“Koordenadór neʼebé diʼak no belun neʼebé loos”
IRMAUN John (Jack) Barr, neʼebé serbí nuʼudar membru husi Grupu Administradór husi Testemuña ba Jeová, ramata ninia moris iha rai, iha 4 Dezembru 2010, iha loron-sábadu dadeer. Nia tinan 97. Ema barak koñese nia nuʼudar “koordenadór neʼebé diʼak no belun neʼebé loos”.
Irmaun Jack Barr moris iha Aberdeen, iha rai-Eskósia, oan-ikun husi maun-alin naʼin-tolu. Ninia inan-aman mós ema kose-mina. Kuandu irmaun Barr konta istória kona-ba tempu nia sei labarik, klaru katak nia hadomi nia família no hafolin duni ninia inan-aman nia ezemplu diʼak.
Kuandu nia tama tempu joven, irmaun Jack komesa sente katak susar tebes atu koʼalia ba ema neʼebé nia la koñese. Maibé, nia hakaʼas an atu manán hasoru problema neʼe. Entaun, iha loron-domingu ida iha tinan 1927, kuandu nia tinan 14, nia fó-hatene ninia aman katak agora nia prontu atu bá haklaken uma ba uma ho nia. Komesa husi tempu neʼebá toʼo nia mate, irmaun Barr sempre laran-manas atu haklaken lia-foun diʼak.
Loron ida, nia inan hetan asidente neʼebé halo nia besik atu mate, no ida-neʼe halo Jack hanoin kleʼan kona-ba saida mak nia sei halo ho nia moris. Nuneʼe, iha tinan 1929 nia dedika nia an ba Maromak Jeová, no ikusmai nia iha oportunidade atu hetan batizmu iha tinan 1934. Depois iha tinan 1939, nia komesa serbí hamutuk ho família Betel iha London, rai-Inglaterra. Husi tempu neʼebá, nia kontinua ninia serbisu ba tempu-tomak durante tinan 71.
Iha 29 Outubru 1960, irmaun Barr kaben ho irmán Mildred Willet, neʼebé ba tempu kleur serbí nuʼudar pioneiru no misionária neʼebé laran-manas. Irmaun Barr bolu nia relasaun ho nia feen nuʼudar “relasaun neʼebé espesiál no folin-boot tebes”. Ema koñese irmaun no irmán Barr nuʼudar kaben-naʼin neʼebé fó ezemplu diʼak, laran-metin ba malu toʼo irmán Mildred ramata nia moris iha rai, iha fulan-Outubru 2004. Irmaun no irmán Barr iha toman diʼak atu lee Bíblia hamutuk loron-loron.
Buat ida neʼebé irmaun-irmán sira hanoin-hetan kona-ba irmaun Jack Barr mak nia sempre fó konsellu diʼak. Nia sempre tetu didiʼak kuandu fó konsellu, hatoʼo ho laran-diʼak no nia sempre fó konsellu husi Bíblia. Nia halo serbisu ho badinas. Nuʼudar koordenadór, nia hatudu domin no laran-diʼak ba sira neʼebé serbisu hamutuk, no mós hatudu laran-metin ba ninia belun sira. Ninia komentáriu, diskursu, no orasaun hatudu katak nia hadomi lia-loos no hafolin ninia relasaun besik ho Maromak Jeová.
Maski ita sente triste katak ita-nia irmaun doben neʼe la hamutuk tan ho ita, maibé ita mós kontente katak nia simu ona moris rohan-laek iha lalehan, prezente furak ida neʼebé nia hein bá no hafolin tebes. No ida-neʼe mak nia sempre hakarak atu hetan.—Rom 2:6, 7.