ba sira atu halaʼo serbisu sira-neʼe hotu. 28 Neʼe mak serbisu neʼebé Gerson nia família sei halo iha tenda reuniaun nian,+ no amlulik Arão nia oan-mane Itamar+ mak sei dirije sira atu halaʼo sira-nia knaar.

29 “Kona-ba Merari nia oan-mane sira,+ ó tenke rejistu sira tuir sira-nia família no sira-nia aman nia umakain. 30 Ó tenke rejistu mane hotu husi tinan 30 toʼo 50 neʼebé sai parte ba grupu neʼebé halo serbisu iha tenda reuniaun nian. 31 Sira tenke lori buat tuirmai neʼe nuʼudar sira-nia knaar+ iha tenda reuniaun nian: tenda santu nia arus sira,+ tenda nia ai-lolon sira,+ ai-riin sira,+ no hun sira;+ 32 ai-riin sira+ neʼebé haleʼu pátiu, riin nia hun sira,+ pregu sira,+ no tali tenda nian hamutuk ho sasán hotu no buat seluk hotu neʼebé uza hamutuk ho buat sira-neʼe. Imi tenke fó knaar ba sira ida-idak kona-ba sasán neʼebé sira tenke lori. 33 Neʼe mak dalan neʼebé Merari nia família+ halo serbisu iha tenda reuniaun nian, no amlulik Arão nia oan-mane Itamar mak sei dirije sira.”+

34 Tuirmai Moisés no Arão no povu nia xefe sira+ halo rejistu ba Kohat nia oan-mane sira tuir sira-nia+ família no sira-nia aman nia umakain. 35 Sira rejistu mane hotu husi tinan 30 toʼo 50 neʼebé sai parte ba grupu neʼebé halo serbisu iha tenda reuniaun nian.+ 36 Sira hotu neʼebé rejistu ona tuir sira-nia família hamutuk naʼin-2.750.+ 37 Neʼe mak mane sira neʼebé rejistu ona husi Kohat nia família, katak sira hotu neʼebé halo serbisu iha tenda reuniaun nian. Moisés no Arão rejistu sira tuir orden neʼebé Jeová fó liuhusi Moisés.+

38 Sira rejistu Gerson nia oan-mane sira+ tuir sira-nia família no sira-nia aman nia umakain. 39 Sira rejistu mane hotu husi tinan 30 toʼo 50 neʼebé sai parte ba grupu neʼebé halo serbisu iha tenda reuniaun nian. 40 Sira hotu neʼebé rejistu ona tuir sira-nia família no sira-nia aman nia umakain hamutuk naʼin-2.630.+ 41 Neʼe mak mane sira neʼebé rejistu ona husi Gerson nia família, katak sira hotu neʼebé halo serbisu iha tenda reuniaun nian. Moisés no Arão rejistu sira tuir Jeová nia orden.+

42 Sira rejistu Merari nia oan-mane sira tuir sira-nia família no sira-nia aman nia umakain. 43 Sira rejistu mane hotu husi tinan 30 toʼo 50 neʼebé sai parte ba grupu neʼebé halo serbisu iha tenda reuniaun nian.+ 44 Sira hotu neʼebé rejistu ona tuir sira-nia família hamutuk naʼin-3.200.+ 45 Neʼe mak mane sira neʼebé rejistu ona husi Merari nia família. Moisés no Arão rejistu sira tuir orden neʼebé Jeová fó liuhusi Moisés.+

46 Moisés no Arão no Izraél nia xefe sira halo rejistu ba ema Levi sira-neʼe hotu tuir sira-nia família no sira-nia aman nia umakain. 47 Mane sira-neʼe hotu husi tinan 30 toʼo 50, no sira simu knaar atu halo serbisu no lori sasán tenda reuniaun nian.+ 48 Mane hotu neʼebé rejistu ona hamutuk naʼin-8.580.+ 49 Sira rejistu mane sira-neʼe tuir orden neʼebé Jeová fó liuhusi Moisés, sira rejistu tuir mane ida-idak nia knaar no sasán neʼebé sira tenke lori; sira rejistu mane sira-neʼe hodi tuir mandamentu neʼebé Jeová fó sai ona ba Moisés.

5 Jeová koʼalia tan ba Moisés, hodi dehan: 2 “Hatete ba ema Izraél atu haruka ema hotu neʼebé moras-lepra+ no ema neʼebé iha moras been sai husi oin-lulik+ no ema neʼebé sai la moos* tanba kona ema nia mate-isin,* atu sai hodi hela iha povu nia hela-fatin nia liʼur.+ 3 Imi tenke haruka sira sai, maski sira mak mane ka feto. Imi tenke haruka sira sai ba povu nia hela-fatin nia liʼur, atu nuneʼe sira labele hafoʼer povu+ nia hela-fatin tanba haʼu hela iha povu nia leet.”+ 4 Entaun, ema Izraél halo tuir mandamentu neʼe no haruka ema moras sira sai hodi hela iha povu nia hela-fatin nia liʼur. Sira halo tuir duni buat neʼebé Jeová hatete ba Moisés.

5 Jeová koʼalia tan ba Moisés, hodi dehan: 6 “Hatete ba ema Izraél: ‘Se mane ka feto ida halo sala ruma hodi la hatudu laran-metin ba Jeová, ema* neʼe halo ona sala.+ 7 Nia* tenke fó sai ninia sala+ neʼebé nia* halo ona no tenke selu multa ho folin kompletu atu taka ninia sala no mós aumenta tan porsentu ruanulu ba folin neʼe;+ nia tenke fó multa neʼe ba ema neʼebé nia fó susar. 8 Maibé se ema neʼe mate no la iha família besik atu simu multa neʼe, nia tenke fó fali ida-neʼe ba Jeová no neʼe sei sai amlulik nian, no nia mós tenke fó bibi-malae aman nuʼudar sakrifísiu atu hamoos ninia sala.+

9 “‘Kontribuisaun santu hotu+ neʼebé ema Izraél fó ba amlulik tenke sai ninian.+ 10 Buat santu neʼebé ema Izraél ida-idak fó sei sai ninian nafatin. Buat naran deʼit neʼebé ema ida entrega ba amlulik, sei sai amlulik neʼe nian.’”

11 Jeová koʼalia tan ba Moisés, hodi dehan: 12 “Koʼalia ba ema Izraél no hatete ba sira: ‘Neʼe mak buat neʼebé imi tenke halo se mane ida nia feen halo sala no la hatudu laran-metin ba nia laʼen 13 no se mane seluk halo ona relasaun seksuál ho nia,+ maibé ninia laʼen la hatene no ema seluk mós la hatene, no feto neʼe hafoʼer ona ninia an maibé la iha ema ida sai sasin no seidauk kaer toman nia: 14 Se laʼen neʼe sai laran-moras no deskonfia ninia feen halo sala seksuál no tuir loloos feto neʼe hafoʼer ona ninia an, ka se laʼen neʼe sai laran-moras no deskonfia ninia feen halo sala seksuál maibé tuir loloos feto neʼe la hafoʼer ninia an, 15 mane neʼe tenke lori ninia feen ba amlulik, no lori mós sakrifísiu ida nuʼudar feto neʼe nian, sakrifísiu neʼe mak sevada uut gomor isin ida.* Nia labele fui mina ka tau olíbanu iha leten, tanba neʼe mak sakrifísiu sevada nian* kona-ba laran-moras, sakrifísiu sevada nian atu hanoin fali kona-ba sala neʼe.

16 “‘Amlulik tenke lori feto neʼe mai no haruka nia hamriik iha Jeová nia oin.+ 17 Amlulik tenke lori bee santu iha sanan-rai nia laran, no nia tenke foti rai-rahun balu husi rai iha tenda santu no tau neʼe iha bee laran. 18 Tuirmai, amlulik tenke haruka feto neʼe hamriik iha Jeová nia oin no kore ninia fuuk no amlulik tenke tau sakrifísiu sevada nian kona-ba laran-moras iha feto neʼe nia liman atu hanoin fali sala neʼe,+ no amlulik tenke kaer hela bee moruk neʼebé lori malisan iha nia liman.+

19 “‘Amlulik tenke haruka feto neʼe jura no dehan ba feto neʼe: “Se la iha mane seluk neʼebé halo relasaun seksuál ho ó bainhira ó sei sai nuʼudar feen ba ó-nia laʼen+ no ó la halo sala hodi sai foʼer, entaun bee moruk neʼe sei la lori malisan ba ó. 20 Maibé se ó halo ona sala bainhira ó sei sai nuʼudar feen ba ó-nia laʼen hodi hafoʼer ó-nia an, no halo ona relasaun seksuál ho mane seluk+ neʼebé laʼós ó-nia laʼen . . .” 21 Tuirmai amlulik tenke haruka feto neʼe halo juramentu neʼebé inklui mós malisan, no amlulik sei dehan ba feto neʼe: “Jeová sei husik ema temi ó-nia naran bainhira fó-malisan no jura iha ó-nia povu nia leet, nuʼudar Jeová halo ó-nia oan-fatin* namlaek* tiha no halo ó-nia kabun bubu. 22 Bee neʼe neʼebé lori malisan sei tama ba ó-nia tee-oan hodi halo ó-nia kabun bubu no ó-nia oan-fatin* namlaek* tiha.” Ho ida-neʼe, feto neʼe tenke dehan: “Amen! Amen!”*

23 “‘Tuirmai amlulik tenke hakerek malisan sira-neʼe iha livru ida no fase moos liafuan sira-neʼe iha bee moruk laran. 24 Amlulik tenke haruka feto neʼe hemu bee moruk neʼebé iha malisan, no bee neʼebé lori malisan sei tama ba feto neʼe nia laran no sei lori susar ba nia. 25 Amlulik tenke foti sakrifísiu sevada nian kona-ba laran-moras+ husi feto neʼe nia liman no book neʼe bá-mai iha Jeová nia oin, no amlulik tenke lori neʼe besik altár. 26 Amlulik tenke foti sakrifísiu sevada nian liman isin ida atu reprezenta* sakrifísiu tomak no sunu neʼe iha altár leten hodi halo suar,+ no tuirmai nia sei haruka feto neʼe hemu bee neʼe. 27 Bainhira nia haruka feto neʼe hemu, se feto neʼe hafoʼer ona ninia an no la hatudu laran-metin ba nia laʼen, entaun bee neʼebé lori malisan sei tama ba nia laran no lori susar ba nia, no ninia kabun sei bubu, no ninia oan-fatin* sei namlaek* tiha, no ema sei temi ninia naran bainhira fó-malisan no jura iha ninia povu nia leet. 28 Maibé, se feto neʼe la hafoʼer ninia an no moos* hela, nia sei sai livre husi kastigu neʼe, no nia bele sai isin-rua no iha oan.

29 “‘Neʼe mak ukun-fuan kona-ba laran-moras+ kuandu feto ida halo sala no hafoʼer ninia an bainhira nia sei sai nuʼudar feen ba ninia laʼen, 30 ka se mane ida sai laran-moras no deskonfia ninia feen halo sala seksuál; nia tenke lori ninia feen hodi hamriik iha Jeová nia oin, no amlulik sei halo tuir ukun-fuan sira-neʼe hotu ba ninia feen. 31 Mane neʼe sei sai livre husi sala, maibé ninia feen sei hatán ba ninia sala rasik.’”

6 Jeová koʼalia tan ba Moisés, hodi dehan: 2 “Koʼalia ba ema Izraél no hatete ba sira: ‘Se mane ka feto ida halo juramentu espesiál atu moris nuʼudar ema Nazireu* ida+ ba Jeová, 3 nia tenke hadook an husi tua-uvas no husi tua sira seluk. Nia labele hemu tua-siin husi tua-uvas ka tua-siin husi tua sira seluk.+ Nia labele hemu buat naran deʼit neʼebé halo husi uvas-fuan, no mós labele han uvas-fuan, maski neʼe foin kuʼu ka maran ona. 4 Durante tempu hotu neʼebé nia sai nuʼudar ema Nazireu, nia labele han buat naran deʼit neʼebé halo husi uvas, inklui uvas-fuan neʼebé matak no mós uvas nia kulit.

5 “‘Durante tempu hotu neʼebé nia jura hodi sai ema Nazireu, lámina ida mós labele kona nia ulun.+ Nia tenkesér santu nafatin hodi husik ninia fuuk sai naruk toʼo tempu neʼebé nia haketak an ba Jeová remata ona. 6 Nia labele hakbesik ba ema nia mate-isin* durante tempu hotu neʼebé nia haketak an ba Jeová. 7 Maski ninia aman ka inan ka maun ka alin ka ninia feton mak mate, nia labele hafoʼer ninia an,+ tanba sinál Nazireu nian ba ninia Maromak mak iha ninia ulun.

8 “‘Nia mak santu ba Jeová durante tempu hotu nuʼudar ema Nazireu. 9 Maibé se ema ida mate derrepente deʼit iha ninia sorin+ no nia hafoʼer ninia fuuk neʼebé hanesan sinál katak nia haketak an ona ba Maromak,* nia tenke koi nia fuuk+ iha loron hamoos an nian. Nia tenke koi nia fuuk iha loron hitu. 10 No iha loron ualu, nia tenke lori manu-lakateu rua ka manu-pombu oan rua ba amlulik iha odamatan tenda reuniaun nian. 11 Amlulik tenke prepara manu ida nuʼudar sakrifísiu sala nian no manu ida seluk nuʼudar sakrifísiu sunu nian, ho ida-neʼe, amlulik sei hamoos ema neʼe nia sala+ tanba kona ema nia mate-isin.* Tuirmai nia tenke halo santu* ninia ulun iha loron neʼe. 12 Nia tenke haketak fali nia an ba Jeová hodi komesa fali tempu neʼebé nia moris nuʼudar ema Nazireu, no nia tenke lori bibi-malae aman neʼebé seidauk toʼo tinan ida nuʼudar sakrifísiu taka sala nian. Maibé nia labele sura fali ninia loron uluk nian tanba nia hafoʼer ona ninia an nuʼudar ema Nazireu.

13 “‘Neʼe mak ukun-fuan kona-ba ema Nazireu: Bainhira nia remata ona ninia tempu nuʼudar ema Nazireu,+ imi tenke lori nia ba odamatan tenda reuniaun nian. 14 Iha neʼebá nia tenke fó sakrifísiu ba Jeová, sakrifísiu neʼe mak bibi-malae aman neʼebé seidauk toʼo tinan ida no la iha moras hodi sai nuʼudar sakrifísiu sunu nian,+ bibi-malae inan ida neʼebé seidauk toʼo tinan ida no la iha moras hodi sai nuʼudar sakrifísiu sala nian,+ bibi-malae aman ida neʼebé la iha moras nuʼudar sakrifísiu dame nian,+ 15 no lori raga ida neʼebé nakonu ho paun hanesan kelu neʼebé la iha fermentu, neʼebé halo husi trigu uut neʼebé diʼak no kahur ona ho mina, paun mihis neʼebé la iha fermentu no kose ona ho mina, no mós ninia sakrifísiu trigu* nian+ no sakrifísiu hemu nian.+ 16 Amlulik tenke hasaʼe buat hotu neʼe iha Jeová nia oin no tenke hasaʼe sakrifísiu sala nian no sakrifísiu sunu nian. 17 Amlulik tenke hasaʼe bibi-malae aman nuʼudar sakrifísiu dame nian ba Jeová hamutuk ho raga neʼebé iha paun neʼebé la iha fermentu, no amlulik neʼe mós sei hasaʼe ninia sakrifísiu trigu nian+ no ninia sakrifísiu hemu nian.

18 “‘Ema Nazireu neʼe tenke koi nia fuuk*+ iha odamatan ba tenda reuniaun nian, no nia sei foti ninia fuuk neʼebé sai naruk durante tempu neʼebé nia moris nuʼudar ema Nazireu no tau neʼe iha ahi neʼebé iha sakrifísiu dame nian nia okos. 19 Amlulik tenke foti bibi-malae aman nia kabaas neʼebé daʼan ona,+ paun ida hanesan kelu neʼebé la iha fermentu husi raga neʼe, no paun mihis ida neʼebé la iha fermentu, no tau buat sira-neʼe ba ema Nazireu neʼe nia liman bainhira nia koi ona ninia fuuk neʼebé sai nuʼudar sinál ba ema Nazireu. 20 Amlulik tenke book buat sira-neʼe bá-mai nuʼudar sakrifísiu doko bá-mai nian iha Jeová nia oin.+ Neʼe mak buat santu neʼebé sei sai amlulik nian, hamutuk ho animál nia hirus-matan husi sakrifísiu doko bá-mai nian no animál nia kelen neʼebé fó ona nuʼudar kontribuisaun.+ Tuirmai, ema Nazireu neʼe bele hemu tua-uvas.

21 “‘Neʼe mak ukun-fuan kona-ba ema Nazireu+ neʼebé halo juramentu: Se ema Nazireu ida jura atu fó tan sakrifísiu ba Jeová tuir ninia kbiit hamutuk ho sakrifísiu neʼebé nia tenke fó hodi tuir lei kona-ba ema Nazireu, entaun nia presiza kumpre ninia juramentu neʼe tanba nia hafolin ukun-fuan kona-ba ema Nazireu nian.’”

22 Tuirmai Jeová dehan ba Moisés: 23 “Hatete ba Arão no ninia oan-mane sira: ‘Imi tenke haraik bensaun+ ba povu Izraél hanesan tuirmai neʼe. Dehan ba sira:

24 “Jeová sei haraik bensaun ba imi+ no proteje imi.

25 Jeová sei hatudu laran-sadiʼa* ba imi,+ no nia sei simu imi.

26 Jeová sei hateke ba imi ho laran-diʼak* no haraik dame ba imi.”’+

27 Sira tenke temi haʼu-nia naran hodi fó bensaun ba povu Izraél,+ atu nuneʼe haʼu sei haraik bensaun ba sira.”+

7 Iha loron neʼebé Moisés remata harii tenda santu,+ nia fui mina+ no halo santu tenda neʼe hamutuk ho buat hotu neʼebé iha laran, halo santu altár, no mós ninia sasán hotu.+ Bainhira nia fui tiha mina no halo santu buat sira-neʼe,+ 2 Izraél nia xefe sira,+ ulun-naʼin ba suku sira, fó sakrifísiu. Xefe ba suku sira-neʼe neʼebé tau matan ba sensus 3 lori sira-nia sakrifísiu ba Jeová nia oin, neʼe mak karrosa boot neen no karau-aman 12, karrosa boot ida ba xefe naʼin-rua no karau-aman ida ba sira ida-idak; no sira lori buat sira-neʼe ba tenda santu nia oin. 4 Jeová hatete ba Moisés: 5 “Simu buat sira-neʼe husi sira, tanba ema Levi bele uza buat sira-neʼe hodi halo serbisu iha tenda reuniaun nian, no ó tenke fó buat sira-neʼe ba ema Levi, ba sira ida-idak tuir sira-nia presiza hodi kumpre sira-nia knaar.”

6 Entaun Moisés simu karrosa boot sira-neʼe no mós karau sira no entrega ba ema Levi. 7 Nia fó karrosa boot rua no karau-aman haat ba Gerson nia oan-mane sira, tuir sira-nia presiza atu kumpre sira-nia knaar;+ 8 no nia fó karrosa boot haat no karau-aman ualu ba Merari nia oan-mane sira, tuir sira-nia presiza atu kumpre sira-nia knaar, no amlulik Arão nia oan-mane Itamar mak dirije Merari nia oan-mane sira.+ 9 Maibé nia la fó buat sira-neʼe ba Kohat nia oan-mane sira tanba sira-nia knaar mak liga ho serbisu iha fatin santu,+ no sira lori buat santu iha sira-nia kabaas.+

10 Xefe sira fó sira-nia prezente iha loron neʼebé inaugura*+ altár neʼe, katak iha loron neʼebé fui mina ba altár neʼe. Bainhira xefe sira-neʼe entrega sira-nia sakrifísiu iha altár nia oin, 11 Jeová dehan ba Moisés: “Loron ida-idak xefe ida sei fó ninia sakrifísiu atu inaugura altár neʼe.”

12 Xefe neʼebé fó ninia sakrifísiu iha loron primeiru mak Aminadab nia oan-mane Nasson+ husi suku Judá. 13 Ninia sakrifísiu mak bikan osan-mutin ida ho todan kilograma ida ho balu* no manko osan-mutin ida ho todan grama 800,* neʼebé tetu tuir dasin-fuan husi fatin santu.*+ Bikan ho manko neʼe nakonu ho trigu uut neʼebé diʼak no kahur ona ho mina nuʼudar sakrifísiu trigu* nian;+ 14 kopu* osan-mean ida ho todan grama 114,* neʼebé nakonu ho insensu; 15 karau-oan ida neʼebé aman, bibi-malae aman ida, no bibi-malae oan* ida neʼebé seidauk toʼo tinan ida nuʼudar sakrifísiu sunu nian;+ 16 bibi-timur oan ida nuʼudar sakrifísiu sala nian;+ 17 no nia mós lori karau-aman rua, bibi-malae aman lima, bibi-timur aman lima, no bibi-malae oan lima neʼebé tinan ida nuʼudar sakrifísiu dame nian.+ Neʼe mak sakrifísiu husi Aminadab nia oan-mane Nasson.+

18 Xefe neʼebé fó ninia sakrifísiu iha loron segundu mak Zuar nia oan-mane Netanel,+ neʼebé nuʼudar xefe ba suku Issacar. 19 Ninia sakrifísiu mak bikan osan-mutin ida ho todan kilograma ida ho balu no manko osan-mutin ida ho todan grama 800, neʼebé tetu tuir dasin-fuan husi fatin santu.+ Bikan ho manko neʼe nakonu ho trigu uut neʼebé diʼak no kahur ona ho mina nuʼudar sakrifísiu trigu nian;+ 20 kopu osan-mean ida ho todan grama 114, neʼebé nakonu ho insensu; 21 karau-oan ida neʼebé aman, bibi-malae aman ida, no bibi-malae oan ida neʼebé seidauk toʼo tinan ida nuʼudar sakrifísiu sunu nian;+ 22 bibi-timur oan ida nuʼudar sakrifísiu sala nian;+ 23 no nia mós lori karau-aman rua, bibi-malae aman lima, bibi-timur aman lima, no bibi-malae oan lima neʼebé tinan ida nuʼudar sakrifísiu dame nian.+ Neʼe mak sakrifísiu husi Zuar nia oan-mane Netanel.

24 Xefe neʼebé fó ninia sakrifísiu iha loron terseiru mak Helon nia oan-mane Eliab,+ neʼebé nuʼudar xefe ba suku Zebulão. 25 Ninia sakrifísiu mak bikan osan-mutin ida ho todan kilograma ida ho balu no manko osan-mutin ida ho todan grama 800, neʼebé tetu tuir dasin-fuan husi fatin santu.+ Bikan ho manko neʼe nakonu ho trigu uut neʼebé diʼak no kahur ona ho mina nuʼudar sakrifísiu trigu nian;+ 26 kopu osan-mean ida ho todan grama 114, neʼebé nakonu ho insensu; 27 karau-oan ida neʼebé aman, bibi-malae aman ida, no bibi-malae oan ida neʼebé seidauk toʼo tinan ida nuʼudar sakrifísiu sunu nian;+ 28 bibi-timur oan ida nuʼudar sakrifísiu sala nian;+ 29 no nia mós lori karau-aman rua, bibi-malae aman lima, bibi-timur aman lima, no bibi-malae oan lima neʼebé tinan ida nuʼudar sakrifísiu dame nian.+ Neʼe mak sakrifísiu husi Helon nia oan-mane Eliab.+

30 Xefe neʼebé fó ninia sakrifísiu iha loron haat mak Sedeur nia oan-mane Elizur,+ neʼebé nuʼudar xefe ba suku Ruben. 31 Ninia sakrifísiu mak bikan osan-mutin ida ho todan kilograma ida ho balu no manko osan-mutin ida ho todan grama 800, neʼebé tetu tuir dasin-fuan husi fatin santu.+ Bikan ho manko neʼe nakonu ho trigu uut neʼebé diʼak no kahur ona ho mina nuʼudar sakrifísiu trigu nian;+ 32 kopu osan-mean ida ho todan grama 114, neʼebé nakonu ho insensu; 33 karau-oan ida neʼebé aman, bibi-malae aman ida, no bibi-malae oan ida neʼebé seidauk toʼo tinan ida nuʼudar sakrifísiu sunu nian;+ 34 bibi-timur oan ida nuʼudar sakrifísiu sala nian;+ 35 no nia mós lori karau-aman rua, bibi-malae aman lima, bibi-timur aman lima, no bibi-malae oan lima neʼebé tinan ida nuʼudar sakrifísiu dame nian.+ Neʼe mak sakrifísiu husi Sedeur nia oan-mane Elizur.+

36 Xefe neʼebé fó ninia sakrifísiu iha loron lima mak Zurisadai nia oan-mane Selumiel,+ neʼebé nuʼudar xefe ba suku Simeão. 37 Ninia sakrifísiu mak bikan osan-mutin ida ho todan kilograma ida ho balu no manko osan-mutin ida ho todan grama 800, neʼebé tetu tuir dasin-fuan husi fatin santu.+ Bikan ho manko neʼe nakonu ho trigu uut neʼebé diʼak no kahur ona ho mina nuʼudar sakrifísiu trigu nian;+ 38 kopu osan-mean ida ho todan grama 114, neʼebé nakonu ho insensu; 39 karau-oan ida neʼebé aman, bibi-malae aman ida, no bibi-malae oan ida neʼebé seidauk toʼo tinan ida nuʼudar sakrifísiu sunu nian;+ 40 bibi-timur oan ida nuʼudar sakrifísiu sala nian;+ 41 no nia mós lori karau-aman rua, bibi-malae aman lima, bibi-timur aman lima, no bibi-malae oan lima neʼebé tinan ida nuʼudar sakrifísiu dame nian.+ Neʼe mak sakrifísiu husi Zurisadai nia oan-mane Selumiel.+

42 Xefe neʼebé fó ninia sakrifísiu iha loron neen mak Deuel nia oan-mane Eliasaf,+ neʼebé nuʼudar xefe ba suku Gad. 43 Ninia sakrifísiu mak bikan osan-mutin ida ho todan kilograma ida ho balu no manko osan-mutin ida ho todan grama 800, neʼebé tetu tuir dasin-fuan husi fatin santu.+ Bikan ho manko neʼe nakonu ho trigu uut neʼebé diʼak no kahur ona ho mina nuʼudar sakrifísiu trigu nian;+ 44 kopu osan-mean ida ho todan grama 114, neʼebé nakonu ho insensu; 45 karau-oan ida neʼebé aman, bibi-malae aman ida, no bibi-malae oan ida neʼebé seidauk toʼo tinan ida nuʼudar sakrifísiu sunu nian;+ 46 bibi-timur oan ida nuʼudar sakrifísiu sala nian;+ 47 no nia mós lori karau-aman rua, bibi-malae aman lima, bibi-timur aman lima, no bibi-malae oan lima neʼebé tinan ida nuʼudar sakrifísiu dame nian.+ Neʼe mak sakrifísiu husi Deuel nia oan-mane Eliasaf.+

48 Xefe neʼebé fó ninia sakrifísiu iha loron hitu mak Amiud nia oan-mane Elisama,+ neʼebé nuʼudar xefe ba suku Efraim. 49 Ninia sakrifísiu mak bikan osan-mutin ida ho todan kilograma ida ho balu no manko osan-mutin ida ho todan grama 800, neʼebé tetu tuir dasin-fuan husi fatin santu.+ Bikan ho manko neʼe nakonu ho trigu uut neʼebé diʼak no kahur ona ho mina nuʼudar sakrifísiu trigu nian;+ 50 kopu osan-mean ida ho todan grama 114, neʼebé nakonu ho insensu; 51 karau-oan ida neʼebé aman, bibi-malae aman ida, no bibi-malae oan ida neʼebé seidauk toʼo tinan ida nuʼudar sakrifísiu sunu nian;+ 52 bibi-timur oan ida nuʼudar sakrifísiu sala nian;+ 53 no nia mós lori karau-aman rua, bibi-malae aman lima, bibi-timur aman lima, no bibi-malae oan lima neʼebé tinan ida nuʼudar sakrifísiu dame nian.+ Neʼe mak sakrifísiu husi Amiud nia oan-mane Elisama.+

