Vizita ba rai-Brazíl

EMA neʼebé hela primeiru iha rai-Brazíl mak ema neʼebé halaʼo sira-nia moris hodi halibur deʼit ai-han husi natureza ka hodi kasa, no mós toʼos-naʼin sira. Kuandu ema Portugál tama iha rai neʼe, sira lori relijiaun Katólika Romana. Sira harii igreja no kapela barak iha rai neʼe no balu hafurak ho ai neʼebé ema bahat no taka ho osan-mean.

Hahú husi tinan 1.500 liu toʼo tinan 1.800 liu, ema lori atan sira hamutuk millaun haat husi rai-Áfrika toʼo rai-Brazíl hodi halo serbisu iha toʼos. Atan sira-neʼe lori mós sira-nia tradisaun, entaun ikusmai tradisaun sira-neʼe sai nuʼudar relijiaun ba ema Áfrika iha rai-Brazíl ho naran macumba no candomblé. Ita bele haree ema Áfrika nia kultura iha múzika Brazíl nian, dansa sira no mós sira-nia ai-han.

Hahán ida mak feijoada, neʼebé uluk mai husi Portugál. Hahán neʼe mak hanesan sopa ida neʼebé kahur ho naʼan no koto metan, no sopa neʼe baibain han hamutuk ho etu no modo sira seluk. Durante tinan 1.800 toʼo 1.900, ema rihun ba rihun husi rai-Europa (hanesan rai-Alemaña, Itália, Polónia, no España), rai-Japaun, no rai sira seluk muda hodi hela iha rai-Brazíl.

Ohin loron, iha rai-Brazíl iha Testemuña ba Jeová hamutuk naʼin-750.000 no iha kongregasaun hamutuk 11.000. Sira halaʼo estudu Bíblia hamutuk 800.000 liu. Entaun, atu bele harii reuniaun fatin sira iha rai-Brazíl hodi ema sira-neʼe uza, sira halo grupu konstrusaun nian hamutuk 31. Grupu sira-neʼe muda ba fatin oioin hodi halo serbisu hamutuk ho Testemuña sira iha fatin ida atu harii ka hadiʼa Reuniaun-Fatin, no sira hadiʼa ka harii Reuniaun-Fatin hamutuk 250 toʼo 300 tinan-tinan. Hahú husi fulan-Marsu tinan 2000, sira halo tiha ona projetu hanesan neʼe hamutuk 3.000 liu.