54 Xefe neʼebé fó ninia sakrifísiu iha loron ualu mak Pedazur nia oan-mane Gamaliel,+ neʼebé nuʼudar xefe ba suku Manasés. 55 Ninia sakrifísiu mak bikan osan-mutin ida ho todan kilograma ida ho balu no manko osan-mutin ida ho todan grama 800, neʼebé tetu tuir dasin-fuan husi fatin santu.+ Bikan ho manko neʼe nakonu ho trigu uut neʼebé diʼak no kahur ona ho mina nuʼudar sakrifísiu trigu nian;+ 56 kopu osan-mean ida ho todan grama 114, neʼebé nakonu ho insensu; 57 karau-oan ida neʼebé aman, bibi-malae aman ida, no bibi-malae oan ida neʼebé seidauk toʼo tinan ida nuʼudar sakrifísiu sunu nian;+ 58 bibi-timur oan ida nuʼudar sakrifísiu sala nian;+ 59 no nia mós lori karau-aman rua, bibi-malae aman lima, bibi-timur aman lima, no bibi-malae oan lima neʼebé tinan ida nuʼudar sakrifísiu dame nian.+ Neʼe mak sakrifísiu husi Pedazur nia oan-mane Gamaliel.+

60 Xefe+ neʼebé fó ninia sakrifísiu iha loron sia mak Jideoni nia oan-mane Abidan,+ neʼebé nuʼudar xefe ba suku Benjamim. 61 Ninia sakrifísiu mak bikan osan-mutin ida ho todan kilograma ida ho balu no manko osan-mutin ida ho todan grama 800, neʼebé tetu tuir dasin-fuan husi fatin santu.+ Bikan ho manko neʼe nakonu ho trigu uut neʼebé diʼak no kahur ona ho mina nuʼudar sakrifísiu trigu nian;+ 62 kopu osan-mean ida ho todan grama 114, neʼebé nakonu ho insensu; 63 karau-oan ida neʼebé aman, bibi-malae aman ida, no bibi-malae oan ida neʼebé seidauk toʼo tinan ida nuʼudar sakrifísiu sunu nian;+ 64 bibi-timur oan ida nuʼudar sakrifísiu sala nian;+ 65 no nia mós lori karau-aman rua, bibi-malae aman lima, bibi-timur aman lima, no bibi-malae oan lima neʼebé tinan ida nuʼudar sakrifísiu dame nian.+ Neʼe mak sakrifísiu husi Jideoni nia oan-mane Abidan.+

66 Xefe neʼebé fó ninia sakrifísiu iha loron sanulu mak Amisadai nia oan-mane Ahiezer, neʼebé nuʼudar xefe ba suku Dan.+ 67 Ninia sakrifísiu mak bikan osan-mutin ida ho todan kilograma ida ho balu no manko osan-mutin ida ho todan grama 800, neʼebé tetu tuir dasin-fuan husi fatin santu.+ Bikan ho manko neʼe nakonu ho trigu uut neʼebé diʼak no kahur ona ho mina nuʼudar sakrifísiu trigu nian;+ 68 kopu osan-mean ida ho todan grama 114, neʼebé nakonu ho insensu; 69 karau-oan ida neʼebé aman, bibi-malae aman ida, no bibi-malae oan ida neʼebé seidauk toʼo tinan ida nuʼudar sakrifísiu sunu nian;+ 70 bibi-timur oan ida nuʼudar sakrifísiu sala nian;+ 71 no nia mós lori karau-aman rua, bibi-malae aman lima, bibi-timur aman lima, no bibi-malae oan lima neʼebé tinan ida nuʼudar sakrifísiu dame nian.+ Neʼe mak sakrifísiu husi Amisadai nia oan-mane Ahiezer.+

72 Xefe neʼebé fó ninia sakrifísiu iha loron 11 mak Okran nia oan-mane Pagiel, neʼebé nuʼudar xefe ba suku Aser.+ 73 Ninia sakrifísiu mak bikan osan-mutin ida ho todan kilograma ida ho balu no manko osan-mutin ida ho todan grama 800, neʼebé tetu tuir dasin-fuan husi fatin santu.+ Bikan ho manko neʼe nakonu ho trigu uut neʼebé diʼak no kahur ona ho mina nuʼudar sakrifísiu trigu nian;+ 74 kopu osan-mean ida ho todan grama 114, neʼebé nakonu ho insensu; 75 karau-oan ida neʼebé aman, bibi-malae aman ida, no bibi-malae oan ida neʼebé seidauk toʼo tinan ida nuʼudar sakrifísiu sunu nian;+ 76 bibi-timur oan ida nuʼudar sakrifísiu sala nian;+ 77 no nia lori mós karau-aman rua, bibi-malae aman lima, bibi-timur aman lima, no bibi-malae oan lima neʼebé tinan ida nuʼudar sakrifísiu dame nian.+ Neʼe mak sakrifísiu husi Okran nia oan-mane Pagiel.+

78 Xefe neʼebé fó ninia sakrifísiu iha loron 12 mak Enan nia oan-mane Aira, neʼebé nuʼudar xefe ba suku Naftali.+ 79 Ninia sakrifísiu mak bikan osan-mutin ida ho todan kilograma ida ho balu no manko osan-mutin ida ho todan grama 800, neʼebé tetu tuir dasin-fuan husi fatin santu.+ Bikan ho manko neʼe nakonu ho trigu uut neʼebé diʼak no kahur ona ho mina nuʼudar sakrifísiu trigu nian;+ 80 kopu osan-mean ida ho todan grama 114, neʼebé nakonu ho insensu; 81 karau-oan ida neʼebé aman, bibi-malae aman ida, no bibi-malae oan ida neʼebé seidauk toʼo tinan ida nuʼudar sakrifísiu sunu nian;+ 82 bibi-timur oan ida nuʼudar sakrifísiu sala nian;+ 83 no nia lori mós karau-aman rua, bibi-malae aman lima, bibi-timur aman lima, no bibi-malae oan lima neʼebé tinan ida nuʼudar sakrifísiu dame nian.+ Neʼe mak sakrifísiu husi Enan nia oan-mane Aira.+

84 Neʼe mak sakrifísiu atu inaugura+ altár neʼebé Izraél nia xefe sira fó bainhira fui mina ba altár neʼe: bikan husi osan-mutin 12, manko husi osan-mutin 12, kopu husi osan-mean 12;+ 85 bikan osan-mutin ida-idak nia todan mak kilograma ida ho balu no manko ida-idak nia todan mak grama 800, sasán hotu neʼebé halo husi osan-mutin nia todan hamutuk kilograma 27* neʼebé tetu tuir dasin-fuan husi fatin santu;+ 86 kopu osan-mean 12 neʼebé nakonu ho insensu, kopu ida-idak nia todan mak grama 114 neʼebé tetu tuir dasin-fuan husi fatin santu, no kopu hotu nia todan hamutuk kilograma ida ho balu. 87 Animál hotu ba sakrifísiu sunu nian hamutuk karau-aman 12, bibi-malae aman 12, bibi-malae oan 12 neʼebé tinan ida no sira-nia sakrifísiu trigu nian, no bibi-timur aman hamutuk 12 nuʼudar sakrifísiu sala nian; 88 no animál hotu ba sakrifísiu dame nian hamutuk karau-aman 24, bibi-malae aman 60, bibi-timur aman 60, no bibi-malae oan 60 neʼebé tinan ida. Neʼe mak sakrifísiu atu inaugura+ altár bainhira fui tiha mina ba altár neʼe.+

89 Iha tempu hotu neʼebé Moisés tama ba tenda reuniaun nian atu koʼalia ho Maromak,+ Moisés sei rona lian ida koʼalia ho nia husi Arka Aliansa* nia matan leten,+ husi kerubín rua nia leet;+ nuneʼe mak Maromak koʼalia ho nia.

8 Jeová koʼalia ba Moisés, hodi dehan: 2 “Koʼalia ba Arão no hatete ba nia: ‘Bainhira ó sunu lakan ahi-oan hitu, ó tenke tau didiʼak sira hodi bele fó naroman ba área neʼebé iha ahi-oan fatin neʼe nia oin.’”+ 3 Entaun Arão halo buat tuirmai neʼe: Nia sunu lakan ahi-oan hodi fó naroman ba área neʼebé iha ahi-oan fatin neʼe nia oin,+ hodi tuir mandamentu neʼebé Jeová fó sai ona ba Moisés. 4 Tuirmai neʼe mak dalan neʼebé sira halo ahi-oan fatin: Sira tuku osan-mean hodi halo ahi-oan fatin; husi ninia kain toʼo ninia funan, sira tuku osan-mean hodi halo buat sira-neʼe hotu.+ Sira halo ahi-oan fatin neʼe tuir vizaun+ neʼebé Jeová hatudu ona ba Moisés.

5 Jeová koʼalia tan ba Moisés, hodi dehan: 6 “Hili ema Levi husi ema Izraél nia leet, no hamoos sira.+ 7 Ó tenke halo buat tuirmai neʼe hodi hamoos sira: Hisik bee hamoos sala nian ba sira, no sira tenke koi sira-nia fuuk no isin-fulun hotu ho lámina, fase sira-nia roupa, no hamoos sira-nia an rasik.+ 8 Tuirmai sira tenke foti karau-aman* ida+ no ninia sakrifísiu trigu* nian+ husi trigu uut neʼebé diʼak no kahur ona ho mina, no ó tenke foti karau-aman* ida tan nuʼudar sakrifísiu sala nian.+ 9 No ó tenke lori ema Levi ba tenda reuniaun nia oin no halibur povu Izraél tomak.+ 10 Bainhira ó lori ema Levi ba Jeová nia oin, ema Izraél tenke tau sira-nia liman ba ema Levi.+ 11 Arão tenke hasaʼe* ema Levi iha Jeová nia oin nuʼudar sakrifísiu doko bá-mai nian+ husi ema Izraél, no sira sei halaʼo sira-nia knaar ba Jeová.+

12 “Tuirmai ema Levi tenke tau sira-nia liman ba karau-aman sira-nia ulun.+ Depois neʼe, hasaʼe karau-aman ida nuʼudar sakrifísiu sala nian no ida seluk nuʼudar sakrifísiu sunu nian ba Jeová atu hamoos ema Levi nia sala.+ 13 Ó tenke haruka ema Levi hamriik iha Arão no ninia oan-mane sira-nia oin no hasaʼe* ema Levi sira nuʼudar sakrifísiu doko bá-mai nian ba Jeová. 14 Ó tenke haketak ema Levi husi ema Izraél sira-nia leet, no ema Levi sei sai haʼu-nian.+ 15 Depois neʼe, ema Levi sei mai atu serbí iha tenda reuniaun nian. Neʼe mak dalan neʼebé ó tenke hamoos sira no hasaʼe* sira nuʼudar sakrifísiu doko bá-mai nian. 16 Tanba sira sai ona nuʼudar prezente neʼebé entrega ona mai haʼu husi ema Izraél nia leet. Haʼu sei foti sira ba haʼu-nia an hodi troka ema Izraél nia oan primeiru* hotu.+ 17 Tanba oan primeiru hotu iha ema Izraél nia leet mak haʼu-nian, neʼe inklui ema no animál nia oan primeiru.+ Haʼu halo santu* ona sira ba haʼu-nia an iha loron neʼebé haʼu oho oan primeiru hotu iha rai-Ejitu.+ 18 Haʼu sei foti ema Levi hodi troka oan-mane primeiru hotu iha ema Izraél nia leet. 19 Haʼu sei fó ema Levi nuʼudar prezente ba Arão no ninia oan-mane sira husi ema Izraél nia leet, atu halo serbisu ba ema Izraél iha tenda reuniaun nian+ no atu hamoos ema Izraél nia sala, hodi nuneʼe susar ruma labele mosu iha ema Izraél nia leet+ tanba ema Izraél hakbesik ba fatin santu.”

20 Moisés, Arão no povu Izraél tomak halo nuneʼe ba ema Levi. Ema Izraél halo tuir mandamentu hotu neʼebé Jeová fó sai ona ba Moisés kona-ba ema Levi. 21 Entaun ema Levi hamoos sira-nia an no fase sira-nia roupa,+ depois neʼe, Arão hasaʼe* sira nuʼudar sakrifísiu doko bá-mai nian iha Jeová nia oin.+ Tuirmai Arão hasaʼe sakrifísiu atu hamoos sira-nia sala.+ 22 Depois neʼe, ema Levi tama ba tenda reuniaun nian hodi halaʼo sira-nia knaar iha Arão no ninia oan-mane sira-nia oin. Sira halo ba ema Levi hodi tuir mandamentu neʼebé Jeová fó sai ona ba Moisés kona-ba ema Levi.

23 Jeová koʼalia tan ba Moisés, hodi dehan: 24 “Arranju kona-ba ema Levi mak tuirmai neʼe: Mane sira husi tinan 25 ba leten sei hola parte ba grupu neʼebé halo serbisu iha tenda reuniaun nian. 25 Maibé kuandu sira tinan 50 ona, sira sei para husi serbisu neʼe. 26 Sira bele ajuda sira-nia maluk sira neʼebé iha knaar iha tenda reuniaun nian, maibé sira rasik labele halaʼo serbisu iha fatin neʼe. Neʼe mak buat neʼebé ó tenke halo kona-ba ema Levi no kona-ba sira-nia knaar.”+

9 Iha fulan-primeiru tinan segundu husi tempu neʼebé sira sai husi rai-Ejitu, Jeová koʼalia ba Moisés iha rai-fuik Sinai,+ hodi dehan: 2 “Ema Izraél tenke prepara sakrifísiu Páskua* nian+ tuir tempu neʼebé deside ona.+ 3 Iha loron 14 iha fulan neʼe kuandu rai-nakaras,* imi tenke prepara sakrifísiu neʼe tuir tempu neʼebé deside ona. Imi tenke prepara hodi tuir ukun-fuan hotu no matadalan hotu kona-ba selebrasaun neʼe.”+

4 Entaun Moisés hatete ba ema Izraél atu prepara sakrifísiu Páskua nian. 5 Tuirmai sira prepara sakrifísiu Páskua nian iha loron 14 fulan-primeiru kuandu rai-nakaras,* iha rai-fuik Sinai. Ema Izraél halo tuir mandamentu hotu neʼebé Jeová fó sai ona ba Moisés.

6 Maibé iha mane balu neʼebé sai la moos* ona tanba kona ema nia mate-isin,*+ tan neʼe sira labele prepara sakrifísiu Páskua nian iha loron neʼe. Entaun mane sira-neʼe bá hasoru Moisés no Arão iha loron neʼe+ 7 no dehan ba Moisés: “Ami sai la moos ona tanba kona ema nia mate-isin.* Maski nuneʼe, tanbasá mak ami labele hasaʼe sakrifísiu ba Jeová hamutuk ho ema Izraél tuir tempu neʼebé deside ona?”+ 8 Ho ida-neʼe, Moisés dehan ba sira: “Hein lai iha neʼebá, husik haʼu rona toʼok saida mak Jeová nia mandamentu kona-ba imi.”+

9 Tuirmai Jeová dehan ba Moisés: 10 “Hatete ba ema Izraél: ‘Maski ema ruma iha imi-nia leet ka imi-nia jerasaun iha futuru sai la moos tanba kona ema nia mate-isin*+ ka halo viajen ba fatin dook, nia mós tenke prepara sakrifísiu Páskua nian ba Jeová. 11 Ema sira hanesan neʼe tenke prepara selebrasaun neʼe iha loron 14 fulan-segundu+ kuandu rai-nakaras.* Sira tenke han neʼe hamutuk ho paun neʼebé la iha fermentu no modo neʼebé moruk.+ 12 Sira labele husik ai-han ida toʼo dadeer,+ no labele halo tohar animál nia ruin ida.+ Sira tenke prepara neʼe tuir ukun-fuan hotu kona-ba Páskua. 13 Maibé se ema ida moos* hela ka la laʼo ba fatin dook, maibé nia la prepara sakrifísiu Páskua nian, entaun ema* neʼe tenke mate hodi halakon husi povu nia leet,+ tanba nia la hasaʼe Jeová nia sakrifísiu tuir tempu neʼebé deside ona. Ema neʼe tenke hatán ba ninia sala.

14 “‘Se ema estranjeiru ida hela ho imi, nia mós tenke prepara sakrifísiu Páskua nian ba Jeová.+ Nia tenke halo nuneʼe tuir ukun-fuan no matadalan hotu kona-ba Páskua.+ Iha ukun-fuan ida deʼit ba imi hotu, maski ema estranjeiru ka rai-naʼin.’”+

15 Iha loron neʼebé harii hotu ona tenda santu,+ kalohan taka tenda santu neʼe, katak tenda neʼebé iha Arka Aliansa nian,* maibé iha kalan, buat neʼebé haree hanesan ahi mosu iha tenda santu neʼe nia leten toʼo dadeer.+ 16 Neʼe mak buat neʼebé kontinua mosu. Kalohan taka tenda neʼe iha loron, no iha buat ida hanesan ahi iha kalan.+ 17 Bainhira kalohan hiʼit saʼe tiha husi tenda neʼe, ema Izraél mós muda kedas husi fatin neʼe,+ no iha fatin neʼebé kalohan para, iha fatin neʼe mak ema Izraél sei hela.+ 18 Ema Izraél muda tuir Jeová nia orden, no sira hela tuir Jeová nia orden neʼe.+ Bainhira kalohan nafatin iha tenda santu nia leten, sira mós kontinua hela iha fatin neʼe. 19 Bainhira kalohan nafatin iha tenda santu nia leten ba tempu kleur, ema Izraél mós halo tuir Jeová no la muda husi fatin neʼe.+ 20 Dala ruma kalohan kontinua iha tenda santu nia leten ba loron balu. Ema Izraél nafatin hela hodi tuir Jeová nia orden, no sira muda husi fatin neʼe tuir Jeová nia orden. 21 Dala ruma kalohan neʼe kontinua iha tenda leten husi kalan toʼo dadeer, no bainhira kalohan neʼe hiʼit saʼe iha dadeer, sira mós sai husi fatin neʼe. Maski kalohan neʼe hiʼit saʼe iha loron ka iha kalan, sira mós sei muda husi fatin neʼe.+ 22 Maski kalohan neʼe kontinua iha tenda santu nia leten ba loron rua, fulan ida, ka ba tempu naruk, bainhira kalohan neʼe nafatin iha tenda leten ema Izraél kontinua hela iha fatin neʼe no la muda husi fatin neʼe. Maibé kuandu kalohan neʼe hiʼit saʼe ona, sira muda husi fatin neʼe. 23 Ema Izraél hela hodi tuir Jeová nia orden, no sira muda husi fatin neʼe hodi tuir Jeová nia orden. Sira kumpre sira-nia obrigasaun hodi halo tuir Jeová nia orden neʼebé Jeová fó liuhusi Moisés.

10 Tuirmai Jeová dehan ba Moisés: 2 “Halo trombeta rua+ ba ó-nia an; tuku osan-mutin hodi halo trombeta sira-neʼe, no uza trombeta sira-neʼe hodi bolu povu no hodi fó sinál atu sobu tenda sira. 3 Bainhira huu trombeta rua neʼe hotu, povu tomak tenke mai hasoru ó iha odamatan tenda reuniaun nian.+ 4 Se huu trombeta ida deʼit, entaun xefe sira deʼit, katak ulun-naʼin ba ema rihun ba rihun iha Izraél mak tenke mai hasoru ó.+

5 “Bainhira imi huu trombeta ho lian tun-saʼe, entaun povu neʼebé hela iha parte leste+ tenke sai husi sira-nia fatin. 6 Bainhira imi huu trombeta lian tun-saʼe ba dala segundu, povu neʼebé hela iha parte súl+ tenke sai husi sira-nia fatin. Bainhira imi huu trombeta ho lian hanesan neʼe, povu iha parte ida-idak sei sai husi sira-nia fatin.

7 “Imi tenke huu trombeta sira+ bainhira imi bolu kongregasaun* atu halibur hamutuk, maibé labele huu ho lian tun-saʼe. 8 Arão nia oan-mane sira neʼebé serbí nuʼudar amlulik, tenke huu trombeta sira-neʼe,+ no matadalan atu huu trombeta sira-neʼe mak ukun-fuan ba nafatin iha imi-nia jerasaun hotu.

9 “Se imi tenke bá funu hasoru inimigu neʼebé fó susar ba imi iha imi-nia rai, imi tenke huu trombeta ho lian funu nian,+ no imi-nia Maromak Jeová sei hanoin-hetan imi no salva imi husi imi-nia inimigu.

10 “No mós, iha tempu neʼebé imi haksolok,+ katak iha imi-nia festa sira+ no iha loron primeiru fulan-fulan, imi tenke huu trombeta sira ba imi-nia sakrifísiu sunu nian+ no imi-nia sakrifísiu dame nian;+ ho lian husi trombeta sira-neʼe, imi-nia Maromak sei hanoin-hetan imi. Haʼu mak Jeová, imi-nia Maromak.”+

11 Iha loron 20 fulan-segundu tinan segundu,+ kalohan neʼe hiʼit saʼe tiha husi tenda santu+ neʼebé iha Arka Aliansa nian.* 12 Entaun ema Izraél hahú sai husi rai-fuik Sinai tuir arranju neʼebé iha ona kona-ba oinsá atu sai husi sira-nia fatin,+ no kalohan para iha rai-fuik Paran.+ 13 Neʼe mak dala primeiru neʼebé sira sai husi sira-nia fatin hodi tuir Jeová nia orden liuhusi Moisés.+

14 Entaun grupu suku tolu neʼebé suku Judá mak dirije, sai ulukliu tuir sira-nia grupu tropa sira, no Aminadab nia oan-mane Nasson+ mak ulun-naʼin ba sira-nia grupu tropa sira. 15 Zuar nia oan-mane Netanel mak ulun-naʼin ba grupu tropa sira husi suku Issacar.+ 16 Helon nia oan-mane Eliab mak ulun-naʼin ba grupu tropa sira husi suku Zebulão.+

17 Bainhira sobu tiha ona tenda santu,+ Gerson nia oan-mane sira no Merari nia oan-mane sira,+ neʼebé iha knaar atu lori tenda santu, sira lori tenda neʼe no sai husi sira-nia fatin.

18 Tuirmai grupu suku tolu neʼebé suku Ruben mak dirije, sai husi sira-nia fatin tuir sira-nia grupu tropa sira, no Sedeur nia oan-mane Elizur+ mak ulun-naʼin ba sira-nia grupu tropa sira. 19 Zurisadai nia oan-mane Selumiel mak ulun-naʼin ba grupu tropa sira husi suku Simeão.+ 20 Deuel nia oan-mane Eliasaf mak ulun-naʼin ba grupu tropa sira husi suku Gad.+

21 Tuirmai ema Kohat sai husi sira-nia fatin. Ema Kohat mak iha knaar atu lori sasán husi fatin sagradu.+ Antes sira toʼo fatin ida, tenda santu tenke harii fali ona.

22 Tuirmai grupu suku tolu neʼebé suku Efraim mak dirije, sai husi sira-nia fatin tuir sira-nia grupu tropa sira, no Amiud nia oan-mane Elisama mak ulun-naʼin ba sira-nia grupu tropa sira.+ 23 Pedazur nia oan-mane Gamaliel mak ulun-naʼin ba grupu tropa sira husi suku Manasés.+ 24 Jideoni nia oan-mane Abidan mak ulun-naʼin ba grupu tropa sira husi suku Benjamim.+

25 Tuirmai grupu suku tolu neʼebé suku Dan mak dirije, sai husi sira-nia fatin tuir sira-nia grupu tropa sira, sira laʼo iha kotuk no sai hanesan guarda ba suku sira seluk hotu, no Amisadai nia oan-mane Ahiezer mak ulun-naʼin ba sira-nia grupu tropa sira.+ 26 Okran nia oan-mane Pagiel mak ulun-naʼin ba grupu tropa sira husi suku Aser.+ 27 Enan nia oan-mane Aira mak ulun-naʼin ba grupu tropa sira husi suku Naftali.+ 28 Ema Izraél no sira-nia tropa sira halo tuir arranju neʼe bainhira sira sai husi sira-nia fatin.+

29 Tuirmai Moisés koʼalia ba Ruel*+ nia oan-mane Hobab. Ruel mak ema Midian, nia mak Moisés nia banin-mane. Moisés hatete: “Ami atu laʼo ba fatin neʼebé Jeová dehan: ‘Haʼu sei fó rai neʼe ba imi.’+ Entaun mai hamutuk ho ami,+ no ami sei tau matan didiʼak ba ó, tanba Jeová promete ona buat diʼak ba ema Izraél.”+ 30 Maibé nia dehan ba Moisés: “Haʼu sei la bá ho imi. Haʼu sei fila fali ba haʼu-nia rai no haʼu-nia família.” 31 Ho ida-neʼe, Moisés dehan: “Favór ida, keta husik ami, tanba ó hatene fatin neʼebé ami tenke hela iha rai-fuik, no ó bele hatudu dalan ba ami.* 32 Se ó laʼo hamutuk ho ami,+ buat diʼak hotu neʼebé Jeová fó ba ami, ami mós sei fó duni ba ó.”

33 Entaun sira hahú laʼo husi Jeová nia foho+ hodi laʼo durante loron tolu, no Jeová nia Arka Aliansa nian+ laʼo iha sira-nia oin durante loron tolu hodi buka fatin ba sira atu hela.+ 34 Jeová nia kalohan+ mak dirije sira durante loron, iha tempu neʼebé sira sai husi sira-nia hela-fatin.

35 Bainhira muda Arka neʼe, Moisés sei dehan: “Oh Jeová, hamriik bá,+ no halo namkari Ita-nia inimigu, no mós halo sira neʼebé odi Ita halai husi Ita-nia oin.” 36 Bainhira sira hatún fali Arka neʼe, Moisés sei dehan: “Oh Jeová, fila fali mai hamutuk ho povu Izraél neʼebé sura labele no rihun ba rihun.”+

11 Povu neʼe hahú muramura makaʼas iha Jeová nia oin. Bainhira Jeová rona ida-neʼe, nia sai hirus tebes, no Jeová hatún ahi ba ema sira-neʼe no ahi han sira balu iha povu nia hela-fatin nia ninin. 2 Bainhira povu hakilar hodi husu ajuda ba Moisés, nia harohan ba Jeová,+ no ahi neʼe mate. 3 Entaun sira hanaran fatin neʼe Tabera,* tanba Jeová hatún ahi ba sira.+

4 Ema estranjeiru sira+ neʼebé iha ema Izraél nia leet hatudu hahalok kaan-teen,+ no ema Izraél mós hahú halerik, hodi dehan: “Sé mak sei fó ami naʼan atu han?+ 5 Ami hanoin-hetan ikan neʼebé uluk ami han beibeik hodi la selu iha rai-Ejitu, no mós pepinu, pateka, liis-tahan, liis-mean no liis-mutin!+ 6 Maibé agora ami la iha forsa. Ami la haree buat ida, só deʼit maná neʼe.”+

7 Tuir loloos, maná+ mak hanesan koentru-musan,+ no kór hanesan ai-been bedeliu nia kór. 8 Baibain povu bá foti maná neʼe no halo uut hodi uza fatuk dulas trigu nian ka lesu. Tuirmai sira daʼan ida-neʼe iha sanan ka halo neʼe hanesan paun kabuar,+ no kuandu han, ida-neʼe hanesan dose midar kahur ho mina. 9 Bainhira mahobeen tun ba povu nia hela-fatin iha kalan, maná mós tun.+

10 Moisés rona família ida-idak halerik, ema ida-idak halerik iha sira-nia odamatan tenda nian. Nuneʼe Jeová sai hirus tebes,+ no Moisés mós sai la kontente kona-ba neʼe. 11 Tuirmai Moisés hatete ba Jeová: “Tanbasá mak Ita fó-terus ba Ita-nia atan? Tanbasá mak Ita la kontente ho haʼu, hodi Ita tau povu hotu nia todan iha haʼu-nia leten?+ 12 Haʼu mak sai isin-rua ba povu hotu neʼe ka? Haʼu mak tuur-ahi ba sira ka? Tan neʼe mak Ita dehan mai haʼu: ‘Koʼus sira iha ó-nia hirus-matan, hanesan atan ida koʼus bebé neʼebé nurak’, atu lori sira ba rai neʼebé Ita jura ona atu fó ba sira-nia beiʼala sira.+ 13 Haʼu sei buka naʼan iha neʼebé atu fó ba povu hotu neʼe? Tanba sira kontinua halerik iha haʼu-nia oin dehan: ‘Fó naʼan ba ami atu han!’ 14 Haʼu mesak deʼit labele lori povu hotu neʼe; ida-neʼe todan liu ba haʼu.+ 15 Se Ita halo hanesan neʼe ba haʼu, favór ida, oho kedas haʼu.+ Maibé se haʼu monu loos ba Ita-nia laran, labele husik haʼu haree tan susar sira.”

16 Jeová hatán ba Moisés: “Halibur mane naʼin-70 husi Izraél nia katuas sira, mane neʼebé ó hatene nuʼudar katuas no ulun-naʼin ba povu neʼe,+ no lori sira ba tenda reuniaun nian, no haruka sira hamriik iha neʼebá hamutuk ho ó. 17 Haʼu sei tun+ no koʼalia ho ó iha neʼebá,+ no haʼu sei foti haʼu-nia espíritu balu+ neʼebé haʼu fó ona ba ó no fó fali ba sira, no sira sei ajuda ó atu lori povu neʼe nia todan atu nuneʼe ó lalika lori todan neʼe mesak deʼit.+ 18 Ó tenke dehan ba povu: ‘Aban halo santu* imi-nia an bá,+ tanba imi sei han duni naʼan, no Jeová rona ona imi-nia lian halerik+ neʼebé dehan: “Sé mak sei fó ami naʼan atu han? Ami-nia moris diʼak liu iha rai-Ejitu.”+ Jeová sei fó duni naʼan ba imi, no imi sei han.+ 19 Imi sei han naʼan, laʼós deʼit ba loron ida ka loron 2 ka loron 5 ka loron 10 ka loron 20, 20 maibé ba fulan ida tomak, toʼo naʼan neʼe sai husi imi-nia inus-kuak no toʼo imi hakribi,+ tanba imi nega ona Jeová, neʼebé iha imi-nia leet, no imi halerik iha ninia oin no dehan: “Tanbasá mak ami sai husi rai-Ejitu?”’”+

21 Tuirmai Moisés dehan: “Haʼu hela ho povu neʼebé iha mane hamutuk naʼin-600.000,*+ maibé Ita rasik dehan: ‘Haʼu sei fó naʼan ba sira, no sira sei han ba fulan ida tomak!’ 22 Maski ami oho bibi-lubun no karau-lubun sira, ida-neʼe sei toʼo ba sira ka? Se ami kaer ikan hotu iha tasi, ida-neʼe sei toʼo ba sira ka?”

23 Tuirmai Jeová dehan ba Moisés: “Jeová nia liman badak demais ka?+ Agora ó sei haree se buat neʼebé haʼu hatete sei sai loos ka lae.”

24 Entaun Moisés sai ba liʼur no fó sai Jeová nia liafuan ba povu. No nia halibur mane naʼin-70 husi povu nia katuas sira no haruka sira hamriik haleʼu tenda neʼe.+ 25 Tuirmai Jeová tun iha kalohan ida+ no koʼalia ho Moisés+ no foti espíritu balu+ neʼebé nia fó ona ba Moisés no fó ba katuas naʼin-70 neʼe ida-idak. Bainhira espíritu neʼe tun ba sira, sira hahú kedas hatudu hahalok hanesan profeta,*+ maibé depois neʼe, sira la halo tan nuneʼe.

26 Iha mane naʼin-rua neʼebé sei iha hela povu nia hela-fatin. Sira-nia naran mak Eldad no Medad. Maromak nia espíritu hahú tun ba sira, tanba sira-nia naran mós hakerek ona hamutuk ho mane sira seluk, maibé sira la bá iha tenda reuniaun nian. Entaun sira hahú hatudu hahalok hanesan profeta iha povu nia hela-fatin. 27 Mane joven ida halai hodi fó-hatene ba Moisés, dehan: “Eldad no Medad hatudu hahalok hanesan profeta iha povu nia hela-fatin!” 28 Tuirmai Nun nia oan-mane Josué,+ neʼebé sai Moisés nia atan husi tempu joven kedas, dehan: “Haʼu-nia naʼi Moisés, hanetik sira bá!”+ 29 Maibé Moisés hatete ba nia: “Ó sente laran-moras ba sira tanba hanoin haʼu ka? Lalika hanoin hanesan neʼe, haʼu hakarak Jeová nia povu hotu sai nuʼudar profeta no Jeová fó ninia espíritu ba sira!” 30 Tuirmai Moisés fila fali ba povu nia hela-fatin hamutuk ho Izraél nia katuas sira.

31 Depois neʼe, Jeová halo anin mosu no hahú lori manu-kiukae husi tasi no halo sira tun haleʼu povu nia hela-fatin+ no barak toʼo aas maizumenus sentímetru 89* husi rai, no sira namkari iha povu nia hela-fatin sorin-sorin, no nakonu iha área ho luan hanesan laʼo ain ba loron ida. 32 Entaun iha loron neʼe tomak no kalan tomak no loron tomak iha loron tuirmai, povu sira hadeer no halibur manu-kiukae sira-neʼe. La iha ema ida neʼebé halibur menus liu fali omer isin sanulu,* no sira rasik habai maran naʼan sira-neʼe haleʼu sira-nia hela-fatin hotu. 33 Maibé bainhira naʼan sei iha hela sira-nia nehan leet, antes sira nata ida-neʼe, Jeová sai hirus tebes hasoru povu neʼe, no Jeová oho ema barak.+

34 Entaun sira hanaran fatin neʼe Kibrot-Hatava,*+ tanba iha fatin neʼe mak sira hakoi ema sira neʼebé hatudu hahalok kaan-teen.+ 35 Povu sai husi Kibrot-Hatava hodi bá Hazerot, no sira hela iha Hazerot.+

12 Miriam no Arão hahú koʼalia kontra Moisés tanba nia hola feto Kus nuʼudar ninia feen.+ 2 Sira dehan: “Jeová koʼalia liuhusi deʼit Moisés ka? Nia mós koʼalia liuhusi ita, loos ka lae?”+ Jeová rona hela ida-neʼe.+ 3 Moisés mak ema neʼebé laran-maus liu fali ema seluk*+ hotu iha mundu tomak.

4 Derrepente deʼit Jeová koʼalia ba Moisés, Arão no Miriam: “Imi naʼin-tolu sai hodi bá tenda reuniaun nian.” Nuneʼe sira naʼin-tolu sai hodi bá tenda neʼe. 5 Jeová tun iha kalohan* laran+ no para iha odamatan ba tenda neʼe no bolu Arão ho Miriam. Nuneʼe sira naʼin-rua hakat ba oin. 6 Tuirmai Maromak dehan: “Favór ida, rona ba haʼu-nia liafuan. Se iha Jeová nia profeta ida iha imi-nia leet, entaun haʼu sei fó sai haʼu-nia an ba nia liuhusi vizaun ida,+ no haʼu sei koʼalia ba nia iha mehi ida.+ 7 Maibé haʼu-nia atan Moisés la hanesan neʼe! Haʼu entrega haʼu-nia umakain tomak ba nia.*+ 8 Haʼu koʼalia ba nia oin ba oin,*+ no haʼu koʼalia nakloke, laʼós ho ai-sasiʼik; no Jeová mosu ba nia. Entaun, tanbasá mak imi la taʼuk atu koʼalia kontra haʼu-nia atan Moisés?”

9 Entaun Jeová sai hirus makaʼas hasoru sira, no nia husik hela sira. 10 Kalohan muda sai husi tenda neʼe nia leten, no Miriam hetan moras-lepra neʼebé mutin hanesan jelu-rahun.+ Tuirmai Arão fila oin ba Miriam, no nia haree katak Miriam hetan ona moras-lepra.+ 11 Arão koʼalia kedas ba Moisés dehan: “Haʼu husu ba Ita, haʼu-nia naʼi! Favór ida, keta husik ami hetan kastigu tanba sala neʼe! Buat neʼebé ami halo ona mak beik. 12 Favór ida, keta husik Miriam nafatin hanesan labarik neʼebé moris mai mate ona ho isin balu dodok!” 13 Ho ida-neʼe, Moisés hahú halerik ba Jeová dehan: “Oh Maromak, favór ida kura nia bá!”+

14 Jeová hatán ba Moisés, dehan: “Se karik ninia aman tafui kabeen kedas ba nia oin, nia sei sai moe ba loron hitu, loos ka lae? Entaun haketak nia ba loron hitu iha povu nia hela-fatin nia liʼur,+ no depois neʼe, imi bele lori fali nia ba povu nia hela-fatin.” 15 Nuneʼe sira haketak Miriam ba loron hitu iha povu nia hela-fatin nia liʼur,+ no povu la muda toʼo sira lori fali Miriam ba povu nia hela-fatin. 16 Tuirmai povu sai husi Hazerot,+ no hela iha rai-fuik Paran.+

13 Jeová koʼalia tan ba Moisés, hodi dehan: 2 “Haruka ema atu hafuhu rai-Kanaan neʼebé haʼu sei fó ba ema Izraél. Imi tenke haruka mane ida husi suku ida-idak, mane sira-neʼe mak nuʼudar xefe+ ba sira-nia aman nia suku.”

3 Entaun Moisés haruka sira husi rai-fuik Paran+ hodi tuir Jeová nia orden. Mane sira-neʼe hotu mak nuʼudar ulun-naʼin ba ema Izraél. 4 Sira-nia naran mak tuirmai neʼe: husi suku Ruben mak Zakur nia oan-mane Samua; 5 husi suku Simeão mak Hori nia oan-mane Safat; 6 husi suku Judá mak Jefuné nia oan-mane Caleb;+ 7 husi suku Issacar mak José nia oan-mane Igal; 8 husi suku Efraim mak Nun nia oan-mane Oseias;+ 9 husi suku Benjamim mak Rafu nia oan-mane Palti; 10 husi suku Zebulão mak Sodi nia oan-mane Gadiel; 11 husi suku José,+ katak husi suku Manasés+ mak Susi nia oan-mane Gadi; 12 husi suku Dan mak Gemali nia oan-mane Amiel; 13 husi suku Aser mak Micael nia oan-mane Setur; 14 husi suku Naftali mak Vofsi nia oan-mane Nabi; 15 husi suku Gad mak Maki nia oan-mane Guel. 16 Neʼe mak naran ba mane sira neʼebé Moisés haruka atu hafuhu rai-Kanaan. No Moisés fó naran ba Nun nia oan-mane Oseias nuʼudar Josué.*+

17 Bainhira Moisés haruka sira atu bá hafuhu rai-Kanaan, nia dehan ba sira: “Laʼo ba área Negeb, no tuirmai saʼe ba área foho nian.+ 18 Imi tenke haree rai neʼe hanesan saida+ no haree se ema neʼebé hela iha neʼebá mak forte ka fraku, barak ka uitoan, 19 no mós se rai neʼe mak diʼak ka aat no sira-nia sidade sira neʼebé sira hela mak iha moru metin ka la iha moru. 20 Imi buka-hatene toʼok se rai neʼe mak bokur ka maran+ no se iha ai-hun barak ka la iha. Imi tenke sai aten-brani+ no foti ai-fuan balu husi rai neʼe.” Tuir loloos, tempu neʼebá mak tempu neʼebé uvas-fuan primeiru tasak ona.+

21 Entaun sira bá hafuhu rai neʼe husi rai-fuik Zin+ toʼo Reob+ besik Lebo-Hamat.*+ 22 Bainhira sira tama ba área Negeb, sira toʼo iha Hebron.+ Ahiman, Sesai no Talmai+ hela iha Hebron, sira mak ema Anac.+ Tuir loloos, Hebron harii tinan hitu antes ema harii Zoan iha rai-Ejitu. 23 Bainhira sira toʼo Mota* Eskol,+ sira tesi uvas-sanak neʼebé iha uvas ramu ida, neʼebé mane naʼin-rua mak tenke leba ho ai-lolon ida, no sira mós foti romaun-fuan no figeira-fuan.+ 24 Sira hanaran fatin neʼe Mota* Eskol,*+ tanba uvas ramu ida neʼebé ema Izraél tesi iha neʼebá.

25 Loron 40 liutiha,+ sira neʼebé bá hafuhu rai neʼe fila fali. 26 Sira fila ba Moisés no Arão no ba povu Izraél tomak iha rai-fuik Paran, iha Kades.+ Sira lori lia-menon ba povu tomak no hatudu ba sira ai-fuan husi rai neʼe. 27 Tuirmai sira hatete ba Moisés: “Ami tama ona ba rai neʼebé Ita haruka ami atu bá haree, no loloos rai neʼe iha susubeen no bani-been barak,+ no neʼe mak ai-fuan sira husi rai neʼe.+ 28 Maski nuneʼe, povu neʼebé hela iha rai neʼe mak forte, no sira-nia sidade sira mak boot no iha moru neʼebé aas. Ami mós haree katak ema Anac hela iha neʼebá.+ 29 Ema Amalec+ hela iha área Negeb,+ no ema Hetes, ema Jebus,+ ema Amoreu+ hela iha área foho nian, no ema Kanaan+ hela besik tasi+ no besik Mota Jordaun.”

30 Tuirmai Caleb koko atu halo kalma povu neʼebé hamriik iha Moisés nia oin, hodi dehan: “Mai ita saʼe kedas bá, ita sei foti duni rai neʼe nuʼudar ita-nian, tanba ita sei manán duni rai neʼe.”+ 31 Maibé mane sira neʼebé bá hamutuk ho nia dehan: “Ita labele bá atu kontra hasoru povu neʼe, tanba sira forte liu ita.”+ 32 Sira kontinua lori lia-menon neʼebé aat+ kona-ba rai neʼebé sira foin hafuhu, hodi dehan: “Rai neʼebé ami laʼo liu hodi hafuhu mak rai neʼebé han ninia ema rasik, no ema hotu neʼebé ami haree iha neʼebá mak mane neʼebé isin-boot tebetebes.+ 33 Iha neʼebá ami haree jigante sira,* katak Anac nia oan-mane sira,+ jerasaun husi ema Nefilím, no se kompara ho sira, ami hanoin katak ami mak hanesan gafañotu deʼit, no sira mós haree ami hanesan neʼe.”

14 Tuirmai povu hotu halerik ho lian makaʼas, no sira kontinua halerik no tanis durante kalan tomak.+ 2 Ema Izraél hotu hahú muramura hasoru Moisés no Arão,+ no povu tomak koʼalia kontra sira, hodi dehan: “Diʼak liu ami mate iha rai-Ejitu, ka diʼak liu ami mate deʼit iha rai-fuik neʼe! 3 Tanbasá mak Jeová lori ami mai iha rai neʼe hodi halo ami mate ho surik?+ Ami-nia feen sira no ami-nia oan sira sei sai dadur.+ Diʼak liu ba ami atu fila fali ba rai-Ejitu, loos ka lae?”+ 4 Sira mós koʼalia ba malu dehan: “Mai ita hili ulun-naʼin ida no fila fali ba rai-Ejitu!”+

5 Ho ida-neʼe, Moisés no Arão hakneʼak no hakruʼuk ho oin ba rai iha kongregasaun Izraél tomak nia oin. 6 Nun nia oan-mane Josué+ ho Jefuné nia oan-mane Caleb,+ neʼebé mós bá hamutuk ho ema sira neʼebé hafuhu rai neʼe, sira naʼin-rua lees sira-nia roupa, 7 no sira dehan ba povu Izraél tomak: “Rai neʼebé ami hafuhu mak rai neʼebé diʼak tebetebes.+ 8 Se Jeová kontente ho ita, nia sei lori ita hodi tama duni ba rai neʼe no fó ba ita rai neʼebé iha susubeen no bani-been barak.+ 9 Maibé imi labele kontra hasoru Jeová, no imi labele taʼuk ba povu iha rai neʼe,+ tanba ita sei halakon sira.* Sira-nia protesaun hasai tiha ona husi sira, no Jeová hamutuk ho ita.+ Keta taʼuk sira.”

10 Maibé, povu hotu koʼalia hamutuk atu tuda sira.+ No Jeová nia glória mosu iha tenda reuniaun nian ba povu Izraél tomak.+

11 Tuirmai Jeová dehan ba Moisés: “Toʼo bainhira tan mak povu neʼe la hatudu respeitu ba haʼu,+ no toʼo bainhira tan mak sira la tau fiar ba haʼu maski haʼu halo milagre hotu neʼe iha sira-nia leet?+ 12 Haʼu sei fó moras-peste* ba sira no oho sira, no husik haʼu halo ó sai nasaun ida neʼebé boot liu no iha kbiit liu fali sira.”+

13 Maibé Moisés dehan ba Jeová: “Ita lori Ita-nia povu sai husi ema Ejitu nia leet ho kbiit boot. Entaun, se Ita halo nuneʼe, ema Ejitu sei rona kona-ba neʼe,+ 14 no sira sei koʼalia kona-ba neʼe ba povu iha rai neʼe. No sira mós rona ona katak Ita, Jeová, mak iha povu neʼe nia leet+ no hatudu sai ona Ita-nia an ba sira oin ba oin.+ Ita mak Jeová, no Ita-nia kalohan iha sira-nia leten, no Ita laʼo iha sira-nia oin ho kalohan* iha loron no ahi* iha kalan.+ 15 Se Ita oho povu hotu neʼe dala ida deʼit,* nasaun sira neʼebé rona ona kona-ba Ita-nia naran-boot sei hatete nuneʼe: 16 ‘Jeová la iha kbiit atu lori povu neʼe ba rai neʼebé nia promete atu fó ba sira, tan neʼe nia oho sira iha rai-fuik.’+ 17 Favór ida, oh Jeová, agora hatudu sai Ita-nia kbiit neʼebé boot, hanesan Ita promete ona, hodi dehan: 18 ‘Jeová la hirus lalais no nakonu ho domin neʼebé laran-metin,*+ fó perdua ba sala sira no ba hahalok kontra lei, maibé nia sei fó duni kastigu ba ema neʼebé halo sala, kastigu ba oan tanba aman nia sala, ba jerasaun tolu no jerasaun haat.’+ 19 Favór ida, fó perdua ba povu neʼe nia sala tuir Ita-nia domin boot ho laran-metin, hanesan Ita perdua ona povu neʼe hahú husi rai-Ejitu toʼo agora.”+

20 Tuirmai Jeová dehan: “Haʼu perdua sira tuir ó-nia liafuan.+ 21 Maski nuneʼe, haʼu jura hodi haʼu-nia moris, mundu tomak sei nakonu ho Jeová nia glória.+ 22 Maibé mane hotu neʼebé haree ona haʼu-nia glória no milagre+ neʼebé haʼu halo iha rai-Ejitu no iha rai-fuik, no kontinua koko haʼu+ ba dala sanulu ona no la rona ba haʼu-nia liafuan,+ 23 sira sei nunka haree rai neʼebé haʼu jura ba sira-nia aman sira. Sin, ema sira-neʼe hotu neʼebé la hatudu respeitu ba haʼu sei la haree rai neʼe.+ 24 Maibé tanba Caleb+ nia hanoin la hanesan sira no nia kontinua laʼo tuir haʼu ho laran tomak, haʼu sei lori duni nia hodi tama ba rai neʼebé nia bá hafuhu ona, no ninia bei-oan sira sei foti rai neʼe nuʼudar liman-rohan.+ 25 Tanba ema Amalec no ema Kanaan+ hela iha rai-tetuk, entaun aban imi tenke fila fali no laʼo ba rai-fuik liuhusi dalan ba Tasi Mean.”+

26 Tuirmai Jeová koʼalia ba Moisés no Arão, hodi dehan: 27 “Toʼo bainhira tan mak povu laran-aat neʼe sei kontinua muramura hasoru haʼu?+ Haʼu rona ona ema Izraél nia liafuan muramura hasoru haʼu.+ 28 Hatete ba sira: ‘Jeová dehan nuneʼe: “Haʼu jura hodi haʼu-nia moris, haʼu sei halo ba imi tuir buat neʼebé haʼu rona imi koʼalia ona!+ 29 Iha rai-fuik neʼe mak imi sei mate,+ sin, imi hotu husi tinan 20 ba leten neʼebé rejistu ona, katak imi hotu neʼebé muramura hasoru haʼu.+ 30 Imi ida mós sei la tama ba rai neʼebé haʼu jura ona* atu imi hela bá,+ só deʼit Jefuné nia oan-mane Caleb no Nun nia oan-mane Josué mak sei tama ba rai neʼe.+

31 “‘“Maski imi dehan katak imi-nia oan sira sei sai dadur kuandu sira tama ba rai neʼe, maibé haʼu sei lori oan sira-neʼe tama ba rai neʼe+ no sira sei haree rai neʼebé imi hakribi.+ 32 Maibé imi rasik sei mate iha rai-fuik neʼe. 33 Imi-nia oan-mane sira sei sai nuʼudar bibi-atan iha rai-fuik ba tinan 40,+ no sira tenke hatán ba imi-nia sala tanba imi-nia hahalok la laran-metin* toʼo ema ikus husi imi mate iha rai-fuik neʼe.+ 34 Neʼe tuir loron sira neʼebé imi hafuhu rai neʼe, katak loron 40,+ loron ida ba tinan ida, sin, loron ida ba tinan ida, imi sei hatán ba imi-nia sala ba tinan 40,+ hodi nuneʼe imi sei hatene rezultadu neʼebé mosu se imi kontra haʼu.*

35 “‘“Haʼu, Jeová, mak fó sai ona kona-ba neʼe. Haʼu sei halo nuneʼe ba povu laran-aat neʼe, katak sira hotu neʼebé halibur hamutuk hodi kontra haʼu: Iha rai-fuik neʼe mak sira sei lakon sira-nia moris, no iha neʼe mak sira sei mate.+ 36 Mane sira neʼebé uluk Moisés haruka atu hafuhu rai neʼe no lori fali lia-menon neʼebé aat hodi halo povu tomak muramura hasoru nia,+ 37 sin, mane sira neʼebé lori fali lia-menon aat kona-ba rai neʼe, sira sei hetan kastigu no mate iha Jeová nia oin.+ 38 Maibé Nun nia oan-mane Josué, no Jefuné nia oan-mane Caleb neʼebé uluk bá hamutuk ho sira hodi hafuhu rai neʼe, sei kontinua moris.”’”+

39 Bainhira Moisés koʼalia liafuan sira-neʼe ba ema Izraél tomak, sira hahú tanis makaʼas. 40 Liután neʼe, sira hadeer sedu iha dadeer no koko atu saʼe ba foho-tutun neʼe, hodi dehan: “Ami halo sala ona. Maibé agora, ami prontu ona atu saʼe ba fatin neʼebé Jeová dehan.”+ 41 Maibé Moisés hatete: “Tanbasá mak imi hakat liu Jeová nia orden? Neʼe sei la lori susesu ba imi. 42 Keta bá, tanba Jeová la hamutuk ho imi; no imi sei lakon ho imi-nia inimigu.+ 43 Tanba ema Amalec no ema Kanaan mak hein hela iha fatin neʼebá hodi kontra imi,+ no imi sei mate ho surik. No tanba imi fila kotuk hodi la laʼo tuir Jeová, Jeová sei la hamutuk ho imi.”+

44 Maibé ho ulun-toos no foti an,* sira saʼe ba foho-tutun,+ maski nuneʼe Jeová nia Arka Aliansa nian no mós Moisés la muda husi povu nia hela-fatin.+ 45 Tuirmai ema Amalec no ema Kanaan neʼebé hela iha foho neʼe tun mai no oho sira, no halo sira halai namkari toʼo Horma.+

15 Jeová koʼalia tan ba Moisés, hodi dehan: 2 “Koʼalia ba ema Izraél no hatete ba sira: ‘Bainhira imi tama ba rai neʼebé haʼu sei fó ba imi atu hela+ 3 no imi fó imi-nia karau ka bibi hodi sunu iha ahi atu hasaʼe nuʼudar sakrifísiu ba Jeová, maski imi-nia sakrifísiu neʼe mak sakrifísiu sunu nian+ ka sakrifísiu neʼebé imi hasaʼe tanba halo juramentu espesiál ka sakrifísiu neʼebé imi fó ho hakarak rasik+ ka sakrifísiu neʼebé imi hasaʼe durante tempu festa nian,+ atu nuneʼe ninia morin bele halo Jeová kontente,*+ 4 entaun ema neʼebé hasaʼe sakrifísiu ba Jeová tenke hasaʼe mós sakrifísiu trigu* nian husi trigu uut neʼebé diʼak+ gomor isin ida* no kahur ona ho mina litru ida.* 5 Imi mós tenke hasaʼe tua-uvas litru ida nuʼudar sakrifísiu hemu nian, hamutuk ho sakrifísiu sunu nian+ ka sakrifísiu husi bibi-malae oan* ida-idak. 6 Ka bainhira imi hasaʼe bibi-malae aman ida, imi tenke fó mós sakrifísiu trigu nian husi trigu uut neʼebé diʼak gomor isin rua* no kahur ona ho mina litru ida ho mililitru 200.* 7 No imi tenke hasaʼe tua-uvas litru ida ho mililitru 200 nuʼudar sakrifísiu hemu nian, atu nuneʼe ninia morin bele halo Jeová kontente.*

8 “‘Maibé se imi hasaʼe karau-aman ida nuʼudar sakrifísiu sunu nian+ ka sakrifísiu atu halo juramentu espesiál+ ka sakrifísiu dame nian ba Jeová,+ 9 imi mós tenke hasaʼe sakrifísiu trigu nian+ hamutuk ho karau-aman neʼe; sakrifísiu trigu nian neʼe mak trigu uut neʼebé diʼak gomor isin tolu* neʼebé kahur ona ho mina litru rua.* 10 Imi mós tenke fó tua-uvas litru rua nuʼudar sakrifísiu hemu nian,+ no nuʼudar sakrifísiu neʼebé sunu iha ahi, atu nuneʼe ninia morin bele halo Jeová kontente.* 11 Neʼe mak buat neʼebé imi tenke halo ba karau-aman ida-idak ka ba bibi-malae aman ida-idak ka ba bibi-malae oan ida-idak ka ba bibi-timur ida-idak. 12 Imi tenke halo nuneʼe ba animál ida-idak hodi tuir animál hira mak imi hasaʼe nuʼudar sakrifísiu. 13 Iha dalan hanesan neʼe mak ema Izraél ida-idak tenke hasaʼe sira-nia sakrifísiu neʼebé sunu iha ahi no ninia morin halo Jeová kontente.*

14 “‘Se ema estranjeiru ida hela ho imi ka hela iha imi-nia leet ba tempu kleur ona, no nia hasaʼe sakrifísiu neʼebé sunu iha ahi hodi ninia morin bele halo Jeová kontente,* ema neʼe tenke halo hanesan deʼit ho buat neʼebé imi halo.+ 15 Imi neʼebé parte ba kongregasaun neʼe no ema estranjeiru neʼebé hela ho imi iha ukun-fuan ida deʼit. Neʼe mak ukun-fuan ba nafatin ba imi-nia jerasaun hotu. Ema estranjeiru tenke hanesan deʼit ho imi iha Jeová nia oin.+ 16 Iha ukun-fuan ida deʼit no lei ida deʼit ba imi no ba ema estranjeiru neʼebé hela ho imi.’”

17 Jeová dehan tan ba Moisés: 18 “Koʼalia ba ema Izraél no hatete ba sira: ‘Bainhira imi tama iha rai neʼebé haʼu sei lori imi bá 19 no imi han ai-han* ruma husi rai neʼe,+ imi tenke fó kontribuisaun ba Jeová. 20 Imi tenke fó kontribuisaun husi imi-nia trigu uut* husi trigu primeiru+ neʼebé imi koʼa ona no halo neʼe nuʼudar paun neʼebé hanesan kelu. Imi tenke fó neʼe hanesan ho kontribuisaun husi fatin sama trigu nian. 21 Iha imi-nia jerasaun hotu, imi tenke fó imi-nia trigu uut balu husi trigu primeiru neʼebé imi koʼa ona nuʼudar kontribuisaun ba Jeová.

22 “‘Se imi halo sala no la halo tuir mandamentu sira-neʼe hotu neʼebé Jeová fó sai ona ba Moisés, 23 neʼe katak halo tuir mandamentu hotu neʼebé Jeová fó ona ba imi liuhusi Moisés, hahú husi loron neʼebé Jeová fó sai mandamentu neʼe no kontinua toʼo imi-nia jerasaun hotu, 24 no se imi halo sala la ho neon no povu la hatene kona-ba neʼe, povu tomak tenke hasaʼe karau-aman* ida nuʼudar sakrifísiu sunu nian atu nuneʼe ninia morin bele halo Jeová kontente,* hamutuk ho sakrifísiu trigu nian no sakrifísiu hemu nian hodi tuir ukun-fuan neʼebé iha ona,+ no mós hasaʼe bibi-timur oan ida nuʼudar sakrifísiu sala nian.+ 25 Amlulik sei hamoos povu Izraél tomak nia sala, no sira sei hetan perdua,+ tanba neʼe mak sala neʼebé sira halo la ho neon, no sira lori sakrifísiu neʼebé sunu iha ahi hodi hasaʼe ba Jeová no lori sira-nia sakrifísiu sala nian ba Jeová nia oin tanba sira-nia sala neʼe. 26 Povu Izraél tomak no ema estranjeiru neʼebé hela iha sira-nia leet sei hetan perdua, tanba ida-neʼe mak sala neʼebé povu tomak halo la ho neon.

27 “‘Se ema* ida halo sala la ho neon, entaun nia tenke fó bibi-timur inan neʼebé seidauk toʼo tinan ida hodi sai nuʼudar sakrifísiu sala nian.+ 28 Amlulik tenke hamoos sala husi ema* neʼebé halo sala la ho neon iha Jeová nia oin; amlulik sei hamoos sala neʼe, no ema neʼe sei hetan perdua.+ 29 Ema Izraél no ema estranjeiru neʼebé hela iha sira-nia leet, tenke iha ukun-fuan ida deʼit kona-ba halo sala la ho neon.+

30 “‘Maibé se ema* ida halo sala ho neon,+ maski nia mak ema Izraél ka ema estranjeiru neʼebé iha sira-nia leet, neʼe katak ema neʼe koʼalia aat ona kona-ba Jeová, nia tenke mate hodi halakon husi povu nia leet. 31 Ema* neʼe tenke hetan kastigu-mate tanba nia hakribi Jeová nia liafuan no kontra ninia mandamentu.+ Nia tenke hatán ba ninia sala.’”+

32 Bainhira ema Izraél hela iha rai-fuik, sira hetan mane ida hili hela ai-pedasuk sira iha loron Sábadu.+ 33 Sira neʼebé hetan mane neʼe hili hela ai, lori nia ba Moisés no Arão no ba povu hotu nia oin. 34 Sira sulan nia+ tanba ukun-fuan seidauk fó sai ho klaru kona-ba saida mak sira tenke halo ba nia.

35 Jeová dehan ba Moisés: “Mane neʼe tenke mate,+ no povu tomak tenke tuda nia iha povu nia hela-fatin nia liʼur.”+ 36 Entaun povu tomak lori nia sai ba povu nia hela-fatin nia liʼur no tuda nia toʼo mate, hodi tuir mandamentu neʼebé Jeová fó sai ona ba Moisés.

37 Jeová koʼalia tan ida-neʼe ba Moisés: 38 “Koʼalia ba ema Izraél no hatete ba sira katak iha sira-nia jerasaun hotu, sira tenke halo saren iha sira-nia roupa ninin neʼebé iha okos, no sira tenke suku kabas kór-azúl iha hena saren neʼe nia leten.+ 39 ‘Imi tenke tau saren neʼe atu nuneʼe imi sei haree no hanoin-hetan Jeová nia mandamentu hotu no halo tuir mandamentu sira-neʼe.+ Imi keta halo tuir deʼit imi-nia laran no buat neʼebé imi-nia matan haree, neʼebé book imi atu la hatudu laran-metin.*+ 40 Neʼe sei ajuda imi atu hanoin-hetan, no imi sei halo tuir haʼu-nia mandamentu hotu no sai santu ba imi-nia Maromak.+ 41 Haʼu mak Jeová, imi-nia Maromak, neʼebé lori imi sai husi rai-Ejitu atu bele hatudu sai katak haʼu mak imi-nia Maromak.+ Haʼu mak Jeová, imi-nia Maromak.’”+

16 Tuirmai Kora+ halibur hamutuk ho Datan, Abiram no On. Sira naʼin-tolu mak Ruben nia jerasaun.+ Kora mak Izar nia oan-mane,+ Izar mak Kohat nia oan-mane,+ Kohat mak Levi nia oan-mane.+ Datan no Abiram mak Eliab nia oan-mane,+ no On mak Pelete nia oan-mane. 2 Sira halibur hodi kontra hasoru Moisés hamutuk ho mane Izraél naʼin-250 neʼebé serbí nuʼudar xefe ba povu, neʼebé hili husi kongregasaun nia leet, no sira mak ema naran-boot. 3 Entaun sira halibur hamutuk hodi kontra+ Moisés no Arão no dehan ba sira: “Ami baruk ona ho imi! Povu tomak mak santu,+ sira hotu santu, no Jeová iha sira-nia leet.+ Entaun, tanbasá mak imi tenke foti imi-nia an aas liu Jeová nia kongregasaun?”

4 Bainhira Moisés rona ida-neʼe, nia hakneʼak kedas no hakruʼuk ho oin ba rai. 5 Tuirmai nia hatete ba Kora no ba ema hotu neʼebé apoia Kora, hodi dehan: “Aban dadeer Jeová sei hatudu sai sé mak ninian+ no sé mak santu no sé mak bele hakbesik ba nia,+ no ema naran deʼit neʼebé nia hili+ mak sei hakbesik ba nia. 6 Kora no ema hotu neʼebé apoia ó,+ imi halo ida-neʼe bá: Foti fatin insensu nian,+ 7 no aban tau ahi iha fatin sira-neʼe no tau insensu iha leten iha Jeová nia oin, no ema neʼebé Jeová sei hili,+ nia mak ema neʼebé santu. Imi Levi nia oan-mane sira,+ imi-nia hahalok aat tebes ona!”

8 Tuirmai Moisés dehan ba Kora: “Favór ida, rona bá, imi Levi nia oan-mane sira. 9 Imi hanoin ida-neʼe mak buat kiʼik deʼit ka? Izraél nia Maromak haketak ona imi husi povu Izraél+ no husik imi atu hakbesik ba nia hodi halo Jeová nia serbisu iha ninia tenda santu no atu hamriik iha povu nia oin atu serbí sira,+ 10 no Maromak mós lori imi besik ba nia hamutuk ho imi-nia maun-alin sira seluk, katak Levi nia oan-mane hotu. Agora imi mós koko atu hadau knaar amlulik nian ka?+ 11 Tanba razaun neʼe, ó no ema hotu neʼebé apoia ó, halibur hamutuk hodi kontra ona Jeová. Kona-ba Arão, nia mak sé hodi imi tenke muramura hasoru nia?”+

12 Depois neʼe, Moisés haruka ema atu bolu Eliab nia oan-mane sira Datan no Abiram,+ maibé sira dehan: “Ami sei la bá! 13 Ó lori ami sai husi rai neʼebé iha susubeen no bani-been barak atu husik ami mate iha rai-fuik neʼe, entaun ó hanoin neʼe mak buat kiʼik deʼit ka?+ Agora ó mós hakarak atu halo ó-nia an nuʼudar ami-nia ukun-naʼin boot ka?* 14 Rai neʼebé iha susubeen no bani-been barak iha neʼebé?+ Ó seidauk fó ba ami toʼos no toʼos-uvas nuʼudar liman-rohan, loos ka lae? Ó hakarak atu ema sira-neʼe laʼo tuir deʼit ó hanesan matan-delek ka?* Ami sei la bá!”

15 Entaun Moisés sai hirus tebes no dehan ba Jeová: “Keta fila oin hodi hateke ba sira-nia sakrifísiu trigu* nian. Haʼu la foti kuda-burru ida husi sira, no haʼu la halo aat ba sira ida.”+

16 Tuirmai Moisés dehan ba Kora: “Aban, ó no ema hotu neʼebé apoia ó tenke mai iha Jeová nia oin, ó hamutuk ho sira no mós Arão. 17 Imi ida-idak tenke lori imi-nia fatin insensu nian no tau insensu iha laran, no imi ida-idak sei hasaʼe imi-nia fatin insensu nian iha Jeová nia oin, neʼe katak fatin insensu nian hamutuk 250. Ó no Arão mós lori imi ida-idak nia fatin insensu nian.” 18 Entaun sira ida-idak lori sira-nia fatin insensu nian, no sira tau ahi no insensu iha laran no sira hamriik iha odamatan ba tenda reuniaun nian hamutuk ho Moisés no Arão. 19 Bainhira Kora halibur ona ema hotu neʼebé apoia nia+ hodi kontra Moisés no Arão iha odamatan ba tenda reuniaun nian, Jeová nia glória mosu ba povu tomak.+

20 Jeová dehan ba Moisés no Arão: 21 “Haketak imi-nia an husi grupu neʼe nia leet, atu nuneʼe haʼu bele halakon kedas sira.”+ 22 Ho ida-neʼe, sira hakneʼak no hakruʼuk ho oin ba rai, hodi dehan: “Oh Maromak, Maromak neʼebé fó moris* ba ema hotu,+ Ita hirus povu tomak tan deʼit ema ida nia sala ka?”+

23 Tuirmai Jeová koʼalia ba Moisés, hodi dehan: 24 “Koʼalia ba povu neʼe no hatete ba sira, ‘Sees husi Kora, Datan no Abiram nia tenda sira!’”+

25 Depois neʼe, Moisés hamriik no bá hasoru Datan no Abiram, no Izraél nia katuas sira+ mós bá hamutuk ho nia. 26 Nia dehan ba povu neʼe: “Favór ida, hadook an husi ema aat sira-neʼe nia tenda no keta kona buat naran deʼit neʼebé sira-nian, atu nuneʼe imi labele lakon tanba sira-nia sala.” 27 Entaun sira hadook an kedas husi Kora, Datan, no Abiram nia tenda iha sorin-sorin, no Datan no Abiram sai husi sira-nia tenda hodi hamriik iha sira-nia tenda oin hamutuk ho sira-nia feen, oan-mane no labarik kiʼik sira.

28 Tuirmai Moisés dehan: “Ho ida-neʼe mak imi sei hatene katak Jeová mak haruka haʼu atu halo buat hotu neʼe, no neʼe laʼós mai husi haʼu-nia hakarak rasik: 29 Se ema sira-neʼe mate hanesan baibain ema seluk mós mate no se sira-nia kastigu mak hanesan deʼit ho ema seluk nian, entaun neʼe katak laʼós Jeová mak haruka haʼu.+ 30 Maibé se Jeová halo buat foun ruma ba sira no halo rai nakloke* hodi tolan sira hamutuk ho buat hotu neʼebé sira-nian no sira tama moris deʼit ba rate,* imi sei hatene duni katak ema sira-neʼe la hatudu respeitu ba Jeová.”

31 Bainhira Moisés foin koʼalia hotu liafuan sira-neʼe, rai nakfera iha fatin neʼebé ema sira-neʼe hamriik bá.+ 32 Rai nakloke* no tolan sira hamutuk ho sira-nia umakain no ema hotu neʼebé Kora nian+ no sira-nia sasán hotu. 33 Entaun sira no buat hotu neʼebé sira-nian tama moris deʼit ba rate* laran, no rai taka tiha sira, ho ida-neʼe sira lakon husi kongregasaun nia leet.+ 34 Ema Izraél hotu neʼebé haleʼu sira halai tanba rona sira hakilar, no ema Izraél dehan: “Ami taʼuk katak rai sei tolan ami!” 35 Tuirmai Jeová hatún ahi+ no han mane naʼin-250 neʼebé hasaʼe insensu.+

36 Jeová dehan ba Moisés: 37 “Hatete ba amlulik Arão nia oan-mane Eleazar atu foti fatin insensu nian+ husi ahi laran, tanba buat sira-neʼe mak santu. No mós dehan ba nia atu lekar ahi-klaak sira dook uitoan. 38 Kona-ba mane sira neʼebé lakon sira-nia moris* tanba halo sala, imi tenke tuku sira-nia fatin insensu nian atu sai nuʼudar riti neʼebé mihis hodi taka altár neʼe,+ tanba sira hasaʼe ona ida-neʼe iha Jeová nia oin, no buat sira-neʼe sai santu ona. Neʼe sei sai nuʼudar sinál ba ema Izraél.”+ 39 Entaun amlulik Eleazar foti fatin insensu nian husi riti neʼebé ema sira-neʼe hasaʼe ona, katak ema sira neʼebé ahi han tiha ona, no tuku neʼe hodi taka altár. 40 Nia halo tuir duni mandamentu neʼebé Jeová fó liuhusi Moisés. Neʼe sei fó-hanoin ema Izraél katak ema neʼebé laʼós Arão nia oan ka bei-oan labele hakbesik hodi sunu insensu iha Jeová nia oin+ no katak ema ida labele sai hanesan Kora no mós sira neʼebé apoia nia.+

41 Iha loron tuirmai, povu Izraél tomak hahú kedas muramura hasoru Moisés no Arão,+ hodi dehan: “Imi naʼin-rua oho tiha ona Jeová nia povu.” 42 Bainhira povu neʼe halibur ona hodi kontra Moisés no Arão, sira fila oin ba tenda reuniaun nian, no haree kalohan taka ona tenda neʼe, no Jeová nia glória hahú mosu.+

43 Moisés no Arão bá iha tenda reuniaun nia oin,+ 44 no Jeová dehan ba Moisés: 45 “Imi hasees an husi povu neʼe nia leet, atu nuneʼe haʼu bele halakon kedas sira.”+ Ho ida-neʼe, sira hakneʼak no hakruʼuk ho oin ba rai.+ 46 Tuirmai Moisés dehan ba Arão: “Foti fatin insensu nian no tau ahi husi altár+ iha laran no tau insensu iha leten no bá lalais povu neʼe hodi hamoos sira-nia sala,+ tanba Jeová hasai ona ninia hirus. Moras-peste hahú ona!” 47 Arão foti kedas fatin insensu nian hodi tuir Moisés nia liafuan, no halai ba kongregasaun nia leet, maibé nia haree moras hahú ona kona povu neʼe. Entaun nia tau insensu iha fatin insensu nian no hahú hamoos povu nia sala. 48 Nia kontinua hamriik entre ema neʼebé mate no ema neʼebé moris, no ikusmai moras-peste para. 49 Ema neʼebé mate tanba moras-peste neʼe hamutuk naʼin-14.700, neʼe la inklui ema sira neʼebé mate tanba Kora. 50 Ikusmai bainhira Arão fila fali ba Moisés iha odamatan ba tenda reuniaun nian, moras-peste neʼe para ona.

17 Jeová dehan ba Moisés: 2 “Hatete ba ema Izraél no foti ai-tonka ida husi suku ida-idak, husi xefe sira ba sira-nia suku ida-idak,*+ ai-tonka hamutuk 12. Ó tenke hakerek sira ida-idak nia naran iha sira-nia ai-tonka ida-idak. 3 Ó tenke hakerek Arão nia naran iha suku Levi nia ai-tonka, tanba xefe ba suku ida-idak* iha ai-tonka ida deʼit. 4 Tau ai-tonka sira-neʼe iha tenda reuniaun nia laran iha Arka Aliansa* nia oin,+ iha fatin neʼebé haʼu sempre mosu ba ó.+ 5 Mane neʼebé haʼu hili,+ ninia ai-tonka sei iha funan, ho ida-neʼe, haʼu sei hapara ema Izraél nia muramura hasoru haʼu+ no mós hasoru imi.”+

6 Entaun Moisés koʼalia ba ema Izraél, no xefe sira hotu fó sira-nia ai-tonka, katak ai-tonka ida husi sira-nia suku ida-idak,* hamutuk ai-tonka 12, no Arão nia ai-tonka mós iha sira-nia ai-tonka nia leet. 7 Tuirmai Moisés tau ai-tonka sira-neʼe iha Jeová nia oin iha tenda neʼebé iha Arka Aliansa nian.*

8 Iha loron tuirmai, bainhira Moisés tama ba tenda neʼebé iha Arka Aliansa nian,* nia haree Arão nia ai-tonka neʼebé reprezenta suku Levi mosu tubun no funan no iha ai-amendueira fuan neʼebé tasak. 9 Depois neʼe, Moisés lori ai-tonka hotu husi Jeová nia oin hodi sai ba liʼur ba povu Izraél tomak. Sira haree didiʼak ai-tonka sira-neʼe, no mane ida-idak foti sira-nia ai-tonka.

10 Tuirmai Jeová dehan ba Moisés: “Tau fali Arão nia ai-tonka+ iha Arka Aliansa* nia oin. Ó tenke rai ai-tonka neʼe nuʼudar sinál+ ba kontradór sira-neʼe,+ atu nuneʼe sira labele muramura tan hasoru haʼu no sira labele mate.” 11 Moisés halo tuir kedas mandamentu neʼebé Jeová fó sai ona ba nia. Nia halo nuneʼe duni.

12 Tuirmai ema Izraél dehan ba Moisés: “Agora ami sei mate, ami sei mate duni, ami hotu sei mate! 13 Ema naran deʼit neʼebé hakbesik ba Jeová nia tenda santu sei mate!+ Entaun, ami hotu sei mate iha dalan hanesan neʼe ka?”+

18 Tuirmai Jeová dehan ba Arão: “Ó no ó-nia oan-mane sira no ó-nia umakain neʼebé hamutuk ho ó sei hatán ba hahalok sala hotu neʼebé kontra ukun-fuan kona-ba fatin sagradu,+ no ó no ó-nia oan-mane sira sei hatán ba hahalok sala hotu neʼebé kontra ukun-fuan kona-ba imi-nia knaar amlulik nian.+ 2 No mós lori ó-nia maun-alin husi suku Levi, katak ó-nia beiʼala nia suku, atu nuneʼe sira bele apoia ó no halo serbisu ba ó+ no ba ó-nia oan-mane sira iha tenda nia oin, katak tenda neʼebé iha Arka Aliansa nian.*+ 3 Sira tenke kumpre sira-nia knaar ba ó no ba tenda neʼe tomak.+ Maibé, sira labele hakbesik ba sasán sira iha fatin santu no altár neʼe, atu nuneʼe imi ka sira labele mate.+ 4 Sira sei apoia ó no halaʼo sira-nia knaar iha tenda reuniaun nian no halo serbisu hotu iha tenda neʼe, no ema baibain* labele hakbesik ba imi.+ 5 Imi tenke halaʼo imi-nia knaar iha fatin santu+ no altár,+ atu nuneʼe haʼu-nia hirus+ labele mosu tan hasoru povu Izraél. 6 Haʼu rasik hili ona imi-nia maun-alin sira, ema Levi, husi ema Izraél nia leet nuʼudar prezente ba imi.+ Sira mak Jeová nian hodi halo serbisu iha tenda reuniaun nian.+ 7 Ó no ó-nia oan-mane sira iha knaar atu halo serbisu amlulik nian kona-ba altár neʼe no buat sira neʼebé iha kortina laran,+ no imi tenke halo serbisu neʼe.+ Haʼu fó ona knaar amlulik nian nuʼudar prezente ba imi, no ema baibain* neʼebé hakbesik ba fatin neʼe tenke hetan kastigu-mate.”+

8 Jeová koʼalia tan ba Arão: “Haʼu rasik fó ó knaar atu tau matan ba kontribuisaun neʼebé ema fó ba haʼu.+ Haʼu fó ona ba ó no ó-nia oan-mane sira parte balu husi buat santu hotu neʼebé ema Izraél fó no neʼe sai nuʼudar imi-nian ba nafatin.+ 9 Sakrifísiu santu liu hotu neʼebé sunu iha ahi mak sei sai ó-nian. Sakrifísiu hotu neʼebé sira fó mak ó-nian, neʼe inklui sira-nia sakrifísiu trigu* nian,+ sakrifísiu sala nian+ no sakrifísiu taka sala nian+ neʼebé sira lori ba haʼu. Neʼe mak buat neʼebé santu liu hotu ba ó no ba ó-nia oan-mane sira. 10 Ó tenke han ida-neʼe iha área neʼebé santu liu hotu.+ Mane hotu bele han ida-neʼe. Neʼe mak buat neʼebé santu ba ó.+ 11 No mós buat sira tuirmai neʼe mak ó-nian: Buat neʼebé sira fó nuʼudar kontribuisaun+ hamutuk ho sakrifísiu doko bá-mai nian hotu+ husi ema Izraél. Haʼu fó ona buat sira-neʼe ba ó, ó-nia oan-mane no oan-feto sira nuʼudar imi-nian ba nafatin.+ Ema hotu neʼebé moos* iha ó-nia umakain bele han ida-neʼe.+

12 “Haʼu entrega buat tuirmai neʼe ba ó:+ Mina neʼebé diʼak liu hotu no tua-uvas foun neʼebé diʼak liu hotu no trigu* neʼebé diʼak liu hotu, no ai-fuan primeiru+ neʼebé sira fó ba Jeová. 13 Ai-fuan primeiru husi ai-horis hotu iha sira-nia rai, neʼebé sira lori ba Jeová, neʼe sei sai ó-nian.+ Ema hotu neʼebé moos iha ó-nia umakain bele han ida-neʼe.

14 “Buat hotu neʼebé haketak* nuʼudar buat santu iha Izraél tenke sai ó-nian.+

15 “Oan primeiru husi buat moris hotu,+ neʼebé sira sei fó ba Jeová, maski ema ka animál, neʼe tenke sai ó-nian. Maibé, ó tenke sosa fali ema nia oan primeiru hotu,+ no mós ó tenke sosa fali oan primeiru husi animál neʼebé la moos.+ 16 Se ema ka animál neʼe mak fulan ida ba leten, ó tenke sosa fali neʼe ho folin osan-mutin 5,*+ neʼebé tetu tuir dasin-fuan husi fatin santu.* Dasin-fuan ida nia todan mak gera 20.* 17 Maibé ó labele sosa fali karau-aman neʼebé moris primeiru ka bibi-malae oan* primeiru ka bibi-timur oan primeiru.+ Tanba animál sira-neʼe mak buat neʼebé santu. Ó tenke hisik sira-nia raan iha altár leten,+ no ó tenke sunu sira-nia bokur hodi halo suar nuʼudar sakrifísiu neʼebé sunu iha ahi no ninia morin halo Jeová kontente.*+ 18 Naʼan husi animál sira-neʼe sei sai ó-nian. Hanesan mós ho animál nia hirus-matan husi sakrifísiu doko bá-mai nian no animál nia kelen sorin loos, neʼe sei sai ó-nian.+ 19 Kontribuisaun santu hotu neʼebé ema Izraél fó ba Jeová,+ haʼu entrega ida-neʼe ba ó no ó-nia oan-mane sira no ó-nia oan-feto sira nuʼudar imi-nian ba nafatin.+ Neʼe mak aliansa masin nian* neʼebé metin ba nafatin iha Jeová nia oin ba ó no ó-nia oan ho bei-oan sira.”

20 Jeová koʼalia tan ba Arão: “Ó sei la simu liman-rohan iha sira-nia rai, no la iha parte ida iha sira-nia rai neʼebé sei sai ó-nian.+ Haʼu mak ó-nia parte no ó-nia liman-rohan iha ema Izraél nia leet.+

21 “Kona-ba Levi nia oan-mane sira, haʼu fó ona porsentu sanulu+ husi ema Izraél nuʼudar sira-nia liman-rohan tanba serbisu neʼebé sira halo iha tenda reuniaun nian. 22 Povu Izraél labele hakbesik tan ba tenda reuniaun nian, se lae sira sei hetan sala no mate. 23 Ema Levi mak sei halo serbisu iha tenda reuniaun nian, no sira mak sei hatán ba povu nia sala.+ Neʼe mak ukun-fuan ba nafatin durante imi-nia jerasaun hotu katak sira labele hetan liman-rohan iha ema Izraél nia leet.+ 24 Tanba haʼu fó ona porsentu sanulu husi povu Izraél ba ema Levi nuʼudar sira-nia liman-rohan, katak porsentu sanulu neʼebé ema Izraél fó ba Jeová. Tan neʼe mak haʼu dehan ona: ‘Iha ema Izraél nia leet, sira labele hetan liman-rohan ida.’”+

25 Tuirmai Jeová dehan ba Moisés: 26 “Ó tenke hatete ba ema Levi: ‘Imi sei simu porsentu sanulu husi ema Izraél neʼebé haʼu fó ona ba imi hodi sai imi-nia liman-rohan,+ no imi tenke fó fali kontribuisaun porsentu sanulu husi porsentu sanulu neʼe ba Jeová.+ 27 Neʼe mak imi-nia kontribuisaun hodi reprezenta kontribuisaun sira husi imi-nia trigu,+ tua-uvas no mina. 28 Ho ida-neʼe mak imi mós sei fó kontribuisaun ba Jeová husi porsentu sanulu hotu neʼebé imi simu husi ema Izraél, no husi porsentu sanulu hotu neʼe mak imi sei fó imi-nia kontribuisaun neʼebé Jeová nian ba amlulik Arão. 29 Imi tenke fó kontribuisaun oioin ba Jeová husi parte diʼak liu hotu husi prezente neʼebé imi simu+ nuʼudar buat santu.’

30 “Ó tenke dehan ba sira: ‘Bainhira imi, ema Levi sira, fó kontribuisaun neʼebé diʼak liu husi parte sira-neʼe, entaun buat neʼebé restu sei sai imi-nian, neʼe sei reprezenta imi-nia trigu, tua-uvas no mina. 31 Imi no imi-nia umakain bele han buat sira-neʼe iha fatin naran deʼit, tanba neʼe mak imi-nia kolen neʼebé imi simu ba imi-nia serbisu iha tenda reuniaun nian.+ 32 Imi sei la hetan sala kona-ba neʼe se imi fó kontribuisaun neʼebé diʼak liu husi parte sira-neʼe, no imi labele hafoʼer buat neʼebé santu husi ema Izraél, se lae imi sei mate.’”+

19 Jeová koʼalia tan ba Moisés no Arão, hodi dehan: 2 “Neʼe mak ukun-fuan neʼebé Jeová fó ona ba imi: ‘Hatete ba ema Izraél katak sira tenke foti karau-inan ida neʼebé mean, la iha moras+ no seidauk lori naha todan ruma hodi fó ba ó. 3 Imi tenke entrega karau neʼe ba amlulik Eleazar, no nia sei lori sai neʼe ba povu nia hela-fatin nia liʼur, no tenke oho karau neʼe iha ninia oin. 4 Tuirmai amlulik Eleazar tenke foti karau nia raan balu iha ninia liman-fuan no hisik raan neʼe dala hitu ba odamatan tenda reuniaun nian.+ 5 Tenke sunu karau neʼe iha Eleazar nia oin, sin, tenke sunu tiha karau neʼe nia kulit hamutuk ho ninia isin, raan, no teen.+ 6 Amlulik tenke foti ai-sedru, ai-isopu,+ no hena mean no soe buat sira-neʼe iha ahi neʼebé han hela karau neʼe. 7 Tuirmai amlulik tenke fase ninia roupa no hariis, no depois neʼe, nia bele tama ba povu nia hela-fatin; maibé amlulik neʼe sei sai la moos* toʼo kalan.

8 “‘Ema neʼebé sunu karau neʼe tenke fase ninia roupa no hariis, no nia sei sai la moos toʼo kalan.

9 “‘Ema neʼebé moos* mak tenke halibur ahi-kadesan husi karau-inan neʼe+ no tau iha povu nia hela-fatin nia liʼur iha fatin neʼebé moos, no povu Izraél tenke rai hela ida-neʼe no uza kuandu prepara bee hamoos nian.+ Neʼe mak sakrifísiu sala nian. 10 Ema neʼebé halibur ahi-kadesan husi karau neʼe tenke fase ninia roupa no sai la moos toʼo kalan.

“‘Neʼe mak ukun-fuan ba nafatin ba ema Izraél no mós ema estranjeiru neʼebé hela iha sira-nia leet.+ 11 Ema neʼebé kona ema nia mate-isin* sei sai la moos durante loron hitu.+ 12 Ema neʼe tenke hamoos nia an ho bee neʼe iha loron terseiru, no nia sei sai moos iha loron hitu. Maibé se nia la hamoos nia an iha loron terseiru, entaun nia sei la sai moos iha loron hitu. 13 Ema neʼebé kona ema nia mate-isin* no la hamoos nia an, nia hafoʼer ona Jeová nia tenda santu,+ ema* neʼe tenke mate hodi halakon husi Izraél nia leet.+ Nia kontinua la moos tanba seidauk hisik bee hamoos nian+ ba nia. Sin, nia la moos nafatin.

14 “‘Neʼe mak ukun-fuan bainhira ema ida mate iha tenda laran: Ema neʼebé tama tenda neʼe no ema neʼebé iha ona tenda neʼe nia laran sei sai la moos durante loron hitu. 15 Sasán hotu neʼebé ninia matan la taka metin* sei sai la moos.+ 16 Ema neʼebé laʼo iha rai-luan no kona ema neʼebé mate tanba surik ka kona mate-isin ka mate-ruin ka rate, nia sei sai la moos durante loron hitu.+ 17 Sira tenke foti ahi-kadesan husi sakrifísiu sala nian neʼebé sunu ona no fui bee moos ba ahi-kadesan neʼe iha sanan laran atu hamoos ema neʼebé la moos. 18 Tuirmai ema neʼebé moos+ tenke foti ai-isopu+ no hoban iha bee neʼe no hisik ba tenda, ba sasán hotu, ba ema* hotu neʼebé iha neʼebá, no mós ba ema neʼebé kaer mate-ruin ka kaer ema neʼebé ema seluk oho ka mate-isin ka rate. 19 Ema neʼebé moos tenke hisik bee neʼe ba ema neʼebé la moos iha loron terseiru no iha loron hitu,+ no nia sei hamoos ema neʼe husi nia sala iha loron hitu neʼe; tuirmai ema neʼe tenke fase ninia roupa no hariis, no nia sei sai moos iha kalan.

20 “‘Maibé kona-ba ema neʼebé la moos no la hamoos nia an, ema* neʼe tenke mate hodi halakon husi kongregasaun nia leet,+ tanba nia hafoʼer ona Jeová nia fatin sagradu. Nia nafatin la moos tanba seidauk hisik bee hamoos nian ba nia.

21 “‘Neʼe mak ukun-fuan ba nafatin ba sira: Ema neʼebé hisik bee atu hamoos+ tenke fase ninia roupa, no ema neʼebé kaer bee hamoos nian sei sai la moos toʼo kalan. 22 Buat hotu neʼebé ema la moos neʼe kaer sei sai la moos, no ema* neʼebé kaer ida-neʼe sei sai la moos toʼo kalan.’”+

20 Iha fulan-primeiru, povu Izraél tomak toʼo iha rai-fuik Zin, no povu hela iha Kades.+ Miriam+ mate no hakoi iha neʼebá.

2 La iha bee ba povu neʼe,+ entaun sira halibur hamutuk hodi kontra Moisés no Arão. 3 Povu neʼe haksesuk malu ho Moisés+ no dehan: “Diʼak liu ami mate hamutuk ho ami-nia maun-alin sira bainhira sira mate iha Jeová nia oin! 4 Tanbasá mak imi lori Jeová nia kongregasaun mai iha rai-fuik neʼe atu halo ami no ami-nia animál-hakiak sira mate?+ 5 Tanbasá mak imi lori ami sai husi rai-Ejitu hodi mai iha fatin aat neʼe?+ Fatin neʼe la diʼak atu kuda fini, ai-figeira, uvas no romaun, no la iha bee atu hemu.”+ 6 Tuirmai Moisés no Arão sai husi kongregasaun neʼe nia oin hodi bá iha odamatan ba tenda reuniaun nian no sira hakneʼak no hakruʼuk ho oin ba rai, no Jeová nia glória hahú mosu ba sira.+

7 Depois neʼe, Jeová dehan ba Moisés: 8 “Foti ai-tonka bá, tuirmai ó no ó-nia maun Arão halibur povu hamutuk, no koʼalia ba fatuk boot neʼe iha sira-nia oin atu bee sai husi fatuk boot neʼe, no imi sei fó bee ba sira husi fatuk boot neʼe, atu povu neʼe ho sira-nia animál-hakiak bele hemu.”+

9 Entaun Moisés foti ai-tonka husi Jeová nia oin+ hodi tuir mandamentu neʼebé Maromak fó ba nia. 10 Tuirmai Moisés no Arão halibur kongregasaun neʼe hamutuk iha fatuk boot neʼe nia oin, no nia dehan ba sira: “Agora rona bá, imi kontradór sira! Imi obriga ami atu fó bee ba imi husi fatuk boot neʼe ka?”+ 11 Ho ida-neʼe, Moisés foti nia liman no baku fatuk boot neʼe dala rua ho ninia ai-tonka, no bee barak komesa suli sai mai, no povu neʼe ho sira-nia animál-hakiak hahú hemu bee neʼe.+

12 Depois neʼe, Jeová dehan ba Moisés no Arão: “Tanba imi la hatudu fiar ba haʼu no la fó glória ba haʼu* iha povu Izraél nia oin, entaun imi sei la lori kongregasaun neʼe tama ba rai neʼebé haʼu sei fó ba sira.”+ 13 Neʼe mak bee Meribá* nian;+ iha fatin neʼe mak ema Izraél haksesuk malu ho Jeová, nuneʼe nia halo santu ninia an iha sira-nia leet.

14 Tuirmai Moisés haruka ema lori lia-menon husi Kades ba liurai Edom:+ “Ita-nia maun-alin ema Izraél+ dehan nuneʼe: ‘Ita rasik hatene susar hotu neʼebé ami hetan ona. 15 Ami-nia beiʼala sira muda ba rai-Ejitu,+ no ami hela iha rai-Ejitu ba tinan barak,+ no ema Ejitu halo aat ba ami no ami-nia beiʼala sira.+ 16 Ikusmai ami halerik ba Jeová,+ no nia rona ami no haruka ninia anju+ hodi lori ami sai husi rai-Ejitu. Agora ami iha Kades, sidade neʼebé iha Ita-nia fronteira. 17 Favór ida, husik ami laʼo liuhusi Ita-nia rai. Ami sei la laʼo liuhusi Ita-nia toʼos ka toʼos-uvas, no ami sei la hemu bee husi Ita-nia bee-posu ida. Ami sei laʼo deʼit iha Dalan Liurai nian hodi la fila ba liman-loos ka liman-karuk toʼo ami laʼo liu tiha Ita-nia rai.’”+

18 Maibé, liurai Edom dehan ba nia: “Imi labele laʼo liuhusi ami-nia rai. Se lae, haʼu sei sai ho surik atu kontra imi.” 19 Ema Izraél hatán fali ba nia: “Ami sei laʼo liuhusi dalan boot deʼit, no se ami no ami-nia animál-hakiak hemu bee ruma, ami sei selu.+ Ami hakarak deʼit atu laʼo ain liuhusi imi-nia rai.”+ 20 Maibé liurai Edom dehan: “Imi labele laʼo liu.”+ Nuneʼe ema Edom sai ho ema barak no ho tropa* neʼebé forte hodi kontra sira. 21 Ho ida-neʼe, liurai Edom la husik ema Izraél atu laʼo liuhusi ninia rai; tan neʼe, ema Izraél hasees an husi nia.+

22 Povu Izraél tomak sai husi Kades no laʼo toʼo Foho Hor.+ 23 Tuirmai Jeová dehan ba Moisés no Arão iha Foho Hor neʼebé besik rai-Edom nia fronteira: 24 “Arão sei mate no hakoi hanesan hakoi ninia beiʼala sira.*+ Nia sei la tama ba rai neʼebé haʼu sei fó ba ema Izraél, tanba imi naʼin-rua kontra haʼu-nia mandamentu kona-ba bee iha Meribá.+ 25 Lori Arão no ninia oan-mane Eleazar no saʼe ba Foho Hor. 26 Hasai Arão nia roupa+ no tau fali ba ninia oan-mane Eleazar,+ no Arão sei mate iha neʼebá.”

27 Entaun Moisés halo tuir duni Jeová nia mandamentu, no povu hotu haree bainhira sira saʼe ba Foho Hor. 28 Tuirmai Moisés hasai Arão nia roupa no tau fali ba ninia oan-mane Eleazar. Depois neʼe, Arão mate iha foho leten.+ Tuirmai Moisés no Eleazar tun husi foho neʼe. 29 Bainhira povu tomak haree katak Arão mate ona, umakain Izraél hotu tanis ba Arão durante loron 30.+

21 Bainhira liurai Kanaan husi Arad,+ neʼebé hela iha área Negeb, rona katak ema Izraél laʼo liuhusi dalan Atarim, nia ataka ema Izraél no lori ema balu nuʼudar dadur. 2 Entaun ema Izraél jura ba Jeová, hodi dehan: “Se Ita entrega ema sira-neʼe ba ami-nia liman, ami mós sei harahun sira-nia sidade sira.” 3 Nuneʼe Jeová rona ba ema Izraél nia harohan no entrega ema Kanaan ba sira, no sira oho ema Kanaan no harahun mós sira-nia sidade sira. Tan neʼe, sira hanaran fatin neʼe Horma.*+

4 Sira kontinua laʼo husi Foho Hor+ liuhusi dalan Tasi Mean nian, atu nuneʼe sira bele laʼo haleʼu rai-Edom,+ no povu neʼe komesa sai kole tanba viajen neʼe. 5 Povu neʼe kontinua koʼalia kontra Maromak no Moisés,+ hodi dehan: “Tanbasá mak imi lori ami sai husi rai-Ejitu atu halo ami mate iha rai-fuik neʼe? Iha neʼe la iha ai-han no bee,+ no ami hakribi* ona paun aat neʼe.”+ 6 Entaun Jeová haruka samea venenu ba povu nia leet, no samea sira-neʼe tata povu sira-neʼe, tan neʼe ema Izraél barak mate.+

7 Tuirmai povu mai hasoru Moisés no dehan: “Ami halo ona sala hodi koʼalia kontra Jeová no ó.+ Husu ba Jeová atu nia bele hasai samea sira-neʼe husi ami.” Ho ida-neʼe, Moisés husu ba Maromak kona-ba povu neʼe.+ 8 Tuirmai Jeová dehan ba Moisés: “Ó rasik halo samea venenu neʼe nia modelu ida no tau neʼe iha ai-riin. No bainhira samea tata ema ida, nia tenke hateke ba samea neʼe hodi bele kontinua moris.” 9 Moisés halo kedas samea ida husi riti+ no tau neʼe iha ai-riin,+ no bainhira samea tata ema ida no nia hateke ba samea riti neʼe, nia la mate.+

10 Depois neʼe, ema Izraél sai no hela iha Obot.+ 11 Tuirmai sira sai husi Obot no hela iha Ije-Abarim,+ iha rai-fuik iha Moab nia oin neʼebé iha sorin parte leste. 12 Husi fatin neʼe sira sai no hela iha Foho-Leet* Zered.+ 13 Husi fatin neʼe sira sai no hela iha área Arnon+ neʼebé iha rai-fuik neʼebé hahú husi ema Amoreu nia fronteira. Arnon mak Moab nia fronteira, fronteira neʼe entre ema Moab no ema Amoreu nia rai. 14 Tan neʼe mak livru istória kona-ba Jeová nia Funu sira dehan katak “Vaebe iha Sufa no foho-leet* sira iha Arnon, 15 no foho-leet* sira neʼebé tun toʼo sidade Ar no liga ho Moab nia fronteira”.

16 Tuirmai sira laʼo ba Beer.* Neʼe mak bee-posu neʼebé Jeová koʼalia ba Moisés, hodi dehan: “Halibur povu neʼe, no haʼu sei fó bee ba sira.”

17 Iha tempu neʼebá, ema Izraél kanta knananuk tuirmai neʼe:

“Bee-posu suli sai bá! Kanta* ba nia!

Tuirmai sira sai husi rai-fuik hodi bá Matana, 19 husi Matana sira bá Naliel, no husi Naliel sira bá Bamot.+ 20 Sira sai husi Bamot hodi bá rai-tetuk neʼebé iha área* Moab nian,+ iha Pisga nia leten,+ neʼebé hateke ba Jesimon.*+

21 Tuirmai ema Izraél haruka ema atu lori lia-menon ba Sihon, ema Amoreu nia liurai, no dehan:+ 22 “Ami hakarak laʼo liuhusi Ita-nia rai. Ami sei la tama ba Ita-nia toʼos ka toʼos-uvas. Ami sei la hemu bee husi Ita-nia bee-posu ida. Ami sei laʼo deʼit iha Dalan Liurai nian toʼo ami laʼo liu tiha Ita-nia rai.”+ 23 Maibé Sihon la husik ema Izraél atu laʼo liuhusi ninia rai. Nuneʼe Sihon halibur ninia povu hotu no sai hodi kontra ema Izraél iha rai-fuik no sira toʼo iha Jahaz no hahú halo funu hasoru ema Izraél.+ 24 Maibé ema Izraél manán nia ho surik+ no foti ninia rai+ husi Arnon+ toʼo Jabok,+ neʼebé besik ema Ammon, tanba Jazer+ mak fronteira ba ema Ammon nia rai.+

25 Entaun ema Izraél foti sidade sira-neʼe hotu, no sira hahú hela iha ema Amoreu nia sidade hotu+ iha Hesbon no ninia sidade kiʼik sira hotu.* 26 Tanba Hesbon mak Sihon nia sidade; Sihon mak ema Amoreu nia liurai neʼebé halo funu hasoru liurai Moab no foti ninia rai hotu toʼo Arnon. 27 Tan neʼe mak iha liafuan goza nian neʼebé dehan:

“Mai iha Hesbon.

Harii Sihon nia sidade no harii metin bá.

28 Tanba ahi mosu husi Hesbon, ahi-lakan husi Sihon nia sidade.

Ahi neʼe han mohu tiha Ar iha Moab, no han mohu naʼi sira ba fatin aas* iha Arnon.

29 Oh Moab, susar ba ó! Oh povu husi Kemos,+ imi sei rahun!

Nia sei haree ninia oan-mane sira laʼo namkari husi rai neʼe no ema Amoreu nia liurai Sihon sei lori ninia oan-feto sira nuʼudar dadur.

31 Nuneʼe ema Izraél hahú hela iha ema Amoreu nia rai. 32 Tuirmai Moisés haruka mane balu atu bá hafuhu sidade Jazer.+ Sira manán ninia sidade kiʼik sira* no duni sai ema Amoreu neʼebé hela iha neʼebá. 33 Depois neʼe, sira fila no laʼo saʼe liuhusi Dalan ba Basan. No Liurai Og+ husi Basan sai mai hamutuk ho ninia povu atu halo funu hasoru ema Izraél iha Edrei.+ 34 Jeová dehan ba Moisés: “Keta taʼuk ba nia,+ tanba haʼu sei entrega nia ho ninia povu hotu no mós ninia rai ba ó-nia liman,+ no ó sei halo ba nia hanesan ó halo ona ba ema Amoreu nia liurai Sihon, neʼebé uluk hela iha Hesbon.”+ 35 Entaun sira oho nia, hamutuk ho ninia oan-mane sira no ninia povu hotu toʼo la iha ema ida mak moris,+ no sira foti ninia rai.+

22 Tuirmai ema Izraél sai no hela iha rai-tetuk maran Moab nian iha Mota Jordaun nia sorin neʼebé hateke ba Jerikó.+ 2 Zipor nia oan-mane Balak+ haree buat hotu neʼebé Izraél halo ona ba ema Amoreu, 3 no ema Moab sai taʼuk tebetebes ba povu neʼe, tanba sira barak loos; ema Moab sente taʼuk tebes no hakribi ema Izraél.+ 4 Entaun ema Moab dehan ba Midian nia katuas sira:+ “Agora kongregasaun neʼe sei tolan buat hotu neʼebé haleʼu ita, hanesan karau neʼebé tolan duʼut iha rai-luan.”

Iha tempu neʼebá, Zipor nia oan-mane Balak mak Moab nia liurai. 5 Nia haruka ema lori lia-menon ba Beor nia oan-mane Balám iha Petor+ neʼebé besik Mota Eufrates,* iha Balám nia rai. Balak bolu Balám, hodi dehan: “Haree! Povu ida sai ona husi rai-Ejitu. Sira taka ona rai tomak,+ no sira hela iha haʼu-nia oin. 6 Entaun favór ida, mai ajuda haʼu hodi fó-malisan ba povu neʼe,+ tanba sira forte liu fali haʼu. Karik haʼu bele manán sira no duni sira sai husi haʼu-nia rai, tanba haʼu hatene ho didiʼak katak ema neʼebé ó fó bensaun sei hetan bensaun no ema neʼebé ó fó-malisan sei hetan malisan.”

7 Entaun Moab nia katuas sira no Midian nia katuas sira halo viajen no lori mós osan balu iha sira-nia liman hodi selu Balám atu fó-malisan, no sira bá hasoru Balám+ no hatoʼo Balak nia lia-menon ba nia. 8 Ho ida-neʼe, Balám dehan: “Hela kalan ida iha neʼe, no haʼu sei fó sai ba imi buat naran deʼit neʼebé Jeová koʼalia ba haʼu.” Entaun, Moab nia ulun-naʼin sira hela ho Balám.

9 Tuirmai Maromak mosu ba Balám no dehan:+ “Sé mak ema sira neʼebé hamutuk ho ó?” 10 Balám hatán ba Maromak neʼebé loos: “Zipor nia oan-mane Balak, neʼebé liurai ba Moab, haruka lia-menon ba haʼu, hodi dehan: 11 ‘Haree bá! Povu neʼebé sai husi Ejitu taka ona rai tomak. Entaun mai ajuda haʼu no fó-malisan ba sira.+ Karik haʼu bele funu hasoru sira no duni sai sira.’” 12 Maibé Maromak dehan ba Balám: “Ó labele bá hamutuk ho sira. Ó labele fó-malisan ba povu neʼe, tanba sira hetan ona bensaun.”+

13 Balám hadeer iha dadeer no koʼalia ba ulun-naʼin sira neʼebé Balak haruka mai, hodi dehan: “Fila fali ba imi-nia rai, tanba Jeová lakohi haʼu bá hamutuk ho imi.” 14 Entaun ulun-naʼin sira husi Moab sai no fila fali ba Balak no dehan: “Balám lakohi mai hamutuk ho ami.”

15 Maibé, Balak haruka tan ulun-naʼin sira seluk neʼebé barak liu no importante liu fali grupu ida uluk. 16 Sira hasoru Balám no dehan ba nia: “Zipor nia oan-mane Balak dehan nuneʼe: ‘Favór ida, keta husik buat ida hanetik ó atu mai hasoru haʼu, 17 tanba haʼu sei fó kolen boot ba ó no haʼu sei halo buat naran deʼit neʼebé ó husu haʼu atu halo. Entaun favór ida, mai no fó-malisan ba povu neʼe.’” 18 Maibé Balám hatán ba Balak nia atan sira: “Maski Balak entrega ninia uma tomak nakonu ho osan-mutin no osan-mean ba haʼu, haʼu labele halo buat ida hodi kontra fali orden neʼebé haʼu-nia Maromak Jeová fó ba haʼu maski buat kiʼik ka boot.+ 19 Maibé favór ida, hela lai kalan neʼe, atu nuneʼe haʼu bele hatene saida tan mak Jeová sei hatete ba haʼu.”+

20 Tuirmai Maromak mosu ba Balám iha kalan no dehan ba nia: “Se mane sira-neʼe mai atu bolu ó, entaun bá hamutuk ho sira. Maibé ó bele koʼalia deʼit liafuan neʼebé haʼu hatete ba ó.”+ 21 Entaun Balám hadeer iha dadeer no tau sela ba ninia kuda-burru* no bá hamutuk ho Moab nia ulun-naʼin sira.+

22 Maibé Maromak sai hirus tebes ba nia tanba nia bá, no Jeová nia anju hamriik iha dalan atu kontra nia. Iha tempu neʼe Balám saʼe hela ninia kuda-burru, no ninia atan naʼin-rua hamutuk ho nia. 23 Bainhira kuda-burru neʼe haree Jeová nia anju hamriik iha dalan hodi kaer hela surik iha ninia liman, kuda-burru neʼe hahú atu sees husi dalan hodi bá rai-luan. Maibé Balám komesa baku kuda-burru neʼe atu laʼo tuir fali dalan. 24 Tuirmai Jeová nia anju hamriik iha dalan kloot entre toʼos-uvas rua, neʼebé iha moru fatuk iha sorin-sorin. 25 Bainhira kuda-burru haree Jeová nia anju, kuda-burru neʼe hahú sena an ba moru neʼe no hanehan Balám nia ain ba moru, no Balám hahú baku tan kuda-burru neʼe.

26 Jeová nia anju hakat liu dala ida tan no hamriik iha dalan kloot neʼebé la iha fatin atu fila ba liman-loos ka liman-karuk. 27 Bainhira kuda-burru neʼe haree Jeová nia anju, nia latan an maski Balám saʼe hela iha leten, entaun Balám sai hirus makaʼas no kontinua baku kuda neʼe ho ninia ai-tonka. 28 Ikusmai Jeová halo kuda-burru neʼe koʼalia,*+ no kuda-burru neʼe dehan ba Balám: “Haʼu halo saida ba ó hodi ó baku haʼu ba dala tolu?”+ 29 Balám hatán ba kuda-burru neʼe: “Neʼe tanba ó hamoe ona haʼu. Se karik iha surik iha haʼu-nia liman, haʼu sei oho tiha ó!” 30 Tuirmai kuda-burru neʼe dehan ba Balám: “Haʼu mak ó-nia kuda-burru neʼebé ó saʼe iha ó-nia moris tomak toʼo agora, loos ka lae? Entaun, uluk haʼu halo ona hanesan neʼe ba ó ka?” Nia hatán: “Lae!” 31 Tuirmai Jeová loke Balám nia matan,+ no nia haree Jeová nia anju hamriik iha dalan ho surik iha ninia liman. Entaun Balám hakneʼak kedas no hakruʼuk ho oin ba rai.

32 Tuirmai Jeová nia anju dehan ba nia: “Tanbasá mak ó baku ó-nia kuda-burru ba dala tolu? Haree! Haʼu rasik sai mai hodi kontra ó, tanba ó-nia hahalok mak kontra haʼu-nia hakarak.+ 33 Kuda-burru neʼe haree haʼu no koko atu hasees an husi haʼu ba dala tolu ona.+ Hanoin toʼok se nia la sees husi haʼu! Karik agora haʼu oho ona ó no husik kuda-burru neʼe moris.” 34 Balám dehan ba Jeová nia anju: “Haʼu halo ona sala, tanba haʼu la hatene katak Ita mak hamriik iha dalan hodi kontra haʼu. Agora se Ita la gosta atu haʼu halo viajen neʼe, entaun haʼu sei fila fali deʼit.” 35 Maibé Jeová nia anju dehan ba Balám: “Bá hamutuk ho sira, maibé ó tenke koʼalia deʼit liafuan neʼebé haʼu hatete ba ó.” Entaun Balám kontinua laʼo hamutuk ho Balak nia ulun-naʼin sira.

36 Bainhira Balak rona katak Balám mai ona, nia sai kedas hodi hasoru Balám iha Moab nia sidade ida iha Foho-Leet Arnon neʼebé iha fronteira. 37 Balak dehan ba Balám: “Haʼu mak bolu ó, loos ka lae? Tanbasá mak ó la mai hasoru haʼu? Ó hanoin katak haʼu labele fó kolen boot ba ó ka?”+ 38 Balám hatán ba Balak: “Agora haʼu mai ona hasoru Ita. Maibé haʼu labele koʼalia buat ida. Haʼu sei koʼalia deʼit liafuan neʼebé Maromak tau iha haʼu-nia ibun.”+

39 Entaun Balám bá hamutuk ho Balak, no sira toʼo iha Kiriat-Huzot. 40 Balak hasaʼe karau no bibi-malae nuʼudar sakrifísiu no haruka naʼan balu ba Balám no ba ulun-naʼin sira neʼebé hamutuk ho nia. 41 No iha dadeer Balak lori Balám ba Bamot-Baal; husi neʼebá nia bele haree povu Izraél tomak.+

23 Tuirmai Balám dehan ba Balak: “Harii altár hitu iha fatin neʼe,+ no prepara karau-aman hitu no bibi-malae aman hitu ba haʼu.” 2 Balak halo tuir kedas buat neʼebé Balám hatete. Balak ho Balám hasaʼe karau-aman ida no bibi-malae aman ida iha altár ida-idak.+ 3 Tuirmai Balám dehan ba Balak: “Hein lai iha neʼe besik ó-nia sakrifísiu sunu nian, no haʼu sei bá. Karik Jeová sei mosu ba haʼu. Buat naran deʼit neʼebé nia fó sai mai haʼu, haʼu sei fó-hatene ba ó.” Entaun, nia saʼe ba foho-oan ida nia tutun.

4 Tuirmai Maromak mosu ba Balám,+ no Balám dehan ba Maromak: “Haʼu harii altár hitu tuituir malu, no haʼu hasaʼe ona karau-aman no bibi-malae aman iha altár ida-idak.” 5 Ho ida-neʼe, Jeová tau liafuan tuirmai neʼe iha Balám nia ibun:+ “Fila fali ba Balak, no ida-neʼe mak ó tenke hatete ba nia.” 6 Entaun nia fila fali no haree katak Balak no Moab nia ulun-naʼin hotu hamriik besik ninia sakrifísiu sunu nian. 7 Tuirmai nia hatoʼo lia-dadolin neʼe, hodi dehan:+

“Balak, liurai Moab nian, lori haʼu husi Aram,+

Sin, mai hodi koʼalia aat Izraél.’+

 8 Oinsá mak haʼu bele fó-malisan ba sira neʼebé Maromak la fó-malisan?

No oinsá mak haʼu bele koʼalia aat sira neʼebé Jeová la koʼalia aat?+

11 Balak dehan ba Balám: “Nuʼusá mak ó halo nuneʼe ba haʼu? Haʼu lori ó mai atu fó-malisan ba haʼu-nia inimigu sira, maibé agora ó fó fali bensaun barak ba sira.”+ 12 Nia hatán: “Haʼu tenke koʼalia buat naran deʼit neʼebé Jeová tau iha haʼu-nia ibun,+ loos ka lae?”

13 Balak dehan ba nia: “Favór ida, mai hamutuk ho haʼu hodi bá iha fatin seluk neʼebé ó bele haree sira. Ó sei haree povu balu deʼit; ó sei la haree sira hotu. Husi neʼebá ó tenke fó-malisan ba sira.”+ 14 Entaun Balak lori Balám ba rai-luan Zofim nian, iha Foho Pisga nia tutun,+ no harii altár hitu no hasaʼe karau-aman ida no bibi-malae aman ida iha altár ida-idak.+ 15 Entaun Balám dehan ba Balak: “Hein lai iha neʼe besik ó-nia sakrifísiu sunu nian no haʼu sei bá koʼalia ho Maromak iha neʼebá.” 16 Jeová mosu ba Balám no tau liafuan sira-neʼe ba nia ibun:+ “Fila fali ba Balak, no neʼe mak buat neʼebé ó tenke dehan ba nia.” 17 Entaun Balám bá hasoru fali Balak no haree katak nia hein hela besik ninia sakrifísiu sunu nian, no Moab nia ulun-naʼin sira hamutuk ho nia. Balak husu ba Balám: “Jeová dehan saida?” 18 Tuirmai Balám hatoʼo lia-dadolin neʼe, hodi dehan:+

“Oh Balak, hamriik no rona bá.

Oh Zipor nia oan-mane, rona mai haʼu.

Bainhira nia koʼalia buat ruma, nia mós sei halo tuir duni, loos ka lae?

Bainhira nia koʼalia, nia mós sei kumpre duni,+ loos ka lae?

22 Maromak lori sira sai husi rai-Ejitu.+

Ba sira, nia hanesan karau-aman fuik nia dikur.+

Iha tempu neʼe ema bele dehan kona-ba Jacob no Izraél:

‘Haree ba buat neʼebé Maromak halo ona!’

25 Tuirmai Balak hatete ba Balám: “Se ó labele fó-malisan ba sira, entaun keta haraik bensaun ba sira.” 26 Balám hatán ba Balak: “Haʼu fó-hatene ona ba ó: ‘Haʼu sei halo buat hotu neʼebé Jeová hatete’,+ loos ka lae?”

27 Balak dehan ba Balám: “Favór ida, mai no haʼu sei lori ó ba fatin seluk tan. Karik iha neʼebá mak Maromak loos sei husik ó atu fó-malisan ba povu neʼe.”+ 28 Entaun Balak lori Balám ba foho Peor nia tutun, neʼebé hateke tun ba Jesimon.*+ 29 Tuirmai Balám dehan ba Balak: “Harii altár hitu iha fatin neʼe, no prepara karau-aman hitu no bibi-malae aman hitu ba haʼu.”+ 30 Balak halo tuir duni buat neʼebé Balám hatete, no nia hasaʼe karau-aman ida no bibi-malae aman ida iha altár ida-idak.

24 Bainhira Balám haree katak Jeová nia hakarak mak atu fó bensaun ba ema Izraél, Balám la bá tan hodi buka sinál atu fó sai buat aat kontra ema Izraél,+ maibé nia fila nia oin ba rai-fuik. 2 Bainhira Balám foti nia matan no haree ema Izraél nia hela-fatin tuir sira-nia suku,+ Maromak nia espíritu tun ba nia.+ 3 Depois neʼe, nia hatoʼo lia-dadolin tuirmai neʼe, hodi dehan:+

10 Tuirmai Balak sai hirus tebes ho Balám. Balak ho hirus basa liman no dehan ba Balám: “Haʼu bolu ó hodi fó-malisan ba haʼu-nia inimigu,+ maibé agora ó fó fali bensaun ba sira ba dala tolu ona. 11 Agora fila kedas ba uma. Haʼu hanoin atu fó kolen boot ba ó,+ maibé Jeová hanetik ona ó-nia kolen neʼe.”

12 Balám hatán ba Balak: “Haʼu koʼalia ona ba ema neʼebé ó haruka ba haʼu, hodi dehan: 13 ‘Maski Balak entrega ninia uma tomak nakonu ho osan-mutin no osan-mean ba haʼu, haʼu labele halo buat ida hodi kontra fali orden neʼebé Jeová fó ba haʼu maski diʼak ka aat. Haʼu sei koʼalia deʼit buat neʼebé Jeová hatete ba haʼu.’+ 14 Agora haʼu atu fila fali ba haʼu-nia povu. Entaun mai no husik haʼu fó sai ba ó buat neʼebé povu neʼe sei halo ba ó-nia povu iha futuru.”* 15 Ho ida-neʼe, nia hatoʼo lia-dadolin tuirmai neʼe, hodi dehan:+

20 Bainhira nia haree Amalec, nia kontinua hatoʼo ninia lia-dadolin, hodi dehan:

21 Bainhira nia haree ema Keneu,+ nia kontinua hatoʼo ninia lia-dadolin, hodi dehan:

“Ó-nia hela-fatin mak seguru hanesan manu nia knuuk iha fatuk boot lolon.

22 Maibé ema ida sei sunu tiha ema Keneu.*

Bainhira loos mak Asíria sei lori sira nuʼudar dadur?”

23 Nia kontinua ninia lia-dadolin, hodi dehan:

“Susar boot! Sé mak sei moris kuandu Maromak halo ida-neʼe?

Maibé nia mós sei lakon hotu.”

25 Tuirmai Balám+ hamriik no fila fali ba ninia rai. Balak mós fila fali ba ninia rai.

25 Bainhira ema Izraél hela iha Sitim,+ sira hahú halo sala seksuál ho ema Moab nia oan-feto sira.+ 2 Feto sira-neʼe konvida povu Izraél atu bá hamutuk ho sira bainhira sira hasaʼe sakrifísiu ba sira-nia maromak sira,+ no povu neʼe hahú han no hakruʼuk ba feto sira-neʼe nia maromak sira.+ 3 Ho ida-neʼe, ema Izraél hola parte hodi adora Baal husi Peor,+ no Jeová sai hirus tebes ba ema Izraél. 4 Jeová dehan ba Moisés: “Lori povu sira-nia ulun-naʼin hotu, fó kastigu-mate ba sira no tara sira-nia mate isin iha Jeová nia oin durante loron,* atu nuneʼe Jeová bele hatún ninia hirus ba ema Izraél.” 5 Tuirmai Moisés dehan ba Izraél nia juís sira:+ “Imi ida-idak tenke oho imi-nia ema neʼebé hola parte ona hodi adora Baal husi Peor.”+

6 Maibé iha tempu neʼe duni, mane Izraél ida lori feto Midian ida+ mai iha povu nia hela-fatin iha Moisés nia oin no iha povu Izraél hotu nia oin, nuʼudar sira tanis hela iha odamatan ba tenda reuniaun nian. 7 Bainhira Eleazar nia oan-mane Fineias,+ amlulik Arão nia bei-oan, haree ida-neʼe, nia hamriik kedas husi povu neʼe nia leet no foti diman iha ninia liman. 8 Tuirmai, nia duni tuir mane Izraél neʼe ba tenda laran no sona borus sira naʼin-rua. Nia sona mane Izraél neʼe, no feto neʼe nia sona borus liuhusi feto neʼe nia oin-lulik. Iha tempu neʼe mak moras-peste para no la kona tan ema Izraél.+ 9 Ema neʼebé mate tanba moras-peste neʼe hamutuk naʼin-24.000.+

10 Tuirmai Jeová dehan ba Moisés: 11 “Eleazar nia oan-mane Fineias,+ amlulik Arão nia bei-oan hatún ona haʼu-nia hirus ba povu Izraél, tanba nia la simu ema neʼebé la hatudu laran-metin ba haʼu iha sira-nia leet.+ Tan neʼe mak haʼu la halakon hotu ema Izraél maski haʼu hakarak sira atu adora haʼu mesak deʼit.+ 12 Tan neʼe, dehan ba nia: ‘Haʼu fó ona ba nia haʼu-nia aliansa dame nian. 13 Neʼe mak aliansa amlulik nian ba nafatin ba nia no ba ninia bei-oan sira,+ tanba nia la simu ema neʼebé la hatudu laran-metin ba ninia Maromak,+ no nia mós hamoos povu Izraél nia sala.’”

14 Tuir loloos, mane Izraél neʼebé mate hamutuk ho feto Midian neʼe, ninia naran mak Zimri, Salu nia oan-mane, nia mak xefe ba ninia aman nia umakain husi suku Simeão. 15 Feto Midian neʼebé mate, ninia naran mak Kozbi, Zur+ nia oan-feto; Zur mak ulun-naʼin ba ninia aman nia umakain husi Midian.+

16 Depois neʼe, Jeová dehan ba Moisés: 17 “Ataka ema Midian no halakon sira,+ 18 tanba sira lori susar ba imi, hodi lohi imi halo sala ho Peor.+ Sira dada imi ba sala liuhusi xefe Midian nia oan-feto Kozbi, neʼebé mate+ iha loron neʼebé imi hetan moras-peste tanba Peor.”+

26 Liutiha moras-peste neʼe,+ Jeová koʼalia ba Moisés no amlulik Arão nia oan-mane Eleazar, hodi dehan: 2 “Halo sensus ba povu Izraél tomak husi tinan 20 ba leten, tuir sira-nia aman nia umakain, no sura sira hotu neʼebé bele serbí nuʼudar tropa iha Izraél.”+ 3 Entaun Moisés no amlulik Eleazar+ koʼalia ba sira iha rai-tetuk maran Moab nian+ iha Mota Jordaun ninin besik Jerikó,+ hodi dehan: 4 “Halo sensus ba povu sira husi tinan 20 ba leten, hodi tuir mandamentu neʼebé Jeová fó sai ona ba Moisés.”+

Izraél nia oan-mane sira neʼebé sai husi rai-Ejitu mak tuirmai neʼe: 5 Izraél nia oan-mane primeiru Ruben;+ Ruben nia oan-mane sira+ mak tuirmai: Umakain Hanok nian mai husi Hanok; umakain Palu nian mai husi Palu; 6 umakain Hezron nian mai husi Hezron; umakain Karmi nian mai husi Karmi. 7 Sira mak Ruben nia família, no sira neʼebé rejistu ona hamutuk naʼin-43.730.+

8 Palu nia oan-mane mak Eliab. 9 Eliab nia oan-mane sira mak Nemuel, Datan no Abiram. Datan no Abiram mak xefe sira neʼebé hili ona atu reprezenta povu, neʼebé kontra Moisés+ ho Arão hamutuk ho Kora nia grupu+ bainhira sira kontra hasoru Jeová.+

10 Tuirmai rai nakloke* no tolan sira hotu. Kona-ba Kora, nia mate hamutuk ho sira neʼebé apoia nia bainhira ahi han mane naʼin-250.+ No sira sai hanesan ezemplu atu fó avizu mai ita.+ 11 Maibé, Kora nia oan-mane sira la mate.+

12 Simeão+ nia oan-mane sira tuir sira-nia família mak tuirmai neʼe: umakain Nemuel nian mai husi Nemuel;* umakain Jamin nian mai husi Jamin; umakain Jakin nian mai husi Jakin; 13 umakain Zerá nian mai husi Zerá; umakain Saul nian mai husi Saul. 14 Sira mak Simeão nia família, no sira neʼebé rejistu ona hamutuk naʼin-22.200.+

15 Gad+ nia oan-mane sira tuir sira-nia família mak tuirmai neʼe: umakain Zefon nian mai husi Zefon; umakain Hagi nian mai husi Hagi; umakain Suni nian mai husi Suni; 16 umakain Ozni nian mai husi Ozni; umakain Eri nian mai husi Eri; 17 umakain Arod nian mai husi Arod; umakain Areli nian mai husi Areli. 18 Sira mak Gad nia família, no sira neʼebé rejistu ona hamutuk naʼin-40.500.+

19 Judá+ nia oan-mane sira mak Er no Onan.+ Maibé Er no Onan mate iha rai-Kanaan.+ 20 Judá nia oan-mane sira seluk tuir sira-nia família mak tuirmai neʼe: umakain Selá nian mai husi Selá;+ umakain Peres nian mai husi Peres;+ umakain Zerá+ nian mai husi Zerá. 21 Peres nia oan-mane sira mak tuirmai neʼe: umakain Hezron nian mai husi Hezron;+ umakain Hamul nian mai husi Hamul.+ 22 Sira mak Judá nia família, no sira neʼebé rejistu ona hamutuk naʼin-76.500.+

23 Issacar+ nia oan-mane sira tuir sira-nia família mak tuirmai neʼe: umakain Tola nian mai husi Tola;+ umakain Puva nian mai husi Puva; 24 umakain Jasub nian mai husi Jasub; umakain Sinrom nian mai husi Sinrom. 25 Sira mak Issacar nia família, no sira neʼebé rejistu ona hamutuk naʼin-64.300.+

26 Zebulão+ nia oan-mane sira tuir sira-nia família mak tuirmai neʼe: umakain Sered nian mai husi Sered; umakain Elon nian mai husi Elon; umakain Jaleel nian mai husi Jaleel. 27 Sira mak Zebulão nia família, no sira neʼebé rejistu ona hamutuk naʼin-60.500.+

28 José+ nia oan-mane sira tuir sira-nia família mak tuirmai neʼe: Manasés no Efraim.+ 29 Manasés+ nia oan-mane sira mak tuirmai neʼe: umakain Makir nian mai husi Makir;+ no Makir nia oan-mane mak Gilead;+ umakain Gilead nian mai husi Gilead. 30 Gilead nia oan-mane sira mak tuirmai neʼe: umakain Iezer nian mai husi Iezer; umakain Helek nian mai husi Helek; 31 umakain Asriel nian mai husi Asriel; umakain Siquém nian mai husi Siquém; 32 umakain Semida nian mai husi Semida; umakain Hefer nian mai husi Hefer. 33 Hefer nia oan-mane Zelofead la iha oan-mane ida, só oan-feto deʼit,+ no Zelofead nia oan-feto sira-nia naran+ mak Mala, Noa, Hogla, Milca, no Tirza. 34 Sira mak Manasés nia família, no sira neʼebé rejistu ona hamutuk naʼin-52.700.+

35 Efraim+ nia oan-mane sira tuir sira-nia família mak tuirmai neʼe: umakain Sutela nian mai husi Sutela;+ umakain Beker nian mai husi Beker; umakain Tahan nian mai husi Tahan. 36 Sutela nia oan-mane sira mak tuirmai neʼe: umakain Eran nian mai husi Eran. 37 Sira mak Efraim nia família, no sira neʼebé rejistu ona hamutuk naʼin-32.500.+ Sira mak José nia oan-mane tuir sira-nia família.

38 Benjamim+ nia oan-mane sira tuir sira-nia família mak tuirmai neʼe: umakain Belá nian mai husi Belá;+ umakain Asbel nian mai husi Asbel; umakain Ahiram nian mai husi Ahiram; 39 umakain Sefufan nian mai husi Sefufan; umakain Hufam nian mai husi Hufam. 40 Belá nia oan-mane sira mak Arde no Naaman:+ umakain Arde nian mai husi Arde; umakain Naaman nian mai husi Naaman. 41 Sira mak Benjamim nia oan-mane tuir sira-nia família, no sira neʼebé rejistu ona hamutuk naʼin-45.600.+

42 Dan+ nia oan-mane sira tuir sira-nia família mak tuirmai neʼe: umakain Suham nian mai husi Suham. Sira mak Dan nia família. 43 Sira neʼebé rejistu ona husi Suham nia família hamutuk naʼin-64.400.+

44 Aser+ nia oan-mane sira tuir sira-nia família mak tuirmai neʼe: umakain Imná nian mai husi Imná; umakain Isvi nian mai husi Isvi; umakain Berias nian mai husi Berias; 45 Berias nia oan-mane sira mak tuirmai neʼe: umakain Heber nian mai husi Heber; umakain Malkiel nian mai husi Malkiel. 46 Aser nia oan-feto nia naran mak Sera. 47 Sira mak Aser nia família, no sira neʼebé rejistu ona hamutuk naʼin-53.400.+

48 Naftali+ nia oan-mane sira tuir sira-nia família mak tuirmai neʼe: umakain Jazeel nian mai husi Jazeel; umakain Guni nian mai husi Guni; 49 umakain Jezer nian mai husi Jezer; umakain Silem nian mai husi Silem. 50 Sira mak Naftali nia família, no sira neʼebé rejistu ona hamutuk naʼin-45.400.+

51 Ema Izraél hotu neʼebé rejistu ona hamutuk naʼin-601.730.+

52 Depois neʼe, Jeová dehan ba Moisés: 53 “Ó tenke fahe rai neʼe nuʼudar liman-rohan tuir naran sira neʼebé rejistu ona.*+ 54 Ba grupu neʼebé boot liu, ó tenke aumenta sira-nia liman-rohan, no ba grupu neʼebé kiʼik, ó tenke hamenus sira-nia liman-rohan.+ Ó tenke fó liman-rohan ba grupu ida-idak tuir númeru husi ema neʼebé rejistu ona. 55 Maibé, ó tenke haketak rai neʼe liuhusi dada sorteiu.*+ Sira tenke simu sira-nia liman-rohan tuir sira-nia aman nia suku nia naran. 56 Sira ida-idak nia liman-rohan sei deside liuhusi dada sorteiu no fahe ba grupu boot no grupu kiʼik sira.”

57 Ema Levi neʼebé rejistu ona+ tuir sira-nia família mak tuirmai neʼe: umakain Gerson nian mai husi Gerson; umakain Kohat nian mai husi Kohat;+ umakain Merari nian mai husi Merari. 58 Levi nia família seluk tan mak tuirmai neʼe: umakain Libni nian,+ umakain Hebron nian,+ umakain Mali nian,+ umakain Musi nian,+ no umakain Kora nian.+

Kohat nia oan-mane mak Amram.+ 59 Amram nia feen naran Jokebed,+ nia mak Levi nia oan-feto, neʼebé moris ba Levi iha rai-Ejitu. Amram nia oan-mane sira mak Arão, Moisés, no sira-nia biin Miriam.+ 60 Arão nia oan-mane sira mak Nadab, Abiú, Eleazar no Itamar.+ 61 Maibé Nadab no Abiú mate tanba sunu ahi neʼebé la tuir ukun-fuan iha Jeová nia oin.+

62 Ema Levi hotu neʼebé rejistu ona hamutuk naʼin-23.000, katak mane hotu husi fulan ida ba leten.+ Sira la rejistu hamutuk ho povu Izraél,+ tanba sira la simu liman-rohan iha povu Izraél nia leet.+

63 Moisés no amlulik Eleazar rejistu ema sira-neʼe bainhira sira mós rejistu ema Izraél iha rai-tetuk maran Moab nian iha Mota Jordaun ninin besik Jerikó. 64 Maibé iha ema sira-neʼe nia leet la iha ema ida neʼebé uluk rejistu ona iha tempu neʼebé Moisés no amlulik Arão halo sensus ba ema Izraél iha rai-fuik Sinai.+ 65 Tanba Jeová koʼalia ona kona-ba sira, hodi dehan: “Sira sei mate duni iha rai-fuik neʼe.”+ Entaun la iha ema ida neʼebé moris hela husi sira, só deʼit Jefuné nia oan-mane Caleb, no Nun nia oan-mane Josué mak moris hela.+

27 Tuirmai Zelofead+ nia oan-feto sira mai. Zelofead mak Hefer nia oan-mane, Hefer mak Gilead nia oan-mane, Gilead mak Makir nia oan-mane, Makir mak Manasés nia oan-mane. Sira husi Manasés nia família, no Manasés mak José nia oan-mane. Zelofead nia oan-feto sira-nia naran mak Mala, Noa, Hogla, Milca no Tirza. 2 Sira hamriik iha Moisés nia oin, iha amlulik Eleazar no xefe sira-nia oin,+ no iha povu hotu nia oin iha odamatan ba tenda reuniaun nian no dehan: 3 “Ami-nia aman mate ona iha rai-fuik, maibé nia la hola parte ho grupu neʼebé halibur hamutuk kontra Jeová, katak sira neʼebé apoia Kora,+ maibé nia mate tanba ninia sala rasik no nia la iha oan-mane ida. 4 Nuneʼe tanbasá mak ami-nia aman nia naran tenke lakon husi ninia suku tanba nia la iha oan-mane? Fó liman-rohan ba ami hanesan ho ami-nia aman nia maun-alin sira.” 5 Entaun Moisés lori sira-nia liafuan neʼe ba Jeová nia oin.+

6 Tuirmai Jeová dehan ba Moisés: 7 “Zelofead nia oan-feto sira koʼalia loos. Ó tenke fó liman-rohan ba sira hanesan ho sira-nia aman nia maun-alin sira no entrega sira-nia aman nia liman-rohan ba sira.+ 8 Dehan ba ema Izraél: ‘Se mane ida mate no la iha oan-mane, imi tenke entrega ninia liman-rohan ba ninia oan-feto. 9 Se nia la iha oan-feto, imi tenke entrega ninia liman-rohan ba nia maun ka alin-mane. 10 Se nia la iha maun ka alin, imi tenke entrega ninia liman-rohan ba ninia aman nia maun-alin sira. 11 No se ninia aman la iha maun-alin, imi tenke entrega ninia liman-rohan ba ninia família neʼebé besik, no ema neʼe sei foti nuʼudar ninian. Desizaun neʼe sei sai nuʼudar ukun-fuan ba ema Izraél, hodi tuir mandamentu neʼebé Jeová fó ba Moisés.’”

12 Tuirmai Jeová dehan ba Moisés: “Saʼe ba foho iha Abarim,+ no haree rai neʼebé haʼu sei fó ba ema Izraél.+ 13 Bainhira ó haree tiha rai neʼe, ó mós sei mate hanesan ó-nia maun Arão no hakoi hanesan hakoi ó-nia beiʼala sira,*+ 14 tanba bainhira povu neʼe haksesuk malu ho haʼu iha rai-fuik Zin, ó kontra haʼu-nia mandamentu no la fó glória ba haʼu* iha povu neʼe nia oin kona-ba bee neʼe.+ Neʼe mak bee husi Meribá+ neʼebé iha Kades+ iha rai-fuik Zin.”+

15 Tuirmai Moisés dehan ba Jeová: 16 “Jeová, Maromak neʼebé fó moris* ba ema hotu, favór ida, hili mane ida atu tau matan ba povu neʼe, 17 mane neʼe sei sai sira-nia ulun-naʼin no sei dirije sira iha buat hotu neʼebé sira halo, atu nuneʼe Jeová nia povu labele sai hanesan bibi neʼebé bibi-atan la iha.” 18 Entaun Jeová dehan ba Moisés: “Hili Nun nia oan-mane Josué, neʼebé matenek, no tau ó-nia liman ba nia.+ 19 Tuirmai haruka nia hamriik iha amlulik Eleazar nia oin no iha povu hotu nia oin, no ó tenke fó knaar ba nia iha sira hotu nia oin+ hodi sai nuʼudar ulun-naʼin. 20 Ó tenke fahe ó-nia kbiit* balu ba nia,+ atu nuneʼe povu Izraél hotu sei rona ba nia.+ 21 Nia sei hamriik iha amlulik Eleazar nia oin, no Eleazar sei husu Jeová nia desizaun liuhusi Urim*+ kona-ba nia. Nia mak sei fó mandamentu no sira hotu sei halo tuir, Josué no povu Izraél tomak neʼebé hamutuk ho nia.”

22 Entaun Moisés halo tuir duni mandamentu neʼebé Jeová fó sai ona ba nia. Nia lori Josué no haruka Josué hamriik iha amlulik Eleazar nia oin no iha povu hotu nia oin, 23 no nia tau liman ba Josué no fó knaar ba nia nuʼudar ulun-naʼin,+ hodi tuir mandamentu neʼebé Jeová fó liuhusi Moisés.+

28 Tuirmai Jeová dehan ba Moisés: 2 “Haruka povu Izraél no hatete ba sira: ‘Imi tenke kuidadu didiʼak kona-ba haʼu-nia sakrifísiu neʼebé imi hasaʼe ba haʼu, katak haʼu-nia ai-han.* Imi tenke hasaʼe haʼu-nia sakrifísiu sira neʼebé sunu iha ahi atu ninia morin halo haʼu kontente.* Imi tenke hasaʼe neʼe tuir ninia tempu neʼebé deside ona.’+

3 “Dehan ba sira: ‘Neʼe mak sakrifísiu neʼebé sunu iha ahi, neʼebé imi tenke hasaʼe beibeik ba Jeová: bibi-malae oan* rua neʼebé tinan ida no la iha moras, nuʼudar sakrifísiu sunu nian neʼebé hasaʼe loroloron.+ 4 Iha dadeer imi tenke hasaʼe bibi-malae oan ida, no bibi-malae oan ida seluk imi tenke hasaʼe iha rai-nakaras,*+ 5 no hasaʼe neʼe hamutuk ho trigu uut neʼebé diʼak gomor isin ida* neʼebé kahur ona ho mina diʼak litru ida* nuʼudar sakrifísiu trigu* nian.+ 6 Neʼe mak sakrifísiu sunu nian neʼebé imi tenke hasaʼe beibeik,+ hodi tuir ukun-fuan neʼebé fó sai ona iha Foho Sinai. Sakrifísiu neʼe mak buat morin neʼebé halo Maromak kontente,* katak sakrifísiu neʼebé sunu iha ahi hodi hasaʼe ba Jeová, 7 hamutuk ho ninia sakrifísiu hemu nian litru ida ba bibi-malae oan ida-idak.+ Imi tenke fui tua neʼe iha fatin santu nuʼudar sakrifísiu hemu nian neʼebé hasaʼe ba Jeová. 8 Imi tenke hasaʼe bibi-malae oan seluk iha rai-nakaras.* Imi tenke hasaʼe neʼe hamutuk ho sakrifísiu trigu nian no sakrifísiu hemu nian hanesan ho ida neʼebé imi hasaʼe iha dadeer, imi tenke hasaʼe neʼe nuʼudar sakrifísiu neʼebé sunu iha ahi no ninia morin halo Jeová kontente.*+

9 “‘Maibé, iha loron Sábadu,+ imi tenke hasaʼe bibi-malae oan* rua neʼebé tinan ida no la iha moras, no mós hasaʼe trigu uut neʼebé diʼak gomor isin rua* neʼebé kahur ona ho mina nuʼudar sakrifísiu trigu nian, hamutuk ho ninia sakrifísiu hemu nian. 10 Neʼe mak sakrifísiu sunu nian neʼebé imi tenke hasaʼe iha loron Sábadu, hamutuk ho sakrifísiu sunu nian no sakrifísiu hemu nian neʼebé imi hasaʼe loroloron.+

11 “‘Iha loron primeiru husi fulan ida-idak, imi tenke hasaʼe sakrifísiu sunu nian ba Jeová. Sakrifísiu sira-neʼe mak karau-aman* rua, bibi-malae aman ida, no bibi-malae oan* hitu neʼebé tinan ida no la iha moras.+ 12 Imi mós tenke hasaʼe trigu uut neʼebé diʼak gomor isin tolu* neʼebé kahur ona ho mina nuʼudar sakrifísiu trigu nian+ ba karau-aman ida-idak, trigu uut neʼebé diʼak gomor isin rua* neʼebé kahur ona ho mina nuʼudar sakrifísiu trigu nian ba bibi-malae aman,+ 13 no trigu uut neʼebé diʼak gomor isin ida* neʼebé kahur ona ho mina nuʼudar sakrifísiu trigu nian ba bibi-malae oan ida-idak nuʼudar sakrifísiu sunu nian. Neʼe mak sakrifísiu neʼebé sunu iha ahi no ninia morin halo Jeová kontente.*+ 14 Sira-nia sakrifísiu hemu nian mak tua-uvas litru rua* ba karau-aman ida.+ Tua-uvas litru ida ho mililitru 200* ba bibi-malae aman ida+ no litru ida ba bibi-malae oan ida.+ Neʼe mak sakrifísiu sunu nian neʼebé imi hasaʼe fulan ida-idak durante tinan tomak. 15 No mós, imi tenke hasaʼe bibi-timur oan ida nuʼudar sakrifísiu sala nian ba Jeová hamutuk ho sakrifísiu sunu nian neʼebé hasaʼe loroloron ho ninia sakrifísiu hemu nian.

16 “‘Iha loron 14 fulan-primeiru imi tenke selebra Páskua* ba Jeová.+ 17 Iha loron 15 husi fulan neʼe sei iha festa ida. Imi sei han paun neʼebé la iha fermentu durante loron hitu.+ 18 Iha loron primeiru sei iha reuniaun boot santu. Imi labele halo serbisu todan naran deʼit. 19 Imi tenke hasaʼe sakrifísiu sunu nian neʼebé sunu iha ahi hodi hasaʼe ba Jeová. Sakrifísiu neʼe mak karau-aman* rua, bibi-malae aman ida, no bibi-malae oan* hitu neʼebé tinan ida. Imi tenke hasaʼe animál neʼebé la iha moras.+ 20 Imi tenke hasaʼe animál sira-neʼe hamutuk ho sira-nia sakrifísiu trigu nian husi trigu uut neʼebé diʼak no kahur ona ho mina,+ trigu gomor isin tolu* ba karau-aman ida no gomor isin rua* ba bibi-malae aman. 21 Imi tenke hasaʼe trigu uut neʼebé diʼak gomor isin ida* ba bibi-malae oan ida-idak husi bibi-malae oan hitu neʼe, 22 no mós hasaʼe bibi-timur ida nuʼudar sakrifísiu sala nian hodi hamoos imi-nia sala. 23 Imi tenke hasaʼe sakrifísiu sira-neʼe hamutuk ho sakrifísiu sunu nian iha dadeer, neʼebé imi hasaʼe beibeik nuʼudar sakrifísiu sunu nian. 24 Loroloron imi tenke hasaʼe sakrifísiu sira-neʼe iha dalan neʼebé hanesan durante loron hitu hodi sai nuʼudar ai-han,* neʼe mak sakrifísiu neʼebé sunu iha ahi no ninia morin halo Jeová kontente.* Imi tenke hasaʼe neʼe hamutuk ho sakrifísiu sunu nian no sakrifísiu hemu nian neʼebé imi hasaʼe loroloron. 25 No iha loron hitu imi tenke halaʼo reuniaun boot santu.+ Imi labele halo serbisu todan naran deʼit.+

26 “‘Iha loron neʼebé imi halibur ai-han primeiru husi imi-nia toʼos,+ bainhira imi hasaʼe sakrifísiu trigu* foun nian ba Jeová,+ imi tenke halaʼo reuniaun boot santu iha imi-nia festa semana nian.+ Imi labele halo serbisu todan naran deʼit.+ 27 Imi tenke hasaʼe sakrifísiu sunu nian neʼebé ninia morin halo Jeová kontente.* Sakrifísiu sira-neʼe mak karau-aman rua, bibi-malae aman ida, no bibi-malae oan* hitu neʼebé tinan ida.+ 28 No kona-ba sira-nia sakrifísiu trigu nian, imi tenke hasaʼe trigu uut neʼebé diʼak no kahur ona ho mina, trigu gomor isin tolu* ba karau-aman ida-idak, trigu gomor isin rua* ba bibi-malae aman, 29 trigu uut neʼebé diʼak gomor isin ida* ba bibi-malae oan ida-idak husi bibi-malae oan hitu neʼe. 30 Imi mós tenke hasaʼe bibi-timur oan ida hodi hamoos imi-nia sala.+ 31 Imi tenke hasaʼe buat sira-neʼe hamutuk ho sakrifísiu sunu nian no sakrifísiu trigu nian neʼebé hasaʼe loroloron. Animál sira-neʼe labele iha moras,+ no imi tenke hasaʼe buat sira-neʼe hamutuk ho sira-nia sakrifísiu hemu nian.

29 “‘Iha loron primeiru fulan-hitu, imi tenke halaʼo reuniaun boot santu. Imi labele halo serbisu todan naran deʼit.+ Iha loron neʼe, imi tenke huu trombeta.+ 2 Imi tenke hasaʼe sakrifísiu sunu nian neʼebé ninia morin halo Jeová kontente.* Sakrifísiu neʼe mak karau-aman* ida, bibi-malae aman ida, no bibi-malae oan* hitu neʼebé tinan ida, no animál hotu neʼe labele iha moras. 3 No kona-ba sira-nia sakrifísiu trigu* nian, imi tenke hasaʼe trigu uut neʼebé diʼak no kahur ona ho mina, trigu gomor isin tolu* ba karau-aman, trigu gomor isin rua* ba bibi-malae aman, 4 no trigu gomor isin ida* ba bibi-malae oan ida-idak husi bibi-malae oan hitu neʼe, 5 no mós hasaʼe bibi-timur oan* ida nuʼudar sakrifísiu sala nian hodi hamoos imi-nia sala. 6 Imi tenke hasaʼe sakrifísiu neʼe hamutuk ho sakrifísiu sunu nian no ninia sakrifísiu trigu nian neʼebé imi hasaʼe fulan-fulan,+ no mós sakrifísiu sunu nian no ninia sakrifísiu trigu nian neʼebé imi hasaʼe loroloron,+ hamutuk ho sira-nia sakrifísiu hemu nian,+ hodi tuir ukun-fuan neʼebé iha ona, neʼe mak sakrifísiu neʼebé sunu iha ahi no ninia morin halo Jeová kontente.*

7 “‘Iha loron sanulu fulan-hitu neʼe, imi tenke halaʼo reuniaun boot santu,+ no imi tenke hatudu katak imi triste.* Imi labele halo serbisu todan naran deʼit.+ 8 Imi tenke hasaʼe sakrifísiu sunu nian neʼebé ninia morin halo Jeová kontente.* Sakrifísiu neʼe mak karau-aman ida, bibi-malae aman ida, no bibi-malae oan hitu neʼebé tinan ida, no animál hotu neʼe labele iha moras.+ 9 No kona-ba sira-nia sakrifísiu trigu nian, imi tenke hasaʼe trigu uut neʼebé diʼak no kahur ona ho mina, trigu gomor isin tolu ba karau-aman, trigu gomor isin rua ba bibi-malae aman, 10 no trigu gomor isin ida ba bibi-malae oan ida-idak husi bibi-malae oan hitu neʼe, 11 no mós imi tenke hasaʼe bibi-timur oan ida nuʼudar sakrifísiu sala nian, hamutuk ho sakrifísiu sala nian neʼebé hasaʼe iha Loron Hamoos Sala nian*+ no sakrifísiu sunu nian no ninia sakrifísiu trigu nian neʼebé hasaʼe loroloron, hamutuk ho sira-nia sakrifísiu hemu nian.

12 “‘Iha loron 15 fulan-hitu neʼe, imi tenke halaʼo reuniaun boot santu. Imi labele halo serbisu todan naran deʼit, no imi tenke selebra festa ba Jeová durante loron hitu.+ 13 Imi tenke hasaʼe sakrifísiu sunu nian,+ sakrifísiu neʼebé sunu iha ahi no ninia morin halo Jeová kontente.* Sakrifísiu neʼe mak karau-aman 13, bibi-malae aman 2, no bibi-malae oan 14 neʼebé tinan ida, no animál hotu neʼe labele iha moras.+ 14 No kona-ba sira-nia sakrifísiu trigu nian, imi tenke hasaʼe trigu uut neʼebé diʼak no kahur ona ho mina, trigu gomor isin tolu ba karau-aman ida-idak husi karau-aman 13 neʼe, trigu gomor isin rua ba bibi-malae aman ida-idak husi bibi-malae aman 2 neʼe, 15 no trigu gomor isin ida ba bibi-malae oan ida-idak husi bibi-malae oan 14 neʼe, 16 no mós imi tenke hasaʼe bibi-timur oan ida nuʼudar sakrifísiu sala nian, hamutuk ho sakrifísiu sunu nian neʼebé hasaʼe loroloron, no mós ninia sakrifísiu trigu nian no sakrifísiu hemu nian.+

17 “‘Iha loron segundu, imi tenke hasaʼe karau-aman 12, bibi-malae aman 2, no bibi-malae oan 14 neʼebé tinan ida, no animál hotu neʼe labele iha moras.+ 18 Imi mós tenke hasaʼe sira-nia sakrifísiu trigu nian no sira-nia sakrifísiu hemu nian ba karau-aman sira, bibi-malae aman sira, no bibi-malae oan sira tuir sira-nia númeru no tuir ukun-fuan neʼebé iha ona, 19 no mós imi tenke hasaʼe bibi-timur oan ida nuʼudar sakrifísiu sala nian, hamutuk ho sakrifísiu sunu nian neʼebé hasaʼe loroloron no ninia sakrifísiu trigu nian, hamutuk ho sira-nia sakrifísiu hemu nian.+

20 “‘Iha loron terseiru, imi tenke hasaʼe karau-aman 11, bibi-malae aman 2, no bibi-malae oan 14 neʼebé tinan ida, no animál hotu neʼe labele iha moras,+ 21 no hasaʼe sira-nia sakrifísiu trigu nian no sira-nia sakrifísiu hemu nian ba karau-aman sira, bibi-malae aman sira, no ba bibi-malae oan sira tuir sira-nia númeru no tuir ukun-fuan neʼebé iha ona, 22 no mós imi tenke hasaʼe bibi-timur ida nuʼudar sakrifísiu sala nian, hamutuk ho sakrifísiu sunu nian neʼebé hasaʼe loroloron no ninia sakrifísiu trigu nian no sakrifísiu hemu nian.+

23 “‘Iha loron haat, imi tenke hasaʼe karau-aman 10, bibi-malae aman 2, no bibi-malae oan 14 neʼebé tinan ida, no animál hotu neʼe labele iha moras,+ 24 no hasaʼe sira-nia sakrifísiu trigu nian no sira-nia sakrifísiu hemu nian ba karau-aman sira, bibi-malae aman sira, no ba bibi-malae oan sira tuir sira-nia númeru no tuir ukun-fuan neʼebé iha ona, 25 no mós imi tenke hasaʼe bibi-timur oan ida nuʼudar sakrifísiu sala nian, hamutuk sakrifísiu sunu nian neʼebé hasaʼe loroloron no ninia sakrifísiu trigu nian no sakrifísiu hemu nian.+

26 “‘Iha loron lima, imi tenke hasaʼe karau-aman 9, bibi-malae aman 2, no bibi-malae oan 14 neʼebé tinan ida, no animál hotu neʼe labele iha moras,+ 27 no hasaʼe sira-nia sakrifísiu trigu nian no sira-nia sakrifísiu hemu nian ba karau-aman sira, bibi-malae aman sira, no ba bibi-malae oan sira tuir sira-nia númeru no tuir ukun-fuan neʼebé iha ona, 28 no mós imi tenke hasaʼe bibi-timur ida nuʼudar sakrifísiu sala nian, hamutuk ho sakrifísiu sunu nian neʼebé hasaʼe loroloron no ninia sakrifísiu trigu nian no sakrifísiu hemu nian.+

29 “‘Iha loron neen, imi tenke hasaʼe karau-aman 8, bibi-malae aman 2, no bibi-malae oan 14 neʼebé tinan ida, no animál hotu neʼe labele iha moras,+ 30 no hasaʼe sira-nia sakrifísiu trigu nian no sira-nia sakrifísiu hemu nian ba karau-aman sira, bibi-malae aman sira, no ba bibi-malae oan sira tuir sira-nia númeru no tuir ukun-fuan neʼebé iha ona, 31 no mós imi tenke hasaʼe bibi-timur ida nuʼudar sakrifísiu sala nian, hamutuk ho sakrifísiu sunu nian neʼebé hasaʼe loroloron no ninia sakrifísiu trigu nian no sakrifísiu hemu nian.+

32 “‘Iha loron hitu, imi tenke hasaʼe karau-aman 7, bibi-malae aman 2, no bibi-malae oan 14 neʼebé tinan ida, no animál hotu neʼe labele iha moras,+ 33 no hasaʼe sira-nia sakrifísiu trigu nian no sira-nia sakrifísiu hemu nian ba karau-aman sira, bibi-malae aman sira, no ba bibi-malae oan sira tuir sira-nia númeru no tuir ukun-fuan neʼebé iha ona, 34 no mós imi tenke hasaʼe bibi-timur ida nuʼudar sakrifísiu sala nian, hamutuk ho sakrifísiu sunu nian neʼebé hasaʼe loroloron no ninia sakrifísiu trigu nian no sakrifísiu hemu nian.+

35 “‘Iha loron ualu, imi tenke halaʼo reuniaun espesiál ida. Imi labele halo serbisu todan naran deʼit.+ 36 Imi tenke hasaʼe sakrifísiu sunu nian, sakrifísiu neʼebé sunu iha ahi no ninia morin halo Jeová kontente.* Sakrifísiu neʼe mak karau-aman ida, bibi-malae aman ida, no bibi-malae oan hitu neʼebé tinan ida, no animál sira-neʼe labele iha moras,+ 37 no hasaʼe sira-nia sakrifísiu trigu nian no sira-nia sakrifísiu hemu nian ba karau-aman, bibi-malae aman, no ba bibi-malae oan sira tuir sira-nia númeru no tuir ukun-fuan neʼebé iha ona, 38 no mós imi tenke hasaʼe bibi-timur ida nuʼudar sakrifísiu sala nian, hamutuk ho sakrifísiu sunu nian neʼebé hasaʼe loroloron no ninia sakrifísiu trigu nian no sakrifísiu hemu nian.+

39 “‘Imi tenke hasaʼe sakrifísiu sira-neʼe ba Jeová durante tempu festa nian,+ hamutuk ho imi-nia sakrifísiu juramentu nian+ no sakrifísiu neʼebé imi fó ho hakarak rasik+ nuʼudar sakrifísiu sunu nian,+ sakrifísiu trigu nian,+ sakrifísiu hemu nian+ no sakrifísiu dame nian.’”+ 40 Moisés fó sai ba ema Izraél mandamentu hotu neʼebé Jeová fó ba nia.

30 Tuirmai Moisés koʼalia ba ulun-naʼin sira+ husi Izraél nia suku sira, hodi dehan: “Neʼe mak ukun-fuan neʼebé Jeová fó sai ona: 2 Se mane ida halo promesa+ ba Jeová ka jura+ atu la halo buat ruma, nia labele kontra ninia liafuan neʼe.+ Nia tenke kumpre buat hotu neʼebé nia jura ona atu halo.+

3 “Se feto joven ida sei hela iha ninia aman nia uma no nia halo promesa ba Jeová ka jura atu la halo buat ruma 4 no ninia aman rona ninia promesa neʼe ka ninia juramentu atu la halo buat ruma, no ninia aman la kontra ida-neʼe, entaun feto joven neʼe nia promesa hotu sei metin hela, no ninia juramentu atu la halo buat ruma sei metin nafatin. 5 Maibé se ninia aman bandu nia bainhira ninia aman rona katak nia halo ona promesa ka jura atu la halo buat ruma, entaun nia lalika kumpre ida-neʼe. Jeová sei perdua nia tanba ninia aman mak bandu nia.+

6 “Maibé se nia kaben ona ho mane ida bainhira nia sei iha hela ninia juramentu okos ka promesa neʼebé nia halo ho ansi, 7 no ninia laʼen rona kona-ba neʼe no la kontra ida-neʼe iha loron neʼebé nia rona kona-ba neʼe, entaun feto neʼe nia promesa ka ninia juramentu atu la halo buat ruma sei metin nafatin. 8 Maibé se ninia laʼen bandu nia iha loron neʼebé ninia laʼen rona ida-neʼe, ninia laʼen bele hasai ninia promesa neʼe ka juramentu neʼebé nia halo ho ansi,+ no Jeová sei perdua nia.

9 “Maibé se feto-faluk ida ka feto neʼebé soe-malu ona mak jura, entaun buat hotu neʼebé nia jura sei metin nafatin.

10 “Maibé se feto ida halo promesa ka jura atu la halo buat ruma bainhira nia sei hela iha ninia laʼen nia uma 11 no ninia laʼen rona kona-ba neʼe no la kontra ka la bandu, entaun feto neʼe nia promesa hotu ka ninia juramentu atu la halo buat ruma sei metin nafatin. 12 Maibé se iha loron neʼebé ninia laʼen rona ida-neʼe no ninia laʼen hasai hotu feto neʼe nia promesa ka juramentu atu la halo buat ruma, entaun promesa sira-neʼe sai la vale ona.+ Ninia laʼen hasai tiha ona buat hotu neʼe, no Jeová sei perdua nia. 13 Kona-ba promesa ruma ka juramentu atu nega an hodi la halo buat ruma, feto neʼe nia laʼen mak sei deside se nia tenke kumpre ka lae. 14 Maibé se ninia laʼen la kontra ida-neʼe loron ba loron, neʼe katak nia husik feto neʼe atu kumpre ninia promesa hotu ka ninia juramentu hotu atu la halo buat ruma no feto neʼe tenke kumpre buat sira-neʼe. Ninia laʼen halo neʼe metin ona tanba nia la kontra iha loron neʼebé nia rona feto neʼe halo juramentu sira-neʼe. 15 Maibé se liutiha tempu balu husi loron neʼebé ninia laʼen rona kona-ba neʼe mak ninia laʼen hasai feto neʼe nia promesa ka ninia juramentu, entaun ninia laʼen sei lori feto neʼe nia sala.+

16 “Neʼe mak ukun-fuan sira neʼebé Jeová fó ba Moisés kona-ba laʼen ida ho ninia feen, no kona-ba aman ida ho ninia oan-feto joven neʼebé sei hela iha ninia aman nia uma.”

31 Tuirmai Jeová dehan ba Moisés: 2 “Fó kastigu+ ba ema Midian tanba buat neʼebé sira halo ba ema Izraél.+ Depois neʼe, ó sei mate no hakoi hanesan hakoi ó-nia beiʼala sira.”*+

3 Entaun Moisés koʼalia ba povu neʼe, hodi dehan: “Halo prontu mane sira iha imi-nia leet hodi halo funu hasoru ema Midian no lori Jeová nia kastigu ba ema Midian. 4 Imi tenke haruka mane naʼin-1.000 husi suku ida-idak iha Izraél hodi bá funu.” 5 Entaun husi ema Izraél rihun ba rihun,+ suku ida-idak fó mane naʼin-1.000, neʼe katak hamutuk mane naʼin-12.000 mak sai prontu ba funu.

6 Tuirmai Moisés haruka sira bá atu halo funu, nia haruka ema naʼin-1.000 husi suku ida-idak, hamutuk ho amlulik Eleazar nia oan-mane Fineias,+ neʼebé lori sasán santu sira no trombeta funu nian+ iha ninia liman. 7 Sira halo funu hasoru ema Midian hodi tuir mandamentu neʼebé Jeová fó sai ona ba Moisés, no sira oho mane hotu. 8 Hamutuk ho ema seluk neʼebé sira oho, sira mós oho liurai Midian naʼin-lima, neʼe mak Evi, Rekem, Zur, Hur no Reba. No sira mós oho Beor nia oan-mane Balám+ ho surik. 9 Maibé ema Izraél lori feto no labarik sira husi Midian nuʼudar dadur. Ema Izraél mós hadau ema Midian nia karau no bibi-malae, katak sira-nia animál-hakiak hotu, no sira-nia sasán hotu. 10 Ema Izraél mós sunu ema Midian nia sidade hotu neʼebé sira hela bá no sira sunu povu nia hela-fatin hotu.* 11 Sira lori povu nia sasán hotu, animál hotu no sira mós lori ema nuʼudar dadur. 12 Tuirmai sira lori ema dadur sira, sasán neʼebé sira hadau, no animál sira ba Moisés no amlulik Eleazar no ba povu Izraél tomak, iha povu nia hela-fatin iha rai-tetuk maran Moab nian+ iha Mota Jordaun nia sorin besik Jerikó.

13 Tuirmai Moisés no amlulik Eleazar no povu nia xefe hotu sai hodi hasoru sira iha povu nia hela-fatin nia liʼur. 14 Maibé Moisés sai hirus ba ulun-naʼin tropa nian neʼebé dirije funu, katak xefe ba tropa naʼin-1.000 no xefe ba tropa naʼin-100 neʼebé foin fila husi funu. 15 Moisés dehan ba sira: “Nuʼusá mak imi husik feto hotu moris? 16 Sira mak feto neʼebé halo tuir Balám nia liafuan hodi dada ema Izraél atu la hatudu hahalok laran-metin+ ba Jeová kona-ba Peor,+ tan neʼe mak Jeová nia povu hetan moras-peste.+ 17 Agora imi tenke oho labarik-mane hotu no mós feto hotu neʼebé halo ona relasaun seksuál ho mane ida. 18 Maibé imi bele husik feto joven sira moris, katak feto hotu neʼebé seidauk halo relasaun seksuál ho mane ida.+ 19 Imi tenke hela iha povu nia hela-fatin nia liʼur durante loron hitu. Imi hotu neʼebé oho ona ema* ruma no imi neʼebé kona mate-isin,+ imi tenke hamoos imi-nia an+ iha loron terseiru no mós iha loron hitu, imi no ema neʼebé imi lori nuʼudar dadur. 20 Imi tenke hamoos tiha sala husi roupa hotu, sasán neʼebé halo ho animál nia kulit, sasán husi bibi-timur nia fulun, no sasán husi ai.”

21 Tuirmai amlulik Eleazar koʼalia ba tropa sira neʼebé halo ona funu: “Neʼe mak ukun-fuan neʼebé Jeová fó ba Moisés: 22 ‘Kona-ba osan-mean, osan-mutin, riti, besi, kaleen no besi-makdadi,* 23 buat hotu neʼebé ahi labele han mohu, imi tenke hamoos neʼe liuhusi ahi, no neʼe sei sai moos. Maibé, imi mós tenke hamoos buat sira-neʼe ho bee.*+ Buat hotu neʼebé ahi bele han mohu, imi tenke hamoos ho bee hamoos nian. 24 Imi tenke fase imi-nia roupa iha loron hitu no sai moos, no tuirmai imi bele tama ba povu nia hela-fatin.’”+

25 Depois neʼe, Jeová dehan ba Moisés: 26 “Halo lista ba buat hotu neʼebé sira hadau no sura dadur sira, katak ema no animál; ó tenke halo neʼe hamutuk ho amlulik Eleazar no ulun-naʼin ba umakain sira iha povu nia leet. 27 Imi tenke haketak buat neʼebé sira hadau ona ba parte rua hodi fahe ba tropa sira neʼebé hola parte iha funu no ba povu seluk hotu.+ 28 Ó tenke foti buat tuirmai husi tropa sira neʼebé bá funu, hodi fó nuʼudar impostu ba Jeová: ema* ida husi ema naʼin-500, karau ida husi karau 500, kuda-burru ida husi kuda-burru 500, no bibi ida husi bibi 500. 29 Ó tenke foti neʼe husi tropa sira-nia parte no fó ba amlulik Eleazar nuʼudar kontribuisaun ba Jeová.+ 30 Kona-ba parte neʼebé fó ona ba ema Izraél, ó tenke foti ema ida husi ema naʼin-50, karau ida husi karau 50, kuda-burru ida husi kuda-burru 50, bibi ida husi bibi 50, no animál-hakiak ida husi animál-hakiak 50, no fó buat sira-neʼe ba ema Levi+ neʼebé halaʼo knaar iha Jeová nia tenda santu.”+

31 Entaun Moisés no amlulik Eleazar halo tuir duni mandamentu neʼebé Jeová fó sai ona ba Moisés. 32 Sasán restu husi sasán neʼebé tropa sira foti mak bibi hamutuk 675.000, 33 karau hamutuk 72.000, 34 no kuda-burru hamutuk 61.000. 35 Feto* neʼebé seidauk halo relasaun seksuál ho mane,+ hamutuk naʼin-32.000. 36 Parte neʼebé mane sira neʼebé halo funu simu mak bibi hamutuk 337.500. 37 Impostu neʼebé fó ba Jeová mak bibi hamutuk 675. 38 Iha mós karau hamutuk 36.000, no husi karau sira-neʼe karau 72 mak sai nuʼudar impostu ba Jeová. 39 Iha kuda-burru hamutuk 30.500, no husi kuda-burru sira-neʼe kuda-burru 61 mak sai nuʼudar impostu ba Jeová. 40 Iha ema* hamutuk naʼin-16.000, no husi ema* sira-neʼe ema naʼin-32 mak sai nuʼudar impostu ba Jeová. 41 Tuirmai Moisés fó impostu sira-neʼe nuʼudar Jeová nia kontribuisaun ba amlulik Eleazar,+ hodi tuir mandamentu neʼebé Jeová fó sai ona ba Moisés.

42 Kona-ba parte neʼebé ema Izraél simu, neʼebé Moisés haketak ona husi parte ba mane neʼebé halo funu, 43 parte neʼe mak bibi hamutuk 337.500, 44 karau hamutuk 36.000, 45 kuda-burru hamutuk 30.500, 46 no ema* hamutuk naʼin-16.000. 47 Tuirmai Moisés foti ema ida husi ema naʼin-50, no animál ida husi animál 50, husi parte neʼebé ema Izraél simu, no nia fó buat sira-neʼe ba ema Levi,+ neʼebé halaʼo knaar iha Jeová nia tenda santu,+ hodi tuir mandamentu neʼebé Jeová fó sai ona ba Moisés.

48 Tuirmai xefe sira ba tropa rihun ba rihun,+ katak xefe ba tropa naʼin-1.000 no xefe ba tropa naʼin-100, hakbesik ba Moisés, 49 no sira dehan ba Moisés: “Ita-nia atan sira sura ona ema neʼebé ami dirije hodi bá funu, no la iha ema ida mak lakon husi ami.+ 50 Entaun ami ida-idak sei fó sakrifísiu ba Jeová husi buat neʼebé ami hetan, neʼe mak sasán husi osan-mean, pulseira ain no liman, kadeli selus,* brinkus, no buat murak seluk, atu nuneʼe bele hamoos ami-nia sala iha Jeová nia oin.”

51 Entaun Moisés no amlulik Eleazar simu osan-mean hotu neʼe husi sira, katak sasán murak hotu. 52 Osan-mean hotu neʼebé sira fó ba Jeová nuʼudar kontribuisaun hamutuk kilograma 191,* ida-neʼe husi xefe ba tropa naʼin-1.000 no xefe ba tropa naʼin-100. 53 Tropa ida-idak simu ona parte ida husi buat neʼebé sira hadau. 54 Moisés no amlulik Eleazar simu osan-mean husi xefe ba tropa naʼin-1.000 no xefe ba tropa naʼin-100 no lori neʼe ba tenda reuniaun nian atu nuneʼe povu Izraél hanoin-hetan oinsá Jeová ajuda sira.*

32 Ruben nia oan-mane sira+ no Gad nia oan-mane sira+ iha animál-hakiak barak tebes, no sira haree katak rai-Jazer+ no rai-Gilead mak área neʼebé diʼak ba animál-hakiak sira. 2 Entaun Gad nia oan-mane sira no Ruben nia oan-mane sira hakbesik Moisés, amlulik Eleazar, no povu nia xefe sira, hodi dehan: 3 “Atarot, Dibon, Jazer, Nimra, Hesbon,+ Eleale, Sebam, Nebo,+ no Beon,+ 4 neʼe mak rai sira neʼebé Jeová manán ona iha povu Izraél nia oin,+ no rai sira-neʼe diʼak ba animál-hakiak sira, no Ita-nia atan sira iha animál-hakiak neʼebé barak.”+ 5 Sira dehan tan: “Se Ita hakarak hatudu laran-diʼak ba ami, entrega rai sira-neʼe ba Ita-nia atan sira nuʼudar ami-nian. Keta haruka ami hakur Mota Jordaun.”

6 Tuirmai Moisés koʼalia ba Gad nia oan-mane sira no Ruben nia oan-mane sira, hodi dehan: “Imi-nia maun-alin sira sei bá funu no imi sei hela deʼit iha neʼe ka? 7 Tanbasá mak imi halo povu Izraél laran-triste atu la hakur Mota Jordaun hodi tama ba rai neʼebé Jeová sei fó duni ba sira? 8 Neʼe mak buat neʼebé imi-nia aman sira halo bainhira haʼu haruka sira sai husi Kades-Barnea atu bá haree rai neʼe.+ 9 Bainhira sira toʼo iha Mota* Eskol,+ no haree rai neʼe, sira halo povu Izraél taʼuk hodi la tama ba rai neʼebé Jeová sei fó ba sira.+ 10 Jeová sai hirus tebes iha loron neʼe no nia jura, hodi dehan:+ 11 ‘Mane sira husi tinan 20 ba leten neʼebé sai husi rai-Ejitu, sei la haree rai neʼe+ neʼebé haʼu jura atu fó ba Abraão, Isaac no Jacob,+ tanba sira la halo tuir haʼu ho laran tomak, 12 só deʼit Jefuné nia oan-mane Caleb+ neʼebé nuʼudar ema Kenizeu no Nun nia oan-mane Josué+ mak sei haree rai neʼe, tanba sira halo tuir Jeová ho laran tomak.’+ 13 Entaun Jeová sai hirus tebes ba ema Izraél no nia halo sira laʼo-lemo iha rai-fuik ba tinan 40,+ toʼo jerasaun hotu neʼebé halo hahalok aat iha Jeová nia oin mate.+ 14 Imi ema sala-naʼin sira, agora imi halo hanesan deʼit ho buat neʼebé imi-nia aman sira halo, imi halo Jeová hirus liután hasoru ema Izraél. 15 Se imi fila kotuk hodi la halo tuir nia, nia sei husik fali ema Izraél iha rai-fuik, no imi sei lori kastigu ba povu hotu neʼe.”

16 Liutiha tempu balu, sira hakbesik ba Moisés no dehan: “Husik ami harii animál nia luhan husi fatuk ba ami-nia animál-hakiak sira no harii sidade sira ba ami-nia oan. 17 Maibé ami sei nafatin prontu atu bá funu+ no ami sei laʼo iha ema Izraél nia oin toʼo ami lori tiha sira ba sira-nia fatin, durante tempu neʼe ami-nia oan sira sei hela iha sidade neʼebé iha moru aas hodi moris ho hakmatek husi povu iha rai neʼe. 18 Ami sei la fila fali ba ami-nia uma toʼo ema Izraél ida-idak simu ona sira-nia rai nuʼudar liman-rohan.+ 19 Ami sei la simu liman-rohan hamutuk ho sira iha Mota Jordaun nia sorin seluk, tanba ami simu ona ami-nia liman-rohan iha Mota Jordaun nia sorin parte leste.”+

20 Moisés hatán ba sira: “Se imi halo buat tuirmai neʼe: Imi ida-idak foti imi-nia surik iha Jeová nia oin hodi bá halo funu;+ 21 no se imi ida-idak foti surik hodi hakur Mota Jordaun iha Jeová nia oin, bainhira nia duni sai ninia inimigu husi ninia oin,+ 22 toʼo domina tiha rai neʼe iha Jeová nia oin,+ depois mak imi bele fila mai+ no imi sei sai livre husi sala ba Jeová no Izraél. Tuirmai rai neʼe sei sai imi-nian iha Jeová nia oin.+ 23 Maibé se imi la halo buat sira-neʼe, imi halo ona sala kontra Jeová. Se nuneʼe, imi hatene bá katak imi sei hatán ba imi-nia sala.* 24 Entaun imi bele harii sidade sira ba imi-nia oan no animál luhan sira ba imi-nia animál-hakiak,+ maibé imi tenke halo tuir buat neʼebé imi promete ona.”

25 Gad nia oan-mane sira no Ruben nia oan-mane sira dehan ba Moisés: “Ita-Boot nia atan sira sei halo tuir duni buat neʼebé ami-nia naʼi hatete. 26 Ami-nia oan, ami-nia feen no ami-nia animál-hakiak hotu sei hela iha sidade sira iha rai-Gilead,+ 27 maibé Ita-nia atan sira sei hakur mota, mane hotu sai prontu ona hodi halo funu iha Jeová nia oin,+ hodi tuir buat neʼebé ami-nia naʼi hatete.”

28 Entaun Moisés fó mandamentu kona-ba sira ba amlulik Eleazar, ba Nun nia oan-mane Josué, no ulun-naʼin ba umakain sira husi Izraél nia suku sira. 29 Moisés dehan ba sira: “Se Gad nia oan-mane sira no Ruben nia oan-mane sira hakur ba Mota Jordaun nia sorin seluk hamutuk ho imi, katak sira-nia mane hotu neʼebé prontu ona atu halo funu iha Jeová nia oin, no se imi domina ona rai neʼe, tuirmai imi bele fó rai-Gilead ba sira nuʼudar sira-nian.+ 30 Maibé se sira la foti surik no hakur mota hamutuk ho imi, entaun sira sei hela iha imi-nia leet iha rai-Kanaan.”

31 Ho ida-neʼe, Gad nia oan-mane sira no Ruben nia oan-mane sira hatán: “Ami sei halo tuir buat neʼebé Jeová koʼalia ona ba Ita-nia atan sira. 32 Ami sei foti surik no hakur mota iha Jeová nia oin hodi tama ba rai-Kanaan,+ maibé ami-nia liman-rohan neʼebé ami sei simu mak iha Mota Jordaun nia sorin neʼe.” 33 Entaun kona-ba ema Amoreu nia liurai Sihon nia rai+ no Liurai Og husi Basan nia rai,+ no rai neʼebé parte ba sidade sira-neʼe, no sidade kiʼik sira neʼebé haleʼu rai neʼe, Moisés entrega ba Gad nia oan-mane sira, ba Ruben nia oan-mane sira,+ no ba Manasés nia suku sorin balu.+ Manasés mak José nia oan-mane.

34 Gad nia oan-mane sira harii* Dibon,+ Atarot,+ Aroer,+ 35 Atrot-Sofan, Jazer,+ Jogbea,+ 36 Bet-Nimra+ no Bet-Haran,+ sidade sira neʼebé iha moru aas, no sira harii animál luhan husi fatuk. 37 Ruben nia oan-mane sira harii Hesbon,+ Eleale,+ Kiriataim,+ 38 Nebo+ no Baal-Meon+ (naran ba sidade sira-neʼe troka ona), no mós sira harii Sibma; no sira hahú tau naran foun ba sidade sira neʼebé sira harii fali.

39 Manasés nia oan-mane Makir ninia oan-mane sira+ halo funu hasoru Gilead no manán área neʼe no hasai ema Amoreu neʼebé hela iha neʼebá. 40 Entaun Moisés fó Gilead ba Manasés nia oan-mane Makir, no nia hahú hela iha neʼebá.+ 41 No Manasés nia oan-mane Jair bá funu hasoru sidade kiʼik sira iha Gilead no manán sidade sira-neʼe, no nia hanaran fatin sira-neʼe Havot-Jair.*+ 42 Noba bá halo funu no manán Kenat no mós ninia sidade kiʼik sira,* no hahú hanaran fatin neʼe Noba hodi tuir ninia naran rasik.

33 Neʼe mak fatin sira neʼebé povu Izraél hela durante sira-nia viajen bainhira sira sai husi rai-Ejitu+ tuir sira-nia grupu tropa sira+ hodi tuir Moisés no Arão nia matadalan.+ 2 Moisés kontinua hakerek kona-ba fatin neʼebé sira hela bá durante sira-nia viajen hodi tuir Jeová nia orden. Tuirmai neʼe mak sira-nia hela-fatin husi fatin ida ba fatin seluk:+ 3 Iha loron 15 fulan-primeiru,+ sira sai husi Ramesés.+ Loron neʼe mak loron ida depois Páskua,*+ no ema Izraél sai ho fiar an* iha ema Ejitu hotu nia oin. 4 Iha tempu hanesan, ema Ejitu hakoi sira-nia oan primeiru hotu neʼebé Jeová oho iha sira-nia leet,+ tanba Jeová lori ona kastigu ba sira-nia maromak sira.+

5 Entaun, ema Izraél sai husi Ramesés no hela iha Sukot.+ 6 Tuirmai sira sai husi Sukot no hela iha Etam,+ neʼebé iha rai-fuik nia ninin. 7 Tuirmai sira sai husi Etam no fila fali ba Pihairot, neʼebé iha Baal-Zefon nia oin,+ no sira hela besik Migdol.+ 8 Depois neʼe, sira sai husi Pihairot no laʼo liu tasi klaran+ hodi bá rai-fuik+ no kontinua laʼo durante loron tolu iha rai-fuik Etam+ no hela iha Mara.+

9 Tuirmai sira sai husi Mara no toʼo iha Elim. Iha Elim iha bee-matan 12 no ai-palmeira hun 70, entaun sira hela iha neʼebá.+ 10 Tuirmai sira sai husi Elim no hela besik Tasi Mean. 11 Depois neʼe, sira sai husi Tasi Mean no hela iha rai-fuik Sim.+ 12 Tuirmai sira sai husi rai-fuik Sim no hela iha Dofka. 13 Depois neʼe, sira sai husi Dofka no hela iha Alus. 14 Tuirmai sira sai husi Alus no hela iha Refidim,+ no iha neʼebá la iha bee ba povu neʼe atu hemu. 15 Depois neʼe, sira sai husi Refidim no hela iha rai-fuik Sinai.+

16 Sira sai husi rai-fuik Sinai no hela iha Kibrot-Hatava.+ 17 Tuirmai sira sai husi Kibrot-Hatava no hela iha Hazerot.+ 18 Depois neʼe, sira sai husi Hazerot no hela iha Ritma. 19 Tuirmai sira sai husi Ritma no hela iha Rimon-Peres. 20 Depois neʼe, sira sai husi Rimon-Peres no hela iha Libna. 21 Sira sai husi Libna no hela iha Risa. 22 Depois neʼe, sira sai husi Risa no hela iha Kehelata. 23 Tuirmai sira sai husi Kehelata no hela iha Foho Sefer.

24 Depois neʼe, sira sai husi Foho Sefer no hela iha Harada. 25 Tuirmai sira sai husi Harada no hela iha Makelot. 26 Depois neʼe, sira sai+ husi Makelot no hela iha Tahat. 27 Tuirmai sira sai husi Tahat no hela iha Tera. 28 Tuirmai sira sai husi Tera no hela iha Mitka. 29 Depois neʼe, sira sai husi Mitka no hela iha Hasmona. 30 Tuirmai sira sai husi Hasmona no hela iha Moserot. 31 Depois neʼe, sira sai husi Moserot no hela iha Bene-Jakan.+ 32 No sira sai husi Bene-Jakan no hela iha Hor-Hagidgad. 33 Tuirmai sira sai husi Hor-Hagidgad no hela iha Jotbata.+ 34 Depois neʼe, sira sai husi Jotbata no hela iha Abrona. 35 Tuirmai sira sai husi Abrona no hela iha Ezion-Geber.+ 36 Depois neʼe, sira sai husi Ezion-Geber no hela iha rai-fuik Zin,+ neʼe mak Kades.

37 Tuirmai sira sai husi Kades no hela iha Foho Hor,+ katak iha rai-Edom nia fronteira. 38 Amlulik Arão saʼe ba Foho Hor hodi tuir Jeová nia orden no nia mate iha neʼebá. Arão mate iha loron primeiru fulan-lima tinan 40 husi tempu neʼebé ema Izraél sai husi rai-Ejitu.+ 39 Arão mate iha Foho Hor kuandu nia tinan 123.

40 Ema Kanaan nia liurai husi Arad,+ neʼebé hela iha área Negeb iha rai-Kanaan, rona katak ema Izraél mai ona.

41 Liutiha tempu balu, ema Izraél sai husi Foho Hor+ no hela iha Zalmona. 42 Depois neʼe, sira sai husi Zalmona no hela iha Punon. 43 Tuirmai sira sai husi Punon no hela iha Obot.+ 44 Depois neʼe, sira sai husi Obot no hela iha Ije-Abarim, iha fronteira Moab nian.+ 45 Tuirmai sira sai husi Ijim* no hela iha Dibon-Gad.+ 46 Depois neʼe, sira sai husi Dibon-Gad no hela iha Almon-Diblataim. 47 Tuirmai sira sai husi Almon-Diblataim no hela iha Abarim nia foho sira+ iha Nebo nia oin.+ 48 Ikusmai sira sai husi Abarim nia foho sira no hela iha rai-tetuk maran Moab nian iha Mota Jordaun ninin besik Jerikó.+ 49 Sira kontinua hela besik Mota Jordaun, husi Bet-Jesimot toʼo Abel-Sitim,+ katak iha rai-tetuk maran Moab nian.

50 Jeová koʼalia ba Moisés iha rai-tetuk maran Moab nian iha Mota Jordaun ninin besik Jerikó, hodi dehan: 51 “Koʼalia ba ema Izraél no hatete ba sira: ‘Imi sei hakur Mota Jordaun hodi tama ba rai-Kanaan.+ 52 Imi tenke duni sai ema hotu neʼebé hela iha rai neʼe husi imi-nia oin no halakon sira-nia fatuk neʼebé bahat ona+ no sira-nia estátua hotu husi besi,+ no imi tenke harahun sira-nia fatin aas hotu neʼebé lulik.+ 53 Imi sei foti rai neʼe no hela iha neʼebá, tanba haʼu sei fó duni rai neʼe ba imi nuʼudar imi-nian.+ 54 Imi tenke fahe rai neʼe hodi dada sorteiu*+ atu sai nuʼudar liman-rohan ba imi-nia família sira. Ba grupu neʼebé boot imi tenke aumenta ninia liman-rohan, no ba grupu neʼebé kiʼik imi tenke hamenus ninia liman-rohan.+ Ema ida-idak sei simu liman-rohan hodi tuir rezultadu husi dada sorteiu. Imi sei simu imi-nia rai nuʼudar liman-rohan tuir imi-nia aman nia umakain.+

55 “‘Maibé se imi la duni sai ema neʼebé hela iha rai neʼe husi imi-nia oin,+ entaun ema neʼebé imi husik hela sei sai hanesan ai-tarak iha imi-nia matan laran no ai-tarak iha imi-nia sorin, no sira sei fó susar ba imi iha rai neʼebé imi hela bá.+ 56 Haʼu sei fó kastigu ba imi hanesan ho kastigu neʼebé haʼu deside ona atu fó ba sira.’”+

34 Jeová koʼalia tan ba Moisés, hodi dehan: 2 “Fó sai matadalan neʼe ba ema Izraél: ‘Bainhira imi tama ba rai-Kanaan,+ rai neʼe sai nuʼudar imi-nia liman-rohan, no ninia fronteira sira mak tuirmai neʼe.+

3 “‘Imi-nia fronteira parte súl sei hahú husi rai-fuik Zin neʼebé iha Edom nia sorin, no imi-nia fronteira súl nian iha parte leste mak husi Tasi Masin* nia rohan.+ 4 Imi-nia fronteira sei toʼo parte súl husi dalan neʼebé saʼe ba Akrabim,+ kontinua tan ba Zin, no tuirmai toʼo iha parte súl husi Kades-Barnea.+ Tuirmai fronteira neʼe fila ba Hazar-Adar+ no liu toʼo Azmon. 5 No iha Azmon, fronteira neʼe fila fali ba Uádi* Ejitu no toʼo Tasi Boot.*+

6 “‘Imi-nia fronteira parte oeste mak Tasi Boot* no ninia tasi-ibun sira. Neʼe sei sai imi-nia fronteira parte oeste.+

7 “‘Imi-nia fronteira parte norte mak tuirmai neʼe: Husi Tasi Boot imi tenke marka imi-nia fronteira toʼo Foho Hor. 8 Husi Foho Hor imi tenke marka imi-nia fronteira toʼo Lebo-Hamat,*+ no fronteira nia rohan mak iha Zedad.+ 9 Fronteira neʼe sei kontinua toʼo Zifron, no ninia rohan mak Hazar-Enan.+ Ida-neʼe mak imi-nia fronteira parte norte.

10 “‘Tuirmai imi tenke marka imi-nia fronteira parte leste hahú husi Hazar-Enan toʼo Sefam. 11 Fronteira neʼe kontinua husi Sefam toʼo Ribla iha parte leste husi Aim, no tun no liu foho-oan sira iha parte leste husi Tasi Kineret.*+ 12 Fronteira neʼe sei liu toʼo Mota Jordaun, no ninia rohan mak Tasi Masin.+ Neʼe mak imi-nia rai+ no ninia fronteira sira neʼebé haleʼu rai neʼe.’”

13 Entaun Moisés fó matadalan ba ema Izraél, hodi dehan: “Neʼe mak rai neʼebé imi sei fahe nuʼudar imi-nian liuhusi dada sorteiu,*+ hodi tuir Jeová nia mandamentu atu fahe rai ba Izraél nia suku sia no Manasés nia suku sorin balu. 14 Tanba suku Ruben, suku Gad no Manasés nia suku sorin balu simu tiha ona sira-nia liman-rohan.+ 15 Izraél nia suku rua no Manasés nia suku sorin balu simu ona sira-nia liman-rohan iha área Mota Jordaun nia sorin parte leste besik Jerikó, fatin neʼebé loro-matan saʼe.”+

16 Jeová koʼalia tan ba Moisés, hodi dehan: 17 “Tuirmai neʼe mak mane sira neʼebé sei fahe rai neʼe ba imi nuʼudar imi-nian: Amlulik Eleazar+ no Nun nia oan-mane Josué.+ 18 Imi tenke foti xefe ida husi suku ida-idak atu fahe rai neʼe nuʼudar imi-nia liman-rohan.+ 19 Tuirmai neʼe mak mane sira-neʼe nia naran: husi suku Judá+ mak Jefuné nia oan-mane Caleb;+ 20 husi suku Simeão+ mak Amiud nia oan-mane Semuel; 21 husi suku Benjamim+ mak Kislon nia oan-mane Elidad; 22 husi suku Dan+ mak Jogli nia oan-mane Buki neʼebé nuʼudar xefe; 23 husi José nia oan-mane sira+ husi suku Manasés+ mak Efod nia oan-mane Haniel neʼebé nuʼudar xefe; 24 husi suku Efraim+ mak Siftan nia oan-mane Kemuel neʼebé nuʼudar xefe; 25 husi suku Zebulão+ mak Parnak nia oan-mane Elizafan neʼebé nuʼudar xefe; 26 husi suku Issacar+ mak Azan nia oan-mane Paltiel neʼebé nuʼudar xefe; 27 husi suku Aser+ mak Selomi nia oan-mane Ahiud neʼebé nuʼudar xefe; 28 husi suku Naftali+ mak Amiud nia oan-mane Pedahel neʼebé nuʼudar xefe.” 29 Neʼe mak mane sira neʼebé Jeová haruka atu fahe rai ba ema Izraél iha rai-Kanaan.+

35 Jeová koʼalia tan ba Moisés iha rai-tetuk maran Moab nian iha Mota Jordaun ninin besik Jerikó,+ hodi dehan: 2 “Haruka ema Izraél atu fó sidade sira ba ema Levi atu hela, katak sidade balu neʼebé ema Izraél sei simu nuʼudar liman-rohan,+ no sira mós tenke fó ba ema Levi rai-luan neʼebé haleʼu sidade sira-neʼe nuʼudar fatin ba animál sira.+ 3 Ema Levi sei hela iha sidade sira-neʼe, no rai-luan neʼe mak ba sira-nia animál-hakiak, sira-nia sasán no ba sira-nia animál seluk hotu. 4 Rai-luan neʼebé haleʼu sidade sira neʼebé imi sei fó ba ema Levi mak ho naruk metru 445* husi sidade nia moru haleʼu sidade nia sorin-sorin. 5 Imi tenke sukat sidade nia liʼur iha sorin parte leste ho luan metru 890,* sorin parte súl ho luan metru 890, sorin parte oeste ho luan metru 890, no sorin parte norte ho luan metru 890, no sidade mak iha klaran. Neʼe mak rai-luan ba ema Levi nia sidade sira.

6 “Imi tenke fó sidade protesaun nian neen+ ba ema Levi, atu ema neʼebé oho ema seluk la ho neon bele halai bá,+ no imi mós tenke fó sidade 42 tan ba sira. 7 Imi tenke fó sidade 48 ba ema Levi, inklui mós sidade sira-neʼe nia rai-luan sira.+ 8 Sidade neʼebé imi sei fó ba ema Levi mak husi ema Izraél nia liman-rohan.+ Husi grupu neʼebé boot imi tenke foti barak, no husi grupu neʼebé kiʼik imi tenke foti uitoan.+ Grupu ida-idak sei fó sidade balu ba ema Levi tuir liman-rohan neʼebé sira simu.”

9 Jeová koʼalia tan ba Moisés, hodi dehan: 10 “Koʼalia ba ema Izraél no hatete ba sira: ‘Imi sei hakur Mota Jordaun hodi tama ba rai-Kanaan.+ 11 Imi tenke hili sidade sira neʼebé fasil atu halai bá nuʼudar sidade protesaun nian ba imi-nia an, no ema sira neʼebé oho ema* seluk la ho neon tenke halai ba sidade sira-neʼe.+ 12 Sidade sira-neʼe sei sai nuʼudar fatin protesaun nian husi ema mate neʼe nia família,*+ atu nuneʼe ema neʼebé oho ema seluk labele mate toʼo nia hetan tesi-lia iha povu nia oin.+ 13 Imi sei uza sidade neen neʼe hodi fó protesaun hodi kumpre objetivu neʼe. 14 Imi tenke fó sidade tolu iha Mota Jordaun nia sorin neʼe+ no sidade tolu tan iha rai-Kanaan+ atu sai nuʼudar sidade protesaun nian. 15 Sidade neen neʼe sei sai nuʼudar fatin protesaun nian ba ema Izraél, ema estranjeiru,+ no ema husi rai seluk neʼebé hela iha imi-nia leet, atu nuneʼe ema naran deʼit neʼebé oho ema* seluk la ho neon bele halai bá neʼebá.+

16 “‘Maibé se ema ida baku ema hodi uza besi no ema neʼe mate, nia mak ohodór. Ohodór neʼe tenke hetan kastigu-mate.+ 17 Se nia tuku ema ho fatuk neʼebé bele halo ema mate no ema neʼe mate duni, nia mak ohodór. Ohodór neʼe tenke hetan kastigu-mate. 18 Se nia baku ema ho ai neʼebé bele halo ema mate no ema neʼe mate duni, nia mak ohodór. Ohodór neʼe tenke hetan kastigu-mate.

19 “‘Família husi ema neʼebé mate* mak sei oho ema neʼebé ohodór. Bainhira nia hasoru ohodór neʼe, nia rasik mak sei oho ema neʼe. 20 Se ema ida mate tanba ema seluk mak dudu nia ho odi ka tuda buat ruma ba ema neʼe ho hanoin neʼebé aat,*+ 21 ka se ema ida ho odi baku ema seluk ho ninia liman, no ema neʼe mate, ida neʼebé baku ema neʼe tenke mate. Nia mak ohodór. Família husi ema neʼebé mate* tenke oho tiha ema neʼebé ohodór bainhira hasoru nia.

22 “‘Maibé se nia halo neʼe la ho neon no laʼós tanba odi mak nia dudu ema neʼe ka nia soe buat ruma ba ema neʼe la ho hanoin neʼebé aat,*+ 23 ka se nia la haree ema neʼe no soe fatuk ruma no fatuk neʼe monu ba ema neʼe nia leten no loloos nia la odi ema neʼe ka la buka atu hakanek ema neʼe, no ema neʼe mate, 24 povu tenke tesi-lia entre ema neʼebé oho ema seluk no família husi ema neʼebé mate,* hodi tuir ukun-fuan sira-neʼe.+ 25 Tuirmai povu tenke salva ema neʼe husi ema mate neʼe nia família* no entrega ema neʼe ba sidade protesaun nian neʼebé nia halai ona bá, no nia tenke hela iha neʼebá toʼo amlulik boot mate, katak amlulik boot neʼebé simu ona mina santu.*+

26 “‘Maibé se ema neʼebé oho ema seluk laʼo sai husi baliza ba sidade protesaun nian neʼebé nia halai bá 27 no família husi ema neʼebé mate* hetan nia iha sidade protesaun nia baliza liʼur no oho nia, família neʼe la hetan sala kona-ba ema nia raan. 28 Tuir loloos, nia tenke hela iha sidade protesaun nian toʼo amlulik boot mate. Maibé bainhira amlulik boot mate tiha, ema neʼebé oho ema seluk bele fila fali ba ninia rai rasik.+ 29 Imi tenke halo tuir ukun-fuan sira-neʼe bainhira imi tesi-lia iha fatin neʼebé imi hela bá iha imi-nia jerasaun hotu.

30 “‘Ema naran deʼit neʼebé oho ema* seluk tenke hetan kastigu-mate nuʼudar ohodór+ bainhira iha sasin sira;*+ maibé imi labele fó kastigu-mate ba ema* ida se iha deʼit sasin ida. 31 Imi labele simu folin atu sosa fali ema ohodór ida nia moris se nia merese atu mate, tanba ema neʼe tenke hetan kastigu-mate.+ 32 Imi labele simu folin atu sosa fali ema neʼebé halai ona ba sidade protesaun nian no husik nia hela fali iha ninia rai antes amlulik boot mate.

33 “‘Imi labele hafoʼer rai neʼebé imi hela bá, tanba raan mak hafoʼer rai neʼe,+ no liuhusi deʼit raan husi ema neʼebé fakar raan mak bele hamoos tiha sala iha rai.+ 34 Imi labele hafoʼer rai neʼebé imi no haʼu hela bá; tanba haʼu, Jeová, mak hela iha povu Izraél nia leet.’”+

36 Ulun-naʼin ba família sira husi Gilead nia jerasaun hakbesik no koʼalia ba Moisés no ba xefe sira, katak família nia ulun-naʼin sira husi ema Izraél. Gilead mak Makir nia oan-mane+ no Manasés nia bei-oan, no Manasés mak José nia oan-mane. 2 Sira dehan: “Jeová haruka Ita-Boot, ami-nia naʼi, atu fahe rai neʼe liuhusi dada sorteiu*+ hodi fó nuʼudar liman-rohan ba ema Izraél; no Jeová haruka ami-nia naʼi atu fó liman-rohan ba ami-nia maun Zelofead nia oan-feto sira.+ 3 Se sira ida kaben ho mane husi suku seluk iha Izraél, entaun feto neʼe nia liman-rohan mós sei hasai husi ami-nia aman sira-nia liman-rohan no fó tan ba suku seluk neʼebé nia kaben bá, nuneʼe liman-rohan neʼe sei hasai tiha husi ami-nia liman-rohan neʼebé ami simu liuhusi dada sorteiu. 4 Bainhira toʼo Tinan Livre nian+ ba povu Izraél, feto neʼe nia liman-rohan mós sei fó tan ba suku seluk neʼebé nia sai parte bá nuʼudar sira-nian ba nafatin, nuneʼe ninia liman-rohan sei hasai tiha husi liman-rohan ba ami-nia aman nia suku.”

5 Entaun, Moisés hatete ba ema Izraél hodi tuir Jeová nia orden, hodi dehan: “Buat neʼebé José nia bei-oan sira koʼalia mak loos. 6 Neʼe mak mandamentu neʼebé Jeová fó sai ona ba Zelofead nia oan-feto sira: ‘Sira bele kaben ho ema naran deʼit neʼebé sira hakarak. Maibé sira tenke kaben deʼit ho mane husi sira-nia aman nia suku. 7 Ema Izraél nia liman-rohan labele muda husi suku ida ba suku seluk, tanba ema Izraél tenke kaer metin ba sira-nia beiʼala nia liman-rohan husi sira-nia suku. 8 Kona-ba oan-feto hotu neʼebé simu liman-rohan iha Izraél nia suku ida nia leet, sira tenke kaben deʼit ho mane husi sira-nia aman nia suku,+ atu nuneʼe ema Izraél bele kaer metin ba sira-nia beiʼala nia liman-rohan. 9 Ema Izraél nia liman-rohan labele muda husi suku ida ba suku seluk, tanba suku ida-idak iha Izraél tenke kaer metin ba sira-nia liman-rohan rasik.’”

10 Zelofead nia oan-feto sira halo tuir duni mandamentu neʼebé Jeová fó sai ona ba Moisés.+ 11 Entaun Zelofead nia oan-feto Mala, Tirza, Hogla, Milca no Noa,+ kaben ho mane sira husi sira-nia aman nia família. 12 Sira kaben ho mane sira husi família Manasés nian, atu nuneʼe sira-nia liman-rohan nafatin hela iha sira-nia aman nia suku. Manasés mak José nia oan-mane.

13 Jeová fó mandamentu no lei sira-neʼe ba ema Izraél liuhusi Moisés iha rai-tetuk maran Moab nian iha Mota Jordaun ninin besik Jerikó.+